1. Mbaʼérepa jaikuaasevaʼerã umi ánhelgui?

JAIKUAÁVO peteĩ ñande rapichápe jaikuaa jepi avei ifamíliagui. Upéicha avei jaikuaávo Ñandejára Jehovápe jaikuaa avei ifamíliagui oĩva yvágape. Upe famíliape oĩ umi ánhel, ha umívape la Biblia ohenói ‘Ñandejára raʼykuéra’ (Job 38:7). Upéicharõ, mbaʼéichapa Jehová ojokuái chupekuéra ojapo hag̃ua haʼe oipotáva? Mbaʼépa ojaporakaʼe hikuái yvyporakuérare? Mbaʼépa ikatu ojapo ñanderehe? Ha upéicharamo, mbaʼéichapa ojapo hikuái upéva?

2. Moõguipa ou umi ánhel ha mboýpa oĩ?

² La Biblia oñeʼẽ hetaiterei hendápe umi ánhelgui. Jahechami koʼã mbaʼe jaikuaave hag̃ua chuguikuéra. Moõguipa ou umi ánhel? Colosenses 1:16 heʼi : ‘Haʼe [Jesucristo] rupive ojejapovaʼekue opa mbaʼe oĩva, yvágape ha yvy ári’. Upéicharõ, Ñandejára Jehová ojapo umi tekove espirituál, oñehenóiva ánhel, Itaʼýra ypykue rupive. Ha mboy ánhelpa oĩ? La Biblia omombeʼu oĩha hetaiterei millones, ha enterove ipoderosoha (Salmo 103:20). *

3. Mbaʼépa ñanemboʼe umi ánhelgui Job 38:4-7?

³ Ñandejára Ñeʼẽ, la Biblia, omombeʼu ko Yvy ojejapórõ  guare, ‘enterove Ñandejára raʼykuéra oñepyrũ osapukaijoa vyʼápe’ (Job 38:4-7). Upéicharõ, umi ánhel oĩmavaʼekue ymaiterei ojejapo mboyve yvyporakuérape, ha ojejapo mboyve ko Yvy jepe avei. La Biblia ohechauka koʼápe umi ánhel oñanduha avei, heʼi hesekuéra ‘vyʼápe osapukaihague oñondivepa’. Koʼápe jahecha ‘enterove Ñandejára raʼykuéra’ ovyʼahague oñondivepa. Upérõ, entéro umi ánhel oĩvaʼekue oñondivepa peteĩ famíliaicha, ha oservi Ñandejára Jehovápe.

4. Mbaʼéichapa ohechauka la Biblia umi ánhel ifiélva ojepyʼapyha yvyporakuéra ojapóvare?

⁴ Ohecha rire mbaʼéichapa ojejapo ñande tuvakuéra ypykuépe, umi ánhel ifiélva oikuaaseterei avei mbaʼéichapa oñembohetáta yvyporakuéra ha mbaʼéichapa oñekumplíta ohóvo Ñandejára propósito (Proverbios 8:30, 31; 1 Pedro 1:11, 12). Péro ohasávo pe tiémpo, umi ánhel ohecha mbaʼéichapa hetaiterei yvyporakuéra omboyke ñande Apohare ñanderayhuetévape. Katuete umi ánhel jeroviapy ombyasy ko mbaʼe. Péro upéicha avei oĩramo peteĩ yvypóra jepe ojevýva Jehovápe, ‘oĩ vyʼa Ñandejára anhelkuéra apytépe’ (Lucas 15:10). Ha ojepyʼapýgui hikuái Ñandejára siervokuérare, Jehová oiporu meme chupekuéra omombarete ha oñangareko hag̃ua umi ifiélvare ko Yvy ape ári (Hebreos 1:7, 14). Jahecháta koʼág̃a mbaʼéichapa ojapo hikuái upéva.

