1. Fuddarak ghoddchem asa tea vixim tumi khoim xikonk xoktat?

TV-CHER vaitt khobro polloun, ‘hea sonvsarachem kitem zatolem?’ Oso tumchea monant ghoddie prosn aila astolo. Faleam kitem zatolem tem konnuch sangonk xokona, karonn vaitt ghoddnneo chintinastana ani okosmat ghoddttat. (Jakob 4:14) Fuddarak kitem zatolem, tea vixim fokot Jehova Devak khobor asa. (Izaias 46:10) Taka lagon, tannem khub vorsam poilim Bible-ant, aiz ghoddtta tea vaitt ghoddnnea vixim, toxench fuddarak zauncheo asat tea borea ghoddnnea vixim-i boroun dovorlolem.

2, 3. Jezuchea xisamnim taka kitem vicharlem, ani Jezun tankam kitem zobab dilo?

² Lokam lagim, Jezu Krist Devachea Rajea vixim uloilo. Prithume voilem vaittponn kaddun, hem Raj, tacher bori poristhiti haddttolem mhunn tannem tankam kolloilem. (Lukas 4:43) Hem aikolea uprant, lokank tem Raj kednam ietolem, tea vixim zannam  zaunk zai aslem. Jezuche xisui hachea vixim zannam zaunk sodhtale. Taka lagon, tannim taka “Tujea ienneachi ani kallachea xevottachi khunna konn ti, amkam sang” mhunn vicharlolem. (Matev 24:3) Hacho zobab ditana Jezun tankam, xevott kednam ietolo tem fokot Jehova Devuch zannam mhunn sanglem. (Matev 24:36) Punn, kallacho xevott ieunchea poilim, ani Devachem Raj munxam pasot xanti ani sovoskai haddchea poilim, hea prithumer kitem ghoddttolem tem tannem sangon dovorlolem. Ani tannem sangloleo sogleo vostu atam ghoddttat.

³ Ami khorench ‘xevottachea’ disamnim ravtat vo na, hem zannam zaunchea poilim, eka zhuza vixim polloum-ia. Tem zhuz sorgar zal’lem, ani tacho porinnam amcherui zata.

4, 5. (a) Jezu raza zalea uprant sorgar kitem zalem? (b) Prokasovnni 12:12 pormonnem sorgar zal’lea zhuzacho prithumer kitem porinnam zalo?

⁴ Fattlea odheai-ant xiklolea pormonnem Jezu Krist 1914 hea vorsa Raza zalo. (Daniel 7:13, 14 vachat.) Raza zalea uprant, Jezun rokddoch aplo odhikar cholounk suru kelo. Bible sangta, tednam “sorgar ek zhuz suru zalem. Mikael [Jezuchem dusrem nanv] aplea dutank gheun aracher [Soitanacher] zhuzlo. Ar aplea dutank gheun tanche virudh zhuzlo.” * Hea zhuzant, Soitan ani tache ainz harle ani Jezun tankam sorgar thaun prithumer uddoile. Tankam sorga-voile kaddle dekhun  Devache visvaxi ainz khuxal zale. Punn, munxancher tras aile. Bible mhunntta, “prithumechem . . . kotta! Kiteak devchar bhov ragixtt zaun tumche modem denvun aila, ani apnnak thoddoch kall asa mhonn to zanno.”—Prokasovnni 12:7, 9, 12, 13.

⁵ Sorgar zal’lea zhuzacho, prithumer kitem porinnam zalo? Soitan ragan bhoron prithumer aslolea lokank tras diunk laglo. Ani he tras amkam aizui bhogche poddttat, punn te chodd vell urchenant. Apleak “thoddoch kall” asa hem Soitan dekhun zannam. Bible-ant hea kallak, ‘nimanne dis’ mhunnttlam. (2 Timotak 3:1) Dev beginuch Soitanak hea sonvsarantlo kaddun uddoitolo. Hem aikon amkam kitlem borem dista nhoi! Atam ami Bible-ant adinch boroun dovorloleo, amchea tempar ghoddttat teo ghoddnneo polloitolim. Hachea voilean, ami khorench nimannea disamnim ravtat ani Devachem Raj beginuch amchea pasot zaitim besanvam haddttolem mhunn kollon ietolem. Tor, atam ami amchea disamnim ghoddtta tea Jezun sanglolea  khunnachea char bhagancher niall korum-ia.

