1. Ke ki pudi judanu sibi di futuru?

BU ciga di obi notisia na radiu o na televison i bu punta, ‘nunde kes mundu na bai?’ Kusas tristi ta akontisi di repenti sin no spera, i nin un pekadur ka pudi sibi ke ki na sedu amaña. (Tiagu 4:14) Ma, Jeova sibi ke ki na akontisi na futuru. (Isaias 46:10) Manga di tempu atras, si Palabra, Biblia, ka falaba so di mau kusas ku na akontisi na no tempu, ma tambi di kusas bunitu ku na bin akontisi na futuru ku na bin.

2, 3. Kal purgunta ki disipulus di Jesus fasil, i kuma ki ruspundi?

² Jesus Kristu falaba aserka di Renu di Deus ku na bin kaba ku maldadi i fasi Tera un paraisu. (Lukas 4:43) Jintis misti sibi kal tempu ku Renu na bin. E ku manda, disipulus di Jesus puntal: “Kal ki na sedu sinal di bu presensa ku kabantada di sistema di kusas?” (Mateus 24:3, NM) Pa ruspundi, Jesus fala elis ki, so Jeova Deus ku sibi diritu kal tempu ku fin des sistema di kusas na bin. (Mateus 24:36) Ma, Jesus falaba di kusas  ku na bin akontisi na Tera antis di Renu tisi pas ku suguransa di bardadi pa pekaduris. Ke ki falaba sta na ojadu aos!

³ Antis di no oja provas di kuma no sta na vivi na “kabantada di sistema di kusas,” no fala un bokadu di un gera ki nin un pekadur ka oja. I akontisi na seu i si rusultadu afetanu.

4, 5. (a) Ke ki akontisi na seu puku tempu dipus ki Jesus mposadu suma Rei? (b) Sugundu Apokalipsi 12:12, kal ki rusultadu di gera na seu?

⁴ Kapitulu 8 des livru mostra kuma, Jesus Kristu kumsa rena na seu na anu 1914. (Lei Daniel 7:13, 14.) Puku dipus di risibi puder di Renu, Jesus aẑi. Biblia fala: “I rebenta gera na seu. Migel [utru nomi di Jesus] ku si anjus geria kontra dragon [Satanas Diabu]. Dragon ku si anjus e geria.” * Satanas ku si anjus mau, comadu dimonius, pirdi gera i e spulsadu di seu pa Tera. Anjus di Deus kontenti manera ki Satanas ku si dimonius spulsadu di seu. Ma, pekaduris ka sinti ki mesmu alegria. En ves di kila, Biblia fala: “Ai di kilis ku mora na tera . . . Pabia diabu disi pa bos ku garandi raiba; i sibi kuma i sobral puku tempu.” — Apokalipsi 12:7, 9, 12.

⁵ Jubi kal ki rusultadu di gera na seu. Na si raiba, Satanas na tisi ai, o purblemas, riba di kilis ku sta na Tera. Suma ku bu na bin oja, no sta na vivi na tempu di ki ai o purblemas. Ma i ka na tarda — i na sedu so “puku tempu.” Te mesmu Satanas sibi  kila. Biblia coma es tempu di “ultimus dias.” (2 Timótiu 3:1, NM) I un alegria garandi sibi kuma, i ka na tarda, Deus na kaba ku nfluensia di Diabu na mundu! No jubi alguns kusas ku Biblia falaba ja del i ku sta na akontisi na no tempu. Es ta mostra kuma, no sta na vivi na ultimus dias i ki, i ka na tarda, Renu di Deus na bin tisi bensons ku ka ta kaba pa kilis ku ama Jeova. Purmeru, no na jubi kuatru kusas na sinal ki Jesus fala i na bin ojadu na no tempu.

6, 7. Kuma ki palabras di Jesus aserka di gera ku fomi sta na kumpri na no tempu?

⁶ ‘Nason na lanta kontra nason, renu kontra renu.’ (Mateus 24:7) Na sekulu ku pasa, milyons di jintis muri na gera. Un storiadur Britaniku skirbi: “Sekulu 20 seduba sekulu ku sangi mas darmadu na storia. . . . I seduba sekulu ku kuas gera ka para, i tenba puku tempu nunde ki ka ojadu gera organizadu.” Un organizason ku ta studa akontisimentus di mundu, fala: “Numeru di jintis ku muri na gera na sekulu [20] i mas tris bias numeru di jintis ku muri na tudu geras desdi  purmeru sekulu dipus di Jesus Kristu te 1899.” Desdi 1914, mas di 100 milyon di jintis muri pabia di gera. Milyons di jintis sufri dur pabia e pirdi un algin ke ama na gera. Talves abo tambi bu pirdi algin ku bu ama des manera.

