1, 2. Mɛni nɔ́ namihi nihi kɛ ngɛ kpee mwɔnɛ ɔ, nɛ lɔ ɔ ha nihi fuu biɔ mɛni sanehi?

BENƐ a hwu ta nɛ ngɛ gbeye ko ngɛ ma ko nɔ se ɔ, a pu ma bi yihi kɛ jokuɛwi akpehi abɔ nɛ a gbo ngɛ ta a mi ɔ ngɛ muɔ kake mi, nɛ a kadi muɔ ɔ he kɛ kpe. A ngma ngɛ kadimi ní ɔmɛ a he ke: “Mɛni he je?” Behi fuu ɔ, ke oslaa ko ba a, bɔ nɛ e dɔɔ nihi ha a ji nɔ́ nɛ haa a biɔ sane nɛ ɔ nɛ. Nihi kɛ aywilɛho biɔ sane nɛ ɔ ke a suɔlɔ ko gbo ngɛ ta, oslaa, hiɔ, aloo awi yemi dɛ mi, aloo ke ní nɛ ɔmɛ eko puɛ a wehi, aloo e ha nɛ a ngɛ nɔ́ nae wawɛɛ ngɛ blɔ kpa komɛ a nɔ. A suɔ kaa á le nɔ́ nɛ ha haomi nɛ ɔmɛ ba a nɔ.

² Mɛni he je Mawu ngmɛ nɔ́ nami blɔ? Ke Yehowa Mawu ji Ope ɔ, nɛ e ngɛ suɔmi, kɛ ní lemi, nɛ e yeɔ dami sane hu ɔ, lɛɛ mɛni he je mɔ nɛ je ɔ mi hyi tɔ kɛ ninyɛ kɛ yayami peemi ɔ? Anɛ o susu sane nɛ ɔ he hyɛ lo?

3, 4. (a) Mɛni tsɔɔ kaa tɔmi ko be he kaa wa ma bi ke mɛni he je Mawu ngmɛ nɔ́ nami blɔ? (b) Kɛ Yehowa nuɔ ní yayamihi nɛ nihi peeɔ, kɛ nɔ́ nami he ha kɛɛ?

³ Anɛ e ji tɔmi kaa wa ma bi kaa mɛni he je nɛ Mawu ngmɛ nɔ́ nami blɔ lo? E haoɔ ni komɛ kaa a ma bi sane nɛ ɔ, ejakaa a susuɔ kaa lɔ ɔ maa tsɔɔ kaa a be Mawu mi  hemi kɛ yemi, aloo a be bumi ha Mawu. Se ke o kane Baiblo ɔ, o maa na kaa anɔkualetsɛmɛ nɛ yee Mawu gbeye bi sanehi nɛ ngɛ kaa kikɛ. Kaa nɔ hyɛmi nɔ́ ɔ, gbalɔ Habakuk bi Yehowa ke: “Mɛni he je o ha i ngɛ yayami kɛ haomi hyɛe kikɛ nɛ ɔ? Kɛ pee kɛɛ nɛ o ngɛ nɔ́ nɛ dɛ nɛ ɔ hyɛe, nɛ o pui mi ɔ? Hɛ mi kpatami kɛ yi wu tso níhi bɔle mi kɛ kpe; pɛ kɛ kunɔ ngɛ he tsuaa he”—Habakuk 1:3.

⁴ Anɛ Yehowa kã gbalɔ Habakuk anɔkualetsɛ ɔ hɛ mi kaa e bi sane nɛ ɔ lo? Dɛbi. Se mohu Mawu ha nɛ a ngma munyu nɛ Habakuk je e tsui mi nɛ e tu ɔ kɛ piɛɛ Baiblo mi munyu ɔmɛ a he. Jehanɛ ɔ, Mawu ye bua lɛ nɛ e nu níhi a sisi saminya, nɛ e hemi kɛ yemi mi ba wa. Yehowa suɔ kaa e maa pee jã ha mo hu. Mo kai kaa, Baiblo ɔ tsɔɔ kaa ‘e hyɛɛ wa nɔ.’ (1 Petro 5:7) Mawu sume ní yayamihi nɛ nihi peeɔ kɛ nɔ́ nami nɛ jee mi kɛ baa a kulaa pe adesahi tsuo. (Yesaya 55:8, 9) Lɛɛ mɛni he je nɛ nɔ́ nami hiɛ ngɛ je ɔ mi mɔ?

