СӘРЕ 9
Әм Рʹасти ль «Ахьрийа ве Дьнйайе» Дьжин?
-
Чь дь Кʹьтеба Пирозда дәрһәԛа рʹожед иройин һатьбу пʹехәмбәртикьрьне?
-
Чь те готьне дь Кʹьтеба Пирозда, мәрийед ԝәʹде «ахьрийа ве дьнйайе» ԝе чь щурʹәйи бьн?
-
Кʹьтеба Пироз дәрһәԛа ԝәʹде «ахьрийа ве дьнйайе» чь тьштед баш пʹехәмбәрти кьрийә?
1. Жь кʹӧ әм дькарьн ахьрийе пебьһʹәсьн?
ДЬБӘК жи, гава тӧ дь телевизореда дәнг у бәʹса дьбьһейи, пьрс бал тә пешда те: ‹Гәло һʹале ве дьнйайе ԝе чаԝа бә?› Ԛәзийа ӧса ньшкева дьԛәԝьмьн, кӧ рʹасти жи тʹӧ кәс ньзанә сьбе ԝе чь сәре ԝи бьԛәԝьмә (Аԛуб 4:14). Ле Йаһоԝа занә ль ахьрийе чь ԝе бьԛәԝьмә (Ишайа 46:10). Дь Кʹьтеба хԝәйә Пирозда, Йаһоԝа нә кӧ тʹәне дәрһәԛа ԛәзийа у кӧл-дәрдед рʹожа иройин пʹехәмбәрти да ньвисаре, ле ӧса жи дәрһәԛа кʹәрәма, йед кӧ зутьрәке ԝе бьԛәԝьмьн.
2, 3. Шагьртед Иса чь жь ԝи пьрсин, у Иса ча щаба хԝә да?
2 Иса Мәсиһ гьли дькьр дәрһәԛа Пʹадшатийа Хԝәде, йе кӧ ԝе һʹәму зӧлмийе бьдә һьлдане у әʹрде бькә щьнәт (Луԛа 4:43). Мәрийа гәләк дьхԝәст пебьһʹәсийана, кӧ Пʹадшатийа Хԝәде кʹәнге ԝе бьһата. Дәрбәке шагьртед Иса жь ԝи пьрс кьрьн: «Бежә мә, әв тьшт ԝе кʹәнге бьԛәԝьмьн? У нишана һатьна тә у ахьрийа ве дьнйайе ԝе чаԝа бә?» (Мәтта 24:3). Ԝи чахи Иса щаба ԝан да у гот, кӧ тʹәне Хԝәде Йаһоԝа занә, кʹәнге ԝе хьлазийа ве дьнйайе бе (Мәтта 24:36). Ле Иса пʹехәмбәрти кьр, ԝәки пешийа кӧ Пʹадшатийа Хԝәде әʹрде бькә щьнәт, ль сәр әʹрде ԝе чь бьԛәԝьмьн. У әв пʹехәмбәрти һәма иро тенә сери!
3 Пешийа кӧ әм избат кьн, ԝәки әв йәк рʹасти жи ӧса нә, ԝәрә әм пебьһʹәсьн ль әʹзмана чь шәрʹ ԛәԝьми. Рʹаст ә тʹӧ кәс жь мәрьва әв шәрʹ нәдитийә, ле әв шәрʹ ль сәр һʹәмуйа һʹӧкӧм бу.
ШӘРʹЕ ЛЬ ӘʹЗМАНА
4, 5. (а) Паши ԝе йәке ча Иса бу пʹадша, ль әʹзмана чь ԛәԝьми? (б) Ча жь Әʹйанти 12:12 те кʹьфше, паши шәрʹе ль әʹзмана чь ԛәԝьми?