5. Máva mávapepa oipytyvõvaʼekue umi ánhel, omombeʼuháicha la Biblia?

⁵ Oñehundírõ guare umi siuda aña Sodoma ha Gomorra, peteĩ kuimbaʼe ihústova hérava Lot ha itajyrakuéra ojesalva mokõi ánhel oguenohẽ rupi chupekuéra upégui (Génesis 19:15, 16). Heta áño ohasa rire ko mbaʼe, pe proféta Daniélpe ojeity peteĩ yvykuápe, oĩháme umi león, péro mbaʼevete ndojehúi chupe. Haʼe omombeʼu mbaʼérepa  upéva: ‘Ñandejára omondo hiʼánhel ha omboty umi león juru’ (Daniel 6:22). Pe síglo primérope, peteĩ ánhel oguenohẽ apóstol Pédrope kárselgui (Hechos 12:6-11). Umi ánhel oipytyvõ avei Jesúspe oñepyrũrõ guare oservi Ñandejárape ko Yvy ape ári (Marcos 1:13). Ha omano mboyve, peteĩ ánhel ou hendápe ‘omombarete hag̃ua chupe’ (Lucas 22:43). Mbaʼeichaite piko oiméne koʼã mbaʼe omombareterakaʼe Jesúspe pe oikotevẽve jave!

6. a) Mbaʼéichapa oñangareko umi ánhel Ñandejára siervokuérare koʼág̃a? b) Mbaʼe porandúpa ñambohováita koʼág̃a?

⁶ Koʼág̃a rupi umi ánhel ndojehechaukavéima Ñandejára siervokuérape ko Yvy ape ári. Ndajahecháiramo jepe chupekuéra, umi ánhel imbaretéva oñangareko gueteri Ñandejára siervokuérare ani hag̃ua oho vai espiritualménte. La Biblia heʼi: ‘Jehová ánhel oñemoĩ umi chugui okyhyjéva ypýpe, ha oguenohẽ chupekuéra mbaʼe vaígui’ (Salmo 34:7). Mbaʼérepa ñanemombaretevaʼerã koʼã ñeʼẽ? Oĩgui umi espíritu aña ñanehundiséva! Mávapa umíva? Moõguipa ou hikuái? Mbaʼéichapa ojapose ñanderehe mbaʼe vai? Jaikuaa hag̃ua koʼã mbaʼe, jahechami mbaʼépa oikorakaʼe yvyporakuéra oñepyrũrõ guare.

7. Mboýpepa Satanás omboyke Ñandejáragui?

⁷ Jahechahaguéicha pe kapítulo 3-pe, oĩvaʼekue peteĩ ánhel oporogovernaséva, ha upéicha ou oñemoĩ Ñandejárare. Upe rire ko ánhelpe oñehenói Satanás el Diablo (Revelación 12:9). Ombotavy rire Évape, mil seiscientos áño aja Satanás haimete omboykepaite yvyporakuérape Ñandejáragui. Mbovymi oĩvaʼekue ifiélva, umíva apytépe Abel, Enoc ha Noé (Hebreos 11:4, 5, 7).

8. a) Mbaʼéichapa umi ánhelgui oiko demónio? b) Mbaʼépa ojaporakaʼe umi demónio ani hag̃ua oñehundi pe Dilúviope?

⁸ Noé tiémpope, oĩvevaʼekue umi ánhel oñemoĩva Jehováre. Haʼekuéra oheja Ñandejára família yvagapegua, ou ko  Yvy ape ári ha oñembohete yvypóraicha. Mbaʼerãpa? Jalee Génesis 6:2-pe: ‘Ñandejára añetegua raʼykuéra oñepyrũ omaña kuimbaʼe rajykuérare, iporãha hikuái, ha oñemoĩ oiporavo hembirekorã, opa oipotáva’. Umi ánhel ojapoukavaʼekue heta mbaʼe vai yvyporakuérape. Péro Jehová ndohejái chupekuéra ojapo are upéva. Haʼe ogueru pe dilúvio ha upéicha ohundipaite umi yvyporakuéra iñañávape ha oheja umi chupe ifiélvape añónte (Génesis 7:17, 23). Upévare umi ánhel rrevélde, térã demónio, ohejámante pe hete ha oho jey yvágape espírituicha. Upéicha haʼekuéra oñemoĩ Satanás ykére, ha oiko chugui ‘umi demónio ruvicha’ (Mateo 9:34).

