1. ¿Xí laay ni rimbu millón buñ raquiin guientzaayno?

MILLÓN de buñ ló guidopynac Gudxlio nanyibu laay ni laa padrenuestro. Nacní toib laay ni Jesucristo biduidy par gann buñ ximod guininé Dios. Ni rasetlaa laay reʼ nigolú rasacni. Guisuidyno tzón cós ni ranab laay reʼ ni gacné lóono guienno más xí ni merpa rasuidy la Biblia.

2. ¿Xí tzón cós bisuidy Jesús xpiin guinab lóo Dios?

² Ro rasaló laay padrenuestro, Jesús gochbu ni cacadiag láabu: «Lóoto, non guininéto Dios scareʼ: Bixiosdo ni noʼ guibá, gac nayaa laalo. Guieed Gobierno xtunylo né gac ni nálo xomod lainy guibá, láaca ló gudxlio» (Mateo 6:9-13). ¿Ximod rarexa tzón cós ni rasetlaa laay reʼ?

3. ¿Xí raquiin ganno de Gobierno xtuny Dios?

³ Ma bisuidyno de laa Dios, Jehová. Láaca ma bisuidyno ni bunybu né ni gonybu par buñ. Per ¿xí biduidy Jesús diitz órni goniʼbu que guinabno: «Guieed Gobierno xtunylo»? ¿Xí ngú Gobierno xtuny Dios? ¿Ximod órni guieedni gony nayaani laa Dios? Ni guieed Gobierno reʼ, ¿xigony raquiinni par gac ni ná Dios?

4. ¿Xí ngú Gobierno xtuny Dios, né chú rony Mandary loni?

⁴ Gobierno reʼ Jehová Dios bisaʼ láani, né láacabu golúbu chú gony mandary loni. ¿Chú cayony Mandary Gobierno xtuny Dios? Jesucristo. Diti noʼ toib buñgudxlio ni rony mandary ni rigaʼl láabu, por ngú láabu ngú «ni nac Rey de guirá ni rony mandary né Señor de guirá ni rony mandary xomod señor» (1 Timoteo 6:15). Jesús nap galnadip par gony más cós tzaay que nitisi buñgudxlio ni natzaay xcalrrien ni rony mandary.

5. ¿Desde pu lagary rony mandary Gobierno xtuny Dios, né chú layibu sony mandaryni?

⁵ ¿Desde pu lagary rony mandary Gobierno xtuny Dios? ¿Pu lagary noʼ Jesús? Xomod ma bisuidyno, Jesús golxigaʼbu ló yac nadop, né después biásbu lad gueʼet né sieebu guibá (Hechos 2:33). Scú láani, Gobierno xtuny Dios noʼni guibá. Por ngú la Biblia rabeʼ laani: «Gobierno ni noʼ guibá» (2 Timoteo 4:18). Ná Gobierno reʼ noʼni guibá, gony mandaryni Gudxlio (bíil Revelación 11:15).

6, 7. Jesús ni rony Mandary, ¿xigony diti noʼ stoib xomod láabu?

⁶ Jesús ni rony Mandary, ¿xigony diti noʼ stoib xomod láabu? Por toibtica razón, diti sioʼ dzú saitybu. Diti nacbu xomod stipnés ni rony mandary ló Gudxlio. La Biblia ná que «láabu ngú toibguielot ni diti labúu raity, ni rabés ronoʼ guii ro ni toib buñ labúu radxin» (1 Timoteo 6:16). Ndeʼ raduidy diitz que guirá cós tzaay ni gonybu, sácni por tipzó. Né sonybu xiroʼgolu cós tzaay.

⁷ Buny pensary ló profecía ni raniʼ de Jesús: «Espíritu xtuny Jehová sadxin ronoʼbu, espíritu de xiroʼ galnann né de galrrien, espíritu par guilitz né de galnadip, espíritu de galnann né de galrradzuiby Jehová. Né sioladxbu guidzuibybu Jehová. Láabu diti sony  juzgarbu por ni guibiʼsi bisalóbu, diti sony censurarbu nosi ni guicadiag guidiagbu. Láabu toibsi midid sony juzgarbu buñdxo, né xinésni sony censurarbu par gacnébu buñ nadaʼa ló gudxlio» (Isaías 11:2-4). Diitzreʼ raslooy que Jesús gony xinésni né gandxiʼbu buñ órni gony mandarybu ló Gudxlio. ¿Rioladxlo tzó toib ni gony mandary looy modreʼ la?

8. ¿Chú layibu gony mandary né Jesús?

