1. ¿Achike wuj nbʼin ri xtbʼanatäj chi qawäch apo?

TOQ natzʼët ri noticias rikʼin bʼaʼ nabʼij: «¿Achike más xtbʼanatäj apo?». Wakami chaq kʼateʼ nqanaʼ e kʼo kʼayewal pa qawiʼ. Majun winäq ta chi Ruwachʼulew etamayon achike xtbʼanatäj chwaʼq kabʼij (Santiago 4:14). Ja kʼa ri Jehová retaman (Isaías 46:10). Rijaʼ ojer riʼ rubʼin pe chupam ri Biblia ri kʼayewal yeʼajin wakami, chuqaʼ ri urtusanïk xkeyaʼöx pa qawiʼ chi qawäch apo.

2, 3. ¿Achike xkajoʼ xketamaj rutzeqelibʼey ri Jesús, chuqaʼ achike xubʼij rijaʼ chi ke?

² Ri Jesucristo xutzijoj ruqʼatbʼäl tzij ri Dios. Ri qʼatbʼäl tzij riʼ xtukʼïs ruwäch ri itzelal y xtukotzʼijaj ruwäch ri Ruwachʼulew (Lucas 4:43). Ri winäq xeʼakʼaxan ri Jesús xkajoʼ xketamaj jampeʼ xtkʼojeʼ ri qʼatbʼäl tzij riʼ. Ri rutzeqelibʼey xkibʼij chi re: «¿Achike [...] retal richin ke riʼ nnabʼëx chi napon yan ri rukʼisibʼäl qʼij?» (Mateo 24:3). Ri Jesús xubʼij chi xa xe ri Jehová etamayon ri qʼij toq xtkʼis ruwäch ri itzelal (Mateo 24:36). Ja kʼa rijaʼ xubʼij achike kʼayewal xkebʼanatäj chi Ruwachʼulew toq ri Ajawaren xa  xtukʼäm yan pe ri uxlanibʼäl kʼuʼx. Ri kʼayewal riʼ yeʼajin chik wakami.

³ Richin nqetamaj chi kij ri kʼayewal yebʼanatäj pa «rukʼisibʼäl taq qʼij», nabʼey tqetamaj chi rij jun oyowal (chʼaʼoj) ri xbʼanatäj chi kaj. Ri oyowal riʼ majun winäq xtzʼeton, ri xbʼanatäj chupam ri oyowal kʼo xukʼäm pe pa qawiʼ.

4, 5. a) ¿Achike xbʼanatäj chi kaj toq xyaʼöx yan ri qʼatbʼäl tzij pa ruqʼaʼ ri Jesús? b) Achiʼel nubʼij ri Apocalipsis 12:12, ¿achike xbʼanatäj chi Ruwachʼulew toq xkʼaq pe ri Satanás?

⁴ Chupam ri jun kan tanaj xqetamaj chi ri Jesucristo xyaʼöx ri qʼatbʼäl tzij pa ruqʼaʼ pa 1914, chi laʼ chi kaj (tasikʼij Daniel 7:13, 14). Xa xe kʼa riʼ xutikirisaj rusamaj. Ri Biblia nubʼij: «Chi kaj xbʼanatäj jun oyowal. Ri ángel Miguel [jun chik rubʼiʼ ri Jesús] e rachibʼilan ri ru-ángel, xkibʼän oyowal rikʼin ri itzel chiköp [Satanás] y ri itzel taq ru-ángel». * Ri Satanás chuqaʼ ri itzel taq rachibʼil xechʼakatäj, ke riʼ xekʼaq pe chi Ruwachʼulew. Ri utziläj taq ángeles xekikot toq xelesäx pe ri Satanás chuqaʼ ri rachibʼil chi kaj. Ja kʼa ri winäq chi Ruwachʼulew kʼayewal xukʼäm pe pa kiwiʼ. Ri Biblia rubʼin pe reʼ: «Kan toqʼëx iwäch rïx ri ix kʼo chuwäch ri ruwachʼulew [...]. Ruma ri Itzel Winäq xxuleʼ qa iwikʼin rïx rikʼin janila royowal ruma rijaʼ retaman chi man kʼïy ta chik qʼij ri yaʼon chi re» (Apocalipsis 12:7, 9, 12).

