1. Aiseā e ao ai ona tatou malamalama i agelu?

PE A e fia masani i se tagata, e tatau foʻi ona e faamasani i lona aiga. Ina ia tatou iloa lelei Ieova, e tatau foʻi ona tatou faamasani i lona aiga i le lagi lea ua faia aʻe i agelu. Ua taʻua i le Tusi Paia, o agelu o ʻatalii o le Atua.’ (Iopu 38:7) O le ā le matafaioi a agelu e tusa ai ma le finagalo o le Atua? Pe na faia sa latou vaega i mea na tutupu i aso ua tuanaʻi? Pe e taaʻina e agelu lou olaga? Afai o lea, e faapefea?

2. O ai na faia agelu, ma e toʻafia i latou?

² E tele tala a le Tusi Paia e uiga i agelu. Seʻi o tatou tilofaʻia nisi o na tala ina ia atili ai ona tatou iloa agelu. O ai na faia agelu? Ua faapea mai le Kolose 1:16: ʻNa foafoaina isi mea uma i le lagi ma le lalolagi e ala iā Iesu.’ O lea la, na faia e Ieova le Atua agelu uma lava e ala i lona Alo ulumatua. E toʻafia agelu o loo iai? Ua faailoa mai e le Tusi Paia, na faia le faitau miliona o agelu malolosi.—Salamo 103:20. *

3. O le ā ua taʻua i le Iopu 38:4-7 e uiga i agelu?

 ³ Ua taʻua i le Tusi Paia, na “alalaga i viiga atalii uma o le Atua” ina ua faia le lalolagi. (Iopu 38:4-7) Ua loa ona iai agelu a o leʻi taitai ona faia le lalolagi ma tagata. Ua faaalia ai foʻi, e iai faalogona o agelu auā ua faapea mai le mau na latou “alalaga faatasi ma le olioli.” Ia mātau mai, na olioli faatasi “atalii uma o le Atua.” O le taimi lenā na autasi ai agelu uma lava o se aiga e tasi ma auauna iā Ieova le Atua.

4. Ua faaalia faapefea i le Tusi Paia e naunau agelu faamaoni i mea e fai e tagata?

⁴ Talu mai le taimi na faia ai uluaʻi tagata, na matuā naunau agelu faamaoni i tagata ma le faataunuuga o le finagalo o le Atua. (Faataoto 8:30, 31; 1 Peteru 1:11, 12) A o faagasolo le taimi, na mātau ai e agelu ua fulitua le toʻatele o tagata i le Atua alofa na faia i latou. E lē taumatea na faanoanoa agelu faamaoni i lenā mea. Ae “e olioli agelu” pe a salamō se tagata e toʻatasi, ma toe foʻi atu iā Ieova. (Luka 15:10) Talu ai e matuā naunau agelu i tagata e auauna i le Atua, e lētioa la ona tofia i latou e Ieova e faamalosia ma puipuia ana auauna faamaoni i le lalolagi. (Faitau le Eperu 1:7, 14.) Ia manatu i ni faaaʻoaʻoga.

5. O ā faaaʻoaʻoga ua taʻua i le Tusi Paia e uiga i le fesoasoani mai o agelu?

⁵ Na fesoasoani agelu e toʻalua iā Lota ma ona afafine, ia sao mai le faaumatiaga o aai leaga o Sotoma ma Komoro, e ala i le taʻitaʻi ese atu o i latou. (Kenese 19:15, 16) I senituri mulimuli ane, na lafoina ai le perofeta o Tanielu i se lua o leona, ae e leʻi afāina ai o ia. Na fai mai Tanielu: “Na auina mai e loʻu Atua lana agelu e punitia gutu o leona.” (Tanielu 6:22) I le uluaʻi senituri, na faasaʻoloto ai e se agelu le aposetolo o Peteru mai le  falepuipui. (Galuega 12:6-11) Na fesoasoani foʻi agelu iā Iesu i le amataga o lana talaʻiga i le lalolagi. (Mareko 1:13) A o toeitiiti lava maliu Iesu, na faaali atu i ai se agelu ma “faamalosi iā te ia.” (Luka 22:43) E lē taumatea na faamāfanafanaloto agelu iā Iesu i na taimi tāua o lona soifuaga!

6. (a) E faapefea ona puipuia e agelu i aso nei tagata o le Atua? (e) O ā fesili o le a tatou tilofaʻia?

