1. ¿Xigony raquiin gantzayno ni rony ángeles ni noʼ guibá?

RIOʼ ór órni rimbuno toib buñ láaca raquiin guimbuno xfamilybu. Scúca láani, ni guimbuno Jehová láaca raquiin guimbuno xfamilybu ni nac ángeles ni noʼ guibá. La Biblia rabeʼ laayibu, «xiin Dios» (Job 38:7). Per ¿ximod raquiin Jehová layibu par gony ni ná? ¿Noʼ ro ma gocné ángeles buñgudxlio la? ¿Noʼ pu racné ángeles lóono la? Pal scú nacní, ¿ximod?

2. ¿Chú bisaʼ ángeles, né balac ángeles noʼ?

² La Biblia rasetlaa ángeles xidalgayoʼ buelt. Nigoreʼ guisuidyno tipnés textos ni rasetlaa de ángeles. ¿Chú bisaʼ ángeles? Colosenses 1:16 ná: «Por láabu [Jesucristo] guirá cós goyaʼni lainy guibá né ló gudxlio». Scú láani, guirá ángeles ni noʼ, Dios bisaʼ layibu por tigaa né biquiimbu Xiin lagolbu. ¿Balac ángeles noʼ? La Biblia raniʼ que Jehová bisaʼ xidalgayoʼ millón ángeles, né guiráyibu nap galnadip (Salmo 103:20). *

3. ¿Xí raiby Job 38:4-7 lóono de ángeles ni noʼ guibá?

³ Xtiitz Dios, la Biblia, raiby lóono que órni Dios bisaʼ  Gudxlio «guirá xiin Dios gosaló bicaʼ rudx» (Job 38:4-7). Dios bisaʼ ángeles dzú yása guisaʼbu buñ né dzú yása guisaʼbu Gudxlio. Texto reʼ raslooy lóono que ángeles rasacyibu xomod lóono, mod raslooy texto reʼ órni rasetlaa que, «goxtiguie junt bicaʼyibu rudx». Biduidysi cuent que «guirá xiin Dios» bibaladxyibu «junt». Ló dzúcu, guirá ángeles gocyibu toibsi family ni buny ni ná Jehová Dios.

4. ¿Ximod raslooy la Biblia que ángeles xtuny Dios rioʼyibu ló galrasaʼ por ni rony buñgudxlio?

⁴ Desde dzú bibiʼyibu goyaʼ primer buñgonaʼ né primer buñguieeu, guirá ángeles ni rony ni ná Dios bislooyibu que goyoʼyibu ló galrasaʼ por buñgudxlio ni cadal né láaca ni gac cumplir ni Dios ma goniʼ gony (Proverbios 8:30, 31; 1 Pedro 1:11, 12). Conforma godudy dzú, ángeles bibiʼyibu ximod xidal buñ golsit de Jehová, Dios ni nadxiʼ layibu. Nandxichno que ndeʼ goloʼ nabann guirá ángeles ni rony ni ná Dios. Per ná órni toibsi buñ rabiguet rasob Jehová «guirá ángeles xtuny Dios rabaladx» (Lucas 15:10). Xomod ma bienno, rioʼyibu ló galrasaʼ que buñ ni rony ni ná Dios guiguaʼ sacró. Por ngú, diti radziguiaʼno que Jehová xidal buelt biquiimbu ángeles par gocné né gon buñ ni rasob láabu ló Gudxlio (bíil Hebreos 1:7, 14). Guibiʼno ximod bunyibu láani.

5. Mod sieed ló la Biblia, ¿ximod gocné ángeles buñ?

⁵ Órni Dios binitló gudx mal, Sodoma né Gomorra, nosi ni bilaa ngú Lot né guiropca xiindzap portín chop ángeles goleʼ layibu lagarycu (Génesis 19:15, 16). Godudy xidal íz de goló góc ndeʼ, Daniel ni bicaʼ profecía goyoʼ ni bisal láabu lainy xcarió betz ons, per diti noʼ xi  bunyimu Daniel. Láabu goniʼbu xigony gocni scú: «Dios xtuni bixel ángel xtuny né bisieg roʼ guirá betz ons» (Daniel 6:22). Ló Xtzúno toib ángel bilaabu Pedro par labúu bireʼ press (Hechos 12:6-11). Láaca ángeles gocné Jesús órni gosaló buny xchiin Dios ló Gudxlio (Marcos 1:13). Órni ma yaaca gaitybu, toib ángel bireʼ lóbu né «gocné láabu» (Lucas 22:43). ¡Xcalrracné ángeles gocnéni Jesús órni ma yaaca gaitybu!