⁵ Ri Satanás xyakatäj royowal ruma xchʼakatäj, wakami nrajoʼ nukʼïs royowal chi kij ri winäq chi Ruwachʼulew. Achiʼel xtqetamaj qa, wakami oj kʼo chi kiwäch ri kʼayewal e ruyaʼon ri Satanás pa qawiʼ. Ri kʼayewal riʼ man xtyalöj ta, xa xe jun tiempo xtubʼän, y ri Satanás retaman riʼ.  Ri Biblia «rukʼisibʼäl taq qʼij» nubʼij chi re ri tiempo riʼ (2 Timoteo 3:1). ¡Janila yojkikot nqetamaj chi ri Jehová xtuchüp yan kiwäch ri kʼayewal e ruyaʼon ri Satanás! Tqatzʼetaʼ jujun chi ke ri kʼayewal e kʼo wakami, ri e rubʼin pe ri Biblia. Re kʼayewal reʼ nkibʼij chi oj kʼo pa rukʼisibʼäl taq qʼij, chuqaʼ chi ri Rajawaren ri Dios xtukʼäm yan pe ri urtusanïk pa kiwiʼ ri yeʼajowan ri Jehová. Tqatzʼetaʼ kajiʼ chi ke ri kʼayewal ri xubʼij ri Jesús chi xkebʼanatäj.

6, 7. ¿Achike rubʼeyal qitzij elenäq ri rubʼin pe ri Jesús chi rij ri oyowal chuqaʼ ri wayijal?

⁶ «Jun ajawaren xtyakatäj kʼa el chi rij jun chik ajawaren» (Mateo 24:7). Chupam rukʼisibʼäl 100 kan junaʼ, pa millón ri winäq e kaminäq el kuma ri oyowal (chʼaʼoj). Jun achin aj Gran Bretaña, ri yerutzʼibʼaj ri achike yebʼanatäj, xubʼij: «Ri rukʼisibʼäl 100 junaʼ xeqʼax kan, ja riʼ toq más kamïk xebʼanatäj, más chi kiwäch ronojel junaʼ e qʼaxnäq kan. [...] Chupam ri rukʼisibʼäl 100 kan junaʼ, kan xkicholobʼaʼ pe kiʼ ri oyowal xebʼanatäj, kan choj kayoxiʼ ok qʼij ri majun oyowal ta xbʼanatäj chi Ruwachʼulew». Jun Instituto rubʼiʼ Worldwatch, nubʼij: «Ri winäq xekäm chupam ri oyowal xebʼanatäj  pa taq junaʼ 1900 kʼa 1999, oxiʼ mul más chi kiwäch ri xekäm chupam ri oyowal xebʼanatäj ri pa nabʼey siglo kʼa 1899». Kan xa xe chupam pe ri junaʼ 1914 más 100 millón winäq e kaminäq el kuma ri oyowal. E kʼïy winäq kinaʼon ri tijoj poqonal nuyaʼ ri oyowal ruma e rukamisan el ri kachʼalal.

⁷ «Xkepe [...] wayijal» (Mateo 24:7). Ri etamanelaʼ pa kiwiʼ ri tikoʼn nkibʼij chi chupam ri rukʼisibʼäl kan 30 junaʼ xkʼiyïr ri tikoʼn. Stapeʼ ke riʼ e kʼïy winäq kilon wayijal ruma majun kulew ta chuqaʼ majun kipwäq ta richin nkilöqʼ kiway. Pa millón ri winäq, chi kiwäch e kʼïy tinamït, janila tijoj poqonal kilon ruma kʼayew nkïl qa kiway ri jujun qʼij. Ri Organización Mundial de la Salud nubʼij chi ri wayijal, jun chi ke ri kʼayewal nbʼanon chi yekäm más woʼoʼ millón akʼwalaʼ pa jun junaʼ.

8, 9. ¿Achike ruma nqabʼij chi ri xubʼij pe ri Jesús chi kij ri kabʼraqän y ri yabʼil kan qitzij elenäq?

