1, 2. Met sókkun riáfféú aramas ra kúkkúna ikenái? Ikkefa ekkewe kapas eis chómmóng ra ákkeáni?

LÓN eú fénú mi tatakkis ren maun, fitengeréú fefin me semirit ra máló nge esap iir soufiu. Iwe, iir meinisin ra ireir lón chék eú watteen peias me chómmóng kúkkún irápenges ra fót pwelin ena peias. Iwe, a mak wóór: “Pwata?” Ina ewe kapas eis aramas ra kan ákkeáni fán letipechou lupwen maun, feiengaw, samau are chón ipweri allúk ra nieló attongeer kewe are ataieló imwer are och sókkun riáfféú mi toriir. Ra mochen silei met popun a toriir ekkena mettóch mi eriáfféú.

² Pwata Kot a mutatá riáfféú? Ika pwe Jiowa Kot mi kon manaman, tong, mirit me pwúng, pwata fénúfan a uren koput me mettóch ese pwúng? Kese fen pwisin ekieki usun ekkena mettóch?

3, 4. (a) Met a affata pwe ese wor ngawen ach eis ika pwata Kot a mutatá riáfféú? (b) Met meefien Jiowa usun féfféringaw me riáfféú?

³ Itá mi ngaw ach sipwe eis ika pwata Kot a mutatá riáfféú? Ekkóch ra lólilen pwe ar eáni ena kapas  eis a wewe ngeni pwe rese súféliti Kot are ese naf ar lúkú. Iwe nge, atun kopwe álleani ewe Paipel, kopwe kúna pwe ekkóch mi tuppwél ngeni Kot ra pwal eáni ena chék sókkun kapas eis. Áwewe chék, ewe soufós Apakuk a eisini Jiowa: “Pwota ka föri pwe üa küna ei sokun weires? Pwota ka tongeni nenengeni ei sokun föför mi ngau? Feiengau me angangen mwänewüs ra nonom mwei, fiu me änini ra fis ekis meinisin.”​—Apakuk 1:3.

⁴ Itá Jiowa a apwúngú ena soufós mi tuppwél Apakuk ren an kana kapas eis? Aapw. Jiowa a mutatá pwe alon Apakuk keei mi popu seni wenecharen letipan repwe mak lón Paipel. Kot a pwal álisi pwe epwe weweéch me alapaaló an lúkú. Jiowa a pwal mochen álisuk. Chemeni mwo pwe ewe Paipel a apasa, “I a ekieki met oupwe feiöch ren.” (1 Petrus 5:7) Án Kot oput féfféringaw me riáfféú a kon lap seni án aramas oput ekkena mettóch. (Aisea 55:8, 9) Nge pwata a kon lululó riáfféú wóón fénúfan?

5. Met aramas ra apasa usun ewe popun sia kúkkúna riáfféú? Iwe nge, met ewe Paipel a apasa?

⁵ Aramas seni sókkopaten lamalam ra eisini néúr kewe néúwis me sense ika met popun aramas ra kúna chómmóng riáfféú. Fán chómmóng, ekkena néúwis ra ereniir pwe ina letipen Kot me mettóch meinisin mi fis ra kkótóló seni chék me lóóm, pachelong mettóch mi eriáfféú. Ra apasa pwe sisap tongeni weweiti án Kot kewe angang. Ra pwal erá pwe Kot a akkóta pwe aramas pwal mwo nge semirit ra máló pwe repwe nónnóm ren lón láng. Iwe nge, ka fen káé pwe Jiowa Kot ese tongeni féri minne mi ngaw. Iei alon Paipel: “Ese fokun tufich ngeni Kot pwe epwe föri föför mi ngau, ese fokun tufich ngeni Ewe mi Unusen Manaman pwe epwe föri mine a mwäl.”​—Hiop 34:10.

6. Pwata chómmóng aramas ra tipi ngeni Kot pwe efisian riáfféú meinisin wóón fénúfan?

⁶ Ka silei met popun aramas ra tipi ngeni Kot pwe efisian riáfféú meinisin wóón fénúfan? Fán chómmóng, a ina usun pún ra ekieki pwe Kot, i ewe sounemenemen ei fénúfan. Nge rese silei ewe pwóróus mi enlet Paipel a apasa. Ka fen káé ena pwóróus mi enlet lón Sópwun 3 pwe Satan ewe Tefil, i wesewesen sounemenemen ei fénúfan.

