1. Usay wi go ebul lan bɔt wetin go apin tumara bambay?

DI BAD tin dɛn we pipul dɛn kin yɛri na nyus kin mek dɛn wɔnda wetin go apin to di wɔl tumara bambay. Di we aw bad bad tin dɛn de apin, de mek nɔbɔdi nɔ go ebul no wetin go apin di nɛks de. (Jems 4:​14) Bɔt Jiova no wetin go apin tumara bambay. (Ayzaya 46:​10) Trade trade, di Baybul bin tɔk bɔt di bad bad tin dɛn we de apin naw ɛn bɔt di gud tin dɛn we go apin tumara bambay.

2, 3. Wetin Jizɔs in disaypul dɛn bin aks am? Aw Jizɔs ansa dɛn?

² We Jizɔs Krays bin de na di wɔl, i bin de tɔk bɔt Gɔd in Kiŋdɔm. I se na da Kiŋdɔm de go pul ɔl di bad bad tin dɛn we de apin na di wɔl ɛn i go mek di wɔl bi Paradays. (Lyuk 4:​43) Pipul dɛn bin want no ustɛm di Kiŋdɔm go kam. Ivin Jizɔs in disaypul dɛnsɛf bin want fɔ no. Na dat mek dɛn bin aks am se: “Us sayn go sho wi se yu de kam bak ɛn di wɔl de dɔn?” (Matyu 24:​3) Jizɔs bin tɛl dɛn se na Jiova Gɔd wangren sabi di tɛm we di wɔl go dɔn. (Matyu 24:​36) Bɔt Jizɔs bin tɛl dɛn bɔt di  kayn tin dɛn we go apin na di wɔl bifo di Kiŋdɔm kam. Ɔl di tin dɛn we i bin tɔk bɔt, de apin rayt naw!

³ Bifo wi tɔk bɔt di tin dɛn we de sho se wi de na di tɛm we di Baybul se “di wɔl de dɔn,” lɛ wi tɔk smɔl bɔt wan wɔ we no mɔtalman nɔ bin si. I bin apin na ɛvin, ɛn di tin we apin afta di wɔ bin mek sɔntin apin na di wɔl.

4, 5. (a) Wetin apin na ɛvin afta Jizɔs bi Kiŋ? (b) Wetin Rɛvɛleshɔn 12:​12 se bin apin afta di wɔ na ɛvin?

⁴ Insay Chapta 8, wi lan se na insay 1914 Jizɔs bigin rul na ɛvin. (Rid Daniɛl 7:​13, 14.) As Jizɔs bi Kiŋ so, i du sɔntin na ɛvin. Di Baybul se: “Wa fɔdɔm na ɛvin, Maykɛl [Jizɔs in ɔda nem] ɛn in enjɛl dɛn go fɛt di dragɔn [Setan], di dragɔn insɛf fɛt bak wit in yon mɛsenja dɛn.” * Setan ɛn in dɛbul dɛn nɔ bin win di fɛt, ɛn dɛn bin ib dɛn dɔŋ na di wɔl. Di enjɛl dɛn we fetful to Gɔd bin gladi bikɔs Setan ɛn in dɛbul dɛn dɔn kɔmɔt na ɛvin. Bɔt di pipul dɛn na di wɔl nɔ go gladi bikɔs di Baybul se: “Bad bad tin dɔn fɔdɔm pan di grɔn . . . bikɔs di Dɛbul dɔn kam dɔŋ to una ɛn i vɛks bad bikɔs i no se na smɔl tɛm nɔmɔ lɛf fɔ am.”—Rɛvɛleshɔn 12:​7, 9, 12.

⁵ Yu si wetin go apin na di wɔl afta di wɔ na ɛvin? Bikɔs Setan in at wam, i go mek bad bad tin dɛn apin to di wan dɛn we de na di wɔl. Leta, wi go si se na insay da tɛm de we Setan go de du bad bad tin dɛn, wi de naw. Bɔt da tɛm de nɔ go te, “na smɔl tɛm nɔmɔ” i go tek. Setan insɛf no se na smɔl tɛm nɔmɔ i gɛt. Na da smɔl tɛm de di Baybul se “di wɔl go dɔn.” (Matyu 24:​14) Wi gladi fɔ no se i nɔ go te igen, Gɔd go pul ɔl di bad  bad tin dɛn we Setan dɔn briŋ kam na di wɔl. Lɛ wi tɔk naw bɔt sɔm pan di tin dɛn we di Baybul bin dɔn tɔk se go apin. Dɛn tin ya de apin rayt naw. Na dɛn tin ya go sho se na di tɛm we di wɔl go dɔn, na in wi de so. Ɛn i nɔ go te igen, Gɔd in Kiŋdɔm go du fayn fayn tin dɛn fɔ di wan dɛn we lɛk Jiova. Fɔs, lɛ wi tɔk bɔt 4 tin dɛn we Jizɔs bin se go apin insay wi tɛm.

