1. Karakory ma ahaizantsika raha mbala ho avy?

ASA anao efa navy nitandren̈y vaovao amy radio na amy tele, ke baka io anao nieritreritry: ‘Han̈ano akory eky hiafarany donia ty?’ Tsisy olo mahay raha mbala ho avy, fotony faviany antambo zen̈y matetiky tsy ampoizin̈y. (Jakoba 4:14) Jehovah zaraiky fo mahay raha mbala ho avy. (Isaia 46:10) Baiboly efa nan̈ambara letry ela fa ho hisy raha ratsy hiboaka aminandrantsika. Nambarany koa fa ho hisy raha farany tsara koa tsy ho ela.

2, 3. Ino ma raha nan̈ontaniany pianatra Jesosy? Karakory nivolan̈iny?

² Jesosy Kristy nivolan̈a fa Fanjakan̈any Zan̈ahary han̈adoso raha ratsy jiaby ndreky han̈ano tany ty paradisa. (Lioka 4:43) Maro olo nan̈iry hahay fotoan̈a haviany Fanjakan̈a io. Ndray pianatranany mba nan̈ontany izy karaha ty: “Karakory hahaizanay fan̈atrehanao ndreky hahaizan̈a farany donia ty?” (Matio 24:3) Jesosy nivolan̈a fa Jehovah zaraiky fo mahay andra haviany farany doniany Satana ty. (Matio 24:36) Nambarany iro koa raha ho hisy ambony tany eto alohany Fanjakan̈any Zan̈ahary hampilamin̈y  tany ty ndreky hampiadan̈a olombelon̈o. Raha jiaby nambarany Jesosy efa miboaka aby!

³ Karakory ma ahaizantsika fa ho avy marin̈y “farany donia ty”? Atsika mbala hizaha zen̈y, fa alohanizen̈y fo atsika hianatra raha momba ady araiky tsy hitanolombelon̈o. Tandan̈itry tan̈y ady io, fa misy ifandraisany amintsika.

4, 5. a) Nisy ino tandan̈itry tan̈y, tsy ela tafarany Jesosy nanjary Panjaka? b) Izikoa Apokalypsy 12:12 zahan̈a, nan̈ano karakory niafarany ady io?

⁴ Efa hitantsika tamy Toko faha-8 tamy boky ty fa taminy 1914 Jesosy Kristy nanjary Panjaka tandan̈itry tan̈y. ( Vakia Daniela 7:13, 14.) Nisy raha nataony tsy ela tafaranizen̈y. Baiboly mivolan̈a karaha ty :“Vaky ady tandan̈itry tan̈y. Mikaely [na Jesosy] ndreky anjelinany aby io niady tamy dragona [Satana Devoly]. Dragona ndreky anjelinany aby io koa niady.” * Resy Satana ndreky iro anjely ratsy niaraka taminany, demony an̈arandro io, ke natsipy tambony tany taty. Anjely tsy nivadiky tamy Zan̈ahary aby io ravoravo, fotony Satana ndreky demony aby io niroasin̈y. Olo tambony tany taty ndraiky tsy ravoravo, fotony Baiboly mivolan̈a karaha ty: ‘Antambo navy aminaro ambony tany, fotony Devoly loso an̈y, meloko mare. Hainy baka fa hely fo andranany tavela.’—Apokalypsy 12:7, 9, 12.

⁵ Nan̈ano karakory ma tambony tany teto Satana koa fa resy? Satana neloko mare, ke hampisy antambo ambony tany eto fo raha tiany hatao. Zen̈y ankitin̈y raha iain̈antsika izioty. Kanefa zen̈y tsy hahadin̈y ela, fotony efa  ‘hely andranany’ tavela. Ndray Satana mba mahay raha zen̈y! ‘Andra farany’ ikahiany Baiboly izio. (2 Timoty 3:1) Ten̈a ravoravo atsika mahay fa tsy ambelany Zan̈ahary hanohy asa ratsinany fo Devoly io. Nambarany Baiboly amintsika fa efa an̈atiny andra farany io atsika, ke hely tavela Fanjakan̈any Zan̈ahary han̈amia rady olonany. Atsika izio hizaha raha efatra nivolan̈iny Jesosy ahaizan̈a andra farany io, ke efa miboaka aminandrantsika izioty.

