1. Dicon nos lo kier siña tocante angel?

SIÑA conoce un persona por lo general ta encera haya sa un poco tocante su famia. Asina tambe, conoce Yehova Dios ta encera siña conoce su famia angelical mas mihor. Bijbel ta yama e angelnan “yiu hombernan di Dios.” (Job 38:7) Pues, ki papel nan ta hunga den Dios su proposito? Acaso nan a hunga un papel den historia di humanidad? Angelnan ta influencia bo bida? Si ta asina, con?

2. Di unda angel a bin, y cuanto tin?

² Bijbel ta referi cientos di biaha na angel. Laga nos considera un par di e referencianan aki pa siña mas tocante angel. Di unda angel a bin? Colosensenan 1:16 ta bisa: “Pa medio di dje [Hesucristo] tur cos a wordo crea, tanto den e shelonan como riba tera.” Pues anto, pa medio di su Yiu primogenito Yehova Dios a crea un pa un tur e criaturanan spiritual yama angel. Cuanto angel tin? Bijbel ta indica cu Dios a crea cientos di miyones di angel, y nan tur ta poderoso.—Salmo 103:20; Revelacion 5:11.

3. Kico Job 38:4-7 ta conta nos di e angelnan?

³ Dios su Palabra, Bijbel, ta conta nos cu ora tera a wordo funda, “tur e yiu hombernan di Dios tawata grita di alegria.” (Job 38:4-7) Pues angelnan tawata existi hopi prome cu Dios a crea hende, asta prome cu el a crea tera. E parti di  Bijbel aki ta mustra ademas cu angel tin sintimento, pasobra e ta bisa cu nan a “grita di alegria.” Tuma nota tambe cu “tur e yiu hombernan di Dios” a canta hunto. E tempo ei tur angel tawata forma parti di un famia uni sirbiendo Yehova Dios.

4. Con Bijbel ta mustra cu angelnan fiel ta interesa den actividad humano?

⁴ For di tempo cu e fiel criaturanan spiritual tawata testigo di e creacion di e prome hendenan, nan a demostra un interes profundo den e famia humano cu tawata crece y den e realisacion di Dios su proposito. (Proverbionan 8:30, 31; 1 Pedro 1:11, 12) Sinembargo, cu pasamento di tempo e angelnan a mira con mayoria di e famia humano a stop di sirbi nan Creador amoroso. Esaki sin duda a haci e angelnan fiel tristo. Di otro banda, ki ora cu maske ta un hende bolbe na Yehova, “tin goso den presencia di e angelnan.” (Lucas 15:10) Ya cu e angelnan ta asina interesa den e bienestar di hende cu ta sirbi Dios, nos por compronde dicon Yehova bes tras bes a uza angel pa fortalece y proteha su sirbidonan fiel riba tera. (Hebreonan 1:7, 14) Considera algun ehempel.

5. Menciona algun ehempel di sosten di angel cu nos ta haya den Bijbel.

⁵ Dos angel a yuda e homber husto Lot y su yiu mohenan sobrevivi destruccion di e stadnan malbado di Sodoma y Gomora door di saca nan for di e area ei. (Genesis 19:15, 16) Siglonan despues, enemigonan di profeta Daniel a laga bent’e den un cueba di leon, pero e no a sufri daño y a bisa: “Mi Dios a manda su angel y a sera boca di e leonnan.” (Daniel 6:22) Den e prome siglo di nos era, un angel a libra apostel Pedro for di prizon. (Echonan 12:6-11) Ademas, angelnan a sostene Hesus na comienso  di su ministerio riba tera. (Marco 1:13) Y poco prome cu Hesus su morto, un angel a aparece na dje y a “fortalec’e.” (Lucas 22:43) Sosten di e angelnan na e momentonan hopi importante ei di Hesus su bida lo mester tawata un gran consuelo p’e!

6. (a) Con angel ta proteha Dios su pueblo awe? (b) Ki preguntanan nos lo considera awor?

