1. Jñáni kʼoatso jmeni xi koa̱n nichxin xi nroaján.

KʼIANGA chotsenlai ya telebisión jmeni xi kjima i̱ Sonʼnde, a sakʼoaa chjonangilai yaoli jméni xi chan koa̱n. Toʼima faʼai kjoaxkón kʼoa niʼyajinla xi be jmeni xi koa̱n nyaonjngiján (Santiago 4:14). Tonga je Jeobá bení (Isaías 46:10). Kʼoa je Énle tongini kʼoakitso je kjoaxkón xi kjima ndʼaibi, tonga kʼoati kitso jme kjoanda xi sʼa nroa.

2, 3. Jméni xi kiskonangile chjotale Jesús kʼoa jókitsole.

² Je Jesucristo kitsoya xi tʼatsʼe “kjoatéxomale Niná”, xi ijngoni én, je Chjotaxále Niná xi sikjeson kjoatsʼen xi tjín Sonʼnde kʼoa xi ʼndenaxó sikao (Lucas 4:43). Je chjota xi kinrʼoéle Jesús koanmele nga skoe̱ kʼiáni kjoaʼaí “kjoatéxoma” jebi. Saʼnda kitsole je chjotale: “Kʼiánibe nga kʼoakoa̱n je kjoabi. Jmé choa̱ xi sʼe̱ kʼianga me koa̱njngo ngayije je kjoabi.” (Lucas 21:7.) Je Jesús kʼoakitsole je chjotale nga tojekjoan Niná Jeobá xi be kʼiani kuichokjetʼa jmeni xi chon sonʼnde (Mateo 24:36). Tonga je Jesús tongini kʼoakitso jme kjoa xi sʼe̱ nga kjesa faʼaikaojin kjoanyʼán i̱ Sonʼnde. Kʼoa jetíbitjoson ndʼaibi jme xi kitso.

 ³ Nga kjesa chotʼayajinjián jme choa̱ xi tjín nga jekui “nichxin xi kjoetʼa” tiyoaa ndʼaibi, kuila títjon chótʼayá tʼatsʼe jngo kjoajchán xi nijngojin chjota tsabe xi ya kisʼejna ngʼajmi, ya jña tjío ánkje. Kjoajchán jebi kʼoati tíbʼakaotʼaná tsanda ñá.

4, 5. 1) Jméni xi koan ya ngʼajmi nga jetsakʼaile xá Jesucristo. 2) Jósʼin kichomani je kjoajchán xi kisʼejna ya ngʼajmi tojo tso Apocalipsis 12:12.

⁴ Je kjoaʼmiya xi jaʼato kui kitsoyaná nga nó 1914 tsakʼaile xá Jesucristo ya ngʼajmi (tʼexkiai Daniel 7:13, 14). * Kʼoa je Biblia kʼoatso jmeni xi kisʼin nga jetsakʼaile xá. Itso: “Jngo kjoajchán xi nʼio koan ya ngʼajmi. Miguel [xi tijeni Jesús] kao ánkjele kiskankao je cho̱toán [je Na̱i]. Kʼoa kiskan cho̱toánbi kao ánkjele”. * Kisicha je Na̱i kʼoa kao ánkje xi ya kitjenngile kʼoa i Sonʼnde kinikʼatsaojenngi. Je ánkjele Niná tsjoa koanle nga tsakichonsje je Na̱i kʼoa kao ánkjele ya ngʼajmi. Tonga xi kjoa tsakatiojin jé chjotasonʼnde. Itso Biblia: “Ma̱xóni xi tjío sonʼnde [...], nga je na̱i je kʼoasʼin jitjojenjinno nga jon. Ali tokʼoakji jti male, nga be nga tochoa nichxin tjínle” (Apocalipsis 12:7, 9, 12).

⁵ Ndala tikjaʼaitsjain jmeni xi koan nga jekisʼejna kjoajchán ya ngʼajmi. Je Na̱i nʼio koanjtile kʼoa kuinga nʼio tse  kjoa tíbajngisíni i̱ Sonʼnde saʼnda kʼia. Tonga tochoatse nga kʼoasʼin kʼoa bení je Na̱i. Kʼoa jotjín tse nichxin tíjnasale je Na̱i “nichxin xi kjoetʼa” tsole Biblia (2 Timoteo 3:1). Je Niná jeme kjoaʼaxin je Na̱i i̱ Sonʼnde kʼoa nʼio tsjoa maná jebi. Chótʼajinla kʼaa kjoa xi tongini kʼoakitso je Biblia nga koa̱n nichxin xi tiyoaa ndʼaibi. Kʼianga tíbitjoson kjoa jebi kui xi bakó nga nichxin fetʼa tiyoaa kʼoa nga je chjota xi tsjoake Jeobá jeme sʼe̱le kjoanichikontʼain kʼianga koatexoma je Chjotaxále Niná. Xi títjon, ñola choa̱ chótʼayá xi kitso Jesús nga koa̱n nichxin xi tiyoaa ndʼaibi.

