1. Indu tji matu vanga okurihonga ohunga noruyaveze matu sokutara pi?

OVE wa rora okupuratena kombuze moradio yoye poo kotiivii? Mape ya wa rora okuripura kutja, ‘Hapo ouye mbwi wa tanda pi?’ Oviwonga vi werereka ovandu nga tji ve ha tjiwa kutja muhuka mari eta ye. (Jakobus 4:14) Nungwari Jehova u tjiwa mbi mavi tjitwa moruyaveze. (Jesaja 46:10) Rukuru tjinene, Embo re, Ombeibela ra hunganeka ohunga nomaumba nge tjitwa moruveze rwetu na wina ohunga noviṋa oviwa mbi mavi katjitwa moruyaveze rwopopezu.

2, 3. Ovahongewa vaJesus ve mu pura epuriro riṋe, neye we ve zira vi?

² Jesus Kristus wa hungira ohunga nOuhona waMukuru, mbu mau kayandeka ourunde nokuririsa ehi ndi oparadisa. (Lukas 4:43) Ovandu aave vanga okutjiwa kutja Ouhona mbwo mau ya ruṋe. Ovahongewa vaJesus ve mu pura kutja, “Otjiraisiro tjomeero woye notjomaandero wouye mbwi ma rire tjiṋe?” (Mateus 24:3) Jesus we ve zira kutja Jehova Mukuru erike ongu tjiwa nawanawa kutja omaandero wouye mbwi maye ya ruṋe. (Mateus 24:36) Posi yokutja, Jesus wa hunganeka oviṋa mbi mavi tjitwa kombanda yehi  komurungu waindu Ouhona waMukuru au hi ya eta ohange nondjeverero yatjiri kovandu. Imbi eye mbya hunganeka nai vi tjitwa!

³ Nambano ngunda atu hi ya konḓonona oviraisiro vyokutja tu hupa moruveze ‘rwomaandero wouye mbwi,’ ngatu tare kovita mbi hi na indu vya rorerwe okumunikwa i omundu. Ovita mbyo vya ri meyuru, nungwari ovikongorere ko vyavyo vi ṱuna kweṱe.

4, 5. (a) Tjimanga indu Jesus tja za nokuzikwa otjOmbara, keyuru kwa tjitwa tjike? (b) Otja kOmavandururiro 12:12, ovikeṋa mbyatja vi kongorera kovita meyuru?

⁴ Ekondwa nda kapita membo ndi ra kahurura kutja Jesus Kristus wa uta okuhonapara otjOmbara meyuru mombura 1914. (Daniel 7:13, 14) Tjimanga Jesus tja za nokurira Ombara, eye wa toora omikambo. Ombeibela mai tja: “Nu pa kara ovita meyuru. Mikael [ena rarwe raJesus] novaengeli ve va rwisire otjitjupamuriro [Satan Omudiaboli], notjo wina tje ve rwisire novaengeli vatjo.” * Satan novaengeli ve ovarunde, ozondemone, va pandjara ovita mbyo nave nakaurirwa kombanda yehi okuza meyuru. Ovaengeli ovaṱakame vaMukuru va yoroka tjinene indu Satan nozondemone ze tji va rambwa. Nungwari ovature vehi katjave kara nondjoroka otja indjo. Orondu Ombeibela mai tja: “Owee ku eṋe, mahi . . . Orondu Omudiaboli wa rauka, me ya ku eṋe, neye u nomazenge omanene, tjinga ama tjiwa kutja u noruveze orusupi uriri.”—Omavandururiro 12:7, 9, 12.

⁵ Tara kovikongorereko vyovita mbya tjitwa meyuru. Mena romazenge we, Satan wa eta ozombamisiro kovature vehi. Otja tji mo kamuna, eṱe nai tu hupa moruveze ndwo rwozombamisiro. Nungwari orwo maru rire ‘oruveze  orusupi uriri.’ Satan wina ma tjiwa. MOmbeibela oruveze ndwi ru isanewa ‘omayuva omasenina.’ (2 Timoteus 3:1) Ihi tjiri otjinyandise tjomutima okutjiwa kutja moruyaveze rwopopezu Mukuru ma isapo Omudiaboli nomarorero we kombanda yehi! Nambano indjo tu tare koviṋa tjiva Ombeibela mbi ya hunganeka nu mbi tjitwa nai moruveze rwetu. Imbi vi raisa kutja tu ri momayuva omasenina nu moruyaveze rwopopezu Ouhona waMukuru mau eta ozondaya nḓe hi nomaandero ku imba mba suvera Jehova. Rutenga, ngatu tare kovitjitwa vine Jesus mbya tja mavi rire otjiraisiro tjoruveze mu tu ri ndwi.

