1. Anni nga libru i makekagi tu mesimmu ta mappange?

NAGGIRAW ka kari ngana tu balita tapus nakagim, ‘Anni panô ngana laman i mesimmu ta mappange?’ Gavva mesimmu i trahedia ira yari tu awan tu tolay nga makekagi nu anni mesimmu sonu umma. (Santiago 4:14) Ngem ammu ni Jehova nu anni mesimmu ta mappange. (Isaias 46:10) Nabinnay ngana nga neprofesiya ta Biblia i marake nga mesissimmu ta kaggawattam kunne na gapa ta makapabbaw nga gannagannug nga aranni ngana mesimmu.

2, 3. Anni i nepakkiavu na apostoles kani Jesus, anna anni i netabbag na?

² Egga nelammuyag ni Jesu-Cristo meyannung ta Pappatulan na Dios nga mamangultimu ta kinamarakay anna mamabbalin ta davvun tu paraiso. (Lucas 4:43) Kaya na totolay nga mammuan nu sonu anni duttal i Pappatulan. Kakuruganna, nepakkiavu na apostoles kani Jesus: “Anni i panakkilalan ta panolim [“keggam,” NW ] nga yatun ngana i panuppalan na mundo?” (Mateo 24:3) Netabbag ni Jesus nga si Jehova nga Dios laman i makannammu ta eksakto nga panuppalan na mundo onu na sistema na gannagannug. (Mateo 24:36) Ngem kinagina i gannagannug nga mesimmu  ta davvun nige nga iparattal na Pappatulan i kurug nga imammo anna seguridad ta tangaravvunan. Mesissimmu ngana i neprofesiyana!

³ Nige tam gigiammuan i ebidensia nga mattoletam ngana ta panuppalan na sistema na gannagannug, ammuattam labbi i gerra nga ari pulus nemammatan na totolay. Nesimmu yatun ta langi, ngem mafektattam ta resultana.

4, 5. (a) Anni i nesimmu ta langi ari nabbayag turi ta nabbaling si Jesus tu Patul? (b) Anni i resulta na gerra ta langi segun ta Nepakannammu 12:12?

⁴ Nepakanawag ta kapitulo 8 nga nammaguray ta langi bilang Patul si Jesu-Cristo turi 1914. (Bibbigammu i Daniel 7:13, 14.) Ari nabbayag, egga netuppal ni Jesus. Kagian na Biblia: “Nabbatta i gerra ta langi. Si Miguel [tanakuan nga ngagan ni Jesus] tuange ta anghel na ira ay nakillaban ta dragon [Satanas nga Diablo] tuange gapa ta anghel na ira.” * Naffu si Satanas anna i demoniona ira, tapus napapanaw ira ta langi anna napatavvar ta davvun. Nagayayya i matalo ira nga anghel megafu ta awan ngana ta langi si Satanas anna i demoniona ira. Ngem ari tu magayayya i totolay. Kagian lallagu na Biblia: “Ngem pakallallo kamu, sikamu nga egga ta utun na davvun . . . ta minulug nikamu i Demonio, nga nepallo i batù onu lussaw na, megafu ta ammu na tu pigo onu ababba ngana laman i nabattang sa nga tiempo!”​—Nepakannammu 12:7, 9, 12.

⁵ Nonopammu nu anni i resulta na gerra ta langi. Megafu ta gazzi ni Satanas, nazzigariga onu kakkabbi i totolay ta davvun. Magigiammum taw nga kapitulo nga mattoletam ngana tatun nga pakallallo nga tiempo. Ngem manganannuan laman yatun nga tiempo. Maski si Satanas ammuna nga ‘pigo ngana laman i tiempo’ nga nabattang sa. Tukuyan na Biblia  yatun nga periodo tu “pangurianan ira nga aggaw.” (2 Timoteo 3:1) Makapagayayya yatun nittam megafu ta aranni ngana nga alsan na Dios i influwensia ni Satanas ta davvun! Gigiammuattam i karuan ira nga gannagannug nga neprofesiya ta Biblia nga mesissimmu ngana. Yaw ira i mamakurug nga mattoletam ngana ta pangurianan ira nga aggaw. Ipasinganna paga nga aranni ngana nga ituppal na Pappatulan na Dios i mannanayun ira nga bendision para ta mangiddu kani Jehova. Ollu, gigiammuattam i kinagi ni Jesus nga appa nga parte na pagisenialan tape mammuattam nu anni ngana nga tiempo i pattolayattam.

