Kapitlu Disgħa

Qegħdin Aħna Ngħixu fl-​“Aħħar Jiem”?

Liema ġrajjiet fi żmienna ġew imbassrin fil-​Bibbja?

Il-​Kelma t’Alla kif tgħid li kellhom ikunu n-​nies fl-​“aħħar jiem”?

Il-​Bibbja liema affarijiet tajbin tbassar rigward l-​“aħħar jiem”?

1. Fejn nistgħu nsiru nafu dwar il-​futur?

ĠIELI kont qed tara l-​aħbarijiet fuq it-​televixin u f’qalbek għedt, ‘Min jaf x’se jiġri minnha din id-​dinja?’ Id-​diżgrazzji tant qed jiġru f’daqqa u għal għarrieda li ħadd ma jistaʼ jbassar x’se jiġri, lanqas s’għada. (Ġakbu 4:​14) Madankollu, Ġeħova jaf x’se jiġri fil-​futur. (Isaija 46:10) Żmien twil ilu l-​Kelma tiegħu, il-​Bibbja, ma bassritx biss l-​affarijiet ħżiena li qed jiġru llum imma wkoll l-​affarijiet taʼ l-​għaġeb li se jiġru fil-​futur qarib.

2, 3. Id-​dixxipli taʼ Ġesù liema mistoqsija staqsewh, u hu kif weġibhom?

² Ġesù Kristu tkellem dwar is-​Saltna t’Alla li se ttemm il-​ħażen u tagħmel l-​art ġenna. (Luqa 4:​43) In-​nies riedu jafu meta kienet se tiġi s-​Saltna. Fil-​fatt, id-​dixxipli taʼ Ġesù staqsewh: “X’se jkun is-​sinjal tal-​preżenza tiegħek u taʼ tmiem is-​sistema?” (Mattew 24:3) Ġesù weġibhom li Alla Ġeħova biss kien jaf eżatt meta kellu jiġi t-​tmiem taʼ din is-​sistema. (Mattew 24:36) Minkejja dan, Ġesù bassar x’kellu jiġri fuq l-​art preċiż qabel ma s-​Saltna kellha ġġib il-​paċi u s-​sigurtà veri lill-​umanità. Dak li bassar qed iseħħ illum!

 ³ Qabel neżaminaw l-​evidenza li qed ngħixu fi “tmiem is-​sistema,” ejja nikkunsidraw fil-​qosor gwerra li ma setgħet tiġi osservata mill-​ebda bniedem fuq l-​art. Din seħħet fil-​qasam taʼ l-​ispirti inviżibbli, u r-​riżultat tagħha jeffettwa lilna.

GWERRA FIS-​SEMA

4, 5. (a) X’ġara fis-​sema ftit wara li Ġesù nħatar bħala Sultan? (b) Skond Rivelazzjoni 12:​12, x’kellu jkun ir-​riżultat tal-​gwerra fis-​sema?

⁴ Il-​kapitlu taʼ qabel f’dan il-​ktieb spjega li Ġesù Kristu sar Sultan fis-​sema fl-​1914. (Danjel 7:​13, 14) Ftit wara li Ġesù beda jsaltan, hu ħa azzjoni. “Faqqgħet gwerra fis-​sema,” tgħid il-​Bibbja. “Mikiel [isem ieħor għal Ġesù] u l-​anġli tiegħu tqabdu mad-​dragun [Satana x-​Xitan], u d-​dragun u l-​anġli tiegħu tqabdu.” * Satana u l-​anġli ħżiena tiegħu, id-​demonji, tilfu din il-​gwerra u tkeċċew mis-​sema għal fuq l-​art. L-​ulied spirti t’Alla li baqgħu leali ferħu li Satana u d-​demonji tiegħu tkeċċew. Madankollu, il-​bnedmin ma kienx se jkollhom il-​ferħ li kellhom huma. Pjuttost, il-​Bibbja bassret: “Gwaj għall-​art . . . għax ix-​Xitan niżel għandkom u għandu rabja kbira, għax jaf li żmien qasir baqagħlu.”​—Rivelazzjoni 12:​7, 9, 12.

