SHemppuwaa Uddufuna

Nuuni Deˈiyoy ‘Wurssetta Gallassaanee’?

Geeshsha Maxaafan kaseti odettida, nu wodiyan polettidabati aybee?

Xoossaa Qaalay ‘wurssetta gallassan’ deˈiya asay ay mala gidanaagaa yootii?

Geeshsha Maxaafay ‘wurssetta gallassaa’ xeelliyaagan ayba minttettiyaabati deˈanaagaa yootii?

1. Sinttanaabaa aybippe erana danddayiyoo?

ERAADOONIYAN woy televizhiiniyan odiyoobaa siyada ‘ha alamiyau wurssettay ayba gidanee?’ gaada neeni garametta eray? Qoppennan daafabi gakkiyo gishshau, ooninne wontto hananabaa kasetidi qoppana danddayenna. (Yaaqooba 4:14) Gidoppe attin, sinttanau aybi hananaakko Yihooway erees. (Isiyaasa 46:10) A Qaalay, Geeshsha Maxaafay daro wodiyaappe kase, nu wodiyan polettiya iitabatubaa xalla gidennan, mata wode polettana ufayssiyaabatubaakka kasetidi yootiis.

2, 3. Yesuusi erissiyo ashkkarati a ay oychchidonaa? I waatidi zaaruwaa immidee?

² Yesuus Kiristtoosi, iitatettaa xayssidi saˈaa gannate oottiya, Xoossaa Kawotettaabaa yootiis. (Luqaasa 4:43) He Kawotettay yaana wodiyaa asay erana koyiis. Ubba Yesuusi erissiyo ashkkarati: “Ne yuussaayyoonne wodiyaa wurssettaayyo malaatai aiba gidanee?” yaagidi a oychchidosona. (Maatiyoosa 24:3) Yesuusi etau zaariiddi, wodiyaa wurssettaa yuussau keerettida gallassaa Xoossaa Yihoowappe hari ooninne erennaagaa yootiis. (Maatiyoosa 24:36) Gidikkonne, he Kawotettay asaa naatussi sarotettaanne woppaa ehaanaappe kasetidi saˈan hananabaa Yesuusi  yootiis. I yootidobay ha wodiyan polettiiddi deˈees!

³ Nuuni ‘wodiyaa wurssettan’ deˈiyoogau naqaasha gidiyaabaa beˈanaappe kasetidi, ayba asinne beˈibeenna issi olaabaa ane qanttan beˈoos. Hegee hanidoy asau beettenna ayyaana alamiyaana; he olay ehiyoobay nuna bochchiyaaba gidiis.

SALUWAN DENDDIDA OLAA

4, 5. (a) Yesuusi Kawo gidosaara saluwan hanidabi aybee? (b)  Ajjuutaa 12:12y bessiyoogaadan, saluwan denddida olay kaalettanabay aybee?

⁴ Ha maxaafan aadhdhida shemppuwan, Yesuus Kiristtoosi 1914n saluwan Kawo gididoogee qoncciis. (Daaneeal 7:13, 14) Yesuusi Kawo gidosaara tangguwaa ekkiis. Geeshsha Maxaafay: “Saluwan olai denddiis. Mikaa7⁠eeli [Yesuusau hara sunttaa] ba kiitanchchatuura issippe miimminttiyaara [Seexaanaa Dabloosara] olettiis; miimmintteekka ba kiitanchchatuura gididi, zaarettidi olettiis” yaagees. * Seexaanaynne a iita kiitanchchati, daydanttati, olan xoonettidi saluwaappe saˈaa olettidosona. Seexaanaynne a iita kiitanchchati olettidoogan, Xoossaassi ammanettida kiitanchchati ufayttidosona. Gidikkonne, asaa naati hegaadan ufayttokkona. Hegaappe dumma ogiyan, Geeshsha Maxaafaa hiraagay: ‘SHin saˈau . . . aayyeˈana! Aissi giikko, xalahe halaqai baayyo guutta wodee attidoogaa eriyo gishshau, wolqqaama hanqquwaara duge inttekko wodhdhiis’ yaagees.—Ajjuutaa 12:7, 9, 12.

