1. Mang meybil ni boor e girdi’ ni manang e ngad weliyed murung’agen?

BOOR e girdi’ u fayleng ni yad manang fare meybil ni yima yog e Chitamangimad ngay. Re meybil ney e aram fare kenggin e meybil ni fil Jesus Kristus ngak pi gachalpen. Rib ga’ fan e re meybil nem, ya faan ga ra fal’eg i lemnag fa dalip yil’ nsom’on e meybil ko re kenggin e meybil nem ma ra gel e tamilangan’ rom ko n’en nri be fil e Bible.

2. Mang dalip ban’en ni yog Jesus ngak pi gachalpen ni ngar yibilayed?

² I yog Jesus ngak e piin ni ur motoyilgad ngak u tabolngin e re kenggin e meybil ney ni gaar: “Baara’ rogon ni ngam meybilgad ni nge lungumed: ‘Chitamangimad ni ga bay u tharmiy: Ngan tay fan fithingam nib thothup, ma ga par ni gur e ga be gagiyegnagmad, min rin’ e tin nib m’agan’um ngay u roy u but’ ni bod rogon ni yibe rin’ u tharmiy.’” (Matthew 6:9-13) Mang e ba ga’ fan ko re dalip yil’ i meybil ney?

3. Mang e ba t’uf ni ngad nanged u murung’agen e Gagiyeg rok Got?

 ³ Boor ban’en ni kad filed u murung’agen fithingan Got, ni Jehovah. Ma kud weliyed boch ban’en u murung’agen e tin nib m’agan’ Got ngay, ni tin ni ke rin’ nge tin ni bay fini rin’ ni fan ko girdi’. Ere, mang e be yip’ Jesus fan u nap’an ni yog ni ngad meybilgad ni nge lungudad: “Ma ga par ni gur e ga be gagiyegnagmad?” Mang e re Gagiyeg nem? Uw rogon nra thothupnag fithingan Got? Ma uw rogon nra lebguy e tin nib m’agan’ Got ngay?

4. Mang e Gagiyeg rok Got? Mini’ e Pilung riy?

⁴ Gagiyeg rok Got e aram Gil’ilungun Got nib am ni ke sunmiy Jehovah ni bay be’ ni ke mel’eg ni nge mang Pilung riy. Mini’ e cha’ nem? Aram Jesus Kristus. Ka nog e “Somol ko pi somol nge Pilung ko pi pilung” ngak Jesus u Bible ni bochan e kab ga’ ngak e pi pilung nu fayleng. (Revelation 17:14) Ba thil ya kab gel gelngin ma ka boor e tin nib fel’ nrayog ni nge rin’ nder yag ni nge rin’ e pi pilung nu fayleng.

5. Uw e ra gagiyeg Gil’ilungun Got riy? Mang e ra gagiyegnag?

⁵ U uw e ra gagiyeg Gil’ilungun Got riy? Som’on e, uw e bay Jesus riy? Dabisiy nra yib ngan’um ni yim’ Jesus faram u daken baley i ren, min faseg ko yam’ ma de n’uw nap’an nga tomuren me yan nga tharmiy. (Acts 2:33) Ere, aram e gin ni bay Gil’ilungun Got riy. Aram fan ni ke yog e Bible e “gagiyeg nu tharmiy” ngay. (Matthew 13:11) Yugu aram rogon ni bay Gil’ilungun Got u tharmiy machane ra gagiyegnag e fayleng.​—Mu beeg e Revelation 11:15.

6, 7. Uw rogon nib thil e gagiyeg nra tay Jesus ko gagiyeg ni be tay e pi pilung nu fayleng?

 ⁶ Uw rogon nib thil e gagiyeg nra tay Jesus ko gagiyeg ni be tay e pi pilung nu fayleng? Reb riy e dabi yim’ Jesus. Ke taarebrogonnag e Bible Jesus ngak e pi pilung nu fayleng ma ke yog ni bay u “reb e yafas ndabi mus biid.” (Hebrews 7:16) Fan e re n’ey e gubin e tin nib fel’ nra rin’ Jesus e dabi m’ay angin. Ma boor ban’en nrib fel’ nra rin’ ni fan ngak e girdi’.