⁷ ‘I na ten fomi.’ (Mateus 24:7) Piskisas mostra kuma pruduson di kusas di kume omenta ciu duranti 30 anus ku pasa. Mesmu asin, fomi kontinua pabia manga di jintis ka tene diñeru sufisienti pa kumpra kumida o e ka tene kau di labra. Na teras ku sta na disinvolvi, mas di un bilyon di jintis ten di vivi ku 600 FCFA o menus pur dia. Maioria des jintis ta sufri di fomi garandi. Organizason Mundial di Saudi fala ki mau alimentason ta kontribui ciu na mortu di mas di sinku milyon di mininus kada anu.

8, 9. Ke ki ta mostra kuma profesias di Jesus aserka di tirmidura di con ku duensas kumpri?

⁸ ‘Na manga di lugar con na tirmi ku forsa.’ (Lukas 21:11) Sugundu un grupu di sientistas na Stadus Unidu, i na peradu pa i ten media di 19 tirmidura di con kada anu. Es tirmidura di con tene forsa garandi pa dana predius i findi con. Na  media, kada anu, i ta ten tirmidura di con forti dimas ku ta kausa distruison total di predius. Riẑistus dispunivel mostra kuma tirmidura di con mata mas di dus milyons di jintis desdi 1900. Utru fonti di nformason fala: “Avansu na teknoloẑia rapati numeru di mortus so un bokadu.”

⁹ ‘Duensa na laga.’ (Lukas 21:11) Mesmu ku avansus na medisina, duensas antigu ku nobu sta na kansa jinti. Un relatoriu fala ki 20 duensas ku kunsidu diritu — suma tuberkulosi, paludismu ku kolera — ta ojadu sempri na anus resenti, i sertu tipus di duensas sta na torna difisil di kura ku mesiñus. Na bardadi, pelu menus 30 duensas nobu surẑi. Alguns delis ka tene kura i e ta mata.

10. Kal komportamentu ku faladu na 2 Timótiu 3:1-5 ku bu ta oja na jintis aos?

¹⁰ Alen di fala di sertus akontisimentus di mundu, Biblia falaba ja di kuma, ultimus dias na markadu pa mudansa na sosiedadi umanu. Apostulu Paulu splika kuma ki jintis na sedu. I fala sin: “Na ultimus dias i na ten tempus difisil di lida  kel.” (Lei 2 Timótiu 3:1-5.) Paulu fala inda kuma jintis na

• ama se kabesa

• ama diñeru

• disobdisi se pape ku se mame

• sedu infiel

• tene falta di afeison

• sedu sin kontrolu

• sedu malvadu

• ama sabura di mundu en ves di ama Deus

• finji sedu riliẑiozu ma e ka sedu pratikanti

11. Kuma ki Salmu 92:7 splika ke ki na akontisi ku jintis mau?

¹¹ I ten jintis suma esis na zona ku bu sta? Sin duvida i ten. I ten jintis na tudu ladu ku tene mau maña. Es ta mostra kuma, i ka na tarda, Deus na aẑi, pabia Biblia fala: “Mesmu ku jintis mau nasi suma paja, nin si kusas na kuri diritu pa kilis ku ta fasi mal, e na kabadu ku el pa sempri.” — Salmu 92:7.

12, 13. Kuma ki “kuñisimentu di bardadi torna ciu nes “tempu di fin”?

¹² Na bardadi, i ten manga di ai o purblemas na ultimus dias, suma  ki Biblia falaba ja. Ma, nes mundu ŝeiu di purblema, i ten akontisimentus pusitivu entri adoraduris di Jeova.

¹³ Livru bibliku di Daniel fala ki “kuñisimentu di bardadi na torna ciu.” Kal tempu ku kila na akontisi? Na “tempu di fin.” (Daniel 12:4, NM) Spesialmenti desdi 1914, Jeova sta na juda kilis ku na bardadi misti sirbil pa e omenta na kuñisimentu di Biblia. E tene mas apresu pa bardadi presiosu suma, nomi di Deus ku si intenson, resgati di sakrifisiu di Jesus, kondison di mortus ku resureison. Alen des, adoraduris di Jeova aprindi vivi di un manera ku na benefisia elis i ku na ngaba Deus. E tene tambi un ntindimentu klaru aserka di funson di Renu di Deus i kuma ki na rosolvi purblemas na mundu. Ke ke ta fasi kes kuñisimentu? Es purgunta ta lebanu pa utru profesia ku sta na kumpri nes ultimus dias.