⁵ Jekk jogħġbok innota x’kellu jkun ir-​riżultat tal-​gwerra fis-​sema. Fid-​dagħdigħa li kellu fuqu, Satana kien se jġib gwaj, jew inkwiet, fuq dawk li kienu fuq l-​art. Bħalma se tara, aħna issa qegħdin ngħixu f’dan iż-​żmien taʼ gwaj. Imma dan se jkun relattivament qasir​—“żmien qasir” biss. Anki Satana jafu dan. Il-​Bibbja tirreferi għal dan il-​perijodu bħala “l-​aħħar jiem.” (2 Timotju 3:1) Kemm għandna għalxiex inkunu grati li Alla dalwaqt se  jneħħi l-​influwenza li x-​Xitan għandu fuq l-​art! Ejja nikkunsidraw xi ftit mill-​affarijiet imbassrin fil-​Bibbja li qed jiġru issa stess. Dawn juru li qed ngħixu fl-​aħħar jiem u li s-​Saltna t’Alla dalwaqt se ġġib barkiet dejjiema għal dawk li jħobbu lil Ġeħova. L-​ewwel, ejja neżaminaw erbaʼ aspetti tas-​sinjal li Ġesù qal li kellu jimmarka ż-​żmien li qed ngħixu fih.

ŻVILUPPI KBAR FL-​AĦĦAR JIEM

6, 7. Il-​kliem taʼ Ġesù dwar il-​gwerer u n-​nuqqas taʼ ikel kif qed jitwettaq illum?

⁶ “Ġens iqum kontra ġens u saltna kontra saltna.” (Mattew 24:7) Miljuni taʼ nies inqatlu fil-​gwerer matul is-​seklu li għadda. Studjuż Britanniku taʼ l-​istorja kiteb: “Is-​seklu 20 kien l-​iktar wieħed imdemmi li qatt tniżżel fl-​istorja. . . . Kien seklu li fih il-​gwerer kważi ma qatgħu xejn, ħlief għal xi perijodi qosra li fihom ma kienx hemm xi gwerra jew oħra.” Rapport mill-​Worldwatch Institute jistqarr: “Kien hemm tliet darbiet iktar nies li sfaw vittma tal-​gwerra fis-​seklu [20] milli kien hemm fil-​gwerer kollha mill-​ewwel seklu AD sa l-​1899.” Iktar minn 100 miljun ruħ mietu minħabba l-​gwerer mill-​1914 ’l hawn. Avolja aħna stess inkunu nafu x’jiġifieri li titlef wieħed mill-​maħbubin tiegħek kaġun tal-​gwerra, xorta qatt ma nistgħu  nimmaġinaw id-​disprament u l-​uġigħ taʼ qalb li ħassew dawk il-​miljuni kollha li tilfu l-​maħbubin tagħhom.

⁷ “Ikun hemm nuqqas taʼ ikel.” (Mattew 24:7) Ir-​riċerkaturi jgħidu li l-​produzzjoni taʼ l-​ikel żdiedet ħafna matul dawn l-​aħħar 30 sena. Minkejja dan, xorta għad hawn nuqqas taʼ ikel għaliex ħafna nies m’għandhomx biżżejjed flus biex jixtru l-​ikel jew l-​art biex jikkultivawha. F’pajjiżi li qed jiżviluppaw, iktar minn biljun ruħ qed jgħixu b’ħamsa u tletin ċenteżmu jew inqas kuljum. Il-​maġġuranza taʼ dawn in-​nies ibatu l-​ġuħ għomorhom kollu. L-​Organizzazzjoni Dinjija tas-​Saħħa tgħid li n-​nuqqas taʼ ikel sustanzjuż hu l-​kaġun ewlieni għall-​mewt taʼ iktar minn ħames miljun tifel u tifla kull sena.

8, 9. X’juri li l-​profeziji taʼ Ġesù dwar it-​terremoti u l-​mard li jittieħed twettqu?