6. a) ¿Ximod ran ángeles xcudx Dios ló naareʼ? b) ¿Xí galrranabdiitz guicapyno?

⁶ Ló naareʼ, guirá buñ ni noʼ lad xcudx Dios ma diti rabiʼyibu ángeles ló Gudxlio. Ná buñ diti rabiʼ ángeles xtuny Dios ni nap galnadip, ransayibu buñ né máspa órni noʼ cós ni rony que ralsit buñ de Jehová. La Biblia ná: «Ángel xtuny Jehová noʼ roloo guirá buñ ni radzuiby Láabu né cayan né calaa layibu» (Salmo 34:7). ¿Xigony racné diitzreʼ lóono? ¡Portín noʼ ángeles ni nac nigolú mal né raniiny guinitlóyibu lóono! ¿Chú layibu? ¿Chú bisaʼ layibu? ¿Xí ronyibu par gonyibu mal lóono? Par guienno láani guisuidyno tidxo xí góc ló dzú ni bibany Adán.

7. ¿Balac buñ goleʼ Buñdzab tiplad par golsit de Dios?

⁷ Xomod bienno ló capítulo 3 de libro reʼ, goyoʼ toib ángel ni goniiny gony mandary a stipnés buñ, né modreʼ cualóbu Dios. Después ángel reʼ bidxin góc laabu Buñdzab (Revelación 12:9). Después ni biscúbu Eva, ló 1,600 íz bunybu gann que casi guirá buñ golsit de Dios. Nosi tipnés buny ni ná Dios, xomod Abel, Enoc né Noé (Hebreos 11:4, 5, 7).

8. a) ¿Ximod tipnés ángeles bidxin góc demony? b) ¿Xí láani buny guirá demony par labúu nalaa de guiérodann?

⁸ Ló dzú ni bibany Noé goyoʼ stipnés ángeles ni cualó  Jehová. Bisianyibu lagary ni gopyibu lad xfamily Dios lainy guibá né bietjyibu ló Gudxlio par gocyibu xomod buñ. ¿Xigony? Génesis 6:2 rabexa: «Xiin Dios ni nigolú, gosaló bibiʼ que xiindzap guirá buñgudxlio nigolú móz nacyibu. Por ngú layibu gosaló cuaʼyibu guirá buñgonaʼ ni layibu golúyibu par gac tzeʼelyibu». Guirá ángeles bixinyibu xpensary buñgudxlio, per Jehová diti naduidy lagary ñonyibu láani por xiroʼ tiemp. Jehová bitné toib guiérodann né binitlóbu guirá buñ mal, nosi buñ ni bisob láabu bilaa (Génesis 7:17, 23). Per guirá demony par labúu nalaayibu gocyibu espíritu stoib né bibiguetyibu guibá. Ni bunyibu bislooy que  noyibu xilad Buñdzab ni bidxin góc «ni rony mandary demony» (Mateo 9:34).

9. a) ¿Xí gosaclóo demony órni bibiguetyibu guibá? b) ¿Xí guisuidyno ni rony demony?

⁹ Órni guirá demony bibiguet guibá, Dios diti biduidy lagary ñoʼyibu lad xfamilybu lainy guibá, xomodca bunybu né Buñdzab (2 Pedro 2:4). Ná nigoreʼ demony diti labúu racyibu de beʼel né de runy layibu laʼra ronyibu mal buñ. Scú láani, né xcalrracné demony, Buñdzab «cascú guiránac buñgudxlio» (Revelación 12:9; 1 Juan 5:19). ¿Ximod? Demony nap xidal mod par guiscú guirá clas buñ (bíil 2 Corintios 2:11). Nigoreʼ guisuidyno ximod ronyibu láani.

10. ¿Xí laani ngú galchiser?

¹⁰ Par guiscú demony buñ raquiinyibu galchiser. Galchiser nacní órni buñ raniʼ né demony o raquiinyibu toib buñ par gonyibu láani. La Biblia rianladx galchiser né raibyni lóono galsitno de guirá cós ni napni (Gálatas 5:19-21). Demony raquiin galchiser o galbruj xomod rony toib buñ ni raquiin bisaʼ clas tramp par guinás nimal. Toib ni ranás nimal rayopy xidal mod par guinás xidal clas nimal. Scúca rony demony, de xidal mod raquiinyibu galchiser par guiab guirá clas buñ loni.