6, 7. Aw wi no se di tin dɛn we Jizɔs bin tɔk trade bɔt wɔ ɛn angri, de apin tide?

⁶ “Wan kɔntri go fɛt ɔda kɔntri; wan neshɔn go fɛt ɔda neshɔn.” (Matyu 24:​7) Fɔ lɛk ɔndrɛd ia so naw, wɔ dɔn mek plɛnti plɛnti pipul dɛn dɔn lɔs dɛn layf. Wan man na Ingland bin rayt se: “Frɔm di ia 1901 to di ia 2000, dɛn dɔn kil plɛnti pipul dɛn pan wɔ pas ɛni ɔda tɛm na di wɔl. Insay dɛn ia dɛn de, wɔ bin de bi ɔltɛm. Na wan wan tɛm nɔmɔ pipul dɛn bin de blo smɔl fɔ fɛt wɔ.” Ɔda pipul dɛn se: “Di pipul dɛn we day pan wɔ frɔm 1901 to di ia 2000 bɔku tri tɛm pas di wan dɛn we day pan ɔl di wɔ dɛn we apin frɔm Jizɔs in tɛm te 1899.” Frɔm 1914, di wan dɛn we dɔn day pan wɔ dɔn pas 100 milyɔn pipul dɛn. Wi kin fil am we pɔsin we wi no  kin day pan wɔ, bɔt wi nɔ go ebul no di kayn pwɛl at we bɔku pipul dɛn kin gɛt we dɛn padi ɛn fambul kin day.

⁷ “Bad aŋri go de na [di] wɔl.” (Matyu 24:​7) Sɔm pipul dɛn we de stɔdi bɔt it biznɛs se it dɔn bɔku na di wɔl dɛn biɛn tɛm ya. Bɔt pan ɔl dat, plɛnti pipul dɛn nɔ gɛt tin fɔ it bikɔs dɛn nɔ gɛt bɛtɛ mɔni fɔ bay it ɔ dɛn nɔ gɛt say fɔ plant it fɔ dɛnsɛf. Insay sɔm kɔntri dɛn, bɔku bɔku pipul dɛn nɔ kin gɛt tin fɔ it. Di World Health Organization se ɛvri ia, lɛk fayv milyɔn pikin dɛn so kin day bikɔs dɛn nɔ gɛt bɛtɛ tin fɔ it.

8, 9. Wetin sho se di tin dɛn we Jizɔs bin tɔk bɔt atkwek ɛn sik, de apin naw?

⁸ “Di grɔn go de trimbul bad.” (Lyuk 21:​11) Sɔm pipul dɛn na Amɛrika we de stɔdi bɔt di grɔn, se na lɛk 19 bad bad atkwek dɛn so kin apin insay wan ia. Dɛn atkwek ya ebul fɔ pwɛl wan ol bildin ɛn krak di grɔn. Sɔm pan di atkwek dɛn we kin apin ɛvri ia, kin ebul fɔ pwɛl os dɛn. Ɔda pipul dɛn se frɔm di ia 1900, di pipul dɛn we atkwek dɔn kil, dɔn pas lɛk tu milyɔn. Ɔda pipul dɛn bin tɔk bak se: “Pan ɔl we sayɛnsman dɛn de tray fɔ mek difrɛn difrɛn tin dɛn fɔ ɛp fɔ sev pipul dɛn layf, di wan dɛn we kin day we atkwek kin apin, stil bɔku.”

 ⁹ “Dɛn sik we de prɛd go de ɔlsay.” (Lyuk 21:​11) Di mɔ we mɔtalman de tray fɔ mek mɛrɛsin dɛn fɔ mɛn sik dɛn, na di mɔ sik dɛn de bɔku. Sɔm pipul dɛn na Amɛrika bin rayt se dɛn biɛn tɛm ya, tri pan di 20 sik dɛn we de ɔlsay na di wɔl na dray-kɔf, maleria ɛn kɔlɛra. Dɛn rayt bak se sɔm pan dɛn sik ya at fɔ mɛn. Apat frɔm dat, lɛk 30 nyu sik dɛn so dɔn kam. Sɔm pan dɛn sik ya nɔ de mɛn ɛn dɛn dɔn kil plɛnti pipul dɛn.

