1. Tanbasá mak ita hakarak hatene kona-ba anju sira?

ATU koñese didiʼak ema ida, ita hakarak hatene kona-ba ema neʼe nia família. Nuneʼe mós, atu hatene didiʼak kona-ba Maromak Jeová, ita hakarak hatene kona-ba ninia família iha lalehan, katak anju sira. Bíblia bolu anju sira nuʼudar “Maromak nia oan” sira. (Jó [Ayub] 38:7) Nuneʼe, Maromak fó knaar saida deʼit ba anju sira? Sira envolve an iha ema nia istória ka lae? Anju sira kona ita-nia moris ka lae? Se nuneʼe, oinsá?

2. Sé mak kria anju sira? Iha anju naʼin-hira?

² Bíblia temi kona-ba anju sira dala atus ba atus. Mai ita koʼalia kona-ba ezemplu balu atu hatene liután kona-ba anju sira. Sé mak kria anju sira? Eskritura iha Koloso 1:16 hatete: “Liuhusi nia [Jesus Kristu] mak Maromak kria buat hotu iha lalehan no iha rai.” Nuneʼe, Maromak Jeová kria anju ida-idak liuhusi Ninia Oan-Boot. Iha anju naʼin-hira? Bíblia dehan katak Maromak Jeová kria anju rihun ba rihun, no sira hotu iha forsa boot.—2 Pedro 2:11.

3. Eskritura iha Jó 38:4-7 esplika saida deʼit kona-ba anju sira?

 ³ Maromak nia Liafuan, Bíblia, hatete katak bainhira Maromak komesa atu kria mundu, “Maromak nia oan hotu haklalak hodi hahiʼi nia”. (Jó [Ayub] 38:4-7) Ida-neʼe hatudu katak anju sira iha tiha ona antes Maromak kria mundu no ema. Eskritura neʼe mós hatudu katak anju sira iha sentimentu, tanba eskritura neʼe hatete sira “haklalak hamutuk ho haksolok”. Haree eskritura neʼe hatete: “Maromak nia oan hotu” haksolok hamutuk. Iha tempu neʼebá, anju hotu-hotu hanesan família ida neʼebé hamutuk serbí Maromak Jeová.

4. Oinsá mak Bíblia hatudu katak anju diʼak sira iha interese ba buat neʼebé ema halo?

⁴ Husi tempu neʼebé anju sira haree Maromak kria ema primeiru, anju sira neʼebé laran-metin ba Maromak Jeová iha interese ba ema neʼebé sai barak iha mundu, no mós kona-ba oinsá mak Maromak nia hakarak ba ema laʼo ba oin. (Provérbios [Amsal] 8:30, 31; 1 Pedro 1:11, 12) Maibé, nuʼudar ema sai barak, anju sira haree katak ema barak liu la halo tuir sira-nia Kriadór. Klaru katak ida-neʼe halo anju sira neʼebé laran-metin sente triste loos. Iha parte seluk, kuandu ema ida fila fali hodi serbí Maromak Jeová, ‘anju sira haksolok’. (Lucas 15:10) Tanba anju sira hakarak ema neʼebé serbí Jeová atu laran-metin nafatin, Jeová uza beibeik sira atu hametin no ajuda Ninia atan sira neʼebé laran-metin ba Nia. (Ebreu 1:7, 14) Mai ita koʼalia kona-ba ezemplu balu.

5. Bíblia konta istória saida deʼit neʼebé hatudu katak anju sira ajuda ema?

 ⁵ Anju naʼin-rua ajuda ema neʼebé laran-loos naran Lot ho nia oan-feto sira atu hetan salvasaun bainhira Maromak sobu sidade aat naran Sodoma no Gomorra, hodi lori sira sai husi sidade sira-neʼe. (Gênesis [Kejadian] 19:15, 16) Tinan barak tuirmai, profeta Daniel nia inimigu sira hatama nia ba leaun nia kuak, maibé nia la hetan kanek ida no nia dehan: “Haʼu-nia Maromak haruka ninia anju no taka leaun sira-nia ibun.” (Daniel 6:22) Iha apóstolu sira-nia tempu, anju ida lori apóstolu Pedro halai sai husi komarka. (Apóstolu 12:6-11) Anju sira hametin Jesus bainhira nia komesa halaʼo ninia serbisu ba Maromak iha mundu. (Marcos 1:13) No mós, antes Jesus mate, anju ida mosu atu “hametin nia”. (Lucas 22:43) Klaru katak Jesus hafolin ajuda neʼebé nia simu husi anju sira-neʼe!

