1. ¿Shamuj punllacunapi ima tucunataca maipitaj huillacun?

NOTICIACUNATA radiopi uyashpa o televisionpi ricushpaca, ¿imashi tucushun nishpa yuyashcanguichu? Cunan punllacunapica achca llaquicunami ricurin. Caya punlla ima tucunataca ni pi mana huillai tucunchu (Santiago 4:14). Shinapish Jehová Diosca huillai tucunmi (Isaías 46:10). Achca huatacuna ñaupamanmi cunan punllacunapi ima llaquicuna tiyanata, shamuj punllacunapi ima tucunatapish Bibliapi ña huillarca.

2, 3. a) ¿Jesusta catijcunaca imatataj tapurca? b) ¿Jesusca imatataj cutichirca?

² Jesusca Diospaj Mandanamantami huillarca. Chai Mandanami llaquicunata tucuchishpa cai Allpata shuj paraisota ruranga (Lucas 4:43). Jesusta uyajcunaca Diospaj Mandana ima hora shamuna cashcatami yachasha nirca. Jesusta catijcunaca: “Can cutin shamunapajpish, cai shina causai tucurinapajpish ¿ima ricunata ricushpataj tucui chaicuna pajtamucushcataca yachashun?” nishpami tapurcacuna (Mateo 24:3). “Cai shina causai” ima hora tucurinataca Jehová Diosllami  yachan nishpami Jesusca cutichirca (Mateo 24:36). Shinapish Jesusca Diospaj Mandana cai Allpata manaraj shuj paraisota rurajpi imalla tucunatami huillarca. Chai shimicunaca cunanmi pajtaricun.

³ ‘Cai shina causai tucurina’ punllacunapi causacushcata yachangapajca jahua pachapi ima tucushcata ricushun. Jahua pachapica gentecuna mana ricushca macanacuimi tiyarca. Chai macanacui tiyashcamantami cai Allpapipish achca llaquicuna tiyashca.

4, 5. a) ¿Jesús mandai callarishca qˈuipaca jahua pachapica imataj tucurca? b) ¿Apocalipsis 12:12-pi nishca shinaca imataj cai Allpapica tucuna carca?

⁴ Capítulo 8-pica, 1914-pi jahua pachapi Jesús mandai callarishcatami yacharcanchij (Daniel 7:13, 14-ta rezai). Jesús mandai callarishca qˈuipa ima tucushcata parlashpami Bibliaca: ‘Cielopica jatun macanacuimi tiyarca. Miguel o Jesusmi paipaj angelcunandij, dragonhuan macanacurca. Dragonpish paipaj angelcunandijmi macanacurca’ nin. * Dragón o Diabloca mana misharcachu. Chaimantami Jesusca, Diablota paita catij supaicunatapish cai Allpaman shitarca. Diablota llujshichishpa shitajpica jahua pachapi causaj alli angelcunaca achcatami cushicurca. Shinapish ¿cai Allpapica imataj tucurca? Bibliapica: ‘Allpapi causajcuna ¡aij imachari tucunguichij! Diabloca pai munashcata rurana punllacuna ashalla cashcata yachashpami, jatunta pˈiñarishpa cancunapajman uriyashca’ ninmi (Apocalipsis 12:7, 9, 12).

⁵ ¿Jahua pachapi macanacui tiyashcamantaca imataj tucurca? Diabloca achcatami pˈiñarirca. Chaimantami cai Allpapi causajcunataca achcata llaquichicun. Cunan  punllacunapi causanaca sinchimi can. Shinapish cai shina causaica ñallami tucuringa. ‘Ashalla punllacuna’ tiyashcataca Diablopish allimi yachan. Cai punllacunataca Bibliaca ‘tucuri punllacuna’ ninmi (2 Timoteo 3:1). ¡Diablopaj ruraicunata Dios ñalla tucuchinata yachashpaca achcatami cushicunchij! Cunan punllacunapi imalla tucunataca Bibliaca ñami huillarca. Chaicuna pajtaricushcata ricushpami tucuri punllacunapi causacushcata yachanchij. Shinallataj Diospaj Mandana cai Allpata ñalla mandana cashcatami yachanchij. Chaipica Diosta alli servijcunaca huiñai huiñaitami achca bendicioncunata charishun. Cunanca Jesús yachachishca shina tucuri punllacunapi ima chuscu ruraicuna pajtarina cashcata ricushun.