4 Жь сәре майин әм пеһʹәсийан, кӧ Иса дь сала 1914-да ль сәр әʹзмана бу Пʹадша. (Бьхунә Данйел 7:13, 14.) Чахе әԝи сәрԝерти сьтанд, әԝи перʹа-перʹа дәстпекьр шьхӧлкʹарийе бькә. Дь Кʹьтеба Пирозда те готьне: «Ль әʹзмен шәрʹ дәстпебу. Мьхайил [сәрнавәки Иса] мьлйакʹәтед хԝәва тʹәви зийе [Шәйтʹан Мире-щьна] шәрʹ кьр, зийе жи мьлйакʹәтед хԝәва тʹәви ԝан шәрʹ кьр». * Дь ви шәрʹида Мире-щьна у мьлйакʹәтед хьраб демәк щьн, данә дәр у жь әʹзмана һатьнә авитьне сәр әʹрде. Бьдьнә һʹәсабе хԝә, мьлйакʹәтед Хԝәдейә амьн чьԛас ша дьбун, кӧ әʹзман һатә тʹәмьзкьрьне. Ле сәва мәрьва әв бу кʹәдәрәкә мәзьн. Дь Кʹьтеба Пирозда те готьне: «Ле ԝәй ль әʹрде . . . чьмки Мирещьн жорда сәр ԝәда һатә авитьне у әԝ жь һерсе хԝә дьхԝә, кӧ занә ԝе һьндьки бьминә» (Әʹйанти 12:7, 9, 12).
5 Дина хԝә бьде, әви шәрʹе ль әʹзмана чь гәрәке бьанийа ль сәр әʹрде. Мире-щьна бь һерса хԝә гәрәке һʹәму мәрийарʹа ль сәр әʹрде ԝәй, демәк кӧл-дәрд бьанийа. Дь ви сәрида ԝе рʹьнд бе әʹйанкьрьне, кӧ әм рʹасти жи дь ԝәʹдәки ӧсада дьжин. Ле зутьрәке хьлазкьрьн ԝе һәбә, Шәйтʹан Мире-щьна хԝәха жи занә кӧ «ԝе һьндьки бьминә». Кʹьтеба Пироз әви зәмани нав дькә «рʹожед ахьрийе» (2 Тимотʹейо 3:1). Чьԛас әм гәрәке ша бьн, чьмки зутьрәке Хԝәде ԝе әʹрде жь һʹӧкӧмтийа Мире-щьна хьлаз кә! Ԝәрә әм дәрһәԛа һьнә тьшт хәбәрдьн, йед кӧ дь Кʹьтеба Пирозда һатьнә пʹехәмбәртикьрьне, у рʹожа иройин жи тенә сери. Әв йәк избат дькә, кӧ әм бь рʹастийе жи дь рʹожед ахьрийеда дьминьн, у Пʹадшатийа Хԝәде ԝе зутьрәке кʹәрәма һʹәта-һʹәтайе бьбаринә ль сәр ԝан мәрьва, кʹи кӧ Хԝәде һʹьз дькьн. Пешийе ԝәре әм хәбәрдьн дәрһәԛа чар нишанед рʹожа иройин, кʹижан кӧ Иса дьгот.
ԚӘԜЬМАНДЬНЕД МӘХСУС ДЬ РʹОЖЕД ПАШЬНДА
6, 7. Ча гьлийед Иса дәрһәԛа шәрʹа у хәлайи-щәлайе, иро тенә сери?
6 «Мьләте рʹабә ль сәр мьләт, пʹадшати ль сәр пʹадшатийе» (Мәтта 24:7). Жь сала 1901-2000, бь милйона мәрьв дь шәрʹда һатьбун кӧштьне. Тʹәрихзанәки Британи ӧса ньвисийә: «Дь нав тʹәмамийа дирока дьнйайеда жь һʹәму ԛьрʹна зедәтьр дь ԛьрʹна бистида хуна мәрийа һатьбу рʹетьне . . . дь ԝан ԝәʹдада беһʹәсаб шәрʹ һәбун, әв шәрʹ һәрге хьлаз дьбун жи, һьнәк ԝәʹдә шунда диса дәстпедьбун». Дь рʹожнәмәкә бь наве «Ԝӧрлдԝочда», ӧса ньвисар ә: «Тʹәне дь ԛьрʹна бистида, һаԛас мәрьв һатьбун кӧштьне, чьԛас кӧ дь нава тʹәмамийа дирокеда нәһатьбун кӧштьне». Дь сала 1914-да, нав шәрʹда ԝәкә 100 милйон мәрьв мьрьн. Һәрге кәсәк жь мәрийед мә нав шәрʹда мьрьнә, әв кʹәдәрәкә мәзьн ә, ле бьдә һʹәсабе хԝә, мьрьна бь милйона мәрийа, чьԛас кʹәдәрәкә мәзьн ани ль дьнйайе.
