1. Vaira negana ai do idia vara gaudia be edeseniai do ita dibaia?

NEGA ta televisen dekenai nius oi itaia bona oi laloa, ‘Inai tanobada dekenai dahaka do ia vara, a?’ Gau dikadia idia vara haraga bona ita laloa lasi negana ai idia vara, unai dainai ta ia diba lasi dahaka be kerukeru do ia vara. (Iamesi 4:14) To Iehova be vaira negana ai do ia vara gauna ia diba. (Isaia 46:10) Idaunegai, Baibel ese iseda nega dekenai do idia vara gau dikadia sibona ia perovetalaia lasi, to nega vaira ai do idia vara gau namodia ia perovetalaia danu.

2, 3. Iesu ena hahediba taudia ese edena henanadai idia henia, bona iena haere be dahaka?

² Iesu Keriso ese Dirava ena Basileia ia herevalaia, unai Basileia ese kara dika do ia haorea bona tanobada be paradaiso ai do ia halaoa. (Luka 4:43) Taunimanima idia ura diba edena negai unai Basileia do ia mai. Iesu ena hahediba taudia ese ia idia nanadaia: “Do oi giroa mai, bona tanobada dokona danu, ena toana be dahaka?” (Mataio 24:3) Iesu ese idia ia hamaoroa, Iehova Dirava sibona be inai tanobada ena dokona ia diba. (Mataio 24:36) To Basileia ese taunimanima dekenai maino bona noho namona ia do mailaia lasi neganai, Iesu ese tanobada dekenai do idia vara gaudia ia perovetalaia. Ia perovetalaia gaudia be hari idia vara noho!

 ³ Idia vara gaudia ese idia hamomokania ita be “tanobada dokona” dekenai ita noho, to unai ita do herevalaia lasi neganai, tau ta ese ia itaia lasi tuarina ta mani ita laloa. Unai tuari be ita itaia diba lasi lauma gabuna dekenai ia vara, bona ia be mai anina ita dekenai.

4, 5. (a) Iesu be King dagina ia abia murinai, guba dekenai dahaka ia vara? (b) Apokalupo 12:12 ena hereva hegeregerena, guba dekenai ia vara tuarina dainai dahaka ia vara?

⁴ Karoa gunana ese ia hahedinaraia lagani 1914 ai, Iesu Keriso be guba dekenai King dagina ia abia. (Daniela 7:​13, 14) Iesu ese Basileia siahuna ia abia murinai, kara ta ia karaia. Baibel ia gwau: “Guba dekenai tuari ia vara. Mikaela [Iesu ena ladana ma ta] mai ena aneru momo danu ese huala [Satani Diabolo] idia tuari henia. Huala mai ena aneru momo danu ese Mikaela idia tuari henia.” * Satani bona ena aneru dikadia, demoni unai, idia lusi bona guba amo tanobada dekenai idia negea diho. Dirava ena aneru idia moale badina Satani bona ena demoni be guba dekenai idia noho lasi. To, taunimanima be idia moale lasi. Baibel ia gwau: “Tanobada . . . madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.”​—Apokalupo 12:​7, 9, 12.

⁵ Guba dekenai ia vara tuarina dainai ia vara gauna mani ita laloa. Satani be ia badu dikadika dainai, tanobada dekenai nega dika bada ia havaraia. Bona hari ita be unai nega dekenai ita noho. To ia be nega daudau do ia noho lasi​—‘nega kwadogi sibona.’ Satani danu be unai ia diba. Baibel ese inai nega ia gwauraia, ‘nega dokona.’ (2 Timoteo 3:1) Ita moale badina kahirakahira Dirava ese Diabolo ena gaukara idauidau tanobada dekenai do ia kokia! Baibel ese ia perovetalaia gaudia haida be hari idia vara noho, mani idia haida ita itaia. Idia hamomokania ita be nega dokona dekenai ita noho bona  kahirakahira Dirava ena Basileia ese Iehova idia lalokau henia taudia dekenai hahenamo momo do ia mailaia. Gau ginigunana be, Iesu ia gwau hari ita noho negana idia makaia toa foa ita laloa.

