1. Ongwaye tji matu sokurihonga ohunga novaengeli?

OKUTJIWA omundu potuingi ku hepa kutja u tjiwe oveṱunḓu re wina. Momuano tjingewo, okutjiwa Jehova Mukuru maku hee kutja tu sokutjiwa ovaengeli, mbe ri eṱunḓu re romeyuru. Owo ve norupa rwaye mokuyenenisa ombango yaMukuru? Owo va ri norupa movitjitwa vyovandu vyorukapitaveze? Ovaengeli ve ṱuna kehupo roye? Ndoovazu pe ri nao, omomuano uṋe?

2. Ovaengeli va za pi, nowo ivengapi?

² Ombeibela i hungira ohunga novaengeli povikando ovingi. Ngatu tare ku tjiva vyavyo nu tu rihonge ovingi ohunga novaengeli. Owo va za pi? Ovakolose 1:16 mari tja: ‘Mu Ye [Jesus Kristus], Ndjambi oma uta oviṋa avihe, mbi ri meyuru na mbi ri kombanda yehi.’ Okutja oviutwa avihe vyombepo, mbi isanewa ovaengeli, vya memwa i Jehova okupitira mOmuna we otjiveri. Ku novaengeli vengapi? Ombeibela i raisa kutja Jehova wa mema ovaengeli omangete omengi, nu avehe ovanamasa.—Epsalme 103:20; Omavandururiro 5:11.

3. Ombeibela mu Job 38:4-7 mai tu raere tjike ohunga novaengeli?

 ³ Embo raMukuru, Ombeibela, mari tu raere kutja ehi tji ra utwa, ‘oviutwa avihe vyeyuru vya ravaera nenyando.’ (Job 38:4-7) Okutja ovaengeli va ri ko rukuru ngunda ovandu ave hi ya memwa, na wina ngunda ehi ari hi ya utwa. Etjangwa rOmbeibela ndi, mari raisa kutja ovaengeli ve tjaterwa tji kwa tjitwa otjiṋa otjiwa, orondu oro mari tja owo va ‘ravaera nenyando.’ Oruveze ndwo, ovaengeli avehe aave karere Jehova Mukuru otja eṱunḓu rimwe.

4. Ombeibela i raisa vi kutja ovaengeli mba ovaṱakame ve nombango movitjitwa vyovandu?

⁴ Okuza ku indu tji va muna ovandu ovatenga tji va memwa, oviutwa vyeyuru oviṱakame vya raisa ombango momekuriro weṱunḓu rovandu na momuano ondando yaMukuru mbu mai yenenisiwa. (Omiano 8:30, 31; 1 Petrus 1:11, 12) Nungwari oruveze otja tjaaru kayenda ovaengeli va muna ovandu ovengi tjaave poka kOmuute wawo worusuvero. Ihi tja hihamisa ovaengeli mba omutima. Posi yokutja, indu omundu nandarire umwe tje ritanaurire ku Jehova, ‘mape kara enyando komurungu wovaengeli.’ (Lukas 15:10) Mena rokutja ovaengeli ve rikendera kovakarere vaMukuru pu pe ṱa mbo, Jehova opaa zokuungurisa ovaengeli povikando ovingi okuzeuparisa nokuyama ovakarere ve ovaṱakame kombanda yehi. (Ovaheberi 1:7, 14) Tara kovihorera tjiva.

5. Ovihorera viṋe vyombatero okuza kovaengeli mbi ri mOmbeibela?

⁵ Ovaengeli vevari va yama omurumendu omusemba Lot novanatje ve ovakazona komayandekero wovihuro ovirunde vyaSodom na Gomora mokuvepitisa movihuro mbyo. (Genesis 19:15, 16) Ozombura ozengi kombunda yanao, omuprofete Daniel wa yumbwa motjitoto tjozongeyama, nozo kaze mu tjitire otjipo. Eye wa tja: “Ndjambi wa hindi omuengeli we kutja e ye okupata ovinyo vyozongeyama.” (Daniel 6:22) Meserewondo etenga O.Z., omuengeli wa kutura omuapostele Petrus okuza mondeko. (Oviungura 12:6-11) Ovaengeli wina va yanḓiparisa Jesus indu tja uta oviungura vyokuzuvarisa kombanda yehi. (Markus 1:13) Nu  okaruveze okasupi komurungu wonḓiro yaJesus, omuengeli we rimunikisa ku ye “ne Mu zeuparisa.” (Lukas 22:43) Ombatero ndjo tjiri ya zeuparisa Jesus tjinene moruveze rwouzeu ndwo!

6. (a) Ovaengeli ve tjevera vi ovakarere vaMukuru ndino? (b) Omapuriro yeṋe ngu matu katara ko nai?

