1. Akin et labay tayon aralen so nipaakar ed saray anghel?

PIAN nakabat moy sakey ya too, kaukolan mo met ya kabaten so pamilya to. Mipadpara, pian nakabat tayoy Jehova a Dios, kaukolan tayo met ya kabaten iray anghel ya pamilya tod tawen. Saray anghel et tinawag na Biblia ya “ananak na Dios.” (Job 38:7) Antoy responsabilidad na saray anghel? Kasin atulongan la na saray anghel so totoo nensaman? Natulongan da ka met kasi? No on, panon?

2. Iner so nanlapuan na saray anghel, tan pigara iran amin?

² Diad Biblia, aminpigapiga ya binitla iray anghel. Aralen tayo so pigara ed saratan pian lalo itayon makaaral nipaakar ed saray anghel. Iner so nanlapuan da? Oniay ibabaga na Colosas 1:16: “Diad panamegley to [si Jesu-Kristo] et apalsa so amin ni ran bengatlan walad tawen tan walad dalin.” Kanian, amin ya espiritun tatawagen ya anghel et sansakey ya ginawa nen Jehova a Dios panamegley na panguloan ya Anak to. Pigaran amin iray anghel? Ibabaga na Biblia ya nilasus milyon ya anghel so pinalsa, tan amin da et makapanyari.​—Salmo 103:20. *

3. Antoy ibabaga na Job 38:4-7 nipaakar ed saray anghel?

 ³ Ibabaga na Salitay Dios, say Biblia, ya nen ginawa so dalin, “amin ya ananak na Dios et inkasil day boses da ed panangirayew.” (Job 38:4-7) Kanian, abayag lan ginawa iray anghel antis nin ginawa iray totoo, tan antis ni ingen ya ginawa so dalin. Ipapanengneng met na Biblia ya walay liknaan na saray anghel, ta ibabaga na satan ya “nambabansag ya inmeyag ed liket” so “amin ya ananak na Dios.” Diad saman, amin ya anghel et kaibad pamilya nen Jehova a Dios, ya nankakasakey ya manlilingkor ed sikato.

4. Panon ya ipapaamta na Biblia ya interesado iray matoor ya anghel ed gagawaen na totoo?

⁴ Manlapu la nen anengneng na saray matoor ya anghel so impanggawa ed si Adan tan Eva, interesado ran maong no panon ya ondakel so too tan no panon ya nasumpal so panlabayan na Dios. (Proverbio 8:30, 31; 1 Pedro 1:11, 12) Balet, diad inlabas na panaon, naobserbaan na saray anghel ya dakel a totoo so agla mandadayew ed maaron Manamalsa ra. Seguradon naermenan iray matoor ya anghel lapud satan. Balet, kada walay anggan sakey ya toon ompawil ya mandayew ed si Jehova, ‘manliket iray anghel na Dios.’ (Lucas 15:10) Walay malasakit na saray anghel ed saray mandadayew ed Dios, kanian agla pankelawan no akin ya aminpigan inusar ira nen Jehova pian pabiskegen tan protektaan iray matoor ya mandadayew ed sikato diad dalin. (Basaen so Hebreo 1:7, 14.) Niay pigaran alimbawa.

5. Mangiter na alimbawa ed Biblia no panon ya tinmulong iray anghel.

⁵ Tinulongan na duaran anghel so maong a toon si Lot tan saray mamarikit to. Impaway da rad Sodoma tan Gomorra pian nisalba ira no deralen lay mauges a totoo ed saratan ya syudad. (Genesis 19:15, 16) Kayari na dakel ya taon, si propetan Daniel et imbuntok ed ungib na saray leon, balet akaliktar tan inkuan to: “Imbaki na Dios ko so anghel to pian pepetan toy sangi na saray leon.” (Daniel 6:22) Nen panaon na saray  inmunan Kristiano, impaway na sakey ya anghel ed prisoan si apostol Pedro. (Gawa 12:6-11) Sakey ni, tinulongan na saray anghel si Jesus nen wadiad dalin. (Marcos 1:13) Tan antis na impatey nen Jesus, sakey ya anghel so nampanengneng tan “amabiskeg ed sikato.” (Lucas 22:43) Talagan atulongan si Jesus diad saraman ya importantin maong ya panaon ed bilay to!

