KAPITE VALU
Koteā Koa Ia Te Pule’aga ’o Te ’Atua?
Koteā ’aē ’e ’ui ’i te Tohi-Tapu ’o ’uhiga mo te Pule’aga ’o te ’Atua?
Koteā ’aē ka fai anai e te Pule’aga ’o te ’Atua?
Ko ’āfea ’aē ka fakahoko anai e te Pule’aga, ia te finegalo ’o te ’Atua ’i te kele?
’E ’ILO’I e te ’u lau’i miliona haha’i ’o te malamanei kātoa ia te faikole ’aē ko te Tāmai ’aē ’e ’i selo. Ko te faikole ’iloa ’aia, ’e ko te faikole fa’ifa’itaki ’aē ne’e tuku mai e Sesu Kilisito. ’E ma’uhiga ’aupito ia te faikole ’aia, pea ko tatatou vaka’i ia te ’u ’uluaki koga e tolu ’o te faikole ’aia, ’e feala ai anai ke tou mahino lelei age ki te ’u me’a ’aē ’e ako’i mo’oni mai ’i te Tohi-Tapu.
2 ’I te kamata ’o te faikole ’aia, ne’e fakatotonu fēnei e Sesu ki te nofo’aki: “Koia ’e tonu ke koutou faikole fēnei: ‘Ko tamatou Tāmai ’e ’i selo, ke tāpuhā tou huafa. Ke hoko mai tou pule’aga. Ke fai tou finegalo ’i te kele, ohage ko selo.’” (Mateo 6:9-13, MN) Koteā te faka ’uhiga ’o te ’u koga ’aia e tolu ’o tana faikole?
3 ’E lahi te ’u me’a ’aē kua tou mahino kiai ’o ’uhiga mo te huafa ’o te ’Atua, ia Sehova. Pea ne’e tou kamata talanoa ’o ’uhiga mo te finegalo ’o te ’Atua—te ’u me’a ’aē ne’e ina fai pea mo te ’u me’a ’aē ka ina fai anai ma’a te malamanei. Kae koteā ’aē ne’e manatu kiai Sesu, ’i tana ’ui ’aē ke tou faikole fēnei: “Ke hoko mai tou pule’aga”? Koteā koa ia te Pule’aga ’o te ’Atua? Ko te hoko mai ’o te Pule’aga ’aia, ’e ina tapuha feafea’i anai, pe’e ina fakama’oni’oni feafea’i anai ia te huafa ’o te ’Atua? Pea koteā te pikipikiga ’o te hoko mai ’o te Pule’aga pea mo te fai ’o te finegalo ’o te ’Atua?
KOTEĀ KOA IA TE PULE’AGA ’O TE ’ATUA?
4 Ko te Pule’aga ’o te ’Atua, ’e ko te pule’aga ’aē ne’e fakatu’u e Sehova ’Atua, pea ne’e ina filifili he Hau ke ’afio ai. Ko ai te Hau ’o te Pule’aga ’o te ’Atua? ’E ko Sesu Kilisito. Ko te Hau ko Sesu ’e mā’oluga age ’i te ’u pule fuli ’o te kele pea ’e fakahigoa’i ia ia ko “te Hau o te u hau, mo te Aliki o te u aliki.” (1 Timoteo 6:15) ’E ina ma’u he mālohi fe’auga mo’o fai he ’u gāue ’e lahi age ’i te ’u gāue ’aē ’e lava fai e he pule fakakelekele, mā’ia mo te pule ’aē ’e lelei tokotahi.
5 ’E tu’u ’ifea te Pule’aga ’o te ’Atua? ’E ’ifea ia Sesu? ’E koutou manatu’i, ne’e koutou ako ko Sesu ne’e mate ’i te pou fakamamahi, pea ne’e fakatu’uake. Mole fualoa, pea ne’e hake ki selo. (Gaue 2:33) Koia ’e ko selo ’aē ’e tu’u ai te Pule’aga ’o te ’Atua. Koia ’aē ’e ’ui ai ’i te Tohi-Tapu ko te pule’aga ’aia ’e ko te “pule’aga ’aē ’i selo.” (2 Timoteo 4:18, MN) Logola tana tu’u ’i selo, kae ’e ina pule’i anai te kele.—Apokalipesi 11:15.
