1. Муқәддәс Китаптики һәқиқәт тоғрисида көпирәк билим елишиңизға немә ярдәм бериду?

ҺӘЗРИТИ Әйсаниң шагиртлири униңдин қандақ дуа қилишни сориғанда, у бир үлгилик дуани уларға үгәткән. Мошу дуа чоңқур мәнаға егә, униң үч тиләкни мулаһизә қилиш, сизниң Муқәддәс Китап зади немә һәқиқәтни үгитидиғанлиғи тоғрисида көпирәк билим елишиңизға ярдәм бериду.

2. Әйса шагиртлириға қайси үч тиләк тоғрисида дуа қилишни үгәткән?

² Шу үлгилик дуаниң башлинишида, Әйса өзиниң аңлиғучилириға мундақ дуа қилиңлар дәп үгәткән: “Әй асмандики Атимиз, Сениң намиң улуқланғай. Падишалиғиң йәр йүзидә намайән болғай. Ирадәң асмандикидәк йәр йүзидиму әмәлгә ашурулғай” (Мәтта 6:9—13). Немә үчүн Әйса үлгилик дуада шу үч тиләкни тилигән?

3. Худа Падишалиғи тоғрисида биз немиләрни билишимиз керәк?

³ Биз аллиқачан Худаниң хас исми: Йәһвә, тоғрисида көп үгинип өттуқ. Һәм биз униң ирадиси тоғрисидики бәзи мәлуматларни, болупму өтмүштә у инсанлар үчүн немә қилғанлиғи вә кәлгүсидә немә қилидиғанлиғини мулаһизә қилған едуқ. Амма, Әйса дуга қилишни үгәткәндә немини көздә тутуп: “Падишалиғиң... намайән болғай” дәп тиләшни ейтқан? Худа Падишалиғи дегән немә? Падишалиғиниң келиши қандақ қилип Худаниң исмини муқәддәс қилиду? Һәм Падишалиғиниң келиши билән Худаниң ирадисиниң әмәлгә ешиши оттурисида қандақ мунасивәт бар?

4. Худаниң Падишалиғи дегән немә? Падишалиғиниң Падишаси ким?

⁴ Худа Падишалиғи, Тәңри Йәһвә тәрипидин қурулған бир һөкүмәт болуп униң Падишасини Худа өзи таллиған. Ким Худа Падишалиғиниң Падишаси? Әйса Мәсиһ. Падиша сүпитидә Әйса бу дуниядики һәммә һакимийәт жүргүзидиған адәмләрдин улуқ, шуңа Муқәддәс Китапта: “Падишаларниң Падишаси” дәп тилға елинған (Тимотийға 1-хәт 6:15). Һәр қандақ һакимийәт жүргүзгүчи, һәтта улар арисидики әң яхшисиға қариғанда Мәсиһ Әйса бизгә зор бәхит-саадәт елип келидиған ишларни қилиш күч-қудритигә егә.

5. Худа Падишалиғи қәйәрдә? Вә кимләр үстидин һакимийәт жүргүзиду?

⁵ Худа Падишалиғи қәйәрдә һакимийәт жүргүзиду? Ундақта, Әйса қәйәрдә? Сизниң есиңизда болса, Әйса түврүк яғачқа михлинип өлтүрүлгәндин кейин, Худа уни өлүмдин тирилдүргән вә қисқа вақиттин кейин, у асманға чиқип кәткән (Әлчиләр 2:33). Демәк, Худа Падишалиғи асманда орунлашқан. Шуниң үчүн Муқәддәс Китап: уни “асмандики... Падишалиқ” дәп атайду (Тимотийға 2-хәт 4:18). Гәрчә Худа Падишалиғи асманда болсиму, у кәлгүсидә йәр йүзидики инсанлар үстидин һакимийәт жүргүзиду (Вәһийләр 11:15).

6, 7. Немә үчүн Әйса әң яхши Падиша?

⁶ Немә үчүн Әйса әң яхши Падиша? Биринчи сәвәп, Әйса мәңгү өлмәйду. Муқәддәс Китап Мәсиһни бу дуния падишалири билән селиштуруп мундақ дегән: “Мәңгү өлмәс, адәм йеқинлишалмайдиған нур ичидә яшайдиған” (Тимотийға 1-хәт 6:16). Демәк, кәлгүсидә Әйса җәзмән инсанлар үчүн пайдилиқ ишларни мәңгү қилиду.