6, 7. Edena dala ai Iesu ena hereva tuari bona hitolo bada dekenai be hari ia guguru?

⁶ “Bese ta ese do ia toreisi, bese ta do ia tuari henia. Bona basileia ta ese do ia toreisi, basileia ta do ia tuari henia.” (Mataio 24:7) Idia ore vadaeni laganidia ai, taunimanima milioni momo be tuari dekenai idia mase. Britain ena histori torea tauna ta ia gwau: “Histori ibounai lalonai lagani 1900 amo ema bona 2000 lalonai taunimanima momo herea idia alaia mase. . . . Unai laganidia be tuari negana, to nega ta ta bona nega kwadogi sibona lalonai tanobada dekenai tuari ia vara lasi.” Orea ta (Worldwatch Institute) ia gwau: “Lagani [1900-2000] huanai idia vara tuari, ese aposetolo edia nega ela bona lagani 1899 ai idia vara tuari lalonai idia mase taudia edia namba be nega toi ia hanaia.” Lagani 1914 amo, tuari dainai taunimanima 100 milioni mai kahana idia mase. Bema ita lalokau henia tauna ta be tuari dekenai ia mase, unai dainai ia vara lalohisihisina ita diba, to tuari dekenai edia lalokau taudia idia haboioa taudia milioni momo ese idia mamia lalohisihisina ita mamia diba lasi.

 ⁷ “Gabu idauidau dekenai hitolo bada do ia vara.” (Mataio 24:7) Tahua gaukara idia karaia taudia idia gwau, idia hanaia lagani 30 lalonai, aniani hatubua bona karaia gaukarana idia habadaia. To, taunimanima idia hitolo badina idia momo edia moni be hegeregere lasi aniani idia hoia totona, eiava idia be tano lasi edia aniani idia hadoa totona. Taunimanima milioni momo be hanaihanai idia hitolo. World Health Organization ia gwau, lagani ta ta ai natudia faiv milioni mai kahana idia mase badina aniani namona idia ania lasi.

8, 9. Dahaka ese ia hahedinaraia Iesu ena peroveta herevana be ia vara momokani?

⁸ “Gabu ibounai dekenai tano do idia mareremarere.” (Luka 21:11) Orea ta (U.S. Geological Survey) ia gwau, lagani ta ta lalonai tano mareremarere badadia 19 bamona idia vara bona ruma ia hadikaia bona tano ia kehoa. Bona lagani ta ta ai tano mareremarere badadia idia vara bona ruma idia hadikaia. Repoti ese idia hahedinaraia, lagani 1900 amo, tano mareremarere ese taunimanima 2 milioni mai kahana ia hamasea. Orea ta ia gwau: “Ena be saiens taudia ese diba matamata idia abia, to unai ese tano mareremarere dainai idia mase taudia edia namba ia hamaragia sisina sibona.”

⁹ “Gabu ibounai dekenai . . . ta ta dekenai do ia hanaia gorerena do idia vara.” (Luka 21:11) Ena be doketa ese gorere  hanamoa totona diba matamata idia abia, to gorere gunadia bona matamatadia ese taunimanima idia hahisia noho. Ripoti ta ia gwau taunimanima idia diba gorere 20​—idia haida be TB, malaria, bona kolera​—be iseda nega ai ia bada ia lao, bona gorere haida be muramura ese ia hanamoa diba lasi. Gorere matamata 30 bamona idia hedinarai. Idia haida be idia hanamoa diba lasi bona taunimanima idia hamasea.

10. Timoteo Iharuana 3:​1-5 ese edena kara idauidau ia herevalaia, bona hari inai negai oi itaia taunimanima ese idia hahedinaraia?