⁵ Saluwan denddida olay ay kaalettanaakko ane qoppa. Seexaanay ba hanqquwan saˈan deˈiyaageetu bolli aayyeˈana giissiyaabaa woy metuwaa ehaana. Neeni beˈanaagaadan, nuuni haˈˈi he metuwaa wodiyan deˈoos. SHin hegee takkana wodee qantta woykko ‘guutta.’ Seexaanaykka hegaa erees. Geeshsha Maxaafay he wodiyaa ‘wurssetta gallassaa’ yaagees. (2 Ximootiyoosa 3:1) Xoossay mata wode Dabloosi saˈaa bolli gattido qohuwaa xayssin ayba ufayttanddonii! Geeshsha Maxaafan kaseti  odettida, ha wodiyan polettiiddi deˈiyaabatuppe amaridaageeta ane beˈoos. Hageeti, nuuni wurssetta gallassan deˈiyoogaanne Xoossaa Kawotettay Yihoowa siiqiyaageetussi merinaa anjjuwaa ehaanaagaa boxooxissoosona. Koyro ane Yesuusi yootido, nuuni deˈiyo wodiyaa malaatiyaabatuppe oyddata beˈoos.

WURSSETTA GALLASSAN HANANA WAANNABATA

6, 7. Olaanne koshaa xeelliyaagan Yesuusi yootidobay ha wodiyan waanidi polettidee?

⁶ “Issi biittaa asai hara biittaa asaara olettana; qassi issi kawotettai hara kawotettaara olettana.” (Maatiyoosa 24:7) Aadhdhida xeetu layttatun miilooniyan qoodettiya asay olan hayqqiis. Issi Birttaaniyaa biitta asa gidida, taarikiyaa eranchchay: “Xaafettida taarikiyan 20⁠tta xeetu layttati awudeegaappenne aadhdhidi daro sutti gukkido wode. . . . Ha xeetu layttati, citan citan gidi olaa miishshaa oyqqidi olettiyo olay amarida heeran qantta wodiyaassi zarbbidoy baynnaakko, mule oli xayibeenna wode geetettana danddayoosona” yaagiis. Alamiyan hanettiyaabaa kaalliya dirijjitee kessido iripporttee: “Olay 20⁠tta xeetu layttatun worido asaa qooday, K.Y.S. koyro xeetu layttaappe biidi 1899 gakkanaashin olan hayqqidaageetu qoodaappe heezzu kushe darees” yaagiis. Olaa gaasuwan 1914⁠ppe haa simmin hayqqida asay 100⁠u  miilooniyaappe daro. Nuuni issi asi olan hayqqin gakkiya azzanuwaa beˈidaba gidikkonne, daro miilooniyan qoodettiya asaa gakkida hegaa mala azzanoy ay keenakko qoppanaukka wayssiyaaba.

⁷ ‘Koshay . . . deˈana.’ (Maatiyoosa 24:7) Ikkonomiyaa hanotaa pilggiyaageeti, aadhdhida 30⁠u layttan kattaa murutay keehippe gujjidoogaa yootoosona. Gidikkonne, daro asaayyo kattaa shammanau gidiya miishshay woykko zeriyo gadee baynna gishshau, koshay haˈˈikka gakkiyoogaa aggibeenna. Dichchaa bolli deˈiya biittatun, biilooniyaappe dariya asay galla galla demmiyo miishshay tammu bira heera woy hegaappe guutta. Hageetuppe daroti koshan kabbattidaageeta. Alamiyaa Payyatettaa Dirijjitee, ichchashu miilooniyaappe dariya naati layttan layttan hayqqiyoogaayyo waanna gaasoy kabbashaa giidi malees.

8, 9. Yesuusi yootido biittaa qaattaaranne harggiyaara gayttida hiraagati polettiiddi deˈiyoogaa bessiyay aybee?