10. Pan ɔl di tin dɛn we Sɛkɛn Lɛta To Timoti 3:​1-5 se pipul dɛn go de du, uswan yu de si de apin tide?

¹⁰ We di Baybul bin de tɔk bɔt di tin dɛn we go de apin we di wɔl want dɔn, i tɔk bɔt di we aw pipul dɛn go tan lɛk. I se: “Jɛs bifo Jizɔs kam bak di tɛm go traŋa.” (Rid Sɛkɛn Lɛta To Timoti 3:​1-5.) Pɔl se pipul dɛn

• go de mɛmba dɛnsɛf nɔmɔ

• go want ɔltin

• nɔ go de yɛri dɛn mami ɛn dadi wɔd

• nɔ go de tɛl tɛnki fɔ ɛni gud we pɔsin du fɔ dɛn

• nɔ go gɛt sɔri at

•   nɔ go ebul kɔntrol dɛnsɛf

• go wayl if pɔsin ambɔg dɛn

• go lɛk fɔ ɛnjɔy dɛnsɛf, dɛn nɔ go lɛk Gɔd

• go de fɔm ipokrit lɛkɛ se dɛn bisin bɔt Gɔd wok, bɔt dɛn nɔ go biliv se Gɔd gɛt pawa

11. Wetin Sam 92:​7 se go apin to di wan dɛn we de du bad?

¹¹ Na so pipul dɛn de na yu eria? Nɔto yu eria nɔmɔ o, na so pipul dɛn de ɔlsay! Dɛn gɛt abit dɛn we nɔ fayn. Ɔl dɛn tin ya de sho se i nɔ go te igen Gɔd go du wetin de na Sam 92:​7, we se: “I lɛk usay pɔsin we de du bad dɔn rich, Gɔd mɔs briŋ am kam dɔŋ we i nɔ go ɛva go ɔp.”

12, 13. Aw bɔku pipul dɛn dɔn lan plɛnti tru tin bɔt Gɔd?

¹² Apat frɔm di bad bad tin dɛn we go apin we di wɔl want dɔn, di Baybul tɔk bak bɔt sɔm gud tin dɛn we go apin to di wan dɛn we de sav Jiova.

¹³ Daniɛl bin rayt na di Baybul se “pipul go gɛt plɛnti sɛns.” Ustɛm dis go bi? I go bi “di tɛm we di wɔl go want dɔn.” (Na wi mek am italiks; Daniɛl 12:​4) Frɔm 1914, Jiova dɔn  ɛp di wan dɛn we rili want fɔ sav am, fɔ sabi di Baybul. Dɛn dɔn sabi plɛnti tru tin dɛn bɔt Gɔd. Tin dɛn lɛk Gɔd in nem, wetin Gɔd want, di day we Jizɔs Krays kam day fɔ wi, wetin de apin to di wan dɛn we dɔn day, ɛn aw dɛn go gɛt layf bak. Ɛn dɛn dɔn lan aw fɔ liv dɛn layf di we we go mek dɛn bɛtɛ dɛnsɛf ɛn we go mek pipul dɛn prez Gɔd. Dɔn, dɛn dɔn ebul fɔ ɔndastand wetin na Gɔd in Kiŋdɔm ɛn wetin i go du fɔ mɔtalman. Wetin dɛn de du wit ɔl dɛn tin ya we dɛn dɔn lan? Di ansa de insay di ɔda tin we di Baybul se go apin we di wɔl want dɔn.

14. Na lɛk ɔmɔs kɔntri dɛn so dɛn dɔn prich di gud nyus bɔt Gɔd in Kiŋdɔm? Udat dɛn de prich am?

¹⁴ We Jizɔs bin de tɔk bɔt wetin go apin we “di wɔl de dɔn,” i bin se “pipul go tɛl ɔlman na [di] wɔl di Gud Nyuz bɔt wɛn Gɔd go rul di wɔl.” (Na wi mek am italiks; Rid Matyu 24:​3, 14.) Tide, pipul dɛn de prich di gud nyus bɔt di Kiŋdɔm ɔlsay na di wɔl. Dɛn de prich bɔt wetin na di Kiŋdɔm, wetin i go du, ɛn wetin wi fɔ du if wi want fɔ mek di Kiŋdɔm rul wi. I dɔŋ pas 230 kɔntri dɛn usay dɛn de prich bɔt di Kiŋdɔm ɛn, insay bɔku bɔku langwej dɛn. Na Jiova Witnɛs dɛn de prich bɔt dis Kiŋdɔm. Dɛn “kɔmɔt na ɔl dɛn trayb ɛn ɔl dɛn neshɔn na [di] wɔl.” (Rɛvɛleshɔn 7:​9) Jiova Witnɛs dɛn de stɔdi di Baybul wit pipul dɛn we rili want fɔ no wetin di Baybul de tich. Dɛn de du dis fɔ fri. Wetin di Baybul bin dɔn tɔk de rili apin, pan ɔl we Jizɔs bin se “pipul [dɛn] nɔ go lɛk” di wan dɛn we na tru Kristian.—Lyuk 21:​17.

