1. Náa e̱ʼkha̱ raʼthí dí marigá nda̱wa̱á rá.

ÍNDO̱ natayáá noticia rí nanújngoo náa televisión, lá na̱dxu̱ʼnú natraximínáʼ xú káʼnii gámbá numbaaʼ rígi̱ ráʼ. Rí mbiʼi xúgi̱ narígá wéñuʼ gamiéjunʼ rí nimbáa xa̱bu̱ xándoo maʼthí ndiéjunʼ gárígá imbo̱o̱ mbiʼi (Santiago 4:14). Mú, Jeobá ndaʼyoo dí marigá (Isaías 46:10). Niʼni má mba̱yu̱ʼ tsiguʼ, rí náa Biblia na̱nguá niʼtáriyaʼ i̱ndó gamiéjunʼ rí marigá rí mbiʼi xúgi̱ ma̱ngaa niʼthí marigá rí mitsaan wéñuʼ nda̱wa̱á.

2, 3. Ndiéjunʼ graxe̱ nini̱i̱ Jesús discípulo ndrígóo ga̱jma̱a̱ ndiéjunʼ niriʼña̱a̱ ikhaa xá.

² Jesucristo niʼthí ga̱jma̱a̱ numuu Reino ndrígóo Dios, Xa̱bu̱ Ñajunʼ bi̱ maʼni gámbáa dí ra̱májánʼ ga̱jma̱a̱ maʼni mbá Ku̱ba̱ʼ mitsaan (Lucas 4:43). Xa̱bu̱ bi̱ nidxawíín rí niʼthí Jesús nindúún mbuyáá nguáná ga̱ʼkha̱ Reino buʼko̱. Discípulo ndrígóo niraxi̱i̱: “Ndiéjunʼ lá garigá índo̱ rí ikháánʼ gátagíʼdi̱i̱ maratañájunʼ náa numbaaʼ ga̱jma̱a̱ índo̱ rí mambáa xúgíʼ dí xtáa rarígá náa numbaaʼ rá.” (Mateo 24:3). Ikhaa niriʼña̱a̱ rí i̱ndó Jeobá Dios eʼyoo nguáná phú ga̱ʼkha̱ fin náa numbaaʼ xkawiʼ rígi̱ (Mateo 24:36). Mú, Jesús niʼtáriyaʼ ndiéjunʼ gárígá náa tsu̱du̱u̱ Ku̱ba̱ʼ nákha xóo tséʼkha̱ kayóo Reino rí tsímáá ga̱jma̱a̱ rí xa̱bu̱ ní xámiñun. Rí Jesús niʼthí marigá ikhaa má xtáa rarígá rí mbiʼi xúgi̱.

 ³ Nákha xóó tséʼyáá tikhuu náa nasngájma rí kuwáanʼ “iwáá mbiʼi”, guʼtá ga̱jma̱a̱ numuu mbá guerra rí nimbáa xa̱bu̱ táʼga̱nú mbaʼyoo. Guerra rígi̱ nirígá náa mekhuíí náa kuwa ángeles, ga̱jma̱a̱ rígi̱ naʼni rí xákuwáanʼ májánʼ náa tsu̱du̱u̱ ku̱ba̱ʼ.

4, 5. a) Ndiéjunʼ nirígá náa mekhuíí nguátha mbiʼi nda̱wa̱á rí Jesús nigíʼdu̱u̱ niʼtáñajunʼ rá. b) Xó má eʼthí náa Revelación 12:12, ndiéjunʼ nirígá nda̱wa̱á rí ninújngoo guerra mekhuíí rá.

