1. Iner tayo naamtaan no antoy nagawad arapen?

NO MANBANTAY kay balita ed TV, ompan naisip mo, ‘Anto la kasi pansumpalan na sayan mundo?’ Saray trahedya et bigla labat ya nagawa tan anggapoy toon makapangibaga no antoy nagawa ed arapen. (Santiago 4:14) Balet, amta nen Jehova no antoy nagawad arapen. (Isaias 46:10) Abayag lan impasakbay na Salita to, say Biblia, irayan mauges ya nagagawa ed panaon tayo pati saray balibalin nagawa ed arapen.

2, 3. Antoy intepet na saray disipulo ed si Jesus, tan antoy ebat to?

² Impulong nen Jesu-Kristo so Panarian na Dios ya mangekal ed kaugsan tan pagmaliwen ton paraiso so dalin. (Lucas 4:43) Labay ya naamtaan na totoo no kapigay isabi na Panarian. Diad tua, intepet na saray disipulo ed si Jesus: “Kapigan iraya nagawa, tan antoy tanda na kiwawalam tan say kaunoran a parte na sistema na mundo?” (Mateo 24:3) Imbaga nen Jesus ed sikara ya si Jehova a Dios labat so makaamta no kapigan so eksakton panampot na mauges iran nagagawad mundo. (Mateo 24:36) Balet imbaga met nen Jesus iray nagawad dalin antis nin pagmaliwen na  Panarian ya mareen so kipapasen na dalin. Nagagawa la iratan natan!

³ Antis tayon aralen iray prueba ya manbibilay tayo lad “kaunoran a parte na sistema na mundo,” amtaen tayo nin magano so nipaakar ed guerra ya ag-anengneng na anggan siopan too. Agawa itan ed tawen, tan amin tayo et apektado ed satan.

4, 5. (a) Antoy agawad tawen nen ginmapon nanuley si Jesus? (b) Antoy ibabaga na Apocalipsis 12:12 ya resulta na guerra ed tawen?

⁴ Impaliwawa ed Kapitulo 8 ya nen 1914 et nagmaliw ya Ari si Jesu-Kristo ed tawen. (Basaen so Daniel 7:13, 14.) Nen ginmapon nanuley si Jesus, sikatoy kinmiwas. Imbaga na Biblia: “Walay agawan guerra ed tawen, si Miguel [sakey nin ngaran nen Jesus] tan saray anghel to et akilaban ed dragon [si Satanas a Diablo], tan say dragon tan saray anghel to et akilaban.” * Si Satanas tan saray mauges ya anghel to odino saray demonyo et atalo ed saman ya guerra tan sikaray imbantak diad dalin. Malikeliket iray matoor ya anghel ta anggapo la diman si Satanas tan saray demonyo to. Balet, aliwan ontan so naeksperiensya na totoo. Imbaga na Biblia: “Kasi lay dalin . . . lapud linmeksab ed sikayo so Diablo, ya agaylay pasnok to, ta amta ton antikey lay panaon to.”​—Apocalipsis 12:7, 9, 12.

⁵ Imanom pay resulta na guerra ed tawen. Diad pasnok nen Satanas, ginulo to ray wadiad dalin. Nanengneng mon manbibilay tayo la natan ed mair-irap a panaon. Balet magano labat itan, diad ‘antikey labat a panaon.’ Anggan si Satanas et amta to ’tan. Satan ya panaon et tatawagen na Biblia ya “kaunoran iran agew.” (2 Timoteo 3:1) Malikeliket tayo ta magano lan ekalen na Dios so impluensya na Diablo diad dalin! Aralen tayoy pigarad saray imbaga na  Biblia ya nagagawa la natan. Prueba iratan ya manbibilay itayo lad kaunoran iran agew tan magano lan iter na Panarian na Dios iray bendisyon ed saramay mangaaro ed si Jehova. Unona, aralen tayo ni so apatiran kaibad tanda ya imbaga nen Jesus a mangipanengneng ya talagan manbibilay tayo lad kaunoran iran agew.

6, 7. Panon ya nagagawa natan so imbaga nen Jesus nipaakar ed guerra tan eras?

⁶ “Manlalaban iray bansa ontan met ed saray panarian.” (Mateo 24:7) Minilyon a totoo so inatey ed saray guerra diad apalabas ya 100 a taon. Oniay insulat na sakey a historian ya taga Britain: “Manlapud taon 1901 ya anggad taon 2000, agawa iray sankagrabian lan impamatey ya nirekord ed history. . . . Diad saratan ya taon et agnanaandi so guerra, anggan iner ya pasen et walan walay panlalaban.” Oniay inreport na Worldwatch Institute: “Saray inatey ed guerra manlapu la nen 1901 ya anggad 2000 et mamitloy karakel to no ikomparad amin ya inatey ed guerra manlapu lad panaon nen Jesus ya anggad taon 1899.” Masulok a 100 milyon ya totoo so inatey ed guerra manlapu lad 1914. Minilyon ya totoo so nanirap tan nanermen a maong lapud impatey na inad-aro da ed saray guerra. Ompan asalim met la itan.