⁸ “Biittai wolqqappe qaaxxiyoogee . . . yaana.” (Luqaasa 21:11) Biitta Giddo Hanotaa Xannaˈiya Amarkkaa biitta Dirijjitee giidoogaadan, 1990⁠ppe ha simmin deˈiya wode xallan layttan layttan 17 gidiya, gimbbe keetta laaliyaanne biittaa zaˈissiya wolqqaama biitta qaattay denddiis. Qassi layttan layttan issitoo gimbbe keettata muleera laaliyaagaa keena wolqqaama biitta qaatay denddees. Hara  kanee qassi: “Aadhdhida 100⁠u layttatun biittaa qaattay xeetu shaˈatun qoodettiya asaa woriis; tekinolojee giigissidobaykka hayqqiya asaa qoodaa guuttanau oottidobay keehi guutta” yaagiis.

⁹ “Wurssiya harggee yaana.” (Luqaasa 21:11) Akkamuwan asay daro ooratta eraa demmidaba gidikkokka, kase erettida harggeenne ooratta qommo harggee asaa naata wurssiiddi deˈees. Issi iripporttee giidoogaadan, ajaajjiyaa, shekkeeriyaanne kolleeraa gujjin aadhdhida tammaappe dariya layttatun, 20 gidiya daro erettida hargge qommoti ubbasaa gakkidosona; hegeetuppe amarida harggeti asay xaliyaa ekkidikka paxanau metiyaageeta gidiiddi yiidosona. Ubba guuxxiis giishin 30 gidiya ooratta hargge qommoti merettidosona. Hegeetuppe amaridaageeti woriyaageeta; qassi etuppe waanidi paxanaakkokka erettibeenna.

WURSSETTA GALLASSAA ASAA

10. Neeni asaa bolli beˈiyo, 2 Ximootiyoosa 3:1-5n odettida eeshshati awugeetee?

¹⁰ Geeshsha Maxaafay wurssetta gallassan alamiyan hanettana waannabata yootiyoogaa bolli, wurssetta gallassan deˈiya asaa naata xaaxi waaxidi xeelliyo wode, eta dummayiyaabi deˈanaagaakka kasetidi yootiis. Asaa naata xaaxi waaxi xeelliyo wode, eti ay mala gidanaakko kiitettida PHauloosi qonccissiis. “Wurssetta gallassi waissiya wodee yaanaagaa” 2 Ximootiyoosa  3:1-5n nabbabeettees. PHauloosi giidobaa giddon asati

▪ banttana siiqiyaageeta

▪ miishshaa siiqiyaageeta

▪ banttana yelidaageetuyyo azazettennaageeta

▪ geeshshatetti baynnaageeta

▪ siiqoy baynnaageeta

▪ banttana naagennaageeta

▪ kehennaageeta

▪ Xoossaappe aattidi, ufayttiyoobaa dosiyaageeta

▪ nu ammanuwaa bolla doonan ekkidabaa milatana; shin a tumu wolqqaa erikke giyaageeta gidana yaagiyaageeti deˈoosona

11. Mazamure 92:7y iita asata aybi gakkanaagaa qonccissii?

¹¹ Ne heeran deˈiya asay hegaa mala gidennee? gidiyoogee qoncce. Iita eeshshay deˈiyo asay ubbasan deˈees. Geeshsha Maxaafay: “Iitati maataadan diccikkokka, iita oottiya ubbati daayikkokka, eti merinaayyo xayana” yaagiyo gishshau, ha hanotay Xoossay mata wode tangguwaa ekkanaagaa bessees.—Mazamure 92:7.

POLETTANA LOˈˈOBATA!

12, 13. Ha ‘wurssettaa wodiyan’ tumu ‘eray’ waanidi daridee?

¹² Geeshsha Maxaafay kasetidi yootidoogaadan,  wurssetta gallassay tumukka metuwan kumiis. Gidikkonne, ha metoy kumido wodiyan, Yihoowayyo goynniyaageetu giddon loˈˈobi polettiiddi deˈees.