¹⁰ Baibel ese nega dokona ai tanobada dekenai do idia vara gau badadia sibona ia perovetalaia lasi, to ia gwau taunimanima edia kara do idia idau danu. Aposetolo Paulo be taunimanima momo ese do idia hahedinaraia karadia ia herevalaia. Timoteo Iharuana 3:​1-5 ia gwau: “Nega ena dokona dekenai, metau dikadia momo do idia vara.” Paulo ia gwau taunimanima be

• idia edia ura sibona do idia tahua

• moni do idia mataganigani henia

• edia tama sina do idia kamonai henia lasi

• helaga karadia do idia negea

•   lalokau do idia diba lasi

• do idia lebulebu

• do idia dagedage

• lebulebu karadia idauidau do idia ura henia bada, to Dirava do idia ura henia maragi

• Dirava badinaia kara be toana sibona do idia hahedinaraia

11. Salamo 92:7 ese edena dala ai kara dika taudia dekenai do ia vara gauna ia herevalaia?

¹¹ Emu noho gabuna dekenai taunimanima ese unai kara idauidau idia hahedinaraia, a? Oibe, idia hahedinaraia. Gabu ibounai dekenai taunimanima edia kara be dika. Unai ese ia hahedinaraia kahirakahira Dirava ese kara ta do ia karaia, badina Baibel ia gwau: “Kara dika taudia be do idia tubu daekau, ava idia tubu daekau bamona. Bona kerere idia karaia taudia, be kohu momo bona noho namo idia abia diba, to oi ese idia do oi hadikaia ore.”​—Salamo 92:7.

12, 13. Edena dala ai “aonega” be inai “dokona negana” ai ia bada ia lao?

¹² Nega dokona ai gau dikadia momo do idia vara, Baibel ese ia perovetalaia bamona. To inai tanobada dikana ai, Iehova idia tomadiho henia taudia dekenai gau namodia do idia vara.

¹³ Baibel buka Daniela ia gwau “aonega do ia bada herea.” Unai be edena  negai do ia vara? “Dokona negana” ai. (Daniela 12:4) Lagani 1914 amo, idia ura momokani Iehova idia hesiai henia taudia be, Ia ese ia durudia Baibel idia lalopararalaia namonamo totona. Idia ese Dirava ena ladana bona ena ura, Iesu Keriso ena mauri davalaia boubouna, mase taudia dekenai ia vara gauna bona toreisi lou idia lalopararalaia. Danu, Iehova idia tomadiho henia taudia be idia dekenai namo ia mailaia bona Dirava ena ladana hanamoa dalanai edia mauri idia noholaia. Dirava ena Basileia ese do ia karaia gaukara bona tanobada dekenai idia vara gaudia do ia hanamoa dalana idia diba. Idia abia diba dekenai dahaka do idia karaia? Unai henanadai dainai inai nega dokona dekenai ia guguru toa ta mani ita laloa.

14. Hari inai negai Basileia ena sivarai namona idia harorolaia ena bada be edena bamona, bona daidia ese idia harorolaia noho?

¹⁴ Iesu Keriso ese “tanobada dokona” ia perovetalaia neganai, ia gwau: “Basileia ena Sivarai Namona be tanobada ibounai dekenai do idia harorolaia.” (Mataio 24:​3, 14) Tanobada hegegemadai, Basileia ena sivarai namona​—Basileia be dahaka, dahaka do ia karaia, bona ena hahenamo idauidau ita abia dalana​—be hari tano 230 bona gado 400 mai kahana dekenai idia harorolaia. Iehova ena Witnes taudia milioni momo be mai edia goada ibounai ida Basileia ena sivarai namona idia harorolaia. Idia be “bese idauidau, iduhu idauidau, kopina idauidau, bona gado idauidau” taudia. (Apokalupo 7:9) Witnes taudia ese davana lasi Baibel stadi, be Baibel ena hadibaia hereva idia ura taudia milioni momo ida idia karaia. Unai peroveta herevana ia guguru dainai ita hoa, badina Iesu ia gwau Keristani taudia momokanidia be “taunimanima ibounai ese do idia badu henia”!​—Luka 21:17.

15. (a) Dahaka dainai oi abia dae ita be nega dokona dekenai ita noho? (b) “Dokona” ena anina be dahaka Iehova idia dadaraia taudia bona Dirava ena Basileia ena lohia siahuna idia abia dae taudia dekenai?