⁷ Қени биз Муқәддәс Китапниң Мәсиһ тоғрисида ейтқан бешаритини ойлап көрәйли: “Муниң үстигә Худавәндиниң роһи назил болуп һекмәт вә пәмниң роһи, мәслиһәт вә қувәтниң роһи, мәрипәт вә Худавәндиниң қорқунчисиниң роһи үстидә сакин болур [турар]. Худавәндиниң қорқунчиси билән униң хуш ризайи [разилиғи] болуп өзи көзлириниң көргинигә мувапиқ һөкүм қилмас вәйа қулақлириниң аңлиғиниға мувапиқ итап қилмас [әйиплимәс], бәлки пеқирларға адаләт билән һөкүм қилип йәрниң мискинлирини инсап билән” әйипләйдур (Йәшая 11:2—4). Мошу бешарәт Әйса Мәсиһниң вәдә қилинған, йәр йүзидики хәлиқләргә ғәмхорлуқ қилидиған һәққаний  Падиша екәнлигини көрситиду. Мошундақ бир һөкүмдарниң болушини халамсиз?

8. Әйса билән кимләр бирликтә башқуриду?

⁸ Бу йәрдә Худа Падишалиғи тоғрисида йәнә бир һәқиқәт бар: Әйса өзи ялғуз һакимийәт жүргүзмәйду, у башқилар билән бирликтә һакимийәт жүргүзиду. Мәсилән, әлчи Павлус Тимотийға: “Қийинчилиқларға бәрдашлиқ бәрсәк, Униң билән биллә һөкүм сүримиз” дегән (Тимотийға 2-хәт 2:12). Пәрвәрдигар Йәһвә Павлус, Тимотий вә башқа садақәтмән кишиләрни Әйса билән бирликтә асмандики падишалиқта һакимийәт жүргүзүш үчүн таллавалған. Шу имтиязға егә болғанларниң сани қанчә?

9. Әйса билән бирликтә һакимийәт жүргүзидиғанларниң сани қанчә? Худа қачан уларни таллашни башлиған?

⁹ Мошу китапниң 7-бабида көрситилгәндәк, Мәсиһниң шагирти Юһанна мундақ бир көрүнүшни көргән: “Андин Қозиниң Сион теғи үстидә турғанлиғини көрдүм. Униң йенида пешанисигә Қозиниң вә Униң Атисиниң исми йезилған 144 000 киши бар еди”. Шу 144 000 киши кимләр? Юһанна өзи бизгә: “Қоза нәгә барса, уларму Униңға әгишип шу йәргә бариду. Улар инсанлар арисидин... қутқузувелинғанлар болуп,.. Худаға вә Қозиға аталғанлардур” дәйду (Вәһийләр 14:1, 4). Улар Мәсиһниң садақәтмән әгәшкүчилири болуп Мәсиһ билән бирликтә асманда һакимийәт жүргүзүш үчүн алаһидә талланған. Улар өлүмдин асмандики һаятлиққа тирилдүрүлгәндин кейин, Әйса билән биргә йәр йүзи үстидин һакимийәт жүргүзиду (Вәһийләр 5:10). Милади 33-жили Йәһвә Худа садақәтмән етиқатчиларни таллашни башлиған болуп, уларниң сани 144 000 ға толғичә таллайду.

10. Немә үчүн Худаниң, Мәсиһ Әйса вә 144 000 кишини инсанийәт үстидин һакимийәт жүргүзүшкә қоюши, униң инсанларға болған чоңқур меһир-муһәббитини ипадиләш усули дәймиз?