⁶ Moruveze rwetu, ovaengeli kave rimunikisa rukwao kovakarere vaMukuru kombanda yehi. Nandarire kutja ovaengeli vaMukuru ovanamasa kave munika kovandu, owo ngunda ve tjevera ovandu ve, nu tjinene koviṋa mbi mape ya avi ve hihamisa mohamunika. Ombeibela mai tja: “Omuengeli waMuhona u tjevera imba mbe nondira ku Ye, nu u ve isa mo moumba.” (Epsalme 34:7) Ongwaye omambo ngo tji maye tu zeuparisa? Omena rokutja ku noviutwa vyombepo ovirunde nu ovinaumba mbi vanga okutunyona! Oviutwa viṋe mbyo? Ovyo vya za pi? Nu vi kondjisa okutuhihamisa vi? Okumuna omaziriro, ngatu tare ku imbi mbya tjitwa kombutiro yovandu.

7. Satan wa toṋa pu pe ṱa pi okupora ovandu ku Mukuru?

⁷ Otja tji twe ri honga mEkondwa 3 rembo ndi, umwe wovaengeli aa vanga okuhonaparera po varwe nu wa pirukira Mukuru. Kombunda eye wa katjiukwa otja Satan Omudiaboli. (Omavandururiro 12:9) Mozombura 1 600 Satan tja za nokupukisa Eva, eye wa pora ovandu ovengi ku Mukuru, pendje na tjiva ovaṱakame, tjimuna Abel, Enok na Noa.—Ovaheberi 11:4, 5, 7.

8. (a) Ovaengeli tjiva pe ya vi ve rire ozondemone? (b) Ozondemone za tjita tjike kutja aze ha yandekwa mOmupupo woruveze rwaNoa?

⁸ Momayuva waNoa ovaengeli tjiva va pirukira Jehova. Owo va isa eṱunḓu raMukuru romeyuru, ave ya kombanda yehi nave rundurura otutu twawo twombepo mu itwi twovandu. Va tjitira tjike nao? Mu Genesis 6:2 matu lese nai: “Novanatje ovazandu vaNdjambi tji va muna kutja ovanatje  ovakazona mba vovandu ovawa, arire tji ve ritoororere ngamwa imba owo mbu mave vanga okukupa.” Nungwari Jehova Mukuru ke na pa yandjera ovaengeli mba ve kayende komurungu okutjita ourunde nokuzunḓa ovandu. Eye wa eta omupupo omunene kombanda yehi mbwa yandeka ovandu avehe ovarunde na yama ovakarere ve ovaṱakame uriri. (Genesis 7:17, 23) Okutja ovaengeli ovapirukire mba mbe isanewa ozondemone, va isa otutu twawo twonyama nave yaruka keyuru otjoviutwa vyombepo. Owo ve kerikuta kOmudiaboli, eye ngwa rira ‘omunene wozombepo ozohakohoke.’—Mateus 9:34.

9. (a) Ozondemone tji za yaruka keyuru za katjitwa vi? (b) Matu kakonḓonona tjike ohunga nozondemone?

 ⁹ Ovaengeli ovehinanḓuviro mba tji va yaruka keyuru, owo kave yakurirwe motjimbumba tjaMukuru tjovaengeli, tjimuna omunane wawo, Satan. (2 Petrus 2:4) Nandarire kutja owo nai kave yenene okutanaura otutu twawo rukwao, owo ngamba ve pukisa ovandu tjinene. Satan u “pukisa ouye auhe” nombatero yozondemone nḓa. (Omavandururiro 12:9; 1 Johanes 5:19) Omomuano uṋe? Tjinenenene, ozondemone ze ungurisa omihingo pekepeke okupukisa ovandu. (2 Ovakorinte 2:11) Ngatu tare komihingo tjiva mbi.

10. Oundjai ovikeṋa?

¹⁰ Okupukisa ovandu, ozondemone ze ungurisa oundjai. Omaungurisiro woundjai, okuhakaena nozondemone, kutja okuyenda omuini poo okupitira monganga yomuzorondu poo mombetere. Ombeibela i tu tjaera koundjai nu i tu rakiza okuhumburuka kokure noviṋa mbi mavi tjama noundjai. (Ovagalate 5:19-21) Ozondemone ze ungurisa oundjai tjimuna omundu tje ungurisa oukurya okupata nawo ouzera. Omupate wouzera u ungurisa oukurya pekepeke. Momuano otjingewo, ozondemone ze ungurisa omihingo pekepeke vyoundjai okupukisa navyo ovandu.

