1. Inogne ty mirehake amantikagne miomba ty hoavy?

NAHO fa nitsanogne vaovao an-dradio ndra telé rehe, va’e hanao tihoe tie: ‘Hanao akore ty hiafarà ty tontolo toy?’ Tsy misy ndaty magnampò ty loza hiseho fa sambe tsy misy mahafantatse ty raha hisy hamaray. (Jakoba 4:14) Faie mahafantatse ty hoavy ty Jehovah. (Isaia 46:10) Fa ela bey ty nisaontsia’e agnate Baiboly ao ty raha raty hiseho amy hinane zao. Nisaontsie’e ka fa hisy raha fanjaka hiseho.

2, 3. Inogne ty raha nagnontenea i mpiana i Jesosy rey aze, le akore ty navale’e iareo?

² Nirehake miomba ty Fanjakàn’Andrianagnahare ty Jesosy Kirisity. O Fanjakagne iohoe ty hagnafake o haratiagneo naho hagnova ty tane toy ho paradisa. (Lioka 4:43) Nagniry hahafantatse ty andro hiavia o Fanjakagne iohoe o ndatio. Nagnontane i Jesosy i mpiana’e rey tie: “Inogne ka ty ho famantara ty fiavi’o naho ty amy ze o fifaragna ty tontolo toy zao?” (Matio 24:3) Namale ty Jesosy fa i Jehovah raike avao ty mahafantatse ty hifaragna ty tontolo i Satana toy. (Matio 24:36) Faie nirehafe i Jesosy hey ty raha  hiseho an-tane etoy, aloha ty hindesa i Fanjakagney filaminagne naho fiadanagne hoahy o ndatio. Avy eo iaby hinane zao ze raha nirehafe i Jesosy!

³ Hodinehentikagne ty raha magnamaregne tie ho tapetse vata’e “ty tontolo toy.” Faie andao hey handineke ty aly raike tsy trea maso. Tan-dagnitse agne ty nisehoa’e faie misy voka’e amantikagne.

4, 5. a) Inogne ty raha niseho tan-dagnitse agne tafara ty naha Mpanjaka i Jesosy? b) Inogne ty voka ty aly rehafe ty Apokalypsy 12:12?

⁴ Nihazavaegne tamy ty toko taloha itoy fa natao Mpanjaka an-dagnitse agne ty Jesosy Kirisity tamy ty taogne 1914. (Vakio Daniela 7:13, 14.) Nisy raha nanoe’e tafara izay. “Nisy hotakotake ... ty tan-dagnitse agne” hoe ty Baiboly. “I Mikaela [ndra Jesosy] naho o anjeli’eo nifandrapake tamy i dragogney [Satana Devoly], le nialy ka i dragogney vaho o anjeli’eo.” * Nirese ty Satana vaho o anjely raty atao tihoe demoniao, le navokovoko an-tane etoy. Fale ze anjely tsy nivalike taman’Andrianagnahare fa niroahegne boake an-dagnitse agne ty Satana naho o demonia’eo. Faie tsy fale o ndatio kanao mirehake ty Baiboly tie: “Loza hoahy i taney ... fa nizotso ama’areo agne ty Devoly sady boseke, fa fanta’e fa fohe ty fotoagne anagna’e.”—Apokalypsy 12:7, 9, 12.

⁵ Inogne ty ho voka o aly tan-dagnitse agne iohoe? Boseke ty Satana, le hinday loza an-tane etoy. Ho treantikagne fa feno loza vata’e ty fiaignantikagne amy hinane zao. Faie tsy haharetse zay. Ndra i Satana ka mahafantatse izay. ‘Andro fara’e’ ty anognona ty Baiboly o andro iohoe. (2 Timoty 3:1) Fale tikagne fa tsy hengàn’Andrianagnahare hanankery amantikagne etoy sasa ty Devoly! Andao areke  tikagne handineke ty raha ila’e miseho amy izao, fa nirehafe ty Baiboly miaolo. Izay ty ahafantaragne fa andro fara’e o andro iaignantikagne zao sady fa kidikidy ty sisa, le hinday fitahiagne hoahy ze ndaty tea aze i Fanjakàn’Andrianagnaharey. Handineke famantaragne efatse nirehafe i Jesosy fa hampiambake o andro iaignantikagne zao tikagne.