⁶ Ua lē o toe faaali mai agelu i aso nei i tagata o le Atua i le lalolagi. E ui e lē vaaia i latou, ae ua faaauau pea ona puipuia tagata o le Atua e agelu malolosi, aemaise mai lamatiaga faaleagaga. Ua faailoa mai i le Tusi Paia: “E tolauapi le agelu a Ieova e siʻosiʻomia ai i latou o ē e matataʻu iā te ia, ma e na te laveaʻiina foʻi i latou.” (Salamo 34:7) Aiseā ua faamāfanafanaina ai i tatou i na upu? Auā o loo iai agaga leaga ua mananaʻo ia faatamaʻia i tatou! O ai na agaga leaga? Aiseā ua avea ai i latou ma agaga leaga? E faapefea ona latou taumafai e faaumatia o tatou ola? Ina ia tali na fesili, seʻi o tatou tilofaʻia le mea na tupu i le amataga mai o le tagata.

7. Pe na toʻatele ni tagata na mafai ona faaliliu ese e Satani mai le Atua?

⁷ Na tatou aʻoaʻoina i le Mataupu e 3 le fia pule o se tasi agelu ma fulitua ai i le Atua. Na faaigoa mulimuli ane o ia o Satani le Tiapolo. (Faaaliga 12:9) I le 1,600 tausaga talu ona ia faasesēina Eva, na faaliliu ese ai e Satani mai i le Atua toetoe o tagata uma lava, seʻi vaganā ai ni tagata faamaoni e pei o Apelu, Enoka ma Noa.—Eperu 11:4, 5, 7.

8. (a) Na faapefea ona avea isi agelu ma temoni? (e) O le ā le mea na fai e temoni ina ia sao ai mai le Lolo i aso o Noa?

⁸ E iai agelu na fouvale iā Ieova i aso o Noa. Na tuua lo latou aiga i le lagi, ae ō mai i le lalolagi ma liu i tino tagata.  Aiseā? Ua taʻua i le Kenese 6:2: “Ona vaavaai mai lea o atalii o le Atua moni i afafine o tagata, ua lalelei lava i latou; ona latou ave lea o i latou e fai ma a latou avā, o fafine uma ua mananaʻo i ai.” Ae e leʻi tuufauina e Ieova gaoioiga a agelu leaga ma amioga faapiʻopiʻo a tagata. Na ia aumaia se lolo tele e tafiesea ai tagata amio leaga ma faasao tau lava o ana auauna faamaoni. (Kenese 7:17, 23) Ina ua oo mai le lolo, na faamataa ai e agelu fouvale o latou tino tagata, ae toe foʻi i le lagi i tino agaga. Ona o a latou gaoioiga leaga, na latou ʻau ai i le Tiapolo, ma o lea na avea ai o ia ma “pule o temoni.”—Mataio 9:34.

9. (a) O le ā na tupu i temoni ina ua toe foʻi i le lagi? (e) O le ā o le a tatou iloiloina e uiga i temoni?

 ⁹ Ina ua toe foʻi agelu lē usiusitai i le lagi, e leʻi toe taliaina i latou e pei o lo latou taʻitaʻi o Satani, i le aiga o le Atua. (2 Peteru 2:4) E ui lava e lē mafai ona latou toe liu i tino tagata, ae o loo faaauau pea a latou taaʻiga leaga i tagata. Ona o le fesoasoani a nei temoni, ua ʻfaasesēina ai e Satani le lalolagi atoa.’ (Faaaliga 12:9; 1 Ioane 5:19) E faapefea? E iai auala ua faasesē ai tagata e temoni. (Faitau le 2 Korinito 2:11.) Seʻi o tatou iloiloina nisi o nei auala.

10. O le ā lenei mea e taʻu o faiga faataulāitu?

¹⁰ Ua faaaogā e temoni faiga faataulāitu e faasesē ai tagata. O faiga faataulāitu e fesootaʻi tuusaʻo ma temoni, pe e ala atu i se taulāitu. Ua taʻusalaina i le Tusi Paia faiga faataulāitu, ma ua lapataʻia i tatou ia faamamao mai faiga uma faataulāitu. (Kalatia 5:19-21) E faaaogā e temoni faiga faataulāitu e pei ona faaaogā e se tagata fagota o maunu. E eseese maunu e faaaogā e se tautai e puʻe ai iʻa. E faaaogā foʻi e temoni faiga eseese faataulāitu e maileia ai tagata.