6, 7. Ino ivolan̈ana fa misy ankitin̈y ady ndreky mosary nivolan̈iny Jesosy in̈y?

⁶ “Hisy firenena hiady firenena, hisy fanjakan̈a hiady fanjakan̈a.” (Matio 24:7) Tan̈atiny zato taon̈o loso zay, olo mandeha antapitrisa maty taminy ady. Misy manampahizan̈a araiky amy resaka tantara nivolan̈a karaha ty: “Nanomboko tamy taon̈o 1900 man̈aty, maro olo maty ... Nisy ady fo tan̈atiny taon̈o jiaby zen̈y. Hely fo fotoan̈a tsy nisiany ady tamy tany sasany.” Koran̈iny tatitry araiky nataony Fikamban̈ana Pandiniky Zao Tontolo Zao fa “intelony olo maty taminy ady talohany taon̈o 1899 olo maty taminy ady tan̈atiny [taon̈o 1900].” Mandilatra 100 tapitrisa olo naty taminy ady, nanomboko taminy  1914. Antapitrisany koa olo nanjary miory, mijaly, fotony naty havan̈a taminy ady. Anao koa mety efa nandalovany raha karaha zen̈y.

⁷ “Hisy mosary.” (Matio 24:7) Misy manampahaizan̈a mivolan̈a fa tan̈atiny 30 taon̈o loso zay, hanin̈y treka. Kanefa mbala maro fo olo matiny mosary, fotony ankamarozanolo tsisy vola hivangan̈a hanin̈y na tsisy tany hitsaboan̈a. Amy tany mahantra, andrivony tapitrisa olo mahazo karama hely fo, ke maro olo tsy mahita hanin̈y hohanin̈y. Fikamban̈ana Iraisampirenena Momba Fahasalaman̈a mivolan̈a fa isaka taon̈o, tsaiky mandilatra dimy tapitrisa maty, fotony tsy ampy hanin̈y.

8, 9. Ino ivolan̈ana fa misy ankitin̈y horohorontany ndreky valan̈aretin̈y nivolan̈iny Jesosy in̈y?

⁸ ‘Ho hisy horohorontany amy tany maro.’ (Lioka 21:11) Misy manampahizan̈a momba siansy mivolan̈a fa misy horohorontany mandeha 19 isaka taon̈o, ke maro tran̈o robaka ndreky tany mitresaka. Maro koa tanàna ravan̈a isaka taon̈o. Karaha ty nivolan̈iny boky araiky: ‘Rango tamy taon̈o 1900, mandeha aroe tapitrisa olo matiny horohorontany. Marin̈y fa efa mivoatra teknolozy ­aminandra izioty, kanefa zen̈y tsy nahavita mampihen̈y isakanolo maty.’

 ⁹ “Hisy valan̈aretin̈y.” (Lioka 21:11) Ndray efa maro raha hainy dokotera momba fitahan̈a, mbala maro fo olo matiny aretin̈y efa nisy ndreky aretin̈y vaovao. Misy tatitry mivolan̈a fa misy aretin̈y kadiriny 20 matetiky avoa olo, an̈atinizen̈y tiberkilozy, lafievra ndreky kolerà. Maro koa aretin̈y sarotro tahan̈a, ndray efa mihina aody. Karazan̈a aretin̈y vaovao kadiriny 30 farany hely hita, ke sasany amindro io mamono, kanefa mbala tsy nahitan̈a aody.