6, 7. ¿Macanacuicuna, yaricaicunapish ima shinataj Jesús huillashca shina pajtaricun?

⁶ ‘Mama llajtaca caishuj mama llajtahuanmi macanacunga, jatun mandajcunapurapish macanacungacunami’ (Mateo 24:7). Último 100 huatacunapica achca gentecunami macanacuicunapi huañushca. Historiamanta parlaj shuj runaca cashnami nirca: “1901-manta 2000 huatacamaca achca gentecunami huañurca. Macanacuicunapish huashan huashanmi tiyarca.  Asha punllacunallami huaquin llajtacunapica macanacuicuna mana tiyarca”. Shuj organización nishca shinaca: “Jesús huacharishcamanta 1899 huatacamaca achca gentecunami macanacuicunapi huañurca. Shinapish chai huatacunahuan chˈimbapurajpica 1901-manta 2000 huatacamaca quimsa cutin yalli gentecunami macanacuicunapi huañurca”. 1914-manta callarishpaca 100 millones yalli gentecunami macanacuicunapi huañushca. Chaimantami achca gentecunaca paicunapaj familia illaj saquirishca. ¿Cambaj familiapish macanacuicunapi huañushcachu?

⁷ ‘Yaricaicunami tiyanga’ (Mateo 24:7). Shuj organización nishca shinaca último 30 huatacunapica achca micunami tiyashca. Shinapish achca gentecunami cullquita mana charishcamanta, maipi tarpunata mana charishcamanta yaricaihuan causan. Huaquin llajtacunapica mil millones yalli gentecunami cada punlla shuj dolarhuan o menoshuan causan. Organización Mundial de la Salud nishca shinaca cada huatami yaricaimantaca cinco millones yalli huahuacuna huañun.

8, 9. ¿Allpa chujchuicuna, ungüicunapish ima shinataj Jesús huillashca shina pajtaricun?

⁸ Jatun allpa chujchuicunami tiyanga (Lucas 21:11). Servicio Geológico de  Estados Unidosca: “Cada huatami casi 19 jatun allpa chujchuicuna tiyanga. Jatun huasicunatami urmachinga. Allpa chijtarijtami chujchunga” nin. Cunan punllacunapica casi cada huatami allpa chujchuicunaca jatun huasicunata urmachishca. Shinallataj 1900 huatamantaca ishqui millones yalli gentecunami allpa chujchuicunapi huañushca. Shuj libropi nishca shinaca, mushuj aparatocuna tiyajpipish achca gentecunami allpa chujchuicunapi huañun.

⁹ “Millai ungüicunami tiyanga” (Lucas 21:11). Alli jambicuna tiyajpipish gentecunaca ñaupa ungüicunata, mushuj ungüicunatami charin. Shuj informepi nishca shinaca, último huatacunapica rijsishca 20 yalli ungüicunami ashtahuan mirashca. Por ejemplo, tuberculosis, paludismo, cólera ungüicunami ashtahuan mirashca. Shinallataj casi 30 mushuj ungüicunami ricurishca. Huaquin ungüicunaca huañuchij ungüicunami can. Jambingapajpish mana ima jambi tiyanchu.

10. ¿2 Timoteo 3:1-5-pi nishca shinaca gentecunaca ima shinataj can?