6, 7. Omambo waJesus ohunga novita nondjara ya yenenisiwa vi moruveze rwetu?

⁶ “Otjiwaṋa tjimwe matji sekamene otjiwaṋa otjikwao, nouhona umwe au rwisa ouhona oukwao.” (Mateus 24:7) Omangete yovandu va ṱa movita mozombura esere nḓa kapita. Omutjange umwe womakuruhungi wehi rOvaingirisa wa tja: “Meserewondo oritja-20 mwa tika ombinḓu onyingi tjinene okukapita omaserewondo warwe. . . . Oro ra ri eserewondo rovita mbi hi nondjandero, nu otuveze tji ku ha ri ovita twa ri otusupi uriri.” Orutuu okuza korutu ndu konḓonona oviṋa  mouye rwa tja: “Ovandu mba ṱa movita meserewondo oritja-20 va kapita ovandu mba ṱa movita okuza mouye outenga AD nga mombura 1899 potutatu.” Okuza mo-1914 ovandu mbe ri kombanda yomangete 100, va ṱa mena rovita. Omangete wovandu va muna oruhoze mena rokuzepaisa ovasuverwa vawo movita. Ngahino oove umwe wawo.

⁷ “Maku kara ondjara.” (Mateus 24:7) Ovakonḓonone ve tja omaunguriro wovikurya ya yeruruka tjinene mozombura 30 nḓa kapita. Posi yokutja ouhepe wovikurya u ryamena ko komurungu orondu ovandu ovengi kave novimariva mbya yenene okuranda ovikurya poo ehi romakunino. Momahi tjiva omasyona, ovandu mbe ri kombanda yetau rimwe ve rara nondjara eyuva arihe. Orutu rwOuveruke rwOuye ru haka kutja omariro omangundi ootjiṋa tji tji zepa ounatje wokombanda yomangete yetano ombura aihe.

8, 9. Ovikeṋa mbi mavi raisa kutja omahunganekero waJesus ohunga nomanyinganyingiro wehi nomitjise ya rira ouatjiri?

⁸ “Mamu kara omanyinganyingiro wehi omatirise.” (Lukas 21:11) Otja kotjira otjikonḓonone tjondungiro yehi tjaAmerika, ku undjirwa kutja maku kara omanyinganyingiro wehi omanene ovikando ape 19 mombura aihe, nu ngu maye yenene okuwisa ozondjuwo nokutaura ehi. Nu ombura aihe  kwa rora okutjitwa omanyinganyingiro wehi nge nomasa wokunyona ozondjuwo. Omatjivisiro nge ri po nai ya raisa kutja omanyinganyingiro wehi ya zepa ovandu vokombanda omangete yevari okuza kombura ndji 1900. Nu warwe ya tja: “Onḓunino younongo woviungura ya herura otjiṱiro hi pehi, nu kaṱiṱi uriri.”

⁹ “Mamu kara . . . nomitjise.” (Lukas 21:11) Nandi ku nozonamiti ozengi nozonganga nḓa hongwa, omitjise omikuru nomipe ngunda vi kondjisa ovandu. Orutuu rumwe rwa tjivisa kutja mozombura nḓa kapita pa handjauka omitjise 20 omitjiukwa, tjimuna o-TB, omalaria, okolera (omutjise wopehuri mbu etwa i omeva wondova), nu omitjise tjiva vi ririra ko omizeu okupanga nozopera. Mu nomitjise ape 30 omipe nu tjiva vyavyo ngamba kavi nomiti omipange nu vi zepa ovandu.