7 «Щи-щийа ԝе хәлайи-щәлайе. . . бә» (Мәтта 24:7). Ча жь леколина зандара те кʹьфше, дь нава 30 салед пашьнда хӧрәк һе зедә бу. Ле диса жи мәри бьрʹчи нә, чьмки пʹәре ԝан тʹӧнә хԝарьне бькʹьрʹьн, йан жи әʹрде ԝан тʹӧнә, ԝәки тьшта бьчиньн. Ԝәкә бь милйарда мәрьв дь ԝәлатед пешдачуйида, мәщбур ьн рʹоже тʹәне пе доларәки бьжин. Гәләк жь ԝан мәрийа жь бьрчибуне нәхԝәш дькʹәвьн. Бь һʹәсабкьрьна Организасиона Сахләмхԝәйкьрьнейә Һәмдьнйайе, һәр сал ԝәкә пенщ милйон зарʹ жь бьрчибуне дьмьрьн.
8, 9. Жь чь те кʹьфше кӧ пʹехәмбәртийед Иса дәрһәԛа әʹрдһʹәжа у нәхԝәшийа һʹал, бь рʹастийе жи тенә сери?
8 «Әʹрдһʹәжед мәзьн . . . ԝе бьбьн» (Луԛа 21:11). Ча жь Хьзмәткьрьна Әʹрднасийа Әмәрикайа Йәкбуйи те кʹьфше, һәр сал ԝәкә 19 әʹрдһʹәжед гран дькарьн бьԛәԝьмьн. Жь ван әʹрдһʹәжед гьран, авайи зийанәкә мәзьн дьстиньн у әʹрд жи дьԛәльшә. Хенщи ве йәке, һәр сал әʹрдһʹәжед ӧса ԛайим жи дьԛәԝьмьн, кӧ гәлә авайи бь тʹәмами һьлдьшьн. Ӧса жи һʹәсабәк дьдә кʹьфше кӧ сала 1990-да дәстпебуйи, жь әʹрдһʹәжа дӧ милйона зедәтьр мәрьв мьрьн. Дь нәшьркьрьнәкеда һатьбу ньвисаре: «Тәкʹнолощийа мәрийа ԛәт тʹӧ тьшти нькарә бькә, сәва кӧ әʹмьре мәрийа жь әʹрдһʹәжа хьлаз кә».
9 «Мина нәхԝәшийа һʹал ԝе бьбьн» (Луԛа 21:11). Рʹаст ә медисинайә иройин пешда чуйә, ле йәкә әԝана нькарьн әван нәхԝәшийед ну бьдьнә сәкьнандьне, у нәхԝәшийед бәре жи һәр щар һе гәләк бәла дьбьн. Дь әʹдәбийатәкида һатьбу готьне кӧ ԝәкә 20 нәхԝәшийед ӧса, ча мәсәлә: «тубәркулоз, тʹа, кʹолера» һәнә, йед кӧ һәр щар һʹәкимарʹа һе чәтьн дьбә ван нәхԝәшийа ԛәнщ кьн. Хенщи ԝе йәке, ԝәкә 30 нәхԝәшийед ну ль дьнйайе бәла бун. Гәләк жь ван нәхԝәшийа найенә ԛәнщкьрьне у гәләк мәри жь бо ван нәхԝәшийа дьмьрьн жи.
ДЬ РʹОЖЕД АХЬРИЙЕДА МӘРЬВ ԜЕ ЧЬ ЩУРʹӘЙИ БЬН
10. Ча жи дь 2 Тимотʹейо 3:1-5-да һатьбу пʹехәмбәртикьрьне, иро мәри чь щурʹәйи нә?