¹⁰ Tucuri punllacunapi ima tucunatapish, gentecuna ima shina canatapishmi Bibliaca huillarca. Apóstol Pabloca: “Cai punllacuna tucurinapajca  llaqui punllacunami shamunga” nircami (2 Timoteo 3:1-5-ta rezai). Shinallataj gentecunaca cashnami canga nircami:

• quiquinlla alli canata munajcuna

• quiquinpajlla charinata munajcuna

• yaya mamata mana cazujcuna

• mana pagui nijcuna

• rumi shungucuna

• mana jarcari tucujcuna

• pˈiña millaicuna

• Taita Diosta mashcanapaj randica aicha munaipi cushicunallata cˈuyajcuna

• Ricuipica Dios yuyailla cajcuna. Ashtahuanpish paicuna rurashcahuanca Dios mana tiyashcata ricuchijcuna

11. Salmo 92:7-pi nishca shinaca ¿millaita rurajcunaca imataj tucunga?

¹¹ ¿Cambaj llajtapipish gentecunaca chashnachu can? Muyundij Allpapimi chashna gentecuna tiyan. Chaimantami Dios imata ñalla ruranata yachanchij. Bibliapica: ‘Millaita rurajcunaca mana jahualla sumajtami sisan. Ashtahuanpish huiñaipaj chingachishca canapajllamari’ ninmi (Salmo 92:7).

12, 13. ¿Jatun yachaica ima shinataj “tucuri” punllacunapica ashtahuan mirashca?

¹² Bibliapi huillashca shina tucuri punllacunapi achca llaquicuna tiyajpipish, Jehová Diosta servijcunapurapica tauca alli ruraicunami tiyan.

¹³ Jatun yachaipish ashtahuanmi miranga nishpami profeta Danielca huillarca. ¿Ima horataj cai shimicunaca pajtarina carca? “Tucuri punllacunapi” ninmi (Daniel 12:4). Jehová Diosca paipaj munaita rurasha nijcunataca, 1914 huatamantami Bibliapi yachachishcata alli entendichun ayudacushca. Por ejemplo, Diospaj shutimanta, Diospaj munaimanta, Jesús huañushcamanta ima bendicioncunata charishcata, huañushcacuna ima tucushcata, huañushcacuna causarina cashcatami entendishcanchij. Jehová Diosta servijcunaca Bibliapi yachachishcata pajtachishcamantami alli causanchij, chashnami paita jatunyachinchij. Shinallataj Diospaj Mandana ima cashcata, cai Allpata ima shina shuj paraisota ruranatapishmi alli entendishcanchij. ¿Chaita yachashcamantaca imatataj rurashcanchij? Cai tapuita cutichingapajca tucuri punllacunapi pajtaricushca shujtaj profeciata ricushun.

14. a) ¿Maicamataj Diospaj Mandanamanta huillacunchij? b) ¿Picunataj Diospaj Mandanamanta huillacun?

¹⁴ ‘Dios Mandacun alli huillaitaca, tucui cai pachapi causajcunamanmi huillashca canga’ nishpami Jesusca yachachirca. “Cai shina causai” tucurinata parlashpami chaita yachachirca (Mateo 24:3, 14-ta rezai). Muyundij Allpapimi Diospaj Mandanamanta alli huillaicunata huillacunchij. Diospaj Mandana ima cashcata, imata ruranata, sumaj bendicioncunata charingapaj imata ruranatami huillacunchij. Cai alli huillaicunataca 230 yalli llajtacunapimi, achca shimicunapi huillacunchij. ‘Tucui llajtacunamanta, chˈican chˈican aillucunamanta, chˈican chˈican rimaicunamanta’ achca huaranga huaranga testigo de Jehovacunami Diospaj Mandanamanta alli huillaicunata cushicushpa huillacunchij (Apocalipsis 7:9). Bibliamanta yachasha nij achca gentecunamanpish gratismi yachachinchij.  Cai profecía ima shina pajtaricushcata ricushpaca achcatami cushicunchij. Jesús huillashca shina ‘tucuicuna pˈiñajpipish’ huillashpami catinchij (Lucas 21:17).