11. O le ā lenei mea e taʻu o valovaloga, ma aiseā e ao ai ona tatou ʻalofia na faiga?

¹¹ O se tasi o maunu ua faaaogā e temoni, o valovaloga. O le ā lenei mea e taʻu o valovaloga? O le taumafai lea ia iloa se mea o le a tupu i le lumanaʻi po o se mea e lē iloa. O isi vala o valovaloga, e aofia ai le vaai i fetu, faipelē, fofō faataulāitu, saʻili i faailoga po o le faamatalaina o miti. E ui e manatu māmā le toʻatele o tagata i valovaloga, a ua faaalia i le Tusi Paia ua galulue soosootauʻau tagata fai valovaloga ma temoni. O se faaaʻoaʻoga, ua taʻua i le Galuega 16:16-18, o se “temoni e vavalo” na māfua ai ona  faia e se teine ni “valovaloga.” Ae na lē mafai ona toe vavalo ina ua tuliese le temoni.

12. Aiseā e mataʻutia ai le taumafai e fesootaʻi i ē ua maliliu?

¹² O se isi auala ua faasesē ai e temoni tagata, o le uunaʻia lea o i latou e fesili atu i ē ua maliliu. O tagata ua faavauvau i le maliu o sē pele iā i latou, e masani ona faasesēina i manatu sesē e uiga i tagata oti. E ono taʻu i ai e se taulāitu ni faamatalaga faapitoa, pe tautala mai foʻi le taulāitu i le leo o le tagata ua oti. E iʻu ina talitonu tagata, o loo ola pea tagata oti ma o le faafesootaʻia o i latou, e fesoasoani e foʻia ai le faavauvau o tagata soifua. Ae e lē o se faamāfanafanaga lenā mea, ma e mataʻutia foʻi. Aiseā? Auā e mafai e temoni ona faataʻitaʻia leo o tagata ua oti ma tuuina atu i le taulāitu faamatalaga e uiga i le tagata ua oti. (1 Samuelu 28:3-19) E lē gata i lea, e pei ona aʻoaʻoina i le Mataupu e 6, ua lē o toe iai le tagata lea ua oti. (Salamo 115:17) O lea la “o se tasi e fesili atu i ē ua oti,” ua faasesēina e agaga leaga ma e feteenaʻi ma le finagalo  o le Atua. (Faitau le Teuteronome 18:10, 11; Isaia 8:19) O lea la, ia teena lenei maunu mataʻutia ua faaaogā e temoni.

13. O le ā le mea ua fai e le toʻatele o tagata na fefefe muamua i agaga leaga?

¹³ E lē gata ina faasesēina e agaga leaga tagata, ae ua faafefe foʻi iā te i latou. Ua matuā feʻai lava Satani ma ana temoni, auā ua latou iloa “ua puupuu” lo latou taimi o totoe, ona taofiofia lea o a latou gaoioiga. (Faaaliga 12:12, 17) Ae ui i lea, ua mafai e le faitau afe o tagata na fefefe muamua i agaga leaga, ona motusia a latou fesootaʻiga ma agaga leaga. E faapefea ona latou fai lenā mea? O le ā le mea e mafai ona fai e se tagata pe afai ua aafia i faiga faataulāitu?

14. I le pei o Kerisiano i le uluaʻi senituri i Efeso, e faapefea ona tatou saʻoloto mai faiga faataulāitu?

¹⁴ Ua faailoa mai i le Tusi Paia le auala e tetee ai i agaga leaga ma motusia fesootaʻiga ma i latou. Ia fai ma faaaʻoaʻoga Kerisiano i le uluaʻi senituri i le aai o Efeso. Na faia e nisi o i latou faiga faataulāitu a o leʻi avea ma Kerisiano. O le ā le gaoioiga na latou faia ina ia saʻoloto ai mai faiga faataulāitu? Ua taʻua i le Tusi Paia: “E toʻatele i latou o ē na faia faiga faaagaga [faiga faataulāitu], ua faaputuputu faatasi a latou tusi, ma susunu ai i le afi i luma o tagata uma.” (Galuega 19:19) Ina ua susunu e nei Kerisiano fou a latou tusi o togafiti faataulāitu, na latou faataatia ai se faaaʻoaʻoga mo ē e mananaʻo e tetee i agaga leaga i aso nei. O tagata e fia auauna iā Ieova, e tatau ona latou lafoaʻia mea uma lava e fesootaʻi atu i faiga faataulāitu. E aofia ai tusi, mekasini, ata tifaga, ata ma pese e uunaʻia ai faiga faataulāitu, ma faafoliga ai o se mea lelei e fiafia i ai. E aofia ai foʻi asoa po o isi mea e puipuia ai mai mea leaga.—1 Korinito 10:21.

