1. Saen niato maaaraman an manongod sa ngapit?

NAGDALAN na daw kamo kan mga bareta sa telebisyon asin nag-isip-isip, ‘Ano daw an kaaabtan kan kinaban na ini?’ An makaturotristeng mga bagay bigla na sana asin dai inaasahan na nangyayari kaya mayong tawo na makakapagsabi antes pa kun ano an mangyayari sa aga. (Santiago 4:14) Minsan siring, aram ni Jehova kun ano an nakatagama sa ngapit. (Isaias 46:10) Kaidtong haloy na an nakaagi ihinula kan saiyang Tataramon, an Biblia, bako sana an maraot na mga bagay na nangyayari sa satong kaaldawan kundi siring man an marahayon na mga bagay na mangyayari sa harani nang ngapit.

2, 3. Ano an ihinapot kan mga disipulo ki Jesus, asin paano sia suminimbag?

² Si Jesu-Cristo nagtaram manongod sa Kahadean nin Dios, na matapos sa karatan asin mapangyaring magin paraiso an daga. (Lucas 4:43) Gustong maaraman kan mga tawo kun noarin madatong an Kahadean na iyan. Sa katunayan, an mga disipulo ni Jesus naghapot saiya: “Ano an magigin tanda kan saimong presensia asin kan pagtatapos kan sistema nin mga bagay?” (Mateo 24:3) Bilang simbag sinabihan sinda ni Jesus na si Jehova Dios sana an eksaktong nakakaaram kun noarin madatong an katapusan kan sistemang ini nin mga bagay. (Mateo  24:36) Alagad ihinula ni Jesus an mga bagay na mangyayari sa daga bago mismo pangyarihon kan Kahadean an tunay na katoninongan asin katiwasayan sa katawohan. An ihinula nia nangyayari na ngonyan!

³ Bago niato siyasaton an ebidensia na kita nabubuhay na sa “pagtatapos kan sistema nin mga bagay,” estudyaran niato sa madali an sarong guerra na mayo nin tawo na posibleng makaheling. Iyan nangyari sa dai naheheling na rona nin mga espiritu, asin an kinaabtan kaiyan nakakaapektar sato.

4, 5. (a) Ano an nangyari sa langit dai nahaloy pakatapos na patukawon si Jesus bilang Hade? (b) Segun sa Kapahayagan 12:12, ano an magigin resulta kan guerra sa langit?

⁴ Ipinaliwanag sa sinusundan na kapitulo sa librong ini na si Jesu-Cristo nagin Hade sa langit kan taon 1914. (Daniel 7:13, 14) Dai nahaloy pakatapos niang akoon an kapangyarihan sa Kahadean, si Jesus huminiro. “Puminutok an guerra sa langit,” an sabi kan Biblia. “Si Miguel [ibang ngaran ni Jesus] asin an saiyang mga anghel nakipaglaban sa dragon [si Satanas na Diablo], asin an dragon asin an mga anghel kaiyan nakipaglaban.” * Si Satanas asin an saiyang maraot na mga anghel, an mga demonyo, nadaog sa guerrang iyan asin pinalayas sa langit pasiring sa daga. Naggayagaya an maimbod na espiritung mga aki nin Dios ta mayo na si Satanas asin an saiyang mga demonyo. Minsan siring, dai maeeksperyensiahan kan mga tawo an siring na kagayagayahan. Imbes, an Biblia naghuhula: “Herak man kan daga . . . huli ta huminilig na dian sa saindo an Diablo, na may dakulang kaanggotan, sa pakaaram na halipot na sana an saiyang panahon.”​—Kapahayagan 12:7, 9, 12.

⁵ Mangnohon tabi nindo kun ano an magigin resulta kan guerra sa langit. Sa saiyang nagpuputok na kaanggotan, si Satanas matao nin grabeng sakit, o problema, sa mga nag-eerok sa daga. Siring kan maheheling nindo, kita nabubuhay na ngonyan sa panahon na iyan nin grabeng sakit. Alagad medyo  madali sana iyan​—‘halipot sanang panahon.’ Dawa si Satanas nakakaaram kaiyan. Inaapod kan Biblia an peryodong ini na an “huring mga aldaw.” (2 Timoteo 3:1) Naoogma nanggad kita na sa dai na mahahaloy hahaleon nin Dios an impluwensia kan Diablo sa daga! Estudyaran niato an nagkapira sa mga ihinula sa Biblia na nangyayari ngonyan mismo. Pinapatunayan kaini na kita nabubuhay na sa huring mga aldaw asin na sa dai na mahahaloy itatao kan Kahadean nin Dios an daing katapusan na mga bendisyon sa mga namomoot ki Jehova. Enot, siyasaton niato an apat na kabtang kan tanda na sinabi ni Jesus na mapamidbid kan panahon na kinabubuhayan niato.