⁶ Awe, angelnan no ta aparece visiblemente mas na Dios su pueblo riba tera. Aunke hende no por mira Dios su angelnan poderoso, te ainda nan ta proteha su pueblo, specialmente contra cualkier daño spiritual. Bijbel ta bisa: “E angel di SEÑOR ta campa rond di esnan cu ta tem’e, y ta rescata nan.” (Salmo 34:7) Dicon e palabranan ei mester ta un gran consuelo pa nos? Pasobra tin criaturanan spiritual malbado peligroso cu kier destrui nos! Ken nan ta? Di unda nan ta bin? Con nan ta purba perhudica nos? Pa haya contesta riba e preguntanan aki, laga nos considera brevemente algo cu a pasa na comienso di historia humano.

7. Te na ki grado Satanas a logra aparta hende for di Dios?

⁷ Manera nos a siña den Capitulo 3 di e buki aki, un di e angelnan a desaroya un deseo pa goberna riba otro persona y pesei el a bira contra Dios. Mas despues e angel aki a bira conoci como Satanas e Diabel. (Revelacion 12:9) Durante e 16 siglonan cu a sigui despues cu el a gaña Eva, Satanas a logra aparta casi tur hende for di Dios cu excepcion di un par di persona fiel, manera Abel, Enok y Noe.—Hebreonan 11:4, 5, 7.

8. (a) Con algun angel a bira demoño? (b) Pa sobrevivi e Diluvio di tempo di Noe, kico e demoñonan mester a haci?

⁸ Den tempo di Noe, otro angelnan a rebela contra Yehova. Nan a bandona nan luga den Dios su famia celestial, baha bin na tera y bisti curpa di carni. Pakico? Nos ta lesa na Genesis 6:2: “E yiu hombernan di Dios a mira cu e yiu  mohenan di hende tawata bunita; y nan a tuma esposanan pa nan mes, esun cu nan tawata kier a scohe.” Pero Yehova Dios no a permiti pa e accion di e angelnan aki sigui ni e corupcion cu esei a trece riba humanidad. El a trece un diluvio mundial riba tera cu a destrui tur hende malbado y a conserva solamente su sirbidonan fiel. (Genesis 7:17, 23) Pues, e angelnan rebelde (of demoñonan) a haya nan forsa ta bandona nan curpa carnal y bolbe na shelo como criaturanan spiritual. Nan accion a pone nan na banda di Diabel, kende e ora ei a bira e gobernante of “prins di demoñonan.”—Mateo 9:34.

9. (a) Kico a pasa cu e demoñonan ora cu nan a bolbe na shelo? (b) Kico nos lo considera relaciona cu e demoñonan?

 ⁹ Ora cu e angelnan desobediente a bolbe na shelo, nan—mescos cu nan gobernante Satanas—no por a forma parti mas di Dios su famia di angel. (2 Pedro 2:4, NW) Aunke awor nan no por bisti curpa humano mas, toch ainda nan ta eherce hopi mal influencia riba hende. De echo, cu yudansa di e demoñonan aki, Satanas “ta gaña henter mundo.” (Revelacion 12:9; 1 Huan 5:19) Con? E demoñonan ta uza principalmente metodonan diseña pa gaña hende. (2 Corintionan 2:11) Laga nos considera algun di e metodonan aki.

10. Kico ta spiritismo?

¹⁰ Pa gaña hende, e demoñonan ta uza spiritismo. E practica di spiritismo ta metemento cu demoño, sea cu un persona ta tuma contacto direct cu e demoñonan of cu e ta uza un intermediario of medio humano pa esei. Bijbel ta condena spiritismo y ta spierta nos pa keda liber di tur cos conecta cu ne. (Galationan 5:19-21) E demoñonan ta uza spiritismo mescos cu piscado ta uza as. Un piscado ta uza varios tipo di as pa coi diferente tipo di pisca. Asina tambe spiritonan malbado ta uza diferente forma di spiritismo pa trece tur tipo di hende bou di nan influencia.