9. a) Mbaʼépa oikorakaʼe umi demóniore oho jeýramo guare yvágape? b) Mbaʼépa jaikuaáta koʼág̃a umi demóniogui?

 ⁹ Oho jeýramo guare yvágape umi ánhel naiñeʼẽrendúiva, Ñandejára omboyke chupekuéra ifamíliagui, ojapohaguéicha Satanás rehe (2 Pedro 2:4). Koʼág̃a haʼekuéra ndaikatuvéima oñembohete yvypóraicha; upéicharamo jepe ojapouka gueteri heta mbaʼe vai yvyporakuérape. Ha umi demónio ndive, Satanás ‘ogueraha vai hína opa yvyporakuérape’ (Revelación 12:9; 1 Juan 5:19). Mbaʼéichapa ojapo upéva? Umi demónio oiporu heta mbaʼe ombotavy hag̃ua yvyporakuérape (2 Corintios 2:11). Jahechami koʼág̃a umi mbaʼe.

10. Mbaʼépa pe espiritísmo?

¹⁰ Ombotavy hag̃ua hentekuérape, umi demónio oiporu pe espiritísmo. Pe espiritísmo haʼe umi mbaʼe ojejapóva ojejeheʼa hag̃ua umi demónio ndive, ha ikatu ojejapo hendivekuéra voi térã peteĩ médium rupive. La Biblia heʼi pe espiritísmo ivaiha ha jajeivaʼerãha oimeraẽ mbaʼe chugui oúvagui (Gálatas 5:19-21). Pe espiritísmo ikatu ñambojoja pe karnáda oiporúvare umi peskadór. Peteĩ peskadór oiporu opaichagua karnáda ojagarra hag̃ua opaichagua pira. Upéicha avei umi espíritu aña oiporu opaichagua espiritísmo oguereko hag̃ua ipoguýpe opaichagua héntepe.

11. Mbaʼépa pe adivinasión, ha mbaʼérepa jajeivaʼerã chugui?

¹¹ Peteĩ karnáda oiporúva umi demónio haʼe pe adivinasión. Mbaʼépa upéva? Opa mbaʼe ojejapóva ojekuaa hag̃ua oikótava tenonderãme térã umi mbaʼe ojekuaaʼỹva. Pe adivinasiónpe oike astrolohía, horóscopo jelee, varáha jeporu (pruevéra), oleéva ñande popyte (quiromancia), térã umi omombeʼúva mbaʼépa heʼise ñande képe jahechavaʼekue. Oĩramo jepe heta oimoʼãva pe adivinasión ndojapoiha mbaʼeve ñanderehe, la Biblia ohechauka umi ojapóva koʼã mbaʼe ombaʼapoha umi espíritu aña ndive. Upévare He chos 16:16-18-pe heʼi ‘peteĩ demónio adivinasión rehegua’ oikuaaukahague peteĩ mitãkuñáme pe oikótava. Péro pe demónio osẽ rire chugui ndaikatuvéima ojapo upéva.

