1. Ania a libro ti mangipalgak iti mapasamak iti masanguanan?

ITI panagbuybuyam kadagiti damag iti telebision, naisaludsodmo kadin ti kastoy, ‘Ania ngata ti pagtungpalan daytoy a lubong?’ Di ninamnama a mapasamak dagiti nakalkaldaang a banag ken awan ti tao a makaibaga iti mapasamak inton bigat. (Santiago 4:14) Nupay kasta, ammo ni Jehova ti mapasamak iti masanguanan. (Isaias 46:10) Nabayagen nga impadto ti Biblia dagiti dakes a banag a mapaspasamak iti kaaldawantayo ken dagiti nakaskasdaaw a banag a mabiiten a mapasamak.

2, 3. Ania ti insaludsod dagiti adalan ni Jesus, ket ania ti insungbatna?

² Nagsao ni Jesu-Kristo maipapan iti Pagarian ti Dios, a mamagpatingga iti kinadakes ken mamagbalin iti daga a paraiso. (Lucas 4:43) Kayat idi dagiti tattao a maammuan no kaano nga umay ti Pagarian. Kinapudnona, insaludsod dagiti adalan ni Jesus: “Anianto ti pagilasinan ti kaaddam ken ti panungpalan ti sistema ti bambanag?” (Mateo 24:3) Kas sungbat, kinuna kadakuada ni Jesus a ni laeng Jehova a Dios ti makaammo no kaano a dumteng ti panungpalan daytoy a sistema dagiti bambanag. (Mateo 24:36) Ngem impadto ni  Jesus dagiti banag a mapasamak ditoy daga sakbay nga iyeg ti Pagarian ti pudno a talna ken talged iti sangatauan. Mapaspasamaken dagiti impadtona!

³ Sakbay a sukimatentayo ti pammaneknek nga agbibiagtayon iti “panungpalan ti sistema ti bambanag,” usigentayo iti apagbiit ti maipapan iti gubat a saan a naimatangan ti asinoman a tao. Napasamak dayta idiay langit, ket ti resultana apektarannatayo.

4, 5. (a) Ania ti napasamak idiay langit di nagbayag kalpasan ti pannakaisaad ni Jesus kas Ari? (b) Sigun iti Apocalipsis 12:12, ania ti resulta ti gubat sadi langit?

⁴ Inlawlawag ti napalabas a kapitulo iti daytoy a libro a nagbalin nga Ari ni Jesu-Kristo idiay langit idi tawen 1914. (Daniel 7:13, 14) Di nagbayag kalpasan ti pannakaisaadna kas Ari, nagtignay ni Jesus. Kuna ti Biblia: “Bimtak ti gubat sadi langit: Ni Miguel [sabali pay a nagan ni Jesus] ken dagiti anghelna nakibakalda iti dragon [ni Satanas a Diablo], ket nakibakal ti dragon ken dagiti anghelna.” * Naabak iti dayta a gubat ni Satanas ken dagiti dakes nga anghelna, dagiti demonio, ket napagtalawda idiay langit ken naitapuakda ditoy daga. Agragragsak dagiti matalek nga espiritu nga annak ti Dios ta awanen idiay langit ni Satanas ken dagiti demoniona. Ngem saan a rag-o ti inyeg daytoy kadagiti tattao. Imbes ketdi, naipadto iti Biblia: “Asi pay ti daga . . . agsipud ta ti Diablo immulog kadakayo, nga addaan iti dakkel nga unget, yantangay ammona nga ababan ti periodo ti tiempona.”—Apocalipsis 12:7, 9, 12.

⁵ Imutektekam ti resulta ti gubat sadi langit. Sipupungtot a rirriribuken ni Satanas dagiti agnanaed ditoy daga. Kas maadalmonto, agbibiagtayon iti dayta a panawen ti riribuk. Ngem apagbiit dayta—‘ababa laeng a periodo ti  tiempo.’ Ammo met dayta ni Satanas. Dagiti “maudi nga aldaw” ti awag ti Biblia iti daytoy a panawen. (2 Timoteo 3:1) Anian a ragsaktayo ta mabiiten nga ikkaten ti Dios ti impluensia ti Diablo ditoy daga! Usigentayo ti sumagmamano kadagiti banag a naipadto iti Biblia a mapaspasamak itan. Paneknekan dagitoy nga agbibiagtayon kadagiti maudi nga aldaw ken mabiiten nga iyeg ti Pagarian ti Dios dagiti agnanayon a bendision kadagidiay mangay-ayat ken ni Jehova. Umuna, sukimatentayo ti uppat a paset ti pagilasinan a kinuna ni Jesus a mangtanda iti panawen a pagbibiagantayo.