⁸ «Xkepe nimaläj taq silonel» (Lucas 21:11). Jun moloj pa Estados Unidos, ri nutzʼët achike rubʼanon ri Ruwachʼulew, nubʼij chi kan choj majun, pa jun junaʼ yebʼanatäj 19 kabʼraqän. Reʼ kan kʼo kuchuqʼaʼ richin yekitzelaj nimaʼq taq jay chuqaʼ  nkijäq ri ulew. Chuqaʼ ronojel bʼaʼ junaʼ e bʼanatajnäq kabʼraqän ri jumul e kiwulan nimaʼq taq jay. Ri ajlanïk bʼanon pe chi kij ri winäq e kaminäq kuma ri kabʼraqän, nubʼij chi kan xa xe chupam pe ri junaʼ 1900 más kaʼiʼ millón ri e kaminäq. Jun moloj nubʼij chi «ronojel ri samaj bʼanon pe chi rij ri kabʼraqän, man kan ta e rutoʼon ri winäq».

⁹ «Xkepe [...] yabʼil» (Lucas 21:11). Stapeʼ jalajöj rubʼeyal aqʼomanïk e kʼo wakami, e kʼo kʼakʼaʼ taq yabʼil ri más yewachin pe. Kʼo jun wuj nubʼij chi chupam ri rukʼisibʼäl lajutäq taq junaʼ, e kʼo 20 yabʼil ri kan e kʼo wi. Achiʼel ri chaqiʼj ojöbʼ, ri raxtew chuqaʼ ri cólera. Ja kʼa e kʼo más yabʼil ri man choj ta chik aqʼom nkajoʼ. Chuqaʼ kan choj majun, kʼo 30 kʼakʼaʼ taq yabʼil kikʼutun pe kiʼ. Kʼïy chi ke re yabʼil reʼ majun kaqʼomal ta, kʼa ja wakami majun ilon ta kaqʼomaxik.

10. Achiʼel nubʼij ri 2 Timoteo 3:1-5, ¿achike kinaʼoj xtkibʼän ri winäq pa rukʼisibʼäl taq qʼij?

¹⁰ Ri Biblia man xa xe ta rubʼin pe chi kʼo kʼayewal xkebʼanatäj pa rukʼisibʼäl taq qʼij chuqaʼ rubʼin pe chi ri winäq xtkijäl kinaʼoj. Ri apóstol Pablo nuqʼalajrisaj chi pa «rukʼisibʼäl taq qʼij xtpe janila rukʼayewal» (tasikʼij 2 Timoteo  3:1-5). Ja reʼ kinaʼoj xtkibʼän ri winäq nubʼij ri Pablo:

• xa xe rijeʼ xtkajoʼ qa kiʼ

• xtbʼe kanima chi rij ri pwäq

• man xtkinimaj ta kitzij kiteʼ kitataʼ

• man xkematyoxin ta

• man xtkijoyowaj ta kiwäch ri winäq

• man xtkiqʼät ta kiʼ

• nqʼax ruwiʼ ri itzelal nkibʼän

• más xtkajoʼ ri kʼastajinïk ke ri Dios

• nkibʼij chi nkajoʼ ri Dios, ja kʼa man nkinimaj ta rutzij

11. ¿Achike xtbʼan chi ke ri itzel taq winäq nubʼij ri Salmo 92:7?

¹¹ ¿Ke riʼ kinaʼoj ri winäq pa atinamit rat? Xa bʼa achike tinamït e kʼo winäq ke riʼ kinaʼoj. Riʼ nuyaʼ retal chi ri Dios xtuchüp yan ruwäch ri itzelal. Ri Biblia nubʼij chi toq ri «e bʼanöy itzelal yekʼïy achiʼel ri qʼayïs, y ütz nkibʼän qʼanej, xa xe richin yekʼis jumul» (Salmo 92:7).

12, 13. ¿Achike tzʼetbʼäl kʼo chi ri etamabʼäl kʼiyirnäq pa «rukʼisibʼäl taq qʼij»?

¹² Achiʼel rubʼin pe ri Biblia, ri pa  rukʼisibʼäl taq qʼij, janila kʼayewal xkebʼanatäj. Ja kʼa kikʼin ri rusamajelaʼ ri Jehová e kʼo utziläj taq bʼanobʼäl xkebʼanatäj.