10 Дь Кʹьтеба Пирозда те гьликьрьне нә кӧ тʹәне дәрһәԛа ԝе йәке, ԝәки дь рʹожед ахьрийеда ԝе чь бьԛәԝьмьн, ле ӧса жи дәрһәԛа ԝе йәке кӧ мәрьв ԝе чь щурʹәйи бьн. Паԝлосе шанди рʹьнд әве йәке шьровәдькә у дьбежә, «кӧ рʹожед ахьрийеда зәманед хьраб ԝе бен». (Бьхунә 2 Тимотʹейо 3:1-5.) Паше жи зедә дькә, кӧ мәри ԝе бьбьнә:
-
Хԝәһʹьз
-
Пʹәрәһʹьз
-
Нә гӧрʹа де-бавада
-
Һʹәрам
-
Дьлсар
-
Тәмсьст
-
Зӧлмкʹар
-
Рʹьһʹәтиһʹьз, нә кӧ Хԝәдеһʹьз
-
Пʹьшке хԝәденасийе ԝе ль ԝан кʹәвә, ле ԝе ԛәԝата ԝе инкʹар кьн
11. Ча жь кʹьтеба Зәбуре 92:7 те кʹьфше, чь ԝе бе сәре мәрьвед хьраб?
11 Тӧ ча тʹәхмин дьки, дор-бәре тә рʹасти мәрийед ӧса һәнә? Һьлбәт, бәле. Чьмки ль дьнйайе мәрьвед ӧса тʹьжә нә. У әв йәк избат дькә, кӧ зутьрәке Хԝәде ԝе чʹарәке бькә, чьмки дь кʹьтеба Зәбура 92:7-да ньвисар ә, кӧ чахе мәрийед нәһәԛ мина стрина шин бьн у һʹәмуйе кӧ зӧлмийе дькьн мина кӧлирка гӧлвәдьн, ԝи чахи әԝана һʹәта-һʹәтайе ԝе бенә кʹӧтакьрьне.
МӘʹНИ БОНА ШАБУНЕ
12, 13. Чь щурʹәйи дь ван рʹожед ахьрийеда ԝе «занин зедә бьбә»?
12 Ча Кʹьтеба Пироз пʹехәмбәрти кьрьбу, дь ван рʹожед ахьрийеда кӧл-дәрд гәләк ьн, рʹасти жи «ԝәй ль әʹрде». Ле дь ве дьнйа хьрабда, йед кӧ Хԝәде һʹьз дькьн, гәләк мәʹнийед ԝан һәнә ԝәки әԝана ша бьн.
13 Дь Кʹьтеба Данийелда те пʹехәмбәртикьрьне кӧ занәбун ԝе «зедә бьбә». Демәк әв те һʹәсабе кӧ занәбуна рʹаст дәрһәԛа Хԝәде ԝе зедә бьбә. Ле әв йәк кʹәнге гәрәке бьԛәԝьмийа? Ԝәʹде Рʹожа Ахрәте (Данийел 12:4). Дәстпебуйи жь сала 1914, Йаһоԝа али мәрьвед амьн дькьр, ԝәки әԝана һе рʹьнд бькарьбьн Кʹьтеба Пироз фәʹм бькьн. Мәсәлә, әԝана пеһʹәсийан рʹасти дәрһәԛа наве Хԝәде, у ԛьрара ԝи, ӧса жи әԝана һе кʹур пеһʹәсийан дәрһәԛа ԛӧрбанбуна Иса Мәсиһ, һʹале мьрийа у сахкьрьне. Хенщи ԝе йәке, ԛӧльхкʹаред Йаһоԝа пеһʹәсийан, кӧ ча әԝана гәрәке бьжин, ԝәки әʹмьре ԝан бәхтәԝар бә у дьле Хԝәде жи ша бькьн. Ӧса жи ԝана һе рʹьнд фәʹм кьрьн шьхӧле Пʹадшатийа Хԝәде чь йә, у әв Пʹадшати ԛьрара Хԝәде ль сәр әʹрде ԝе чаԝа бинә сери. Гәло, чахе ԛӧльхкʹаред Йаһоԝа әв занәбун стандьн, чь дәстпекьрьн бькьн? Әв пьрс тʹәви пʹехәмбәртийед дьн тʹәвгьредайийә, йед кӧ дь рʹожед ахьрийеда тенә сери.
«Әв Мьзгинийа Пʹадшатийе ԝе ль нав тʹәмамийа дьнйайе бе даннасинкьрьне» (Мәтта 24:14).
