1. ¿Ibigala anmar wisguedi ángelmar doamala?

BE DULE wargwen mag daggele, be wisbaloed doamar e gwenagana. Aayobmogad, be sogdibe an wisye doagi Jehová, be wisbalir gebed doamar e mimmigana. Bibliagi soglenaid ángelmar, Jehová mimmiganye (Job 38:7, TNM). Ángelmar, ¿ibu Jehovága imagmala? Dulemar anbaggualid aggale, ¿ibu imagdimala? ¿Nabir anmar bendagmala? Degisundibe, ¿igi anmar bendasmalale?

2. ¿Doa ángelmar obinyisa, geb ángelmar bule mergumala?

² Bibliagi meerba ángelmar bilenaid. Anmar abar daggoena, wisguega we nue doamala. ¿Doa ángelmar imasa? Colosenses 1:16 gine soge: “Cristogi belagwabba ibmar nibneggined, ibmar nabneggined [...] obinnilesad”. Degsoggua Jehová Massi saglaginedi, e Bab bendasad bela ángelmar obinyedgi. ¿Bule mergu ángelmar nigga? Bibliagi soglenaid millónbali ángelmar nigye, geb yeer gangu nanabarye (Salmo 103:20, TNM; Revelación [Apocalipsis] 5:11, TNM).

3. Job 38:4-7 gine, ¿ángelmargi igi sunmagnai?

³ Bibliagi soglenaid, Jehová, Nabbaneg imasgua “bela Bab Dummad mimmigan binnasur goddemala, argan ogolagwale” (Job 38:4-7, TNM). Wegi soglenaidba, anmar wisid dulemar imagleged iduale bad diggasur gus ángelmar  gudimalanad, ar Nabbaneg imagleged iduale bad bugmalanad. Bibliagi soglenabalid, ángelmar yeer iddodamarye. Soglenaid, “weligwar iddoge bular goddemar[ye]”. Daggena sognaid, “bela Bab Dummad mimmigan” “bular” weligwar iddodmarye, danar goddemalad obared. Degsoggua, aa unni bela ángelmar buraggwa gudimalanad, Jehovágala buraggwa arbabugmalanad.

4. ¿Igi Bibliagi soglenaidba mag daglege ángelmar nabbira dulemar binale?

⁴ Gebbe Adán, Evabo obinyilesgu, dulemar mergudgua, ángelmar nuegan nabbira dulemar binarmalanad. Geb anba Bab ibmar abeged nue gued abesmarbalid (Proverbios 8:30, 31; 1 Pedro 1:11, 12, TNM). Auggi birgamar nanamaidba daggarmalad bur melu dulemar Babba dabisurmala. Degsoggu ángelmar buggib binsasmalar gebed. Degi inigwale dule wargwen gannar Jehovága arbadele “angermar, ber weligwar iddodamalad” (Lucas 15:10, Bab Dummad Jesucristoba Igar Mesisad Garda [NVS]). Anmar durdasad, ángelmar abemarye Babga arbamalad nued gudi gumalad. Degsoggua anmar geger dagsulid, Jehová, ángelmar barmiardagu, dulemar nue eba nanaid ogannogega, geb bendaggega (Hebreos 1:7, 14 absogo). Anmar we ibmargi sunmaggoena.

5. ¿Ángelmar doamar bendasye Bibliagine soglenai?

⁵ Jehová, Sodoma geb Gomorra isgusadba obelosgua, Lot, e sisgan buraggwa nabir bendaglesmalad ar ángelmar wemar onosad (Génesis 19:15, 16). Anba ebbenne dulemar, profeta Daniel leónmar neg yaba egwadsamargua, Danieldina aggar gussurmogad. Daniel sogsad ibiga aggar gussuli: “An Bab Dummad na e ángel barmiali assusabburmar gagga edugega” (Daniel 6:22, TNM). Apóstolmar ibagangi ángel wargwen apóstol Pedro onosmogad esgaryagi  mellesigu (Gusmalad 12:6-11, NVS). Jesús Nabbaneggi Babga arbaargua, anba ángelmar Jesús bendasmarmogad (Marcos 1:13). Geb Jesús burgwed iduale, ángel wargwen ese nonibalid “ogannogega” (Lucas 22:43). ¡Jesús yeer iddosar gebed Babga arbadi unni ángelmar e ogannosadba!