6, 7. Inogne ty magnamaregne fa avy amo o andro hinane zao ty raha nirehafe i Jesosy miomba ty aly naho ty keré?

⁶ “Hisy firenena haname aly amy ty firenena, hisy ka fanjakagne haname aly amy ty fanjakagne ila’e.” (Matio 24:7) Ndaty an-tapetrisa’e ty nimate tamy ty aly tagnate ty zato taogne fa nilasagne. Izao ty raha nirehafe ty ndaty mpahay tantara raike: “Ty taogne 1900 mbetoagne ro nahatreavagne vonoagne ndaty maro hatrake amy izay. ... Tsy mba nisy fijanogna’e i alỳ tamo o taogne iohoe. Andro tsy ampe avao ty tsy nialia ty faritse ila’e.” Natalily ty Fikambanagne Mpandineke ty Tontolo toy, fa “ty isa ty ndaty mate tamy ty aly tagnate [ty taogne 1900], magnafara mbetoagne, le miheregne in-telo tamy ty isa ty ndaty nimate tamy ty aly tamy ty andro i Jesosy hatrake tamy ty taogne 1899.”  Ndaty losotse ty 100 tapetrisa ty mate tamy ty aly nanomboke tamy ty taogne 1914. Ndaty an-tapetrisa’e ty ore naho mijale fa nimate tamy i alỳ ty longo’e sady va’e fa namoe ty longo’o hoe izay ka varagne rehe.

⁷ “Hisy keré.” (Matio 24:7) Nisy ndaty mpikaroke nirehake fa nitombo bey ty hanegne tagnate ty 30 taogne nilasagne. Faie mbe misy avao ty keré, fa maro ty ndaty tsy managne drala hiviliagne hanegne sady tsy managne tane hamboleagne. Amy ty tane vaho mivoatse, agnarivo tapetrisa’e ty ndaty mandrambe karama tsy ampe. Ty maro ama’e tsy managne hanegne ho hane’e. Mirehake ty Fikambanagne Iharoam-pirenena Miomba ty Fahasalamagne fa ajaja losotse ty dime tapetrisa ty mate isan-taogne fa tsy soa fihinagne.

8, 9. Inogne ty magnamaregne fa niavy eo ty raha nitokie i Jesosy miomba ty ezegnezen-tane naho ty aretegne manjamagne?

⁸ “Hisy ezegnezen-tane fatratse.” (Lioka 21:11) Mirehake ty ndaty mpahay siansa fa misy ezegnezen-tane lahibey 19 isan-taogne manimba tragno naho mampikoromake tane. Misy ezegnezen-tane fatratse ka isan-taogne mandrotsake tragno. Misy mitalily fa nahafate ndaty losotse ty roe tapetrisa ty ezegnezen-tane nanomboke tamy ty taogne 1900. Hoe ty boke raike: “Tsy mba nampihegne ty isa ty ndaty  mate tamy ty ezegnezen-tane ty fisia o varam-bazahao.”

⁹ “Aretegne manjamagne.” (Lioka 21:11) Le mbe manjamagne ndaty maro ty aretegne fa taolo, naho ty aretegne vaovao ndra tie fa mivoatse ty fahaian-draha o dokoterao. Misy mitalily fa aretegne 20 ty fa fantatse soa. Agnate izay ty berikilozy, ty tazogne naho ty kolerà. Mihasarotse ka ty mitsabo ty aretegne ila’e amy ty fagnafoly. Aretegne vaovao 30 fara fahatsiampe’e ty vaho miseho sady mbe tsy nahatreavagne fagnafoly ty ila’e ama’e sady mahafate.