¹³ Ri qitzij «etamabʼäl kan xtbʼe kʼa pa jotöl» xubʼij pe ri Daniel. ¿Jampeʼ xtbʼanatäj ri rubʼin pe? Pa «rukʼisibʼäl taq qʼij» (Daniel 12:4). Xa xe chupam pe ri junaʼ 1914, ri Jehová e rutoʼon pe ruwinaq richin nqʼax ri Ruchʼabʼäl chi kiwäch. E rutoʼon pe rikʼin ri etamabʼäl chi rij ri rubʼiʼ, ri nrajoʼ rijaʼ, ri xuyaʼ rukʼaslem ri Jesús pa kamïk, ri kibʼanon ri kaminaqiʼ chuqaʼ ri kʼasojinïk. Ri rusamajelaʼ ri Jehová ketaman nkikʼwaj jun utziläj kʼaslem, jun kʼaslem ri nuyaʼ ruqʼij ri Dios. Qʼaxnäq más chi kiwäch achike ri Rajawaren ri Dios chuqaʼ achike rubʼanik xkeruchojmirisaj ri kʼayewal chi Ruwachʼulew. ¿Achike nkibʼän rikʼin ronojel re etamabʼäl reʼ? Re jun kʼutunïk reʼ yojrukʼwaj rikʼin jun chik profecía ri najin wakami.

14. ¿Pa jaruʼ tinamït chuqaʼ chʼabʼäl ntzijöx Rajawaren ri Dios, chuqaʼ achike yebʼanon re samaj reʼ?

¹⁴ «Nabʼey ntzijöx ri utziläj rutzijol [...] chi ke konojel winaqiʼ richin ri ruwachʼulew», xchaʼ ri Jesucristo toq xchʼon chi rij ri xkebʼanatäj pa rukʼisibʼäl taq qʼij (tasikʼij Marcos 13:3, 4, 10). Ronojel Ruwachʼulew najin ntzijöx Rajawaren ri Dios. Ntzijöx achike xtubʼän pa kiwiʼ ri winäq chuqaʼ ri rubʼeyal xkeqïl ri urtusanïk xkeruyaʼ. Reʼ najin ntzijöx pa cientos chi chʼabʼäl chuqaʼ pa más 235 nimaʼq taq tinamït. Pa millón rusamajelaʼ ri Jehová, ri jalajöj kijatzul, kitinamit chuqaʼ kichʼabʼäl yekikot nkitzijoj Rajawaren ri Dios (Apocalipsis 7:9). Chuqaʼ pa millón ri winäq yekitijoj ri nkajoʼ nketamaj ri nukʼüt ri Biblia. Re tijonïk reʼ man tojon ta. Rikʼin reʼ nqatzʼët chi ronojel ri xubʼij kan ri Jesús qitzij elenäq. Chuqaʼ qitzij elenäq toq xubʼij: «Xkixitzeläx [...] ruma in itzeqelibʼen» (Lucas 21:17).

15. a) ¿Oj kʼo rukʼisibʼäl taq qʼij wakami nabʼij rat, achike ruma ke riʼ nabʼij? b) ¿Achike xtbʼanatäj kikʼin ri man nkibʼän ta ri nubʼij ri Jehová, chuqaʼ kikʼin ri yeniman rutzij?

¹⁵ Ruma najin yebʼanatäj ri rubʼin pe ri Biblia, ¿nubʼij reʼ chi oj kʼo pa rukʼisibʼäl taq qʼij? Ri Ajawaren xtyaʼöx kan rutzijoxik kʼa toq ri Jehová xtubʼij chi mani chik. Ja riʼ toq «xtapon ri rukʼisibʼäl qʼij» (Mateo 24:14). «Ri rukʼisibʼäl qʼij» nchʼon chi rij ri qʼij toq ri Dios xtuchüp ruwäch ri itzelal chi Ruwachʼulew. Ja ri Jesús chuqaʼ ri ángeles xkerukusaj richin xtuchüp kiwäch ri man nkajoʼ ta nkibʼän ri nubʼij rijaʼ (2 Tesalonicenses 1:6-9). Ri Satanás y ri itzel taq rachibʼil man xkekiqʼol ta chik ri winäq. Chi rij riʼ ri Ajawaren xtuyaʼ kʼïy urtusanïk pa kiwiʼ ri xtkibʼän ri nubʼij ri Jehová (Apocalipsis 20:1-3; 21:3-5).