11. ¿Xí láani ngú adivinación, né xigony raquiin galsitno de láani?

¹¹ Toib tramp ni raquiin demony ngú, adivinación. ¿Xí láani ngú adivinación? Ndeʼ nacní órni buñ ná gann xí gac né layibu o ná gann ni diti rimbu. Tipnés mod ni nap adivinación, láani ngú astrología, baraj, bola de cristal. Ni roʼol ladxña buñ o rayopy ximod rarexa toib bacaʼal. Ná xidal buñ raniʼ que ndeʼ diti mal, la Biblia raslooytzay que buñ ni nac bruj o buñ chiser  toibsi ronyibu dxiin né demony. Xomod raslooy Hechos 16:16-18 que «toib demony de adivinación» buny que toib mbioxhlas gonaʼ ñony adivinar. Per órni bireʼ demony reʼ laidybu, mbioxhlas reʼ ma diti labúu buny dxiin cú.

12. ¿Xigony napni riesga gonyno por guininéno gueʼet?

¹² Noʼ stoib mod ni rascú demony, rakíilbu buñ par guininé gueʼet. Órni buñ ribdxaʼ por ni goity xfamily o ximig rioʼ ni raiby láabu pór galrrascú de gueʼet. Toib buñ chiser labúu gaiby layibu cós ni diti rimbubu de guet cú, o gonybu modpa góc xtiitz ni goity cú. Ndeʼ rony que xidal buñ raluladx que gueʼet nigolú nabany né pal raninéyibu gueʼet sacnéni layibu par gony guantaryibu galrrioop. Per ndeʼ toib galrrascú láani né nacní toib riesga. ¿Xigony? Portín demony labúu rony modpa góc xtiitz ni goity né labúu raibybu a buñ chiser stipnés cós ni buny gueʼet cú (1 Samuel 28:3-19). Per xomod  ma bisuidyno ló capítulo 6 órni buñ raity cuti raloxni (Salmo 115:17). Por ngú, buñ «ni ranabdiitz gueʼet» demony rascú layibu né ndeʼ mal nacní nisló Dios (bíil Deuteronomio 18:10, 11; Isaías 8:19). Por ngú, goyoʼ naní né golsit de guirá tramp ni raquiin demony.

13. ¿Xí láani labúu buny gann xidal buñ ni bidzuiby demony nírcu?

¹³ Demony diti nosi rascú, láaca ratzuibyibu buñ. Buñdzab né xidemony nantzayibu que ma «tidxósi tiemp» napyibu par tzó ni guinitló layibu ló Gudxlio, né por ngú ronyibu cós ni nigolú mal ló xtzúno (Revelación 12:12, 17). Ná scú nacní, xidalguixo buñ ni bibany né bidzuiby a demony ma bireʼ ló ndeʼ. ¿Ximod labúu bunyibu láani? ¿Xí labúu gony toib buñ ni ma noʼ ló galchiser par guireʼ loni?

14. ¿Ximod guicalóno demony mod buny tipnés herman ni goyoʼ ló gudx Éfeso?

¹⁴ La Biblia raiby lóono ximod guicalóno demony né ximod guilaano de layibu. Guibiʼno xí buny tipnés buñ ni cuanal Jesús ni golés gudx Éfeso. Tipnésyibu dzú yása guicanalyibu Jesús gocyibu buñ chiser. ¿Xí bunyibu órni goniiny layibu guireʼyibu ló galchiser? La Biblia raniʼ: «Xidal buñ ni góc buñ bruj bitop guirá libros ni gop né bisaʼij láani nisló guirá buñ» (Hechos 19:19). Ni gosaló cuanal Jesús bisaʼijyibu libros de galchiser, né modreʼ godiʼxyibu toib mod galán par ni ná guicaló demony ló naareʼ. Buñ ni ná gony ni ranab Jehová raquiin guinitlóyibu guirá cós de galchiser ni raquiinyibu. Ladni noʼ libros, revistas, películas, guiich dibuj ni raniʼ de galchiser, canción ni rakíil buñ gony galchiser, ni rony que buñ guibiʼ galchiser sacroyen o par guioladxyibu láani. Láaca raquiin guinitlóyibu amuletos, o  stipnés cós ni raquiin buñ guirá ór par guilaa de nitisi cós mal (1 Corintios 10:21).