⁸ “Ikun hemm terremoti kbar.” (Luqa 21:11) Skond l-​Istħarriġ Ġeoloġiku taʼ l-​Istati Uniti, medja taʼ 19-​il terremot kbir huma mistennijin kull sena. Dawn huma b’saħħithom biżżejjed biex jagħmlu ħsara ’l-​bini u jxaqqu l-​art. U bejn wieħed u ieħor kull sena kien hemm terremoti b’saħħithom biżżejjed biex jikkaġunaw il-​qerda totali tal-​bini.  Sors ieħor jistqarr: “It-​terremoti ħadu mijiet t’eluf taʼ ħajjiet f’dawn l-​aħħar 100 sena u t-​titjib fit-​teknoloġija ftit li xejn naqqas l-​imwiet.”

⁹ “Ikun hemm mard li jittieħed.” (Luqa 21:11) Minkejja l-​progress fil-​mediċina, l-​umanità hija mifnija kemm bil-​mard li ilu jolqot lill-​umanità u kemm b’mard li qed jitfaċċa issa. Rapport wieħed jgħid li 20 marda magħrufa sew​—inkluż it-​tuberkulosi, il-​malarja, u l-​kolera—saru iktar u iktar komuni f’dawn l-​aħħar snin, u xi tip taʼ mard qed isir iktar u iktar diffiċli biex jiġi kkurat permezz tal-​mediċini. Fil-​fatt, minn taʼ l-​inqas tfaċċaw 30 marda ġdida. Xi wħud minnhom għadha ma nstabet ebda kura għalihom u huma fatali.

IN-​NIES TAʼ L-​AĦĦAR JIEM

10. Liema tendenzi mbassrin fit-​2 Timotju 3:​1-5 tara fin-​nies illum?

¹⁰ Minbarra li identifikat ċerti żviluppi dinjin, il-​Bibbja bassret li waħda mill-​affarijiet li kellhom jimmarkaw l-​aħħar jiem kienet bidla fis-​soċjetà umana. L-​appostlu Pawlu ddeskriva kif kienu se jkunu l-​maġġuranza tan-​nies. Fit-​2 Timotju 3:​1-5 nsibu: “Fl-​aħħar jiem ikun hawn żminijiet kritiċi li diffiċli biex issib tarfhom.”  Fost affarijiet oħra, Pawlu qal li n-​nies kellhom ikunu

▪ iħobbu lilhom infushom

▪ iħobbu l-​flus

▪ diżubbidjenti lejn il-​ġenituri

▪ żleali

▪ mingħajr imħabba naturali

▪ mingħajr rażna

▪ feroċi

▪ iħobbu l-​pjaċiri minflok ma jħobbu lil Alla

▪ ikollhom għamla taʼ devozzjoni lejn Alla imma ma jurux bil-​fatti l-​qawwa tagħha

11. Salm 92:8 kif jiddeskrivi dak li se jiġri min-​nies il-​ħżiena?

¹¹ Saru hekk in-​nies taʼ fejn toqgħod int? Ċertament li saru. Nies b’tendenzi ħżiena jinsabu kullimkien. Dan juri li Alla dalwaqt se jaġixxi, għax il-​Bibbja tgħid: “Mqar jekk iħaddru bħall-​ħaxix il-​ħżiena, u jwarrdu dawk kollha li jagħmlu l-​ħażen, lkoll għad jinqerdu għal dejjem.”​—Salm 92:8 (92:​7, NW).

ŻVILUPPI POŻITTIVI!

12, 13. “L-​għerf” veru kif żdied fi “żmien it-​tmiem”?

¹² L-​aħħar jiem huma tabilħaqq  mimlijin gwaj, eżatt bħalma bassret il-​Bibbja. Madankollu, f’din id-​dinja mimlija inkwiet hemm żviluppi pożittivi fost l-​aduraturi taʼ Ġeħova.

