1. Чьрʹа әм гәрәке пебьһʹәсьн дәрһәԛа мьлйакʹәта?

ЧАХЕ тӧ дьхԝази рʹьнд тʹәви кәсәки бьби нас, тӧ ӧса жи насийа хԝә дьди малбәта ԝи. Ләма жи сәва кӧ Йаһоԝа рʹьнд нас ки, тӧ гәрәке дәрһәԛа мьлйакʹәта жи пебьһʹәси, әԝ һәнә нәфәред малбәта Йаһоԝайә әʹзмана. Дь Кʹьтеба Пирозда ль сәр мьлйакʹәта те готьне «лаԝед Хԝәде» (Ибо 38:7). Гәло Йаһоԝа Хԝәде чь шьхӧл дайә ԝан? Гәло дь тʹәрихийеда шьхӧле мьлйакʹәта ль сәр мәрийа һʹӧкӧм буйә? Дьбә кӧ шьхӧле мьлйакʹәта иро ль сәр әʹмьре тә жи һʹӧкӧм дьбә? Һәрге бәле, чаԝа?

2. Ча мьлйакʹәт һатьнә дьне, у ль әʹзмана чьԛас мьлйакʹәт һәнә?

² Дь Кʹьтеба Пирозда дәрһәԛа мьлйакʹәта бь сәда щара һатийә ньвисаре. Ԝәрә әм бьньһерʹьн чәнд рʹеза, бь сайа кʹижана әм дькарьн һе зәʹф пебьһʹәсьн дәрһәԛа мьлйакʹәта. Мьлйакʹәт ча һатьнә дьне? Дь кʹьтеба Колоси 1:16-да ньвисар ә: «Бь дәсте ԝи [Иса Мәсиһ] һәр тьштед ль әʹрд у әʹзмана әʹфьринә». Ча те кʹьфше, Йаһоԝа бь дәсте Кӧрʹе хԝәйи тайе тʹәне, демәк Иса Мәсиһ һʹәму мьлйакʹәт әʹфьрандийә. Ле ль әʹзмана чьԛас мьлйакʹәт һәнә? Жь Кʹьтеба Пироз әм педьһʹәсьн, ԝәки ль әʹзмана бь һʹәзара у милйона мьлйакʹәт һәнә, у әԝана гьшк ԛәԝат ьн (Зәбур 103:20).

3. Жь кʹьтеба Ибо 38:4-7, дәрһәԛа мьлйакʹәта әм чь педьһʹәсьн?

³ Дь Хәбәра Хԝәдеда, демәк Кʹьтеба Пирозда, те готьне, кӧ чахе Йаһоԝа Хԝәде әʹрд дьәʹфьранд «һʹәмуйа лаԝед  Хԝәде бь кʹефхԝәшийева банг дькьрьн» (Ибо 38:4-7). Жь ве рʹезе те кʹьфше, кӧ мьлйакʹәт пешийа әʹфьрандьна мәрьва у пешийа әʹфьрандьна әʹрде һәбунә. Ӧса жи дь ван рʹезада те готьне, кӧ мьлйакʹәт һәврʹа «дьстьрийан». Бь ван хәбәра әʹйан дьбә, ԝәки һʹәста мьлйакʹәта һәйә, демәк әԝана дькарьн шабьн у бәрхԝә кʹәвьн.

4. Жь Кʹьтеба Пироз ча те кʹьфше, кӧ мьлйакʹәтед амьн хәм дькьн бона һʹалхԝәшийа мәрьва?

⁴ Чахе Йаһоԝа у Иса мәрьвед пешьн әʹфьрандьн мьлйакʹәта жи жь әʹзмана дьньһерʹин, жь ԝан ԝәʹхтада мьлйакʹәтед амьн пәй мәрьва дьньһерʹьн у хәм дькьн дәрһәԛа һʹалхԝәшийа ԝан у ӧса жи дәрһәԛа ԛәдандьна ԛьрара Йаһоԝа Хԝәде (Мәтʹәлок 8:30, 31; 1 Пәтрус 1:11, 12). Ле мьлйакʹәта ӧса жи дьдит, кӧ ԝәʹдә чьԛас дәрбаз дьбу мәрьв һе зедә жь Әʹфьрандаре хԝәйи һʹьзкьри дур дькʹәтьн у нәдьхԝәстьн ԝирʹа ԛӧльх кьн. Бейи шьк, жь бо ве йәке мьлйакʹәтед амьн бәрхԝә дькʹәтьн. Ле һәрге кәсәк тʹобә дькә у дәстпедькә гӧрʹа Йаһоԝа Хԝәде бькә, мьлйакʹәтед амьн «ша дьбьн» (Луԛа 15:10). Жь вьр те кʹьфше, кӧ мьлйакʹәт гәлә хәм дькьн бона һʹалхԝәшийа ԝан мәрийа, йед кӧ Хԝәдерʹа ԛӧльх дькьн. Ләма жи, Йаһоԝа тʹьме мьлйакʹәт дьшандьн, сәва кӧ али ԛӧльхкʹаред хԝәйә амьн бькә у ԝана хԝәй кә. (Бьхунә Ибрани 1:7, 14.) Ньһа әм пебьһʹәсьн чәнд мәсәла.