11. Kico ta adivinacion, y dicon nos mester evit’e?

¹¹ Un tipo di as cu demoñonan ta uza ta adivinacion. Kico ta adivinacion? Esei ta miramento di destino, un intento pa haya sa tocante futuro of algo desconoci. Algun forma di adivinacion ta astrologia, uzo di baraha di carta tarot of Spaño, wakmento den bola di cristal, lesamento di plant’i man y buscamento di señalnan misterioso den soño. Aunke hopi hende ta pensa cu practicamento di adivinacion ta inofensivo, Bijbel ta mustra cu miradonan di destino y spiritonan malbado ta traha hunto. Por ehempel,  Echonan 16:16-18 ta menciona “un spirito di adivinacion” cu a duna un mucha mohe e habilidad pa practica “miramento di destino.” Pero e mucha mohe a perde e habilidad aki ora cu a saca e demoño for di dje.

12. Dicon ta peligroso pa purba comunica cu e mortonan?

¹² Un otro manera cu e demoñonan ta gaña hende ta door di anima nan pa consulta e mortonan. Hende cu ta pena pa e morto di un ser keri hopi bes ta ser gaña door di ideanan robes relaciona cu e defuntonan. Un medio spiritista kisas ta duna informacion special of ta papia cu un stem cu ta parce esun di un defunto. Como resultado, hopi hende ta keda combenci cu e mortonan realmente ta na bida y cu door di tuma contacto cu nan, esnan na bida por soporta nan pena. Pero tal “consuelo” en realidad ta falso y tambe peligroso. Dicon? Pasobra e demoñonan por imita stem di un defunto y duna un spiritista informacion tocante e defunto. (1 Samuel 28:3-19) Ademas, manera nos a siña den Capitulo 6, e mortonan a stop di existi. (Salmo  115:17) Pues anto, ken “cu ta consulta cu e mortonan” a ser gaña door di spiritonan malbado y ta actua contrario na e boluntad di Dios. (Deuteronomio 18:10, 11; Isaias 8:19) Pesei tene cuidou, y rechasa e as peligroso aki cu e demoñonan ta uza.

13. Kico hopi hende cu un tempo tawatin miedo di demoño a logra haci?

¹³ Spiritonan malbado no solamente ta gaña hende sino ta spanta nan tambe. Awe, Satanas y su demoñonan sa cu nan tin “solamente un poco tempo mas” prome cu saca nan for di accion, y awor nan ta mas feros cu nunca. (Revelacion 12:12, 17) Apesar di esei, miles di hende cu un tempo tawata biba tur dia cu miedo di e spiritonan malbado ei a logra libra nan mes di e miedo ei. Con nan a haci esaki? Kico un persona por haci asta si e ta envolvi caba den spiritismo?

14. Mescos cu e cristiannan di prome siglo na Efeso, con nos por libra for di spiritonan malbado?

¹⁴ Bijbel ta conta nos tanto con pa resisti spiritonan malbado como con pa libra for di nan. Considera e ehempel di e cristiannan di prome siglo den e stad di Efeso. Algun di nan a practica spiritismo prome cu nan a bira cristian. Ora cu nan a dicidi di stop di practica spiritismo, kico nan a haci? Bijbel ta bisa: “Hopi di esnan cu tawata practica magia a trece nan bukinan hunto y a kima nan dilanti di tur.” (Echonan 19:19) Door di destrui nan bukinan di magia, e cristiannan nobo ei a pone un ehempel pa esnan cu ta desea di resisti spiritonan malbado awe. Hende cu kier sirbi Yehova tin cu deshaci di tur cos conecta cu spiritismo. Esei ta encera buki, revista, pelicula, poster y grabacionnan musical cu ta stimula e practica di spiritismo y cu ta lag’e parce un cos atractivo y excitante. Tambe nan tin cu deshaci di  amulet of otro articulonan cu hende ta bisti como proteccion contra cos malo.—1 Corintionan 10:21.