6 He ko’e ’e lelei ke Hau ia Sesu? ’Uluaki, ’e mole mate anai ’i he temi. ’E kehekehe ia Sesu mo te ’u hau fakakelekele, he’e ’ui ’i te Tohi-Tapu “[ko] ia tokotahi ’aē ’e ina ma’u te ma’uli tuputupua, pea ’e nofo ’i he mālama ’e mole lava kakusia.” (1 Timoteo 6:16, MN) Ko tona faka ’uhiga, ko me’a lelei fuli ’aē ka ina fai ’e tologa anai, pea ’e lahi anai te ’u me’a ’aē ka ina fai mo’o tapuakina tana haha’i.
7 ’O ’uhiga mo Sesu, ’e ’ui fēnei ’i te lea faka polofeta ’o te Tohi-Tapu: “’E nofo anai te laumālie ’o Sehova iā te ia, te laumālie ’o te poto pea mo te ’atamai, te laumālie ’o te tokoni pea mo te mālohi, te laumālie ’o te mālama pea mo te manavasi’i kiā Sehova; pea ’e fiafia anai ’i te manavasi’i kiā Sehova. Pea ’e mole ina fakamāu anai ’aki te me’a ’aē ne’e hā ki ’ona mata, pea ’e mole ina fai anai tana fakatonutonu ’aki pe te me’a ’aē ne’e fagono ki ai ’ona taliga. Pea ’e ina fakamāu’i mo’oni anai ia nātou liliki ’aki te faitotonu, pea ’e ina fakatonutonu’i anai ’aki te faitotonu ke fua lelei ki te kau agavaivai ’o te kele.” (Isaia 11:2-4) ’E hā ’aki te ’u palalau ’aia, ne’e tonu kiā Sesu ke liliu ko he Hau faitotonu mo aga’ofa ki te haha’i ’aē ’e mā’u’uli ’i te kele. ’E koutou loto koa ki he hau feiā?
8 Ko’eni te tahi mo’oni ’o ’uhiga mo te Pule’aga ’o te ’Atua: ko Sesu ’e mole hau tokotahi anai. ’E ’i ai tona ’u kaugā hau. Ohage la, ne’e ’ui fēnei e te ’apositolo ko Paulo kiā Timoteo: “Kapau ’e tou haga fa’a kātaki, pea ’e tou hau foki anai mo ia.” (2 Timoteo 2:12, MN) Ei, ko Paulo, mo Timoteo pea mo ’ihi kau agatonu ’aē ne’e filifili e te ’Atua, ’e nātou hau fakatahi anai mo Sesu ’i te Pule’aga ’aē ’e ’i selo. Ko te tokofia ’aē ka nātou ma’u anai te tu’ulaga ’aia?
9 Ohage ko tona ’ui ’i te kapite 7 ’o te tohi ’aenī, ne’e hā ki te ’apositolo ko Soane ia “te Akeno [ko Sesu Kilisito] ’e tu’u ’i te Mo’uga ’o Sione [’i tona tu’ulaga hau ’aē ’i selo], pea ne’e tutu’u ai te toko teau-fāgofulu-ma-fā afe ’aē ’e tohi ’i tonatou ’u la’e tona huafa pea mo te huafa ’o tana Tāmai.” Ko ai te toko 144 000 ’aia? ’E tala fēnei mai e Soane: “Ko nātou ’aia ne’e nātou haga muli’i te Akeno ’i te potu fuli pe ’e ’alu kiai. Ko nātou ’aia ’aē ne’e totogi mai te haha’i ko te ’u polopolo ’o te ’Atua pea mo te Akeno.” (Apokalipesi 14:1, 4, MN) Ei, ko nātou ’aia ’e ko te ’u tisipulo agatonu ’a Sesu Kilisito, ’aē ne’e filifili kehe ke nātou hau mo ia ’i selo. ’I tonatou ’osi fakatu’uake mai te mate ki te ma’uli ’aē ’i selo, “’e tonu anai ke nātou hau [mo Sesu] ki te kele.” (Apokalipesi 5:10, MN) Talu mai te temi ’o te kau ’apositolo, ne’e filifili e te ’Atua he kau Kilisitiano agatonu ke feala hanatou fakakatoa ia te toko 144 000.