5. Кʹижан мәсәлә жь Кʹьтеба Пироз нишан дькьн, кӧ мьлйакʹәта али мәрьва кьрьнә?

⁵ Дӧ мьлйакʹәта, али мәрьвәки амьн Лут у ԛизед ԝи кьрьн. Ԝана Лут у ԛизед ԝи жь шәһәред зӧлм Содом у Гоморе дәрхьстьн у жь ԛьрʹкьрьне хьлаз кьрьн (Дәстпебун 19:15, 16). Пәй ве йәкерʹа чәнд сәд сал шунда, Данийел пʹехәмбәр, һатьбу авитьне бире ль нава шера. Ле шера зийан нәданә ԝи. Ле гәло әԝ йәк ча ԛәԝьми? Данийел әԝ йәк ӧса шьровәкьр: «Хԝәдайе мьн мьлйакʹәте хԝә шанд у дәве шера гьртьн» (Данийел 6:22). Ӧса жи дь ԛьрʹна йәкеда, мьлйакʹәт Пәтрусе шанди жь кәле аза кьр  (Кʹаред Шандийа 12:6-11). Хенщи ве йәке чахе Иса дәстпекьр ль сәр әʹрде ԛӧльх кә, мьлйакʹәта әԝ ԛәԝи дькьрьн (Марԛос 1:13). Пешийа мьрьна Иса жи, мьлйакʹәт ԝива хӧйа бу у «әԝ ԛәԝат кьр» (Луԛа 22:43). Бь рʹастийе жи дьлбиникә чьԛас мәзьн бу сәва Иса, кӧ мьлйакʹәт әԝи ԝәʹде фәрз дь әʹмьре ԝида, әԝ ԛәԝи кьр.

6. (а) Ча рʹожа иройин мьлйакʹәтед баш хәм дькьн бона щьмәʹта Хԝәде? (б) Дәрһәԛа кʹижан пьрса әме ньһа хәбәрдьн?

⁶ Рʹожа иройин ль сәр әʹрде мьлйакʹәт ида ԛӧльхкʹаред Хԝәдева хӧйа набьн. Рʹаст ә әв мьлйакʹәтед ԛәԝат найнә дитьне, ле әԝана хәм дькьн бона щьмәʹта Хԝәде. Илаһи сәва кӧ һәләԛәтийа мә тʹәви Йаһоԝа Хԝәде хьраб нәбә. Дь Кʹьтеба Пирозда те готьне: «Мьлйакʹәте Хӧдан, ль дора кәсед кӧ жь ԝи дьтьрсьн, артешгәһе ава дькә», демәк хԝәй дькә, «у ԝан хьлаз дькә» (Зәбур 34:7). Әв гьли гәлә дьлбинийе дьдьнә мә, чьмки щьн дьхԝазьн ԛьрʹа мә биньн! Ле щьн кʹи нә? Ча әԝана һатьнә дьне? Ча әԝана дькарьн зийане бьдьнә мә? Сәва кӧ щаба ван пьрса бьбиньн, ԝәрә әм кьн пебьһʹәсьн, чь ԛәԝьми дәстпека тʹәрихийа инсанәте.

7. Мире-щьна чьԛас мәри жь Хԝәде дур хьст?