6, 7. Paano naootob ngonyan an mga tataramon ni Jesus manongod sa mga guerra asin kakulangan nin kakanon?

⁶ “An nasyon matindog tumang sa nasyon asin an kahadean tumang sa kahadean.” (Mateo 24:7) Minilyon na tawo an nagkagaradan sa mga guerra durante kan nakaaging siglo. Isinurat nin sarong historyador na Britano: “An ika-20 siglo an pinakamadugo sa kasaysayan na nakarekord. . . . Iyan sarong siglo nin haros daing patod na guerra, na may nagkapira sanang haralipot na peryodo na mayo nin organisadong ralaban sa sarong lugar.” An sarong report kan Worldwatch Institute nagsasabi: “An kabilangan nin mga tawong biktima nin guerra kan [ika-20]  siglo tolong doble kan sa gabos na guerra poon kan enot na siglo AD sagkod 1899.” Labing 100 na milyon na tawo an nagadan bilang resulta nin mga guerra poon kan 1914. Dawa kun nag-agi na kita nin kamondoan na bunga nin pagkagadan sa guerra nin sarong namomotan, dai niato kayang masabotan an kamondoan asin kolog nin boot na inagihan nin minilyon.

⁷ “Magkakaigwa nin mga kakulangan nin kakanon.” (Mateo 24:7) An mga parasiyasat nagsasabi na luminangkaw nanggad an produksion nin kakanon durante kan nakaaging 30 taon. Minsan siring, nagpapadagos an kakulangan nin kakanon huli ta an dakol na tawo mayo nin igong kuartang pambakal nin kakanon o nin dagang matatanoman. Sa nagpoprogreso pa sanang mga nasyon, mga labing sarong bilyon katawo an kinakaipuhan na mabuhay sa ginaganar na sarong dolyar o mas hababa pa kada aldaw. An mayoriya digdi nag-aagi nin nagpapadagos na pagkagutom. Kinakalkulo kan World Health Organization na an malnutrisyon sarong mayor na dahelan nin pagkagadan nin labing limang milyon na aki kada taon.

8, 9. Ano an nagpapaheling na naotob an mga hula ni Jesus manongod sa mga linog asin peste?

⁸ “Magkakaigwa nin makokosog na linog.” (Lucas 21:11) Segun sa U.S. Geological Survey, may promedyong 19 darakulang linog an inaasahan kada taon. An mga ini may igong kosog tanganing madanyaran an mga edipisyo asin pagatakon an daga. Asin sa promedyo,  taon-taon nagkakaigwa nin mga linog na may igong kosog tanganing biyong malaglag an mga edipisyo. May mga rekord na nagpapaheling na labing duwang milyon an nagadan sa mga linog poon kan 1990. An sarong reperensia nagsasabi: “Dikit sana an nagibo kan mga pag-oswag sa teknolohiya tanganing mainaan an bilang nin mga nagagadan.”

⁹ “Magkakaigwa nin . . . mga peste.” (Lucas 21:11) Sa ibong nin mga pag-oswag sa medisina, an katawohan dinadamat nin dati na asin bagong mga helang. An sarong report nagsasabi na may 20 midbid na marhay na helang​—kaiba an tisis, malaria, asin kolera—​na nagin ordinaryo na sana sa nakaagi pa sanang mga dekada, asin may nagkapirang klase nin helang na paorog nang paorog na nagigin masakit paomayan paagi sa mga medisina. Sa katunayan, naglataw an kisuera 30 bagong helang. An nagkapira sa mga ini mayo pang aram na bolong asin nakakagadan.

