1. Vim li cas zoo rau peb kawm txog cov tubtxib saum ntuj?

YUAV kom peb paub txog ib tug tibneeg, peb yuav tsum paub txog nws tsev neeg thiab. Ib yam li ntawd, yuav kom peb paub Vajtswv Yehauvas, peb yuav tsum paub txog nws cuab tubtxib saum ntuj thiab. Phau Vajlugkub muab cov tubtxib saum ntuj hu ua “Vajtswv cov tub.” (Yauj 38:7, hauv qab taw qhia) Cov tubtxib saum ntuj puas muaj feem nrog Vajtswv lub ntsiab? Yav tas los, lawv puas tau pab tibneeg? Niaj hnub no lawv puas pab tau koj? Yog tias lawv pab tau, lawv pab li cas xwb?

2. Cov tubtxib saum ntuj los qhovtwg los, thiab lawv coob npaum li cas?

² Muaj ntau nqe Vajlugkub uas qhia txog cov tubtxib saum ntuj. Yuav kom peb paub ntxiv txog lawv, cia peb kawm seb phau Vajlugkub qhia li cas. Cov tubtxib saum ntuj los qhovtwg los? Khaulauxi 1:16 hais tias: “Vim tus Tub [Yexus Khetos] ntawd, thiaj li tsim ib puas tsav yam tshwm los yog tej uas nyob saum nruab ntug, tej uas nyob hauv ntiajteb.” Yog li ntawd, Vajtswv Yehauvas tau txib kom nws tus Tub hlob tsim tag nrho cov plig uas yog cov tubtxib saum ntuj huvsi. Cov tubtxib saum ntuj coob npaum li cas? Phau Vajlugkub qhia tias Yehauvas tau tsim muaj tsheej plhom tus tubtxib saum ntuj. Lawv puavleej muaj hwjchim kawg li.​—Ntawv Nkauj 103:20; Qhia Tshwm 5:11.

3. Yauj 38:4-7 qhia li cas txog cov tubtxib saum ntuj?

³ Vajtswv Txojlus qhia peb tias thaum Vajtswv tsim tau lub  ntiajteb, “cov tubtxib saum ntuj sawvdaws qw zoo siab xyiv fab.” (Yauj 38:4-7) Yog li ntawd, ua ntej Vajtswv tsim lub ntiajteb thiab tsim tibneeg, twb xub muaj cov tubtxib nyob saum ntuj lawm. Nqe Vajlugkub no pab peb to taub li cas ntxiv txog cov tubtxib saum ntuj? Nqe no pab peb to taub tias cov tubtxib saum ntuj txawj xav thiab txawj zoo siab, rau qhov lawv “sawvdaws qw zoo siab xyiv fab.” Tsis tas li ntawd xwb, nqe no qhia tias “cov tubtxib saum ntuj sawvdaws” xyiv fab ua ke. Yog li, lub sijhawm ntawd tag nrho cov tubtxib saum ntuj sib koom ua ib cuab teev tiam Vajtswv Yehauvas.

4. Ua li cas peb ho paub tias cov tubtxib saum ntuj yeej xav paub txog noob neej?

⁴ Cov tubtxib ncaj ncees saum ntuj pom Vajtswv tsim thawj nkawm niam txiv. Txij thaum ntawd los, lawv yeej xav paub seb noob neej txoj hau kev yuav mus zoo li cas, thiab xav paub seb Vajtswv lub ntsiab yuav muaj tiav li cas. (Paj Lug 8:30, 31; 1 Petus 1:11, 12) Tiamsis ntev mus ntev tuaj, cov tubtxib saum ntuj pom tias tibneeg feem coob tso tseg zuj zus tsis teev tiam tus Tswv Tsim lawm. Qhov ntawd yeej ua rau cov tubtxib ncaj ncees tu siab kawg li. Tiamsis thaum muaj ib tug neeg tig rov los cuag Yehauvas, “muaj kev zoo siab xyiv fab rau ntawm Vajtswv cov tubtxib saum ntuj.” (Luka 15:10) Cov tubtxib saum ntuj mob siab cov neeg uas teev tiam Vajtswv kawg li. Twb yog vim li ntawd, Yehauvas thiaj tas zog txib lawv los txhawb thiab tiv thaiv nws cov tub qhe ncaj ncees hauv ntiajteb no. (Nyeem Henplais 1:7, 14.) Cia peb kawm seb lawv tau pab tibneeg li cas.