7, 8. (a) Ifa usun chón fénúfan ra ákkáppirú ar sounemenem? (b) Ifa usun a fis án aramas kúna riáfféú pokiten rese unuséch me pwal sereseren fansoun?

⁷ Ewe Paipel a affata: “Unusen fanüfan a nom fän nemenien Ewe mi Ngau.” (1 Johannes 5:19) Kese meefi pwe mi pwúng ena? Chón fénúfan ra ákkáppirú ewe chónláng mi ngaw, ewe mi “atupu unusen chon fanüfan.” (Pwärätä 12:9) Satan a fókkun kirikiringaw,  otuputup me sorongaw. Ina minne, chón ei fénúfan mi nóm fán nemenian ra pwal ina usun. Ina eú popun a fis chómmóng riáfféú.

⁸ Lón Sópwun 3, sia fen káé ewe oruuen popun a wor chómmóng riáfféú pún aramas ra tittipis me rese unuséch seni ewe fansoun popuch kewe ra ú ngeni Kot lón Eten. Aramas tipis ra mocheniaiti nemenem, ina minne, a fis maun, kirikiringaw me riáfféú. (Än Salomon Afalafal 4:1; 8:9) Aúlúngátin popun a wor riáfféú pún fán ekkóch, aramas ra chék serengaw. Áwewe chék, emén a fetál lemal me eféú taka a mworetiw wóón mékúran. A feiengaw pún a sereni an nóm ikewe ie lón ena atun. (Álleani James 4:14, 15.) Iwe, aramas ra tongeni serengaw me kúna riáfféú pún ei ótót ese nóm fán nemenien Jiowa.

9. Pwata sia lúkúlúkú pwe a wor eú popun mi pwúng pwe Jiowa a mutatá riáfféú an epwe sópwósópwóló?

⁹ A kan oururukich ach silei pwe Kot ese efisatá mettóch mi eriáfféú, usun choweán taifun, maun, ipweri allúk me kirikiringaw. Nge sia chúen mochen silei ika pwata Jiowa a mutatá riáfféú. I ewe Kot mi Unusen Tekia, iwe a wor an manaman pwe epwe aúkatiw riáfféú. Iwe, pwata chék ese áeá? Sia silei pwe Kot mi tong, iwe ese mwáál, a wor eú popun mi pwúng an ese féri ena mettóch.​—1 Johannes 4:8.

10. Satan a efisi tipemwaramwar usun met me ifa usun?

¹⁰ Sipwe silei ewe popun Kot a mutatá riáfféú ika sia lesékúriiti ewe atun a kerán poputá riáfféú. Lupwen Satan a efisi án Atam me Efa álleasolapa Jiowa, a ppiitá eú kapas eis mi lamot. Satan ese efisatá  tipemwaramwar usun án Jiowa manaman. Pún a silei pwe ese wor aúkúkún án Jiowa manaman. Nge a efisatá tipemwaramwar usun án Jiowa pwúúng le nemenem. A erá pwe Jiowa emén sounemenem mi ngaw ren an kapas chofona me amwéchú seni aramas mettóch mi múrinné. (Álleani Keneses 3:2-5.) Usun itá nge Satan a apasa pwe aramas repwe sópwéch ika resap nóm fán nemenien Kot. A ú ngeni án Jiowa pwúngún nemenem are an pwúúng le nemenem.

11. Pwata Jiowa ese chék nieló chókkewe mi ú ngeni lón Eten?

¹¹ Atam me Efa ra ú ngeni Jiowa. Usun itá ra apasa pwe ‘Ese lamot án Jiowa nemenikich. Sipwe pwisin filatá met a pwúng me mwáál.’ Ifa usun Jiowa epwe tongeni ataweei ena osukosuk? Ifa usun epwe affata ngeni meinisin férian kewe mi mirit pwe an nemenem a enletin múrinné nge chókkewe mi ú ngeni ra mwáál? Eli emén epwe erá pwe epwe fen éch ika Kot a chék nieló ekkewe chón ú ngeni me poputásefál. Nge Jiowa a fen affata letipan pwe fénúfan epwe uroló  ren mwirimwirin Atam me Efa kewe me a mochen ar repwe manaw lón paratis wóón fénúfan. (Keneses 1:28) Iwe, Jiowa a apwénúetá minne a tipeni fansoun meinisin. (Aisea 55:10, 11) Nge ika Jiowa a nieló chókkewe mi ú ngeni lón Eten, esap pélú ewe kapas eis usun an we pwúúng le nemenem.

