1. Saara ki enkuru ei turukugenda kwecumitirizaho?

OBUKAIKURU n’obukaikuru bw’abantu kwehinguliriza ensi yoona, bamanyire kurungi esaara emanyire nk’eya Isiitwe, rundi eya Mukama Waitu. Ebigambo byombi bimanyisa esaara ey’eky’okurorraho Yesu Kristo wonyini ei yatuhaire. Eri saara enyakurumu amakuru maingi. Kucumitiriza ha bicweka by’ayo bisatu ebikubanza nikisobora kukukonyera kwega ebirukukiraho hali ebyo Baibuli eby’eyegesa.

2. Bintu ki ebisatu ebi Yesu y’ayegeseze abegeswa be kusabaga?

² Ha ntandikwa y’esaara enu Yesu akaragira abahuliriza be: “Musabege muti, Isitwe ali omu iguru, Ibara lyawe [l]yezebwe. Obukama bwawe buije. Ebyogonza bikorwe hansi nkoku babikora omu iguru.” (Matayo 6:9-13) Ebintu binu ebisatu Yesu ebi yabalizeho biina makuru ki?

3. Biki ebitukwetaaga kumanya ha Bukama bwa Ruhanga?

³ Twegere bingi ha bikwatiraine n’ibara lya Ruhanga, Yahwe. Tubalizeho na hali ebyo Ruhanga eby’agonza—eby’akozere n’eby’aliko’ra abaana b’abantu. Kyonka Yesu akaba nabaza ha ki obu yatugambire tusabe: “Obukama bwawe buije”? Obukama bwa Ruhanga nikyo kiki? Okwija kwabwo nikwija kweza kuta ibara lya Ruhanga? Kandi kwina kakwatiraine ki n’okukora Ruhanga eby’agonza?

4. Obukama bwa Ruhanga nikyo kiki, kandi Omukama wabwo nuwe oha?

⁴ Obukama bwa Ruhanga niyo gavumenti eyateirweho Yahwe Ruhanga kandi y’agikomera n’Omukama w’ayo. Omukama w’Obukama bwa Ruhanga nuwe oha? Nuwe Yesu Kristo. Yesu ali Mukama mukuru muno kukira abakama b’ensi boona kandi ayetwa “Omukama w’abakama, Omulemi wa banyoro.” (1 Timoseo 6:15) Aine obusobozi kukora ebirungi bingi kukira omulemi ondi wena ha nsi, gonze n’ogu akukirayo oburungi.

5. Obukama bwa Ruhanga bulisigikira nkaha, kandi bulirema baha?

⁵ Obukama bwa Ruhanga bulirema nibusigikira nkaha? Yesu ali nkaha hati? Noijuka obu wayegere ngu akahanikwa ha muti yaitwa, kandi yahumburwa. Hanyuma y’akasumi kake akatemba omuiguru. (Engeso 2:33) Nahabwekyo, oku nuho Obukama bwa Ruhanga buli—omuiguru. Nikyo Baibuli ebwetera ‘Obukama obw’omuiguru.’ (2 Timoseo 4:18) Obukama bwa Ruhanga n’oburaba buli omuiguru, nibwija kulema abali omu nsi.—Okusuku’rwa 11:15.

6, 7. Kiki ekifoora Yesu kuba Mukama murungi muno?

⁶ Kiki ekifoora Yesu kuba Mukama murungi muno? Obulyo obw’okubanza buli nti, uwe talifa. N’eyoleka omulingo Yesu akwahukana ha bakama b’ensi, Baibuli emweta “Nuwe anyina obutafa wenka, aikalire omu musana ogutarukui’rwa haihi.” (1 Timoseo 6:16) Kinu kikumanyisa ngu ebintu byoona ebirungi Yesu eby’alikora birigumaho. Kandi alikora ebintu eby’amaani kandi ebirungi.