¹⁰ “Худаниң, Мәсиһ Әйса вә 144 000 кишини инсанийәт үстидин һакимийәт жүргүзүшкә қоюши униң инсанларға болған чоңқур меһир-муһәббитини ипадиләшниң усулидур. Биринчидин, Әйса инсанларниң қандақ азап-оқубәт чекидиғанлиғини билиду. Әйса Мәсиһ һәққидә әлчи Павлус: “Аҗизлиқлиримизға һисдашлиқ қилмай қалмайду. Уму бизгә охшаш һәр хил синақларға дуч кәлгән, лекин гуна қилип бақмиғандур” дәп ейтқан (Ибранийлар 4:15; 5:8). Иккинчидин, Мәсиһ  билән биллә һакимийәт жүргүзидиғанларму йәр йүзидә яшиған вақтида көп азап-оқубәтләрни бешидин кәчүргән. Улар мукәммәлсизлик билән күрәш қилған вә һәр хил кесәллик азаплириға дучар болған. Шуңа, улар инсанларниң дучар болидиған һәр хил мәсилилирини әлвәттә чүшиниду.

11. Немә үчүн Әйса шагиртлириға Худаниң ирадисиниң асманда әмәлгә ешиши үчүн өз дугалирида тиләш керәклигини ейтқан?

¹¹ Әйса өз шагиртлириға Худа Падишалиғиниң келиши үчүн дуа қилиш керәклигини ейтқан вақтида, у йәнә Худаниң ирадисиниң әмәлгә ешиши үчүн улар өз дуасида: “Ирадәң асмандикидәк йәр йүзидиму әмәлгә ашурулғай” дәп Худадин тиләш керәклигини ейтқан. Худа асманда вә униң ирадиси һәр дайим садақәтмән пәриштәләр тәрипидин асманда орунлинип кәлгән. Шундақ болсиму биз мошу китапниң 3-бабида үгинип өткәндәк, бир яман нийәтлик пәриштәниң Худаниң ирадисиниң әмәлгә ешишини тохтитип, Адәм ата билән Һава аниниң гунакар болушиға сәвәпчи болған. Биз йәнә мошу китапниң 10-бабида, биз билидиған Шәйтан Иблис дәп аталған шу яман нийәтлик пәриштә тоғрисида Муқәддәс Китап бизгә қандақ тәлимләрни беридиғанлиғини үгинимиз. Шәйтан вә униңға әгишишни таллиған җинлар дәп аталған, башлинишида пәриштә сүпитидә яритилған роһий яратмиларниң бир мәзгил асманда турушиға рухсәт қилинған. Шуңлашқа, асмандики периштәләрниң бәзилири шу вақитниң өзидә Худаниң ирадисиниң әмәлгә ешиши үчүн хизмәт қилмиған. Шуңа, асмандики начар әһвални өзгәртиш үчүн Худа Падишалиғи һакимийәт жүргүзүшкә башлиғанда йеңидин тәхткә олтарған Падиша Әйса Шәйтанға қарши җәң башлиди (Вәһийләр 12:7—9).

12. Муқәддәс Китапниң Вәһийләр 12-бап 10-айитидә қайси наһайити муһим икки вәқиә тәсвирләнгән?

¹² Төвәндә немә иш йүз беридиғанлиғи һәққидә Муқәддәс Китапта мундақ тәсвирләнгән: “Асманда жараңлиқ бир авазниң мундақ дегәнлигини аңлидим: «Худайимизниң ниҗатлиғи, қудрити, падишалиғи вә У тайинлиған Мәсиһниң һоқуқи намайән болди. Чүнки Худайимизниң алдида қериндашлиримизни кечә-күндүз әйиплигүчи асмандин ташлаветилди»” (Вәһийләр 12:10). Сиз Муқәддәс Китаптики айәттә тәсвирләнгән  наһайити муһим икки вәқиәгә диққәт қилдиңизмикин? Биринчи, Худаниң Падишалиғи Мәсиһ Әйсаниң башчилиғида һакимийәт жүргүзүшни башлиған. Иккинчи, Шәйтан асмандин йәр йүзигә ташланған.

13. Шәйтанниң асмандин қоғлиниши қандақ нәтиҗә елип кәлди?

¹³ Мошу муһим икки вақиәниң нәтиҗиси қандақ болди? Нәтиҗидә асманда немә иш йүз бәргәнлиги тоғрисида биз оқуп бақайли: “Шуниң үчүн, әй асман вә асманда яшиғучилар, хошал болуңлар!” (Вәһийләр 12:12). Шундақ, асмандики садақәтмән пәриштәләр һазир наһайити хошал, чүнки Шәйтан вә униңға әгишип яман йолға маңған җинлар дәп аталған яман пәриштәләр асмандин қоғлинип йәргә ташланди. Һазир асмандикиләрниң һәммиси Тәңри Йәһвәгә садақәтмән болғанлардур. Асман пүтүнләй тинич болуп иттипақлиқни бузидиғанлар йоқ болди. Һазир Худаниң ирадиси асманда әмәлгә ашурулуп болди.