5. Hauv phau Vajlugkub, cov tubtxib saum ntuj tau pab tibneeg li cas?

⁵ Cov tubtxib saum ntuj tau pab tibneeg li cas? Thaum lub moos Xaudoo thiab lub moos Kaumaula raug rhuav tshem, muaj 2 tug tubtxib saum ntuj tau coj Lauj thiab nws 2 tug ntxhais khiav tawm. (Chiv Keeb 19:15, 16) Puag tom  qab no, tus cev Vajtswv lus hu ua Daniyee raug pov rau hauv ib lub qhov tsov ntxhuav. Tiamsis tsis muaj dabtsi los raug nws li. Daniyee hais tias: “Kuv tus Vajtswv txib nws tus tubtxib saum ntuj tuaj kaw tsov ntxhuav qhov ncauj.” (Daniyee 6:22) Nyob rau thawj 100 xyoo T.Q.Y., muaj ib tug tubtxib saum ntuj tso tus tubtxib Petus dim hauv tsev lojfaj. (Tubtxib Tes Haujlwm 12:6-11) Tsis tas li ntawd xwb, thaum Yexus xub pib tshaj tawm txoj xov zoo hauv ntiajteb no, cov tubtxib saum ntuj tau los txhawb nws. (Malakau 1:13) Ua ntej luag tuaj ntes Yexus mus tua, kuj muaj ib tug tubtxib saum ntuj tshwm los “txhawb [Yexus] lub zog” thiab. (Luka 22:43) Ob lub caij ntawd nyuaj kawg li rau Yexus. Peb yeej paub tias qhov uas cov tubtxib saum ntuj los nplig Yexus, yeej txhawb nws lub zog kawg li!

6. (1) Niaj hnub no Vajtswv cov tubtxib saum ntuj tiv thaiv Vajtswv cov tibneeg li cas? (2) Peb yuav teb cov lus nug twg?

⁶ Niaj hnub no, cov tubtxib saum ntuj tsis tshwm rau Vajtswv cov tibneeg hauv ntiajteb pom lawm. Txawm tias tibneeg qhov muag tsis pom Vajtswv cov tubtxib saum ntuj, los lawv tseem niaj hnub tiv thaiv Vajtswv cov tibneeg. Lawv tiv thaiv Vajtswv cov tibneeg txojkev sib raug zoo nrog Nws. Phau Vajlugkub hais tias: “[Yehauvas] tus tubtxib saum ntuj zov vij rawv cov uas paub ntshai [Yehauvas], thiab cawm kom lawv dim.” (Ntawv Nkauj 34:7) Vim li cas cov lus ntawd ho txhawb tau peb lub zog? Txhawb tau peb zog heev vim muaj tej plig uas limhiam kawg li, uas xav muab peb rhuav tshem! Cov plig ntawd yog leejtwg? Lawv los qhovtwg los? Lawv xav ua phem rau peb li cas? Yuav kom peb teb tau cov lus nug no, cia peb kawm seb tau muaj li cas thaum chiv keeb.

7. Xatas ntxias tau tibneeg coob npaum li cas yuam kev ntawm Vajtswv?

⁷ Zoo li peb twb kawm hauv Tshooj 3, muaj ib tug tubtxib saum ntuj xav ua tus kav, nws thiaj li fav xeeb tawm tsam  Vajtswv. Tus tubtxib ntawd tau lub npe hu ua Xatas uas yog Ntxwg Nyoog. (Qhia Tshwm 12:9) Ib txhiab rau pua xyoo tom qab Xatas ntxias tau Eva yuam kev, Xatas kuj ntxias tau coob leej ntau tus yuam kev ntawm Vajtswv thiab. Tag nrho noob neej yuav luag tso Vajtswv tseg. Tsuas tshuav qee tus thiaj li muab siab npuab Vajtswv xwb, zoo li Anpee, Enauj, thiab Nau-a.​—Henplais 11:4, 5, 7.

8. (1) Ua li cas ho muab cov tubtxib saum ntuj ib txhia hu ua dab? (2) Tiam Nau-a nyob, ua li cas cov dab ho dim Dej Nyab?