12. Mbaʼérepa ikatu ñanembyai ñañehaʼãramo ñañeʼẽ umi omanovaʼekue ndive?

¹² Umi demónio ombotavy avei hentekuérape omokyreʼỹvo chupekuéra oñeʼẽ hag̃ua umi omanovaʼekue ndive. Umi oñembyasývape ihénte omanohaguére, pyʼỹi ojegueroviauka japu umi omanovaʼekuégui. Peteĩ médium espiritísta ikatu omeʼẽ chupekuéra informasión espesiál térã oñeʼẽ pe omanovaʼekuéicha. Upévare heta oĩ ogueroviáva umi omanovaʼekue oikoveha, ha oñeʼẽramo hendivekuéra ikatutaha oñeñandu porãve. Péro upeichagua konsuélo japu rei ha ikatu ñanembyai. Mbaʼérepa upéva? Pórke umi demónio ikatu oñemoñeʼẽ umi omanovaʼekuéicha ha omeʼẽ chuguikuéra informasión umi médium espiritístape (1 Samuel 28:3-19). Avei, jahecháma pe kapítulo 6-pe umi omanovaʼekue ndoikoveimaha (Salmo 115:17). Upéicharõ, oimeraẽ ‘oporandúva  omanovaʼekuépe’ hoʼa umi espíritu aña poguýpe ha oñemoĩ Ñandejárare (Deuteronomio 18:10, 11; Isaías 8:19). Upévare ñañatende porã vaʼerã ani hag̃ua jaisuʼu ko karnáda umi demónio oiporúva.

13. Mbaʼépa ojapo heta hénte oikovaʼekue kyhyjehápe umi demóniogui?

¹³ Umi espíritu aña ndahaʼéi ombotavýnteva hentekuérape, avei omongyhyje chupekuéra. Satanás ha idemoniokuéra oikuaa mbykymaha pe tiémpo oguerekóva ombaʼapo hag̃ua, ha upévare koʼág̃a iñañavéntema (Revelación 12:12, 17). Upéicharõ jepe, hetaiterei hénte oikovaʼekue kyhyjehápe ojei umi espíritu aña poguýgui. Mbaʼéichapa ojapo hikuái upéva? Mbaʼéichapa ikatu peteĩ tapicha ojei umi demónio poguýgui, oiméramo jepe oiporu oikóvo pe espiritísmo?

14. Mbaʼéichapa ikatu jajei umi espíritu añágui, ojapohaguéicha umi kristiáno Efesoygua pe síglo primérope?

¹⁴ La Biblia omombeʼu mbaʼéichapa ikatu ñañemoĩ umi espíritu añáre ha jajei avei chuguikuéra. Jahecháta mbaʼépa ojaporakaʼe pe primer síglope umi kristiáno oikóva táva Éfesope. Oĩvaʼekue umi oiporúva espiritísmo oiko mboyve chuguikuéra kristiáno. Ha ojedesidívo oheja pe espiritísmo, mbaʼépa ojapo hikuái? La Biblia heʼi: ‘Heta umi oiporuvaʼekue máhia ombyaty ilivrokuéra ha ohapy opavave renondépe’ (Hechos 19:19). Umi kristiáno pyahu ohapy ilivrokuéra máhia rehegua ha upéicha ohechauka mbaʼépa ojapovaʼerã koʼág̃a oñemoĩséva guive umi espíritu añáre. Umi oserviséva Jehovápe ohejavaʼerã opa mbaʼe oúva pe espiritísmogui. Umíva apytépe oĩ lívro, rrevísta, pelíkula, fóto ha músika oporomokyreʼỹva ojeporu hag̃ua ha omoporãva pe espiritísmo. Koʼãva apytépe oĩ avei umi amuléto térã umi mbaʼe ojeporúva oñeñangareko hag̃ua mbaʼe vaígui (1 Corintios 10:21).

15. Mbaʼépa jajapovaʼerã ñañemoĩ hag̃ua umi espíritu añáre?

 ¹⁵ Ha ndahetái áño ohundi rire ilivrokuéra, pe apóstol Pablo ohaivaʼekue umi kristiáno Efesoyguápe: ‘Jaguereko peteĩ ñorairõ [...] umi espíritu aña ndive’ (Efesios 6:12). Koʼápe jahecha umi demónio ndopytuʼuihague. Oñehaʼãvaʼekue hikuái oguereko kristianokuérape ipoguýpe. Upévare, mbaʼépa tekotevẽvaʼekue ojapove umi kristiáno? ‘Opa mbaʼe ári’, heʼi Pablo, ‘pejagarra pe eskúdo guasu fe rehegua, upéva reheve ikatúta pembogue umi tata rendy opoíva penderehe pe aña’, térã Satanás (Efesios 6:16). Imbaretevéramo ñande eskúdo fe rehegua, ñañemoĩ mbaretevéta avei umi espíritu añáre (Mateo 17:20).