6, 7. Kasano a matungtungpal ita ti imbaga ni Jesus maipapan kadagiti gubat ken kinakirang ti taraon?

⁶ “Ti nasion tumakderto a bumusor iti nasion ken ti pagarian a bumusor iti pagarian.” (Mateo 24:7) Riniwriw a tattao ti napapatay kadagiti gubat iti napalabas a siglo. Insurat ti maysa a historiador a Britano: “Ti maika-20 a siglo ti kadadaraan a siglo iti pakasaritaan ti tao. . . . Maysa dayta a siglo ti gistay di agsarday a gubat, ket manmano ken apagbiit laeng dagiti tiempo nga awan ti dangadang.” Kuna ti maysa a report manipud iti Worldwatch Institute: “Mamitlo nga ad-adu dagiti tattao a napapatay iti gubat iti [maika-20 a] siglo  ngem kadagiti amin a gubat manipud idi umuna a siglo K.P. agingga idi 1899.” Nasurok a 100 a milion a tattao ti natay kadagiti gubat manipud idi 1914. Ditay matukod ti ladingit ken saem a sinagaba dagiti minilion a tattao a napukawan kadagiti patpatgenda iti biag.

⁷ “Addanto dagiti kinakirang ti taraon.” (Mateo 24:7) Kuna dagiti agsuksukisok nga iti napalabas a 30 a tawen, dakkel ti dinur-asan ti produksion ti taraon. Nupay kasta, agtultuloy a nakirang ti taraon agsipud ta adu dagiti awanan iti umdas a kuarta a paggatang iti taraon wenno awanan iti daga a pagmulaan. Kadagiti napanglaw a pagilian, riniwriw dagiti agbisbisin. Iti panagadal ti World Health Organization, malnutrision ti maysa kadagiti kangrunaan a pakaigapuan ti ipapatay ti nasurok a lima a milion nga ubbing iti kada tawen.

8, 9. Ania ti mangipakita a matungtungpalen ti padto ni Jesus maipapan kadagiti ginggined ken angol?

⁸ “Addanto dadakkel a ginggined.” (Lucas 21:11) Sigun iti U.S. Geological Survey, manipud idi 1990 agpromedio iti 17 a napipigsa a ginggined iti kada tawen ti mangdaddadael kadagiti pasdek ken mamagrengngat iti daga. Tinawen nga adda dagiti napigsa a ginggined a mangrippuog nga interamente kadagiti pasdek. Ipakita dagiti rekord a nasuroken a dua a milion ti natay kadagiti ginggined manipud  idi 1900. Kuna ti maysa a report: “Bassit laeng ti binabaan ti bilang dagiti biktima iti laksid ti idudur-as ti teknolohia.”

⁹ “Addanto . . . dagiti angol.” (Lucas 21:11) Iti laksid ti idudur-as ti medisina, agsagsagaba latta ti sangatauan gapu kadagiti datin ken baro a sakit. Kuna ti maysa a report nga ad-adda a nagbalinen a gagangay kadagiti kallabes a dekada ti 20 a pagaammo a sakit, a pakairamanan ti sarut, malaria, ken kolera, ken adda dagiti sakit a narigat itan nga agasan. Kinapudnona, di kumurang a 30 a baro a sakit ti timmaud. Saan a maagasan ken makapapatay ti dadduma kadagitoy.

10. Ania dagiti kababalin a naipadto iti 2 Timoteo 3:1-5 a makitkitam kadagiti tattao iti kaaldawantayo?

¹⁰ Malaksid iti panangiladawanna iti dadduma kadagiti kasasaad iti lubong, impadto ti Biblia a kadagiti maudi nga aldaw, adda maaramid a panagbalbaliw iti kagimongan ti tao. Dineskribir ni apostol Pablo ti kababalin ti kaaduan a tattao. Iti 2 Timoteo 3:1-5, kastoy ti mabasatayo: “Kadagiti maudi nga aldaw dumtengto dagiti napeggad a tiempo a narigat a pakilangenan.” Kinuna ni Pablo a dagiti tattao agbalindanto a