 ⁷ “Wala ray eras.” (Mateo 24:7) Ibabaga na saray researcher ya dinmakel so naakan diad apalabas ya 30 taon. Balet, siansia nin kulang so naakan ta anggapoy kuartan isaliw odino anggapoy dalin ya napantaneman. Diad saray mairap ya bansa, masulok a sakey bilyon a totoo so manaanos kalamor ed “sankaalmo, sankaluto” ya panagbilay, saray arum et kulang ni ingen so sueldo dad sanagew. Maslak ed sarayan totoo et naeerasan a maong. Base ed World Health Organization, malnutrisyon so manunan rason no akin ya ompapatey so masulok ya limaran milyon ya ugugaw kada taon.

8, 9. Antoy mangipapanengneng ya nagagawa la ray imbaga nen Jesus nipaakar ed yegyeg tan salot odino epidemya?

⁸ “Wala ray maksil a yegyeg.” (Lucas 21:11) Base ed U.S. Geological Survey, manga 19 ya maksil a yegyeg so posiblin nagawa ed kada taon. Diad kakasil na saratan, naderal iray bilding tan onletak-letak so dalin. Tan kada taon, wala ray maksil a yegyeg ya sarag ton igeba iray bilding. Base ed saray rekord, masulok ya 2 milyon so inatey manlapu la nen 1900. Imbaga na sakey a reperensya: “Melmelag labat so agawaan na teknolohiya pian ondaiset so bilang na ompapatey ed yegyeg.”

⁹ “Wala ray . . . salot.” (Lucas 21:11) Anggano moderno lay paraan na panagtambal, dakel nin siansia so  naiirapan lapud saray dati tan balon sakit. Imbaga na sakey a report ya diad agano ni ran taon, mas linmoor so 20 kabkabat ya sakit a singa say tuberculosis [o TB], malaria, tan dengue. Tan saray arum ya klase na sakit et mairap lan tambalen. Diad tua, walay manga 30 balon sakit ya arum ed saratan et agni natambal tan makapatey ni ingen.

10. Anto ray ugali na totoo natan ya abayag lan imbaga na 2 Timoteo 3:1-5?

¹⁰ Aliwa labat lan saray nagagawa ed mundo so abayag lan imbaga na Biblia ya pakanengnengan ya manbibilay itayo lad kaunoran iran agew. Imbaga met na satan ya onuges so ugali na totoo. Impaamta nen apostol Pablo no antoy ugali na karaklan ya totoo. Oniay nabasa tayo: “Diad kaunoran iran agew et onsabi iray mapeligro tan mair-irap a panaon.” (Basaen so 2 Timoteo 3:1-5.) Imbaga nen Pablo ya saray totoo et magmaliw ya

• maaro ed sarili ra

• maaro ed kuarta

• agmatulok ed atateng da

• aliwan matoor

• anggapoy panangaro rad kapamilya da

• anggapoy kontrol da ed sarili ra

•   masibesibeg

• mas inaro ray panliliket nen say Dios

• singano walay takot da ed Dios balet ag-itan nanengneng ed kabibilay da

11. Antoy imbaga na Salmo 92:7 ya nagawa ed saray mauges?

¹¹ Ontan met kasi so naoobserbaan mon ugali na dakel a totoo natan? Seguradon ontan. Anggan iner so laen mo, walan wala ray totoon aliwliway ugali da. Ipapanengneng na satan ya magano lan onkiwas so Dios, ta oniay ibabaga na Biblia: “Say itutubon singa dika na marelmeng tan say ibubulaslas na amin a manggagaway mauges et nagagawa pian naderal ira ya anggad angga.”​—Salmo 92:7.

12, 13. Panon ya dinmakel so “tuan kakabatan” ed sayan “panaon na anggaan”?

¹² Abayag lan imbaga na Biblia ya say kaunoran iran agew et talagan napnoy irap. Balet, anggano napnoy problema so mundo natan, wala ray balibalin nagawa diad saray mandadayew ed si Jehova.

¹³ “Ondakel so tuan kakabatan,” so abayag lan imbaga na libro na Biblia ya Daniel. Kapigan itan nagawa? Diad “panaon na anggaan.” (Daniel 12:4) Manlapu lad 1914, tinulongan nen Jehova iramay talagan labay day  mandayew ed sikato pian mas natalosan day Biblia. Lalon atalosan da ray importantin katuaan, singa say nipaakar ed ngaran tan panlabayan na Dios, say insakripisyon bilay nen Jesu-Kristo, say kipapasen na saray inaatey, tan say kioli. Sakey ni, naaralan la na saray mandadayew ed si Jehova no panoy nawalaan na maliket tan malinis a panagbilay ya mangiter na dayew ed Dios. Mas atalosan da no antoy gawaen na Panarian na Dios tan no panon ya solusyonan na satan iray problemad dalin. Antoy gawaen da ed naaralan da? Pian naebatan itan ya tepet, amtaen tayoy sananey nin ibabaga na Biblia ya nagagawa ed sarayan kaunoran ya agew.