15. Kico nos tin cu haci pa resisti forsanan spiritual malbado?

¹⁵ Algun aña despues cu e cristiannan na Efeso a destrui nan bukinan di magia, apostel Pablo a skirbi nan: “Nos lucha . . . [ta] contra e forsanan spiritual di maldad.” (Efesionan 6:12) E demoñonan no a entrega. Ainda nan tawata purba haya un gara riba e cristiannan. Pues kico mas e cristiannan ei tawatin cu haci? Pablo a bisa: “Riba tur cos, [tuma] e escudo di fe, cu cual boso lo por paga tur e flechanan sendi di e malbado [Satanas].” (Efesionan 6:16) Mas fuerte nos escudo di fe ta, mas grandi nos resistencia contra forsanan spiritual malbado lo ta.—Mateo 17:20.

16. Con nos por fortalece nos fe?

¹⁶ Con anto nos por fortalece nos fe? Door di studia Bijbel. Por ehempel, pa un muraya ta firme, su fundeshi mester ta fuerte. Asina tambe e firmesa di nos fe ta depende pa gran parti di con fuerte su fundeshi—cu ta e conocemento exacto di Dios su Palabra, Bijbel—ta. Si nos ta lesa y studia Bijbel tur dia, nos fe lo bira fuerte. Mescos cu un muraya fuerte, un fe asina lo proteha nos di e influencia di spiritonan malbado.—1 Huan 5:5.

17. Ki paso ta necesario pa nos por resisti spiritonan malbado?

¹⁷ Ki otro paso e cristiannan na Efeso tawatin cu tuma? Nan tawatin mester di mas proteccion pasobra nan tawata biba den un stad yen di demonismo. Pesei Pablo a bisa nan: “Cu tur oracion y suplica pidi tur ora bai den spirito.” (Efesionan 6:18) Siendo cu nos tambe ta biba den un mundo yen di demonismo, ta esencial pa nos haci oracion sinsero na Yehova pa pidie su proteccion pa resisti spiritonan malbado. Claro cu nos tin cu uza e nomber di Yehova den nos oracionnan. “E nomber di Yehova ta un toren fuerte. Den dje e husto ta core drenta y ta ser duna proteccion.” (Proverbionan 18:10, NW) Pues anto, nos tin  cu sigui pidi Dios “libra nos for di e malbado”, Satanas e Diabel. (Mateo 6:13) Yehova lo contesta tal oracion sinsero.—Salmo 145:19.

18, 19. (a) Dicon nos por tin sigur cu nos lo sali victorioso den nos lucha contra criaturanan spiritual malbado? (b) Cua pregunta lo haya contesta den e siguiente capitulo?

¹⁸ Spiritonan malbado ta peligroso, pero si nos ta opone e Diabel y hala serca Dios door di haci Su boluntad, nos no tin nodi biba cu miedo di nan. (Santiago 4:7, 8) E poder di spiritonan malbado ta limita. Nan a haya castigo den tempo di Noe, y nan ta confronta nan huicio final den futuro. (Hudas 6) Corda tambe cu nos tin e proteccion di Yehova su angelnan poderoso. (2 Reinan 6:15-17) E angelnan ei ta profundamente interesa pa mira nos logra resisti spiritonan malbado. E angelnan husto na moda di papia ta curasha nos pa sigui padilanti den nos lucha. Pesei laga nos keda serca di Yehova y di su famia di fiel criaturanan spiritual. Laga nos evita tambe tur tipo di spiritismo y semper aplica e conseho di e Palabra di Dios. (1 Pedro 5:6, 7; 2 Pedro 2:9) E ora ei nos por tin sigur cu nos lo sali victorioso den nos lucha contra criaturanan spiritual malbado.

¹⁹ Pero dicon Dios a tolera spiritonan malbado y e maldad cu a pone hende sufri asina tanto? Den e siguiente capitulo nos ta haya e contesta.