16. ¿Achike ütz nabʼän rat wakami?

¹⁶ Ruma xtchupüx yan ruwäch ri ruqʼatbʼäl tzij ri Satanás, kʼo ta chi nqakʼutuj qa chi qawäch: «¿Achike kʼo ta chi ninbʼän rïn wakami?». Qonojel ütz nqakʼiytisaj qetamabʼal chi rij ri Jehová chuqaʼ nqabʼän ri nrajoʼ rijaʼ (Juan 17:3). Tayaʼ awanima chi rij retamaxik ri nukʼüt ri Biblia. Tukʼuluj chawe yabʼe pa kimolojriʼïl ri rusamajelaʼ ri Jehová (tasikʼij Hebreos 10:24, 25). Tawetamaj ruwäch ri Jehová chuqaʼ tajalaʼ rubʼanik ri akʼaslem, ke riʼ xtabʼän ri nqa chuwäch rijaʼ (Santiago 4:8).

17. ¿Achike ruma majun achike ta xtnabʼen ri qʼij toq xtchup kiwäch ri itzel taq winäq?

¹⁷ Ri Jesús xubʼij kan chi e kʼïy winäq man xtkinimaj ta chi oj kʼo pa rukʼisibʼäl taq qʼij. Ri itzel taq winäq chaq kʼateʼ xtchupüx kiwäch, toq majun achike nnabʼen. Reʼ achiʼel toq jun eleqʼom nok chaqʼaʼ pa jun jay, ri winäq man nkinabʼej ta (tasikʼij 1 Tesalonicenses 5:2). Ri Jesús xubʼij: «Ri pa ruqʼijul ri Noé [...] ri winaqiʼ xa bʼenäq kʼa kanima rikʼin ri waʼin [...] rikʼin ri kikʼulubʼik y rikʼin ri yeyatäj el kimiʼal kikʼajol  richin yekʼuleʼ. Y kan ke riʼ na yeʼajin [...] ri qʼij toq ri Noé y ri e aj pa rachoch xeʼok chupam ri nimaläj barco. Y majun bʼey kʼa xqʼax ta chi kiwäch ri xqʼalajrisäx chi ke, [...] kʼa ja toq xoqaqa na ri yaʼ [...] ri xukʼwan kichin konojel. Y kan ke riʼ chuqaʼ xtbʼanatäj toq xtapon ri nupetebʼal rïn» nel chi tzij, pa rukʼisibʼäl taq qʼij (Mateo 24:37-39).

18. ¿Achike naʼoj xuyaʼ ri Jesús ri kʼo chi nqabʼän pa qakʼaslem?

¹⁸ Ruma riʼ ri Jesús xubʼij: «Tichajij kʼa ri ikʼaslem. Man tbʼe iwanima chi kij ri nimaqʼij; man kixqʼabʼär y chuqaʼ man xa xe ri nkʼatzin chiwe [...] ri nichʼöbʼ, y kʼa toq xtinaʼ, xa ja riʼ xoqaqa ri qʼij, richin chi rïn xkinoqaqa. Y ri qʼij riʼ xa xtoqaqa achiʼel jun koloʼ ri nirarin. Ke riʼ rubʼanik toq xtoqaqa pa kiwiʼ konojel ri winaqiʼ [...]. Ruma riʼ kan tichajij apo jebʼël ri ikʼaslem. Jantapeʼ kixchʼon rikʼin ri Dios, richin yixkolotäj chuwäch ronojel ri tijoj poqonal ri xtpe [...] ri qʼij riʼ» (Lucas 21:34-36). Ronojel ri xubʼij ri Jesús kʼo chi nqasamajij pa qakʼaslem. Ruma ri nkibʼän ri nrajoʼ ri Jehová chuqaʼ ri Jesús, xkekʼaseʼ kan toq xtchup ruwäch ruqʼatbʼäl tzij ri Satanás. Ke riʼ xtkïl kikʼaslem man kʼisel ta chuwäch ri Kotzʼijaläj Ulew chi qawäch apo (Juan 3:16; 2 Pedro 3:13).