⁴ Náa capítulo rí ninújngoo niʼthí rí Jesús nigíʼdu̱u̱ niʼtáñajunʼ xóo Rey náa mekhuíí nákha tsiguʼ 1914 (atraxnuu Daniel 7:13, 14). Ikhaa nigíʼdu̱u̱ niñajunʼ má tsiguʼ rúʼko̱. Náa Biblia naʼthí: “Nirígá mbá guerra mekhuíí: Miguel [i̱mba̱ mbiʼyuu Jesús] gajmíi̱n ángeles ndrígóo nixmijná gajmiún xujkhú wéñiʼ [Satanás], ga̱jma̱a̱ xúʼko̱ má xujkhú wéñiʼ gajmíi̱n ángeles ndrígóo nixmijná”. * Gixa̱a̱ gajmíi̱n ángeles ndrígóo bi̱ ra̱míjínʼ, táʼngu̱u̱n náa guerra ga̱jma̱a̱ nixkriguíin náa tsu̱du̱u̱ Ku̱ba̱ʼ. Ángeles bi̱ nuni rí jmbu nikuwa gagi numuu rí Satanás gajmíi̱n xa̱bu̱ wéñiʼ ní xákuwa náa mekhuíí. Mú xa̱bu̱ xákuwa gagi wéñuʼ. Náa Biblia niʼtáriyaʼ rígi̱: “¡Phú migíníi bi̱ kuwa náa numbaaʼ [...]!, numuu rí Gixa̱a̱ nigajtaa náa ikháanʼla, ikhaa nakiʼnáa wéñuʼ, numuu rí ndaʼyoo rí na̱jkha̱ ratumuu mbiʼi rí nikhánúu maxtáa” (Revelación [Apocalipsis] 12:7, 9, 12).

⁵ Atayáá dí nirígá nda̱wa̱á rí ninújngoo guerra mekhuíí: Gixa̱a̱ makiʼnáa wéñuʼ ga̱jma̱a̱ maʼni rí xa̱bu̱ makuwa mingíjyúuʼ náa tsu̱du̱u̱ Ku̱ba̱ʼ. Xó má gúʼyáá, rí xúgi̱ kuwáanʼ mbiʼi mingíjyúuʼ rúʼko̱. Mú rígi̱ xájyúuʼ mba̱yu̱ʼ, numuu “rí na̱jkha̱ ratumuu mbiʼi rí nikhánúu maxtáa”, ga̱jma̱a̱ asndu Satanás ndaʼyoo rígi̱. Náa Biblia naxná mbiʼyuu “iwáá mbiʼi” (2 Timoteo 3:1). ¡Ra̱ʼkhá tháán kuwáanʼ gagi numuu rí Dios maʼni gámbáa xúgíʼ dí ra̱májánʼ rí xtáa raʼni Gixa̱a̱ náa  tsu̱du̱u̱ Ku̱ba̱ʼ! Guʼyáá tikhuu rí niʼtáriyaʼ náa Biblia marigá ga̱jma̱a̱ xtáa rambánuu rí mbiʼi xúgi̱. Rígi̱ nasngájma rí kuwáanʼ iwáá mbiʼi ga̱jma̱a̱ nacha̱ má Reino ndrígóo Dios maʼni tsajkurámiinʼ wéñuʼ xa̱bu̱ bi̱ nandún kuyáá Jeobá. Timbá, guʼyáá a̱jkhu̱ seña rí niʼthí Jesús marigá rí mbiʼi xúgi̱.

6, 7. Xú káʼnii xtáa rambánuu rí mbiʼi xúgi̱ ajngáa rí niʼthí Jesús ga̱jma̱a̱ numuu mbaʼa guerra ma̱ngaa rí ma̱mbá ganitsu rá.

⁶ “Numu ri matuxu mba numba masañuʼ gajma imba numba, xuʼkue-ma matuxu mba xuajin ri mba masañuʼ gajma imba xuajin ri mba.” (Mateo 24:7.) Mbá ciento tsiguʼ rí ndiʼkhún ninújngoo nikháñun mbaʼin wéñuʼ xa̱bu̱ ga̱jma̱a̱ numuu guerra. Mbáa xa̱bu̱ bi̱ nixtáa náa xuajen Gran Bretaña niʼnirámáʼ dí nirígá nákha wajyúúʼ: “Nákha mbá ciento tsiguʼ rí ninújngoo niradimijna mixkawiʼ wéñuʼ xa̱bu̱. [...] Ninindxu̱u̱ mbá siglo rí nirígá nángi eʼni guerra, mú náa tikhuu xuajen tárígá wéñuʼ guerra”. Mbá informe rí nixná organización bi̱ naʼnigajmaa̱ dí narígá náa tsu̱du̱u̱ numbaaʼ niʼthí: “Náa guerra [dí nirígá nákha mbá ciento tsiguʼ] nikháñun itháan mbaʼin wéñuʼ xa̱bu̱ ki xóo náa i̱ʼwáʼ guerra rí nirígá asndu nákha 100 tsiguʼ nda̱wa̱á rí nixtáa Cristo asndu tsiguʼ 1899”. Itháan  rí 100 millón xa̱bu̱ nikháñun ga̱jma̱a̱ numuu guerra rígi̱ asndu nákha tsiguʼ 1914. Ikha jngó, náa guerra niniñúúnʼ mbaʼin wéñuʼ xa̱bu̱ bi̱ nikháñun a̱ngiu̱ún. Mbá asndu ikháánʼ nitagíʼnii gaʼkhu rúʼko̱.