6, 7. Zhuzam, ani bhuk poddche vixim Jezun uloilolim utram amchea disamnim koxim khorim zalim?

⁶ “Raxttr raxttracher ani raj rajeacher uprastolim.” (Matev 24:7) Fattlea 100 vorsamnim, lak’khamnim lok zhuzant moron gelo. Ek British itihaskar boroita, “Ak’khea itihasant polloilem zalear 1901-2000 hea vorsamnim sogleant chodd lokancho jiv gelo . . . Hea kallar, khoim na khoim zhuz chaluch aslem.” Worldwatch Institute, hea songottnnen dilolea mahiti pormonnem, “Jezuchea zolma thaun 1899 hea vorsa poriant zal’lea zhuzam poros, 1901-2000 hea vorsamnim zal’lea zhuzant, tin pavtti chodd lok melo.” 1914 hea vorsa thaun atam porian melolea lokancho ankddo 10 kotti poros chodd zala. Lak’khamnim lok, zancho konn-na-konn oslea zhuzant mela, tankam kitlem dukh bhoglam astolem hem amchean chintukuch zaunchem na!

 ⁷ “Hanga-thoi bhuk poddtoli.” (Matev 24:7) Fattlea 30 vorsam-nim, pik vaddlolean jevonna-khannacheo vostu khub mellttat oxi mahiti tanchea vixim obheas korpi ditat. Torui astana, lokank jevonn mellona karonn ek tor, tanche kodden tem viktem gheunk poixe asona, vo xet pikounk zomin asona. Ani haka lagon, sonvsarbhor lak’khamnim lok upaxinch urta. The World Health Organization, hanchea mahiti pormonnem, dor vorsa sarkem jevonn mellona zal’lean sumar 50 lakh bhurgim mortat.

8, 9. Bhuimkamp ani duensam vixim Jezuchim utram amchea disamnim khorim zalim mhunn amkam koxem kolltta?

⁸ “Vhoddleo bhuimkampi zato-leo.” (Lukas 21:11) Zomni vixim xiktoleamnim mahiti kaddlolea pormonnem, eka vorsak sumar 19 vhodd bhuimkamp zaunk xoktat. Oslea bhuimkampank lagon, zomin futton voita ani vhoddlim ghoram-i moddttat. Dor vorsa osle bhuimkamp zaun zaitem luksonn zalam. Ani mahiti pormonnem, 1900 hea vorsa thaun sumar 20 lakh lok haka lagon mela. Anik eke kodden sanglam, “Udorgot  zal’lean bhuimkamp khoim zatolo tem adinch kolltta, torui astana meloleancho ankddo titlo unno zaunk na.”

⁹ ‘Pidda (duensam) posortolim.’ (Lukas 21:11) Duensam pois korunk aiz khubxe nove upai sodhun kaddleat. Torui astana, novim-novim duensam ieit asat. Eke mahiti pormonnem, 20 veg-vegllea torechim duensam, zoxim TB ani maleria, sogleak zaleant. Thoddim tor, vokdam ghetlearui borim zainam. Fattlea vorsamnim sumar 30 novim duensam aileant. Tantuntlea thoddeank upai pasun na ani haka lagon zaite lok mortat.

10. 2 Timotak 3:1-5 hantunt sanglolea pormonnem aiz lokanchi vagnnuk koxi asa?