5. Mɛni nya tsɔɔmihi nihi kɛ haa be komɛ ngɛ nɔ́ nɛ ha adesahi ngɛ nɔ́ nae ɔ he, se mɛni ji nɔ́ nɛ Baiblo ɔ tsɔɔ?

⁵ Jami slɔɔtohi a mi bi biɔ a hɛ mi nyɛɛli kɛ tsɔɔli nɔ́  nɛ ha nɔ́ nami hiɛ babauu kikɛ. Behi fuu ɔ, heto nɛ a haa mɛ ji, e ji Mawu suɔmi nya ní kaa nihi nɛ na nɔ́, nɛ e to nɔ́ tsuaa nɔ́ nɛ maa ba hwɔɔ se, kɛ oslaahi tsuo kɛ fɔ si momo. A deɔ nihi fuu ke wa be nyɛe maa nu Mawu blɔhi a sisi, aloo Mawu haa nihi gboɔ, kɛ jokuɛwi po, bɔ nɛ pee nɛ a ya piɛɛ e he ngɛ hiɔwe. Se kaa bɔ nɛ o kase ɔ, Yehowa Mawu pee we nɔ́ yayami kɔkɔɔkɔ. Baiblo ɔ de ke: “Anɛ Mawu maa pee yi wu tso ní lo? Anɛ Ope ɔ maa pee nɔ́ nɛ dɛ blɔ lo?”—Hiob 34:10.

6. Mɛni he je nihi fuu piaa Mawu ngɛ blɔ nɛ dɛ nɔ kaa lɛ nɛ e ha adesahi ngɛ nɔ́ nae ngɛ je ɔ mi ɔ?

⁶ Anɛ o le nɔ́ nɛ ha nihi piaa Mawu ngɛ blɔ nɛ dɛ nɔ kaa lɛ ji nɔ nɛ ha adesahi ngɛ nɔ́ nae ngɛ je ɔ mi ɔ lo? Behi fuu ɔ, a piaa Mawu Ope ɔ, ejakaa a susu kaa lɛ tutuutu ji je nɛ ɔ nɔ yelɔ. A li anɔkuale munyu kpiti ko nɛ he hia nɛ Baiblo ɔ tsɔɔ ɔ. O kase anɔkuale munyu nɛ ɔ ngɛ womi nɛ ɔ Yi 3 ɔ mi. Nɔ nɛ ngɛ je nɛ ɔ nɔ yee nitsɛnitsɛ ji Satan Abosiami.

7, 8. (a) Mɛni blɔ nɔ suhi nɛ a jeɔ kpo ngɛ je ɔ mi ɔ ngɛ kaa e nɔ yelɔ ɔ suhi pɛpɛɛpɛ? (b) Mɛni blɔ nɔ mluku nɛ adesahi yi kɛ ‘be yayami nɛ ba náa nɔ tlukaa’ a ngɔɔ nɔ́ nami kɛ baa?

⁷ Baiblo ɔ de heii ke: “Je ɔ, Abosiami lɛ ngɛ nɔ yee.” (1 Yohane 5:19) Ke o susu munyu nɛ ɔ he ɔ, anɛ sisi numi be he lo? Suhi nɛ nihi jeɔ kpo ngɛ je nɛ ɔ mi ɔ ngɛ kaa mumi mi adebɔ nɛ ngɛ ‘nihi tsuo sisie ngɛ je ɔ mi ɔ’ suhi pɛpɛɛpɛ. (Kpojemi 12:9) Satan sume nɔ, e sisiɔ nɔ, nɛ e yi mi wa. Lɔ ɔ he je nɛ je ɔ nɛ Satan ngɛ nɔ yee ɔ hu mi hyi tɔ kɛ ninyɛ, sisimi, kɛ yi mi wami ní peepeehi ɔ nɛ. Enɛ ɔ ji nɔ́ kake he je nɛ nɔ́ nami hiɛ ngɛ je ɔ mi ɔ nɛ.

