1. ¿Jalasü aküjünüin süchiki tü kasa alatajatkat mapeena?

PIʼRÜLE suluʼu telewisoot tü kasa mojusü alatakat, ¿püsakirüiche paaʼin kaseerüin alatüin sümüin tü mmakat? Wainma kasa mojusü maaʼulu otta nnojotsü atüjaanüin aaʼu tü alatajatkat mapeena (Santiago 4:14). Akaisaʼa Jeʼwaa nütüjaa aaʼu shia (Isaías 46:10). Tü Wiwüliakat süküjüin süchiki tü kasa mojusü eeinjatkat maaʼulu otta tü kasa anasü eeinjatkat mapeena.

2, 3. ¿Kasa nasakitka anain na nikirajüinkana Jesuu? ¿Jamüsü nünüiki namüin?

² Aashajaashi Jesukürisüto süchiki Nuluwataaya Maleiwa, tü ajaʼttirajatkat kasa mojusü otta paʼaraiisüinjatka atuma tü Mmakat (Lucas 4:43). Na aapajakana nünüiki Jesuu natüjawee aaʼu joujeerüin süntüin tia Aluwataayakat. Müshii na nikirajüinkana: ‹¿Kasa shiyaawaseetka sülüʼülüin pükalia otta sajaʼlajaaya kasa süpüshua?› (Mateo 24:3). Naashin Jesuu nia neʼe Jeʼwaa atüjaaka saaʼu tia (Mateo 24:36). Akaisaʼa Jesuu nüküjüin tü eeinjatkat  Mmapaʼa süpülapünaa eein jimataa aaʼin otta anaa akuwaʼipaa sutuma Nuluwataaya Maleiwa. Tia ekeraajüsü maaʼulu.

³ Süpülapünaa wekirajaain sünain tü kasa eekat maaʼulu sutuma ‹sülüʼülüin süpüla sajaʼttüin kasa süpüshuaʼa›, waashajaa süchiki tü atkawaa chajatkat sirumatuʼu otta tü kasa eekat sutuma.

4, 5. (1) ¿Kasa alataka sirumatuʼu nuʼttapa Jesuu sünain aluwatawaa? (2) ¿Kasa alatajatka sutuma tü atkawaa chainjatkat sirumatuʼu saashin Alateetkat Mapeena 12:12?

⁴ Wekirajaa anainrü suluʼu ekirajaaya 8 nuluwataain Jesuu soʼujee tü juyakat 1914 (paashajeʼera Mateo 28:18). Süchikijee tia, müsü tü Wiwüliakat: ‹Eesü wanee atkawaa iipünaa. Miguel [Jesuu] jee na aapiee nümaajanakana, atkaashii naya nümaa chi kayuushikai [Satanaa] jee sümaa tü aapiee nümaajatkalüirua›. * Akanajuushi Satanaa otta na yolujaakana, nojutünaka Mmapaʼamüin. Talatüshii na aapiee oonookana sümaa nünüiki Maleiwa sükajee nujutünüin Satanaa otta na yolujaakana. Akanasaʼa na wayuukana nnojoishii talatüin. Müsü tü Wiwüliakat: ‹Jia kepiakana sainküin tü mmakat, müleʼu maʼin tü müliaa jiʼreetkat süka nujutunuichipain chi Yolujaakai jaʼakamüin. Jashichishaatashi maʼin nia süka sülüʼülüin nükalia süpüla ataʼünaa› (Alateetkat Mapeena 12:7, 9, 12).

⁵ Jülüja paaʼin tü eekat sutuma tü atkawaa chainjatkat sirumatuʼu: jashichinjachi chi Yolujaakai otta aainjainjachi kasa mojusü Mmapaʼa. Kepiashii waya soʼu kaʼikat tia. Akatsaʼa tia motsomüinjatü otta nütüjaa aaʼu shia Satanaa. Sünülia tia sutuma tü Wiwüliakat: ‹Alüʼütsü  süpüla sajaʼttüin kasa süpüshuaʼa› (2 Timoteo 3:1). ¡Talatüsü maʼin waaʼin sükajee najaʼttirajatüin Maleiwa tü kasa mojusü naainjakat chi Yolujaakai Mmapaʼa! Wekirajaa sünain süpüshi tü süküjakat tü Wiwüliakat tü ekeraajakat maaʼulu. Sükajee tia, alüʼütsü süpüla sajaʼttüin kasa süpüshuaʼa otta süpüla saapünüin wainma kasa anasü namüin na aikana apüla Jeʼwaa. Palajana, wekirajaa sünain pienchisü kasa shiyaawaseinjatkat tia.