16. Mbaʼéichapa ikatu ñamombarete ñande fe?

¹⁶ Upéicharõ, mbaʼéichapa ikatu ñamombarete pe fe jaguerekóva? Jastudia rupi la Biblia. Peteĩ murálla imbarete hag̃ua isimiénto porã vaʼerã. Upéicha avei, ñande fe imbarete hag̃ua isimiénto porã vaʼerã, ha upéva hína jaikuaa porã Ñandejára Ñeʼẽ heʼíva. Jalee ha jastudiáramo la Biblia káda día, ñande jerovia imbaretevéta ohóvo. Ha peteĩ murálla mbaretéicha, pe fe ñanemoʼãta umi mbaʼe vaígui ojapóva umi espíritu aña (1 Juan 5:5).

17. Mbaʼépa tekotevẽ jajapo ñañemoĩ hag̃ua umi espíritu añáre?

¹⁷ Mbaʼépa tekotevẽvaʼekue ojapo avei umi kristiáno Efesoygua? Haʼekuéra oñeñangarekovevaʼerã oikógui pe táva henyhẽvape espiritísmogui. Upévare Pablo heʼi chupekuéra: ‘Opaichagua ñemboʼépe, peñemboʼe meme espíritupe’ (Efesios 6:18). Ñande jaiko avei ko múndo henyhẽvape espiritísmogui, upévare tekotevẽ ñañemboʼe meme Jehovápe ñanepytyvõ hag̃ua ñañemoĩvo umi espíritu añáre. Ha tekotevẽ jaiporu Jehová réra ñane ñemboʼépe (Proverbios 18:10). Avei jasegivaʼerã jajerure Ñandejárape ‘tañandepeʼa pe añágui’, Satanás el Diablo (Mateo 6:13). Péicha ñañemboʼéramo katuete Jehová omeʼẽta ñandéve jajeruréva (Salmo 145:19).

18, 19. a) Mbaʼérepa ikatu jajerovia ñaganataha pe ñorairõ jaguerekóva umi espíritu aña ndive? b) Mbaʼe porandúpa ñambohováita pe kapítulo oúvape?

 ¹⁸ Umi espíritu aña ikatu ojapo mbaʼe vai ñanderehe. Péro natekotevẽi jakyhyje chuguikuéra ñañemoĩramo Satanás rehe, ha ñañemoag̃ui Ñandejárare jajapo rupi haʼe oipotáva (Santiago 4:7, 8). Umi espíritu aña podér oguereko límite. Noé tiémpope ojekastigavaʼekue chupekuéra, ha upe rire ohupytýta chupekuéra pe huísio paha (Judas 6). Ñanemanduʼavaʼerã avei oñangarekoha ñanderehe Jehová anhelkuéra ipoderósova (2 Reyes 6:15-17). Koʼã ánhel oipotaiterei ñagana ñane ñorairõ umi espíritu aña ndive. Añetehápe, haʼekuéra ñanemokyreʼỹ jajapo hag̃ua upéva. Upévare ñañemoag̃uivaʼerã Jehová ha ifamília espirituál ifiélva rehe. Avei jajeivaʼerã oimehaichagua espiritísmogui ha jajapo meme vaʼerã Ñandejára Ñeʼẽ heʼíva (1 Pedro 5:6, 7; 2 Pedro 2:9). Upéicha jajapóramo katuete ñaganáta pe ñorairõ jaguerekóva umi espíritu aña ndive.

¹⁹ Péro, mbaʼérepa oheja Ñandejára oĩ gueteri umi espíritu aña ha umi mbaʼe vai hetaitéma oporombohasa asýva? Ko porandu ñambohováita pe kapítulo oúvape.