⁷ Mu lemnag e n’en ni yiiynag e Bible u murung’agen Jesus ni yog nra pi’ Somol e “gonop ngak, nge llowan’ nge salap ni nge maruwel ngay ngi i gagiyegnag e tirok e girdi’ ngay. Bayi nang e tin nib m’agan’ Somol ngay mi i par ni bay madgun u wan’, mi i felan’ ko pigpig ni be tay ni fan ngak. Dabiyog ni turguy e n’en ni ngan rin’ ngak be’ ni bochan usun faanem ara tin ni ke rung’ag ni murung’agen; ra pithig e oloboch rok e piin nib gafgow nrogon, me ayuweg mat’awun e piin nib sobut’an’rad.” (Isaiah 11:2-4) Be dag e pi thin ney nra mang Jesus ba Pilung nib mat’aw ma ma runguy e girdi’ ma ra gagiyegnag e fayleng ni ga’ngin. Ga baadag reb e pilung ni aram rogon, fa?

8. Mini’ e piin ni yad ra un ngak Jesus ko gagiyeg?

⁸ Ku reb e ban’en nib riyul’ u murung’agen Gil’ilungun Got e: Gathi goo Jesus e ra gagiyeg riy ya ku bay boch e girdi’ ni yad ra un ngak ko gagiyeg. I yog apostal Paul ngak Timothy ni gaar: “Faanra ud k’adan’dad i yan, ma ku er rogon ni gadad ra un ngak ko gagiyeg.” (2 Timothy 2:12) Ere, piin ni ke mel’egrad Got nib muun Paul nge Timothy ngorad e yad ra un ngak Jesus ko gagiyeg u Gil’ilungun Got u tharmiy. Uw urngin e girdi’ nra yag e re tow’ath ney ngorad?

9. Uw urngin e piin ni yad ra un ngak Jesus ko gagiyeg? Wuin e ke tabab Got i mel’eg e pi girdi’ ney?

 ⁹ Kad filed faram ko Guruy ni 7 nni piliyeg e changar rok apostal John nge guy “fare Fak e Saf [Jesus Kristus] nib sak’iy nga daken e burey ni Zion; ni yad raay nge aningeg i ragag nge aningeg i biyu’ e girdi’ ni ba’ fithingan rorad nge fithingan e Chitamangin ni kan yoloy nga peri’rad.” Mini’ e pi girdi’ nem ni yad 144,000 u gubin? I yog John ni gaar: “Yad fapi pumoon nra tiyed yad ni yad mmachalbog ndar pired e ppin ma dar uned ko mabgol. Demtrug e gin ni be yan fare Fak e Saf ngay ma yad be un ngak; ya kan biyuliyrad u fithik’ e tin ni ka ba’ e girdi’ nu fayleng ma yad e tin som’on e girdi’ nni pi’rad ngak Got nge ngak fare Fak e Saf.” (Revelation 14:1, 4) Arrogon, yad pi gachalpen Jesus Kristus ni kan mel’egrad ni ngar uned ngak ko gagiyeg u tharmiy. Tomuren ni yira fasegrad ko yam’ nga ranod nga tharmiy ni yad ba kan, ma yad ra un ngak Jesus i gagiyegnag e fayleng. (Revelation 20:4, 6) Ka nap’an e pi apostal me tabab Got i mel’eg e pi Kristiano nib yul’yul’ ya nge gamaneg e re matheeg nem.

10. Mang fan nri be m’ug e t’ufeg rok Got ko n’en ni ke rin’ ni ke tay Jesus nge fare 144,000 e girdi’ ni ngar gagiyegniged e girdi’?

¹⁰ Re n’ey ni ke rin’ Got ni ke tay Jesus nge fare 144,000 e girdi’ ni ngar gagiyegniged e girdi’ nu fayleng e be dag nri gad ba t’uf rok. Manang Jesus rarogon e girdi’ nge gafgow ni ma yib ngorad ya ku ir ma immoy nib girdi’. I weliy Paul murung’agen Jesus ni gaar: “Re prist rodad nem nib th’abi tolang e gathi reb e prist ndabi kireban’ ngodad nga fadad meewar. Ya re prist rodad nem nib th’abi tolang e yib ngak urngin  kanawoen e pi n’en ni ma waliy e girdi’ nge denen ni bod gadad, machane de denen.” (Hebrews 4:15; 5:8) Piin ni yad ra un ngak ko gagiyeg e nap’an ni ur moyed u fayleng ma i yib e gafgow ngorad nib gel mu ur athamgilgad u fithik’. Maku ur gafgowgad ni bochan e m’ar nge rarogorad ndawor ra flontgad. Ere, rib mudugil ni yad manang rarogon e magawon ni ma yib ngak e girdi’!