⁷ Ча әм жь сәре сьсийа пеһʹәсийан, йәк жь мьлйакʹәта хԝәст сәркʹартийе бькә, у мьԛабьли Хԝәде дәркʹәт. Паше әԝ һатә нав кьрьне Шәйтʹан Мире-щьна (Әʹйанти 12:9). Паши ве йәке чахе Мире-щьна Һеԝа хапанд, дь нава 1600 салада әԝи диса гәләк мәри жь Хԝәде дур хьст. Ле һәбун йед ӧса кӧ Хԝәдерʹа амьн ман мәсәлә Һабил, Һәнох у Нӧһ (Ибрани 11:4, 5, 7).

8. (а) Ча һьнә мьлйакʹәт бунә щьн? (б) Щьна чь кьр, ԝәки жь Селава дь ԝәʹде Нӧһда хьлаз бьн?

⁸ Дь ԝәʹде Нӧһда һьнә мьлйакʹәтед дьн жи мьԛабьли Хԝәде дәркʹәтьн. Ԝана әʹмьре әʹзмана һишт, хԝә кьрьн мәри у ӧса пәйа бун ль сәр әʹрде. Гәло чьрʹа? Дь кʹьтеба Дәстпебун 6:2-да те готьне: «Зарʹед Хԝәде дитьн кӧ ԛизед мәрьвайе бәдәԝ ьн, жь ԝан кʹе кʹижан бәгәм дькьр хԝәрʹа жьн дьстандьн (ПКʹМ)». Ԝана мәри һини хьрабийе дькьр,  ле Йаһоԝа дь һьндава ве йәкеда бе тʹалаш нибу, ләма жи әԝи нәһишт кӧ зӧлмийа ԝан дьреж бькʹьшинә. Хԝәде ль сәр тʹәмамийа әʹрде селав рʹакьр, у һʹәму мәрьвед зӧлм ԛьр бун. Тʹәне ԛӧльхкʹаред ԝийә амьн хьлаз бун (Дәстпебун 7:17, 23). Әв мьлйакʹәтед хьраб, йане щьн ԛальбед мәрьвайе һиштьн у пашда вәгәрʹийанә әʹзмана. Бь ви щурʹәйи ԝана алийе Мире-щьна, демәк «сәрԝере щьна» гьрт (Мәтта 9:34).

9. (а) Чь ԛәԝьми, чахе щьн пашда вәгәрʹийанә ль әʹзмана? (б) Дәрһәԛа щьна әме чь пебьһʹәсьн?

⁹ Хԝәде ча бәри Мире-щьна дабу, ӧса жи бәри ԝан щьна да, йед кӧ ԝәʹде селаве вәгәрʹийанә ль әʹзмана (2 Пәтрус 2:4). Рʹаст ә рʹожа иройин әв мьлйакʹәт нькарьн бьбьнә  мәри, ле әԝана диса жи мәрийарʹа хьрабийе дькьн у хьраб ль сәр ԝан һʹӧкӧм дьбьн. Бь аликʹарийа щьна, Шәйтʹан Мире-щьна «тʹәмамийа дьне хальфандийә» (Әʹйанти 12:9; 1 Йуһʹәнна 5:19). Ле чаԝа? Щьн, щурʹә-щурʹә тьшт дькьн, ԝәки мәрийа бьхальфиньн у бьдьн шашкьрьне. (Бьхунә 2 Корьнтʹи 2:11.) Ԝәрә әм пебьһʹәсьн дәрһәԛа ван тьшта.

10. Чь йә сербази?

¹⁰ Щьн сәва кӧ мәрийа бьхальфиньн, сербазийе дьдьнә хәбате. Сербази әв һәйә һәләԛәти тʹәви щьна. Кʹьтеба Пироз сербазийе инкʹар дькә, у тʹәмийе дьдә мә, ԝәки әм жь ԝан һʹәму тьшта чь кӧ тʹәви сербазийе гьредайи йә, хԝә дур бьгьрьн (Галати 5:19-21). Чаԝа хԝарьна мәʹсийа али мәʹсигьрʹа дькә ԝәки мәʹсийа бьгьрьн, ӧса жи сербази али щьна дькә ԝәки мәрийа бьдьнә шашкьрьне. Мәʹсигьр сәва кӧ щурʹә-щурʹә мәʹси бьгьрьн, щурʹә-щурʹә хԝарьн дьдьн хәбате. Мәсәлә кӧрм, нан у диса тьштед майин. Ӧса жи щьн, бь сайа щурʹә-щурʹә сербазийе, дькарьн һʹәму щурʹә мәрийа бьхальфиньн.

