1. Ohutililo yipi ya kũlĩhĩwa calua tuka konomuisa?

 OMANU valua voluali va kũlĩha Ohutililo ya Isietu. Vamue va yi tukula hati, Ohutililo ya Ñala. Ohutililo yaco yina Yesu Kristu a longisile kolondonge viaye. Olondaka vi sangiwa vohutililo yaco, vi kuete esilivilo liocili. Oku konomuisa ovina vitatu via tukuiwa tete vohutililo eyi, cika ku kuatisa oku kũlĩha ciwa eci Embimbiliya li longisa.

2. Ovina vipi vitatu Yesu a vetiya olondonge viaye oku vi pinga vohutililo?

² Kefetikilo liohutililo eyi, Yesu wa longisa olondonge viaye hati: “Likutilili ndeci, hoti, A Isietu o kasi kilu. Onduko yove yi sumbiwe. Usoma wove wiye. Ocipango cove ci lingiwe posi ndeci ci lingiwa kilu.” (Mateo 6:9-13) Apingilo atatu a tukuiwa ndeti vohutililo eyi, a lomboloka nye?

3. Nye tu sukila oku kũlĩha catiamẽla Kusoma wa Suku?

³ Etu tua lilongisa ale calua catiamẽla konduko ya Suku, Yehova. Kuenda tua lilongisavo vimue via tiamẽla kocipango ca Suku. Leci a lingila omanu kuenda eci handi aka linga kovaso. Oco hẽ nye Yesu a yonguile oku popia eci a tu vetiya oku likutilila hati: “Usoma wove wiye”? Usoma wa Suku nye? Kuenda uka yelisa ndati onduko ya Suku oco yi sumbiwe? Oku iya Kusoma waco kua litokeka ndati loku tẽlisiwa kuocipango ca Suku?

4. Usoma wa Suku nye? Kuenda helie Soma yaco?

⁴ Usoma wa Suku uviali wa tumbikiwa la Yehova. Usoma waco u kuete Osoma ya nõliwa. Helie Osoma yaco? Yesu Kristu. Yesu, Osoma yimue ya velapo olosoma viosi via kulo kilu lieve. Eye o tukuiwa hati “Soma yolosoma haeye Ñala yoloñala.” (1 Timoteo 6:15) Eye okuete unene woku linga ovina vialua viwa okuti layimue ombiali yi tẽla oku ci linga.

5. Ombala Yusoma wa Suku yi kasi pi? Kuenda owo uka viala velie?

⁵ Ombala Yusoma wa Suku yi kasi pi? Yesu hẽ o kasi pi? Ove handi ivaluka okuti eye wa fila palo posi eci vovalela kuti. Noke wa pinduiwa, kuenje wa londa kilu. (Ovilinga 2:33) Omo liaco, ombala Yusoma wa Suku, yi kasi muẽle kilu. Eli olio esunga lieci Embimbiliya li tukuila Usoma waco hati, ‘usoma wokilu.’ (2 Timoteo 4:18) Pole, ndaño Usoma wa Suku u kasi kilu, owo uka viala omanu palo posi.​—Tanga Esituluilo 11:15.

6, 7. Nye ci lekisa okuti Yesu Osoma yimue ka yi sokisiwa?

⁶ Nye tu popela okuti Yesu Osoma yimue ka yi sokisiwa? Tu ci popela omo okuti eye lalimue eteke aka fa. Poku sokisa Yesu lolosoma via kulo kilu lieve, Embimbiliya li popia hati, “eye lika o kasi lomuenyo ko pui, haeye o kala kala vocinyi cina ka ci tava oku amelako.” (1 Timoteo 6:16) Eci ci lomboloka okuti ovina viosi viwa Yesu aka linga, vika kala otembo ka yi pui. Eye oka linga ovina vialua viwa.