14. Anggad iner lay pangipupulongan ed maong a balita na Panarian natan, tan siopa ray mangipupulong ed satan?

¹⁴ “Sayan maong a balita na Panarian et nipulong ed interon dalin bilang pantasi ed amin a nasyon.” (Basaen so Mateo 24:3, 14.) Diad interon mundo, ipupulong ed masulok ya 230 a dalin tan ed nilasus iran lenguahe so maong a balita na Panarian. Ipupulong da no anto so Panarian, no antoy gawaen na satan, tan no panon tayon naawat iray bendisyon na satan. Minilyon a Tasi nen Jehova so makulin mangipupulong ed maong a balita na Panarian. “Nanlapu ra ed amin a nasyon tan tribu tan rasa tan lenguahe.” (Apocalipsis 7:9) Saray Tasi et libren mangiyaaral na Biblia ed minilyon a totoon labay dan aralen no anton talaga so ibabangat na Biblia. Talagan makapaliket ta nagagawa la natan irayan abayag lan imbaga na Biblia, anggano saray tuan Kristiano et ‘busolen na amin a totoo’ a singa imbaga nen Jesus.​—Lucas 21:17.

15. (a) Kasin kombinsido kan manbibilay itayo lad kaunoran iran agew, tan akin? (b) Antoy labay ya ibaga na “anggaan” parad saray onkokontrad si Jehova? (c) Antoy labay ya ibaga na “anggaan” parad saray onsusuportad uley na Panarian na Dios?

¹⁵ Lapud nagagawa la natan iray abayag lan imbaga na  Biblia, agta kombinsido kan manbibilay itayo lad kaunoran iran agew? No asabi lay panaon ya patundaen nen Jehova so pangipupulong ed maong a balita, seguradon onsabi la so “anggaan.” (Mateo 24:14) Say labay ya ibaga na “anggaan” et panaon ya ekalen la na Dios so kaugsan diad dalin. No deralen nen Jehova so amin ya onkokontrad sikato, usaren toy Jesus tan saray makapanyarin anghel. (2 Tesalonica 1:6-9) Saray totoo et aglan balot nibalang nen Satanas tan na saray demonyo to. Kayari na satan, iter na Panarian na Dios so dakel ya bendisyon ed amin ya onsusuportad balibalin uley na satan.​—Apocalipsis 20:1-3; 21:3-5.

16. Antoy importantin gawaen mo?

¹⁶ Lapud asingger lan manampot so amin ya mauges a gagawaen nen Satanas diad dalin, maong no itepet tayod sarili tayo, ‘Antoy kaukolan kon gawaen?’ Importantin itultuloy moy panaaral mo nipaakar ed si Jehova tan ed saray panlabayan to. (Juan 17:3) Seryosom so panaaral moy Biblia. Miulop kad saramay gagawaen day anggaay nayarian dan unoren so panlabayan nen Jehova. (Basaen so Hebreo 10:24, 25.) Itultuloy mon kabaten si Jehova a Dios diad panaral moy Salita to, tan no wala ray kaukolan mon umanen, agka natatakot ya gawaen itan pian mas onelet so pikakaarom ed Dios.​—Santiago 4:8.

17. Akin et agnatalaranan so kaderal na saray mauges?

¹⁷ Imbaga nen Jesus ya ibaliwala na karaklan so prueba ya manbibilay itayo lad kaunoran iran agew. Say kaderal na saray mauges et bigbigla tan agnailaloan. Agnatalaranan itan na dakel ya totoo ta onsabi itan a singa matakew ed labi. (Basaen so 1 Tesalonica 5:2.) Onia ni imbaga nen Jesus: “Singa ed panaon nen Noe, ontan met naani ed kiwawala na Anak na too. Ta singa ed saraman ya agew antis na Delap, saray totoo et nan-aakan tan naniinum, angasawa tan akiasawa ra,  anggad agew a linmoob ed biong si Noe, tan ag-ira nanimano ya anggad sinmabi so Delap tan niyanor iran amin, ontan met naani ed kiwawala na Anak na too.”​—Mateo 24:37-39.

18. Antoy imbaga nen Jesus ya importantin ipapuso tayo?

¹⁸ Kanian oniay imbaga nen Jesus ed saray ondedengel ed sikato: “Manalwar kayo pian agbalot nabelatan so puso yo ed sobran panangan tan alabas a panag-inum tan saray kapagaan ed bilay, tan bigbiglan onsabid sikayo itan ya agew a singa sakey a patit. Ta onsabi itan ed amin a manaayam diad tapew na interon dalin. Kanian mansiansia kayon aliing, a manpikasi kayon masimoon ed amin a panaon pian makaliktar kayod sarayan amin a nepeg a nagawa, tan makatalindeg kayod arapan na Anak na too.” (Lucas 21:34-36) Importantin ipapusom irayan imbaga nen Jesus. Akin ey? Lapud nilaban iray inaro nen Jehova a Dios tan nen Jesu-Kristo odino “Anak na too” no deralen la so amin ya mauges a gagawaen nen Satanas diad dalin. Tan tuloytuloy iran manbilay diad balibali ya balon mundo ya maganggano lan onsabi!​—Juan 3:16; 2 Pedro 3:13.