14. Шәйтан йәр йүзигә қоғлап чүшүрүлгәнлик сәвәптин немә ишлар йүз бәрди?

¹⁴ Лекин йәр шари қандақ болди? Муқәддәс Китап: “Вай, әй йәр вә деңизлар! Чүнки иблис үстүңларға ташланди” дәйду (Вәһийләр 12:12). Шәйтан асмандин қоғланғанлиғи вә өзиниң вақит-саатиниң аз қалғанлиғини билип наһайити аччиқ ғәзәпләнди. Униң аччиқ ғәзиви һәр хил ечинишлиқ күлпәтләрни вә “вай”, дәрт-пәриятларни йәр йүзидә пәйда қилди. Биз Шәйтан пәйда қилған шу “вай”, дәрт-пәриятлар тоғрисида кейинки бапта үгинимиз. Ундақта, Худа Падишалиғи кәлгүсидә Худаниң ирадисини йәр йүзидә қандақ әмәлгә ашуриду?

15. Худаниң йәр шариға болған ирадиси қандақ?

¹⁵ Биз мошу китапниң 3-бабида Тәңри Йәһвәниң йәр шариға болған ирадиси тоғрисида үгинип өткән. Сизниң есиңиздиму Худаниң йәр шариға болған ирадиси қандақ? Худа Ерәм беғида көрсәткәндәк, җәннәтниң өлмәй мәңгү яшайдиған һәққаний инсанлар билән толуши униң йәр шариға болған ирадиси еди. Шәйтан Адәм ата билән Һава аниниң гуна қилишиға сәвәпчи болған. Шундақ қилип, шу гуна Худаниң йәр шариға болған ирадисиниң әмәлгә ешишиға тәсир көрсәткән. Бирақ, Худаниң йәр шариға болған ирадисини өзгәртиветәлгини йоқ. Йәһвә Худа һазирму һәм шуни мәхсәт қилғанки: “Адиллар өзи йәргә варис болуп әбәдкичә унда [у йәрдә] олтурар”  (Зәбур 37:29). Худаниң Падишалиғи кәлгүсидә Худаниң әсли ирадисини әмәлгә ашуриду. Ундақта қандақ әмәлгә ашуриду?

16, 17. Муқәддәс Китаптики Даниял 2-бап 44-айәт Худа Падишалиғи тоғрисида бизгә немә ейтип бериду?

¹⁶ Муқәддәс Китаптики Даниял пәйғәмбәрниң алдин ейтқан бешаритини мулаһизә қилип бақайли. Даниял 2-бап 44-айәт: “Бу падишаларниң күнлиридә асманларниң тәңриси әбәдкичә йоқалмайдиған бир падишалиқни қурадур. У падишалиқниң һөкүмити башқа бир хәлиққә берилмәйду амма у өзи шу һәммә падишалиқларни сундуруп йоқитип өзи әбәдкичә сабит [тәврәнмәй] қаладур” дәйду. Бу бизгә Худа Падишалиғи тоғрисида немә ейтип бериду?

¹⁷ Бу бешарәт бизгә төвәндикидәк һәқиқәтләрни ейтип бериду. Биринчи, Худа Падишалиғи шу “падишаларниң күнлиридә” қурилиду, йәни шу вақитта дуниядики башқа падишалиқлар йәнила мәвҗут болуп туриду. Иккинчи, Худа Падишалиғи мәңгү давам қилиду. Худа Падишалиғини башқа һәр қандақ һөкүмәт бойсундуралмайду вә униң орнини алалмайду. Үчинчи, биз Худа Падишалиғи билән дуниядики башқа падишалиқлар оттурисида җәң болидиғанлиғини көримиз. Худа Падишалиғи ғәлибә қилиду. Әң ахирида, Худа Падишалиғи инсанлар үстидин һакимийәт жүргүзидиған бирдин-бир ялғуз һөкүмәт болиду. Шу чағда, инсанлар шу әң яхши һөкүмранлиқ елип кәлгән бәхит-саадәттин бәһримән болуп хошаллиққа чөмүшиду.