6. (a) Ohin loron, oinsá mak anju sira ajuda Maromak nia povu iha mundu? (b) Ita sei koʼalia kona-ba pergunta saida deʼit?

⁶ Ohin loron, anju sira la mosu tan ba Maromak nia povu iha mundu. Maski ema la bele haree anju sira, maibé Maromak nia anju sira-neʼe neʼebé iha forsa boot kontinua atu ajuda ema. Liuliu, sira ajuda Maromak nia povu atu iha nafatin relasaun diʼak ho nia. Bíblia hatete: “Jeová nia anju hela haleʼu sira neʼebé taʼuk ba nia, no nia salva sira.” (Salmo [Mazmur] 34:7) Tanbasá mak liafuan sira-neʼe halo ita sente kmaan? Tanba iha mós anju sira neʼebé aat, no sira hakarak halo ita lakon! Sira mak sé? Sira mai husi neʼebé? Sira koko atu halo aat  mai ita iha dalan saida deʼit? Atu hatán ba pergunta sira-neʼe, mai ita hanoin kona-ba buat neʼebé akontese horiuluk kedas.

7. Satanás halo ema naʼin-hira atu la serbí Maromak?

⁷ Hanesan ita aprende ona iha Kapítulu 3 husi livru neʼe, anju ida hakarak atu ukun kriatura seluk, tan neʼe nia kontra hasoru Maromak. Tuirmai,  anju neʼe simu naran Diabu Satanás. (Apokalipse 12:9) Satanás lohi Eva, no iha tinan 1.600 nia laran tuirmai, Satanás konsege halo ema barak liu atu la serbí Maromak. Ema balu deʼit, hanesan Abel, Enoc, no Noé, mak laran-metin ba Maromak.—Ebreu 11:4, 5, 7.

8. (a) Tanbasá mak anju balu sai aat? (b) Atu anju aat sira la mate iha Rai-Nabeen iha Noé nia tempu, sira tenke halo saida?

⁸ Iha Noé nia tempu, anju seluk mós kontra hasoru Maromak Jeová. Sira husik Maromak nia família iha lalehan no tun mai mundu, depois sira uza isin-lolon hanesan ema nian. Tanbasá? Ita lee iha Gênesis (Kejadian) 6:2: “Maromak loos nia oan sira komesa atu haree ema nia oan-feto sira, sira haree katak feto sira-neʼe bonita. Tan neʼe sira hola feto hotu neʼebé sira hili atu sai sira-nia feen.” Maibé Maromak Jeová la husik anju sira-neʼe nia hahalok, neʼebé estraga mós ema nia hahalok, atu kontinua ba nafatin. Nia halo rai-nabeen iha mundu tomak atu halakon ema aat hotu, no nia salva deʼit ema diʼak. (Gênesis [Kejadian] 7:17, 23) Tan neʼe, anju sira neʼebé kontra hasoru Maromak, tenke husik sira-nia isin-lolon no fila fali ba lalehan. Sira apoia Satanás, no tan neʼe, Satanás sai “anju aat sira-nia ukun-naʼin”.—Mateus 9:34.

9. (a) Saida mak akontese kuandu anju aat sira fila fali ba lalehan? (b) Ita sei aprende saida kona-ba anju aat sira?

⁹ Bainhira anju sira neʼebé la halo tuir fila fali ba lalehan, Maromak la simu tan sira, hanesan ho sira-nia ukun-naʼin, Satanás. (2 Pedro 2:4) Maski agora sira la bele uza ona isin-lolon hanesan  ema nian, maibé sira bele book no obriga ema atu halo buat neʼebé aat. Tuir loloos, liuhusi anju aat sira-neʼe nia ajuda, Satanás “lohi mundu tomak”. (Apokalipse 12:9; 1 João 5:19) Oinsá? Mai ita koʼalia kona-ba dalan balu neʼebé sira uza atu lohi ema.—2 Korinto 2:11.

10. Matan-dook nia atividade katak envolve an ho sé?

¹⁰ Anju aat sira lohi ema liuhusi matan-dook nia atividade. Matan-dook nia atividade mak hanesan envolve an ho anju aat sira. Ema balu envolve an kedas ho anju aat sira, no ema seluk bá hasoru matan-dook. Bíblia fó avizu mai ita atu hadook an husi matan-dook nia atividade hotu. (Galásia 5:19-21) Anju aat sira uza matan-dook nia atividade hanesan peskadór uza iska atu kail ikan. Peskadór uza iska oioin atu kail ikan oioin. Hanesan neʼe, anju aat sira mós uza matan-dook nia atividade oioin atu kona ema oioin.