¹³ “L-​għerf [veru] jiżdied,” bassar il-​ktieb Bibliku taʼ Danjel. Meta kellu jiġri dan? Matul “żmien it-​tmiem.” (Danjel 12:​4, KŻ) Speċjalment mill-​1914 ’l hawn, Ġeħova għen lil dawk li verament jixtiequ jaqduh biex il-​fehma tagħhom tal-​Bibbja tkompli tikber. Huma kabbru l-​apprezzament tagħhom għall-​veritajiet prezzjużi dwar l-​isem u l-​iskop t’Alla, is-​sagrifiċċju taʼ fidwa taʼ Ġesù Kristu, il-​kundizzjoni tal-​mejtin, u l-​irxoxt. Iktar minn hekk, l-​aduraturi taʼ Ġeħova tgħallmu kif jgħixu ħajjithom b’mod li jkun taʼ benefiċċju għalihom u li jġib tifħir lil Alla. Huma kisbu wkoll fehma iktar ċara dwar l-​irwol tas-​Saltna t’Alla u kif din se tirranġa s-​sitwazzjoni li hawn fuq l-​art. Dawn x’jagħmlu b’dan l-​għarfien? Din il-​mistoqsija twassalna għal jerġaʼ profezija oħra li qed titwettaq f’dawn l-​aħħar jiem.

14. Illum, safejn wasal l-​ippridkar taʼ l-​aħbar tajba tas-​Saltna, u min qed ixandarha?

¹⁴ “Din l-​aħbar tajba tas-​saltna tiġi pridkata fl-​art abitata kollha,” qal Ġesù Kristu fil-​profezija tiegħu dwar “tmiem is-​sistema.” (Mattew 24:​3, 14) Madwar l-​art kollha, l-​aħbar tajba tas-​Saltna​—x’inhi s-​Saltna, x’se tagħmel, u kif aħna nistgħu nirċievu l-​barkiet tagħha​—qed tiġi pridkata f’iktar minn 230 pajjiż u b’iktar minn 400 lingwa. Miljuni taʼ Xhieda taʼ Ġeħova qed jippridkaw bil-​ħeġġa din l-​aħbar tajba tas-​Saltna. Huma jiġu minn “kull ġens u tribù u poplu u lsien.” (Rivelazzjoni 7:9) Ix-​Xhieda jagħmlu studji tal-​Bibbja fid-​djar mingħajr ħlas lill-​miljuni taʼ nies li jridu jsiru jafu dak li l-​Bibbja tgħallem verament. Xi twettiq impressjonanti tal-​profezija, speċjalment mindu Ġesù bassar li l-​Kristjani veri kellhom ikunu “mibgħudin minn kulħadd”!​—Luqa 21:17.

 INT X’SE TAGĦMEL?

15. (a) Temmen li qed ngħixu fl-​aħħar jiem, u għala? (b) X’se jkun ifisser “it-​tmiem” għal dawk li jiħduha kontra Ġeħova u għal dawk li jissottomettu ruħhom għall-​ħakma tas-​Saltna t’Alla?

¹⁵ Ladarba llum qed jitwettqu ħafna profeziji tal-​Bibbja, ma taqbilx li aħna qed ngħixu fl-​aħħar jiem? Wara li tixxandar l-​aħbar tajba sakemm iridha Ġeħova, “it-​tmiem” ċertament li se jiġi. (Mattew 24:14) “It-​tmiem” ifisser iż-​żmien meta Alla se jeħles l-​art mill-​ħażen. Biex jeqred lil dawk kollha li minn jeddhom jiħduha kontrih, Ġeħova se juża lil Ġesù u l-​anġli setgħana. (2 Tessalonikin 1:​6-9) Satana u d-​demonji tiegħu m’humiex se jqarrqu iktar bil-​ġnus. Wara dan, is-​Saltna t’Alla se ġġib barkiet kbar fuq dawk kollha li jissottomettu ruħhom għall-​ħakma ġusta tagħha.​—Rivelazzjoni 20:​1-3; 21:​3-5.