14. Даннасинкьрьн дәрһәԛа Мьзгинийа Пʹадшатийе чьԛаси бәла буйә, у әԝ кʹи нә кӧ дәрһәԛа ве мьзгинийе даннасин дькьн?
14 Чахе Иса дәрһәԛа хьлазийа дьнйа Мире-щьна пʹехәмбәрти кьр, әԝи гьлийед ӧса гот: «Әв Мьзгинийа Пʹадшатийе ԝе ль нав тʹәмамийа дьнйайе бе даннасинкьрьне». (Бьхунә Мәтта 24:3, 14.) Әв Мьзгинийа Пʹадшатийе дь ԝәкә 235 ԝәлатада у ль сәр сәда зьмана те даннасинкьрьне. Бь милйона Шәʹдед Йаһоԝа бь дьл у щан дәрһәԛа ве мьзгинийа Пʹадшатийе даннасин дькьн у шьровәдькьн кӧ әв чь Пʹадшати йә, ԝе чь бькә у кʹижан кʹәрәма әм бькарьбьн жь ве Пʹадшатийе бьстиньн. Әԝана «жь һәр мьләти, жь һәр бәрәке, жь һәр щьмәʹте у жь һәр зьмани» һатьнә жьбартьне (Әʹйанти 7:9). Шәʹдед Йаһоԝа һинкьрьна Кʹьтеба Пироз бе пʹәрә дәрбаз дькьн тʹәви милйона мәрьва, йед кӧ дьхԝазьн рʹастийе дәрһәԛа Кʹьтеба Пироз пебьһʹәсьн. Бь рʹастийе жи әв кʹәрәмәтәкә мәзьн ә, кӧ пʹехәмбәрти дәрһәԛа даннасинкьрьне ӧса тенә сери. Һәла һе әв пʹехәмбәртийа Иса жи, кӧ мәсиһийед рʹаст ԝе «бәр чʹәʹве һʹәмуйа рʹәш бьн» һатә сери (Луԛа 21:17).
ТӦЙЕ ЧЬ БЬКИ?
15. (а) Тӧ баԝәр дьки кӧ рʹасти жи әм дь рʹожед ахьрийеда дьжин, у чьрʹа баԝәр дьки? (б) Чь те һʹәсабе хьлазийа дьнйайе сәва ԝан, кʹи кӧ мьԛабьли Хԝәде дьчьн, у чь ԝе бьԛәԝьмә тʹәви ԝан, кʹи кӧ гӧрʹа сәрԝертийа Пʹадшатийа Хԝәде дькьн?
15 Әԝ йәк кӧ һаԛас пʹехәмбәрти жь Кʹьтеба Пироз тенә сери, тәрʹа избат дькә, кӧ әм дь рʹожед ахьрийеда дьжин? Чахе Йаһоԝа ԝе ԛьрар кә кӧ шьхӧле даннасинкьрьне бьдә сәкьнандьне, ԝи чахи «хьлази» ԝе бе (Мәтта 24:14). «Хьлази» те һʹәсабе кӧ Хԝәде ԝе әʹрд жь зӧлмийе тʹәмьз кә у ԛьрʹа ԝан мәрийа бинә, кʹи кӧ пешбәри ԝи дьчьн. Йаһоԝа ԛьрара хԝә, ԝе бь сайа Иса Мәсиһ у мьлйакʹәтед хԝә бинә сери (2 Тʹесалоники 1:6-9). Мире-щьна у щьнед ԝи ида мьләта ԝе нәдьнә шашкьрьне. Һьнге Пʹадшатийа Хԝәде ԝе кʹәрәме бьрʹәшинә сәр һʹәму мәрийа, йед кӧ дь гӧрʹа сәрԝертийа ԝийә рʹастда ньн (Әʹйанти 20:1-3; 21:3-5).
16. Дь ван рʹожед ахьрийеда тӧ чь гәрәке бьки?