6, 7. Jósʼin tíbitjoson nichxin xi tiyoaa ndʼaibi je én xi kitso Jesús xi tʼatsʼe kjoajchán kao kjinrá.

⁶ “Kuisótjenne naxinandá kontrale xi kjaʼaí naxinandá, kʼoa kjoatéxoma kuisótjenne xi kjaʼaí kjoatéxoma.” (Mateo 24:7.) Je xi jngo siento nó jejaʼato miyón chjota jekʼienjin kjoajchán. Jngo chjota xi Inglaterra tsʼe xi kui kji jmeni xi ma kʼoakitso nga nʼio tse njín kixijten je nó xotjín, nga tiʼa tiʼa kisationi kjoajchán kʼoa nga tochoatse kisʼejñáʼnyo sakʼoale. Kʼoa je chjota xi kotʼayason jmeni xi ma Sonʼnde kʼoati  kitso nga janya kʼoatjín chjota kʼienjin kjoajchán tikʼoajinni jotjín kʼienjin kjoajchán ʼnda nichxinle Jesús saʼnda nó 1899. Fitsʼiakjoanni nó 1914 tsʼato jngo siento miyón chjota jekʼienjin kjoajchán. Kʼoa xi totʼatsʼe kjoa jebi nʼio nkjín chjota tjíosícha xínkjín. Tsakui nichxin saʼnda kʼoati jekitjatojin kjoa jebi.

⁷ “Sʼe̱ kjinrá.” (Mateo 24:7.) Je xi batiotsʼinya kjoa jebi kʼoatso nga ʼnda nichxin kjoan kante nóján ʼnda ndʼaibi nʼio tísʼe tsojmi xi ma chine. Tonga tojo tísʼee kjinrá, nga̱ nʼio nkjín chjota xi tsínle nangi jñani bʼéntje tsojmi kʼoa kʼoati tsínle tao̱n xi tsojmi batseni. Kʼoa ya naxinandá jña tsín tao̱n jmi miyón mani chjota xi kjinrá tjíofaʼántsjai. Je Organización Mundial de la Salud kʼoatso nga tsʼato aon miyón xtiʼndí biya nga xki̱ nó nga tsín nda sokóʼa.

8, 9. Jósʼin ʼyañá nga tíbitjoson je én xi tongini kʼoakitso Jesús xi tʼatsʼe cháonxkón kʼoa kao chʼin.

⁸ “Kjoaʼa cháonxkón.” (Lucas 21:11.) Je chjota xi ya Estados Unidos tsʼe xi kotʼayason anni nga cháon faʼani kʼoatso nga xjaʼaonñolaxó cháonxkón faʼa nga xki̱ nó xi síxkoa̱ ndʼiayʼai kʼoa xi bakján nangi. Kʼoa me xki̱ nó faʼa cháonnʼio xi ñaki síkixojen ndʼiayʼai.  Tjen nó 1900 ʼyale nga tsʼato jao miyón chjota xi cháonxkón kʼienjin. Kʼoa ijngosa jtín xi tojo tsʼe cháon kotʼayason xi kʼoakitso nga ninga kjimanda ki̱cha̱ xi chotʼayasonni tʼatsʼe cháon, kʼoa kʼoaʼmile chjota jmeni xi sʼin kʼiatsa cháon kjoaʼa tojo nkjínni chjota biya.

⁹ “Koa̱n [...] chʼinʼbi.” (Lucas 21:11.) Ninga kjimasjaisa xki xi nʼio nda, tojo chʼin tjíokao chjotasonʼnde, chʼin xi tjín ngasʼa kʼoa kao xi sʼa tíbʼatsen. Jngo én kitjo xi kʼoatso kʼianga je nó xi tífaʼato nga kan koya mani je chʼin xi ngisasa tjíobʼétʼale chjota, jolani tsa je chʼintisi, chʼinnangisjeya kʼoa kao chʼinfaʼa, kʼoa kʼoati tísʼe chʼin xi likui timandayanile xki. Xi ijngosani, kantela chʼin kjimatsensa. Tjínkʼa xi ñaki síkʼienná xi kje tsínjin xkile.