⁸ Kaa bɔ nɛ wa susu he ngɛ Yi 3 ɔ mi ɔ, nɔ́ enyɔne he je nɛ nɔ́ nami hiɛ babauu ji kaa, kɛ je benɛ atuã tsɔmi ba ngɛ Eden abɔɔ ɔ mi kɛ ba si amlɔ nɛ ɔ, adesahi yi mluku hu, nɛ a peeɔ ní yayamihi. Adesahi yayami peeli pleɔ tsɛ yemi he, nɛ enɛ ɔ ngɔɔ ta hwumi, yi wu tso ní peepee kɛ nɔ́ nami  kɛ baa. (Fiɛlɔ 4:1; 8:9) Jehanɛ ɔ, ‘be yayami nɛ ba náa nɔ tlukaa’ a hu ji nɔ́ etɛne he je nɛ nɔ́ nami baa. (Kane Fiɛlɔ 9:12.) Akɛnɛ pi Yehowa ji je ɔ Nɔ Yelɔ nɛ poɔ he piɛ he je ɔ, nihi kɛ oslaa kpee tlukaa.

9. Mɛni he je wa ma nyɛ ma ná nɔ mi mami kaa Yehowa ngɛ yi mi tomi kpakpa ko he je nɛ e ngmɛ nɔ́ nami blɔ?

⁹ Se bua jɔmi sane ji kaa pi Mawu nɛ ngɔɔ nɔ́ nami kɛ baa. Pi lɛ nɛ ngɔɔ ta hwumi, awi yemi, yi wu tso ní peepee, aloo adebɔ mi oslaahi nɛ haa nihi naa nɔ́ ɔ kɛ baa. Se kɛ̃ ɔ, e he hia nɛ waa le sane bimi nɛ nyɛɛ se nɛ ɔ heto: Mɛni he je Yehowa ngmɛ nɔ́ nami babauu kikɛ blɔ? Ke lɛ ji Ope ɔ, lɛɛ e ngɛ he wami nɛ e kɛ maa po nɔ́ nami se. Mɛni he je mɔ nɛ e pee we jã? Mawu nɛ ngɛ suɔmi nɛ wa ba le lɛ ɔ maa hi yi mi tomi kpakpa ko kɛ̃.—1 Yohane 4:8.

10. Mɛni he atsinyɛ Satan je ɔ, nɛ ngɛ mɛni blɔ nɔ?

¹⁰ Bɔ nɛ pee nɛ waa na nɔ́ nɛ ha Mawu ngmɛ nɔ́ nami blɔ ɔ, e sa kaa wa susu benɛ nɔ́ nami je sisi ɔ he ekohu. Benɛ Satan ha Adam kɛ Hawa gbo Yehowa nɔ tue ɔ, sane ko nɛ he hia te si. Satan ji he wami nɛ Yehowa ngɛ ɔ he atsinyɛ. Satan nitsɛ le kaa he wami nɛ Yehowa ngɛ ɔ huzu be he. Se mohu ɔ, Satan je he blɔ nɛ Yehowa ngɛ kaa nɔ yelɔ ɔ he atsinyɛ. Satan tsɛ Mawu ke lakpatsɛ, kɛ nɔ nɛ tsiɔ e sisi bi a nya ngɛ ní kpakpahi a he, nɛ e kɛ tsɔɔ kaa Yehowa ji nɔ yelɔ yayami. (Kane 1 Mose 3:2-5.) Satan ngɛ tsɔɔe kaa adesahi a he maa jɔ mɛ ke a je a he kɛ je Mawu nɔ yemi sisi. Enɛ ɔ ji Yehowa je mi tsuo nɔ yemi ɔ, nɛ ji he blɔ nɛ e ngɛ kaa e yeɔ nɔ ɔ tuami ɔ nɛ.