⁸ Noʼ stoib cós ni raquiin ganno de Gobierno xtuny Dios. Diti toibsi Jesús gony mandary láaca sioʼ stipnés ni gony mandary né láabu. Guibiʼno ximod. Pablo gochbu Timoteo: «Pal cayonysano guantary, lóono láaca sonyno mandary toibsi» (2 Timoteo 2:12). Scú, Pablo, Timoteo né stipnés ni buny ni ná Jehová ni láabu golúbu par gony mandary toibsi né Jesús ló Gobierno ni noʼ guibá. ¿Balacyibu gony mandary né Jesús?

9. ¿Balac buñ gony mandary né Jesús, né pu dzú gosaló Dios golú layibu?

⁹ Xomod ma bisuidyno ló capítulo 7 Juan bibiʼ «Xilieen [Jesucristo] sagaʼ laidy dainy ni laa Sión, [lagary ronoʼbu lainy guibá] né ni noʼ né láabu ngú 144,000 ni caa lacaa laabu né laa Bixiosbu». ¿Chú layibu nac 144,000? Juan raniʼ: «Layibu canalyibu Xilieen rotísi sée. Goyoʼ ni gosiʼ layibu lad buñgudxlio xomod primer cuaʼan par Dios né par Xilieen» (Revelación 14:1, 4). Scú láani, nacyibu buñ ni rasob né racanal Jesucristo ni Dios rabú par gony mandary né Jesús. Órni raityibu riásyibu par guibanyibu guibá né «gony mandaryibu ló gudxlio» toibsi né Jesús (Revelación 5:10). Desde ló xtzú xpiin Jesús, Dios cabúbu buñ ni rasob láabu par guisaʼ gacyibu 144,000.

10. ¿Xigony nigolú natzaay Jehová por ni golúbu Jesús né 144,000 par gony mandary buñgudxlio?

¹⁰ Jehová natzaaybu por ni golúbu Jesús né 144,000  par gony mandary buñgudxlio. Bunybu ndeʼ portín Jesús góc buñgudxlio, né nambu xí rasac buñ órni noʼ ló galrrioop. Pablo goniʼ que «diti napno toib sumo sacerdote ni diti labúu guieen mod rasacno, xalagary ngú napno toib ni ma godudy ló prueby ló guirá mod xomodca lóono, per sin galkié» (Hebreos 4:15; 5:8). Ni gony mandary né láabu láaca ma godudy ló galrrioop ni radudy buñgudxlio ló. Per diti nosi ngú, láaca bunyibu xtem par diti bichéyibu né buny guantaryibu guirá clas galguitz. ¡Nandxichno que sienyibu galnagan ni racaló buñgudxlio!

11. ¿Xigony goniʼ Jesús que guirá ni racanal láabu guinabyibu lóo Dios que gac ni nábu lainy guibá?

¹¹ Órni Jesucristo goniʼ que xpiimbu guinab lóo Dios guieed Gobierno xtunybu, goniʼbu que non guinabyibu gac ni ná Dios «xomod lainy guibá, láaca ló gudxlio». Lainy guibá ronoʼ Dios noʼ ángeles xtunybu ro guirási ór cayony ni nábu. Ló capítulo 3 bisuidyno que toib ángel mal ma diti bisob Dios, né buny gann que Adán né Eva naché. Ló capítulo 10 guisuidyno más xí ni rasuidy la Biblia de ángel reʼ, ni rimbuno xomod Buñdzab. Dios biduidy lagary Buñdzab né ángeles ni bidzak láabu —ni laa demony— naguaʼyibu guibá por tidxósi tiemp. Por ngú, ló xtzú Jesús diti guirá ángeles ni goyoʼ guibá buny ni ná Dios. Per ndeʼ nadzaʼni órni Gobierno xtuny Dios né Jesucristo nasaló ñony Mandary, né ñony gann Buñdzab (bíil Revelación 12:7-9).

12. ¿Xí chop cós ni raquiin ganno sieed ló Revelación 12:10?

¹² Profecías ni guisuidyno rabexa xí ni gac: «Bicadiaga toib rudx fuers lainy guibá ni goniʼ: ¡Nigoreʼ ma noʼ ni guilaa né galnadip né Gobierno xtuny Dios né xcalmandary Cristo, portín ma goyoʼ ni bilaʼk, [Buñdzab]  ni ragotz dool xhermanno ni ragotz dool layibu dzúna gueʼel nisló Dios!» (Revelación 12:10). ¿Raduidylo cuent chop cós ni gac ni raquiin guienno ni rasetlaa texto reʼ la? Primer, Gobierno xtuny Dios ni Jesús racaʼ rasaló rony mandary. Ni rarop, goyoʼ ni bilaʼk Buñdzab né biabbu ló Gudxlio.

13. ¿Xí láani góc lainy guibá órni goyoʼ ni bilaʼk Buñdzab lagarycu?