15. (a) Yu biliv se di tɛm we wi de so na in di Baybul kɔl di tɛm we “di wɔl go dɔn”? Wetin mek yu biliv so? (b) We “di wɔl go dɔn,” wetin go apin to di wan dɛn we de du wetin Jiova et?

¹⁵ Tide, wi de si bɔku pan di tin dɛn we di Baybul bin dɔn tɔk se go apin insay wi tɛm. So, yu nɔ tink se di  tɛm we wi de so naw na in di Baybul kɔl di tɛm we “di wɔl go dɔn”? Afta dɛn go dɔn prich di gud nyus di we aw Jiova want, “di wɔl go dɔn.” (Matyu 24:​14) We di Baybul se “di wɔl go dɔn,” i min di tɛm we Gɔd go pul ɔl di bad tin dɛn we de apin na di wɔl. Na Jizɔs ɛn di pawaful enjɛl dɛn Jiova go yuz fɔ pul ɔl di wan dɛn we de du wetin Jiova et. (Sɛkɛn Lɛta Fɔ Tɛsalonayka 1:​6-9) Da tɛm de, Setan ɛn in dɛbul dɛn nɔ go de igen fɔ ful pipul dɛn. Afta dat, Gɔd in Kiŋdɔm go du fayn fayn tin dɛn fɔ di wan dɛn we want mek Gɔd rul dɛn.—Rɛvɛleshɔn 20:​1-3; 21:​3-5.

16. Wetin yu fɔ du naw?

¹⁶ We wi dɔn no naw se di wɔl de kam dɔn, i fayn fɔ mek wi go de tink bɔt di kayn tin dɛn we wi fɔ du. Na fɔ kɔntinyu fɔ lan mɔ bɔt Jiova ɛn di tin dɛn we i want wi fɔ du. (Jɔn 17:​3) Yu fɔ stɔdi di Baybul gud gud wan. Ɛn go de jɔyn Gɔd in pipul dɛn fɔ lan aw fɔ du wetin Jiova want. (Rid Di Ibru Pipul Dɛn 10:​24, 25.) Na fɔ go de rid di difrɛn difrɛn buk dɛn we Jiova Gɔd de yuz fɔ tich in pipul dɛn, ɛn lɛf fɔ du di tin dɛn we di Baybul se Gɔd nɔ want, so dat Gɔd go gladi fɔ yu.—Jems 4:​8.

17. Wetin mek bɔku pipul dɛn go sɔprayz we di wɔl go dɔn?

¹⁷ Jizɔs bin tɔk se bɔku pipul dɛn nɔ go biliv se di wɔl de kam dɔn. Di wɔl go dɔn di tɛm we pipul dɛn nɔ rɛdi. Bɔku pipul dɛn go sɔprayz we di wɔl go dɔn lɛk we pɔsin kin sɔprayz we tifman kin kam tif na nɛt. (Rid Fɔs Lɛta To Tɛsalonayka 5:​2.) Jizɔs bin tɔk bak se: “Di tɛm we Mɔtalman Pikin de kam, pipul go de du lɛkɛ aw dɛn bin de du da tɛm we Noa bin de. Bifo wata bin kɔba di wɔl, ɔlman bin de it ɛn drink; pipul bin de mared. Na dat dɛn bin de pan sote di tɛm we Noa go insay di big bot we i bil, ɛn dɛn nɔ bin no  se ren go kam we go mek wata kɔba ɔl di wɔl, pas we di ren kam ɛn wata kam kɔba ɛn kil dɛn ɔl. Na so i go bi we Mɔtalman Pikin go kam.”—Matyu 24:​37-39.

18. Wetin Jizɔs bin tɔk we wi fɔ tek siriɔs?

¹⁸ Jizɔs tɛl di wan dɛn we bin de lisin to am, se: “Una fɔ bikyaful, mek una nɔ jɛs sidɔm de ɛnjɔy dɛn pati ɛn drɔnk. Una nɔ fɔ put una at tumɔs pan wetin fɔ wɛr ɛn wetin una fɔ it. Mɔtalman Pikin go kam tɛm we una nɔ rɛdi. Lɛkɛ aw trap kin kech bif, na so da de de go kam pan ɔlman ɔlɔbɔt na [di] wɔl. Una fɔ waydawek ɛn una fɔ de pre ɔltɛm so dat una go gɛt trɛnk fɔ bia ɔl dɛn tin we go bi na dis wɔl ɛn una go ebul fɔ tinap bifo Mɔtalman Pikin.” (Lyuk 21:​34-36) Wetin mek i fayn fɔ tek dis tin we Jizɔs tɔk, siriɔs? Na bikɔs na di wan dɛn nɔmɔ we du wetin Jiova ɛn Jizɔs, want, go sev we di wɔl go dɔn. Ɛn dɛn go de sote go na Paradays!—Jɔn 3:​16; Pita In Sɛkɛn Lɛta 3:​13.