11. Mɛni he je Yehowa kpataa we atuã tsɔli ɔmɛ a hɛ mi amlɔ ngɛ Eden?

¹¹ Adam kɛ Hawa tsɔ Yehowa hɛ mi atuã. Ngɛ anɔkuale mi ɔ, nɔ́ nɛ a ngɛ tsɔɔe ji: ‘Wa hia we Yehowa kaa wa Nɔ Yelɔ. Wɔ nitsɛmɛ wa ma nyɛ maa mwɔ wa yi mi kpɔ ngɛ kpakpa kɛ yayami he.’ Kɛ Yehowa ma tsu sane ɔ he ní kɛɛ?  Mɛni blɔ nɔ e maa gu kɛ tsɔɔ adesahi kɛ bɔfohi tsuo kaa atuã tsɔli ɔmɛ a munyu dɛ, se lɛ Yehowa lɛɛ e blɔ tsɔɔmihi da kɛ pi si? Eko ɔ, nɔ ko ma de ke e sa kaa Mawu ko kpata atuã tsɔli ɔmɛ a hɛ mi nɛ e ko bɔ nimli kpahi. Se Yehowa de kaa e yi mi tomi ji kaa e ma ha Adam kɛ Hawa sisi bimɛ ma hyi zugba a nɔ, nɛ e suɔ kaa a hi paradeiso mi ngɛ zugba a nɔ. (1 Mose 1:28) Yehowa haa e yi mi tomi baa mi be tsuaa be. (Yesaya 55:10, 11) Jehanɛ hu, ke e kpata atuã tsɔli ɔmɛ a hɛ mi ngɛ Eden ɔ, lɔ ɔ be hae nɛ a ná heto ha sane nɛ te si ngɛ he blɔ nɛ Yehowa ngɛ kaa e yeɔ nɔ ɔ he.

12, 13. Mo ha nɔ hyɛmi nɔ́ kɛ tsɔɔ nɔ́ nɛ ha Yehowa ngmɛ Satan blɔ konɛ e ye je nɛ ɔ nɔ, kɛ nɔ́ nɛ ha Mawu ngmɛ adesahi blɔ konɛ a ye mɛ nitsɛmɛ a he nɔ.

¹² Ha nɛ wa susu nɔ hyɛmi nɔ́ nɛ ɔ he nɛ waa hyɛ. Waa ngɔ lɛ kaa, tsɔɔlɔ ko ngɛ sukuu bi blɔ nɔ nɛ a maa gu kɛ bu akɔtaa nɛ mi wa ko tsɔɔe. Sukuu bi ɔmɛ a ti nɔ kake nɛ le ní se e ji atuã tsɔlɔ ɔ de ke bɔ nɛ tsɔɔlɔ ɔ ngɛ ní ɔ tsɔɔe ɔ dɛ. Atuã tsɔlɔ nɛ ɔ tsɔɔ kaa tsɔɔlɔ ɔ li ní tsɔɔmi, se lɛɛ e le blɔ kpakpa nɔ nɛ e maa gu kɛ bu akɔtaa a. Sukuu bi ɔmɛ ekomɛ susu kaa e munyu da, nɛ lɔ ɔ he ɔ mɛ hu a tsɔ atuã.  Mɛni e sa kaa tsɔɔlɔ ɔ nɛ pee? Ke e fie atuã tsɔli ɔmɛ kɛ je tsu ɔ mi ɔ, mɛni sukuu bi kpa amɛ ma de? Anɛ a be hee ye kaa a nyɛmi sukuu no ɔ kɛ ni kpa amɛ nɛ ya piɛɛ e he ɔ a munyu da lo? Enɛ ɔ ma ha sukuu bi ɔmɛ tsuo be tsɔɔlɔ ɔ bue hu, nɛ a ma susu kaa tsɔɔlɔ ɔ ngɛ gbeye yee kaa a ma kpa e he bo kaa e li ní tsɔɔmi. Se ngɔɔ lɛ kaa tsɔɔlɔ ɔ ngmɛ atuã tsɔlɔ ɔ blɔ konɛ e tsɔɔ sukuu bi ɔmɛ bɔ nɛ e maa bu akɔtaa a ha.