¹³ ¿Xí bitné chop cós reʼ ni góc lainy guibá? Guisuidyno xí láani góc lainy guibá: «Por ngú, ¡colguibaladx, guibá, né ni rabés cú!» (Revelación 12:12). Scú, ángeles ni rasob Jehová rabaladx portín Buñdzab né xidemony ma diti noʼ guibá. Guirá ángeles ni noʼ guibá rony ni ná Dios, né raguaʼ goxtiguie. Labúu guinino que lainy guibá ma cayac ni ná Dios.

14. ¿Xí láani góc ló Gudxlio órni Buñdzab biab loni?

¹⁴ Per ¿xí góc né Gudxlio? La Biblia ná: «¡Maláy de gudxlio né de nisdaʼ!, portín Buñdzab bietj ro nóoto, né nigolú cadzuitzbu, portín ma nambu que ma tidxósi tiemp napbu» (Revelación 12:12). Buñdzab cadzuitzgoluʼ portín goyoʼ ni bilaʼk láabu né biabbu ló Gudxlio, né ma tidxósi tiemp napbu. Por ngú ragoʼbu xiroʼgolu galnagan ló Gudxlio. Ló capítulo ni sieed guisuidyno más de galnagan ni ragoʼ Buñdzab ló Gudxlio. Per guirá ni ma bisuidyno ronyni que guinabdiitzno, ¿ximod Gobierno xtuny Dios gony que gac ni ná Dios ló Gudxlio?

15. ¿Xí ni nainy Dios gony né Gudxlio?

¹⁵ Bisednaladx xí ni nainy Dios gony ló Gudxlio. Xomod ma bisuidyno ló capítulo 3 ló lagary sacroyen de Edén Dios bislooy que goniiny láabu que Gudxlio guidxin gac toib lagary móz né guidzani de buñtzay ni diti saity. Buñdzab buny gann que Adán né Eva naché né ndeʼ buny que diti ñac cumplir ni maca ni ná Jehová  gac ló Gudxlio. Láabu raniinysabu que gac cumplir diitzreʼ: «Buñ ni rony xinésni xtunyibu sac gudxlio, né por tipzó sabanyibu loni» (Salmo 37:29). Gobierno xtuny Dios sony láani, ¿ximod gacni?

16, 17. ¿Xí láani raiby Daniel 2:44 lóono de Gobierno xtuny Dios?

¹⁶ Ló Daniel 2:44 radzelno profecía reʼ: «Ló xtzú guirá ni cayony mandary cú, Dios ni noʼ guibá sagoʼbu toib gobierno ni dipa sanitló. Né gobierno reʼ diti sadudyni ladxña stoib gudx. Sonynoyni né sanitlóni guirá gobiernos reʼ, né sony mandaryni por tipzó». ¿Xí raiby profecía reʼ lóono de Gobierno xtuny Dios?

¹⁷ Primer, raibyni lóono que Gobierno xtuny Dios sioʼni «ló xtzú guirá ni cayony mandary cú» o laʼga noʼ stipnés gobierno xtuny buñgudxlio. Ni rarop, raibyni lóono que Gobierno xtuny Dios, diti sadudy xtzúni. Diti sioʼ ni gony gann láani né diti sioʼ stoib gobierno xalagaryni. Ni rion, texto reʼ raibyni lóono que sioʼ guerr ro Gobierno xtuny Dios sacaló gobierno xtuny buñgudxlio, per Gobierno xtuny Dios sony gann. Órni guilox ndeʼ, nosi Gobierno reʼ gony mandary ló Gudxlio. Ór cú buñ saguaʼ sacrodiguieʼ ló mandary ni diti ma bimbuyibu.

18. ¿Ximod laa guerr ni tzó ro Gobierno xtuny Dios sacaló gobierno xtuny buñgudxlio?

¹⁸ La Biblia raniʼtzay de guerr ni gac ro Gobierno xtuny Dios sacaló gobierno xtuny buñgudxlio. Raniʼtzayni que órni guibanyno ló dzú ni ma guidubylagá, demony guichetz galrrascú par guiscúbu «guirá buñ ni rony mandary guidopynac gudxlio». ¿Xigony? «Par guidopyibu ló guerr de xtzú rodann Dios ni nap Xiroʼgolu galnadip». Guirá ni rony mandary guidopyibu «lagary ni diitz hebreo laa Armagedón» (Revelación 16:14, 16). Xomod ná chop textos reʼ guerr  ni tzoʼ ro Gobierno xtuny Dios guicaló gobierno xtuny buñgudxlio laa Armagedón.

19, 20. ¿Xigony diti cayac ni ná Dios ló Gudxlio nigoreʼ?