11. Saida mak iska ida neʼebé anju aat sira uza? Tanbasá mak ita tenke sees husi ida-neʼe?

¹¹ Iska oin ida neʼebé anju aat sira uza mak buka-hatene futuru ka buat seluk neʼebé ema la hatene. Ema buka-hatene futuru ka buat seluk liuhusi astrolojia, haree animál nia aten, haree manu-tolun, haree ema nia liman-laran, buka sinál husi mehi, no buat seluk tan. Maski ema barak hanoin katak envolve ho buat hanesan neʼe la iha perigu, maibé Bíblia hatudu katak ema neʼebé halo nuneʼe serbisu hamutuk ho anju aat sira. Porezemplu,  eskritura iha Apóstolu 16:16-18 hatete katak “anju aat ida mak domina” feto ida atu bele “siʼik futuru”. Maibé feto neʼe la bele siʼik tan kuandu apóstolu Paulo haruka anju aat sai husi feto neʼe.

12. Tanbasá mak perigu atu koko koʼalia ho ema neʼebé mate ona?

¹² Dalan ida tan neʼebé anju aat uza atu lohi ema mak book ema atu husu matadalan husi ema neʼebé mate ona. Dala ruma ema neʼebé triste tanba sira-nia belun ka família ida mate ona, fiar ba lia-bosok kona-ba ema mate nia kondisaun. Karik, matan-dook ida konta informasaun espesiál ka uza lian hanesan ema mate nian. Tan neʼe, ema barak fiar katak ema neʼebé mate ona moris hela, no ema sei ladún triste kuandu koʼalia ho ema mate neʼe. Maibé “konsola” hanesan neʼe perigu no tuir lia-bosok. Tanbasá? Tanba anju aat sira bele hasara ema mate nia lian no fó-hatene informasaun kona-ba ema mate neʼe ba matan-dook sira. (1 Samuel 28:3-19) Liután neʼe, hanesan ita aprende ona iha Kapítulu 6, ema mate la iha tan. (Salmo [Mazmur] 115:17; João 11:11-13) Nuneʼe, “ema ruma neʼebé husu ba ema mate”, monu ba anju aat sira-nia lia-bosok, no ema neʼebé halo ida-neʼe kontra Maromak nia hakarak. (Deuteronômio [Ulangan] 18:10, 11; Isaías [Yesaya] 8:19; Apokalipse 21:8) Tan neʼe, ita presiza kuidadu tebes atu la simu anju aat sira-nia iska perigu neʼe.

13. Ema barak neʼebé uluk taʼuk ba anju aat sira, agora sente oinsá?

¹³ Anju aat sira laʼós deʼit lohi ema, maibé sira  mós halo taʼuk ema. Ohin loron, Satanás no ninia anju aat sira hatene katak sira-nia “tempu hela uitoan deʼit”, katak lakleur tan sira la bele lohi ona ema iha mundu. Tan neʼe sira sai hirus makaʼas liután. (Apokalipse 12:12, 17) Maski nuneʼe, ema rihun ba rihun neʼebé uluk taʼuk ba anju aat sira, agora la taʼuk tan. Tanbasá? Oinsá mak ema bele sees husi matan-dook nia atividade?

14. Hanesan ema kristaun iha apóstolu sira-nia tempu, ita bele halo saida atu sees husi anju aat sira?

¹⁴ Bíblia fó-hatene mai ita oinsá ita bele kontra hasoru anju aat sira, no mós dalan atu sees husi sira. Hanoin toʼok kona-ba ezemplu husi ema kristaun iha apóstolu sira-nia tempu iha sidade Éfeso. Antes sira sai ema kristaun, sira balu  halo matan-dook nia atividade. Kuandu sira hakarak sees, saida mak sira halo? Bíblia dehan: “Ema barak neʼebé uluk halo buat oioin ho anju aat nia ajuda, sira halibur sira-nia livru hamutuk no sunu iha ema hotu nia oin.” (Apóstolu 19:19) Hodi sunu sira-nia livru kona-ba matan-dook nia atividade, sira neʼebé foin sai ema kristaun fó ezemplu diʼak ba ema ohin loron neʼebé hakarak kontra hasoru anju aat sira. Ema neʼebé hakarak serbí Maromak Jeová tenkesér soe buat hotu-hotu neʼebé envolve ho matan-dook nia atividade. Sasán sira-neʼe hanesan livru, filme, poster, no múzika neʼebé hatudu katak matan-dook nia atividade mak diʼak. Sasán sira-neʼe mós hanesan hena, kelu no buat seluk neʼebé ema tau ka tara atu anju aat la book sira.—1 Korinto 10:21.