¹³ Yehowa pee nɔ́ ko kaa nɔ́ nɛ tsɔɔlɔ ɔ pee ɔ pɛpɛɛpɛ. Mo kai kaa pi atuã tsɔli ɔmɛ ngɛ Eden ɔ pɛ a he nɛ sane ɔ kɔ. Bɔfohi ayɔhi abɔ na nɔ́ nɛ ya nɔ ɔ. (Hiob 38:7; Daniel 7:10) Bɔ nɛ Yehowa ma tsu atuã tsɔmi ɔ he ní ɔ maa sa bɔfo ɔmɛ tsuo a he, nɛ nyagbe ɔ, e maa sa adesahi hu a he. Lɔ ɔ he ɔ, mɛni Yehowa pee? E ngmɛ Satan blɔ konɛ e tsɔɔ bɔ nɛ e maa ye adesahi a nɔ ha. Jehanɛ hu ɔ, Mawu ngmɛ adesahi blɔ nɛ a ye mɛ nitsɛmɛ a he nɔ ngɛ Satan kudɔmi sisi.

14. Mɛni se nami maa je blɔ nɛ Yehowa ngmɛ adesahi kaa a ye mɛ nitsɛmɛ a he nɔ ɔ mi kɛ ba?

¹⁴ Tsɔɔlɔ nɛ ngɛ wa nɔ hyɛmi nɔ́ ɔ mi ɔ le kaa atuã tsɔlɔ ɔ kɛ sukuu bi nɛ ya piɛɛ e he ɔ a munyu dɛ. Se e le hu kaa ke e ngmɛ mɛ blɔ nɛ a tsɔɔ bɔ nɛ a maa bu akɔtaa a ha a, sukuubi ɔmɛ tsuo ma ná he se. Ke atuã tsɔli ɔmɛ nyɛ we nɛ a bu akɔtaa a, sukuu bi nɛ a yeɔ anɔkuale ɔ tsuo maa na kaa tsɔɔlɔ ɔ pɛ ji nɔ nɛ ma nyɛ maa tsɔɔ mɛ ní. Pee se ɔ, ke tsɔɔlɔ ɔ fie atuã tsɔlɔ ko kɛ je tsu ɔ mi ɔ, a maa nu sisi. Jã kɛ̃ Yehowa le kaa ke adesahi anɔkualetsɛmɛ tsuo kɛ bɔfohi na kaa Satan kɛ atuã tsɔli nɛ piɛɛ e he ɔ yi manye, nɛ adesahi hu nyɛ we nɛ a ye mɛ nitsɛmɛ a he nɔ ɔ, a maa nu sisi. Kaa bɔ nɛ Yeremia nɛ hi si blema a de ɔ, a maa le anɔkuale munyu nɛ he hia nɛ ɔ, kaa: “Yehowa, i le saminya kaa nɔmlɔ adesa blɔ be lɛ nitsɛ e dɛ mi. Adesa nɛ ngɛ nyɛɛe nɛ ɔ, bɔ nɛ e maa pee ha kɛ hia e nane po be e dɛ mi.”—Yeremia 10:23, NW.

15, 16. (a) Mɛni he je Yehowa ngmɛ nɔ́ nami blɔ be gagaaga kikɛ? (b) Mɛni he je Yehowa tsi we awi yemi nguanguahi a nya?

¹⁵ Se mɛni he je Yehowa ngmɛ nɔ́ nami blɔ be gagaaga kikɛ? Nɛ mɛni he je nɛ e tsi we ní yayamihi nɛ baa a nya? Saminya, mo susu níhi enyɔ nɛ tsɔɔlɔ ɔ nɛ ngɛ wa nɔ hyɛmi nɔ́ ɔ mi ɔ be pee ɔ he nɛ o hyɛ. Kekleekle ɔ, e be atuã tsɔlɔ ɔ nya tsie ngɛ bɔ nɛ e maa bu akɔtaa a ha a he. Enyɔne, tsɔɔlɔ ɔ be atuã tsɔlɔ ɔ ye buae ngɛ akɔtaa bumi ɔ mi. Jehanɛ ɔ, mo susu níhi enyɔ nɛ Yehowa hu fia e pɛɛ si kaa e be pee kɔkɔɔkɔ ɔ he nɛ o hyɛ. Kekleekle ɔ, e tsi we Satan kɛ nihi nɛ piɛɛ e he ɔ nya ngɛ mɔde nɛ a ngɛ bɔe kaa a maa tsɔɔ kaa a nɔ́ da a he. E he ba hia kaa e ha be saii nɛ ba be. Enɛ ɔ he ɔ, adesahi ngɔ jeha akpehi abɔ kɛ ka nɔ yemi slɔɔtohi ngɛ yi nɔ sane mi. Adesahi ya hɛ mi ngɛ je mi si kpami kɛ ní kpahi a peemi mi, se dami sane nɛ a yi, ohia, awi yemi, kɛ ta hwumi ngɛ nɔ puee daa jenanɛɛ. Amlɔ nɛ ɔ, e je kpo heii kaa adesa nɔ yemi yi manye.

