1. Ke kae moo re ka ithutago ka bokamoso?

NA O kile wa bogela ditaba thelebišeneng gomme wa ipotšiša gore, ‘Na bokamoso bja lefase le e tla ba bofe?’ Dilo tše di setlago pelo di direga ka lebelo e bile di sa letelwa moo e lego gore ga go motho yo a ka bolelago e sa le pele ka seo se ka diregago gosasa. (Jakobo 4:14) Lega go le bjalo, Jehofa o tseba seo se tlago go direga nakong e tlago. (Jesaya 46:10) Kgale-kgale, Lentšu la gagwe e lego Beibele, le ile la bolela e sa le pele e sego feela ka dilo tše mpe tšeo di diregago mehleng ya rena eupša le ka dilo tše di kgahlišago tšeo di tlago go direga kgaufsinyane.

2, 3. Ke potšišo efe yeo barutiwa ba ilego ba e botšiša Jesu, gomme o ile a araba bjang?

² Jesu Kriste o boletše ka Mmušo wa Modimo, woo o tlago go fediša bokgopo gomme o dire lefase gore e be paradeise. (Luka 4:43) Batho ba be ba nyaka go tseba gore Mmušo o tla tla neng. Ge e le gabotse, barutiwa ba Jesu ba ile ba mmotšiša gore: “Pontšho ya go ba gona ga gago le ya bofelo bja tshepedišo ya dilo e tla ba eng?” (Mateo 24:3) Ge a araba, Jesu o ile a ba botša gore ke Jehofa Modimo a nnoši yo a tsebago gabotse gore bofelo bja tshepedišo ye ya dilo bo tla tla neng. (Mateo  24:36) Eupša Jesu o ile a bolela e sa le pele ka dilo tšeo di tlago go direga lefaseng pele ga ge Mmušo o tliša khutšo ya kgonthe le polokego bathong. Seo a ilego a se bolela se a direga ga bjale!

³ Pele re hlahloba bohlatse bja gore re phela ‘bofelong bja tshepedišo ya dilo,’ anke ka bokopana re ahla-ahleng ka ntwa yeo ka ntle le pelaelo go se nago motho yo a ka bago a ile a e bona. E diregile magodimong a sa bonagalego, gomme ditla-morago tša yona di a re kgoma.

4, 5. (a) Ke’ng seo se ilego sa direga legodimong kapejana ka morago ga ge Jesu a beilwe e le Kgoši? (b) Go ya ka Kutollo 12:12, mafelelo a ntwa ya kua legodimong e be e tla ba afe?

⁴ Kgaolo e fetilego ka pukung ye e hlalositše gore Jesu Kriste o bile Kgoši legodimong ka ngwaga wa 1914. (Daniele 7:13, 14) Kapejana ka morago ga ge a amogetše matla a Mmušo, Jesu o ile a tšea kgato. Beibele e re: “Ntwa ya tsoga legodimong. Mikaele [leina le lengwe la Jesu] le barongwa ba gagwe ba lwa le drakone [Sathane Diabolo], gomme drakone le barongwa ba yona ba lwa.” * Sathane le barongwa ba gagwe ba babe e lego batemona, ba ile ba fenywa gomme ba rakwa legodimong ba rakelwa lefaseng. Barwa ba Modimo ba botegago ba moya ba ile ba thabela gore Sathane le batemona ba gagwe ba rakilwe. Lega go le bjalo, batho ba be ba ka se be le lethabo leo. Ka lehlakoreng le lengwe, Beibele e ile ya bolela e sa le pele gore: “Go madimabe lefase . . . , gobane Diabolo o theogetše go lena a galefile kudu, ka ge a tseba gore o na le nako e kopana.”—Kutollo 12:7, 9, 12.

⁵ Hle ela hloko ditla-morago tšeo di bego di tla ba gona tša ntwa ya legodimong. Ka bogale bja gagwe, Sathane o be a tla tliša madimabe goba mathata go bao ba lego lefaseng. Ka ge o tla bona, ga bjale re phela nakong yeo ya madimabe.  Eupša a tla ba gona ka lebakanyana—ka “nako e kopana” feela. Gaešita le Sathane o lemoga seo. Beibele e šupa nako ye e le ‘mehla ya bofelo.’ (2 Timotheo 3:1) Re ka thaba gakaakang gore Modimo kgaufsinyane o tla fediša tutuetšo ya Diabolo godimo ga lefase! Anke re ahla-ahleng tše dingwe tša dilo tšeo Beibele e di boletšego e sa le pele tšeo di diregago ga bjale. Dilo tše di hlatsela gore re phela mehleng ya bofelo le gore Mmušo wa Modimo kgaufsinyane o tla tliša ditšhegofatšo tša ka mo go sa felego go bao ba ratago Jehofa. Sa mathomo, a re hlahlobeng dibopego tše nne tša pontšho yeo Jesu a boletšego gore e be e tla swaya nako yeo re phelago go yona.