10. Jókjoan ndʼaibi je chjota tojo tso ya 2 Timoteo 3:1-5.

¹⁰ Je Biblia ali tsa tokuijin kʼoakitso jmeni xi koa̱n ngakjijnda Sonʼnde kʼianga tífikjetʼa nichxin, kʼoati kitso jokoa̱nkjoan je chjota. Je pastro Pablo kʼoakitso josʼin je chjota, kʼoa tongini i̱ kitso: “Je nichxin xi kjoetʼa kjoaʼaíná kjoañʼai xi tse” (tʼexkiai 2 Timoteo 3:1-5). Kʼoa  i kjoan ndʼaibi je chjota tojo kitso je pastro Pablo:

• to yaole tsjoake

• chʼaondai

• tsʼantjaikjoake xijchále

• alikui tsjoá kjoanda

• alikui bakó kjoatjaocha

• tokjaʼaíngá sʼín

• toán

• ngisa tsjoake kjoaská tikʼoajinni Niná

• joxi Niná bexkón sʼin matsen, tonga kao xále ʼyanile nga tsínni bexkón Niná

11. Tojo tso ya Salmo 92:7, jmé xi koa̱nle chjotatsʼen.

¹¹ A kʼoakjimakjoan chjota xi tjín ya ʼndeli. Kʼoajin kjimakjoan a tsí jaon. Je chjota xi kʼoatjíosʼín tjín tojñani. Jebi kui xi bakóná nga jeme kjoaʼaxin Niná, nga̱ je Biblia itso: “Kʼianga mankjín je chjotatsʼen joma tsa jñá nga toxkia bisó, kʼoa nga nda batio ngatsʼi xi chʼao sʼín, kuiní nga tondiaa si̱kjeson” (Salmo 92:7).

12, 13. Jmé choa̱ xi tjín nga kjimatse “je xi ñaki kjoachjine” nichxin fikjetʼa xi tiyoaa ndʼaibi.

¹² Nichxin fikjetʼa xi tiyoaa ndʼaibi  nʼio tse kjoa tjín tojo kitso je Biblia. Tonga je choʼndale Jeobá tísʼele kjoa xi ndatjín.

¹³ “Je xi ñaki kjoachjine sa tse sa tsesa koa̱n”, kitso je Daniel. Kʼiáni kuitjoson én jebi. Kʼiaa “nga kuichokjetʼa nichxin” (Daniel 12:4). Tjen nó 1914, je Jeobá tíbasenkao je chjota xi mele sixále nga ngisa nda katamajinle én xi nʼio chjíle bakóya Biblia, jolani xi kui nchja̱ni tʼatsʼe jaʼaínle Niná kʼoa jme xi tjínndajinle, kʼoa kao tʼatsʼe kjoabʼechjíntjaile Jesucristo kʼoa josʼin tjío xi jekʼien kʼoa kao xi tʼatsʼe kjoafaʼáya. Je choʼndale Jeobá kʼoati tíʼmiyale josʼin nga nda koatio kʼoa josʼin kʼoasjengʼa Niná. Kʼoati ngisasa nda kjimajinle xi tʼatsʼe je Chjotaxále Niná kʼoa josʼin sindachon i̱ Sonʼnde. Jósʼin tjíosíchjén kjoankjíntokon jebi. Tsa mená jchaa, ijngolasa én xi tongini kinokjoa chótʼayasoán xi ndʼai tíbitjoson.

14. Jójekji tjen tíʼmiyason énnda chjotse xi tʼatsʼe Chjotaxále Niná, kʼoa ʼyáni xi tjíotsoyason.

¹⁴ “Kʼoa je énnda xi tʼatsʼe je kjoatéxomale ngʼajmi kuinókjoayani ngakijnda sonʼnde”, kitso Jesucristo kʼianga kinchja̱ni jmeni xi koa̱n nga “kjoetʼa [xi chon] sonʼndebi” (tʼexkiai Mateo 24:3, 14). Jngo tjíjtsa Sonʼnde tíʼmiyason je énnda xi tʼatsʼe kjoatéxomale ngʼajmi, xi tsonile, tíʼmiyaa xi tʼatsʼe Chjotaxále Niná, jméni xi sʼin kʼoa jósʼin so̱koná je kjoanichikontʼain xi tsjoá. Tsʼato jao siento kao kante naxinandáyʼai jetíbichó énnda chjotse jebi kʼoa siento koya én tíʼmiyason. Miyón mani je testigole Jeobá xi ya tjíonroani ngakjijnda “ʼnde, kao ntje̱, kao naxinandá, kao én” xi kao kjoatsjoa tjíotsoyason je énnda chjotse xi tʼatsʼe Chjotaxále Niná (Apocalipsis 7:9). Xi ijngosani, miyón mani chjota xi tíʼmiya kjoatjaole Biblia xi mele skoe̱ jokjoantjínni je Énle Niná. Tokʼoamaná josʼin tíbitjoson én jebi, kʼoa ngisa tsa kuenta sʼiaan nga  i̱ kitso Jesús xi tʼatsʼe chjotale: “Koa̱njtikeno ngatsʼi [chjota]” (Lucas 21:17).