¹⁶ Enyɔne, Yehowa yi kɛ bua Satan nɛ e kɛ ye je ɔ nɔ. Ke Mawu tsi ní yayamihi kaa awi yemi nguanguahi a nya a, anɛ lɔ ɔ be odase yemi pee kaa atuã tsɔli ɔmɛ a munyu da lo? Ke Mawu pee jã a, anɛ lɔ ɔ be hae nɛ nihi nɛ a susu kaa adesahi ma nyɛ maa ye mɛ nitsɛmɛ a he nɔ nɛ haomi ko kulaa be bae lo? Ke Yehowa pee jã pɛ, e ma plɛ pee lakpatsɛ kaa atua tsɔli ɔmɛ kɛ̃. Se ‘Mawu be nyɛe maa ye lakpa.’—Hebri Bi 6:18.

17, 18. Mɛni Yehowa maa pee ngɛ haomihi tsuo nɛ je adesa nɔ yemi ngɛ Satan kudɔmi sisi mi kɛ ba a he?

¹⁷ Se haomihi tsuo nɛ Mawu hɛ mi atuã tsɔmi be kɛkɛɛ ɔ ngɔ kɛ ba a hu nɛɛ? E sa kaa wa kai kaa Yehowa ji Ope. Lɔ ɔ he ɔ, e ma nyɛ ma je adesahi a nɔ́ nami ɔmɛ kɛ je, nɛ e maa pee hulɔ. Kaa bɔ nɛ wa kase momo ɔ, a ma dla wa zugba a nɛ e puɛ ɔ kɛ pee Paradeiso. A ma je níhi nɛ yayami ngɔ kɛ ba a kɛ je kɛ gu hemi kɛ yemi nɛ dali ma  ná ngɛ Yesu kpɔmi afɔle sami ɔ mi ɔ nɔ, nɛ a maa gu gbogboehi a si temi ɔ nɔ kɛ ngɔ nihi kɛ ba wami mi ekohu. Mawu maa gu Yesu nɔ kɛ ‘kpata níhi tsuo nɛ Abosiami tsu ɔ hɛ mi.’ (1 Yohane 3:8) Yehowa ma ha ní nɛ ɔmɛ tsuo maa ba mi ngɛ be nɛ sa mi. E sa nɛ wa bua nɛ jɔ kaa Mawu kɛ oya yemi tsu we enɛ ɔ he ní, ejakaa e tsui si tomi ɔ ha nɛ wa ba ná he blɔ kaa wa maa kase anɔkuale ɔ, konɛ wa sɔmɔ lɛ. (Kane 2 Petro 3:9, 10.) Amlɔ nɛ ɔ, Mawu ngɛ nihi nɛ a hɛɛ tsui kpakpa ha Mawu jami hlae, nɛ e ngɛ mɛ ye buae konɛ a to a tsui si ngɛ nɔ́ nami nɛ a kɛ maa kpe ngɛ haomi je nɛ ɔ mi ɔ mi.—Yohane 4:23; 1 Korinto Bi 10:13.