⁷ “Maʼka ihui.” (Mateo 24:7.) Xa̱bu̱ bi̱ nduyáá dí narígá nuthi rí 30 tsiguʼ rí ninújngoo nidu wéñuʼ ganitsu. Mú, narígá má xúʼko̱ ewiʼ numuu rí mbaʼin xa̱bu̱ na̱nguá guáʼdáá ku̱ba̱ʼ náa mudu rí mu̱phu̱ ga̱jma̱a̱ na̱nguá guáʼdáá mbújkha̱a̱ mu mutsi rí mu̱phu̱. Mbaʼin wéñuʼ xa̱bu̱ niguáʼdáá ewiʼ asndu nákha majkhinʼ. Organización Mundial de la Salud nasngájma rí itháan rí witsu millones e̱ji̱n ekháñun mámbá tsiguʼ numuu rí na̱nguá piʼtsu.

8, 9. Xú káʼnii nimbánuu rí niʼtáriyaʼ Jesús ga̱jma̱a̱ numuu gaʼxma, ga̱jma̱a̱ numuu nandii rá.

⁸ “Triga naʼ ri mapu-gake maxma.” (Lucas 21:11.) Xa̱bu̱ bi̱ nunigajmaa dí narígá náa numbaaʼ nithi rí mámbá tsiguʼ nagájnuu mbá awan rí narígá mbá 19 gaʼxma rí gakhi̱i̱ wéñuʼ. Rígi̱ naʼni gachúu guʼwá asndu na̱jkha̱nú naʼni gámbáa ga̱jma̱a̱ narmbáʼtoo ku̱ba̱ʼ. I̱ʼwáʼ i̱yi̱i̱ʼ nasngájma rí gaʼxma nigudíin itháan rí a̱jma̱ millones xa̱bu̱ asndu nákha tsiguʼ 1900. Náa imbo̱o̱ i̱yi̱i̱ʼ naʼthí: “Ajua̱nʼ rí nduyáá ga̱jma̱a̱ gaʼxma naʼni rí makáwíin nguájmi̱i̱n xa̱bu̱”.

 ⁹ “Maʼka [...] nandi.” (Lucas 21:11.) Maski ajndu rígá wéñuʼ thana, xa̱bu̱ guáʼdáá wéñuʼ nandii, xóo dí rígá nákha wajyúúʼ ga̱jma̱a̱ dí ndiʼkhún ejkha̱ rakujmaa. Mbá i̱yi̱i̱ʼ niʼthí, rí tsiguʼ rí ni̱jkha̱ ranújngoo nijmaʼnuʼ mbá 20 nandii dí rígá asndu nákha wajyúúʼ —xó má tuberculosis, paludismo (o malaria) ga̱jma̱a̱ cólera—, ga̱jma̱a̱ i̱ʼwáʼ nandii na̱jkha̱ raʼni itháan mingíjyúuʼ maʼni̱i̱ ga̱jma̱a̱ thana. Ma̱ngaa, nikujmaa mbá 30 nandii rí nuxi̱ʼ. Tikhuu nandii nagudíin xa̱bu̱ ga̱jma̱a̱ asndu xúgi̱ xóó nda̱a̱ thanuu.

10. Ndiéjunʼ rí niʼtáriyaʼ náa 2 Timoteo 3:1-5 xtaa ratayáá ikháánʼ rí kuwa runi xa̱bu̱ rí mbiʼi xúgi̱ rá.

¹⁰ Náa Biblia na̱nguá niʼtáriyaʼ i̱ndó rí marigá náa tsu̱du̱u̱ ku̱ba̱ʼ índo̱ gáʼni iwáá mbiʼi, ma̱ngaa niʼthí rí xa̱bu̱ maʼni mixtiʼkun. Apóstol Pablo niʼtáriyaʼ xú káʼnii gani̱ndxu̱ún xúgínʼ xa̱bu̱. Náa Biblia naʼthí: “Índo̱ gáʼni iwáá mbiʼi maʼni mbiʼi gakhi̱i̱ ga̱jma̱a̱ maʼni mingíjyúuʼ makuwáanʼ” (atraxnuu 2 Timoteo 3:1-5). Pablo niʼthí rígi̱:

• maʼndún kuyamijná i̱ndó ikhiin

• maʼndún maguaʼdáá wéñuʼ mbújkha̱a̱

• xúnimbu̱ún kuñún anu̱ún

•   xákuwa xóo nandoo Dios

• xáʼndun kuñún angiu̱ún

• xájyúuʼ gakiʼníin

• xágáwíínʼ a̱jkiu̱ún índo̱ muñuu dí ra̱májánʼ iʼwíínʼ

• muni i̱ndó rí nanigu̱nʼ ikhiin xúni̱ rí nandoo Dios

• musngajma rí nduyamajkuíí Dios, mú rí kuwa runi nasngájma rí na̱nguá gíʼdoo numuu náa  ikhiin

11. Xó má e̱ʼkha̱ raʼthí náa Salmo 92:7, ndiéjunʼ gugíʼnii xa̱bu̱ bi̱ ra̱míjínʼ rá.

¹¹ Lá xúgi̱ káʼnii ni̱ndxu̱ún xa̱bu̱ bi̱ kuwa náa xuajñanʼ ráʼ. Mbáa xúʼko̱. Náa xúgíʼ tsu̱du̱u̱ ku̱ba̱ʼ kuwa xa̱bu̱ bi̱ nuni xúgi̱ kaʼnii. Rígi̱ nasngájma rí Dios nacha̱ má gáʼkha̱ kayóo rí májánʼ, náa Biblia naʼthí: “Índo̱ xa̱bu̱ xkawiinʼ kuwa rakríʼíin xóo mbá iná, ga̱jma̱a̱ xúgínʼ bi̱ kuwa runi dí ra̱májánʼ ni̱ndxu̱ún asndu xóo mbá ri̱ʼi̱ rí na̱jmi̱di̱ ga̱jma̱a̱ ikhú maguma gámbíin kámuu mbiʼi” (Salmo 92:7).

12, 13. Mbiʼi rígi̱ rí na̱jkha̱nú fin, xú káʼnii ejkha̱ rajoo wéñuʼ “ku̱ma̱ rí gajkhun” rá.

¹² Rígá mbaʼa wéñuʼ gamiéjunʼ índo̱ na̱jkha̱ ratumuu mbiʼi, xó má niʼtáriyaʼ náa Biblia. Mú, náa xa̱bu̱ bi̱ nduyamajkuíí Jeobá narígá tikhuu rí májánʼ.

 ¹³ “Ku̱ma̱ rí gajkhun mba̱jo̱o̱ wéñuʼ”, rígi̱ niʼtáriyaʼ náa libro ndrígóo Daniel. Nguáná gambánuu ajngáa rígi̱ rá. Mambanúu “índo̱ gáʼkha̱nú fin” (Daniel 12:4). Asndu nákha tsiguʼ 1914, Jeobá nimbáñun bi̱ nandún muni ñajunʼ ndrígóo mu maguanu makru̱ʼu̱u̱n itháan májánʼ rí xtáa raʼsngáa náa Biblia rí gíʼdoo wéñuʼ numuu. Ikhiin niguánu nijmañún rí gajkhun ga̱jma̱a̱ numuu Dios ga̱jma̱a̱ rí eyoo maʼni, rí nixnáximinaʼ makhañúu Jesucristo, ga̱jma̱a̱ xú káʼnii kúwi̱i̱n xa̱bu̱ bi̱ nikháñun ma̱ngaa xú káʼnii ikhiin maguanu matuxi̱ín. Xa̱bi̱i̱ ndrígóo Jeobá nijmañún makuwa májánʼ ga̱jma̱a̱ rígi̱ ndaʼyamajkhuu Jeobá. Ma̱ngaa nijmañún itháan májánʼ ndiéjunʼ nindxu̱u̱ Reino ndrígóo Dios ga̱jma̱a̱ xú káʼnii gáʼnimbánuu xkujndu dí rígá náa tsu̱du̱u̱ Ku̱ba̱ʼ. Ndiéjunʼ ene ga̱jma̱a̱ ku̱ma̱ rúʼko̱ xá. Graxe̱ rígi̱ na̱jkha̱ kaguáanʼ náa i̱mba̱ rí kiʼtáriyaʼ rí xtáa rambánuu rí mbiʼi xúgi̱.