11. Чь йә кʹочʹәкти, у чьрʹа әм гәрәке жь ве йәке хԝә дур бьгьрьн?

¹¹ Щьн ӧса жи бь фәʹльквәкьрьне мәрийа дьхапиньн. Ле чь йә фәʹльквәкьрьн? Әв те һʹәсабе чахе дьхԝазьн пебьһʹсьн дәрһәԛа ахьрийе, йан жи дәрһәԛа тьштед нә әʹйан. Мәсәлә фәʹльквәкьрьн бь аликʹарийа стәйрка һәйә, бь карта, бь ԛаԝе, фәʹльквәкьрьн ль сәр дәста, шьровәкьрьна хәԝна йан бәньк кьрьн. Һʹәчʹи зәʹф жь мәрийа дьфькьрьн кӧ дь фәʹльквәкьрьнеда тьштәки хьраб тʹӧнә. Ле жь Кʹьтеба Пироз әм педьһʹәсьн, кӧ бь рʹастийе щьн али фәʹльквәкьрийа у кʹочʹәка дькьн, у жь вьр әм фәʹм дькьн кӧ щьн тʹәви фәʹльквәкьрийа у кʹочʹәка гьредайи нә. Мәсәлә дь Кʹаред Шандийа 16:16-18-да те гьликьрьне, кӧ «рʹӧһʹе кʹочʹәктийе» ԛәԝат дьда ԛизәке, ԝәки әԝ дәрһәԛа ахьрийе әʹйан кә. Ле чахе рʹӧһʹе кʹочʹәктийе, демәк щьн жь ԝе дәркʹәт, әԝе ида нькарьбу кʹочʹәкти бькьра.

12. Чьрʹа хәбәрдан тʹәви мьрийа хоф ә?

¹² Щьн диса бь щурʹәки, мәрийа дьдьнә шашкьрьне.  Ԛәԝата щьна һәйә хԝә бьдьнә кʹьфше мина мьрийед мә, йан жи мина дәнге ԝан хәбәрдьн у әʹламәтийед ӧса дәрбази мә бькьн, чь кӧ тʹәне әв мьрийед мәйә незик заньбун. Ӧса жи щьн заньн, кӧ һәр мәрьвәк бира мьрийед хԝә дькә. Ләма жи щьн әԝе ԛәԝата хԝә дьдьнә сербаза у чахе кәсәк дьчә щәм сербаза, ԝәки тʹәви мьрийед хԝә хәбәр дә, сербаз бь дәнгәки ӧса хәбәр дьдә кӧ ԝана тʹьре мьрийед ԝана йә хәбәр дьдә у һе дьжи, бь ԝе йәке щьн һелана дьдьнә мәрийа, ԝәки һәрʹьн йан чь тʹәви мьрийед хԝә хәбәр дьн (1 Самуйел 28:3-19). Ле ча әм жь сәре 6 пеһʹәсийан, чахе мәри дьмьрә әʹмьре ԝи хьлаз дьбә әԝ ида нажи (Зәбур 115:17). Ләма жи чахе кәсәк «гази мьрийа дькә», әԝана бь щьна тенә хапандьне у мьԛабьли ԛьрара Хԝәде дәрдькʹәвьн (Бьхунә Ԛануна Дӧщари 18:10, 11, ПКʹМ; Ишайа 8:19). Ле һаш жь хԝә һәбә, ԝәки хԝә жь ве ԛәзийаийе дур бьгьри у нәкʹәви тʹәлька щьна.

13. Гәлә мәри, йед кӧ тьрса щьна ль сәр ԝан һәбу, чь карьбунә бькьн?

¹³ Щьн нә кӧ тʹәне мәрийа дьдьнә хапандьне, ле ӧса жи  ԝана дьтьрсиньн. Мире-щьна у щьнед ԝи заньн, кӧ ԝәʹде ԝан «һьндьк» майә, у әԝана ԝе бенә гьредане. Ләма жи ньһа әԝана гәлә һерс ьн (Әʹйанти 12:12, 17). Ле бь һʹәзара мәри, йед кӧ жь щьна дьтьрсийан у тʹьме бьн ве тьрседа дьжитьн, иро жь ве тьрсе аза бунә. Гәло әв йәк ԝанарʹа ча һәв-һат? У әв мәри, йед кӧ ида сербазийева гьредайи йә, чь гәрәке бькә?