¹⁸ Eko ɔ, ni komɛ ma bi kaa, ‘Ke Mawu bɔ Adam kɛ Hawa bɔ nɛ a be nyɛe ma tsɔ atuã a, jinɛ nɔ́ nami nɛ ɔmɛ tsuo ko ba lo?’ Bɔ nɛ pee nɛ waa na heto ɔ, e he hia nɛ o kai nike ní ko nɛ he jua wa nɛ Yehowa ha mo ɔ.

19. Mɛni nike ní nɛ́ he jua wa Yehowa ha wɔ, nɛ mɛni he je e sa kaa waa bu lɛ kaa nɔ́ ko nɛ he jua wa a?

¹⁹ Kaa bɔ nɛ wa na ngɛ Yi 5 ɔ mi ɔ, a bɔ adesahi nɛ a ha mɛ he blɔ nɛ a kɛ peeɔ nɔ́ nɛ nɔ suɔ. Anɛ o na bɔ nɛ nike ní nɛ ɔ he jua wa ha lo? Mawu bɔ lohwehi fuu, se he numi ji nɔ́ nɛ kudɔɔ mɛ titli. Adesahi pee klamahi nɛ nɔ́ nɛ a to he blɔ nya kaa a tsu ɔ pɛ a tsuɔ. Kaa Mawu bɔ wɔ jã a, anɛ wa bua ko jɔ lo? Dɛbi, wa bua jɔ mohu kaa wa ngɛ he blɔ nɛ waa kɛ tsɔɔ nɔmlɔ nɛ wa suɔ kaa wa ma ji, bɔ nɛ wa suɔ nɛ waa ba wa je mi ha, nihi nɛ wa suɔ kaa waa kɛ maa bɔ huɛ, kɛ ekpahi.  Wa suɔ kaa wa ná he yemi bɔ nɛ sa, nɛ enɛ ɔ pɛpɛɛpɛ ji nɔ́ nɛ Mawu suɔ kaa wa ná.

20, 21. Mɛni blɔ nɔ wa ma nyɛ maa ngɔ he blɔ nɛ a kɛ peeɔ nɔ́ nɛ nɔ suɔ ɔ kɛ tsu ní ngɛ blɔ kpakpa nɔ, nɛ mɛni he je e sa kaa waa pee jã?

²⁰ Yehowa sume kaa e maa nyɛ wa nɔ loko wa sɔmɔ lɛ. (2 Korinto Bi 9:7) Kaa nɔ hyɛmi nɔ́ ɔ: Te nɔ́ nɛ ma ha fɔlɔ ko bua maa jɔ saminya nɛɛ—ke jokuɛ ko de e fɔlɔ ɔ ke “Mo tsumi” akɛnɛ a de lɛ kaa e de ɔ he je, aloo ke jokuɛ ɔ nitsɛ je e tsui mi nɛ e de? Lɔ ɔ he ɔ, sane bimi ɔ ji, Kɛ o kɛ he blɔ nɛ a kɛ peeɔ nɔ́ nɛ nɔ nitsɛ suɔ nɛ Yehowa ha mo ɔ ma tsu ní kɛɛ? Satan, Adam, kɛ Hawa ngɔ he blɔ nɛ a ha mɛ ɔ kɛ tsu ní ngɛ blɔ yaya nɔ. A kua Yehowa Mawu. Mɛni o maa pee?

²¹ O ngɛ he blɔ kaa o maa ngɔ nike ní nɛ se be nɛ ɔ, nɛ ji he blɔ nɛ a kɛ peeɔ nɔ́ nɛ nɔ suɔ ɔ kɛ tsu ní ngɛ blɔ kpakpa nɔ. O ma nyɛ maa piɛɛ nimli ayɔhi abɔ nɛ a ngɛ Yehowa blɔ fa mi ɔ he. A haa nɛ Mawu bua jɔɔ, ejakaa a ngɛ mɔde bɔe kaa a ma ha nɛ e pee heii kaa Satan ji lakpatsɛ kɛ nɔ yelɔ nɛ yi manye kulaa. (Abɛ 27:11) Mo hu o ma nyɛ maa pee jã, kɛ gu o je mi nɛ o maa ba saminya a nɔ. A maa tsɔɔ enɛ ɔ nya ngɛ yi nɛ nyɛɛ se ɔ mi.