¹⁰ Bible-ant nimannea disancheo ghoddnneoch nhoi, punn lokam vixim-i sanglolem asa. Lokanchi vagnnuk koxi astoli hea vixim Apostl Paulun boroun dovorlolem. Tannem mhunnttlem, “Nimannea disamnim ek bhirankull kall ieuncho asa.” (2 Timotak 3:1-5 vachat.) Thoinch fuddem, to  tanche vagnnuke vixim boroitana mhunntta, munis zatole

• aplem dhean-mon apnnancheruch dovortat tosle

• girestkaiechea axeche

• avoi-bapaichem aikonant tosle

• onupkari

• moipas vo mog naslole

• nixttur

• Deva poros chodd kuddichea sukhancho mog kortat tosle

• dhormvont munis mhunn dakhoitole, punn tanchea jivitant khorea dhormachem boll dixtti poddona tosle

11. Stotr 92:7-ant noxttea munxam vixim kitem boroilam?

¹¹ Tumi ravtat thoim osle lok asat? Khoreaninch astole! Osle vaitt gunn aslole lok ak’khea sonvsarant bhorlole asat. Hachea voilean, Dev beginuch tancho sogleancho nas kortolo mhunn amchean sangonk zata, karonn Bible mhunntta, “Tonna vori noxtte monis matlear matum, papi soglle rosroslear ros-rosum! Sasnnak tanchem ghorttann zatolench!”—Stotr 92:7.

12, 13. ‘Xevottachea kallar’ ‘khorem ginean’ koxem vaddlem?

¹² Bible-ant sanglolea pormonnem nimannea disamnim khub tras vaddlole asat. Punn sonvsarbhor  itlem vaitt ghoddtta astana-i, Jehovachea lokam modem thoddim borim-i kamam zait asat.

¹³ ‘Khorem ginean khub vaddttolem’ mhunn Bible-ant, Daniel hea pustokant adinch boroun dovorlolem. Hem kednam zatolem kai? ‘Xevottachea kallar.’ (Daniel 12:4, NW) Apli seva korunk sodhtale tea lokank, Bible-achi somzonni vaddounchea pasot Jehova Devan 1914 thaun khub modot kelea. Tankam zaitea vixoi-ancher, zoxe, Devachem nanv ani tache ud’dhex, amkam soddvonn diunk Jezu Kristan dilolem bolidan, melea uprant kitem zata ani meloleam pasot fuddarak kitem bhorvonso asa, hacher chodd somzonni mell’llea. Toxench, aplem jivit bore toren koxem jieunchem ani Devak mhoima koxi haddchi hem-ui te xikle. Itlench nhoi, Devachem Raj kitem kortolem ani tem prithumer koxem boreponn haddttolem hachea-i vixim te bore zannam zale. Hem soglem ginean gheun tim kitem kortat? Hea prosnacho zobab zannam zaunk, nimannea disamnim purnn zata te anik eke bhasaunne vixim ami polloum-ia.

14. Sonvsarbhor porgottnnechem kam koxem cholta ani tem konn kortat?

¹⁴ “Sorginchea Rajeachem Xubhvortoman ak’khea sonvsarant porgott zatolem” mhunn, Jezu Kristan ‘kallachea xevotta’ vixim uloitana sanglem. (Matev 24:3, 14 vachat.) Sonvsarbhor hem porgottnnechem kam, aiz sumar 239 desamnim ani 600 poros chodd bhasamnim chalu asa. Lak’khamnim Jehovache Sakxi, Devachea Rajeachi hi bori khobor umedin porgott korit asat. Tem Raj mhunnttlear kitem? Tem kitem  kortolem? Ani tachim besanvam mellonk ami kitem korunk zai? Oslea prosnanche zobab zannam zaunk te lokank modot kortat. Jehovache Sakxi, veg-vegllea ‘desantle, kullantle, porzantle ani bhasantle’ asat. (Prokasovnni 7:9) Bible khorench kitem xikoita tem zannam zaunk sodhtat tea lak’khamnim lokank, te tachi funkott xikounn ditat. Khorea Kristanvancho soglim “dves kortolim” mhunn Jezun adinch sanglolem. Torui astana, oslea poristhitint pasun, Devachea Rajeachi hi bori khobor itlea vhodd promannan porgott zavop mhunnttlear kitlem ojapachem nhoi!—Lukas 21:17.

15. (a) Ami khorench xevottachea disamnim ravtat oxem tumkam kiteak dista? (b) Jehova Devacho virodh korta tanchem kitem zatolem? (c) Devachea odhikarak man diun choltat tankam kitem mellttolem?