6. (a) Panon a proprotektaan na saray anghel so totoo na Dios natan? (b) Anto ran tepet so ebatan tayo?

⁶ Diad panaon tayo, agla manpapanengneng iray anghel ed totoo na Dios. Balet anggano ag-ira nanengneng na totoo, siansian proprotektaan na saray makapanyarin anghel na Dios iray totoo to, lalo la pian agnaderal so relasyon dad sikato. Ibabaga na Biblia: “Say anghel nen Jehova et babantayan to iramay ontatakot ed Sikato, tan isasalba to ra.” (Salmo 34:7) Akin et makapalikliket iya ed sikatayo? Lapud wala ray mapeligro tan mauge-uges ya espiritu ya labay dan aliway pansumpalan tayo! Siopa iratan? Nanlapuan da? Panon da itayon nayarin sakitan? Pian naamtaan tayoy ebat, aralen tayon magano so agawa sanen si Adan tan Eva ni labat so totoo diad dalin.

7. Panon karakel so naimpluensyaan nen Satanas ya manrebelde ed Dios?

⁷ Naaralan tayo lad Kapitulo 3 ya pinaulyan na sakey ya anghel ya ontubod puso to so mauges a pilalek ya uleyan so arum, kanian nanrebelde ed Dios. Sayan anghel et tinawag ya Satanas a Diablo. (Apocalipsis 12:9) Manlapu la nen pinalikdo nen Satanas si Eva, inimpluensyaan toy amin lawarin totoo ya manrebelde met ed Dios. Balet wala ray pigara ya nansiansian matoor a singa si Abel, Enoc, tan Noe.​—Hebreo 11:4, 5, 7.

8. (a) Panon ya nagmaliw a demonyo so arum ya anghel? (b) Pian makaliktar iray demonyo ed Delap diad panaon nen Noe, antoy ginawa ra?

⁸ Diad panaon nen Noe, wala ray anghel ya nanrebelde ed si Jehova. Tinaynan day tawen pian onla diad dalin tan nansulong  ira na laman na too. Akin? Nabasa tayod Genesis 6:2: “Naimano na saray anak na tuan Dios a maganggana iray bibiin ananak na totoo. Kanian inala ran asawa so amin ya apili ra.” Balet ag-inabuloyan nen Jehova a Dios ya mantultuloy so gagawaen na sarayan anghel tan say mauges ya impluensya rad totoo. Dinelap toy interon dalin kanian inatey so amin ya mauges a totoo tan say inliktar to labat et saray matoor ya mandadayew ed sikato. (Genesis 7:17, 23) Kanian apilitan iray rebelden anghel odino demonyo ya lakseben so pisikal ya laman da tan pinmawil irad tawen bilang espiritu. Kinampian day Diablo, kanian sikatoy nagmaliw a “manuley ed saray demonyo.”​—Mateo 9:34.

9. (a) Antoy agawa ed saray rebelden anghel nen pinmawil irad tawen? (b) Antoy amtaen tayo nipaakar ed saray demonyo?

 ⁹ Nen pinmawil ed tawen iray rebelden anghel, agla ra inturing ya kapamilya nen Jehova, ya singa si Satanas, say manuley da. (2 Pedro 2:4) Agla ra nayarin mansulong na laman na too, balet sarag da nin siansia ya sugsogan so totoo ya manggaway mauges. Diad tua, kaiba nen Satanas irayan demonyo ya “mangibabalang ed interon mundo.” (Apocalipsis 12:9; 1 Juan 5:19) Panon? Wala ray paraan ya uusaren na saray demonyo pian ibalang o palikdoen so totoo. (Basaen so 2 Corinto 2:11.) Amtaen tayoy pigara ed saratan.

10. Anto so espiritismo?

¹⁰ Pian nibalang day totoo, uusaren na saray demonyo so espiritismo. Say espiritismo et pitatalosan ed saray demonyo, direkta man o panamegley na espiritista. Ibabaga na Biblia ya mauges so espiritismo tan bibilinen itayo na satan ya paliisan so amin ya walay koneksion tod espiritismo. (Galacia 5:19-21) No panon ya say managbanwit et manguusar na tapang, uusaren met na saray demonyo so espiritismo. Nanduruman tapang so uusaren na managbanwit pian makalay nanduruman klase na sira. Ontan met, nanduruman klase na espiritismo so uusaren na saray mauges ya espiritu pian impluensyaan so amin a klase na totoo.