⁸ Nyob rau Nau-a tiam, muaj lwm cov tubtxib saum ntuj fav xeeb rau Yehauvas thiab. Lawv tso Vajtswv cuab tubtxib  saum ntuj tseg, thiab txia los ua tibneeg nyob hauv ntiajteb no. Vim li cas? Chiv Keeb 6:2 qhia li no: “Vajtswv cov tub pom tias neeg tej ntxhais zoo nkauj heev lawv txawm tuaj yuav cov uas lawv nyiam ua pojniam.” Qhov uas cov tubtxib saum ntuj ua li no, ua rau neeg hajyam ua phem ua qias. Tiamsis Vajtswv Yehauvas tsis pom zoo rau tej uas lawv ua no. Nws thiaj li txiav txim siab tso dej los nyab lub ntiajteb, rhuav tshem cov tibneeg limhiam. Nws tsuas cawm nws cov tub qhe ncaj ncees xwb. (Chiv Keeb 7:17, 23) Cov tubtxib saum ntuj uas fav xeeb rau Vajtswv thiaj txia ua lub cev plig li qub rov mus saum ntuj ceeb tsheej, kom lawv dim dej nyab. Tej uas lawv tau ua ntawd, qhia tias lawv tuaj Ntxwg Nyoog tog lawm. Yog li ntawd, thiaj muab cov tubtxib limhiam ntawd hu ua dab, thiab Ntxwg Nyoog thiaj tau lub npe hu ua “tus thawj dab.”​—Mathai 9:34.

9. (1) Thaum cov dab rov qab mus txog saum ntuj, ua li cas rau lawv lawm? (2) Peb yuav kawm li cas ntxiv txog cov dab?

⁹ Thaum cov tubtxib uas tsis mloog lus ntawd rov mus txog saum ntuj, lawv koom tsis tau nrog Vajtswv cuab tubtxib saum ntuj lawm, ib yam li Xatas. (2 Petus 2:4) Txawm yog nimno lawv txia tsis tau ua lub cev tibneeg lawm, los lawv tseem dag ntxias tau noob neej mus ua phem. Cov dab ntawd pab Xatas “dag ntxias neeg thoob ntiajteb.” (Qhia Tshwm 12:9; 1 Yauhas 5:19) Dag ntxias li cas? Cov dab siv ntau lub tswvyim los ntxias tibneeg yuam kev. (Nyeem 2 Khaulee 2:11.) Cia peb kawm seb cov dab xev tswvyim li cas los ntxias tibneeg.

10. Tej kevcai teev dab yog dabtsi?

¹⁰ Cov dab siv tej kevcai teev dab los ntxias tibneeg yuam kev. Cov tibneeg uas coj tej kevcai no nrog cov dab tham kiag lossis lawv mus cuag tej txiv neeb uas nrog tau dab txuas lus. Phau Vajlugkub yeej txwv tsis pub peb coj tej kevcai no thiab ceeb toom kom peb tsis txhob muaj feem nrog  tej kevcai ntawd kiag li. (Kalatia 5:19-21) Dab ntxias tibneeg zoo li tus neeg nuv ntses siv ntau hom kab los ntxias kom mag ntau hom ntses. Tej kevcai teev dab no zoo li cov kab nuv ntses ntawd ntag. Cov dab limhiam ntawd siv ntau yam xws li tej kevcai dab qhuas, kev saib yaig thiab lwm yam kevcai los haub ntxias tibneeg.

11. Txojkev saib hmoov yog dabtsi, thiab vim li cas peb yuav tsum tsis txhob koom nrog tej no?

¹¹ Ib hom kab nuv ntses uas dab siv los ntxias tibneeg yog txojkev saib hmoov. Txojkev saib hmoov yog dabtsi? Yog txojkev txheev dab kom yus paub lub neej yav tom hauv ntej seb yuav zoo li cas. Tibneeg saib hmoov li cas? Ib txhia saib hnub qub, ib txhia saib tes, saib xyab, ib txhia ntaus txheeb, thiab ib txhia txhais npau suav. Coob leej xav tias qhov uas tibneeg saib hmoov tsis txhaum dabtsi. Tiamsis phau Vajlugkub qhia tias cov neeg txawj saib hmoov thiab cov dab koom tes ua ke. Tubtxib Tes Haujlwm 16:16-18 pab peb pom tias yeej muaj li ntawd tiag. Cov nqe ntawd qhia txog ib tug ntxhais ua txawj saib hmoov vim nws “raug dab leej nkaub.” Tiamsis tom qab Povlauj ntiab tus dab tawm, tus ntxhais ntawd tsis txawj saib hmoov lawm.