¹⁹ ¿Xí láani gony gann Gobierno xtuny Dios ló guerr ni laa Armagedón? Guibiʼno stoib cós ni gony Gobierno xtuny Dios ló Gudxlio. Ni nainy Jehová ngú que Gudxlio guidzani de buñtzay né guibanyibu ló Gudxlio móz. Per ¿xigony ni raniiny Jehová diti cayac nigoreʼ? Portín buñ galkié lóono, raxoʼno né raityno. Ma bisuidyno ló capítulo 5 que Jesús goity por lóono par labúu guibanyno tipzó. Sigory rasetnaladxlo diitz ni sieed ló Evangelio ni bicaʼ Juan: «Portín nigolú gondxiʼ Dios buñgudxlio por ngú biduidybu toibguielot Xiimbu, modreʼ guirá ni gap fe láabu diti guinitló né labúu guibany tipzó» (Juan 3:16).

²⁰ Stoib galnagan ni rony que diti cayac ni ná Jehová, xidalguixo buñ rascú saʼ né rony galyoxh. Diti nainy layibu guisobyibu Dios. Buñ ni rony cós mal sanitlóyibu ló guerr xtuny Dios, ni laa Armagedón (bíil Salmo 37:10). Stoib razón ni diti labúu rac ni ná Dios, gobiernos ni noʼ diti racnéni buñ par gony ni ná Dios. Xidal gobiernos ni noʼ ló Gudxlio diti nap galnadip, nacyibu buñ mal né moxter. Nayadit raniʼ la Biblia láani: «Buñ rony mandary buñ par gonybu mal láacabu» (Eclesiastés 8:9).

21. ¿Ximod Gobierno xtuny Dios sony que ló Gudxlio gac ni ná Jehová?

²¹ Órni ma godudy Armagedón toibsi Gobierno gony mandary, láani ngú Gobierno xtuny Dios. Ndeʼ gony ni ná Dios né sitné xiroʼ galnasác. Gobierno reʼ guinitló Buñdzab né xidemony (Revelación 20:1-3). Sonyni que xcalgoity Jesús guisac más, modreʼ buñ ni rony ni ná Dios ma diti saxoʼyibu né saityibu. Láaca ló Gobierno  xtuny Dios labúu guibanyibu tipzó (bíil Revelación 22:1-3). Gudxlio sadxin sac toib lagary móz. Né scú Gobierno reʼ gony ni ná Jehová né gony nayaa laabu. ¿Xí raduidy diitz ndeʼ? Por Gobierno reʼ guirá buñ gonyxiroʼ laa Dios.

22. ¿Xigony nandxichno que Gobierno xtuny Dios diti bidxinni órni Jesús goyoʼbu ló Gudxlio o órni biásbu lad gueʼet?

²² Órni Jesús góoch ni cuanal láabu que guinabyibu lóo Dios «Guieed Gobierno xtuny[bu]» biendxichni que par ló dzúcu Gobierno reʼ diti ma bidxinni. ¿Bieedni órni Jesús siee guibá la? Yaca, portín Pedro né Pablo guiropcayibu goniʼyibu que órni Jesús biás lad gueʼet profecía ni sieed ló Salmo 110:1, góc cumplir en láabu: «Diitz ni Jehová góoch a Señor xtuni láani ndeʼ: Gurú niis ladbuʼya dada órni quiixi guirá xi enemiglo xomod bank par ñeʼlo» (Hechos 2:32-35; Hebreos 10:12, 13). Scú láani, Jesucristo golésbu tidxo tiemp.

23. a) ¿Pu dzú gosaló buny mandary Gobierno xtuny Dios? b) ¿Xí guisuidyno ló capítulo ni sieed?

²³ ¿Balac tiemp golésbu? Ló siglo 19 né siglo 20 tidxo buñ ni bisuidy la Biblia, goleʼ xcuent que tiemp ni cués Jesús naloxni íz 1914. (Pal nainy looy gannlo más labúu guibiʼlo apéndice ni laa, «1914: íz ni rasac ni rasetlaa profecías ni sieed ló la Biblia.») Guirá  cós ni cayac ló guidopynac Gudxlio, ni gosaló íz 1914 raduidytzayni diitz que ni buny pensary tidxo buñ ni bisuidy la Biblia nigolúni. Ni carebuʼ guirá profecías ni sieed ló la Biblia raslooyni que íz 1914 Jesucristo gosaló buny Mandary, né Gobierno xtuny Dios gosaló buny mandary. Scú, lóono rabésno ló «tidxósi tiemp» ni nap Buñdzab (Revelación 12:12; Salmo 110:2). Láaca labúu guinino que mápa mer Gobierno reʼ gony que ni ná Dios gac ló Gudxlio. ¿Nac ndeʼ diitz sacró par looy la? ¿Raluladxlo que nigolú sácni la? Capítulo ni sieed gacné lóono guienno xí ni merpa rasuidy la Biblia de guiráni.