10 ’E ko he fakatu’utu’u ’ofa ’aia ke pule’i te malamanei e Sesu pea mo te toko 144 000. ’Uluaki, he’e ko Sesu ’e ina ’ilo’i te ’uhiga ’o te tagata pea ’e ina ’ilo’i ia te ma’uli mamahi. Ne’e ’ui e Paulo ’o ’uhiga mo Sesu “’e mole ko he tahi ’e hala mo manava’ofa ki ’otatou ’u vaivai’aga, kae ko he tahi ia ne’e ’ahi’ahi’i ’i te fa’ahi fuli pe ohage ko tatou, kae ne’e mole hana agahala.” (Hepeleo 4:15; 5:8, MN) ’O toe feiā mo nātou ’aē ka nātou kaugā hau mo ia, ne’e nātou ma’uli mamahi pea mo fa’a kātaki ’i tanatou kei mā’u’uli ’i te kele. Tahi ’aē me’a, ne’e nātou tau’i te ma’uli he’e haohaoa pea mo kātaki’i te ’u fa’ahiga mahaki kehekehe. ’E mahino ia, ’e nātou lotomahino anai ki te ’u fihifihia ’aē ’e tau mo te malamanei.
KOTEĀ ’AĒ KA FAI ANAI E TE PULE’AGA ’O TE ’ATUA?
11 ’I te temi ’aē ne’e ’ui e Sesu ke faikole tana ’u tisipulo ke hoko mai te Pule’aga ’o te ’Atua, ne’e ina toe ’ui foki ’e tonu ke nātou faikole ke fai te finegalo ’o te ’Atua “’i te kele ohage ko selo.” ’E nofo te ’Atua ’i selo, pea ne’e fai tu’uma’u aipe tona finegalo e te kau ’āselo agatonu. Kae ’i te Kapite 3 ’o te tohi ’aenī, ne’e tou ako ai ko te ’āselo agakovi ne’e mole kei ina fai ia te finegalo ’o te ’Atua, pea ne’e ina fakahiga ia Atama mo Eva ke nā agahala. ’I te Kapite 10 ’o te tohi ’aenī, ’e lahi ai te tahi ’u fa’ahi ’e tou vaka’i anai ’o ’uhiga mo te ’āselo agakovi ’aia, ’aē ’e higoa ko Satana te Tevolo. Ko Satana mo tana kau temonio, ia te kau ’āselo ’aē ne’e nātou mulimuli ia te ia, ne’e fakagafua age ke nātou nonofo ’i selo lolotoga he ki’i temi. Koia ’i te temi ’aia ne’e mole fai kātoa ’i selo ia te finegalo ’o te ’Atua. Kae ne’e tonu ke fetogi te ’alu’aga ’aia ’i te temi ’aē ne’e kamata ’afio ai ia te Pule’aga ’o te ’Atua. Ko te Hau fo’ou ko Sesu Kilisito, ne’e ina tau’i ia Satana.—Apokalipesi 12:7-9.
12 Ko te ’u palalau fakakikite ’aenī ’e nātou fakamatala mai te me’a ’aē ne’e hoko: “Ne’e au logo ki te le’o mālohi ’i te lagi ’e ina ’ui fēnei: ‘’I te temi ’aenī kua hoko mai te fakama’uli pea mo te mālohi pea mo te pule’aga ’o totatou ’Atua pea mo te pule ’o tana Kilisito, he kua lī ifo [ia Satana] ia ia ’aē ’e ina fakakovi’i totatou ’u tēhina, ’e ina fakakovi’i ia nātou ’i te ’aho mo te po ia mu’a ’o totatou ’Atua!’” (Apokalipesi 12:10, MN) Ne’e koutou fakatokaga’i ’i te vaega Tohi-Tapu ’aenī, te ’u fa’ahi ma’uhiga ’aupito e lua kua hoko? ’Uluaki, kua kamata pule te Pule’aga ’o te ’Atua ’aē ’e takitaki e Sesu Kilisito. Lua, kua kapu ifo ia Satana mai te lagi ki te kele.