6, 7. ¿Jamüsü shikeraajia maaʼulu tü nümakat Jesuu süchiki tü atkawaakat otta tü jamükat?

⁶ ‹Atkaajiraajeerü wayuu sainküin mma.› (Mateo 24:7.) Ouktüsü wainma maʼin wayuu sutuma tü atkawaakat süchikijee tü 100 juya alatüitpakat. Müshi wanee wayuu chejeʼewai Gran Bretaña, ashajüi süchiki kasa alatüirü: «Süchikijee tü juyakat 1900 ouktüsü maʼin wayuu. [...] Waneepiasü maʼin tü atkawaakat. Motsomüin nnojoluin eein atkawaa suluʼupünaa wanee mma». Müsü nanüiki wanee ekirajaalii süchiki tü alatakat sainküin mma: «Wainma maʼin wayuu ouktaka soʼutpünaa tü juyakat 1900 suulia tü ouktakat süchikijee  nükalia Kürisüto sünainmüin tü juyakat 1899». Wainma maʼin wayuu ouktaka sutuma tü atkawaakat soʼujee tü juyakat 1914. Wainma wayuu ouktaka apüshi sutuma tü atkawaakat. Eesü sülatüirüle pümüin tia.

⁷ ‹Mülieerü maʼin wayuu sutuma jamü.› (Mateo 24:7.) Naashin na achajaaliikana sukuwaʼipa wanee kasa, awainmalaasü maʼin tü eküütkat süchikijee tü 30 juya alatüitpakat. Akatsaʼa, ayatüin alin shiiʼiree eküülü süka wainmain wayuu moumainka süpüla apünajaa jee manneetseka süpüla nayaʼlajüin eküülü. Suluʼu mma eere müliain maʼin wayuu sutuma choʼujaain kasa namüin, wainma maʼin na akanajakana palitchon nneerü süpüla nepijaain otta noʼutku müliashii waneepia sutuma jamü. Saashin La Organización Mundial de la Salud ouktüshii maʼaka 5.000.000 tepichi juyawai sutuma tü jamükat.

8, 9. ¿Jamüsü shikeraajia tü nümakat Jesuu süchiki sukutkujaain tü mmakat otta müliain wayuu sutuma ayuulii?

⁸ ‹Akutkujaweerü tü mmakat.› (Lucas 21:11.) Naashin na atüjüshiikana maʼin, akutkujaweerü tü mmakat maʼaka poloo mekietsattua soʼu wanee juya sümaa emetulüin maʼin shia. Amojujaajeerü tü piichikalüirua otta eerulaajeerü tü mmakat sutuma.  Akutkujaasü maʼin tü mmakat juyawai otta ojuichijaasü wainma piichi sutuma. Jee atüjaana aaʼu sülatüirüin suulia piama miyoone tü wayuu ouktakat sutuma sukutkujaain tü mmakat soʼujee juyaka 1900. Müshii waneeinnua: «Sükajee tü naainjakat na atüjüshiikana maʼin, palitchon na ouktakana».

⁹ ‹Mülieerü maʼin wayuu sutuma ayuulii.› (Lucas 21:11.) Mayaapejeʼe ayatüin na tottootkana ekirajaain sünain eiyajaa ayuulii, ayatüsü müliain wayuu sutuma tü ayuulii sümaiwajatkat otta tü eekat maaʼulu. Naashin wanee wayuuinnua, süchikijee tü 10 juya alatüitpakat jouluitpa maʼin 20 ayuulii maʼaka saaʼin kamüsoina, poloona aisü, eʼiijaa otta waneeirua kapüleesü maʼin eiyajaa süka wunuʼu. Otta eesü maʼaka 30 ayuulii jeketü. Soʼutku tia ayuuliikat mepisalü jee ouktusü wayuu sutuma.

10. ¿Jamüinjatü sukuwaʼipa wayuu maaʼulu saashin 2 Timoteo 3:1-5?