15. Saida mak ita tenke halo atu kontra hasoru anju aat sira?

¹⁵ Tinan balu depois ema kristaun iha Éfeso sunu sira-nia livru kona-ba matan-dook nia atividade, apóstolu Paulo hakerek karta ba sira hodi dehan: “Ita halo funu . . . hasoru anju aat sira.” (Éfeso 6:12) Diabu ho ninia anju aat sira seidauk rende an. Sira koko nafatin atu domina ema kristaun. Tan neʼe, ema kristaun tenke halo saida tan? Paulo hatete: “Iha situasaun hotu, lori imi-nia fiar nuʼudar eskudu boot, hodi imi bele hamate rama-oan ho ahi nian neʼebé husi aat-naʼin.” (Éfeso 6:16) Kuandu ita-nia eskudu fiar nian mak forte liu, ita bele hamriik metin atu kontra hasoru anju aat sira.—Mateus 17:20.

16. Oinsá mak ita bele hametin ita-nia fiar?

 ¹⁶ Entaun, oinsá mak ita bele hametin ita-nia fiar? Hodi estuda Bíblia. Moru ida metin liu se moru neʼe nia hun, ka fundasaun, forte. Hanesan neʼe mós, ita-nia fiar sei sai metin liu se fiar neʼe nia hun mak metin. Buat neʼebé ita estuda husi Maromak nia Liafuan, Bíblia, mak sai nuʼudar hun ba ita-nia fiar. Se ita lee no estuda Bíblia loron-loron, ita-nia fiar sei sai metin liután. Hanesan moru neʼebé metin, fiar neʼebé metin bele proteje ita husi anju aat sira.—1 João 5:5.

17. Saida tan mak ita tenke halo atu kontra hasoru anju aat sira?

¹⁷ Saida tan mak ema kristaun iha Éfeso tenke halo? Sira presiza halo buat seluk tan atu proteje sira tanba sira hela iha sidade neʼebé nakonu ho anju aat sira-nia hahalok. Tan neʼe Paulo hatete ba sira: “Ho orasaun oioin no harohan, halo orasaun beibeik iha situasaun hotu ho espíritu.” (Éfeso 6:18) Tanba ita mós hela iha mundu neʼebé nakonu ho anju aat sira-nia hahalok, ita tenke harohan ba Maromak Jeová hodi husu nia ajuda atu kontra hasoru anju aat sira. Klaru katak ita tenke temi Maromak nia naran, Jeová, kuandu ita halo orasaun. (Provérbios [Amsal] 18:10) Nuneʼe, ita tenke harohan nafatin, husu Maromak atu ‘salva ita husi aat-naʼin’, Diabu Satanás. (Mateus 6:13) Maromak Jeová sei hatán ita-nia orasaun neʼebé ita hatoʼo ho laran.—1 João 5:14, 15.

18, 19. (a) Tanbasá mak ita bele fiar katak ita sei manán kuandu ita halo funu hasoru anju aat sira? (b) Kapítulu tuirmai sei koʼalia kona-ba pergunta saida?

¹⁸ Anju aat sira mak perigu, maibé kuandu ita  kontra hasoru Diabu no hakbesik ba Maromak hodi halo tuir Maromak nia hakarak, ita lalika taʼuk. (Tiago 4:7, 8) Anju aat sira la livre atu halo buat naran deʼit. Iha Noé nia tempu, Maromak kastigu sira, no iha futuru sira sei simu sira-nia kastigu ikus nian. (Judas 6) No hanoin-hetan katak Maromak Jeová nia anju sira neʼebé forte tebes mós ajuda ita. (2 Reis [Raja-Raja] 6:15-17) Maromak nia anju sira-neʼe hakarak tebes katak ita manán hasoru anju aat sira. Anju diʼak sira-neʼe laran-manas atu apoia ita. Tan neʼe, mai ita hakbesik nafatin ba Maromak Jeová no ninia família, katak anju sira neʼebé laran-metin ba nia. No mós, mai ita sees husi matan-dook nia atividade oioin no sempre halo tuir avizu husi Maromak nia Liafuan. (1 Pedro 5:6, 7; 2 Pedro 2:9) Hanesan neʼe, ita sei manán kuandu ita funu hasoru anju aat sira.

¹⁹ Maibé tanbasá mak Maromak husik anju aat sira-neʼe atu fó terus ba ema iha mundu? Kapítulu tuirmai sei fó resposta ba pergunta ida-neʼe.