⁷ Cumitiriza ha bunabbi bwa Baibuli bunu oburukukwata hali Yesu: ‘N’omwoyo gwa Mukama guliika’ra hali we, omwoyo ogw’amagezi n’okwetegereza, omwoyo gw’okuhanura n’amaani, omwoyo gw’okumanya n’ogw’okutiina Mukama; n’okusemererwa kwe kuliba omu kutiina Mukama: kandi talicwa emisango nahondera okurora kw’amaiso  ge, kunu taliramura nahondera okuhu’ra kw’amatuge: baitu n’okuhiki’ra nukwo alicwera abanaku, naramura eby’obulyo ha bw’abaculezi b’omu nsi.’ (Isaya 11:2-4) Ebigambo ebyo nibikyoleka ngu Yesu yakubaire Mukama ahikirire kandi w’embabazi n’alema abantu abali omu nsi. Wakugondeze kuba n’omulemi nk’ogu?

8. Nibaha abaliremera hamu na Yesu?

⁸ Haroho amananu agandi agarukukwata ha Bukama bwa Ruhanga. Yesu talirema wenka. Naija kuba n’abalirema nabo. Nk’eky’okurorraho omukwenda Paulo akagambira Timoseo: “Obutugumisiriza, kandi tuliremera hamu nkabakama.” (2 Timoseo 2:12) Ego, Paulo, Timoseo, n’abesigwa abandi abakomerwemu Ruhanga nibaija kulemera hamu na Yesu omu Bukama bw’omuiguru. Baingaha abaraba n’omugisa gunu?

9. Baingaha abaliremera hamu na Yesu, kandi Ruhanga akatandika ddi kubakoma?

⁹ Nkoku kyolekerwege omu Suura 7 ey’ekitabu kinu, omukwenda Yohana akolesebwa nambere yarolire “Omwana Gwentama [Yesu Kristo] gwemerire ha Rusozi Sayuni [ekikaro kye eky’Obukama obw’omiguru], kandi hamu nauwe akasirira mu bukumi buna mwenkumi ina, bayina ibaralye nibara lya Ise lihandikirwe ha buso bwabu.” 144,000 nibo baha? Yohana wonyini atugambira: “Nibo bakuratira Omwana Gwentama nambere agenda hona. Nibo baguzirwe omu bantu okuba ebyana ebyomuganuro hali Ruhanga, na hali Omwana Gwentama.” (Okusuku’rwa 14:1, 4) Ego, bali bakurasi ba Yesu Kristo abesigwa abakomerwemu omu mulingo ogw’embaganiza, kulemera hamu nawe omuiguru. Hanyuma y’okuhumburwa bakagenda omuiguru, “nibaija kulema ensi nk’abakama” hamu na Yesu. (Okusuku’rwa 5:10, NW) Kuruga omu busumi bw’abakwenda, Ruhanga aikaire n’akoma Abakristayo abesigwa nukwo aijuze omuhendo ogwo, 144,000.

10. Habwaki eri ntekaniza y’engonzi Yesu hamu na 144,000 kuba nibo balirema abantu?

¹⁰ Kututeraho Yesu hamu na 144,000 nibo baleme abaana  b’abantu kikorwa ky’engonzi. Yesu amanyire eki kimanyisa kuba omuntu kandi n’okubonabona. Paulo akagamba ngu Yesu ‘tali ogwo atarukusobora okusali’rwa hamu naitwe obwobugara bwaitu; baitu akohebwa omu byona nkaitwe, kyonka akaba atanyina ekibi.’ (Abaheburaniya 4:15; 5:8) Naabo abaralema hamu nauwe bakabonabona kandi b’agumisiriza bakyali bantu ha nsi. Okwongerezaho, baikaire nibarwanangana n’okutahiki’ra kandi bagumisiriza endwaire zoona ez’enyahukana. Mananu kwo, baija kuba nibetegereza ebizibu ebirukubonesa abantu.