¹⁵ Hari inai negai Baibel ena peroveta hereva momo idia guguru dainai, oi abia dae ita be nega dokona dekenai ita  noho, a? Sivarai namona be do idia harorolaia ela bona Iehova ia laloa ia hegeregere murinai, “dokona” do ia mai. (Mataio 24:14) Inai hereva “dokona” ena anina be Dirava ese tanobada dekenai idia vara kara dika idauidau do ia haorea. Iehova ese Iesu bona aneru goadadia do ia gaukaralaia, mai edia ura ida Ia idia dadaraia taudia hadikaia ore totona. (2 Tesalonika 1:​6-9) Satani bona ena demoni ese bese idauidau do idia hakaua kerere lou lasi. Unai murinai, Dirava ena Basileia ese ena lohia dalana idia abia dae taudia dekenai hahenamo do ia mailaia.​—Apokalupo 20:​1-3; 21:​3-5.

16. Dahaka oi karaia be aonega karana?

¹⁶ Satani ena tanobada be kahirakahira do ia ore dainai, namona be sibona ita nanadaia, ‘Dahaka lau karaia be namo?’ Aonega karana be Iehova bona ena taravatu dekenai iseda diba ita habadaia noho. (Ioane 17:3) Baibel oi stadilaia goadagoada. Bona nega ibounai Iehova ena ura idia karaia taudia bamoa karana oi manadalaia be namo. (Heberu 10:​24, 25) Iehova Dirava ese tanobada hegegemadai dekenai idia noho taudia dekenai ia henia aonegana oi abia noho, bona emu mauri dekenai gau haida oi haidaua unai amo Dirava ena lalonamo do oi abia.​—Iamesi 4:8.

17. Kara dika idauidau hadikaia ore negana ia ginidae neganai, dahaka dainai taunimanima do idia hoa?

¹⁷ Iesu ia gwau taunimanima momo be nega dokona dekenai do idia vara gaudia do idia laloa lasi. Kara dika idauidau hadikaia ore negana be do ia mai haraga bona ita laloa lasi negana ai do ia mai. Hanuaboi ai henaoa tauna ta ia mai bamona, unai nega do ia mai neganai, taunimanima be do idia hoa. (1 Tesalonika 5:2) Iesu ia gwau: “Noa ena nega bamona, Taunimanima ena Natuna do ia mai neganai, be unai bamona gaudia do idia vara. Badina be unai neganai, abata badana do ia ginidae lasi neganai, idia aniani noho, idia inuinu noho, idia headava noho, ia mai bona Noa be lagatoi dekenai ia guia dinana. Taunimanima ese idia laloa lasi dahaka do ia vara, idia kara dika noho, ia mai bona abata badana ia ginidae,  vadaeni abata ranu ese ibounai ia abia lao. Taunimanima ena Natuna do ia mai neganai danu unai bamona do ia vara.”​—Mataio 24:​37-39.

18. Iesu ese dahaka sisiba ia henia bona unai ita laloa bada be namo?

¹⁸ Iesu ese ena kamonai taudia ia hamaoroa: “Do umui naria namonamo, aniani bona kekero muramura bona tanobada ena laloa metau momo gaudia ese emui lalona do idia guia garina, vadaeni Lohiabada ena Dina do ia mai haraga, umui hegaegae lasi garina. Badina be unai Dina be tanobada latanai idia noho taunimanima ibounai dekenai do ia ginidae. Unai dainai, do umui naria, bona nega ibounai do umui guriguri, vadaeni inai dika ibounai dekena amo do umui heau mauri, vadaeni Taunimanima ena Natuna [ena lalonamo ida] ena vairana dekenai do umui gini.” (Luka 21:​34-36) Aonega karana be Iesu ena hereva ita badinaia. Dahaka dainai? Badina Iehova bona “Taunimanima ena Natuna,” Iesu Keriso, ena lalonamo idia abia taudia be Satani ena tanobada dokonai do idia roho mauri bona kahirakahira do ia vara tanobada matamatana dekenai do idia noho ela bona hanaihanai!​—Ioane 3:16; 2 Petero 3:13.