11. Mang fan nib t’uf Gil’ilungun Got nfaanra ngan rin’ e tin nib m’agan’ ngay u tharmiy?

¹¹ Nap’an ni yog Jesus ngak pi gachalpen ni ngar yibilayed Gil’ilungun Got ni nge gagiyegnagrad, miki yog ni ngar yibilayed ni ngan rin’ e tin nib m’agan’ Got ngay “u roy u but’ ni bod rogon ni yibe rin’ u tharmiy.” Bay Got u tharmiy, ma ka aram nap’an i yib ni be rin’ e pi engel rok nib yul’yul’ e tin nib m’agan’ ngay u rom. Kad filed ko guruy ni 3 ni immoy reb e engel ndaki fol rok Got me waliy Adam nge Efa ngar denengow. Ma guruy ni 10 e gad ra fil riy e n’en ni be yog e Bible u murung’agen e re engel nib kireb nem ni aram Satan ni Moonyan’. Kan pag Satan nge pi engel rok ni ka nog e pi kan nib kireb ngorad ni ngar pared u tharmiy u taaboch i ngiyal’. Ere, gathi gubin e engel u tharmiy ni ur folgad rok Got. Machane, ra thil u nap’an nra tabab Gil’ilungun Got ko gagiyeg. Ya ra cham Jesus Kristus ni ka fini Pilung ngak Satan.​—Mu beeg e Revelation 12:7-9.

12. Mang l’agruw ban’en ni ke buch ni be weliy e Revelation 12:10 murung’agen?

¹² Be yog e thin ko profet e n’en ni ke buch u tharmiy  ni gaar: “Mu gu rung’ag ba lam ni ba ga’ u lan e tharmiy ni be gaar, ‘Ke taw ngal’an ni nge thapeg Got e girdi’ ngak! Chiney e ke dag Got gelngin ni ir e pilung! Chiney e ke dag e Messiah rok gelngin! Ya faanem ni ma egnag pi walagdad ni ma yib i sak’iy nga p’eowchen Got ngi i thibthibnagrad ni rran nge nep’ e ka nin’ nga wuru’ e tharmiy.’” (Revelation 12:10) Kam guy l’agruw ban’en nib ga’ fan ni ke buch ni be weliy e re thin nu Bible nem? Som’on e ke tabab Jesus Kristus ko gagiyeg u Gil’ilungun Got. Ma bin migid, e ka nin’ Satan u tharmiy nga fayleng.

13. Mang angin ni ka nin’ Satan nga wuru’ e tharmiy?

¹³ Mang angin e gali n’ey ni ke buch? Gad ra beeg murung’agen ni gaar: “Mu felfelan’gad e pi tharmiy, ni gimed urngin e piin ni gimed be par u wur!” (Revelation 12:12) Kari felfelan’ e pi engel nib yul’yul’ ya daki moy Satan nge pi engel rok u tharmiy. Gubin e engel u tharmiy ni yad be fol rok Jehovah Got. Kari gapas e tharmiy ma ke taareban’uy ma yibe rin’ e tin nib m’agan’ Got ngay.

14. Mang e ke buch ni bochan e ka nin’ Satan nga fayleng?

¹⁴ Ma uw rogon e fayleng? Be gaar e Bible: “Ri bayi gafgow e fayleng nge day! Ya ke yib fare Moonyan’ ngomed ni kari damumuw, ya manang ndaki n’uw nap’an ni nge par.” (Revelation 12:12) Kari damumuw Satan ni bochan e ka nin’ nga wuru’ e tharmiy ma manang ndaki n’uw nap’an ni nge par. Ma bochan ni kari damumuw ma aram fan ni be ‘gafgownag’ e fayleng. Bin migid e guruy e gad ra weliy riy boch murung’agen e re “gafgow” nem. Bochan ni kad nanged e re n’ey, ma rayog ni ngad fithed gadad  ni nge lungudad, Uw rogon nra lebguy Got e tin nib m’agan’ ngay u daken Gil’ilungun?