11. Okuuka otjikeṋa, nongwaye tji matu sokukara kokure nokuuka?

¹¹ Ombate imwe ndji ungurisiwa i ozondemone, okuuka poo okuvetera, okutja okukondja okutjiwa oruyaveze poo okuvanga okutjiwa ohunga notjiṋa tji tji hi nakutjiukwa. Omiano tjiva vyokuuka poo vyokuvetera okumangurura oturoto, okutara motjiritarero poo kozonyose nḓe kara momambo nondando yokuvanga okutjiwa oruyaveze. Ovandu tjiva wina tji va tono omukwe, pe kamburwa kutja mape tjitwa otjiṋa otjiwa poo otjivi. Nandarire kutja ovandu ovengi ve muna kutja okuuka katjiṋa otjivi, Ombeibela i raisa  kutja ozombuke ze ungura ku nozombepo ozombi. Okutara kotjihorera, Ombeibela mOviungura 16:16-18 mai tamuna omusuko ngwa ri “nombepo ombi ndje mu tjitire okurira ombuke.” Nungwari eye wa pandjara omasa nga indu ombepo ndji tji ya pitisiwa mu ye.

12. Ongwaye tje ri otjiṋa otjiete tjoumba okukondjisa okuhungira novaṱi?

¹² Omuano warwe ozondemone mbu ze pukisa nawo ovandu, omokutjita aayo ozo onḓe ri ovandu vawo mba ṱa. Ovandu mbe noruhoze mena ronḓiro yomusuverwa wawo, potuingi ve pukisiwa i omeripura woposyo ohunga na imba mba ṱa. Tjiva ve tja ve yenderwa i ovaṱi vawo. Porumwe ve tja va zuu, va munu poo ve siniwa i ovaṱi. Okutja otjingi tjawo mena roviṋa mbi ve yenda kozonganga zovazorondu okukapaha ombatero poo ondjiviro osemba ohunga novaṱi vawo poo ve kapura oveni kovaṱi. Kunao ovandu ovengi ve kambura kutja ovaṱi tjiri ve nomuinyo nu mave yenene okuvevatera. Nungwari ombatero otja indjo tjiri omungandjo nu mai tu hitisa moumba. Ongwaye tji maku zu nao?  Mena rokutja ozondemone ze horera eraka romuṱi naze yandja ombuze kombetere poo kondjai ohunga na ingwi omuṱi. (1 Samuel 28:3-19) Nu ovaṱi kave nomuinyo rukwao, otja tji twe rihonga mEkondwa 6. (Epsalme 115:17) Okutja omundu “ngu ma kapura ovaṱi” eye wa pukisiwa i ozombepo ozombi nu ma tjiti otjiṋa Mukuru tja tonda. (Deuteronomium 18:10, 11; Jesaja 8:19) Okutja ṱakamisa kutja o ha wire mongwehe ndji, ndji ungurisiwa i ozondemone.

13. Ovandu ovengi mbaave tira ozondemone va tjita vi?

¹³ Ozombepo ozombi kaze pukisa ovandu uriri nungwari wina ze ve tirisa. Nai, Satan nozondemone ze mave tjiwa kutja kwa sewa ‘oruveze orusupi uriri’ ku wo okupandekwa, kunao owo va ririra ko ovindandi. (Omavandururiro 12:12, 17) Nandi pe ri nao, ovandu mbaave tira ozombepo ozombi nḓa, va kuturwa. Ihi ve tji tjita vi? Omundu nai ngu ungurisa oundjai poo oviṋa mbi tjama nounganga, ma yenene okupoka vi ku vyo?

14. Otja tji twa muna kOvakriste veserewondo etenga moEfesus, eṱe matu yenene vi okupoka kozombepo ozombi?

¹⁴ Ombeibela mai tu hongo omiano vyokupirukira ozombepo ozombi nokupoka ku zo. Tara kotjihorera tjOvakriste veserewondo etenga mba ri motjihuro tjaEfesus. Tjiva vawo aave ungurisa oundjai ngunda ave hi ya rira Ovakriste. Indu tji va tya okupoka koundjai, owo va tjita tjike? Ombeibela mai tja: “Otjingi tjaimba mba tjitire oundjai va woronganisa omambo wawo nave ye nyosire momurungu wovandu.” (Oviungura 19:19) Mokunyosa omambo wawo woundjai, Ovakriste ovape mbo va yandja otjihorera ku avehe mbu mave vanga okupirukira ozombepo ozombi ndino. Ovandu mbu mave vanga okukarera Jehova mave sokuimbirahi oviṋa avihe mbi notjiṋa noundjai. Ovyo oviṋa tjimuna omambo, oviperendero, nomizumbi mbi tunduza ovandu okuungurisa oundjai. Vyarwe wina ozongoho, nozongoze nḓe  kutwa movanatje poo movandu ovanene okutjaera ozombepo ozombi. Owo wina kave sokurihwa omiti motutu mbi ku za vi eta ouṋingandu poo okuungurisa omongwa okutjaera ovaroi, nomeva womuronga okuripanga nawo.—1 Ovakorinte 10:21.