11. Habwaki Yesu yagambire abegeswa be kusaba Ruhanga eby’agonza bikorwe omuiguru?

¹¹ Yesu obu yagambire abegeswa be basabe Obukama bwa Ruhanga bwije, akongerezaho ngu basabe eby’agonza bikorwe “hansi, nkoku babikora omu iguru.” Ruhanga ali omuiguru, oku eby’agonza bikaire nibikorwa abamaraika abesigwa. Kyonka omu Suura 3 ey’ekitabu kinu, tukega ngu maraika omubi akaleka kukora Ruhanga eby’agonza yaletera Adamu na Hawa kusiisa. Omu Suura 10, nitwija kwega ebirukukiraho Baibuli eby’eyegesa ha maraika onu omubi, ou tumanyire nka Setani Omuhangirizi. Setani n’abamaraika abandi abacwiremu kumweteranizaho—abetwa amasitani—bakaikirizibwa kwikara omuiguru habw’akacu. Kityo nu, boona abaali omuiguru bakaba batarukukora Ruhanga eby’agonza. Ekyo kikaba kiina kuhinduka Obukama bwa Ruhanga obu bwakutandikire kulema. Aho naho Yesu Kristo n’akyamara kukomwa nk’Omukama, akaba aina kurwanisa Setani.—Okusuku’rwa 12:7-9.

12. Bintu ki ebibiri ebikuru ebyolekerwe omu Kusuku’rwa 12:10?

¹² Ebigambo by’obunabbi bisoborra eky’akubaireho: “Nahu’ra iraka erihango omu iguru nirigamba ngu Hati bunu okujunwa kuizire, namani, nobukama bwa Ruhanga waitu, nobusobozi bwa Kristo we: baitu omulegi [Setani] wa bene baitu akanagwa, arukubalega omu maiso ga Ruhanga  waitu nyamusana nekiro.” (Okusuku’rwa 12:10) Omu nkaara za Baibuli ezo, oyetegereize ebintu bibiri ebikuru muno ebibaireho? Oky’okubanza, Obukama bwa Ruhanga nibwebemberwa Yesu Kristo nibutandika kulema. Eky’akabiri, Setani abingirwe omuiguru yanagwa ha nsi.

13. Bintu ki ebibiri ebirugiremu Setani obw’abingirwe omuiguru?

¹³ Bintu ki ebirugire omu byabaireho? Ha bikwatiraine n’ebyabaireho omuiguru tusoma tuti: “Nukwo musemererwe iguru nabarukuikaramu.” (Okusuku’rwa 12:12) Ego, bamaraika abesigwa omuiguru bakasemererwa habwokuba buli omu omuiguru akaba ali mwesigwa hali Yahwe Ruhanga, Setani n’amasitani ge bamazire kubingwayo. Hati haliyo obusinge bwonyini hamu n’obumu. Ruhanga eby’agonza nibikorwa omuiguru.

14. Biki ebirugiremu Setani obw’anagirwe ha nsi?

¹⁴ Baitu kandi kiki ekihikire ha nsi? Baibuli negamba: “Ziribona ensi nenyanja: baitu Diabolo asirimukire halinywe ayina ekiniga kingi, baitu aboine ngu ayina akacu kake.” (Okusuku’rwa 12:12) Setani aina ekiniga kingi habw’okubingwa omuiguru kandi asigaize akacu kake. Habw’ekiniga kye, narumya, kandi ‘nabonabonesa’ abali ha nsi. Nitwija kwega ebirukukiraho ha bikwatiraine ‘n’okubonabona’ okwo omu suura arahonderaho. Tumazire kwetegereza ebyo, nitusobora kwekaguza, Obukama bunu nibusobora kuletera buta Ruhanga eby’agonza kukorwa ha nsi?

15. Ekigendererwa kya Ruhanga hali ensi nikyo kiraha?

¹⁵ Ijuka ekigendererwa kya Ruhanga hali ensi eki wayegereho omu Suura 3. Omu Adeni, Ruhanga akakyoleka ngu ekigendererwa kye kiri, ensi yoona ebe rugonjo rwe orwijwire abantu abatakufa, bahikirire. Setani akaletera Adamu na Hawa kusiisa, ekyo kiina eki kyakozire ha kuhikirizibwa kw’ekigendererwa kya Ruhanga omu nsi, kyonka kitakihindule. Ekigendererwa kya Ruhanga kikyali; “abahikirire baligwetwa ensi, baragiikaramuga ebiro nebiro.” (Zabuli 37:29) Obukama bwa Ruhanga bukugenda kukihikiriza. Omu mulingo ki?