¹⁰ Süküjüin tü Wiwüliakat tü eeinjatkat sainküin mma otta jamüinjatüin sukuwaʼipa wayuu. Müshi Pablo suluʼu 2 Timoteo 3:1-5: ‹Sülüʼütpa sükalia sajaʼttajatüin kasa süpüshuaʼa, müliainjatü maʼin wayuu›. Tüü, shia  tü sukuwaʼipainjatkat wayuu naashin Pablo:

• kapüleerü naaʼin nakuwaʼipa namüiwaʼa

• kachiirueerü naaʼin washirüü

• moonooinjeena sümaa nanüiki nashi jee nei

• mojuteechi Maleiwa natuma

• maalinjeerü wayuu napüla

• maaʼinjeerü naaʼin

• jashicheena maʼin

• ashaitteena waneepia saaʼu maalin Maleiwa napüla

• anoujayaajeena nünain Maleiwa

11. ¿Kaseerü alataka namüin na mojulaashiikana saashin 2 Pedro 3:7?

¹¹ ¿Müsüche sukuwaʼipa wayuu eere kepiain pia? Eesü müle shia. Sainküin tü mmakat eeshii eeka müin nakuwaʼipa. Tia shiiʼiyatüin sülüʼülüin tü kaʼi najaʼttinnajanakalü oʼu. Müsü tü Wiwüliakat: ‹Najaʼttirüinjana Maleiwa na wayuu mojutkana atuma nia›, na mojulaashiikana (2 Pedro 3:7).

12, 13. ¿Kasa ‹tü shiimain atüjaanakalü aaʼu› maaʼulu?

¹² Wainma kasa mojusü maaʼulu maʼaka süküjüin paala tü Wiwüliakat. Akanasaʼa na aʼyataakana nümüin Jeʼwaa eʼrüshii kasa anasü.

 ¹³ ‹Atüjaaneerü maʼin aaʼu tü shiimainkat›, saashin tü karalouktakat Daniel. ¿Joujeerü shikeraajaka tia? Ekeraajeerü sülüʼütpa «tü kaʼi sajaʼttajatkalü oʼu kasa süpüshuaʼa» (Daniel 12:4, TNM). Soʼujee 1914, nükaaliinjain Jeʼwaa na aʼyataweekana nümüin süpüla natüjaain saaʼu süpüshi tü shiimain suluʼukat tü Wiwüliakat. Maʼaka saaʼin tü sünainpünaakat nünülia Maleiwa, tü keeʼireekat naaʼin, ouktüin Jesukürisüto waaʼu, tü alatakat namüin na ouktushiikana otta tü asoʼirawaakalü aaʼin. Na aʼyataakana nümüin Jeʼwaa anasü nakuwaʼipa sutuma tü natüjaakalü aaʼu otta naʼwaajüin Maleiwa süka. Natüjaa aaʼu kasain wayuu Nuluwataaya Maleiwa otta tü saainjüinjatkat süpüla sunoʼuteʼerüin tü Mmakat. ¿Kasa naainjaka süka tü natüjaakalü aaʼu? Tia ekeraajüsü maaʼulu.

14. ¿Jalamüinsü aküjünüin süchiki Nuluwataaya Maleiwa? ¿Jaralii na aküjakana pütchikat tia?

¹⁴ ‹Aküjüneerü sainküin mma süchiki Nuluwataaya Maleiwa›, müshi Jesukürisüto wanaa sümaa naashajaain süchiki ‹tü kaʼi sajaʼlajaainjatkat oʼu kasa süpüshuaʼa› (paashajeʼera Mateo 24:3, 14). Sainküin mma aküjünüsü süchiki Nuluwataaya Maleiwa, tü kasa eeinjatkat sutuma otta tü waainjüinjatkat süpüla anain wakuwaʼipa sutuma. Alatüsü suulia 230 mma otta wainma anüikii süküjünaka aluʼu. Wainma maʼin aküjülii pütchi nüchiki Jeʼwaa ‹saʼakajeejana shiʼiruku tü wayuukalüirua otta sainküinjee tü mmakat› aküjüshii süchiki Nuluwataaya Maleiwa (Alateetkat Mapeena 7:9). Ekirajüshii naya wayuu eeka nekirajaweein sünain tü shikirajakat maʼin tü Wiwüliakat otta nnojoishii achekajüin nneerü saaʼu. ¡Anakatche maʼin shikeraajia pütchikat tia! Aneerü maʼin shia wamüin jülüjale waaʼin ‹maalinjanain naya süpüla wayuu› naashin Jesuu (Lucas 21:17).

15. (1) ¿Alüʼütsüche saaʼin pümüin süpüla ‹sajaʼttüin kasa süpüshuaʼa›? ¿Jamüsü maka pünüiki? (2) ¿Kaseerü alataka namüin na eʼrüliikana wayumüin nümüin Jeʼwaa otta na oonookana sümaa tü Nuluwataayakat?