12. Vim li cas tsis zoo rau peb txheev cov tuag?

¹² Cov dab kuj dag ntxias tibneeg rau lwm txojkev thiab. Dab txhawb kom tibneeg txheev cov tuag. Thaum ib tug neeg tas sim neej lawm, muaj kev nyuaj siab heev. Coob leej xav yuam kev tias yog lawv mus cuag ib tug neeg txawj txheev dab, ces lawv yuav txuas lus tau nrog tus tuag ntawd thiab yuav tau kev nplig siab. Tej zaum tus neeg txawj txheev dab yuav qhia tau lawv txog tus tuag, lossis yuav muaj lub suab uas zoo li tus tuag ntawd. Yog li ntawd, thaum lawv pom tej no, lawv ntseeg tias tus tuag ntawd tseem muaj sia nyob. Tiamsis tej no puas pab tau tibneeg tiag? Yeej pab tsis tau li. Tej no tseem qheb kev rau dab los ua phem rau tibneeg thiab. Rau qhov twb yog dab ua txuj siv lub suab zoo li tus neeg uas tuag ntawd lub xwb. Thiab  twb yog dab qhia tus neeg txheev dab txog tus tuag ntawd. (1 Xamuyee 28:3-19) Tsis tas li ntawd xwb, hauv Tshooj 6, peb twb kawm tias thaum ib tug neeg tuag lawm, nws tsis ciaj mus nyob qhovtwg li lawm. (Ntawv Nkauj 115:17) Yog li ntawd, cov uas “hu tej tuag” raug dab haub ntxias lawm xwb, thiab lawv tsis ua raws li Vajtswv lub siab nyiam. (Nyeem Kevcai 18:10, 11; Yaxaya 8:19) Peb cia li ceev faj, tsis txhob qaug rau lub tswvyim uas dab nyiam siv no.

13. Puas muaj leejtwg yuav dim tau txojkev ntshai dab?

¹³ Cov dab tsis yog dag ntxias tibneeg xwb, tiamsis dab kuj ua phem thiab hem kom tibneeg ntshai lawv. Niaj hnub no, Xatas thiab nws cov dab paub tias lawv “lub sijhawm tshuav tsis ntev lawm.” Vajtswv yuav muab lawv rhuav tshem. Yog li ntawd, lawv hajyam limhiam tshaj qhov qub. (Qhia Tshwm 12:12, 17) Puas muaj leejtwg yuav dim tau cov dab ntawd? Muaj tsheej txhiab tus tibneeg niaj hnub ua neej ntshai nrhw cov dab limhiam ntawd. Tiamsis thaum kawg, lawv kuj dim tau lawm thiab. Ua li cas lawv ho dim tau? Yog tias ib tug neeg twb teev dab lawm, nws yuav ua li cas nws thiaj dim?

14. Ib yam li cov Khixatia hauv lub moos Efexau, uas nyob rau thawj 100 xyoo, peb yuav ua li cas dim tau ntawm cov dab?

¹⁴ Phau Vajlugkub pab kom peb paub tawm tsam dab, thiab yuav pab kom peb dim cov dab ntawd. Cia peb kawm txog cov Khixatia hauv lub moos Efexau uas nyob rau thawj 100 xyoo. Ua ntej lawv ib txhia los ntseeg ua cov Khixatia, lawv coj lub neej teev dab. Thaum lawv tso kev teev dab tseg, lawv tau ua li cas? Phau Vajlugkub qhia tias: “Muaj ntau leej uas ua khawv koob yees siv kuj muab lawv tej ntawv khawv koob los hlawv ua ke tab meeg sawvdaws.” (Tubtxib Tes Haujlwm 19:19) Qhov uas cov Khixatia muab lawv tej ntawv khawv koob hlawv li ntawd, tseg tau tus qauv zoo heev rau cov neeg niaj hnub no, uas xav tawm tsam dab. Cov uas  xav teev tiam Yehauvas yuav tsum muab ib puas tsav yam uas txuam nrog kev teev dab pov tseg thiab. Tej ntawd yog dabtsi? Lawv yuav tsum muab tej ntawv, tej duab, thiab tej nkauj uas txhawb kev teev dab pov tseg. Thiab tsis tas li ntawd xwb, lawv yuav tsum muab tej pov haum, tej pov khoos, tej hlua khi tes, thiab tej khoom pov siav pov tseg huv tibsi.​—1 Khaulee 10:21.

15. Yuav kom peb tawm tsam yeej dab, peb yuav tsum ua dabtsi ntxiv?

¹⁵ Ntau xyoo tom qab cov Khixatia hauv Efexau muab lawv tej ntawv khawv koob hlawv pov tseg tas lawm, tus tubtxib Povlauj sau mus rau lawv tias lawv yuav tsum “tawm tsam tej dab.” (Efexau 6:12) Povlauj sau li ntawd, rau qhov cov dab yeej tawm tsam cov Khixatia tsis tseg li. Cov dab tseem rau siab ntso nrhiav kev los tswj cov Khixatia. Cov Khixatia yuav tsum ua li cas ntxiv? Povlauj qhia tias: “Cia li muab txojkev ntseeg ua daim hlau thaiv, uas nej siv tua tau tus uas Phem [Xatas] rab hmuv hluavtaws.” (Efexau 6:16) Yog tias peb txhawb peb txojkev ntseeg uas zoo li daim hlau  thaiv kom muaj zog, ces peb hajyam yuav tawm tsam yeej dab.​—Mathai 17:20.