14. Ча әм дькарьн мина мәсиһийед жь бажаре Әфәсе ԛьрʹна йәкеда, хԝә жь сербазийе хԝәй кьн?

¹⁴ Дь Кʹьтеба Пирозда те шьровәкьрьне, ча хԝә жь щьна хԝәй кьн у жь ԝан аза бьн. Ԝәрә әм бьньһерʹьн мәсиһийед дь ԛьрʹна йәкеда жь бажаре Әфәсе чь мәсәлә мәрʹа һиштьн. Пешийа кӧ бьбуна мәсиһи, әԝана сербазийева гьредайи бун. Ле чахе сафи кьрьн сербазийе бьһельн, ԝана чь кьр? Дь Кʹьтеба Пирозда ньвисар ә: «Йед сербазийева жи кӧ мьжул дьбун, гәләка кʹьтебед хԝә тʹоп дькьрьнә щики у ль бәр һʹәмуйа дьшәԝьтандьн» (Кʹаред Шандийа 19:19). Бәле әван мәсиһийа, кʹьтебед сербазийе нә кӧ тʹәне авитьн, ле шәԝьтандьн у бь ве йәке мәсәләкә баш һиштьн ԝанарʹа, кʹи кӧ дьхԝазә хԝә жь щьна хԝәй кә. Һәрге мәри дьхԝазьн Йаһоԝарʹа ԛӧльх кьн, лазьм ә бьһельн һʹәму тьштед кӧ сербазийева гьредайи нә. Мәсәлә, һәнә кʹьтеб, нәшьрькьрьн, синәм (филм), шькьл у кʹьлам, йед кӧ сербазийева гьредайи нә. Әв һʹәму тьшт мәрийа бәрбь сербазийе дькʹьшинә у сербазийе ча тьштәки һʹәԝас у бе хоф дьдә кʹьфше. Сербазийева ӧса жи гьредайи нә тʹәлисмә, морийед чʹәʹва у тьштед майин йед кӧ хԝәва дькьн, сәва кӧ жь ԛәзийа йан рʹӧһʹе хьраб хԝә хԝәй кьн (1 Корьнтʹи 10:21).

15. Әм чь гәрәке бькьн, ԝәки хԝә жь щьна хԝәй кьн?

¹⁵ Чәнд сал шунда, паши ԝе йәке чахе мәсиһийед Әфәси кʹьтебед сербазийе шәԝьтандьн, Паԝлосе шанди ӧса ԝанарʹа ньвиси: «Шәрʹе мә . . . мьԛабьли ордийед рʹӧһʹанийә хьрабә ль дийаре әʹзмана нә» (Әфәси 6:12). Ча  те кʹьфше, щьна нәдьхԝәст мәсиһийа бьһельн. Әԝана бь һʹәму ԛәԝата хԝә тʹәви мәсиһийа шәрʹ дькьрьн, ԝәки ԝана алт кьн. Ле мәсиһийа чь гәрәке бькьрана, ԝәки хԝә жь щьна хԝәй кьрана? Паԝлос әԝана ширәт кьрьн: «Баԝәрийе мина мәртʹале бьгьрьнә хԝә, бь кʹижане һуне бькарьбьн һʹәму тиред агьрийә кӧ Йе Хьраб давежә, бьтәмьриньн» (Әфәси 6:16). Чьԛаси баԝәрийа мә мина мәртʹале ԛәԝи бә, һаԛаси һе рʹьнд әме бькарьбьн хԝә жь щьна хԝәй кьн у мьԛабьли ԝан дәред (Мәтта 17:20).

16. Ча әм дькарьн баԝәрийа хԝә ԛәԝи кьн?

¹⁶ Ча әм дькарьн баԝәрийа хԝә ԛәԝи кьн? Бь сайа һинбуна Кʹьтеба Пироз, баԝәрийа мә ԝе ԛәԝи бә. Ԛәԝибуна диԝар, һʹимва гьредайи йә. Һәрге һʹиме диԝар ԛәԝи йә, диԝар жи ԝе ԛәԝи бә. Ӧса жи баԝәрийа мә, һәрге һʹиме баԝәрийа мә ԛәԝи йә демәк баԝәрийа мә жи ԝе ԛәԝи бә. Ле һʹиме баԝәрийа мә, әв һәйә занәбуна рʹаст жь Кʹьтеба Пироз. Һәрге әм һәр рʹож Кʹьтеба Пироз бьхуньн у һин дьбьн, баԝәрийа мә ԝе һе ԛәԝи бә. Баԝәрийа ӧса, мина диԝарәки ԛәԝи, ԝе мә жь һʹӧкӧмтийа щьна хԝәй кә (1 Йуһʹәнна 5:5).