15. Ina ia tetee atu i agaga leaga, o le ā e tatau ona tatou faia?

 ¹⁵ I tausaga mulimuli ane ina ua uma ona susunuina e Kerisiano i Efeso a latou tusi o togafiti faataulāitu, na tusi atu i ai Paulo: ʻTatou te tau ma agaga leaga.’ (Efeso 6:12) E leʻi solomuli temoni. Na latou taumafai pea ia manumalo. O le ā se isi gaoioiga sa tatau ona faia e Kerisiano? Fai mai Paulo: “A o le mea e sili ona tāua, ia outou ave le talita telē o le faatuatua, lea e mafai ai ona outou tineia ai aū fanafana mū uma a lē o loo leaga [Satani].” (Efeso 6:16) A malosi lo tatou talipupuni o le faatuatua, e faamalosia ai i tatou e tetee atu i agaga leaga.—Mataio 17:20.

16. E faapefea ona faamalosia lo tatou faatuatua?

¹⁶ E faapefea ona faamalosia lo tatou faatuatua? E ala i le suʻesuʻe o le Tusi Paia. E faalagolago le malosi o se pa i le lelei o lona faavae. E faapena foʻi le malosi o lo tatou faatuatua, e faalagolago i le lelei ona faavaeina i le poto mai le Afioga a le Atua, le Tusi Paia. A tatou faitau ma suʻesuʻe i le Tusi Paia i aso taʻitasi, o le a faamalosia ai lo tatou faatuatua. O le faatuatua malosi e pei o se pa e puipuia ai i tatou mai agaga leaga.—1 Ioane 5:5.

17. O le ā se gaoioiga tāua tatou te faia e tetee atu ai i agaga leaga?

¹⁷ O le ā se isi gaoioiga na tatau ona faia e Kerisiano i Efeso? Na tatau ona matuā puipuia i latou, auā o le aai lea na latou nonofo ai, na malosi ai faiga faatemoni. Na taʻu atu la e Paulo iā i latou: “Ia faaauau ona tatalo i le Atua i taimi uma i le agaga, ma tatalo eseese uma, ma faatoga eseese uma.” (Efeso 6:18) Talu ai ua tatou ola i se lalolagi e malosi ai faiga faatemoni, e tāua le tatalo faatauanau iā Ieova mo lana puipuiga mai agaga leaga. Ia manatua, e tatau ona taʻu le suafa o Ieova i a tatou tatalo. (Faitau le Faataoto 18:10.) E ao la ona tatou tatalo e lē aunoa i le Atua ia ʻlaveaʻi i tatou mai i lē o loo leaga,’ o Satani le  Tiapolo. (Mataio 6:13) E tali mai Ieova i a tatou tatalo faatauanau.—Salamo 145:19.

18, 19. (a) Aiseā e mafai ai ona tatou mautinoa o le a tatou manumalo i la tatou taua e tetee i agaga leaga? (e) O le ā le fesili o le a taliina i le mataupu o sosoo mai?

¹⁸ E mataʻutia temoni, ae e lē tatau ona tatou fefefe ai pe a tatou tetee atu i le Tiapolo, ma faalatalata i le Atua ma fai Lona finagalo. (Faitau le Iakopo 4:7, 8.) E gata mai le malosi o agaga leaga. Na faasalaina i latou i aso o Noa, ma o le a faaoo le faasalaga oti iā i latou i le lumanaʻi. (Iuta 6) Ia manatua, o loo puipuia i tatou e agelu malolosi a Ieova. (2 Tupu 6:15-17) E naunau agelu ina ia tatou tetee atu i agaga leaga. Ua faalaeiauina i tatou e agelu faamaoni. O lea la, ia tatou faalatalata atu iā Ieova ma lona aiga faamaoni i le lagi. Ia tatou ʻalofia foʻi faiga uma faataulāitu ma finafinau e faatatauina fautuaga a le Tusi Paia. (1 Peteru 5:6, 7; 2 Peteru 2:9) Ona tatou mautinoa ai lea, o le a tatou manumalo i la tatou taua e tetee i agaga leaga.

¹⁹ Ae aiseā ua lē taofia ai e le Atua nei agaga leaga ma mea leaga ua puapuagatia ai tagata? O le a tali lenā fesili i le mataupu o sosoo mai.