12, 13. Áweweei ika pwata Jiowa a mut ngeni Satan an epwe wiliti sounemenemen ei fénúfan me pwata a mut ngeni aramas ar repwe pwisin nemeniir.

¹² Sipwe eáni eú kapas áwewe. Emén sense a áiti ngeni néún kewe chón sukul ifa usun repwe féri eú lesen mi weires. Emén me lein ekkena chón sukul a tipachem nge a súfélúngaw. Iwe, a apasa pwe mi mwáál minne ena sense a áiti ngeniir. Usun itá nge ena sense a angangaw nge ena chón sukul a silei ifa usun epwe féri ewe lesen lap seni ena sense. Ekkóch chienan kewe ra ekieki pwe a pwúng, iwe ra pwal ú ngeni ena sense. Met ena sense epwe féri? Ika epwe atowu ekkena chón sukul mi súfélúngaw, met ekkewe lusun chón sukul repwe ekieki? Esap pwe repwe lúkú pwe ekkena chón sukul iir mi pwúng? Eli resap chúen súféliti ewe sense pún tittiper nge ese chék mochen akkaffat mwáállin. Iwe, iei met ewe sense a féri, a mut ngeni ena chón sukul mi ú ngeni an epwe áweweei fférún ewe lesen.

¹³ Iwe, ina met Jiowa a pwal féri. Chechchemeni pwe esap chék chókkewe mi ú ngeni Kot lón Eten ra kapachelong lón ewe osukosuk. Fite million chónláng ra katol minne a fis. (Hiop 38:7; Pwärätä 5:11) Napanapen án Jiowa angang wóón ewe osukosuk epwe weneiti ekkena chónláng, iwe mwirin aramas meinisin. Iwe, met Jiowa a fen féri? A mut ngeni  Satan an epwe pwári ifa usun epwe nemeni aramas. A pwal mut ngeni aramas ar repwe pwisin nemeniir fán án Satan emmwen.

14. Ifa usun án Jiowa mut ngeni aramas ar repwe nemeni pwisin iir epwe álisi chókkewe mi letipwenechar?

¹⁴ Ewe sense lón ewe kapas áwewe a silei pwe chókkewe mi ú ngeni ra mwáál. Nge a pwal silei pwe an mut ngeniir le sótun ánnetatá ar ekiek epwe álisi ekkewe chón sukul meinisin. Lupwen epwe ffat pwe chókkewe mi ú ngeni ra mwáál, iwe ekkewe chón sukul mi wenechar repwe silei pwe a fich ngeni chék ewe sense an epwe asukuler. Repwe weweiti ika pwata epwe pwúng án ewe sense epwe atowu meinisin mi ú ngeni. Pwal ina chék usun, Jiowa a silei pwe epwe álisi aramas me chónláng mi letipwenechar ika repwe kúna sópwongawen Satan me chienan kewe me pwal kúna pwe aramas resap tufichin pwisin nemeniéchúúr. Repwe mirititi pwúngún alon Jeremaia, a erá: “Ai Samol mi Lapalap, üa silei pwe aramas resap püsin nemeni manauer, resap pwal tongeni akota mine repwe föri.”​—Jeremaia 10:23.

15, 16. (a) Pwata a ttam án Jiowa mutatá riáfféú an epwe sópwósópwóló? (b) Pwata Jiowa ese pinei mettóch mi ngaw, áwewe chék atai allúk?