6, 7. Anni i mamakurug nga mesissimmu ngana i profesiya ni Jesus meyannung ta gerra anna bisin?

⁶ “Maggegerra noka i nasa-nasion, kunne na gapa ta pappatulan ira.” (Mateo 24:7) Minillion ngana nga totolay i natay megafu ta gerra ta nappasa nga 100 dagun. Netura na Britano nga historiador: “I meka-20 nga siglo i kakaruan tu natay ta interu nga historia. . . . Maggi awan tu imman na gerra tatun nga siglo, anna egga laman pilippiga nga ababba nga tiempo nga awan tu gerra.” Kagian na report na Worldwatch Institute: “Mamittallu nga mas aru nga totolay i natay ta gerra ta meka-20 siglo  anne ta ngamin nga gerra namegafu ta ollu siglo AD adde ta 1899.” Maturu 100 million i natay ta gegerra namegafu turi 1914. Maski nu ammu tam i daddam na matayan tu tadday nga ideddukan megafu ta gerra, ariattam pulus matukug i grabe nga taki anna daddam na minillion nga totolay megafu ta natay nga ideddukadda.

⁷ “Mabbisin i totolay.” (Mateo 24:7) Kagian na mangusito ira nga minaru i produksion na makan ta nappasa nga 30 dagun. Ngem egga lagapa mabbisin megafu ta aru nga totolay i ari makalanno i igatadda tu makan onu awan tu davvudda nga pammulan. Ta mariga nga nasa-nasion, binillion nga totolay i maka-aleg laman tu tadday nga dolyar onu awan paga ta tangaggaw. Kakaruan nira i grabe anna kana-kanayun i pabbisidda. Kagian na World Health Organization nga malnutrision i primero nga kegafuan na patay na maturu nga lima nga million nga abbing kada dagun.

8, 9. Kunnasi nga matuttuppal i neprofesiya ni Jesus meyannung ta lunu-lunig anna epidemia?

⁸ “Egga noka i masikan ira nga lunig.” (Lucas 21:11) Segun ta U.S. Geological Survey, mappromedio tu 19 masikan nga lunu-lunig i mesimmu kada dagun. Kuruga masikan ira yatun nga puede manaral tu darakal nga pataddag anna mamaggungâ tu davvun. Ta kada dagun, egga grabe sikanna nga lunu-lunig  nga awayyana nga manabba tu darakal nga pataddag. Ipasingan na rekord nga maturu tu dua million ngana i natay ta lunig namegafu turi 1900. Kagian paga na tadday nga balita: “Baddi laman i neuffun na moderno nga teknolohia tapenu bumaddi i bilang na matay ta lunig.”

⁹ “Egga noka . . . i palakag nga tulu-tulagan onu epidemia.” (Lucas 21:11) Maski moderno ngana i medisina, ari lagapa nawawan i taka-taki nga mamarpariga ta totolay. Kagian na tadday nga report nga egga 20 taka-taki​—kagitta na tuberkulosis, malaria, anna kolera​—i nabbalin tu gagangay ngana laman ta nappasa nga dekada, anna ari tu moruan i karuan nga klase na taka-taki. Kakuruganna, maturu tu 30 bagu nga taka-taki i limittuag. Awan tu uru na karuan anna kepatayan paga.