⁷ Catiamẽla ku Yesu, Embimbiliya li popia hati: “Espiritu lia Yehova lia kala laye, espiritu liolondunge luloño, espiritu lielungulo lunene, espiritu liukũlĩhĩso lusumba wa Yehova. Esanju liaye li kala koku sumbila Yehova; Ka tetulula ndeci ci lete ovaso aye, pamue oku teta onimbu ndeci ci yeva ovatũi aye, puãi o tetuluila olosuke lesunga, kuenje o tetela omanu vaño voluali olonimbu via sunguluka. O veta oluali lohunya yomẽla waye, kuenje ipa vakuevĩho lofela yovomẽla waye.” (Isaya 11:2-4) Olondaka evi vi lekisa okuti Yesu oka viala omanu lesunga kuenda oka va kuatela ohenda. Oyongola hẽ oku vialiwa losoma ya soka ndeyi?

8. Velie vaka viala la Yesu?

⁸ Cimue cikuavo catiamẽla Kusoma wa Suku, ceci okuti, Yesu kaka viala lika liaye. Kuli vakuavo vaka viala laye. Upostolo Paulu wa sapuila Timoteo hati: “Nda tu pandikisa tu vialela kumue laye.” (2 Timoteo 2:12) Paulu la Timoteo, kuenda vakuavo va nõliwa la Suku, vaka viala kumue la Yesu Vusoma wokilu. Oco hẽ omanu vañami vaka kuata epuluvi liaco?

9. Vañami vaka viala la Yesu? Kuenda otembo yipi Suku a fetika oku va nõla?

⁹ Ndomo ca lekisiwa Vocipama 7 celivulu lilo, upostolo Yoano wa tambuile ocinjonde cimue. Vocinjonde caco, eye wa mola “Kameme [Yesu Kristu] o tãi Komunda Siono [kilu] leci ci soka 144.000 va kuete onduko yaye londuko ya Isiaye via sonehiwa kovipolo viavo va tãi kumue laye.” Ava va tukuiwa ndeti va soka 144.000 velie? Yoano o tu sapuila hati: “Ovo . . . vakuakukuama Kameme kuosi a endaenda. Va yovuiwa komanu kuenje va linga apako atete a eciwa ku Suku la Kameme.” (Esituluilo 14:1, 4) Ovo vana va nõliwila oku viala kumue la Yesu Kristu kilu. Eci va pinduiwila komuenyo wokilu, ‘ovo vaka kala olosoma, kuenje vaka viala ilu lieve’ kumosi la Yesu. (Esituluilo 5:10) Tunde kotembo yovapostolo, Suku wa fetika oku nõla Akristão vakuekolelo oco va tẽlise etendelo 144.000 komanu.

10. Momo lie tu popela okuti esokiyo lia lingiwa lioku nõla Yesu kumue lava va soka 144.000 oco va viale omanu, eliangiliyo limue liwa?

¹⁰ Esokiyo lia lingiwa lioku nõla Yesu kumue lava va soka 144.000 oco va viale omanu, eliangiliyo limue liwa. Momo Yesu wa kũlĩha eci ci lomboloka oku kala omunu loku tala ohali. Upostolo Paulu wa popia hati, “ka tu kuete ocitunda cinene okuti okuleñela kuetu ka ku u yevala, puãi tu kuete ocitunda ca yonjaiwa kovina viosi ndetu, haimo ka ca la linga ekandu.” (Va Heveru 4:15; 5:8) Ava vaka viala laye, eci va kala palo posi va talavo ohali kuenda va pandikisa kovina viñi viñi. Ovo va liyakavo lakandu kuenda ovovei añi añi. Kuenje ovitangi viomanu vika va lomboloka ciwa.