• managayat iti bagbagida

• managayat iti kuarta

•   nasukir kadagiti nagannak

• saan a nasungdo

• awanan iti nainkasigudan a panagayat

• awanan iti panagteppel

• narungsot

• managayat iti ragragsak imbes a managayat iti Dios

• addaan iti langa ti nadiosan a debosion ngem libakenda ti pannakabalin dayta

11. Ania ti kuna ti Salmo 92:7 a mapasamakto kadagiti dakes a tattao?

¹¹ Adda kadi dagiti kasta a tattao iti lugaryo? Sigurado nga adda. Uray sadinoman, adda dagiti tattao a kasta ti kababalinda. Kayat a sawen daytoy a dandanin agtignay ti Dios, ta kuna ti Biblia: “No agtubo dagidiay nadangkes kas iti mulmula ket rumangpaya dagiti amin a managaramid iti makapasakit, dayta ket tapno matalipuposda iti agnanayon.”—Salmo 92:7.

12, 13. Kasano nga immadu ti “pudno a pannakaammo” iti daytoy “tiempo ti panungpalan”?

¹² Pudno a napno iti riribuk dagiti maudi nga aldaw, kas impadto ti Biblia. Ngem iti daytoy nariribuk a lubong, adda dagiti nasayaat a kasasaad a masarakan kadagiti agdaydayaw ken ni Jehova.

 ¹³ “Ti pudno a pannakaammo umadunto,” impadto ti Daniel a libro ti Biblia. Kaano a mapasamak dayta? Iti “tiempo ti panungpalan.” (Daniel 12:4) Nangruna manipud idi 1914, tultulongan ni Jehova dagidiay pudpudno nga agtarigagay nga agserbi kenkuana a rumang-ay iti pannakaawatda iti Biblia. Limmawag ti pannakaawatda kadagiti napateg a kinapudno maipapan iti nagan ken panggep ti Dios, ti daton a pangsubbot ni Jesu-Kristo, ti kasasaad dagiti natay, ken ti panagungar. Maysa pay, nasursuro dagiti agdaydayaw ken ni Jehova ti agbiag iti wagas a makagunggona kadakuada ken pakaidayawan ti Dios. Limmawag met ti pannakaawatda iti akem ti Pagarian ti Dios ken no kasano nga ilintegna dagiti bambanag ditoy daga. Ania ti ar-aramidenda iti daytoy a pannakaammo? Iturongnatayo dayta a saludsod iti maysa pay a padto a matungtungpalen kadagitoy maudi nga aldaw.

14. Kasano kasaknap ti pannakaikaskasaba ita ti naimbag a damag maipapan iti Pagarian, ken siasino dagiti mangikaskasaba iti dayta?

¹⁴ “Daytoy naimbag a damag ti pagarian maikaskasabanto iti intero a mapagnaedan a daga,” kinuna ni Jesu-Kristo iti padtona maipapan iti “panungpalan ti sistema ti bambanag.” (Mateo 24:3, 14) Iti intero a daga, ti naimbag a damag maipapan iti Pagarian—no ania ti Pagarian, no ania ti aramidenna, ken no kasano a magun-odtayo dagiti bendision nga iburayna—ket maikaskasaban iti nasurok a 230 a pagilian ken iti nasurok nga 400 a pagsasao. Minilion a Saksi ni Jehova ti sireregta a mangikaskasaba iti naimbag a damag maipapan iti Pagarian. Naggapuda “kadagiti amin a nasion ken kadagiti tribu ken kadagiti ili ken kadagiti pagsasao.” (Apocalipsis 7:9) Mangikonkondukta dagiti Saksi iti libre a panagadal iti Biblia kadagiti minilion a tattao nga agtarigagay a mangammo iti pudno nga isursuro ti Biblia. Anian a nakaskasdaaw a kaitungpalan ti padto, nangruna ta impadto ni Jesus a dagiti pudno a Kristiano agbalinda a ‘puntiria ti pananggura ti amin a tattao’!—Lucas 21:17.

15. (a) Mamatika kadi nga agbibiagtayon kadagiti maudi nga aldaw, ken apay? (b) Ania ti kaipapanan “ti panungpalan” kadagidiay bumusbusor ken ni Jehova ken kadagidiay agpaspasakup iti turay ti Pagarian ti Dios?