14. Asndu náa kuwa rutaraʼa ajngáa rí májánʼ ndrígóo Reino, ga̱jma̱a̱ tsíin ene ñajunʼ rígi̱ rá.

¹⁴ “Jame miʼtaraʼa apa ajnga ri majan nuxiʼ”, rígi̱ rí niʼtáriyaʼ Jesucristo ‹índo̱ gámbá xúgíʼ dí xtáa rarígá náa numbaaʼ› (atraxnuu Mateo 24:3, 14). Náa xúgíʼ tsu̱du̱u̱ ku̱ba̱ʼ kuwa rutaraʼa ajngáa rí májánʼ ndrígóo Reino, ndiéjunʼ nindxu̱u̱ Reino rúʼko̱, ndiéjunʼ gáʼni ga̱jma̱a̱ xú káʼnii gándoo gúʼni mu mundrígú rí májánʼ wéñuʼ. Ajngáa rí májánʼ rígi̱ najuiʼtaraʼa itháan rí 230 xuajen mba̱ʼu̱ ga̱jma̱a̱ mbaʼa wéñuʼ ajngáa. Ra̱ʼkhá tháán mbaʼin wéñuʼ bi̱ nuni ñajunʼ Jeobá kuwa rutaraʼa ajngáa rí májánʼ ndrígóo Reino. Ikhiin naguwáʼ náa mbaʼa xuajen mba̱ʼu̱, naguwáʼ náa mbaʼa raza, náa xuajen ma̱jkha̱ʼ ga̱jma̱a̱ nuthi mixtiʼkhu ajngáa (Revelación 7:9). Bi̱ nutaraʼa numuu Jeobá tsírumiin xa̱bu̱ bi̱ nandún majmañún ndiéjunʼ rí phú xtáa raʼsngáa náa Biblia. Naʼniulú maguanulú tsiánguá índo̱ nduʼyáá rí xtáa rambánuu rí kiʼtáriyaʼ, itháan índo̱ nduʼyáá rí muraʼni cristianos bi̱ gajkhun índo̱ Jesús niʼthí “maxaxun guyaʼla gajma numu mbiʼyuʼ” (Lucas 21:17).

15. a) Lá tsesngájma xúgíʼ rígi̱ tayáá ikháánʼ rí kuwáanʼ iwáá mbiʼi, ga̱jma̱a̱ náa numuu rá. b) Ndiéjunʼ eyoo gáʼthi ‹fin› náa xa̱bu̱ bi̱ tsíñún gúyáá Jeobá ga̱jma̱a̱ náa xa̱bu̱ bi̱ nunimbu̱ún náa Reino ndrígóo Dios rá.

¹⁵ Numuu rí mbaʼa rí kiʼtáriyaʼ náa Biblia xtáa rambánuu rí mbiʼi xúgi̱, lá tsesngájma xúgíʼ rígi̱ tayáá ikháánʼ rí kuwáanʼ iwáá mbiʼi ráʼ. Ajngáa rí májánʼ miʼtáraʼa asndu índo̱ Jeobá gáʼthi, ga̱jma̱a̱ ikhú ‹gáʼkha̱nú fin› (Mateo 24:14). ‹Fin› nandoo gáʼthi índo̱ gáʼkha̱nú mbiʼi rí Dios maʼni gámbáa dí ra̱májánʼ dí rígá náa tsu̱du̱u̱ Ku̱ba̱ʼ. Jeobá majmiuu Jesús gajmíi̱n ángeles ndrígóo bi̱ guáʼdáá tsiakii mu muni gámbíin xúgínʼ xa̱bu̱ bi̱ tsíñún gúyáá Jeobá (2 Tesalonicenses 1:6-9). Satanás gajmíi̱n xa̱bu̱ wéñiʼ ndrígóo ní xuni nduwiinʼ itháan xa̱bu̱ bi̱ kuwa náa tsu̱du̱u̱ ku̱ba̱ʼ. Nda̱wa̱á rí ninújngoo rígi̱, Reino ndrígóo Dios maʼni tsajkurámiinʼ wéñuʼ xúgínʼ xa̱bu̱ bi̱ gunimbu̱ún náa Xa̱bu̱ Ñajunʼ ndrígóo (Revelación 20:1-3; 21:3-5).