10. Ovikaro viṋe mbya hunganekwa mu 2 Timoteus 3:1-5, mbi munika movandu ndino?

¹⁰ Pendje nokutjiukisa ovitjitwa tjiva ovinene mouye, Ombeibela wina ya hunganeka kutja omayuva omasenina maye tjiukirwa kongaro yomeritjindiro wovandu. Omuapostele Paulus wa handjuṋuna kutja ovandu mave ritjindi vi. Mu 2 Timoteus 3:1-5 matu lese kutja: “Momayuva omasenina mamu  kara otuveze otuzeu.” Okutamuna tjiva, Paulus wa tja ovandu mave rire

• overisuvere

• omakorokope

• ovehinanḓuviro kovanene

• ovehinambango moviṋa oviyapuke

• ovehinarusuvero

• ovanautwe novindandi

• ovasuvere woviṋa pendje yokusuvera Mukuru

• nu mave munika aayo ovakambure, nungwari ve nakaura omasa wongamburiro

11. Epsalme 92:7 mari handjuṋuna vi imbi mbi mavi katjitwa kovarunde?

¹¹ Ovandu momaturiro woye ve raisa ovikaro mbyo? Ii, otjiperi. Koṋa akuhe ku novandu vovikaro ovivi. Ihi matji hee kutja Mukuru u ri pokutoora omikambo orondu Ombeibela mai tja: “Nandarire kutja ovarunde mave hapa otja ehozu, novatjite vouvi mave nyomoka, komaandero owo mave yandekwa nga aruhe.”—Epsalme 92:7.

12, 13. ‘Ondjiviro youatjiri’ ya takavara vi nai momaandero wouye?

¹² Omayuva omasenina tjiri ye ura nozombamisiro, otja Ombeibela pu ya  hunganeka. Nandi mu nouzeu mouye mbwi, okwo ku novitjitwa oviwa mokati kovakarere vaJehova.

¹³ Ombeibela membo raDaniel ya hunganeka kutja: ‘Ondjiviro youatjiri mai takavara.’ Ihi atja tji tjitwa ruṋe? Eendu “ouye tji mau kayanda.” (Daniel 12:4, sasaneka no-NW.) Nu tjinene okuza mo-1914, Jehova wa vatera imba mbe nonḓero yokumukarera kutja ve kure mondjiviro yOmbeibela. Owo va hara ondjiviro ongahuke youatjiri ohunga nena raMukuru nondando ye, nombunguhiro yomuinyo waJesus Kristus, nongaro yovaṱi, na wina ohunga nombendukiro. Okuwezako, ovakarere vaJehova ve rihonga okuhupa omiinyo vyawo mongaro ndji eta otjiyangapara ku wo na wina momuano mbu hivirika Mukuru. Owo wina va muna ondjiviro ongahuke ohunga nOuhona waMukuru nomuano mbu mau kaṱuna oviṋa kombanda yehi. Ondjiviro ndji ve ungura nayo tjike? Epuriro ndo mari tu eta komahunganekero warwe nge yenenisiwa momayuva omasenina nga.

14. Omazuvarisiro wombuze ombwa yOuhona ya handjauka pu pe ṱa pi, nu ovandu veṋe mbe i zuvarisa?

¹⁴ Momaprofetero we ohunga ‘nomaandero wouye mbwi,’ Jesus Kristus wa tja: ‘Nu indji Ombuze Ombwa yOuhona mai zuvarisiwa mouye auhe.’ (Mateus 24:3, 14) Ombuze ombwa ohunga nOuhona waMukuru i zuvarisiwa mouye auhe momahi wokombanda 230 na momaraka wokombanda 400. Ombuze ndjo i tjama ohunga nokutja Ouhona waMukuru otjikeṋa, kutja mau katjita tjike, nokutja matu kamuna vi ozondaya zawo. Omangete wOvahongonone vaJehova ve zuvarisa ombuze ombwa yOuhona noupandi. Owo ovandu mba za “momihoko noviwaṋa avihe, na momaraka aehe.” (Omavandururiro 7:9) Nokuhinakusutisa, owo ve honga ovandu ovengi ovanambango Ombeibela pozoyawo. Inga tjiri omayenenisiro omahimise womaprofetero, orondu Jesus wa hunganeka kutja Ovakriste vatjiri mave ‘tondwa i ovandu avehe’!—Lukas 21:17.