10. Ty aia amy ty toetoetse rehafe ty 2 Timoty 3:1-5 ty misy amy hinane zao?

¹⁰ Fa nirehafe ty Baiboly miaolo ka fa hiova ty toetoe o ndatio amy ty andro fara’e. Nirehafe i apositoly Paoly ty raha hatao ty ankamaroa ty ndaty amy ty andro fara’e. Mirehake amantikagne ty Baiboly tie: “Fantaro soa fa hifanandrife amy i andro fara’ey ty faloviloviagne.” (Vakio 2 Timoty 3:1-5.) Izao ty nirehafe i Paoly fa hatao o ndatio:

• tea ty vata’e

• tea drala

• manjehatse an-drae’e aman-drene’e

• tsy megnatse mivalike

• tsy tea ty saveregna’e

• tsy mahazitse vatagne

• lako siake

• tea raha mahafalefale fa tsy tea an’Andrianagnahare

• manao mpivavake faie tsy trea amy ty raha atao’e ty maha mpivavake aze

11. Inogne ty rehafe ty Salamo 92:7 fa hanjò ty ndaty raty fagnahy?

 ¹¹ Manahake izay vao ty ndaty amy ty faritse misy azo? Tsy kandrahaegne fa misy vata’e zay. Sambe ahatreavagne o ndaty raty toetse rehoe iaby ty tane toy. Ty dika izay fa marine hanao raha ty Andrianagnahare. Hoe ty Baiboly: “Naho fa manahake ty fitiry o akatao, ty ndaty raty fagnahy sady mihamaro o mpanao ratio, le izay ty magnamaregne fa lelia’e ho mate iareo.”—Salamo 92:7.

12, 13. Akore ty ahafantaragne fa mitombo “ty fahafantaragne” ty maregne amo o ‘andro fara’e’ zao?

¹² Maregne vata’e ty raha rehafe ty Baiboly tie ho feno loza ty andro fara’e. Faie misy raha fanjaka miseho ty amy ty mpanompo i Jehovah ndra tie feno raha manahiragne ty tontolo toy.

 ¹³ “Hitombo ty fahafantaragne” ty maregne, fa izay ty nirehafegne miaolo amy ty boke i Daniela. Ombia ty hisehoa izay? Amy ty ‘andro fara’e.’ (Daniela 12:4) Nagnampe ty ndaty magniry hanompo aze mba hahafantatse soa ty Baiboly ty Jehovah nanomboke tamy ty taogne 1914. Nitombo ty fahafantara iareo miomba ty tahinan’Andrianagnahare naho ty safiri’e, ty solovoigne nanoe i Jesosy Kirisity, ty mate naho ty famelomagne ty ndaty mate. Nianara iareo tie fiaignagne manao akore ty mahasoa naho ty magnomey voninahitse i Jehovah. Nihay iareo soa ka tie inogne ty raha hanoe ty Fanjakàn’Andrianagnahare sady akore ty hagnafaha’e ty raha mahaore an-tane etoy. Hatao iareo akore o raha fanjaka naho maregne fanta iareo rehoe? Mba hamaleagne izay, le handineke ty raha raike nitokiegne niavy eo amo o andro fara’e zao tikagne.

14. Aia iaby ty agnambaragne ty talily soa i Fanjakagney amy hinane zao, le ia ty magnambara aze?

¹⁴ “Ho tseizegne mbeombeo amy ty tane toy ty talily soa i Fanjakagney”, hoe ty Jesosy Kirisity naho fa nitoky miomba “ty fifaragna ty tontolo toy.” (Vakio Matio 24:3, 14.) Ambara amy ty tane losotse ty 239 naho amy ty firehake anjato’e maro ty talily soa i Fanjakagney. Hazavaegne amo o ndatio tie inogne ty atao tihoe Fanjakagne, inogne ty raha hatao’e sady akore ty ahazoantikagne ty fitahiagne indese’e. Mazoto magnambara o talily soa iohoe ty Vavaolombelo i Jehovah an-tapetrisa’e boake amy ze “kila tane naho foko naho ty ndaty sambe managne ty fireha’e.” (Apokalypsy 7:9) Mampianatse ndaty an-tapetrisa’e iareo faie tsy andoan-drala fa ze te hahafantatse ty raha ampianare ty Baiboly ro ampianaregne. Mahaveregne ty raha hoe izay, naho henteagne ty fiavy ty raha nitokie i Jesosy manao tihoe tie “ho heje ze kila ndaty” ze Kirisitianagne vata’e!—Lioka 21:17.

15. a) Mino vao rehe fa andro fara’e zao, inogne ty anto’e? b) Hatao akore ze ndaty mandietse i Jehovah naho fa “ho avy ty fara’e”, le ho meagne inogne ze magneke ty fitondrà’e?