11. Anto so panagparles, tan akin a nepeg tayon paliisan itan?

¹¹ Say sakey a klase na tapang ya uusaren na saray demonyo et say panagparles. Anto ’tay panagparles? Say pangamta ed no antoy nagawad arapen tan ed saray bengatlan ag-amta. Say arum ya klase na satan et horoscope, pangusar na tarot cards, inengneng ed bolan kristal, panagpalar, tan say pananap na misteryoson tanda diad saray kugip. Anggaman iisipen na dakel a totoo ya aliwan mauges so panagparles, ipapanengneng na Biblia ya saray managparles et uusaren na saray mauges ya  espiritu. Singa bilang, nabasa ed Gawa 16:16-18 so nipaakar ed “sakey a demonyo na panagparles” ya angiter na pakayari ed bii ya manhula. Balet nakal itan a pakayari na bii nen pinapaway ed sikato so demonyo.

12. Akin et delikado so pitongtong ed saray inaatey?

¹² Wala ni sakey ya gagawaen na saray demonyo pian nibalang day totoo. Papalikdoen na saray demonyo iray totoo ya sarag da kunoy mitongtong ed saray inaatey. Nibabalang da ray totoon maneermen ed impatey na inad-aro ra lapud saray tilan bangat nipaakar ed saray inaatey. Nayarin mangibaga so sakey ya espiritista na nikadkaduman impormasyon odino mansalitan kaboses na samay inatey. Lapud satan, dakel so akombinse ya talagan mabilay ni ray inaatey tan say pitongtong ed sikara et makatulong ed saray mabilay pian nasarag day ermen. Balet diad tua, ag-itan makaligliwa, tan delikado ni ingen. Akin? Ta sarag na saray demonyo ya aligen so boses na inatey a too tan sarag da met ya iter so impormasyon ed espiritista nipaakar ed samay inatey. (1 Samuel 28:3-19) Sakey ni, singa naaralan tayo lad Kapitulo 6, no inatey so sakey, sikatoy  anggapo la. (Salmo 115:17) Kanian “siopaman ya ontupleg [odino mitongtong] ed inatey” et nibabalang na saray mauges ya espiritu tan kontrad panlabayan na Dios so gagawaen to. (Basaen so Deuteronomio 18:10, 11; Isaias 8:19) Nepeg ya alisto itayo sirin ya ipulisay iyan mapeligron tapang na saray demonyo.

13. Antoy alabanan na dakel a totoo?

¹³ Aglabat ibabalang na saray mauges ya espiritu iray totoo noagta tataktakoten da met ira. Amta nen Satanas tan saray demonyo to ya “antikey lay panaon” da tan magano la ran ibantak ed kaaralman, kanian lalon masibesibeg ira. (Apocalipsis 12:12, 17) Anggaman ontan, alabanan na dakel a totoo so takot dad saray demonyo. Antoy ginawa ra? Antoy gawaen na sakey no sikatoy mibibiang ed espiritismo?

14. Singa saray Kristiano nensaman diad Efeso, panon tayon nalabanan iray mauges ya espiritu?

¹⁴ Ibabagad sikatayo na Biblia no panon ya nalabanan iray mauges ya espiritu tan no panon ya itunda so espiritismo. Imanoen pay ginawa na saray Kristiano nensaman diad syudad na Efeso. Arum ed sikara et mibibiang ed espiritismo antis iran nagmaliw a Kristiano. Nen labay da lan itunda so espiritismo, antoy ginawa ra? Inkuan na Biblia: “Dakel ed saramay datin manmamahiko et tinipon da ray libro ra tan pinoolan dad arapan na amin.” (Gawa 19:19) Nen dineral na saray nagmaliw ya Kristiano nensaman iray libro dad magic, angipanengneng iray alimbawa parad saray lalabanan day mauges iran espiritu natan. Saramay labay day mandayew ed si Jehova et kaukolan dan ipulisay so amin ya walay koneksion tod espiritismo. Kaibad satan iray libro, magasin, pelikula, litrato, tan musika ya mangi-ingganyo ed panag-espiritismo tan gagawaen ton singa makapasagyat tan makapaliket itan. Kaiba met ed satan iray anting-anting odino arum ni ran isusulong pian nakontra so mauges.​—1 Corinto 10:21.