¹⁵ Tangay nagadu dagiti padto iti Biblia a matungtungpalen, dika kadi umanamong nga agbibiagtayon kadagiti maudi nga aldaw? No naikaskasaban ti naimbag a damag iti kapkapnekan ni Jehova, dumtengton “ti panungpalan.” (Mateo 24:14) “Ti panungpalan” kaipapananna ti tiempo a panangikkat ti Dios iti kinadakes ditoy daga. Ni Jehova usarennanto ni Jesus ken dagiti mannakabalin nga anghel a mangdadael kadagiti amin a sipapakinakem a bumusbusor kenkuana. (2 Tesalonica 1:6-9) Awanton ni Satanas ken dagiti demoniona a mangyaw-awan kadagiti nasion. Kalpasanna, iburayto ti Pagarian ti Dios dagiti bendision kadagiti amin nga agpasakup iti nalinteg a turayna.—Apocalipsis 20:1-3; 21:3-5.

16. Ania ti nainsiriban nga aramidem?

¹⁶ Tangay asidegen ti panungpalan ti sistema ni Satanas, nasken nga isaludsodtayo iti bagitayo, ‘Ania ti rumbeng nga aramidek?’ Nainsiriban nga itultuloytayo ti agsursuro iti ad-adu pay maipapan ken ni Jehova ken kadagiti iparebbengna kadatayo. (Juan 17:3) Ipasnekmo ti agadal iti Biblia. Ipaugalim ti makitimpuyog a regular kadagiti dadduma pay a mangikagkagumaan a mangaramid iti pagayatan ni Jehova. (Hebreo 10:24, 25) Gumun-odka iti nawadwad a pannakaammo nga ididiaya ni Jehova a Dios kadagiti tattao iti intero a lubong, ken mangaramidka kadagiti kasapulan a panagbalbaliw iti biagmo tapno anamongannaka ti Dios.—Santiago 4:8.

17. Apay a maklaatto ti kaaduan a tattao inton dumteng ti pannakadadael dagiti nadangkes?

¹⁷ Impadto ni Jesus a saan nga ikankano ti kaaduan a tattao ti pammaneknek nga agbibiagtayon kadagiti maudi nga aldaw. Kellaat ken di ninamnama a dumtengto ti pannakadadael dagiti nadangkes. Kas iti mannanakaw nga umay iti rabii, kellaatennanto ti kaaduan a tattao. (1 Tesalonica 5:2) Impakdaar ni Jesus: “Kas idi kaaldawan ni Noe, kastanto ti kaadda ti Anak ti tao. Ta kas kadakuada kadagidi nga aldaw kasakbayan ti  layus, a mangmangan ken umin-inumda, mangas-asawa dagiti lallaki ken mayas-asawa dagiti babbai, agingga iti aldaw a simrek ni Noe iti daong; ket saanda a nangikankano agingga nga immay ti layus ket inyanudna amin ida, kastanto ti kaadda ti Anak ti tao.”—Mateo 24:37-39.

18. Ania a pakdaar ni Jesus ti rumbeng nga ipapusotayo?

¹⁸ Gapuna, kinuna ni Jesus kadagiti dumdumngeg idi kenkuana: “Asikasuenyo ti bagbagiyo tapno dagiti pusoyo saanda a pulos madagsenan iti nalabes a pampannangan ken nakaro a panagin-inum ken kadagiti pakaringgoran iti biag, ket giddato a dayta nga aldaw kellaat nga umay kadakayo kas maysa a silo. Ta dumtengto dayta kadagidiay amin nga agnanaed iti rabaw ti intero a daga. Ngarud, agtalinaedkayo a siririing iti isuamin a tiempo nga umar-ararawkayo tapno makapagballigikayo iti pananglisi kadagitoy amin a banag a naikeddeng a mapasamak, ken iti panagtakder [a naanamongan] iti sanguanan ti Anak ti tao.” (Lucas 21:34-36) Nainsiriban nga ipapusotayo ti sasao ni Jesus. Apay? Agsipud ta dagidiay anamongan ni Jehova a Dios ken “ti Anak ti tao,” ni Jesu-Kristo, adda namnamada a makalasat inton agpatingga ti sistema ti bambanag ni Satanas ken agbiag nga agnanayon iti nakaskasdaaw a baro a lubong a nakaas-asidegen!—Juan 3:16; 2 Pedro 3:13.