15. a) ¿Imamantataj tucuri punllacunapi causacushcata yachanchij? b) ¿Tucurina punllapica Jehová Diosca imatataj ruranga?

¹⁵ Cunan punllacunapica tauca profeciacunami pajtaricun. ¿Manachu tucuri punllacunapi causacunchij? Alli huillaicunataca Jehová Dios munashca punllacamami huillashun. Chai qˈuipaca ‘cai shina causaica tucuringami’ (Mateo 24:14). Tucurina punllapica Jehová Diosca cai Allpapi tiyaj tucui mana allicunatami tucuchinga. Chaita rurachunca Jesustapish, poderta charij angelcunatapishmi agllashca (2 Tesalonicenses 1:6-9). Diablopish, paita catij supaicunapish gentecunata ña mana pandachingachu. Chai qˈuipaca Diospaj Mandanaca, cazushpa causajcunatami achcata bendicianga (Apocalipsis 20:1-3; 21:3-5).

16. ¿Imatataj rurana cangui?

¹⁶ Cai shina llaqui causaica ñallami tucuringa. Chaimantami ¿imatataj rurana cani? nishpa tapurina cangui. Jehová Diostami ashtahuan rijsina cangui. Pai imata rurachun nishcatami pajtachishpa catina cangui (Juan 17:3). Bibliamanta tucui shunguhuan yachashpa cati. Diospaj munaita rurajcunahuan tandanacui (Hebreos 10:24, 25-ta rezai). Bibliapi Jehová Diosmanta yachashpa, pai munashca shina causashpaca Diospaj ñaupajpimi alli ricuringui (Santiago 4:8).

17. ¿Mana allicunata tucuchina punllaca imamantataj cungashcapi shamunga?

¹⁷ Jesús yachachishca shinaca, achca gentecunami tucuri punllacunapi causacushcata mana crin. Mana allicunata tucuchina punllaca tuta shuhua shamuj shinami cungashcapi shamunga (1 Tesalonicenses 5:2-ta rezai). Jesusca cashnami nirca: “Noé causai punllacuna ima shinami carca, chashnallatajmi Runa Aichayuj shamunapajpish canga. Yacu juilluta Dios cachanapajpish allita micushpa, ubyashpa,  cazarashpa, cazarachishpami causarcacuna. Huambuj huasiman Noé yaicungacamami, chashnallataj catircacuna. Paicunaca yacu juillu shamushpa, tucuicunata chingachingacama mana entendircacunachu. Runa Aichayuj shamunapajpish chashnallatajmi canga” nircami (Mateo 24:37-39).

18. ¿Jesús mandashca shinaca imatataj rurana canchij?

¹⁸ Jesusca cashnami mandarca: “Taita Dios mandai callarina punllaca cancuna mana yuyashcapi ama shamuchun, cancunallataj alli yuyarishpa jatun micuita ruranallapi, machanallapi, cai causaipi imatapish charinallapi, cancunapaj shunguta churashpa ama causanguichijchu. Tucui cai pachapi causajcunataca lazyana angu ñapish japij shinami japinga. Punllanta Taita Diosta mañashpa yuyaipi caichij. Chaimi chai llaquicuna shamujpica quishpiri tucunguichij. Runa Aichayuj shamujpipish paipaj ñaupajpi shayari tucunguichij” nircami (Lucas 21:34-36). ¿Imamantataj Jesús mandashcata cazuna canchij? Jehová Diospaj ñaupajpi, Jesucristopaj ñaupajpipish alli ricurishpallami cai shina causai tucurijpica quishpirishun. Shinallataj cai Allpa ñalla shuj paraíso tucujpipish chaipimi causashun (Juan 3:16; 2 Pedro 3:13).