14. Te kal puntu ku bon noba di Renu sta na pregadu aos, i ba kin ku na pregal?

¹⁴ ‘E Bon Noba di renu i na kontadu na tudu mundu,’ es ku Jesus Kristu fala na si profesia aserka di “kabantada di sistema di kusas.” (Lei Mateus 24:3, 14.) Na mundu ntidu bon noba di Renu — ke ki Renu, ke ki na bin fasi, i kuma ku no pudi risibi si bensons — sta na pregadu na mas di 235 teras i na mas di sentenas di linguas. Milyons di Tustumuñas di Jeova ta prega bon noba di Renu ku zelu. E sedu di “tudu nason, tudu rasa, tudu pobu ku tudu lingua.” (Apokalipsi 7:9) Tustumuñas di Jeova ta diriẑi studus bibliku ku milyons di jintis ku misti sibi ke ki Biblia na bardadi ta sina, sin paga nada na se kasa. Es i un kumprimentu garandi di profesia, spesialmenti pabia Jesus falaba ja kuma, “tudu jinti na nfastia” kristons di bardadi! — Lukas 21:17.

15. (a) Sera ki bu fia kuma no sta na vivi na ultimus dias i pabia di ke? (b) Ke ki “fin” na signifika pa kilis ku disidi sta kontra Jeova i pa kilis ku sta bas di guvernu di Renu di Deus?

¹⁵ Suma manga di profesias di Biblia sta na kumpri aos, bu ka konkorda kuma no sta na vivi na ultimus dias? Dipus di bon noba pregadu suma ki Jeova misti, ku serteza, “fin” na bin. (Mateus 24:14) “Fin” signifika tempu ku Deus na bin kaba ku maldadi na Tera. Pa distrui tudu jintis ku disidi sta kontra el, Jeova na usa Jesus ku si anjus puderosu. (2 Tesalonisensis 1:6-9) Satanas ku si dimonius ka na ngana jintis mas. Dipus di kila, Renu di Deus na darma bensons riba di tudu kilis ku seta sta bas di si guvernu justu. — Apokalipsi 20:1-3; 21:3-5.

16. Ke ki bon pa bu fasi?

¹⁶ Suma fin di sistema di Satanas sta pertu, i bon pa no punta no kabesa, ‘Ke ki N dibi di fasi?’ I bon kontinua aprindi mas aserka di Jeova ku ke ki i misti pa no fasi. (Jon 17:3) Pega tesu na studa Biblia. Ba ta asosia sempri ku utrus ku ta buska fasi vontadi di Jeova. (Lei Ebreus 10:24, 25.) Kunsi Jeova Deus atraves di studa di si Palabra, i fasi mudansas ki pirsis na bu vida, asin bu na pudi tene fabur di Deus. — Tiagu 4:8.

17. Ke ku manda distruison di jintis mau na bin paña manga di jintis di surpreza?

¹⁷ Jesus falaba ja kuma, manga di jintis na ignora prova ku ta mostra kuma no sta na vivi na ultimus dias. Distruison di jintis mau na bin di repenti ku surpreza. Suma un ladron di noiti, i na paña maioria di jintis ku surpreza. (Lei 1 Tesalonisensis 5:2.) Jesus avisaba ki presensa di Fiju di omi, o tempu ki na sta na  guverna suma Rei di Renu di Deus na ultimus dias, na sedu suma dias di Noe. ‘Na tempu antis di diluviu, jintis na kumeba, e na bibi, e na kasa, e na da se fijus pa kasamenti, te na dia ku Noe yentra na barku. E ka toma sintidu tok diluviu bin, i kaba ku elis tudu. Asin tambi ki na sedu presensa di Fiju di omi.’ — Mateus 24:37-39.

18. Kal avisu di Jesus ku no dibi di nkara ku seredadi?

¹⁸ E ku manda Jesus fala kilis ku na obilba: “Bo toma sintidu; ka bo diskuda son na wukesa, ku bibidera, ku kudadi de mundu, pa ka ki dia bin paña bos di repenti suma armadilia, pabia i na bin riba di tudu kilis ku sta na tudu parti di mundu. Bo bisia, bo ora sempri, pa bo pudi kapli tudu e kusas ku na bin kontisi, pa bo firma [tene aprovason] dianti di Fiju di omi.” (Lukas 21:34-36) I bon nkara es palabras di Jesus ku seredadi. Pabia di ke? Pabia kilis ku tene aprovason di Jeova Deus ku “Fiju di omi,” Jesus Kristu, tene speransa di salba na fin di sistema di kusas di Satanas i vivi pa sempri na un novu mundu maravilyosu ku sta pertu! — Jon 3:16; 2 Pedru 3:13.