¹⁵ Bible-ant sanglolem toxench aiz ghoddtta. Hem soglem polloun, ami khorench xevottachea disamnim ravtat oxem tumkam disona? Jehovak zai tea toren ani tache khuxe pormonnem bori khobor porgott zalea uprant “xevott” ietolo. (Matev 24:14) Hanga “xevott” hea utracho orth, ek oslo vell jednam Jehova Dev hea prithume voilem soglem vaittponn kaddun uddoitolo. Hem vaittponn kaddun uddounk, ani aplo virodh kortat tancho nas korunk, Dev Jezuk ani ainzank uzar kortolo. (2 Tesalonikekarank 1:6-9) Tea uprant, Soitan ani tache sangati ainz, lokank fottounk xokche nant. Ani tednam Devachea odhikarak man diun choltat tea soglea lokank, fuddarak Dev, aplea Rajea udexim zaitim besanvam ditolo.—Prokasovnni 20:1-3; 21:3-5.

16. Xevott lagim pavla hem zannam zal’lean tumi kitem korchi goroz asa?

 ¹⁶ Soitan ani tachea sangateancho xevott ekdom lagim pavla hem amkam kollon ailem. Tor zonn eklean apleakuch, ‘hanvem kitem korchem?’ ho prosn vicharunk zai. Jehova ani tachea kaideam vixim anik xikot ravlim zalear amkam boreak poddttolem. (Juanv 17:3) Taka lagon Bible xikot ravat ani tachea vixim tumchi somzonni vaddoit ravat. Sodanch, Jehova Devachi seva kortat ani tachi khuxi korunk vavurtat, tea lokam sangata ektthaim zaunchi sonvoim korat. (Hebrevank 10:24, 25 vachat.) Devache utor Bible xikon, Jehova Devachi vollokh gheiat. Toxench, tumchea jivitant favo te bodol korat. Ani oxem kel’lean, tumi Devache ghott ixtt zaunk pavtole.—Jakob 4:8.

17. Vaitt lokancher nisontton ieunchea poilim choddso lok kitem manun gheuncho na?

¹⁷ Sonvsarant ghoddtta tem soglem pollounui, ami nimannea disamnim ravtat mhunn zaito lok manun ghena. Ani oxem zatolem mhunn Jezun adinch sanglolem. Vaitt kortat tea lokanchem nisontton chintinastana ani okosmat zatolem. Zoso ek chor ratcho ieta, teach bhaxen, xevott kollonastana ietolo. (1 Tesalonikekarank 5:2 vachat.) Hachea vixim Jezun xittkaunni diun mhunnttlem, “Noahchea disamnim zoxem zalem, toxench Mon’xacho Put ieta tedna zatolem. Buddte adlea disamnim Noah pett-tarvant bhitor sorlo to dis meren lok khata-pietalo, logn zaun ani logn korun diun aslo, ani poriallo ieun tancho soglleancho nas zai porian, tankam kai ek koll’lem na; toxench Mon’xacho Put ietolo tedna zatolem.”—Matev 24:37-39.

18. Jezun dilolea khoinchea xittkaunnecher ami dhean divop gorjechem?

 ¹⁸ Jezun fuddem mhunnttlem, “Tumi tumchi chotrai dhorat; na tor, kamcharak lobhdon, bebdikai korun, ani hea jivitache huske kaddun, tumchim kallzam zodd zatit ani to Dis tumcher okosmat pavot. Ak’khe prithumer aslolea sogllea mon’xancher fas koso to ietolo. Ieuncheo asat tea ghoddnniam modlean surokxitponnim fuddem vochonk ani Mon’xachea Puta mukhar bhiranti vinnem ubim ravunk tumkam ghottai mellche khatir, sogllea vellar magnnem korun zagrut ravat.” (Lukas 21:34-36) Jezun dilolea hea xittkaunnecher dhean divop kiteak gorjechem asa? Karonn, Soitan ani tachea sangateanchem nisontton zata tednam, Jehova Devachea ani Jezu Kristachea utra pormonnem choltat te lok, salvar zatole. Toxench, fuddarak zatolea novea sonvsarant tankam sasnachem jivit mellttolem.—Juanv 3:16; 2 Pedru 3:13.