13 Ne’e koteā tona fua ’i te ’osi hoko ’o te ’u me’a ’aia e lua? Ko’eni te me’a ’aē ne’e hoko ’i selo: “Koia ke koutou fiafia selo, pea mo koutou ’aē ’e nonofo ai!” (Apokalipesi 12:12, MN) Ei, ne’e fiafia te kau ’āselo agatonu ’i selo, he’e ’i te kua kapu ifo ’o Satana mo tana kau temonio, ko nātou fuli ’aē ’e mā’u’uli ’i selo, ’e nātou nonofo agatonu kiā Sehova ’Atua. ’E ma’u ai te tokalelei pea mo te felogoi kātoa pea mo he’egata. Ei, kua fai te finegalo ’o te ’Atua ’i selo.
14 Kae e feafea’i ’o ’uhiga mo te kele? ’E ’ui fēnei ’i te Tohi-Tapu: “Mala’ia ki te kele pea mo te tai, he kua hifo atu te Tevolo kiā koutou, mo tona ’ita lahi, he kua ina ’ilo’i kua nounou tona temi.” (Apokalipesi 12:12, MN) Kua ’ita ia Satana ’i tona kapu ifo mai te lagi pea mo te temi nounou ’aē ’e kei toe kiā ia. ’I tona ’ita ’aia, ’e ina fakatupu te ’u mamahi, pe’e ko te ’u “mala’ia”, ki te kele. ’E tou fakamahino lelei anai ’i te kapite ’aē ka hoa mai, ia te ’u “mala’ia” ’aia. Kae ’i tatatou ’ilo’i ia te fa’ahi ’aia, ’e feala hatatou fai ia te fehu’i ’aenī, ’E lava fakahoko feafea’i ia te finegalo ’o te ’Atua ’i te kele?
15 Tou fakamanatu’i pe’e koteā ia te finegalo ’o te ’Atua ’o ’uhiga mo te kele. Ne’e koutou ako ia te fa’ahi ’aia ’i te Kapite 3 ’o te tohi ’aenī. ’I Eteni, ne’e fakahā ai e te ’Atua ko tona finegalo ke liliu te kele ko he palatiso, ’e nonofo ai ni haha’i faitotonu, ’e mole mamate anai ’i he temi. Ne’e fakaneke e Satana ia Atama mo Eva ke nā agahala, ’o fua kovi ai ki te hoko ’o te finegalo ’o te ’Atua ’o ’uhiga mo te kele. Kae ne’e mole ina fetogi tana fakatu’utu’u. ’E kei finegalo ia Sehova ‘ke ma’u te kele e te kau faitotonu, pea mo nātou nonofo ai ’o talu ai.’ (Pesalemo 37:29) Pea ’e fakahoko anai ia te fa’ahi ’aia e te Pule’aga ’o te ’Atua. ’O feafea’i?
16 Tou vaka’i age mu’a ia te lea faka polofeta ’o Taniela 2:44. ’E tou lau fēnei ai: “’I te ’u ’aho ’o te ’u hau ’aia ko te ’Atua ’o te lagi ’e ina fakatu’u anai he pule’aga ’e mole pulihi anai ’i he temi. Pea ko te pule’aga ’aia ’e mole tuku anai ki he tahi haha’i. ’E ina laliki anai pea mo fakagata anai te ’u pule’aga fuli ’aia, pea ko ia totonu ’e tu’u anai ’o a’u ki he ’u temi ’e mole ’ilo’i hona gata’aga.” Koteā ’aē ’e ’ui ’i te lea faka polofeta ’aia ’o ’uhiga mo te Pule’aga ’o te ’Atua?