6. a) ¿Emi ibagi igi ángelmar Bab neggwebur bendagmala? b) ¿Ibu ibmargi emidi anmar sunmaggoe?

⁶ Emi ibagi Nabbaneggi bar ángelmar dagledisulid, aaga Jehovága arbamalad bar ángelmar abingudisurmalad. Degi inigwale ángelmar yeer gangumalad, Bab neggwebur bendagmalad melle Babgi bangumalaga. Bibliagi sognaid: “Jehová dobe nanamalad diggarba, Jehová ángel gudii, geb wemar bendagdii” (Salmo 34:7, TNM). ¿Ibiga anmar nued iddoge we ibmar soglesadba? Ar ángelmar isganagan anmar oaggalobi gudimarmogad. ¿Doamar ángelmar isganamala? ¿Bia danimala? ¿Ibu imagmala anmar oaggalogega? Wisguega, anmar sunmaggoloena igi neg gusa gebe dulemar buggudgu.

7. ¿Nia Babgine bule mergu dulemar obadsa?

⁷ Capítulo 3 gine anmar durdasad, ángel wargwena dulemarga neg sebi gualidba, Babgine agbidsaye. We ángel Niaye nug gunoniggid (Apocalipsis 12:9). Eva yardasad sorbali, birga 1.600 nanasadgi belasaar Babgine dulemar obadsad. Degi inigwale abar Babgi bangussurmalad. ¿Doamarsunna? Abel, Enoc geb Noé (Hebreos 11:4, 5, 7).

8. a) Abar ángelmar nuegana, ¿igi ángelmar isganaganga gunonimala? b) Dii Dummad widgua, ¿ibu ángelmar isganamar imagge daglearmala mer burgwemalaga?

⁸ Noé ibagangine bamalad ángelmar Jehovágine agbidsamarmogad. Nibneggi gudidii, Nabbanegse agdenonimalad, sanar gudi gumalaga. ¿Ibiga sanargusmala? Génesis 6:2 (TNM) gine sognai: “Bab Dummad mimmigan dulemar  sisgan daggarmala, yeer dagle daggarmala; na egad egad omegan niggumalagala susmala”. We ángelmala dulemar oisgudmala, auggine Jehovádina undar basur dagmai gussulid. Bela dulemar isgubugmalad obelogega, Baba Dii Dummad barmialid, a unni, unnila eba nue nagusmaladbii bendaglesmalad (Génesis 7:17, 23). Mer burgwemalagala ángelmar isganamala na gannar burbar imagge daglearmalad, nabir nibnegse namalaga. Wegi ibmar imasmaladbali mag daglesad Niabali aggasmala; weyobi Nia ángelmar isganamar e “sagla[gala]” gunoniggid (Mateo 9:34).

9. a) Ángelmar isganamar gannar nibnegse nadmargua, ¿igi imaglesmala? b) ¿Igi ángelmar isganamar dulemar yardagdidii?

 ⁹ Ángelmar Babba igar imassurmalad gannar nibnegse nadmargua, Jehová bar ángelmar nueganba oaggassulid, Niayobi gusmarmogad (2 Pedro 2:4, NVS). Emi ibagi geg bar sanargumar inigwale, dulemar anba ángelmar isganamarba yeer binsaed galedidiid. Ar Nia, ángelmar isganamar e dummadsoggua, aaga we ángelmar Nia bendagmalad, “dulemar bela nabneg naidgi yardag[gega]” (Apocalipsis 12:9; 1 Juan 5:19). ¿Igi dulemar yardagdidii? Ibmar soggwenna ebusurmalad dulemar yardagmalaga (2 Corintios 2:11 absogo). Anmar daggoena ibu ebudamala.

10. ¿Ibu ibmargi niamar dulemar yardagge?

¹⁰ Emi ibagi buggidar dulemar niamarba ibmar imagmalad, geb abar dule bamalad e anar niamarbo sunmaggega imagdamarbalid. ¿Ibu imagdamala? Nerganse naddamala, inadurganse, absogedse, secreto imagmaladse, brujomarse nanamala, emargi ina isgana midamarbalid, geb ibmar wegimaladi. Bibliagi soglenaid, Jehová we ibmarmar nued dagsurye, mer bibbisaar we ibmarse idagmaloye (Deuteronomio 18:10-12; Isaías 47:13, 14). Igi dule ua soega inbaggwa unus ebudae, aayobi niamar ibmar aggar aggar ebumarmogad dulemar yardaggega.