16. Ndiéjunʼ rí itháan májánʼ gíʼmaa matani ikháánʼ rá.

¹⁶ Numuu rí na̱jkha̱ mambáa numbaaʼ ndrígóo Satanás, ikha jngó mámbáa rí ikháánʼ gíʼmaa maraximínáʼ: “Ndiéjunʼ gíʼmaa mani ikhúúnʼ rá.” Itháan májánʼ gáʼni rí majmañaaʼ má xúʼko̱ ga̱jma̱a̱ numuu Jeobá ga̱jma̱a̱ rí ikhaa gíʼthu̱u̱n maʼni mámbáa rí ikháanʼ (Juan 17:3). Atanigajmaa̱ májánʼ wéñuʼ Biblia. Gaguʼwanʼ mi̱dxu̱ʼ náa nagimbúun xa̱bu̱ bi̱ nuni mbá tsiakii muni rí nandoo Jeobá (atraxnuu Hebreos 10:24, 25). Atatsiʼniʼ Jeobá Dios índo̱ matanigajmaa Ajngáa rawunʼ ga̱jma̱a̱ atagíʼ matriʼkuminaʼ rí xú káʼnii maraxtaa mu xúʼko̱ matani rí nanigu̱ʼ ikhaa (Santiago 4:8).

17. Náa numuu rí nimbáa xa̱bu̱ xágiʼthu̱u̱n índo̱ gáʼga̱nú mbiʼi rí maguma gámbíin xa̱bu̱ bi̱ ra̱míjínʼ rá.

¹⁷ Jesús niʼthí rí mbaʼin xa̱bu̱ xáʼndun gúnimbu̱u̱n rí na̱jkha̱ ratumuu mbiʼi. Rí maguma gámbíin xa̱bu̱ bi̱ ra̱míjínʼ ma̱ʼkha̱ nacha̱ wéñuʼ, maʼni mbá mbiʼi rí na̱nguá gíʼthu̱u̱n nimbáa xa̱bu̱, xó má eʼni mbáa xa̱bu̱ bi̱ nato̱ʼo̱o̱ gáʼni kúwáʼ mbruʼun (atraxnuu 1 Tesalonicenses 5:2). Jesús niʼthí: “Indo xo neʼne mbiʼi ri nixta Noé, xkuaʼni gaʼne mbiʼi ri maʼka  Ade Xabo. Numu ri xo neʼne mbiʼi ri naki ri maxnu mendaʼko ruʼhua ri napeʼtso xabo, jame naʼhuan iya, nunigüinʼ jame nuxnatsigunmijne, asjndo mbiʼi ri nitoʼo Noé naʼ aun arca. Tafruʼun asjndo naʼ nixnu mendaʼko ruʼhua, nika jagun mba xuguinʼ. Xkuaʼni gaʼne ri maʼka Ade Xabo manga” (Mateo 24:37-39).

18. Ndiéjunʼ niʼthí Jesús rí gíʼmaa muʼnimbulúʼ rá.

¹⁸ Ikha jngó, Jesús niʼthí: “Guñahuamijna-ma ikanʼla, maxundxaʼhuamijnala ri indo mapeʼtso-güeñaʼla, jame muhuanla iya majnganʼla, ni maxuxnamijnala gaʼko gajma numu ri riga naʼ tsudu numba rigueʼ, an raʼka mba nacha gaganu mbiʼi ruʼkue jangahuanʼla. Numu ri asjndo xo eʼne mba tsaʼkan gaʼne rido maganu mbiʼi ruʼkue naʼ juhua mba xuguinʼ xabo tsi juhua naʼ tsudu numba. Maxunuʼla, jamba miʼtsu gunila tsakun. Ikajngo mbiʼya ri jaʼyala majahuiñaʼla naʼ inu mba xugui ri maʼka, ikajngo mahuajun gukuaʼla naʼ inu Ade Xabo” (Lucas 21:34-36). Gíʼmaa muʼnimbulúʼ ajngáa rí niʼthí Jesús. Náa numuu rá. Numuu rí xa̱bu̱ bi̱ naʼni a̱jkiu̱u̱n kaʼñúún Jeobá Dios ga̱jma̱a̱ xúʼko̱ má “Ade Xabo”, Jesucristo, ma̱ndoo makáwíin índo̱ gámbáa numbaaʼ ndrígóo Satanás. Ga̱jma̱a̱ ma̱ndoo makuwá kámuu mbiʼi náa numbaaʼ nuxi̱ʼ rí wíji̱ ma̱ʼkha̱nú nacha̱ (Juan 3:16; 2 Pedro 3:13).