¹⁵ Sükajee shikeraajüin maaʼulu wainma pütchi suluʼujee tü Wiwüliakat, alüʼütsü süpüla sajaʼttüin kasa süpüshuaʼa. Aküjünüinjatü tü pütchi anasükat otta ajaʼlajaainjatü keraapa shia naashin Jeʼwaa. Süchikijee tia, ‹ajaʼlajaainjatü kasa süpüshuaʼa› (Mateo 24:14). ¿Jamaluʼulu tia? Najaʼttirajatü Maleiwa tü kasa mojusü eekat Mmapaʼa. Nükajee Jesuu otta na aapiee pülashiikana maʼin, najaʼttirüinjana Jeʼwaa na eʼrüliikana wayumüin (2 Tesalónica 1:6-9). Nnojoleerü emeejünüin wayuu nutuma Satanaa otta na yolujaakana. Süchikijee tia, wainmeerü kasa anasü eeka sutuma Nuluwataaya Maleiwa namüin na oonookana sümaa tia Aluwataayakat (Alateetkat Mapeena 20:1-3; 21:3-5).

16. ¿Kasa anaka maʼin süpüla paainjain?

¹⁶ Sükajee sülüʼülüin süpüla sajaʼlajaain tü kasa nuluwataakalü aaʼu Satanaa, eeshii süpüla wasakiraain: «¿Kasa taainjainjatka maaʼulu?». Ayata pikirajaain nünain Jeʼwaa otta sünain tü nuchuntakat pümüin (Juan 17:3). Pikirajaa maʼin sünain tü Wiwüliakat. Puutkajaa waneepia namaa na aainjakana maʼin tü keeʼireekat naaʼin Jeʼwaa (paashajeʼera Hebreokana 10:24, 25). Pikirajaa maʼin sünain tü nikirajakalü anain pia Maleiwa otta piiʼiranajeʼera pukuwaʼipa süpüla talatüin nia pümaa (Santiago 4:8).

17. ¿Jamüsü süntalaa sümüinjatka sümüin wayuu tü kaʼi najaʼttinnajanakalü oʼu na mojulaashiikana?

¹⁷ Naashin Jesuu nnojoleerü kasajatüin sümüin wayuu tü alatakat maaʼulu. Alüʼütshii na mojulaashiikana süpüla ajaʼttinnaa. Antalaa meerü tia kaʼikat maʼaka nüntalaa nümüin wanee kaʼruwarai (paashajeʼera 1 Tesalónica 5:2). Müshi Jesuu: ‹Tü wayuukalüirua nnojoliiwaʼaya noʼotooin  Noé suluʼu tü anuakat, eeʼeraashii neʼe. Nnojotsü natüjaain aaʼu tü kasa alatajatkat namüin. Je mapa, aʼitüsü tü juyakat sünain miyoʼuin maʼi shia süpüla ouktajatüin eekai nnojolüin nümaain Noé suluʼu tü anuakat. Akaweeria takalioʼu tayakai, chi Shipayakai Wayuu› (Mateo 24:37-39).

18. ¿Kasa tü jülüjüinjatkat maʼin waaʼin naashin Jesuu?

¹⁸ Naapirüin waya Jesuu, müshi nia: ‹Aluwataajeechi taya chi Shipayakai Wayuu, saaʼu tü wayuukalüirua. Jülüjale jaaʼin neʼe emiʼijaa, epeʼruwaa, ekawaa je jüshapataale aaʼin saaʼu tü jiküinjatkat, nnojoliishiijaʼa yapain jia sünain aʼatapaa taya sükajee tia. Anakaja jülüjale jaaʼin tü takaliakat waneepia sümaa juchuntüin nümüin Maleiwa süpüla isain jia suulia tü kasa mojusü alateetkat otta suulia japüijain jia tamülatuʼu tayakai, chi Shipayakai Wayuu› (Lucas 21:34-36). Jülüjainjatü maʼin waaʼin tia süka kateerüin noʼu na wayuu anakana noʼuluʼu Jeʼwaa otta Jesukürisüto sajaʼlajaapa tü kasa nuluwataakalü aaʼu Satanaa. Otta müsia kateerü noʼu waneepia suluʼu tü mma jeketüinjatkat (Juan 3:16; 2 Pedro 3:13).