15. Eṱe matu sokutjita tjike kutja tu pirukire ozombepo ozombi?

¹⁵ Ozombura tjiva Ovakriste moEfesus tji va za nokunyosa omambo wawo woundjai, omuapostele Paulus wa tja nai ku wo: ‘Matu ru nozombepo ozonamasa zouye ourunde mbwi.’ (Ovaefese 6:12) Ozondemone ngundee aaze kondjisa okupukisa ovandu. Okutja otjikeṋa tjarwe Ovakriste mbo tjaave sokutjita? Paulus wa tja: “Nu aruhe tjindeye ongamburiro otja oruvao meke reṋu; orondu nongamburiro ndji mamu sora okuzemisa oviku vyomuriro vyaingwi umwe Omurunde” Satan. (Ovaefese 6:16) Indu oruvao rwetu rwongamburiro tji ru nomasa, eṱe wina otji matu kara nomasa yokupirukira ozombepo ozombi nḓo.—Mateus 17:20.

16. Matu yenene vi okuzeuparisa ongamburiro yetu?

¹⁶ Nu matu zeuparisa vi ongamburiro yetu? Omokukonḓonona Ombeibela. Omasa wekuma ye rekareka tjinene komazikameno waro. Momuano otjingewo, omasa wongamburiro yetu ye sokuzikamena kondjiviro yatjiri yEmbo raMukuru, Ombeibela. Indu tji matu lese nokukonḓonona Ombeibela eyuva arihe, ongamburiro yetu mai hara omasa. Otja ekuma enamasa, ongamburiro otja indjo mai tu yama kozombepo ozombi.—1 Johanes 5:5.

17. Omukambo uṋe mbu matu sokutoora kokutja tu pirukire ozombepo ozombi?

¹⁷ Omukambo uṋe warwe Ovakriste mo Efesus mbwaave sokutoora? Owo aave hepa ombatero orondu owo va turire motjihuro tji tje urire nozondemone. Okutja Paulus wa tja nai ku wo: “Avihe mbi tjiteye amamu kumbu nu mu ningire ku Ndjambi aruhe mOmbepo.” (Ovaefese 6:18) Nu mena rokutja eṱe wina tu hupa mouye mbwe ura nozondemone, matu sokukumba ku Jehova nombango aihe kutja me tuvatere okupirukira ozombepo ozombi. Tjiri, matu sokuungurisa ena raJehova  mozongumbiro zetu. (Omiano 18:10) Okutja, matu sokukumba aruhe kutja Mukuru me tu “tjevere ku ingwi Omurunde,” Satan Omudiaboli. (Johanes 17:15) Jehova ma ziri ozongumbiro otja inḓo.—Epsalme 145:19.

18, 19. (a) Eṱe matu tjiwa vi kutja matu toṋa motjirwa tjetu ku noviutwa vyombepo ovirunde? (b) Epuriro riṋe ndi mari kazirwa mekondwa ndi mari kongorere ko?

¹⁸ Ozombepo ozombi ozonaumba, nungwari katu sokuzetira indu tji matu pirukire Omudiaboli natu tumbuka ku Mukuru mokutjita ombango Ye. (Jakobus 4:7, 8) Omasa wozombepo ozombi ye nomaandero. Ozo za vererwe momayuva waNoa, nu nai ze undja ombanguriro osenina ndji mai kara ko moruyaveze. (Judas 6) Zemburuka wina kutja eṱe tu ri mondjeverero yovaengeli ovanamasa vaJehova. (2 Ozombara 6:15-17) Ovaengeli mbo ve vanga kutja tu pirukire ozombepo ozombi nondoṋeno. Ovaengeli ovasemba mba ve ri mbo okutupa oruvara. Okutja ngatu kare popezu na Jehova neṱunḓu re roviutwa vyombepo oviṱakame. Nu ngatu kare ohumburuko noundjai ngamwa nu aruhe ngatu puratene komaronga wEmbo raMukuru. (1 Petrus 5:6, 7; 2 Petrus 2:9) Okutja otji matu toṋa motjirwa tjetu ku noviutwa vyombepo ovirunde.

¹⁹ Nu hapo ongwaye Mukuru tja yandjera ozombepo ozombi nourunde kutja vi etere ovandu omauzeu omengi nao? Epuriro ndo mari kazirwa mekondwa ndi mari kongorere ko.