¹³ ‘Eray daranaagaa,’ Geeshsha Maxaafay Daaneela maxaafan kasetidi yootiis. He eray Xoossaabaa tumaa eraa. Hegee hananay awudee? ‘Wurssettaa wodiyaana.’ (Daaneela 12:4) Yihooway 1914⁠ppe ha bagga wodiyan dumma ogiyan, baassi tumuppe haggaazanau koyiyaageeti Geeshsha Maxaafaa loytti akeekanaadan maaddiis. Eti Xoossaa sunttaaranne a halchchuwaara, Yesuusa wozuwaa yarshshuwaara, hayqqida asaa hanootaaranne dendduwaara gayttida alˈˈo tumaa loyttidi akeekidosona. Hegaappekka aattidi, Yihoowayyo goynniyaageeti banttayyo goˈˈa demmiyoonne Xoossaakka bonchchissiyo deˈuwaa waatidi deˈanaakko tamaaridosona. Eti Xoossaa Kawotettaayyo deˈiya aawatettaanne saˈan deˈiyaabaa i giigissana ogiyaa loyttidi akeekidosona. Eti he eran ay oottiyoonaa? He oyshay nuna ha wodiyan polettiiddi deˈiya hara hiraagaa akeekissees.

14. Kawotettaa wonggeliyaa mishiraachchoy ha wodiyan ay keena aahuwan sabbakettidee? Hegaa sabbakiyaageeti oonee?

¹⁴ “Kawotettaa wonggeliyaa mishiraachchoi sa7a ubban odettana.” Yesuusi ‘wodiyaa wurssettaabaa’ yootido hiraagan qommoora deˈiyaagaadan giis. (Maatiyoosa 24:3, 14) Kawotettay aybakko, i ay oottanaakkonne i ehiyo anjjuwaa nuuni waatidi demmanaakko Kawotettaa wonggeliyaa mishiraachchoy saˈa kumettan, 230⁠ppe dariya biittan 400⁠ppe dariya doonan sabbakettiiddi deˈees. Miilooniyan qoodettiya Yihoowa Markkati, Kawotettaa wonggeliyaa mishiraachchuwaa mishettidi sabbakoosona. Eti “zare ubbaappe, qommo ubbaappe, yara ubbaappenne dumma dumma biitta qaala ubbaappe” yiidosona. (Ajjuutaa 7:9) Markkati Geeshsha Maxaafay tamaarissiyoobaa tumuppe erana koyiya miilooniyan qoodettiya asaa, miishsha qanxxissennan eta son Geeshsha Maxaafaa xannaˈissoosona. Yesuusi ubba tumu Kiristtaaneta asay ‘ubbay ixxanaagaa’  yootidaashin, hiraagay hegaadan polettidoogee ayba maalaalissiyaabee!—Luqaasa 21:17.

NEENI AY OOTTUUTEE?

15. (a) Nuuni deˈiyoy wurssetta wodiyaana gidiyoogaa ammanay? Aybissi ammanay? (b) ‘Wurssettay’ Yihoowaara eqettiyaageetu bolli ay ehaanee? Xoossaa Kawotettaa haaruwaayyo haarettiyaageetussi shin?

¹⁵ Geeshsha Maxaafaa keehi daro hiraagay ha wodiyan polettiiddi deˈiyo gishshau, nuuni deˈiyoy wurssetta gallassaana gidiyoogaa maayikkii? Mishiraachchoy Yihooway koyiyoogaa keena sabbakettoogaappe guyyiyan “wurssettai” gakkanaagee attennaba. (Maatiyoosa 24:14) ‘Wurssettaa’ giyoogee, Xoossay saˈaappe iitatettaa xayssana wodiyaa yaagiyoogaa. Yihooway banaara eriiddi eqettiyaageeta ubbaa xayssanau, Yesuusanne wolqqaama kiitanchchata goˈettana. (2 Tasalonqqe 1:6-9) Hegaappe simmin, Seexaanaynne a iita kiitanchchati asaa balettokkona. Hegaappe guyyiyan, Xoossaa Kawotettay ba suure aysuwau haarettiya asaassi anjjuwaa gogissana.—Ajjuutaa 20:1-3; 21:3-5.