16. Peb yuav txhawb peb txojkev ntseeg li cas?

¹⁶ Ua li peb yuav txhawb peb txojkev ntseeg li cas? Peb yuav tsum kawm phau Vajlugkub. Muab ua piv txwv li no: Yuav kom ib lub tsev ruaj khov, yuav tsum tsa ncej tsa nqaj khov kho thiab. Ib yam li ntawd, yuav kom peb txojkev ntseeg ruaj khov, peb yuav tsum paub qhov tseeb los ntawm phau Vajlugkub uas yog Vajtswv Txojlus. Qhov tseeb ntawd zoo li cov ncej thiab cov nqaj uas yus tsa khov kho, ua rau yus txojkev ntseeg ruaj khov. Yog tias peb nyeem thiab kawm phau Vajlugkub txhua txhua hnub, ces peb hajyam yuav muaj kev ntseeg dua li qub. Zoo li lub tsev uas khov kho, peb txojkev ntseeg yuav tiv thaiv peb ntawm dab tej kev haub ntxias.​—1 Yauhas 5:5.

17. Yuav kom peb tawm tsam yeej cov dab limhiam, peb yuav tsum ua dabtsi ntxiv?

¹⁷ Cov Khixatia yuav tsum ua dabtsi ntxiv, thiaj tiv thaiv tau lawv? Hauv lub moos Efexau muaj kev teev dab puv ntia txhua qhov chaw. Povlauj thiaj qhia li no rau lawv: “Cia li thov Vajtswv . . . txhua lub sijhawm, yuav tsum siv zog taij thov txhua yam.” (Efexau 6:18) Peb kuj nyob rau ib lub qab ntuj uas muaj kev teev dab puv ntia txhua qhov chaw thiab. Yog li ntawd, yuav kom peb tawm tsam yeej cov dab limhiam, peb yuav tsum thov Yehauvas tsis tu ncua, kom nws tiv thaiv peb. Tsis tas li ntawd, thaum peb thov Yehauvas peb yuav tsum siv nws lub npe. (Nyeem Paj Lug 18:10.) Peb yuav tsum rau siab ntso thov Vajtswv kom nws cawm peb “dim ntawm tus uas Phem,” uas yog Xatas. (Yauhas 17:15) Yehauvas yuav teb cov uas muab siab rau thov nws.​—Ntawv Nkauj 145:19.

18, 19. (1) Vim li cas peb ho paub tseeb tias peb yeej yuav tawm tsam yeej cov dab limhiam? (2) Peb yuav kawm txog lo lus nug twg nyob rau Tshooj 11?

¹⁸ Cov dab yeej limhiam kawg li, tiamsis peb tsis tas  ntshai lawv yog tias peb tawm tsam Ntxwg Nyoog. Tsis tas li ntawd xwb, peb yuav tsum txav ze rau Vajtswv es ua li Nws siab nyiam. (Nyeem Yakaunpau 4:7, 8.) Cov dab ntawd tsis muaj hwjchim loj npaum li Vajtswv. Lawv twb raug txim nyob rau Nau-a tiam lawm. Thiab yav tom hauv ntej lawv yuav raug txiav txim zaum kawg nkaus. (Yuda 6) Peb yuav tsum nco ntsoov tias peb muaj kev tiv thaiv los ntawm Yehauvas cov tubtxib saum ntuj uas muaj hwjchim kawg li. (2 Vajntxwv 6:15-17) Cov tubtxib saum ntuj ntawd xav pom peb tawm tsam yeej cov dab limhiam ntawd. Cov tubtxib ncaj ncees saum ntuj niaj hnub txhawb peb, kom peb rau siab ntso tiag. Yog li ntawd, cia peb txav ze rau Yehauvas thiab nws cuab tubtxib saum ntuj. Cia peb txav deb ntawm txhua txojkev teev dab, tsis hais yam loj yam me. Thiab cia peb coj raws li Vajtswv Txojlus qhuab qhia txhua lub sijhawm. (1 Petus 5:6, 7; 2 Petus 2:9) Thaum peb ua li no, ces peb yeej yuav tawm tsam yeej cov dab limhiam ntawd.

¹⁹ Tiamsis tibneeg nyob txom nyem ntsuav vim muaj dab thiab muaj tej kev limhiam. Ua cas Vajtswv ho cia muaj tej no? Peb yuav kawm txog lo lus nug no nyob rau Tshooj 11.