17. Чь ԝе диса али мә бькә, ԝәки хԝә жь щьна хԝәй кьн?

¹⁷ Мәсиһийед Әфәси, диса тьштәк гәрәке бькьрана сәва кӧ хԝә жь щьна хԝәй кьрана. Әԝана дьжитьн дь бажарәки ӧсада кӧ бь сербазийе педа тʹьжә бу. Ләма жи ԝанарʹа лазьм бу һе зедә аликʹари у хԝәйкьрьн. Паԝлосе шанди готә ԝана: «Бь һʹәму дӧа у рʹәща һәр гав дӧа бькьн пе Рʹӧһʹе Пироз» (Әфәси 6:18). Иро әм жи дьнйакә ӧсада дьжин, йе кӧ бь сербазийе тʹьжә йә, ләма жи әм гәрәке тʹьме Йаһоԝарʹа дӧа бькьн аликʹарийе бьхԝазьн, ԝәки жь щьна бенә хԝәйикьрьне. Чахе әм Йаһоԝарʹа дӧа дькьн, әм гәрәке дӧакьрьнеда наве ԝи бьдьн хәбате. Чьмки «наве Йаһоԝа бьрща ԛәԝи йә, йед һәԛ дьрʹәвьнә һьндӧрʹ у хьлазбуне дьстиньн». (Бьхунә Мәтʹәлок 18:10, ДТʹ.) Гәләк фәрз ә Йаһоԝарʹа дӧа бькьн, ԝәки әԝ «мә жь йе хьраб» демәк жь Мире-щьна хьлаз кә (Мәтта 6:13). Йаһоԝа әʹсәйи ԝе щаба дӧайед мәйә бь дьл у щан бьдә (Зәбур 145:19).

18, 19. (а) Чьрʹа әм дькарьн гӧман бьн, ԝәки әме бькарьбьн хԝә жь щьна хԝәй кьн? (б) Дәрһәԛа кʹижан пьрса, әме дь сәре майинда хәбәр дьн?

 ¹⁸ Шәйтʹан Мире-щьна у щьн гәләк зийандар ьн, ле һәрге әм мьԛабьли Шәйтʹан Мире-щьна дәрдькʹәвьн, ԛьрара Хԝәде дьԛәдиньн у бь ве йәке незики Хԝәде дьбьн, әм ида гәрәке жь Мире-щьна у щьна нәтьрсьн. (Бьхунә Аԛуб 4:7, 8.) Чьмки ԛәԝата щьна һьмбәри ԛәԝата Хԝәдайе һьмзор, гәләк кем ә. Дь ԝәʹде Нӧһда әԝана һатьбун щәзакьрьне у дь ахьрийеда жи Хԝәде ԝе диԝана ԝана бькә (Щьһуда 6). Ле бьра бира тә нәчә, ԝәки мьлйакʹәтед Йаһоԝайә ԛәԝат жи дькарьн мә жь щьна хԝәй кьн (2 Пʹадшати 6:15-17). Әв мьлйакʹәт гәлә дьшьрмиш дьбьн бона һʹалхԝәшийа мә у дьхԝазьн, ԝәки әм мьԛабьли щьна дәркʹәвьн. У әв мьлйакʹәтед амьн, мә ԛәԝи дькьн. Ләма жи ԝәрә әм тʹьме һе незики Йаһоԝа у мьлйакʹәтед ԝийә амьн бьн. Гәлә фәрз ә ширәтед жь Кʹьтеба Пироз бьди хәбате, у жь ван һʹәму тьшта чь кӧ сербазийева гьредайи йә, хԝә хԝәй ки (1 Пәтрус 5:6, 7; 2 Пәтрус 2:9). Һәрге тӧ ӧса бьки, дькари гӧман би, кӧ те жь щьна бейи хԝәй кьрьне.

¹⁹ Ле чьрʹа Хԝәде дьһелә, ԝәки щьн һәбьн у чьрʹа Хԝәде дьһелә, ԝәки зӧлми һәбә, жь бо чь жи мәри һаԛас дьчәрчьрьн? Дәрһәԛа ван пьрса әме дь сәре майинда пебьһʹәсьн.