6, 7. Mantšu a Jesu mabapi le dintwa le tlhaelelo ya dijo a phethagala bjang lehono?

⁶ “Setšhaba se tla tsogela setšhaba, mmušo wa tsogela mmušo.” (Mateo 24:7) Batho ba dimilione ba bolailwe dintweng nywageng e 100 e fetilego. Radihistori yo mongwe wa mo-Brithania o ngwadile gore: “Lekgolo la bo-20 la nywaga le bile le tšhollo e kgolo kudu ya madi go ya ka pego ya histori. . . . E be e le ngwaga-kgolo wa ntwa e sa kgaotšego, mo go bilego le dinako tše sego kae tša go se be le ntwa e rulagantšwego lefelong le itšego.” Pego e tšwago go Worldwatch Institute e hlalosa gore: “Batho ba bontši  bjo bo ipoeleditšego gararo ba bile bahlaselwa ba ntwa ngwaga-kgolong [wa bo-20] ge go bapetšwa le bao ba bilego bahlaselwa dintweng ka moka tša go tloga lekgolong la pele la nywaga AD go fihla ka 1899.” Batho ba ka godimo ga dimilione tše 100 ba hwile ka baka la dintwa tšeo di bilego gona ga e sa le go tloga ka 1914. Gaešita le ge re tseba manyami a go hwelwa ke motho o tee yo re mo ratago ntweng, manyami le bohloko tšeo di tlaišitšego batho ba dimilione tše dintši bao ba hwetšwego ke baratiwa ba bona ke tšeo re sa kgonego go di akanya.

⁷ “Go tla ba le tlhaelelo ya dijo.” (Mateo 24:7) Banyakišiši ba bolela gore tšweletšo ya dijo e oketšegile kudu nywageng e 30 e fetilego. Lega go le bjalo, tlhaelelo ya dijo e tšwela pele ka gobane batho ba bantši ga ba na tšhelete e lekanego gore ba ka reka dijo goba lefelo leo ba ka bjalago dibjalo go lona. Batho ba bantši ba fetago dimilione tše sekete ba phela ka tlala. Mokgatlo wa Lefase wa tša Maphelo o akanyetša gore phepompe ke sebaki se segolo sa mahu a bana ba fetago dimilione tše hlano ka ngwaga.

8, 9. Ke’ng seo se bontšhago gore diporofeto tša Jesu mabapi le ditšhišinyego tša lefase le leuba la malwetši di a phethagala?

⁸ “Go tla ba le ditšhišinyego tša lefase tše dikgolo.” (Luka 21:11) Go ya ka U.S. Geological Survey, go letetšwe gore go be le palogare ya ditšhišinyego tše  dikgolo tša lefase tše 19 ngwaga le ngwaga. Ditšhišinyego tše ke tše matla kudu go ka senya meago le go paleša lefase. Le gona go ya ka palogare, ngwaga le ngwaga go bile le ditšhišinyego tša lefase tše matla kudu go ka senya meago ka mo go feletšego. Dipego tšeo di lego gona di bontšha gore ga e sa le go tloga ka 1990 ditšhišinyego tša lefase di bolaile batho ba fetago dimilione tše pedi. Mothopo o mongwe o re: “Tšwelopele ya tša thekinolotši e lekile ganyenyane feela gore e fokotše palo ya mahu.”

⁹ “Go tla ba le . . . leuba la malwetši.” (Luka 21:11) Go sa šetšwe tšwelopele ya tša kalafo, malwetši a mafsa le a kgale a hlasela batho. Pego e nngwe e bolela gore malwetši a 20 a tsebjago kudu—a akaretšago bolwetši bja mafahla, malaria le kholera—a atile kudu nywaga-someng e sa tšwago go feta, gomme go ba thata kudu le go feta gore mehuta e mengwe ya malwetši e fodišwe ka go dirišwa ga diokobatši. Ge e le gabotse, mo e ka bago malwetši a mafsa a 30 a tšweletše. A mangwe a ona ga go tsebje gore a alafša ka eng e bile a kotsi.