11. Nye Yesu a vetiyila Akristão oco va pinge okuti ocipango ca Suku ci lingiwa kilu?

¹¹ Eci Yesu a popia hati likutilili oku pinga Usoma wa Suku oco wiye palo posi, eye wa popiavo hati, likutilili oku pinga oco ocipango ca Suku “ci lingiwe posi ndeci ci lingiwa kilu.” Suku o kasi kilu. Kuenda ocipango caye otembo yosi ca lingaiwa lovangelo vakuacili. Pole, Vocipama 3 celivulu lilo, tua lilongisa okuti kuli ungelo umue ũvi wa liwekapo oku linga ocipango ca Suku. Kuenje wa lueyisa Adama la Heva. Vocipama 10, tuka kũlĩhĩsa eci Embimbiliya li longisa catiamẽla kungelo waco. Ungelo waco wa kũlĩhĩwa hati Satana Eliapu. Satana kumue lovangelo vana va tukuiwa hati olondele, va kala handi kilu otembo yimue. Omo liaco, kotembo yaco, havosiko kilu va kala loku linga ocipango ca Suku. Pole, eci Usoma wa Suku wa fetika oku viala, ovina kilu via pongoloka. Yesu Kristu eci a vialekiwa, wa yaka la Satana, kuenje wo yula.​—Tanga Esituluilo 12:7-9.

12. Ovina vipi vivali via tukuiwa kelivulu Liesituluilo 12:10?

¹² Olondaka vi sangiwa vocitumasuku cikuãimo vi lekisa eci ca pitako. Ovio vi tu sapuila hati: “Nda yeva ondaka yinene kilu, ya linga yiti, Cilo kua tukuluka epopelo lunene luviali wa Suku yetu lomoko ya Kristu waye. Momo omindiki ya vamanjetu ya tundisiwa, una o va lundaila ño-o ku Suku yetu lutanya luteke.” (Esituluilo 12:10) Wa limbuka ovina vivali via tukuiwa vocinimbu eci? Catete, Usoma wa Suku povaka a Yesu Kristu, wa fetika oku viala. Cavali, Satana wa tundisiwa kilu, kuenje wa imbiwa ocipepi la palo posi.

13. Eci Satana a tundisiwa, kilu kueya oku kala ndati?

¹³ Oco hẽ nye ceyililako? Embimbiliya li tu sapuila eci ca pita kilu noke yovina evi vivali. Olio li popia hati: “Yoleli, ailu lene wa tungimo!” (Esituluilo 12:12) Kilu ovangelo vakuacili va yolela omo Satana lolondele viaye va tundisiwa. Kaliye vosi va sialeleko vana lika va pokola ku Yehova Suku. Kilu kueya ombembua yocili loku kolapo. Kuenje ocipango ca Suku ca fetika oku lingiwa kilu.

14. Nye ceya oku pita eci Satana a takumuiwila palo posi?

¹⁴ Oco hẽ palo posi peya oku kala ndati? Embimbiliya li tu sapuila hati: “Ove a ngongo, love a kalunga, ngongo yene! Momo eliapu lia lokila kokuene lonyeño ya lua, omo lia limbuka okuti oloneke vialio vitito.” (Esituluilo 12:12) Satana co temisa calua omo a tundisiwa kilu. Eye wa kũlĩhavo okuti otembo yaye yitito. Omo lionyeño yaco, eye okasi oku kokela omanu ‘ohali’ palo posi. Vocipama cikuãimo, tuka lilongisa vali catiamẽla ‘kongongo’ yaco. Pole, ci tava okuti tu pula ndoco: Usoma uka tẽlisa ndati ocipango ca Suku palo posi?

15. Cipi ocipango ca Suku catiamẽla palo posi?

¹⁵ Ove handi ivaluka ocipango ca Suku catiamẽla palo posi? Ove wa ci lilongisa ale Kocipama 3. Eci Suku a pongiya ocumbo Cedene, onjongole yaye ya kala okuti oluali luosi lu posoka. Kuenda luyukisiwa lomanu vakuesunga okuti va kala otembo ka yi pui. Satana wa lueyisa Adama la Heva. Kuenje eci ca tateka oku tẽlisiwa kuocipango ca Suku palo posi. Pole, ocipango caco cika tẽlisiwa muẽle. Yehova handi o yongola okuti “olondingesunga vi piñala ofeka, vi tungamo oloneke ka vi pui.” (Osamo 37:29) Usoma wa Suku uka tẽlisa onjongole yaco. Uka ci linga hẽ ndati?