18. Худа Падишалиғи билән бу дуниядики һөкүмәтләр оттурисида болидиған әң ахирқи җәң немә дәп аталған?

¹⁸ Худа Падишалиғи билән бу дуниядики һөкүмәтләр оттурисидики әң ахирқи җәң тоғрисида Муқәддәс Китап көп мәлуматларни ейтип бериду. Мәсилән, әң ахирқи җәң болушқа вақит аз қалғансери яман роһлар “пүтүн дуниядики падишаларни” ялғанни тарқитип уларни аздуриду. Немә мәхсәттә шундақ қилиду? “Һәммигә қадир Худаниң улуқ күнидики җәңгә топлашқа кетивататти” вә йәр йүзидики падишалар һәммиси “ибранийчә «Армагедон» дейилидиған йәргә топлиди” (Вәһийләр 16:14, 16). Мошу икки айәт, Худа Падишалиғи билән бу дуниядики һөкүмәтләр оттурисида болидиған әң ахирқи җәңниң Армагедон уруши дәп аталғанлиғини баян қилиду.

19, 20. Худаниң ирадиси немә үчүн һазир йәр йүзидә әмәлгә ашмайватиду?

 ¹⁹ Худа Падишалиғи Армагедон уруши арқилиқ қайси ишни әмәлгә ашуриду? Биз Худаниң йәр шариға болған ирадисини йәнә бир қетим әсләп көрәйли. Пәрвәрдигар Йәһвә йәр йүзидики җәннәтниң һәққаний, мукәммәл ибадәт қилғучи инсанлар билән толушини ирадә қилған. Ундақта, немә үчүн униң шу ирадиси һазир йәр йүзидә әмәлгә ашмиди? Биринчидин, биз инсанлар гунакар, биз кесәл болуп өлимиз. Бирақ, биз мошу китапниң 5-бабида, Әйса Мәсиһниң биз үчүн өзини қурван қилғанлиғи сәвәплик биздә мәңгү яшаш мүмкинчилиги бар дәп үгәнгән. Биз Юһанна баян қилған хуш хәвәрдә хатириләнгән мону айәтни әсләп бақайли: “Чүнки Худа дуниядики инсанларни шу қәдәр сөйдики, Өзиниң бирдин-бир ялғуз Оғлиға ишәнгән һәр бир киши һалак болмай, мәңгүлүк һаятқа еришиши үчүн, Уни қурван болушқа әвәтип бәрди” (Юһанна 3:16).

²⁰ Худаниң ирадисиниң йәр йүзидә техи әмәлгә ашмайватқанлиғиниң йәнә бир сәвәви: нурғун кишиләр рәзил ишларни қилип, ялған сөзләп, адәмләрни алдап, дуния инсан қелипидин чиққан әхлақсизлиқлар билән толди. Улар Худаниң ирадисиниң әмәлгә ешишини халимайду. Худа барлиқ рәзил ишларни қилғанларни өз уруши Армагедон мәзгилидә һалак қилиду (Зәбур 37:10). Йәр йүзидики һөкүмәтләр күчсиз, шәпқәтсиз болуп, кишиләрни Худаниң ирадисиниң әмәлгә ешиши үчүн хизмәт қилишқа илһамландурмайду. Бу немә үчүн һазир Худаниң ирадисиниң йәр йүзидә әмәлгә ашмайватқанлиғиниң йәнә башқа бир сәвәвидур. Муқәддәс Китап ениқ қилип: “Бир адәм йәнә бир адәмниң үстигә күчлүк келип униңға зәрәр [зиян] йәткүзгән” дәйду (Вәз 8:9).

21. Худа Падишалиғи, Худаниң ирадисини йәр йүзидә қандақ әмәлгә ашуриду?