15. Mang e ba m’agan’ Got ngay ni fan ko fayleng?

¹⁵ Ka ga manang faram e n’en nib m’agan’ Got ngay ni fan ko fayleng? Kam fil e re n’ey ko Guruy ni 3. I tamilangnag Got u Eden nib m’agan’ ngay ni nge paradis e fayleng me par e girdi’ riy ndab ra m’ad ma yad ba mat’aw. Machane, ke waliy Satan Adam nge Efa ni ngar denengow, ma aram e daki lebug e tin nib m’agan’ Got ngay. Yugu aram rogon ma dawori thil e n’en nib m’agan’ Got ngay ni fan ko fayleng. Kab m’agan’ Jehovah ngay ni nge par e piin nib mat’aw u fayleng u “fithik’ e gapas, me par ni taferad ni dariy n’umngin nap’an.” (Psalm 37:29) Ma aram e n’en nra rin’ Gil’ilungun Got. Uw rogon nra rin’ e re n’em?

16, 17. Mang e be yog e Daniel 2:44 u murung’agen Gil’ilungun Got?

¹⁶ Mu lemnag fare yiiy ni bay ko Daniel 2:44 ni gaar: “Ngiyal’ ni bay i gagiyeg e pi pilung nem, e aram e bayi sunumeg Got nu tharmiy reb e gagiyeg ndariy e rofen nra mus. Ma binem e gagiyeg e dariy be’ nra gel ngay biid, machane bayi thirif u but’ urngin e pi pilung nem nge gagiyeg ni yad be tay me mang fa birok e gagiyeg e i par ndariy n’umngin nap’an.” Mang e be yog e re thin nem u murung’agen Gil’ilungun Got?

¹⁷ Som’on e be yog nra sunmiy Got Gil’ilungun ko “ngiyal’ ni be gagiyeg e pi pilung” riy ara ngiyal’ ni be gagiyeg e pi am nu fayleng riy. Bin migid e ra par Gil’ilungun Got ara Gagiyeg rok ndariy n’umngin nap’an. Ma dariy reb e am nra gel ngay fa yan nga lon biid. Bin dalip e ra cham me gel Gil’ilungun Got ko pi am ko re  fayleng ney. Ma ra yan i tomur, ma aram e re am nra magey nga i gagiyegnag e girdi’ nu fayleng. Me par e girdi’ nib felfelan’ u tan e gagiyeg ko re am nem.

18. Mang fithingan e bin tomur e mahl u thilin Gil’ilungun Got nge pi am ko re fayleng ney?

¹⁸ Boor ban’en ni be yog e Bible u murung’agen e bin tomur e mahl u thilin Gil’ilungun Got nge pi am nu fayleng. Bod ni be yog e Bible nnap’an nra chugur e tomur ma ra chel e pi kan nib kireb ngar bannaged e “pi pilung u fayleng ni polo’.” Ni mang fan? Ya “ngar kunuyed yad nga taabang ni fan ko mahl ni fan ko fare rran ni ba ga’ fan, ni Rran rok Got ni Gubin ma Rayog Rok.” Ma aram min kunuy e pi pilung nu fayleng nga taabang “nga bang ni ka nog yu Armaggedon ngay ni thin ni Hebrew.” (Revelation 16:14, 16) Bochan e n’en ni be yog fapi thin ni kad beeged, ma fithingan e bin tomur e mahl u thilin e am ko girdi’ nge Gil’ilungun Got e Armageddon.

19, 20. Mang fan ndawori buch e tin nib m’agan’ Got ngay ni fan ko fayleng?

¹⁹ Mang e ra rin’ Gil’ilungun Got u tomuren fare mahl ni Armageddon? Am lemnag bayay e n’en nib m’agan’ Got ngay ni fan ko fayleng. Ba m’agan’ Jehovah Got ngay ni nge sug e fayleng ko girdi’ nib mat’aw mar pigpiggad ngak u Paradis. Machane, mang fan nder yag ni nge buch e re n’ey e chiney? Bin som’on e ka gad bogi tadenen ndawor da flontgad ni gad ma m’ar ma gad ma yim’. Machane, kad filed faram ko Guruy ni 5 ni ke yim’ Jesus ni fan ngodad ni bochan e nge yag e yafos ni manemus ngodad. Ere, dabisiy ni ka ga manang fapi thin ni yog John ni gaar: “Yi Got e rib t’uf e girdi’ nu fayleng rok, ma aram me pi’ Fak ni  kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.”​—John 3:16.