11. ¿Ibu ibmar bamaladgine niamar dulemar yardagbali, geb ibigala we ibmarmar anmar imagged abelesuli?

¹¹ ¿Igi niamar emar yardagmarbali? Abar ibmar wisguega horóscopo absomalad, abar gardagi dodogar ibmar balamimaladse nanamalad, abar argan absomaladse naddamalad, abar nerganse siagwa berbemarbalid, bela we ibmala niamargadid. Buggidar dulemar binsadamar inigwale we ibmarmar aggar emar imagsurye, Bibliagindi soglenaid we ibmargi arbamaladi, niamarse idagmarye.  Daggena Gusmalad 16:16, 18 se, aagi sunmagnaid ‘nelegwa niaburba niggadgi’, we bunagwa nia burbaba ibmar yoo guoed balamidi gusad. Aaga nia yaagwagi nosgua, we yaagwa geg bar we ibmar imagguded.

12. ¿Ibigala nuedsuli binsaedi dule burgwisar anba gudidaye?

¹² ¿Ibu ibmar baid niamar imagbali? Nia dulemar obinsabied, dule burgwisar e burba gudidaye. Weyob niamar emar yardagbalid. Aaga abar dulemar bad iddodamalad dule negowesar soggalile, sergan dagsaye. We ibmar soglegedba dulemar binsadae sergan burgwismaladi gudimarye, degsoggu wemarga ibmar imagleger gebye mer wiledii gumalaga. Auggi weyob ibmar imagger boni dummadid, ar niamar na burgwismaladyob imagdamalad, dule burgwisad sunmagdiiyobi na imagdidamalad, nerganse nonidamalad, geb anba imagmarbalid dule negowesad binsaega dule burgwisad dagsaye (1 Samuel 28:3-19). Auggi, capítulo 6 gine, anmar durdasad dule burgwisar, bar gudisurdaye, bar agneb naosurye (Salmo 115:17). Degsoggu  dulemar binsadibe burgwismalad gudiiye, niamarse binsaed galesdamalad, yardagles gudimardo, geb uggine Bab igargi annadidibardo (Deuteronomio 18:10, 11 absogo; Isaías 8:19). Aaga, be alamagna sao mer niamarse yardaglegega.

13. Dulemar niamar dobdamalanadi, ¿emidi ibu imasmala?

¹³ Niamar unnila dulemar yardaggedginbii arbadisurmalad, dulemar ogwayedamarbalid. Niamar na wismalad obergulesoggalid, emarga “ibagan issee nabbi naid”, aagala bur balibulos sabsur dulemar imagnanaid (Apocalipsis 12:12, 17). Degi inigwale, issesur dulemar niamar dobdamalanadi, emidi nia ibmar indasmalad. ¿Igi nabir indasmala? Dule undargus niamar ibmar imagdiile, ¿igi nabir egi bangusale?

14. ¿Igi anmar niamar ibmar indasale, Cristo sordagan Éfeso ginmaladyobi?

¹⁴ Bibliagi anmarga soglenaid igi dule niamar abin imasale geb igi wemargi waggillege. Anmar daggoena ebbenne Cristo sordagan Éfesogi gudi gusmalad ibu imasmala. Yoo Cristo sordaganga gumargua, abar niamar ibmar imagdamalanad. Soggarmargua, anmar we ibmar indaggoye, ¿ibu imasmala? Bab Gaya burbagi soglenaid, “e gardamar senonima[rye]. Dulemar abargi bela e ina isgana gardamar ogummagsama[rye]” (Gusmalad 19:19). Cristoba nagudmaladi, na libromar nergan igargi sunmagmalad ogummasmalad. Emi ibagi dulemar nia abin imagbimarmogale weyob nabir imagmarmogad. Dule Jehovága arbabiele auggi nergan ibmar ebuged niggale, brujomar ibmardibe geb ibmar bamalad aagimaladdibe obeloger gebed. Libromardibe, películamardibe, músicamardibe, bela ibmar Niagadile, anba yeer dagledibe, nuedid bur obeloged. Dule mer aggar guega sedidibe assu nugar unaaledi, ibu  ibmar unaaleddibe, nuediled we ibmar obelogedi (1 Corintios 10:21).