10. Anong mga ugale na ihinula sa 2 Timoteo 3:1-5 an naheheling nindo sa mga tawo ngonyan?

¹⁰ Apuera sa paglaladawan kan nagkapirang pangyayari sa kinaban, ihinula kan Biblia na an huring mga aldaw mamimidbid man sa pagbabago sa sosyedad nin tawo. Ilinadawan ni apostol Pablo kun ano an magigin ugale nin mga tawo sa pankagabsan. Sa 2 Timoteo 3:1-5, mababasa niato: “Sa huring mga aldaw maabot an delikadong mga panahon na masakit  pakibagayan.” Sa sarong kabtang, sinabi ni Pablo na an mga tawo magigin

• mga mamomoton sa sainda man sana

• mga mamomoton sa kuarta

• mga masumbikal sa mga magurang

• mga bakong maimbod

• mga dai nin natural na kapadangatan

• mga mayong pagpopogol sa sadiri

• mga maringis

• mga mamomoton sa kasingawan imbes na mga mamomoton sa Dios

• may porma nin diosnon na debosyon alagad nagpapainda sa kapangyarihan kaiyan

11. Paano ilinaladawan kan Salmo 92:7 an mangyayari sa mga maraot?

¹¹ Nagin siring na daw kaiyan an mga tawo sa saindong komunidad? Daing duwa-duwa na iyo. May mga tawo sa gabos na lugar na maraot an ugale. Ipinapaheling kaini na sa dai na mahahaloy mahiro an Dios, huli ta sinasabi kan Biblia: “Kun an mga maraot nagsusupang na garo mga pananom asin an gabos na paragibo nin nakakadanyar namumurak, iyan tanganing sinda paraon sagkod lamang.”​—Salmo 92:7.

12, 13. Paano nagin abunda an “tunay na kaaraman” sa “panahon [na ini] kan katapusan”?

¹² An huring mga aldaw tunay nanggad  na pano nin grabeng sakit, siring kan ihinula kan Biblia. Minsan siring, sa purisaw na kinaban na ini may positibong mga pangyayari sa tahaw kan mga nagsasamba ki Jehova.

¹³ “An tunay na kaaraman magigin abunda,” an ihinula kan libro sa Biblia na Daniel. Noarin iyan mangyayari? Durante kan “panahon kan katapusan.” (Daniel 12:4) Nangorogna poon kan 1914, tinabangan ni Jehova an mga nagmamawot talaga na paglingkodan sia na tumalubo sa pakasabot kan Biblia. Nagtalubo sinda sa pakasabot kan mahalagang marhay na mga katotoohan manongod sa ngaran asin katuyohan nin Dios, sa pantubos na atang ni Jesu-Cristo, sa kamugtakan kan mga gadan, asin sa pagkabuhay liwat. Dugang pa, nanodan kan mga nagsasamba ki Jehova kun paano sinda mamumuhay sa paaging kapakipakinabang para sa sainda asin nagtatao nin kaomawan sa Dios. Nagkaigwa man sinda nin mas malinaw na pakasabot sa kabtang kan Kahadean nin Dios asin kun paano kaiyan huhusayon an mga bagay-bagay sa daga. Ano an ginigibo ninda sa kaaraman na ini? An hapot na iyan minagiya sato sa saro pang hula na naootob sa huring mga aldaw na ini.

14. Gurano kalakop ngonyan kan paghuhulit kan maogmang bareta kan Kahadean, asin sairisay an naghuhulit kaiyan?

¹⁴ “An maogmang baretang ini kan kahadean ihuhulit sa bilog na ineerokan na daga,” an sabi ni Jesu-Cristo sa saiyang hula manongod sa “pagtatapos kan sistema nin mga bagay.” (Mateo 24:​3, 14) Sa bilog na daga, an maogmang bareta kan Kahadean​—kun ano an Kahadean, kun ano an gigibohon kaiyan, asin kun paano niato maaako an mga bendisyon kaiyan—​ihinuhulit sa labing 230 kadagaan asin sa labing 400 na lenguahe. Minilyon na Saksi ni Jehova an maigot na naghuhulit kan maogmang bareta kan Kahadean. Sinda hale sa “gabos na nasyon asin tribo asin banwaan patin tataramon.” (Kapahayagan 7:9) Pinapamayohan nin mga Saksi an daing bayad na pakikipag-adal sa Biblia sa minilyon na tawo na gustong makaaram kun ano man nanggad an itinotokdo kan Biblia. Kanigoan kamakangangalas na kaotoban kan hula, nangorogna huling ihinula ni Jesus na an tunay na mga Kristiano ‘ikakaongis nin gabos na tawo’!​—Lucas 21:17.