17 ’Uluaki, ’e ina fakahā mai ko te Pule’aga ’o te ’Atua ne’e tonu ke fakatu’u “’i te ’u ’aho ’o te ’u hau ’aia,” pe’e ’i te temi ’aē ’e kei lolotoga ai ia te tahi ’u pule’aga. Lua, ’e ina ’ui ko te Pule’aga ’aia ’e tu’u anai ’o talu ai. ’E mole fakahifo anai ia te pule’aga ’aia, pe’e fetogi e he tahi pule’aga. Tolu, ’e ina ’ui ’e hoko anai he tau ’e fehōkosi ai ia te Pule’aga ’o te ’Atua pea mo te ’u pule’aga ’o te malamanei. Kae ’e mālo anai ia te Pule’aga ’o te ’Atua. ’I te faka’osi, ’e ko te pule’aga pe ’aia e tahi ’aē ka ina pule’i ia te malamanei, pea ’e ma’u anai e te haha’i ia te takitaki ’aē ’e lelei ’aupito.
18 ’E lahi te ’u fa’ahi ’e fakamatala ’i te Tohi-Tapu ’o ’uhiga mo te tau faka’osi ’aē ’e fehōkosi ai ia te Pule’aga ’o te ’Atua pea mo te ’u pule’aga ’o te malamanei. Ohage la, ’e ’ui ai ’i te fakaōvi mai ’o te faka’osi, ko te ’u laumālie kovi ’e nātou faka mafola anai ni ’u loi mo’o fakahē’i “te ’u hau ’o te kele kātoa.” Koteā tona tupu’aga? “Mo’o tānaki ia nātou [te ’u hau] ki te tau ’o te ’aho lahi ’o te ’Atua te Māfimāfi.” ’E tānaki anai ia te ’u hau ’o te kele “ki te potu ’aē ’e higoa ’i te faka Hepeleo ko Hala-Maketone.” (Apokalipesi 16:14, 16, MN) ’E fakahā mai ’i te ’u vaega ’aia e lua, ko te tau faka’osi ’aē ka fehōkosi ai ia te ’u pule’aga fakatagata pea mo te Pule’aga ’o te ’Atua, ’e fakahigoa’i ko te tau ’o Halamaketone.
19 Koteā anai te gāue ’aē ka fakahoko e te Pule’aga ’o te ’Atua ’i Halamaketone? Tou manatu’i pe’e koteā ia te finegalo ’o te ’Atua ’o ’uhiga mo te kele. Ne’e fakatu’utu’u e Sehova ’Atua ke fakafonu ia te kele e he ’u haha’i faitotonu, mo haohaoa, ’e nātou tauhi kiā te ia ’i te Palatiso. He ko’e ’e mole feala ke hoko te fa’ahi ’aia iā ’aho nei? Kote’uhi, ’uluaki, ’e tou agahala, ’e tou mahahaki pea mo tou mamate. Kae ’i te Kapite 5 ’o te tohi ’aenī, ne’e tou vaka’i ai ne’e mate Sesu ma’a tatou, ke feala hatatou mā’u’uli ’o he’egata. ’E lagi koutou manatu’i te ’u palalau ’aenī ’o te Evaselio ’o Soane: “Nee ofa lahi te Atua ki te malama-nei, ko te tupuaga aia o tana foaki mai tona Alo Ulutokotahi, ke aua naa mate ia natou fuape e tui kia te ia, kae ke natou maù te mauli heegata.”—Soane 3:16.
20 Ko te tahi fihifihia, he’e ko te tokolahi ’e nātou fai te ’u me’a kovi. ’E nātou gutuloi, mo aga fakakākā, pea mo fai te ’u aga he’e’aoga. ’E mole nātou fia fai ia te finegalo ’o te ’Atua. Ko te haha’i ’aē ’e nātou fai te ’u me’a kovi, ’e faka’auha anai nātou lolotoga te tau ’o te ’Atua ’i Halamaketone. (Pesalemo 37:10) Ko te tahi tupu’aga ’o te mole he’eki hoko ’o te finegalo ’o te ’Atua ’i te kele, he’e ko te ’u pule’aga ’e mole nātou fakaloto mālohi’i te haha’i ke nātou fai ia te fa’ahi ’aia. ’E lahi te ’u pule’aga ’e nātou faka’au’auganoa, mo nātou aga fakapō, pea mo nātou aga fakakākā. ’E mo’oni te ’u palalau ’aenī ’a te Tohi-Tapu: “Ko te tagata ’e ina pule’i te tagata ki tona mala’ia.”—Tagata Tānaki 8:9.