15. 1) A makjainli nga nichxin fetʼa tiyoaa, kʼoa ánni. 2) Kʼianga kjoetʼa nichxin, jmé xi koa̱ntʼain je xi kontra batiole Jeobá kʼoa jmé xi kʼoaile je xi sitjosonle je Chjotaxále Niná.

¹⁵ Kʼianga kʼoasikji én xi tongini kisʼetʼa Biblia tíbitjoson ndʼaibi, a tsí matsen nga nichxin fetʼa tiyoaa. Je énnda chjotse tokʼoakji tjen kʼuínyason jokji tjen kuitso Jeobá kʼoa “kʼia[a] kjoaʼaí xi kjoetʼa” (Mateo 24:14). Je én “xi kjoetʼa” tsole ibi kʼianí nga kjoaʼaxin Niná kjoatsʼen xi tjín i̱ Sonʼnde. Kʼianga sikjeson Niná je chjota xi kontra batiole, jé sichjén Jesús kao ánkjele (2 Tesalonicenses 1:6-9). Je Na̱i kʼoa kao ánkje xi tsʼe alikui tikʼoanachanile naxinandá xi tjín. Xijekoa̱n, je Chjotaxále Niná nʼio tse kjoanichikontʼain tsjoále je xi sitjosonle (Apocalipsis 20:1-3; 21:3-5).

16. Jméni xi ndatjín nga sʼiain.

¹⁶ Makjoanni nga jetífikjetʼa jme xi chonle Na̱i i̱ Sonʼnde, machjén nga chjónangilee yaoná nga jngó jngoá: “Jméni xi sʼian”. Xi ngisasa ndatjín kuinga tosi tonda chótʼayá tʼatsʼe Jeobá kʼoa jmeni xi mele nga sʼiaan (Juan 17:3). Tʼenelai yaoli nga nda chótʼayai Biblia. Tʼin ntsjaintsjai kjoajtín xi batío je testigole Jeobá (tʼexkiai Hebreos 10:24, 25). Kataʼyai je Niná Jeobá nga chótʼayai Énle, kʼoa tindayai yaoli josʼin nga sasénle (Santiago 4:8).

17. Ánni nga totjíonjiosínile ngatsʼi chjota kʼianga kjoaʼaínikjeson je chjotatsʼen.

¹⁷ Jesús kʼoakitso nga me ngatsʼi chjota nga tsín kuenta sʼin ninga kʼoakʼuínle nga nichxin fetʼa tiyoaa. Je chjotatsʼen toxijña kjoaʼaínikjeson. Totjíonjiole ngatsʼi je chjota nga kʼoakoa̱n, tojo sʼín tsa jngo ché nga nitje̱n nga tsín ʼya xi tjínjinle nga bichósíché (tʼexkiai 1 Tesalonicenses 5:2). Jesús kʼoakitso: “Tonga jokoanchon nichxinle Noé,  kʼoatisʼin koa̱n kʼianga kjoaʼaí je ʼndíle chjota. Jokoanchon je nichxinbe tongini je jtsínʼio, nga tjíokjen, tjíoʼbi, tjíobixan, kʼoa tjíosíkixan, saʼnda nga je nichxin nga Noé jaʼasʼen je chitsoyʼai. Chjota likui tsabe saʼnda nga jaʼai je jtsínʼiobe xi kikao ngatsʼi. Kʼoatisʼin koa̱nchon kʼianga kjoaʼaí je ʼndíle chjota” (Mateo 24:37-39).

18. Jmé én xi kitso Jesús xi tsín to kjoaská katamaná.

¹⁸ Kuinga i̱ kitsosíni Jesús: “Tikuindao yaono nga tsí tsakui ai ska̱le ni̱ma̱no kao kjoachi̱nga̱ kao kjoachʼi̱, kʼoa kao ngayije kjoa xi ai xi tsʼe i̱ sonʼndebi. Kʼia je nichxin kʼianga tsí tsa kjiatokon, kjoaʼaíneno joni tsa che̱n. Nga̱ je nichxinbe kjoaʼaínele ngatsʼi xi tjío ngakijnda sonʼndebi. Kjiatakon tiyoʼni, tʼetsʼoao ngantsjai nichxin, jméni nga sʼe̱sínino nganʼio nga kuinyaxinlao ngayije je kjoabi xi kjoaʼaí, kʼoa jméni nga sa̱kosínino ʼnde ngixko̱n ʼndíle chjota” (Lucas 21:34-36). Alikui to kjoaská katamaná én jebi. Ánni. Nga̱ je chjota xi nda koatio ngixko̱n Jeobá kʼoa ngixko̱n Jesucristo, kjoaʼatojin tjínkon nga tjóxin jmeni xi chonle Na̱i i̱ Sonʼnde. Kʼoa koaan koatio ngantsjai nichxin ya sonʼnde chjotsele Niná xi jemachrianle (Juan 3:16; 2 Pedro 3:13).