²⁰ Ku reb e magawon rodad e ngiyal’ ney e boor e girdi’ ni yad ma rin’ e kireb. Yad ma ban ma yad ba sasalap ma yad ma un ko ngongol ndarngal. Ma dubrad ni ngar rin’ed e tin nib m’agan’ Got ngay. Yira thang e piin nib kireb u nap’an e mahl rok Got ni Armageddon. (Mu beeg e Psalm 37:10.) Ku reb i fan ndanir rin’ e tin nib m’agan’ Got ngay e ngiyal’ ney e bochan e pi am nu fayleng. Boor e am nder yag ni nge gagiyeg nib fel’ rogon. Be yog e Bible nre fayleng ney e: “Ba fayleng ni bay boch e girdi’ riy ni ba gel gelngirad ma boch e be gafgow u tan pa’rad.”​—Eklesiastes 8:9, BT.

21. Uw rogon nra lebguy Got e tin nib m’agan’ ngay u daken Gil’ilungun?

²¹ Tomuren e Armageddon e taareb e am nra gagiyegnag e girdi’, ni aram e Gil’ilungun Got. Ra lebguy e re Am nem e tin nib m’agan’ Got ngay me yibnag e flaab ko girdi’. Re Am nem e ra thang Satan nge pi engel rok. (Revelation 20:1-3) Ma aram e ra yib angin e biyul rok Jesus ngak e girdi’ nib yul’yul’, ma aram e dab kun m’ar ma dab ku unim’ me yag ni par e girdi’ u tan e Am rok Got ndariy n’umngin nap’an. (Mu beeg e Revelation 22:1-3.) Ra paradis e fayleng ni ga’ngin me lebguy Gil’ilungun Got e tin nib m’agan’ Got ngay ni fan ko fayleng me thothupnag fithingan Got. Mang e be yip’ fan e re n’ey? Be yip’ fan nra munmun ma gubin e girdi’ ni yad be par u tan Gil’ilungun Got e yad ra pining e sorok nga fithingan Jehovah.

22. Uw rogon ni kad nanged nde tabab Gil’ilungun Got ko gagiyeg u nap’an ni immoy Jesus u fayleng ara tomuren ni ke fas ko yam’?

²² Nap’an ni yog Jesus ngak pi gachalpen ni ngar meybilgad ni nge lungurad “Ma ga par ni gur e ga be gagiyegnagmad,” mab tamilang ndawori tabab Gil’ilungun Got ko gagiyeg e ngiyal’ n’em. Ere gur, i tabab Gil’ilungun Got ko gagiyeg u nap’an ni yan Jesus nga tharmiy? Danga’, ya yog Peter nge Paul ni tomuren ni fas Jesus ko yam’ me lebug fare yiiy ni bay ko Psalm 110:1 ni gaar: “I Somol e gaar ngak e somol rog, ni aram fare pilung, ‘Mpar iray nga ba’ ni mat’aw rog nge yan i mada’ ko ngiyal’ ni bay gu tay e pi toogor rom nga tan e rifrif u em.’” (Acts 2:32-35; Hebrews 10:12, 13) Bay n’umngin nap’an ni nge son Jesus.

23. (a) Wuin e tabab Gil’ilungun Got ko gagiyeg? (b) Mang e gad ra fil ko bin migid e guruy?

²³ Uw n’umngin nap’an ni nge son Jesus? Nap’an e bin 19 nge bin 20 e chibog me sumarnag e piin nib yul’yul’ ni yad ma fil e Bible nre ngiyal’ i n’em ni nge son Jesus riy e ra mus ko duw ni 1914. (Ra ga baadag ni ngam nang boch ban’en u murung’agen e re date ney, mag guy fare article ni bay ko Yugu Boch e Thin ni kenggin e “1914 e Reb e Duw nib Ga’ Fan ko Yiiy u Bible.”) Pi n’en ni ke buch u fayleng ni ka  nap’an e duw ni 1914 e be micheg nib puluw e sumar rok e pi girdi’ nib yul’yul’ nem ni yad ma fil e Bible. Pi yiiy nu Bible ni ke lebug e be dag ni ke Pilung Kristus ko duw ni 1914 ma ke tabab Gil’ilungun Got ko gagiyeg u tharmiy. Ere, gad bay ko ngiyal’ ni “daki n’uw nap’an ni nge par” Satan riy. (Revelation 12:12; Psalm 110:2) Ere, rayog ni nga dogned ndab ki n’uw nap’an ma ra lebguy Gil’ilungun Got e tin nib m’agan’ Got ngay u fayleng. Gathi kam felfelan’ ni kam nang e re n’ey? Ba mich u wan’um fa danga’? Bin ni migid e guruy e ga ra fil riy nriyul’ ni be fil e Bible e re n’ey.