10. Ke mekgwa efe yeo e boletšwego e sa le pele go 2 Timotheo 3:1-5 yeo o e bonago bathong lehono?

¹⁰ Ka ntle le go hlalosa ka ditiragalo tše itšego tša lefase, Beibele e boletše e sa le pele gore mehla ya bofelo e tla bonagala ka phetogo lekokong la batho.  Moapostola Paulo o hlalositše seo batho ka kakaretšo ba tlago go ba sona. Go 2 Timotheo 3:1-5 re bala gore: “Mehleng ya bofelo go tla ba le dinako tše di hlobaetšago tšeo go lego thata go lebeletšana le tšona.” Ka bokopana, Paulo o boletše gore batho e tla ba

• baithati

• barati ba tšhelete

• ba go se kwe batswadi

• ba go se botege

• ba ba se nago maikwelo a borutho a tlhago

• ba se nago boitshwaro

• ba bogale

• ba ratago maipshino go e-na le go rata Modimo

• ba ba nago le sebopego sa boineelo go Modimo eupša ba latola matla a bjona

11. Psalme 92:7 e hlalosa bjang seo se tlago go diragalela ba babe?

¹¹ Na batho ba itshwere ka tsela e bjalo tikologong ya geno? Ga go pelaelo gore ba bjalo. Gohle go na le batho bao ba nago le mekgwa e mebe. Se se bontšha gore Modimo kgaufsinyane o tla tšea kgato, ka gobane Beibele e re: “Ba babe xe ba hloxa wa mabyang, ’me ba-dira-bobe bohle xe ba taxa wa matšoba, sa bôná ké xo y’o lôba ya ba moka.”—Psalme 92:7.

12, 13. ‘Tsebo ya therešo’ e atile bjang ‘lebakeng le la bofelo’?

¹² Mehla ya bofelo ruri e tletše ka madimabe bjalo ka ge Beibele e boletše e sa le pele. Lega go le bjalo, lefaseng le la mathata, go na le ditiragalo tše di kgahlišago gare ga barapedi ba Jehofa.

¹³ Puku ya Beibele ya Daniele e boletše e sa le pele gore ‘tsebo ya therešo e tlo ata.’ Seo se be se tla direga neng? ‘Lebakeng la bofelo.’ (Daniele 12:4) Jehofa o thušitše bao ba kganyogago e le ka kgonthe go mo hlankela le go gola kwešišong ya Beibele, kudu-kudu ga e sa le go tloga ka 1914. Ba kwešišitše mo gontši kudu ka ditherešo tše di kgahlišago mabapi le leina la Modimo le morero wa gagwe, sehlabelo sa topollo sa Jesu Kriste, boemo bja bahu gotee le tsogo. Go feta moo, barapedi ba Jehofa ba ithutile kamoo ba ka phelago maphelo a bona ka tsela yeo e ba holago le yeo e tumišago Modimo. E bile ba hweditše kwešišo e kwagalago ya seo Mmušo wa Modimo o se phethago le kamoo o tlago go lokiša dilo lefaseng. Ke’ng seo ba se dirago ka tsebo ye? Potšišo yeo e re tliša boporofeteng bjo bongwe gape bjo bo phethagalago mehleng ye ya bofelo.

14. Go bolelwa ga ditaba tše dibotse tša Mmušo go phatlaletše gakaaka’ng lehono, gomme ke bomang bao ba di bolelago?

¹⁴ Boporofeteng bja gagwe mabapi le “bofelo bja tshepedišo ya dilo,” Jesu Kriste o itše: “Ditaba tše tše dibotse tša mmušo di tla bolelwa lefaseng ka moka leo go agilwego go lona.” (Mateo 24:3, 14) Ditaba tše dibotse tša Mmušo—seo Mmušo e lego sona, seo o tlago go se dira le kamoo re ka hwetšago ditšhegofatšo tša wona—di bolelwa dinageng tše di fetago 230 ka maleme a fetago 400 go dikologa lefase. Dihlatse tša Jehofa tše dimilione di bolela ditaba tše dibotse tša Mmušo ka mafolofolo. Di tšwa “ditšhabeng tšohle le melokong yohle le merafong yohle le malemeng ohle.” (Kutollo 7:9) Dihlatse di swara dithuto tše di sa lefelelwego tša magae tša Beibele le batho ba dimilione bao ba nyakago go tseba seo ge e le gabotse Beibele e se rutago. Ye ruri ke phethagalo e kgahlišago ya boporofeta, kudu-kudu ka ge Jesu a boletše e sa le pele gore  Bakriste ba therešo ba tla ba “ba hloilwego ke batho bohle”!—Luka 21:17.