16, 17. Elivulu lia Daniele 2:44 li tu sapuila nye catiamẽla Kusoma wa Suku?

¹⁶ Kũlĩhisa ocitumasuku ci sangiwa kelivulu lia Daniele 2:44. Kelivulu eli tu tangako hati: “Koloneke violosoma viaco, Suku yokilu o katula usoma, kuenje ka u nyolẽha, ka u tambuiwa lomanu vofeka yiñi; puãi owo u nyõla loku lia ovosoma aco osi, haiwo u kala muẽle hũ oloneke ka vi pui.” Olondaka evi vi tu sapuila nye catiamẽla Kusoma wa Suku?

¹⁷ Catete, olondaka evi vi tu sapuila okuti Usoma wa Suku wa tumbikiwa “koloneke violosoma viaco.” Ale kotembo okuti handi olosoma vikuavo vikasiko. Cavali, vi tu sapuila okuti Usoma waco uka kala otembo ka yi pui. Lalimue eteke uka yuliwa ale oku piñanyiwa lusoma ukuavo. Catatu, tua limbuka okuti kuka kala uyaki pokati Kusoma wa Suku lovosoma oluali. Usoma wa Suku uka yula. Oku sulako, owo lika uka viala omanu vosi. Kuenje omanu vaka vialiwa luviali umue uwa okuti ka wa lamuiwa.

18. Uyaki uka pita pokati Kusoma wa Suku lovosoma oluali u tukuiwa hati ndati?

¹⁸ Embimbiliya li tu sapuila vali cikuavo catiamẽla kesulilo liuyaki uka pita pokati Kusoma wa Suku lovosoma oluali. Olio li tu sapuila okuti, aspiritu ãvi, eci va limbuka okuti esulilo li kasi ocipepi, va enda oku kemba ‘olosoma violuali luosi.’ Oco hẽ nye aspiritu aco a ci lingila? Va ci lingila oku ‘vi ongoluila kovita vieteke linene lia Suku Tõlo.’ Olosoma violuali vi kongoluiwila kocitumãlo ci “tukuiwa hati, Harmagedo velimi lia Heveru.” (Esituluilo 16:14, 16) Omo lieci ca lomboluiwa ndeti vovinimbu evi vivali, uyaki uka pita pokati Kusoma wa Suku lovosoma oluali, u tukuiwa hati uyaki wo Harmagedo.

19, 20. Nye ci kasi oku tateka oku lingiwa kuocipango ca Suku palo posi?

¹⁹ Usoma wa Suku uka tẽlisa nye luyaki wo Harmagedo? Handi ivaluka eci catiamẽla kocipango ca Suku palo posi? Ocipango ca Yehova Suku ceci okuti mulo voluali mu kala lika omanu vakuesunga, haivo va lipua okuti vo vumba lika eye. Nye ci kasi oku tateka okuti eci handi ka ca tẽlisiwile? Catete, etu tuakuakandu. Kuenje tua siata oku vela kuenda oku fa. Pole, vocipama 5, tua lilongisa okuti Yesu wa tu fila oco tu kuate omuenyo ko pui. Ove pamue handi ivaluka olondaka via sonehiwa Kevanjeliu lia Yoano, via popia hati: “Omo Suku a sola ndoco oluali, oco a ecela Omõlaye wongunga okuti wosi u kolela ka fi, puãi o mola omuenyo ko pui.”​—Yoano 3:16.