10. Anni ira masingammu nga ugali na totolay i neprofesiya ta 2 Timoteo 3:1-5?

¹⁰ Fuera paga ta kritikal nga mesissimmu ta pangurianan ira nga aggaw, neprofesiya paga na Biblia i dakal nga panguli na ugali na totolay. Netura ni apostol Pablo i meyannung ta ugali na magaru nga totolay: “Duttal noka i ziga-riga ta pangurianan ira nga aggaw.” (Bibbigammu i 2 Timoteo 3:1-5.) Kinagi ni apostol Pablo nga tatun ira nga aggaw

• ayatan na totolay i baggida laman

•   kuartu laman i agga-nonoda

• ari nga manguru-kurug ta maganâda

• ariadda ammu i mappabalo

• awan tu allôda ta kasittoleda

• ariadda nga matangngallan i baggi anna nonoda

• kitapporay

• ala-alerad-da i pappaga-pagayayya laman anne ta Dios

• appe makadios ira ngem manakîda nga ulian i kata-katoleda

11. Anni i kagian na Salmo 92:7 nga mesimmu ta marakay nga totolay?

¹¹ Kunnatun kari ngana i totolay ta lugar nu? Siguradu nga wan. Maski sitaw nga lugar, egga marake nga totolay. Yaw i mangipasingan nga aranni ngana i kadaral da, megafu ta kagian na Biblia: “Maski nu mattalovu onu mattugu tu kunna kaddo i marakay ira, anna mapprogreso danuri marakay i kuadda, ngem mapittanan nga madaral ira.”​—Salmo 92:7.

12, 13. Kunnasi nga minaru i “fustu nga pakannammu” ta “pangurianan ira nga aggaw”?

¹² Kagitta na neprofesiya na Biblia, talaga napannuan tu zigariga i pangurianan ira nga aggaw. Ngem maski nu magulu i mundo, egga ira makasta nga mesissimmu ta maddayarayaw kani Jehova.

 ¹³ “Umaru noka i fustu nga pakannammu.” Yatun i neprofesiya na Biblia ta libru nga Daniel. Sonu anni nga mesimmu yatun? Durante ta “tiempo na panuppalan.” (Daniel 12:4) Namegafu turi 1914, talaga inuffunan ni Jehova nga umunag i pakalippawa danuri fermi nga makkaraga nga masserbi sa. Mas nga nalippawada i importante ira nga kinakurug meyannung ta ngagan anna gakkag na Dios, i sakrifisio nga tavvu ni Jesu-Cristo, i mesimmu ta natay ira, anna i paginnolay. Fuera paga tatun, nagigiammu na maddayarayaw kani Jehova nu kunnasi ira nga mattolay tu pakabenefisiowadda anna kedayawan na Dios. Napeggan ira tu manawag nga pakalippawa nu anni i ituppal na Pappatulan na Dios anna nu kunnasina nga itunung i gannagannug ta davvun. Anni kuadda taw nga pakannammu? Tabbagan yatun na tadday paga nga profesiya nga matuttuppal ta pangurianan ira nga aggaw.

14. Kunnasi kaláwa na kelayyagayya na mapia nga dumug ta maddaggun, anna sinni ira i mangilayyagayya taw?

¹⁴ “Melayya-gayya noka ta tanga-ravvunan yaw nga Mapia nga Dumug na Pammaguray na Dios.” Yatun i nekagi ni Jesus ta profesiyana meyannung ta “panuppalan na mundo” ni Satanas. (Bibbigammu i Mateo 24:3, 14.) Ta interu nga davvun, melayyagayya ngana ta maturu nga 230 nasion ta minagatu nga lengguahe i mapia nga dumug na Pappatulan​—nu anni i Pappatulan, anni kuanna, anna nu kunnasi tam mabenefisiowan. Minillion nga Saksi ni Jehova i matalikarag nga mangilaygayya ta mapia nga dumug na Pappatulan. Naggafu ira ta ‘madduma-ruma nga nasion, rasa, tribu, anna paguvovug.’ (Nepakannammu 7:9) Makkondukta i Saksi ira tu libre nga paggigiammu tu Biblia ta minillion nga totolay nga kayada mammuan i talaga nga ituttuddu na Biblia. Makapabbaw yaw nga ketuppalan na profesiya, maski nu kinagi ni Jesus ta kurug ira nga Cristiano tu ‘ikalussaw ira noka ngamin na totolay megafu ta ngaganna’!​—Lucas 21:17.

15. (a) Umanugu ka kari nga mattoletam ngana ta pangurianan ira nga aggaw? Ngatta? (b) Anni i mesimmu ta ngamin nga kumontra kani Jehova sonu duttal “i panuppalan”? Anni gapa mesimmu ta makimoray ira ta pammaguray na Pappatulan na Dios?