²¹ Армагедон урушидин кейин инсанлар пәқәт бирла һөкүмәтниң башқуруши астида болиду. У болсиму Худа Падишалиғидур. Шу падишалиқ Худаниң ирадисини әмәлгә ашуриду вә әҗайип бәхит-саадәтләрни елип келиду. Мәсилән, у падишалиқ Шәйтан вә униң җинлириниң тәсирини йоқ қилиду (Вәһийләр 20:1—3). Худа Падишалиғиниң башқуруши астида Әйса Мәсиһниң төләм қурванлиғиниң күчи арқисида садақәтмән кишиләр йәнә кесәл болуп өлүп кәтмәйду. Әксичә, мәңгү яшалайду (Вәһийләр 22:1—3). Кәлгүсидә йәр шари бир гөзәл җәннәт  маканиға айлиниду. Шундақ қилип Худа Падишалиғи йәр йүзидә Худаниң ирадисини әмәлгә ашуриду вә униң исмини муқәддәс қилиду. Бу немә дегән сөз? Бу дегинимиз әң ахирда Худа Падишалиғиниң башқуруши астида болған һәр бир тирик җан, Йәһвә дегән исимни һөрмәтләйду.

22. Әйса йәр йүзидә болған вақитта яки тирилдүрүлүп асманға чиқип кәткәндин кейин, Худа Падишалиғи дәрһал йетип кәлмигәнлигини қандақ билимиз?

²² Әйса өз әгәшкүчилиригә: “Падишалиғиң... намайән болғай” дәп дуа қилишни ейтқан. Шуңа бу наһайити ениқки, Худа Падишалиғи шу вақитниң өзидә кәлмигән. Худа Падишалиғи Әйса Мәсиһ асманға қайтқанда кәлгәнму? Яқ. Әлчи Петрус вә Павлуслар ейтқандәк, Әйса тирилдүрүлгәндин кейин, Зәбур 110-бап 1-айәттә хатириләнгән: Йәһвә Худа Давутниң хоҗайиниға сөзләп, “Мән Сениң дүшмәнлириңни айиғиң астида дәссәткүчә, Мениң оң йенимда олтарғин” дегән бешарәт Мәсиһ Әйсада әмәлгә ашти (Әлчиләр 2:32—35; Ибранийлар 10:12, 13). Мошуниңдин көрүвалалаймизки, Худа Падишалиғиниң келиши үчүн Мәсиһ бир мәзгил сақлиши керәк болған.

23. а) Худаниң Падишалиғи қачан һакимийәт жүргүзүшкә башлиди? ә) Кейинки бап немә тоғрисида мулаһизә қилиду?

²³ Қанчилик узақ вақит сақлаш керәк? 19-әсирниң ахири 20-әсирниң дәсләпки мәзгилидә, Муқәддәс Китапниң әстаидил үгәнгүчилири мошу сақлаш вақтиниң 1914-жили ахирлишидиғанлиғини алдинала тонуп йәткән (Мошу тоғрисидики тәпсилий мәлуматлар “1914-жили Муқәддәс Китап бешаритидики муһим жил” намлиқ қошумчә изаһатта берилди). 1914-жилидин башлап, дунияда нурғун чоң ишларниң  тохтимай йүз бериши Муқәддәс Китап үгәнгүчилириниң шу бешарәтни тоғра чүшинип йәткәнлигини испатлиди. Муқәддәс Китапниң алдин ейтқан бешаритиниң 1914-жили әмәлгә ешиши, Әйса Мәсиһниң Падиша болғанлиғини вә Худаниң асмандики падишалиғиниң һакимийәт жүргүзүшни башлиғанлиғини көрсәтти. Шуңа, биз Шәйтанниң “вақтиниң аз” қалған мошу һалқилиқ дәвирдә яшаватимиз (Вәһийләр 12:12; Зәбур 110:2). Бизму шуни ишәшлик ейталаймизки, пат-арида Худа Падишалиғи, Худаниң ирадисини йәр йүзидә әмәлгә ашурушқа тездин һәрикәт қилиду. Бу әҗайип һәйран қаларлиқ хуш хәвәр әмәсму?! Пат-арида Худа Падишалиғи, Худаниң ирадисини йәр йүзидә әмәлгә ашурушқа тездин һәрикәт қилидиғанлиғиға ишинәмсиз? Кейинки бап, сизниң Муқәддәс Китап һәқиқәтән мошу ишлар тоғрисида үгүтидиғанлиғини чүшинишиңизгә ярдәм бериду.