21 ’I te hili ’o Halamaketone, ’e fakalogo anai ia te haha’i ki te pule’aga pe e tahi, ia te Pule’aga ’o te ’Atua. Ko te Pule’aga ’aia ’e ina fakahoko anai ia te finegalo ’o te ’Atua, pea mo ina ’aumai anai te ’u tapuakina fakatalakitupua. Ohage la, ’e ina pulihi anai ia Satana mo tana kau temonio. (Apokalipesi 20:1-3) ’E faka’aoga’i anai te mālohi ’o te sakilifisio ’o Sesu, ke feala ki te haha’i agatonu ke mole nātou toe mahahaki pea mo mamate. ’Aki te takitaki ’o te Pule’aga ’aia, ’e feala anai hanatou mā’u’uli ’o he’egata. (Apokalipesi 22:1-3) ’E liliu anai te kele ko he Palatiso. Pea ’e feala ai anai ki te Pule’aga ’aia ke ina fakahoko ia te finegalo ’o te ’Atua ’i te kele, pea mo ina tapuha ia te huafa ’o te ’Atua. Koteā tona faka ’uhiga? Ko tona faka ’uhiga, ki muli age ko te haha’i fuli ’aē ka mā’u’uli ’o fakalogo ki te Pule’aga ’o te ’Atua, ’e nātou faka ma’uhiga’i anai ia te huafa ’o Sehova.
KO TE TEMI FEA ’AĒ KA HOKO AI TE GĀUE ’O TE PULE’AGA ’O TE ’ATUA?
22 ’I te ’aho ’aē ne’e ’ui ai e Sesu ki tana ’u tisipulo ke nātou faikole fēnei, “ke hoko mai tou pule’aga,” ne’e mahino ia ne’e mole he’eki tonu ke hoko mai te Pule’aga ’i te temi ’aia. Ne’e hoko mai koa ’i te temi ’aē ne’e hake ai ia Sesu ki selo? Kailoa, he ne’e ’ui e Petelo mo Paulo, ’i te ’osi fakatu’uake ’o Sesu, ne’e ina fakahoko ia te lea faka polofeta ’o Pesalemo 110:1, ’aē ’e ’ui fēnei ai: “Ko’eni ia te folafola ’a Sehova ki toku ’Aliki: ‘Heka ’i toku to’omata’u ’o kaku ki taku tuku tou ’u fili ke hage ko he tu’u’aga ki ’ou va’e.’” (Gaue 2:32-35; Hepeleo 10:12, 13) Ei, ne’e tonu ke fakatalitali.
23 Ne’e tonu ke fakatalitali ’o a’u ki ’āfea? Lolotoga te 19 sēkulō, ne’e fakaauau e te kau Ako fakamalotoloto ’o te Tohi-Tapu, ko te temi ’aē ne’e fakatalitali ai ne’e faka’osi ’i te 1914. (’O ’uhiga mo te ta’u ’aia, koutou vaka’i Te Tahi ’u Fakamahino.) Ko te ’u me’a ’aē ne’e hoko ’i te malamanei ’i te 1914, ’e nātou fakamo’oni ne’e tonu te ’u fakaauau ’a te kau Ako fakamalotoloto ’aia ’o te Tohi-Tapu. Ko te hoko ’o te lea faka polofeta ’e ina fakahā mai, ’i te 1914, ko Kilisito ne’e liliu ko te Hau pea ne’e kamata ’afio te Pule’aga ’o te ’Atua ’aē ’e ’i selo. Koia, kua tou mā’u’uli ’i ‘te temi nounou’ ’aē ’e kei toe ma’a Satana. (Apokalipesi 12:12; Pesalemo 110:2) Tahi ’aē me’a, ’e tou lava ’ui papau, kua ōvi mai te temi ’aē ka gāue ai te Pule’aga ’o te ’Atua mo’o fakahoko ia te finegalo ’o te ’Atua ’i te kele. ’E ko he logo fakafiafia koa kiā koutou? ’E koutou faka tui koa ’e mo’oni te fa’ahi ’aia? ’I te kapite ’aē ka hoa mai, ’e koutou vaka’i ai anai ko te Tohi-Tapu ’e ina ako’i mo’oni mai ia te ’u me’a ’aia.