10. Ino amy toetrinolo volan̈iny 2 Timoty 3:1-5 hitanao aminandra izioty?

¹⁰ Nambarany Baiboly koa fa tsy fiain̈ana fo hiova fa toetrinolo koa. Apostoly Paoly nivolan̈a: “Ty raha tsara ho hainao: Aminandra farany an̈y, fiain̈ana ho sarotro.” ( Vakia 2 Timoty 3:1-5.) Paoly nivolan̈a fa olo ho:

• tia ten̈a

• tia vola

• tsy han̈aja raimandreny

• tsy men̈atra mivadiky

• tsy tia havany

• tsy mahafehy ten̈a

• mora masiaka

•   tia misoma donia fa tsy tia Zan̈ahary

• an̈arany mivavaka fo fa tsy hita amy raha ataony aby izy pivavaka

11. Izikoa Salamo 92:7 zahan̈a, hatao karakory olo ratsy fan̈ahy?

¹¹ Akory, tsy karaha zen̈y toetrinolo amy tany misy anao? Karaha zen̈y, fotony zay tany handihananao ahitanao olo ratsy toetry fo. Zen̈y koa mivolan̈a fa efa tsy ela eky tavela, Zan̈ahary han̈ano raha. Koran̈iny Baiboly karaha ty: “Izikoa fa van̈ono mira ahitry olo ratsy fan̈ahy, ke pan̈ano ratsy jiaby mamelan̈a, zen̈y mivolan̈a fa iro haripaka mandrakizay.”—Salamo 92:7.

12, 13. Karakory nahavy ‘ten̈a fahaizan̈a’ io nitombo be “aminandra farany” izioty?

¹² Baiboly efa nivolan̈a fa han̈ody ho ratsy fo fiain̈ana aminandra farany. Ndray maro raha manahiran̈a amy donia ty, misy raha tsara koa hita aminolo manompo Jehovah.

¹³ Amy bokiny Daniela amy Baiboly ao mivolan̈a fa ‘hitombo be ten̈a fahaizan̈a io.’ Ombian̈a ma raha zen̈y hiboaka? “Aminandra farany.”  (Daniela 12:4) Nanomboko taminy 1914, Jehovah nan̈ampy olo ten̈a man̈iry hanompo izy hahay tsarabe raha koran̈iny Baiboly. Nanjary maro raha haindro, an̈isanizen̈y an̈aran̈a Zan̈ahary ndreky fikasan̈anany, soropan̈avotoan̈a nataony Jesosy Kristy, raha momba olo maty ndreky familoman̈a olo maty. Nianarandro raha tokony hatao han̈amezan̈a voninahitry Zan̈ahary, amy fiain̈ana isanandra. Nanjary nazava tamindro koa Fanjakan̈any Zan̈ahary zen̈y ndreky raha hataonizio, baka tsy ho hisy eky jaly. Ataondro karakory ny marin̈y haindro io? Alohany hamaliantsika zen̈y, zahavantsika antsendriky raha araiky tanteraka aminandra farany misy atsika izioty.

14. Aia aby an̈ambaran̈a vaovao tsara mikasiky Fanjakan̈a io aminandra izioty? Azovy man̈ambara izio?

¹⁴ Jesosy Kristy nivolan̈a fa “hambara amy tany jiaby misy olo antsendriky vaovao tsara mikasiky Fanjakan̈a ty”, koa fa nikoran̈a raha momba “farany donia ty” izy. ( Vakia Matio 24:3, 14.) Efa olo amy tany mandilatra 239, amy volan̈a mandilatra 100 an̈ambaran̈a vaovao tsara ­mikasiky Fanjakan̈a io. Hazavain̈y aminolo raha momba Fanjakan̈a io, raha hataonizio, ndreky raha tokony hataontsika, ­izikoa tiantsika hahazo rady lera Fanjakan̈a io mitondra. Vavolombelon̈o Jehovah antapitrisany mazoto mikoran̈a vaovao tsara io aminolo baka amy “firenena ndreky karazan̈a ndreky volan̈a jiaby.” (Apokalypsy 7:9) Olo antapitrisany mianatra Baiboly amindro, fotony tiandro ho hay raha ten̈a ampianariny Baiboly. Ten̈a mahalany fan̈ahy zen̈y, fotony Jesosy efa nivolan̈a fa ten̈a Kristianin̈y ‘ho halanolo jiaby.’—Lioka 21:17.

15. a) Ino mahavy anao man̈eky fa atsika io efa aminandra farany? b) Izikoa fa ho avy “farany” io, hatao karakory olo manohitry Jehovah? Ino fo raha ho azonolo man̈eky fitondrasan̈anany?