15. (a) Nagtutubod daw kamo na kita nabubuhay na sa huring mga aldaw, asin taano? (b) Mangangahulogan nin ano “an katapusan” para sa mga nagkokontra ki Jehova asin para sa mga nagpapasakop sa pamamahala kan Kahadean nin Dios?

¹⁵ Mantang kadakol na hula sa Biblia an naootob ngonyan, dai daw kamo maoyon na kita nabubuhay na sa huring mga aldaw? Pakatapos ikahulit an maogmang bareta sa paaging naninigoan na si Jehova, “an katapusan” siertong madatong. (Mateo 24:14) “An katapusan” nangangahulogan kan panahon na hahaleon nin Dios an karatan sa daga. Tanganing laglagon an gabos na tuyong nagkokontra sa Saiya, gagamiton ni Jehova si Jesus asin an makapangyarihan na mga anghel. (2 Tesalonica 1:6-9) Dai na madadaya ni Satanas asin kan saiyang mga demonyo an mga nasyon. Pakatapos kaiyan, an Kahadean nin Dios mapaoran nin mga bendisyon sa gabos na nagpapasakop sa matanos na pamamahala kaiyan.​—Kapahayagan 20:1-3; 21:3-5.

16. Ano an madonong na gibohon nindo?

¹⁶ Huling harani na an katapusan kan sistema ni Satanas, kaipuhan na hapoton niato an satong sadiri, ‘Ano an maninigo na ginigibo ko?’ Madonong na padagos na mag-adal nin orog pa manongod ki Jehova asin sa saiyang mga kahagadan sa sato. (Juan 17:3) Magin maigot na estudyante sa Biblia. Ugaleon nindong makiasosyar nin regular sa iba na naghihingoang gibohon an kabotan ni Jehova. (Hebreo 10:24, 25) Ilaog sa isip an abundang kaaraman na itinatao ni Jehova Dios sa mga tawo sa bilog na kinaban, asin gumibo nin kaipuhan na mga pagbabago sa saindong buhay tanganing kamtan nindo an pabor nin Dios.​—Santiago 4:8.

17. Taano ta matataraka an kadaklan na tawo kan pagkalaglag kan mga maraot?

¹⁷ Ihinula ni Jesus na iignorohon kan kadaklan na tawo an ebidensia na kita nabubuhay na sa huring mga aldaw. An pagkalaglag kan mga maraot magigin biglaan asin dai inaasahan. Siring sa sarong parahabon kun banggi, matataraka kaiyan an kadaklan na tawo. (1 Tesalonica 5:2) Si Jesus nagpatanid: “Kun paano kan mga aldaw ni Noe, siring man an presensia kan Aki  nin tawo. Huli ta kun paano sinda kan mga aldaw na idto bago kan baha, nagkakarakan asin nag-iirinom, an mga lalaki nag-aaragom asin an mga babae nagpapaaragom, sagkod kan aldaw na si Noe naglaog sa dahong; asin dai sinda nagmangno sagkod na dumatong an baha asin iinanod sinda gabos, magigin siring man kaiyan an presensia kan Aki nin tawo.”​—Mateo 24:37-39.

18. Anong patanid ni Jesus an maninigo niatong isapuso?

¹⁸ Huli kaini, sinabihan ni Jesus an mga naghihinanyog sa saiya: “Atenderan an saindong sadiri na an saindong mga puso dai noarin man mapagabatan nin sobrang pagkakan asin makosog na pag-inom patin mga kahaditan sa buhay, asin sa panale an aldaw na iyan mag-abot sa saindo na siring sa sarong siod. Huli ta madatong iyan sa gabos na nag-eerok sa ibabaw kan bilog na daga. Magpuka kamo, kun siring, na sa gabos na panahon nagngangayongayo na magin kamong mapanggana sa pagdulag sa gabos na ining bagay na nakatalagang mangyari, asin sa pagtindog [na may pag-oyon] sa atubangan kan Aki nin tawo.” (Lucas 21:34-36) Madonong na isapuso an mga tataramon ni Jesus. Taano? Huli ta an mga may pag-oyon ni Jehova Dios asin “kan Aki nin tawo,” si Jesu-Cristo, may esperansang makaligtas sa katapusan kan sistema nin mga bagay ni Satanas asin mabuhay sagkod lamang sa makangangalas na bagong kinaban na haranihon na!​—Juan 3:16; 2 Pedro 3:13.