16 Дьнйа Мире-щьна ԝе зутьрәке бе кʹӧтакьрьне, ләма жи лазьм ә, пьрсе бьдьнә хԝә: ‹Әз чь гәрәке бькьм?› Гәләк фәрз ә бәрдәԝан ки, кӧ һе зедә пебьһʹәси дәрһәԛа Йаһоԝа у фәрманед ԝи (Йуһʹәнна 17:3). Кʹур Кʹьтеба Пироз леколин бькә. Хенщи ԝе йәке һәр гав тʹәви ԝан мәрийа бә, йед кӧ дьхԝазьн ԛьрара Хԝәде бьԛәдиньн. (Бьхунә Ибрани 10:24, 25.) Дәрһәԛа Йаһоԝа Хԝәде пебьһʹәсә бь аликʹарийа һинбуна Хәбәра ԝи, у гӧһастьнед лазьм дь әʹмьре хԝәда бькә, сәва кӧ бькарьби дьле Хԝәде ша ки (Аԛуб 4:8).
17. Чьрʹа кʹӧтакьрьна мәрьвед зӧлм, сәва гәләка ԝе әʹщебмайи бә?
17 Иса пʹехәмбәрти кьр, кӧ һʹәчʹи зәʹф жь мәрийа ԝе гӧһ нәдьнә гьлийед Иса дәрһәԛа рʹожед ахьрийе. Кʹӧтакьрьна мәрьвед зӧлм ԝе ньшкева бьԛәԝьмә. Гәләк мәри ԝе әʹщебмайи бьминьн, чьмки хьлази ԝе «мина дьзе шәве бе». (Бьхунә 1 Тʹесалоники 5:2.) Иса пешда әʹлам кьр: «Чаԝа кӧ рʹожед Нӧһда ԛәԝьми, һатьна Кӧрʹе Инсан жи ԝе ӧса бьԛәԝьмә. Чаԝа кӧ ԝан рʹожед бәри тофане мәрьва дьхԝарьн, вәдьхԝарьн, дьзәԝьщин у мер дькьрьн, һʹәта ԝе рʹожа кӧ Нӧһ кʹәтә гәмийе у мәрьв пе нәһʹәсийан, һʹәта кӧ лейи рʹабу у һʹәму жи хәньԛандьн. Һатьна Кӧрʹе Инсан жи ԝе ӧса бә» (Мәтта 24:37-39).
18. Кʹижан гьлийед Иса, әм гәрәке һьлдьн дьле хԝә?
18 Иса гӧһдаред хԝәрʹа әʹлам кьр: «Мьԛати хԝә бьн, нәбә кӧ дьле ԝә хԝарьн, вәхԝарьне у хәмед ве дьнйайева гьредайи бә, ньшкева әԝ Рʹож сәр ԝәда бе. Чьмки әԝ рʹоже мина тʹәле бе сәре һʹәму мәрьвед ль сәр дьне. Һʹьшйар бьминьн у һәр гав дӧа бькьн, ԝәки һун бькарьбьн жь ԝан һʹәму тьштед кӧ ԝе бьԛәԝьмьн бьрʹәвьн-хьлаз бьн у ль бәр Кӧрʹе Инсан рʹуспи, [бь ԛәбулкьрьн] бьсәкьньн» (Луԛа 21:34-36). Гәләк фәрз ә, ԝәки гьлийед Иса һьлди дьле хԝә. Чьрʹа? Чьмки әԝ мәри йед кӧ Йаһоԝа Хԝәде у «Кӧрʹе Инсан» ԝан ԛәбул дькьн, әԝана ԝе бькарьбьн хьлаз бьн жь кʹӧтакьрьна дьнйа Шәйтʹан Мире-щьна у бьжин ль щьнәте һʹәта-һʹәтайе. Әв рʹож незик ә, ль бәр шемике йә (Йуһʹәнна 3:16; 2 Пәтрус 3:13).
^ абз. 4 Сәва кӧ һе зедә избаткьрьн пебьһʹәси, кӧ Мьхайил әв сәрнавәки Иса йә, бьньһерʹә рʹупʹела 218-219.
Дьбәкә Wәрʹа Һʹәwас бә
ДӘРҺӘԚА МӘ
Чьрʹа Һин бьн Кʹьтеба Пироз?
Кʹьтеба Пироз али милйона мәрийа дькә, ԝәки бьстиньн щаба пьрсед фәрз бона жийине. Һун дьхԝазьн кӧ али ԝә жи бькә?