²⁰ Ocitangi cikuavo ceci okuti, omanu valua va siata oku linga eci cĩvi. Ovo va kemba, va nyana, kuenda va linga ukahonga. Ovo ka va yongola oku linga ocipango ca Suku. Olondingaĩvi vika nyõliwa vuyaki wa Suku wo Harmagedo. (Tanga Osamo 37:10.) Ocipango ca Suku ka ci kasi oku lingiwavo palo posi, omo okuti olombiali ka vi vetiya omanu oku ci linga. Olombiali vialua via siata oku ecelela ungangala kuenda evĩho. Catiamẽla kekalo liaco, Embimbiliya li popia hati: “Omunu poku kangisa ukuavo o lilinga eye muẽle cĩvi.”​—Ukundi 8:9.

21. Usoma uka tẽlisa ndati ocipango ca Suku palo posi?

²¹ Noke yo Harmagedo, omanu vaka vialiwa lika Lusoma wa Suku. Usoma waco uka tẽlisa ocipango ca Suku. Kuenda uka nena asumũlũho alua komanu. Owo uka nyõla Satana lolondele viaye. (Tanga Esituluilo 20:1-3) Unene wocilumba cocisembi ca Yesu uka kuatisa omanu vosi vakuesunga. Kuenje lomue oka vela vali ndaño oku fa. Vusoma wa Suku, omanu vaka kuata epuluvi lioku kala otembo ka yi pui. (Tanga Esituluilo 22:1-3.) Noke oluali luosi luka kala ocumbo ceposo. Kuenje Usoma uka tẽlisa ocipango ca Suku palo posi. Kuenda uka yelisa onduko ya Suku oco yi sumbiwe. Eci hẽ ci lomboloka nye? Eci ci lomboloka okuti, Vusoma wa Suku vosi vaka kalamo, vaka sumbila onduko ya Suku, Yehova.

22. Tua kũlĩha ndati okuti Usoma wa Suku ka weyile eci Yesu a kala palo posi? Kuenda tua kũlĩhavo ndati okuti ka weyile eci Yesu a pinduiwa?

²² Yesu wa vetiya olondonge viaye oco vi likutilile hati, “Usoma wove wiye.” Eci ci lekisa okuti Usoma ka wa tumbikiwile kotembo yaco. Anga hẽ Usoma weya eci Yesu a londa kilu? Sio. Momo Petulu la Paulu va sapula okuti, eci Yesu a pinduiwa olondaka via sonehiwa Kosamo 110:1, via tẽlisiwa vokuaye. Kosamo yaco tu tangako hati: “Yehova wa popia la cime cange, hati, Tumãla kondio yange toke hu lingila ovanyali vove ociliatelo cove.” (Ovilinga 2:32-34; Va Heveru 10:12, 13) Eci ci lekisa okuti, Yesu handi wa talamẽla otembo yimue.

23. (a) Otembo yipi Usoma wa Suku wa fetika oku viala? (b) Nye tuka lilongisa vocipama cikuãimo?

²³ Yesu wa talamẽla toke otembo yipi? Vokuenda kuanyamo 1.900 toke 2000, ava va kala oku lilongisa Embimbiliya, va pitĩla kelomboloko liokuti otembo yoku talamẽla kua Yesu yika sulila kunyamo wo 1914. (Catiamẽla kotembo eyi, tala Alomboluilo a Vokiyiwako kemẽla 215-218.) Ovina via pita voluali oku pisa kunyamo wo 1914, via lekisa okuti olokonda via lingiwa lomanu vaco, via sokelepo muẽle. Oku tẽlisiwa kuovitumasuku ku lekisa okuti vunyamo wo 1914, Kristu wa linga Osoma. Kuenje Usoma wa Suku wa fetika oku viala kilu. Omo liaco, etu tu kasi ‘koloneke vitito’ via kambelako Satana. (Esituluilo 12:12; Osamo 110:2) Cilo, tu tẽla oku popia lekolelo okuti, Usoma wa Suku ndopo uka tẽlisa ocipango ca Suku palo posi. Olondaka evi hẽ wa vi sanjukila? O tava okuti vika tẽlisiwa muẽle? Ocipama cikuãimo cika tu kuatisa oku limbuka eci Embimbiliya li longisa catiamẽla kovina evi.