16, 17. Danieri 2:44 rutugambira ki ha Bukama bwa Ruhanga?

 ¹⁶ Cumitiriza ha bunabbi obuli omu Danieri 2:44. Bugamba: “Kandi omu biro ebyabakama abo Ruhanga owomu iguru aliimukya obukama, obutalihwerekerezebwa ebiro byona, nobukwakuba okulema kwabwo tikulisigirwa ihanga erindi; baitu bulicwacwana nubumaraho obukama obu bwona, kandi buligumaho ebiro nebiro.” Kinu nikitumanyisa ki ha Bukama bwa Ruhanga?

¹⁷ Eky’okubanza, obunabbi obwo butwoleka ngu Obukama bwa Ruhanga bukaba bwina kutekwaho “omu biro ebyabakama abo,” rundi Obukama obundi nibukyaroho. Eky’akabiri, rukutwoleka ngu Obukama obu buligumaho ebiro n’ebiro. Tibuulisingurwa n’obukwakuba obulemi obundi kugaruka omu kikaro ky’abwo. Eky’akasatu, niturora ngu halibaho obulemu hagati y’Obukama bwa Ruhanga n’obulemi bw’abantu. Obukama bwa Ruhanga bwija kusingura. Ha mpero y’abyoona, nubwo bulemi bwoonka oburukwija kuba nibulema abantu. Obwo nu abantu nibaija kwegondeza omu bulemi oburungi muno obu bakaba batakegondezamuga.

18. Obulemu obw’empero hagati y’Obukama bwa Ruhanga n’agavumenti z’abantu bukwetwa buta?

¹⁸ Baibuli ina bingi eby’ebaza ha bulemu obu obw’empero hagati y’Obukama bwa Ruhanga n’agavumenti z’ensi enu. Nk’eky’okurorraho, etwegesa ngu empero n’eyeyongeraga kwirirra, emyoyo emibi, nubo badaimoni balirarangya ebisuba nibabihabiha ‘abakama b’ensi yoona.’ Baina kigendererwa ki? “Okubasoroza [abakama] hamu hali obulemu obw’ekiro ekikuru ekya Ruhanga w’Obusobozi bwoona.” Abakama b’ensi balisorozebwa “omu kiikaro ekikwetwa omu Ruheburaniya, Hara-Magedoni.” (Okusuku’rwa 16:14, 16) Habw’ebyo ebigambirwe omu nkaara ezo ibiri, okuramaga okwa h’ampero okulibaho hagati ya gavumenti z’abantu n’Obukama bwa Ruhanga nikwetwa Hara-Magedoni rundi Amagedoni.

19, 20. Bintu ki ebirukulemesa Ruhanga eby’agonza kuba nibikorwa omu nsi hati?

 ¹⁹ Obukama bwa Ruhanga kuraba omu Hara-Magedoni burahikiriza ki? Garukamu ocumitirize ha kigendererwa kya Ruhanga hali ensi. Ekigendererwa kya Yahwe Ruhanga kiri, ensi ijule abantu abarungi, abahikirire abakumuhereza omu rugonjo rwe. Kiki ekikukiremesa kukorwa hati? Oky’okubanza, tuli basiisi, turwara kandi tufa. Tukega omu Suura 5, ngu Yesu akatufera nukwo twomere ebiro n’ebiro. Nosobora kuba noijuka n’ebigambo ebiri omu Njiri ya Yohana: “Baitu Ruhanga nukwo yagondeze ati Ensi, nahayo Omwana we ayazairwe omu wenka, omuntu wena anyakumuikiriza aleke okubura, baitu atunge obwomezi obutahwaho.”—Yohana 3:16.