¹⁵ Maro ty raha nitokie ty Baiboly fa niavy eo amy hinane zao. Tsy magneke vao rehe fa miaigne amy ty andro fara’e tikagne hinane zao? Magneke tikagne fa “ho avy ty fara’e” naho fa vita amy ze zoton’arofo i Jehovah ty fagnambaragne i talily soay. (Matio 24:14) ‘O fara’e’ zao ty andro hagnafaha i Jehovah ze raha raty an-tane etoy. I Jesosy naho ty anjely mahery ro hampiasae i Jehovah hamono ze ndaty misatry raha mandietse aze. (2 Tesalonianina 1:6-9) Tsy hamitake o ndatio sasa ty Satana naho o demonia’e reo. Afara izay ty Fanjakàn’Andrianagnahare vaho hinday fitahiagne maro ho ahy ze ndaty magneke ty fitondrà’e.—Apokalypsy 20:1-3; 21:3-5.

16. Inogne ty raha toko’e hatao’o?

¹⁶ Fa marine ho tapetse ty tontolo i Satana toy, le toko’e hieretseretse tikagne tie: ‘Inogne ty raha toko’e hataoko?’ Toko’e hikezake mafe hianatse ty miomba i Jehovah naho ze raha andilia’e tikagne. (Jaona 17:3) Ianaro soa ty Baiboly. Anò fahazaragne ty miharo amy ty ndaty mikezake manao ze zoton’arofo i Jehovah. (Vakio Hebreo 10:24, 25.) Mikezaha hahafantatse i Jehovah naho fa mianatse ty Saontsi’e sady ovao hifanandrife amy ze raha andilia’e ty fiaigna’o hagnomeagne voninahitse aze.—Jakoba 4:8.

17. Nagnino ty hamonoagne ty ndaty raty fagnahy ro ho tampoke?

¹⁷ Fa nirehake ty Jesosy fa tsy ho darea ty ankamaroa ty ndaty ty famantaragne tie fa miaigne amy ty andro fara’e tikagne. Ho tampoke ty hamonoagne ty ndaty raty fagnahy. Tsy hagnampò raha o ndatio fa hanahake ty mpangalatse avy halegne ty hiavia izay. (Vakio 1 Tesalonianina 5:2.) Fa nampitao ty Jesosy tie: “Ho hambagne tamy ty andro faha i Noa ty ho fiavia i Ana o ndatỳ. Fa tamy tie mbe tsy niavy i Ranobey tamy ze i andro zay, le nitondrem-pihinagne  naho nigòke ty finogne, nagnengavao naho nengàm-bao ty o ndaty, hatrake amy ty andro niziliha i Noa tamy i sambobeỳ ao. Tsy nidare iareo amparake ty niavia i Ranobey namaoke iareo iabỳ. Le ho hambagne amy izay ka ty ho fiavia i Ana o ndatỳ.”—Matio 24:37-39.

18. Inogne ty fampitaoagne nirehafe i Jesosy toko’e horihentikagne?

¹⁸ Izay ty nahavy i Jesosy nampitao ze nitsanogne aze tie: “Le ampitaò ty fo’areo tsy himokora ty fihinagne losotse naho ty figenohan-toake vaho ty hatondregnagne amo o fiaignagne zao, tsy mone vaho tsy hagnampò ty hiavia i andro zay, fa ho tampoke manahake o fandrikeo. Fa handrambagne ze kila o ndaty ambone tane etoy anio zay. Le mitaoa avao, sady mihalalia lognandro soa tie hivotsora’areo amy ze hene raha hoavy zay, le hahafiatrefa’areo i Ana o ndatỳ.” (Lioka 21:34-36) Mahilala tikagne naho magnorike o raha nirehafe i Jesosy rehoe. Inogne ty anto’e? Ho voarombake ze ndaty teà i Jehovah Andrianagnahare naho “i Ana o ndatỳ”, ndra i Jesosy Kirisity, naho fa ho rava’e ty tontolo i Satana. Ho velogne nainai’e amy i tontolo vaovao fanjaka fa mariney ao ka iareo!—Jaona 3:16; 2 Petera 3:13.