¹⁵ Megafu ta aru nga profesiya na Biblia i matuttuppal ta kaggawattam, ari ka kari umanugu nga mattoletam ngana ta pangurianan ira nga aggaw? Kabalin na kelayyagayya na mapia nga dumug ta interu davvun, siguradu nga duttal ngana “i panuppalan.” (Mateo 24:14) Kaya kagian na “panuppalan” i tiempo sonu alsan na Dios i kinamarakay ta davvun. Gukaban ni Jesus anna na makapangngua nga angheles, daralan noka ni Jehova ngamin danuri mangontra Sa. (2 Tesalonica 1:6-9) Ari ngana pulus melogo ni Satanas anna na demoniona ira i nasa-nasion. Kabalinna yatun, ivuvvu noka na Pappatulan na Dios i bendision ira ta ngamin nga makimoray ta matunung nga pammagurena.​—Nepakannammu 20:1-3; 21:3-5.

16. Anni i mepangngo nga kuammu?

¹⁶ Megafu ta aranni ngana manuppal i sistema ni Satanas, mawag nga ipakkiavumu ta baggim, ‘Anni i mepangngo nga kuakku?’ Makasta nu itulu-tuloy mu i maggigiammu meyannung kani Jehova anna ta kayana ira nga ipakua nittam. (Juan 17:3) Mallallappo ka nga maggigiammu tu Biblia. Regular nga makikavulu ka ta totolay nga mangngua tu uray ni Jehova. (Bibbigammu i Hebreo 10:24, 25) Ammuammu si Jehova nga Dios gukaban na paggigiammu tu Uvovug na. Uliammu i kawagan ira nga ulian ta pattolem tapenu malawamu i fabor na Dios.​—Santiago 4:8.

17. Ngatta aru nga totolay i makaddag sonu duttal i kadaral na marakay ira?

¹⁷ Neprofesiya ni Jesus nga aru i ari mangikabeng ta ebidensia nga mattoletam ngana ta pangurianan ira nga aggaw. Duttal i kadaral na marakay ira ta tiempo nga ariadda inanaman. Gitta na gavva nga dattal na makkoko nu gabi, kunnatun gapa i angay na panuppalan. (Bibbigammu i 1 Tesalonica 5:2.) Dati nga kinagi ni Jesus nga i kegga na Ana na Tolay ay megitta turi ta tiempo ni Noe. Kinagina: “Nage nuri  na delubio, kimi-kiminan anna mini-mininum i totolay. Nangatawa i lallaki anna naki-atawa i babbay adde ta aggaw na tallung ni Noe ta daka-dakal nga sinambaw onu arka. Ngem ariad-da nga ammu i mesissimmu adde ta nipaddelubio na, ay nalaggabban ira ngamin.”​—Mateo 24:38, 39.

18. Anni i kinagi ni Jesus nga mawag tu ipafutu tam?

¹⁸ Yari tu kinagi ni Jesus ta maggigginna sa: “Magimmugug kamu, ta marakay nu yatun laman i talattangngawan nu i kabattug nu, pagillellaw nu, tuange ta avvuru-vurung nu nga meyannung toye ta maddaggun nga pattolay. Ay gavva nga duttal yatun nga Aggaw anna dangnganan nakamu nga ari tu sigga-paran. Ta yaw ay duttal ta ngamin nga totolay toye ta utun na davvun. Mappara-parak-kamu anna kanayuk-kamu nga maddasal tapenu egga i sikan nu nga mangililli taw ngamin nga mesissimmu. Ay awayya nu i umarubang [nga napaboran] ta Ana na Tolay.” (Lucas 21:34-36) Mawag nga ipafutu tam i kinagi ni Jesus. Ngatta? Megafu ta ngamin danuri paboran ni Jehova nga Dios anna ni Jesu-Cristo, i “Ana na Tolay,” ay mapeggan tu iddanama nga mepalliag ta panuppalan na sistema na gannagannug ni Satanas. Mattolay noka ira tu mannanayun ta makakkasta nga bagu nga mundo nga araranni ngana!​—Juan 3:16; 2 Pedro 3:13.