16. Neeni ayba eratetta ooso oottana bessii?

¹⁶ Seexaanaa siraataa wurssettay matattido gishshau, ‘taani ay oottana bessii?’ giidi nuna nu huuphe oychchana bessees. Yihoowabaanne i nuuppe koyiyoobaa gujjidi tamaariyoogaa aggennaagee eratetta. (Yohaannisa 17:3) Geeshsha Maxaafaa minnada tamaara. Yihoowa sheniyaa polanau koyiyaageetuura ubbatoo shiiqiyoogaa meeze ootta. (Ibraawe 10:24, 25) Xoossaa Yihooway saˈa ubban deˈiya asay demmanaadan giigissido munaasa eraa tamaara; qassi Xoossan nashettana mala ne deˈuwan oottana koshshiya laamiyaa ootta.—Yaaqooba 4:8.

17. Iita asaa xayoy daro asaa daganttiyaagaa gidanay aybissee?

¹⁷ Yesuusi, nuuni wurssetta gallassan deˈiyoogaa bessiya naqaashaa daro asay sheneho gaanaagaa kasetidi yootiis. Iita asati qoppennaaninne naagennan xayana. Kaysoy qammi yiyoogaadan he gallassay asaa daganttiya hanotan gakkana. (1 Tasalonqqe 5:2) Yesuusi: “Asa Na7aa yuussai, Nohe wode hanidoogaa  mala gidana. Aissi giikko, bashshiya haattaa yuussaappe kase wode, Nohee markkabiyan gelido gallassai gakkanaashin, asai meesinne uyees; qassi, attumaasai machcheesinne maccaasai azinaa gelees. Bashsha haattai yiidi, eta ubbaa efaana gakkanaashin, eti akeekibookkona; taani, Asa Na7ai, yiyo wode, hegaa mala gidana” yaagidi seeriis.—Maatiyoosa 24:37-39.

18. Nuuni xaasayi xeellana bessenna Yesuusa seeray woygiyaagee?

¹⁸ Yaatiyo gishshau, Yesuusi bana ezggiyaageetussi: “SHin muussan, ushshan, mattooninne aqossi hirggiyooban intte wozanai balenna mala, qassi intte qoppennan he gallassai intte bolli yeennaadan, inttena naagite. Aissi giikko, he gallassai sa7a ubban de7⁠iya asa ubbaa piriyaadan oiqqana. Simmi intte he yaanabaa ubbaappe attanaunne ta sinttan Asa Na7aa sinttan, [nashettiyo hanotan] eqqanau danddayana mala, ubba wode Xoossaa woosan minnite” yaagiis. (Luqaasa 21:34-36) Yesuusi giidobata xaasayi xeellennaagee eratetta. Aybissi? Xoossaa Yihoowaaninne “Asa Na7aa,” Yesuus Kiristtoosan nashettiyaageetussi Seexaanaa siraataa xayuwaappe attiyoonne yaanau mati uttida maalaalissiya ooratta alamiyan merinau deˈiyo hidootay deˈiyo gishshataassa!—Yohaannisa 3:16; 2 PHeexiroosa 3:13.

[Tohossa qofaa]

GEESHSHA MAXAAFAY TAMAARISSIYOOBAA

▪ Wurssetta gallassay olan, koshan, biittay qaaxxiyoogaaninne wurssiya harggiyan dummatidi erettees.—Maatiyoosa 24:7; Luqaasa 21:11.

▪ Wurssetta gallassan daroti banttana, miishshaanne ufayttiyoobaa siiqiyaageeta gidana; shin Xoossaa siiqokkona.—2 Ximootiyoosa 3:1-5.

▪ Ha wurssetta gallassan, Kawotettaa wonggeliyaa mishiraachchoy saˈa ubban sabbakettiiddi deˈees.—Maatiyoosa 24:14.

[Oyshaa]

 [Sinttaa 93n diya misiliyaa]

“Kawotettaa wonggeliyaa mishiraachchoi sa7a ubban odettana.”—Maatiyoosa 24:14