15. ¿Xí labúu gonyno par labúu guicalóno demony?

¹⁵ Godudy tidxo íz de goló ni cuanal Jesús de gudx Éfeso bisaʼij libros de galchiser ni gopyibu. Pablo bicaʼ guiich lóoyibu ro goniʼbu: «Cacalsaʼno demony» (Efesios 6:12). Ndeʼ bislooy que demony diti ma bireʼgan. Par ló dzúcu demony biyopyibu mod ñonyibu gann ni cuanal Jesús de gudx Éfeso. Por ngú, ¿xí más biquiin ñonyibu ló dzúcu? Pablo goniʼ: «Per ni máspa, colguicaʼ escudo xiroʼ de fe xtunyto, né láani labúu guisioʼyto guirá flech ni nap guii ni sieed de ni nigolú mal [Buñdzab]» (Efesios 6:16). Pal escudo de fe xtunyno nadipni, labúu guicalóno demony né sonyno gann layibu (Mateo 17:20).

16. ¿Xí labúu gonyno par fe ni napnó gac nadipni?

¹⁶ ¿Xí labúu gonyno par gac nadip fe ni napnó? Guisuidyno la Biblia. Toib muro par diti guiabni raquiin guisagaʼni dxich. Scúca fe ni napnó par gacni nadip, raquiin guisagaʼni dxich, né ronyno láani órni racaʼno galnantzay ni sieed ló Xtiitz Dios. Pal rolno né rasuidyno la Biblia guirá dzú, fe ni napnó sac nadipni. Xomod toib muro ni sagaʼdxich, fe ni napnó saquiinno láani xomod toib escudo par guicalóno demony (1 Juan 5:5).

17. ¿Xí raquiin gonyno par labúu guicalóno demony?

¹⁷ ¿Xí más biquiin ñony ni cuanal Jesús de gudx Éfeso? Por ni bibanyibu gudx ro bidza galchiser biquiingoluʼyibu xcalrracné Dios. Por ngú, Pablo góoch layibu: «Guininéto Dios né gonyto láani né guidopy xcalnabanyto, né espíritu conés lóoto» (Efesios 6:18). Lóono láaca nabanyno ló toib gudxliogox ro bidza galchiser né galbruj. Por ngú raquiin guinabno lóo Jehová né guidopy xcalnabanyno par guilaabu lóono de demony. Ni más rasac ngú, guiquiinno laa Jehová órni  guininéno láabu (bíil Proverbios 18:10). Láaca guinapno lóo Dios guilaa lóono de Buñdzab (Mateo 6:13). Jehová sacapy guirá ni ranabno láabu (Salmo 145:19).

18, 19. a) ¿Xigony nandxichno que labúu gonyno gann demony? b) ¿Xí guicapyno ló capítulo ni sieed?

¹⁸ Scú láani, gapnó cuidad demony ni noʼ. Per diti non guidzuibyno layibu, pal racalóno Buñdzab né rabignono Dios né ronyno ni nábu (bíil Santiago 4:7, 8). Xcalnadip demony diti rigaʼl xcalnadip Dios. Góc castigar layibu ló xtzú Noé, né ló dzú ni sietra Dios sanitló layibu (Judas 6). Bisednaladx, ángeles xtuny Jehová nap xiroʼ galnadip par labúu guilaa lóono (2 Reyes 6:15-17). Ángeles xtuny Dios noyibu ló galrasaʼ por lóono par guicalóno demony né raniiny layibu gonyno gann. Ángeles ni rony xinésni rony animaryibu lóono. Por ngú, diti guireʼno xilad Dios né xfamilybu ni nac ángeles ni rony ni nábu. Láaca galsitno de guirá clas galchiser, né guirá ór guisobno litz ni rony mandary Dios ló Xtiitzbu (1 Pedro 5:6, 7; 2 Pedro 2:9). Modreʼ labúu gonyno gann demony ni noʼ ló xtzúno.

¹⁹ Per ¿xigony caduidy Dios lagary tzó demony né cós mal ni rony que buñ tzó ló galrrioop? Ló capítulo ni sieed guicapyno ndeʼ.