15. (a) Na o a dumela gore re phela mehleng ya bofelo, gona ka baka la’ng? (b) Ke’ng seo “bofelo” bo tlago go se bolela go bao ba ganetšago Jehofa le go bao ba ikokobeletšago pušo ya Mmušo wa Modimo?

¹⁵ Ka ge diporofeto tše dintši kudu tša Beibele di phethagala lehono, na ga o dumele gore re phela mehleng ya bofelo? Ka morago ga ge Jehofa a kgotsofetše ka taba ya go bolelwa ga ditaba tše dibotse, “bofelo” bo tla tla e le ka kgonthe. (Mateo 24:14) “Bofelo” bo bolela nako yeo ka yona Modimo a tlago go fediša bokgopo lefaseng. Jehofa o tla diriša Jesu le barongwa ba matla bakeng sa go fediša ka moka bao ba Mo ganetšago ka boomo. (2 Ba-Thesalonika 1:6-9) Sathane le batemona ba gagwe ba ka se sa hlwa ba fora ditšhaba. Ka morago ga seo, Mmušo wa Modimo o tla tšhollela ditšhegofatšo go batho ka moka bao ba ikokobeletšago pušo ya wona ya go loka.—Kutollo 20:1-3; 21:3-5.

16. Ke’ng seo e tlago go ba gabohlale go wena gore o se dire?

¹⁶ Ka ge bofelo bja tshepedišo ya Sathane bo batametše, re swanetše go ipotšiša, ‘Ke’ng seo ke swanetšego go ba ke se dira?’ Ke gabohlale go tšwela pele re ithuta mo go oketšegilego ka Jehofa le ka dilo tšeo a di nyakago go rena. (Johane 17:3) E-ba morutwana yo mafolofolo wa Beibele. Hlagolela mokgwa wa go kopanela ka mehla le bao ba tsomago go dira thato ya Jehofa. (Ba-Hebere 10:24, 25) Tsenya ka go wena tsebo e atilego yeo Jehofa Modimo a dirilego gore e hwetšwe ke batho lefaseng ka bophara, gomme o dire diphetogo tše di nyakegago bophelong bja gago e le gore o thabele go amogelwa ke Modimo.—Jakobo 4:8.

17. Ke ka baka la’ng go fedišwa ga ba babe go tla direga batho ba bantši ba sa itebetše?

¹⁷ Jesu o boletše e sa le pele gore batho ba bantši ba tla hlokomologa bohlatse bja gore re phela mehleng ya bofelo. Go fedišwa ga ba babe go tla tla ka lebelo le ka mo go sa letelwago. Go swana le lehodu ge le e-tla bošego, go tla direga batho  ba bantši ba sa itebetše. (1 Ba-Thesalonika 5:2) Jesu o lemošitše ka gore: “Go etša feela kamoo mehla ya Noa e bego e le ka gona, le go ba gona ga Morwa wa motho go tla ba bjalo. Gobane go etša ge ba be ba le bjalo mehleng yeo ya pele ga meetse-fula, ba e-ja ba e-nwa, banna ba nyala le basadi ba nyalwa, go fihla letšatšing leo Noa a tsenego ka lona arekeng; gomme ba se ele hloko go fihla meetse-fula a e-tla a ba gogola ka moka.”—Mateo 24:37-39.

18. Ke temošo efe ya Jesu yeo re swanetšego go e ela hloko?

¹⁸ Ke ka baka leo Jesu a boditšego batheetši ba gagwe gore: “Itlhokomeleng gore dipelo tša lena di se ke tša imelwa ke bojagobe le go nwa kudu le dipelaelo tša bophelo, gomme ka tšhoganyetšo letšatši leo la le wela ka bjako go etša molaba. Gobane le tla tlela bohle bao ba dulago lefaseng. Ka gona, dulang le phakgame ka dinako tšohle le lopa gore le atlege ka go phonyokga dilo tše ka moka tše di reretšwego go direga, le go ema pele ga Morwa wa motho [le le ba amogelegago].” (Luka 21:34-36) Ke gabohlale gore re ele hloko kudu mantšu a a Jesu. Ka baka la’ng? Ka gobane bao ba amogelwago ke Jehofa Modimo le “Morwa wa motho” e lego Jesu Kriste, ba na le kholofelo ya go phologa bofelo bja tshepedišo ya Sathane ya dilo le kholofelo ya go phela ka mo go sa felego lefaseng le lefsa le le kgahlišago leo le lego kgaufsi kudu!—Johane 3:16; 2 Petro 3:13.