16. Xi jkun għaqli għalik li tagħmel?

¹⁶ Ladarba t-​tmiem tas-​sistema taʼ Satana hu qrib, jeħtieġ li nistaqsu lilna nfusna, ‘X’suppost qed nagħmel?’ Hu għaqli li nkomplu nitgħallmu iktar dwar Ġeħova u dak li jeħtieġ minna. (Ġwanni 17:3) Studja l-​Bibbja bis-​serjetà. Ħudha drawwa li tiltaqaʼ regolarment maʼ dawk li jfittxu li jagħmlu r-​rieda t’Alla. (Ebrej 10:​24, 25) Ikseb l-​għarfien abbundanti li Alla Ġeħova għamel disponibbli għan-​nies madwar id-​dinja kollha, u agħmel il-​bidliet meħtieġa f’ħajtek sabiex tkun tistaʼ tgawdi l-​approvazzjoni t’Alla.​—Ġakbu 4:8.

17. Il-​qerda tal-​ħżiena għala se tiġi għal għarrieda fuq il-​biċċa l-​kbira min-​nies?

¹⁷ Ġesù bassar li l-​biċċa l-​kbira min-​nies kienu se jinjoraw l-​evidenza li qed ngħixu fl-​aħħar jiem. Il-​qerda tal-​ħżiena se tiġi f’daqqa u għal għarrieda. Bħal ħalliel bil-​lejl, din se tiġi għal għarrieda fuq il-​biċċa l-​kbira min-​nies. (1 Tessalonikin 5:2) Ġesù wissa: “Bħalma kienu jiem Noè, hekk tkun il-​preżenza taʼ Bin il-​bniedem. Għax bħalma  f’dawk il-​jiem qabel id-​dilluvju kienu jieklu u jixorbu, irġiel jiżżewġu u nisa jingħataw fiż-​żwieġ, sal-​jum li Noè daħal fl-​arka; u ma tawx kas sakemm ġie d-​dilluvju u kinishom ilkoll, hekk tkun il-​preżenza taʼ Bin il-​bniedem.”​—Mattew 24:​37-39.

18. Ġesù tana liema twissija li għandna niħduha bis-​serjetà?

¹⁸ Għalhekk, Ġesù qal lis-​semmiegħa tiegħu: “Oqogħdu attenti għalikom infuskom li qlubkom qatt ma jitqalu b’ikel u xorb żejjed u ansjetajiet tal-​ħajja, u f’daqqa waħda dak il-​jum jiġi fuqkom għal għarrieda bħal nassa. Għax jiġi fuq dawk kollha li jgħixu fuq wiċċ l-​art kollha. Għalhekk, ibqgħu mqajmin u itolbu bil-​ħerqa l-​ħin kollu biex jirnexxilkom taħarbu minn dak kollu li għandu jseħħ u tieqfu quddiem Bin il-​bniedem.” (Luqa 21:​34-36) Tagħmel tajjeb jekk tieħu l-​kliem taʼ Ġesù bis-​serjetà. Għala? Għaliex dawk li jkollhom l-​approvazzjoni t’Alla Ġeħova u taʼ “Bin il-​bniedem,” Ġesù Kristu, għandhom il-​prospett li jibqgħu ħajjin fit-​tmiem tas-​sistema taʼ Satana u li jgħixu għal dejjem fid-​dinja l-​ġdida meraviljuża li tant hi fil-​qrib!​—Ġwanni 3:​16; 2 Pietru 3:​13.

[Nota taʼ taħt]

DAK LI TGĦALLEM IL-​BIBBJA

▪ L-​aħħar jiem huma mmarkati bi gwerer, nuqqas taʼ ikel, terremoti, u mard li jittieħed.​—Mattew 24:7; Luqa 21:11.

▪ Fl-​aħħar jiem, ħafna nies iħobbu lilhom infushom, il-​flus, u l-​pjaċiri imma ma jħobbux ’l Alla.​—2 Timotju 3:​1-5.

▪ Matul dawn l-​aħħar jiem, l-​aħbar tajba tas-​Saltna qed tiġi pridkata mad-​dinja kollha.​—Mattew 24:14.

[Mistoqsijiet taʼ Studju]

 [Stampi f’paġna 93]

“Din l-​aħbar tajba tas-​saltna tiġi pridkata fl-​art abitata kollha.”​—Mattew 24:14