²⁰ Ekizibu ekindi kiri nti abantu baingi nibakora ebintu ebibi muno. Nibabiha, nibagobeza kandi nibakora eby’obusihani. Tibarukugonza kukora Ruhanga eby’agonza. Abantu abakora ebintu ebibi muno balihwerekerezebwa omu bulemu bwa Ruhanga obwa Hara-Magedoni. (Zabuli 37:10) Kyonka obulyo obundi habwaki Ruhanga eby’agonza tibikukorwa ha nsi buli, gavumenti tizikutamu abantu amaani kubikora. Gavumenti nyingi zibaire nceke, z’omwaga rundi ngobya. Baibuli ebaza bbwa ngu: “Haroho akasumi omuntu omu obwaba nobusobozi okukora kubi omuntu ondi.”—Omugambizi 8:9.

21. Obukama buliretera buta Ruhanga eby’agonza kukorwa ha nsi?

²¹ Hanyuma ya Hara-Magedoni, abantu nibaija kuba hansi ya gavumenti emu yonka, Obukama bwa Ruhanga. Obukama obwo bulikora Ruhanga eby’agonza kandi bulireta emigisa nyingi. Nk’eky’okurorraho, bulihaho Setani n’abadaimoni be. (Okusuku’rwa 20:1-3) Okuraba omu maani g’ekihongwa kya Yesu abantu abesigwa baliba batakyarwara n’obukwakuba kufa. Hansi y’Obukama bwa Ruhanga, abantu b’alyomera ebiro n’ebiro. (Okusuku’rwa 22:1-3) Ensi erifoka rugonjo rwa Ruhanga. Omu mulingo ogu Obukama buliretera Ruhanga eby’agonza kukorwa omu nsi kandi  bulyeza ibara lya Ruhanga. Kinu nikimanyisa ki? Nikimanyisa ngu mporampora, hansi y’Obukama bwa Ruhanga abantu boona balyeza ibara lya Yahwe.

22. Tumanya tuta ngu Obukama bwa Ruhanga butaije Yesu akyali ha nsi rundi aho naho amazire kuhumbuka?

²² Yesu obu yagambire abakurasi be kusaba ngu “Obukama bwabwe buije,” ky’amananu Obukama bwali butakaizire. Yesu obu yagenzere omuiguru bukaiziraho? Nangwa, habwokuba Petero na Paulo bakagamba ngu Yesu amazire kuhumbuka, obunabbi obuli omu Zabuli 110:1, bukahikirizibwa omuli we: “Mukama agambira Mukama wange ati ika’ra ha mukono gwange ogwobulyo, okuhikya obundifora abanyanzigwa bawe akatebe kebigere byawe.” (Engeso 2:32-35; Abaheburaniya 10:12, 13) Hakabaho akasumi k’okulinda.

23. (a) Obukama bwa Ruhanga bukatandika ddi kulema? (b) Kiki ekirabazibwaho omu suura ekugarukaho?

²³ Okulindii’ra kwakumazire kasumi ki? Omu kyasa kya 19 n’ekya 20, abeegi ba Baibuli abesigwa bakagenda nibakyetegereza ngu okulindii’ra okwo kwakugarukire omu 1914. (Ha bikwatiraine n’ekiro kinu rora Ebyongirweho, “1914—Mwaka Mukuru Muno omu Bunabbi bwa  Baibuli.”) Ebintu ebizire nibibaho omu nsi yoona kuruga 1914 bikugumya okwetegereza kw’abegi ba Baibuli kunu ngu kuhikire. Okuhiki’ra kw’obunabbi bwa Baibuli kukwoleka ngu omu 1914, Kristo akafooka Mukama kandi akatandika kulema omu Bukama bwa Ruhanga omuiguru. Nahabwekyo, tuli omu “akacu kake” Setani akasigaizeyo. (Okusuku’rwa 12:12; Zabuli 110:2) Hati nitusobora kubaza nitukigumya ngu omu kasumi kataito muno Obukama bwa Ruhanga nibwija kuletera Ruhanga eby’agonza bikorwe ha nsi. Ganu tigali makuru marungi? Noikiriza ngu g’amananu? Esuura ekugarukaho nija kukukonyera kwetegereza ngu mali ebintu binu Baibuli ebyegesa.