KOTEĀ ’AĒ ’E AKO’I MAI ’I TE TOHI-TAPU?
- Te Pule’aga ’o te ’Atua, ’e ko he pule’aga ’i selo, ’e nofo hau ai ia Sesu Kilisito, pea ’e filifili ’i te malamanei, te toko 144 000 ke nātou kaugā hau mo ia.—Apokalipesi 14:1, 4.
- Ne’e kamata ’afio te Pule’aga ’i te 1914, pea talu mai ai ko Satana ne’e kapu ifo mai te lagi ki te kele.—Apokalipesi 12:9.
- Kua vave hoko mai te temi, ’aē ka haga ai te Pule’aga ’o te ’Atua, ’o faka’auha te ’u pule’aga fakatagata, pea mo liliu anai te kele ko he palatiso.—Apokalipesi 16:14, 16.
Te ’u Fehu’i Ako
1. Ko te faikole ’iloa fea ’aē ka tou vaka’i ’i te temi nei?
2. Koteā te ’u koga e tolu ’aē ne’e ako’i e Sesu ki tana ’u tisipulo ke nātou kole ’i tanatou faikole?
3. Koteā te ’u fehu’i ’aē ’e tou fia mahino kiai ’o ’uhiga mo te Pule’aga ’o te ’Atua?
4. Ko te Pule’aga fea ’o te ’Atua, pea ko ai tona Hau?
5. ’E tu’u ’ifea te Pule’aga ’o te ’Atua, pea ’e ina pule’i anai teā?
6, 7. He ko’e ko Sesu ’e ko he Hau makehe?
8. Ko ai ’aē ka kaugā hau anai mo Sesu?
9. Ko te tokofia ’aē ka nātou kaugā hau anai mo Sesu, pea ne’e kamata talu mai ’anafea tonatou filifili e te ’Atua?
10. He ko’e ’e ko he fakatu’utu’u ’ofa ke pule’i te malamanei e Sesu pea mo te toko 144 000?
11. He ko’e ne’e ’ui e Sesu ki tana ’u tisipulo ke nātou faikole ke fai te finegalo ’o te ’Atua ’i selo?
12. Koteā te ’u fa’ahi ma’uhiga e lua ’aē ’e fakamatala ia Apokalipesi 12:10?
13. Koteā ’aē ne’e hoko ’i te ’osi kapu ifo ’o Satana mai selo?
14. Koteā ’aē ne’e hoko ’i te kapu ’ifo ’o Satana ki te kele?
15. Koteā ia te finegalo ’o te ’Atua ’o ’uhiga mo te kele?
16, 17. Koteā ’aē ’e ’ui iā Taniela 2:44 ’o ’uhiga mo te Pule’aga ’o te ’Atua?
18. Koteā te higoa ’o te tau faka’osi ’aē ’e fehōkosi ai ia te Pule’aga ’o te ’Atua pea mo te ’u pule’aga ’o te malamanei?
19, 20. Koteā ’aē ’e mole feala ai ke hoko ia te finegalo ’o te ’Atua iā ’aho nei?
21. Koteā ’aē ka fai e te Pule’aga mo’o fakahoko ia te finegalo ’o te ’Atua ’i te kele?
22. He ko’e ’e tou ’ilo’i ko te Pule’aga ’o te ’Atua ne’e mole hoko mai ’i te temi ’aē ne’e kei ma’uli ai Sesu ’i te kele, pe’e ’i te ’osi pe ’o tona fakatu’uake?
23. (a) Ko te temi fea ’aē ne’e ’afio ai te Pule’aga ’o te ’Atua? (b) Koteā ’aē ka tou ako ’i te kapite ’aē ka hoa mai?