15. (a) Ove u nongamburiro kutja eṱe tu hupa momayuva omasenina, nongwaye tji mo tja nao? (b) ‘Omaandero’ maye hee tjike ku imba mbe pirukira Jehova na ku imba mbe riwisa kehi yomananeno wOuhona we?

¹⁵ Ove ko nakuitavera kutja eṱe tu ri momayuva omasenina indu tji mo munu kutja omaprofetero omengi wOmbeibela ye yenisiwa moruveze rwetu? Indu ombuze ombwa tji ya zu nokuzuvarisiwa otja konḓero yaJehova, ‘omaandero’ tjiri maye ya. (Mateus 24:14) ‘Omaandero’ maye hee oruveze Mukuru ndu ma kaisapo ourunde kombanda yehi. Jehova mau ungurisa Jesus novaengeli ve ovanamasa okuyandeka avehe mbe mu pirukira. (2 Ovatesalonika 1:6-9) Satan nozondemone ze kave nokupukisa ovandu rukwao. Okuzambo, Ouhona waMukuru mau rokisire ozondaya kombanda ya avehe mbe riwisa kehi yomananeno omasemba wOuhona mbo.—Omavandururiro 20:1-3; 21:3-5.

16. Omukambo uṋe wounongo ove mbu mo sokutoora nai?

¹⁶ Mena rokutja omaandero wouye waSatan ya tumbuka, matu sokuripura oveni kutja, ‘Okuza kunai me sokutjita tjike?’ Ma rire ounongo okukayenda komurungu okurihonga ohunga na Jehova na imbi mbye undjira ko kweṱe. (Johanes 17:3) Rihonga Ombeibela nombango yoye aihe. Riiririsa okuworongana aruhe puna varwe mbe ramanga okutjita ombango yaJehova. (Ovaheberi 10:24, 25) Muna ondjiviro onyingi Jehova Mukuru ndje yandja kovandu mouye auhe, nu u rundurure ongaro yehupo roye kokutja u tjate ku Mukuru.—Jakobus 4:8.

17. Ongwaye omayandekero wovarunde tji maye werereke ovengi?

¹⁷ Jesus wa hunganeka kutja ovengi kave nokuyandja ombakatwi koviraisiro vyokutja tu hupa momayuva omasenina. Ovarunde mave yandekwa tjimanga novengi mave wererekwa, otja erunga mouṱuku. (1 Ovatesalonika 5:2) Jesus wa rakiza kutja: “Omeero wOmuna wOmundu maye sana na imbi mbya tjitirwe momayuva waNoa. Omayuva nga wokomurungu womupupo ovandu iyave ri nokunwa,  novarumendu novakazendu iyave kupasana nga keyuva ndi Noa nda hitire motjitendeze. Nungwari owo kave tjizire imbi mbiyavi tjitwa nga omupupo tji we ya nau ve twara avehe. Otjinga amape kara nao indu Omuna wOmundu tje ya.”—Mateus 24:37-39.

18. Erakiza riṋe nda yandjwa i Jesus ndi matu sokuyandja ko ombakatwi?

¹⁸ Jesus opa zokuraera kovapuratene ve kutja: “Ritjevereye nawa kutja amu ha kara neraru namu ha ṱomanuwa omazeu, namu ha kara nozongendo zouye mbwi, tjapo eyuva ndi ngaari mu vaza ohaze. Orondu oro mari werereke avehe mba tura kombanda yehi arihe otja ongwehe. Kareye katumba nu mu kumbe aruhe kutja mu hare omasa okutuurunga nokuhinotjipo mu imbi avihe mbi mavi tjitwa, nokukurama komurungu wOmuna wOmundu.” (Lukas 21:34-36) Eṱe matu sokuyandja ombakatwi komambo waJesus nga. Omena ratjike? Orondu imba mba yakurwa i Jehova Mukuru ‘nOmuna wOmundu,’ Jesus Kristus, mave katuurunga omayandekero wouye waSatan nave hupisiwa nga aruhe mouye oupe nouhimangongo mbu ri popezu!—Johanes 3:16; 2 Petrus 3:13.