15. ¿Ibu anmar imaggedi niamar abin imaggega?

¹⁵ Cristo sordagan Éfesoginmalad libromar ogummasmalad sorba dogdar undar birgamar nanassulid, Pablo wemarga weyob garda narmasad: “Anmar [...] urwenaid niamar[...]bo” (Efesios 6:12, TNM). Wegi soglenaidba mag dagleged niamar siggirmagnasurmala. Cristo sordagan indagbisurmala. Degsoggu Cristo sordagan, ¿ibu ibmar baid imagmarbalir gebe? Pablo wemarga sogsad: “Mer Bab bengudii nanamarbalo, we ibmala bemar escudod, bemargi sigu milealir, nabir bemar abin oginnega” (Efesios 6:16, TNM). Anmar escudo bela belad ganguer, we sogleged anmar bibbisaar Bab bensulile, bur ibgwensur anmar nabir niamar abin imagye (Mateo 17:20).

16. ¿Ibu anmar imagger gebe mer Bab benguega?

¹⁶ Anmar Biblia durdaggele, Babgi benguosulid. Anmar mer bibbisaar Babgi benguega nueggwa Bab igar wisguer gebed, degiile anmar siggirmaggosulid. Igi neg mer gallamaggega e suwarmar ise digar buggwar gebe, aayobi anmar gannoles gudimogoed. Anmar bane bane Biblia absogele geb durdagbalile, bibbisaar anmar Babgi benguosulid. Neg ise sobar siiyobi, niamar abin anmar siggirmaggosulid (1 Juan 5:5).

17. ¿Ibu anmar imagger gebe niamar mer anmar oiddogegala?

¹⁷ Cristo sordagan Éfesoginmaladi, ¿ibu ibmar baid imagmarbaloena? Emar neggweburgine Nia ibmar doggus niggansoggu, abemalad dule emar bendaggedi. Aaga Pablo wemarga sogsad: “Bela belad Babse gormalo, mer unnila ibmar soggwen ular gormalo, bali bali Babse gormalo” (Efesios 6:18, TNM). Emi ibagi Nia ibmar doggusmosoggua, niamar abin imaggega anmar Jehováse goler gebed, anmar bendaggega. Anmar Jehováse goddele e nugba ese goled abeleged (Proverbios 18:10 absogo). Anmar bali bali Babse  gorbalidid mer Nia anmar oaggalogega (Mateo 6:13). Anmar wegi Jehováse golele, anmar iddogoed (Salmo 145:19).

18, 19. a) ¿Ibiga anmar nue wisi, anmar niamargi un obinoe? b) Capítulo 11 gine ¿ibugi sunmagnai?

¹⁸ Anmar wisid niamar sabsur dulemar imagmalad. Auggi anmar Bab ibmar abeged imagdisundibe geb Niabali anmar dasulile ibiga anmar Nia dobguosunna (Santiago 4:7, 8 absogo). Anba niamar yeer gangumar inigwale, galaggumarmogad. Noé iba unni niamar nue wilesmalad, yoowedsedi obelolemaloed (Judas6,NVS). Ebinsao: Jehová ángelmar yeer gangumaladi, anmar bendaggoed (2 Reyes 6:15-17). Ángelmar nuegan dagdidiid anmar alamagnaid niamarba mer aggaega. Geb anmar galaggued abesurmalad. Anmar galaggusulile, yeer iddodamalad. Degsoggu, anmar mer Jehovági, geb ángelmar nuegangi banguo. Uggi mer anmar nerganse nanabalo, mer brujomarse geb mer bibbisaar anmar ibmar wegimalad imaggoe, bur anmar Bab Gaya burbagi binsaed nued nanaidba ibmar imaggedid (1 Pedro 5:6, 7; 2 Pedro 2:9). Weyob anmar ibmar imagnaile, anmar niamarse galagguosulid.

¹⁹ Degid, ¿ibiga Jehová niamar obergusuli, geb neg isgunaid obelosurbali, ar we ibmarde doggus dulemar wionanaid? Capítulo 11 gine we ibmargi sunmagnaid.