¹⁵ Efa maro raha nikoran̈iny Baiboly efa miboaka. Asa anao mba man̈eky fa efa aminandra farany ankitin̈y atsika io? Izikoa fa tapitry fitorian̈a vaovao tsara io eraka ny mahafapo Jehovah, ho avy amy zay “farany” io. (Matio 24:14) “Farany” io manondro fotoan̈a han̈adosoany Jehovah raha ratsy jiaby ambony tany ty. Jehovah han̈iraka Jesosy ndreky iro anjely mahery aby io hamono zay olo kinia manohitry izy. (2 Tesalonianina 1:6-9) Satana ndreky demony aby io tsy hambela hamitaka olo eky. Fanjakan̈any Zan̈ahary io amy zay han̈amia rady olo man̈eky fitondrasan̈anany.—Apokalypsy 20:1-3; 21:3-5.

16. Ino ma raha tokony hataonao?

¹⁶ Doniany Satana ty efa ho ravan̈a, ke atsika mila mieritreritry: ‘Ino ma raha tokony hataoko?’ Anao tokony hifen̈y fo hianatra raha momba Jehovah ndreky raha irahiny atao. (Jaona 17:3) Ianara tsara Baiboly. Aza manapatapaka fivorian̈a, fotony an̈y anao mahita olo mifen̈y man̈ano sitrapony Jehovah. ( Vakia Hebreo 10:24, 25.) Mahaiza man̈araraotro raha jiaby ataony Zan̈ahary Jehovah hampianaran̈a olonany erantany. Izikoa hitanao fa misy raha mila ovoanao amy fiain̈ananao, ataova zen̈y, baka anao hahazo rady amy Zan̈ahary.—Jakoba 4:8.

17. Nan̈ino ho tampoko aminolo maro fandripahan̈a olo ratsy fan̈ahy io?

¹⁷ Jesosy efa nivolan̈a fa maro olo tsy hijery andra farany zen̈y, ndray fa mahita raha maro mandalo izioty. Ho tampoko fandripahan̈a olo ratsy fan̈ahy. Karaha faviany pangalatra alin̈y andra in̈y raha zen̈y, ke tsy hampoizinolo foeky. ( Vakia 1 Tesalonianina 5:2.) Jesosy nampitandrin̈y atsika karaha ty: “Ke tsisy ny hafa tamy faha Noa in̈y fan̈atrehany Zanakolo. Tamy Safodrano  mbala tsendriky navy, olo nihina, nigiaka, nan̈ainga, ningain̈y, mandrapidirany Noa tan̈atiny sambofiara. Tsisy raha nijirendro foeky firaka iro jiaby nifaoeny Safodrano. Karaha zen̈y koa fan̈atrehany Zanakolo.”—Matio 24:37-39.

18. Ino raha nampitandreminy Jesosy atsika?

¹⁸ Zen̈y nahavy Jesosy nivolan̈a karaha ty taminolo nitandren̈y izy: “Mitandrema tsao fonaro hivisarany fihinanan̈a dila loatra ndreky figiantoaka be loatra ndreky raha maro mampiasa loha amy fiain̈ana, ke tsy hampoizinaro haviany andra zen̈y aminaro, fotony raha zen̈y ho tampoko karaha fandriky in̈y. Ho avy aminolo jiaby miain̈y ambony tany ty raha zen̈y. Ke anaro miambesa fo, ataova fangatahan̈anaro matsan̈a alin̈y, baka anaro ho afaka hilefa raha jiaby tsy maintsy ho avy aby zen̈y, ke ho vitanaro hitsangana [na hahazo sitraka] man̈oloan̈a Zanakolo.” (Lioka 21:34-36) Ten̈a mahatsara atsika man̈araka volan̈a Jesosy zen̈y, fotony doniany Satana ty koa fa hiravan̈iny, zay olo mahazo sitraka amy Zan̈ahary Jehovah ndreky “Zanakolo” na Jesosy Kristy fo ho voavonjy, ke hiain̈y tsisy farany amy Paradisa ho avy io!—Jaona 3:16; 2 Petera 3:13.