15. Pian nalabanan tayo ray mauges ya espiritu, antoy kaukolan tayon gawaen?

 ¹⁵ Kayari pigaran taon, nen dineral na saray Kristiano ed Efeso iray libro rad magic, sinulatan ira nen apostol Pablo: ‘Mipupuligesgesan odino milalaban itayo ed saray mauges ya espiritu.’ (Efeso 6:12) On, agtinmunda iray demonyo. Siansia nin labay da ran impluensyaan. Kanian anto ni kaukolan ya gawaen na saraman a Kristiano? Inkuan nen Pablo: “Nilikud nid saraya, ala yoy baleg a samper na pananisia, a diad panamegley na satan et naerep yoy amin a mandarlang a pana na samay mauges [si Satanas].” (Efeso 6:16) No mas mabiskeg so samper na pananisia tayo, mas mabiskeg tayon nalabanan iray mauges ya espiritu.​—Mateo 17:20.

16. Panon tayon napabiskeg so pananisia tayo?

¹⁶ Panon tayo sirin ya napabiskeg so pananisia tayo? Diad panaral ed Biblia. Say sakey ya padir et malet no malet met so pundasyon na satan. Mipadpara, say pananisia et mabiskeg no mabiskeg met so pundasyon na satan​—say suston kakabatan ed Salitay Dios. No inagew-agew tayon basaen tan aralen so Biblia, lalon ombiskeg so pananisia tayo. Singa say malet ya padir, say mabiskeg a pananisia et manprotekta ed sikatayo pian agnaimpluensyaan na saray mauges ya espiritu.​—1 Juan 5:5.

17. Antoy importantin gawaen pian nalabanan iray mauges ya espiritu?

¹⁷ Anto ni kaukolan a gawaen na saramay Kristiano ed Efeso? Kaukolan day kaaruman ya proteksion lapud manaayam irad sakey a syudad a napnoy impluensya na saray demonyo. Kanian imbaga ed sikara nen Pablo: “Diad amin a paraan na panagpikasi tan masimoon a pikekerew et mantultuloy kayon manpikasi ed amin a pankanawnawa diad pakayari na espiritu.” (Efeso 6:18) Lapud manbibilay itayo met ed mundon grabe so impluensya na saray demonyo, importante so ikerew ed si Jehova na proteksion panamegley na impapuson pikakasi pian nalabanan tayo ray mauges ya espiritu. Siempre, kaukolan tayon bitlaen so ngaran nen Jehova no manpipikasi tayo. (Basaen so Proverbio 18:10.) Tan nepeg tayon itultuloy  ya ipikasi ed sikato: “Iliktar mo kami ed samay mauges,” si Satanas a Diablo. (Mateo 6:13) Ebatan nen Jehova iratan ya impapuson pikakasi.​—Salmo 145:19.

18, 19. (a) Akin et seguradon natalo tayo ray mauges ya espiritu? (b) Anton tepet so ebatan ed ontumbok a kapitulo?

¹⁸ Mapeligro iray mauges ya espiritu, balet agtayo natatakot ya sumpaen o arawian so Diablo tan onasingger itayod Dios diad panggawad panlabayan To. (Basaen so Santiago 4:7, 8.) Limitado labat so pakapanyari na saray mauges ya espiritu. Adusa la ra ed panaon nen Noe, tan asingsingger la ran naderal. (Judas 6) Tandaan tayo met ya proprotektaan itayo na makapanyari iran anghel nen Jehova. (2 Arari 6:15-17) Labalabay na saratan ya anghel ya natalo tayo ray mauges ya espiritu. Diad arum a panangibaga, saratan ya maong ya anghel et papabiskegen day liknaan tayo. Komon ta mansiansia itayon maapit ed si Jehova tan ed saray matoor ya anghel ya kabiangan na pamilya to. Paliisan tayo met so amin a klase na espiritismo tan naynay tayon gawaen so ibabaga na Salitay Dios. (1 Pedro 5:6, 7; 2 Pedro 2:9) No ontan, seguradon natalo tayo ray mauges ya espiritu.

¹⁹ Balet akin et inabuloyan na Dios iray mauges ya espiritu tan say kaugsan ya mamapairap ed totoo? Naebatan itan diad ontumbok a kapitulo.