¹⁵ Iwe nge, pwata Jiowa a mutatá an epwe sópwósópwóló riáfféú ren langattam fansoun? Pwata ese pinei mettóch mi ngaw pwe resap fis? Iwe, ekieki mwo ruu mettóch ewe sense lón ewe kapas áwewe ese féri. Áeúin, ese pinei ewe chón sukul mi ú ngeni le áweweei ifa usun i epwe féri ewe lesen. Oruuan, ese álisi le féri ewe lesen. Iwe, pwal ekieki mwo ekkeei ruu  mettóch Jiowa ese féri. Áeúin, ese pinei án Satan me penian kewe sótun le ánneta pwúngún ar ekiek. Ina minne, a lamot an mut ngeniir och fansoun. Ren fitengeréú ier, aramas ra sótun pwisin nemeniir ren chómmóng sókkopaten nemenem. Inaamwo ika sileien aramas a ekis lapóló nge a pwal fókkun lallapóló pwúngúngaw, wéúngaw, ipweri allúk me maun. Iei a pwáló sópwongawen án aramas nemenem.

¹⁶ Oruuan, Jiowa ese álisi Satan lón an nennemeni ei fénúfan. Áwewe chék, ika Kot a pinei atai allúk, esap usun itá nge Kot a álisatá ekiekin chókkewe mi ú ngeni? Esap usun nge Kot a efisi án aramas ekieki pwe ra tongeni pwisin nemeniir nge resap sópwongaw? Iwe, ika Jiowa a féri ena mettóch, usun itá nge a tipeeú ngeni eú kapas chofona. Iwe nge, “esap tufich pwe Kot epwe tongeni chofona.”​—Ipru 6:18.

17, 18. Met Jiowa epwe fér ngeni ekkewe riáfféú mi pop seni nemenemen aramas me etipetipaen Satan?

¹⁷ Iwe nge, met Jiowa epwe féri ngeni ekkewe chómmóng riáfféú ra fiffis seni lóóm tori ikenái? Sipwe chechchemeni pwe Jiowa a unusen manaman. Ina popun, a tongeni amóeló pwúnúngawen án aramas kewe riáfféú meinisin me epwe wesewesen féri. Sia fen káé pwe epwe fférsefál masouen fénúfan mi fen ngangngawoló ren aramas atun fénúfan epwe wilisefáliti eú Paratis. Pwúnúngawen tipis epwe móló ren án aramas lúkú án  Jesus méén kepich me pwúnúngawen máló epwe móló ren ewe manawsefál. Kot epwe néúnéú Jesus le “atala än Tefil angang.” (1 Johannes 3:8) Jiowa epwe apwénúetá ekkena mettóch meinisin lón chék ewe fansoun mi fich. Sia kilisou pwe esaamwo féri ekkena mettóch pún an mosonottam a awora ngenikich fansoun le káé ewe enlet me angang ngeni. (Álleani 2 Petrus 3:9, 10.) Iwe, Kot a pwal kúkkútta aramas mi letipwenechar pwe repwe fel ngeni me álisiir le likiitú fán ekkewe riáfféú mi tottoriir lón ei ótót mi ngaw.​—Johannes 4:23; 1 Korint 10:13.

¹⁸ Eli ekkóch repwe eis: ‘Epwe itá fisitá riáfféú meinisin ika Kot a féri Atam me Efa pwe repwe chék álleasochis nge resap tongeni ú ngeni?’ Ren an epwe pélú ena kapas eis, kopwe chemeni eú án Jiowa liffang ngonuk mi aúchea.

19. Ifa eú liffang mi aúchea Jiowa a ngenikich? Met popun sipwe aúcheani?

¹⁹ Sia fen kúna lón Sópwun 5 pwe Kot a fératá aramas, a wor ar tufichin pwisin filatá. Ka weweiti aúchean ena liffang? Kot a fératá chómmóng man nge ese wor ar tufichin filatá met mi pwúng me met mi mwáál. Itá sipwe pwapwa ika a ina usun án Kot férikich? Aapw, sia pwapwaesini ach tufichin pwisin filatá, áwewe chék ren met sipwe féri lupwen sipwe wattetá, met sókkun angang sipwe eáni, met sókkun aramas sipwe chiechi ngeni me metakkan. Kot a mochen ach sipwe pwapwaesini ach tufichin pwisin filatá.

20, 21. Ifa usun sipwe áeáéchú ewe liffangen tufichin pwisin filatá, iwe pwata sia mochen féri ena?

 ²⁰ Jiowa ese sani ach sipwe angang ngeni fán ósópwisek. (2 Korint 9:7) Áwewe chék: Met epwe fen kon apwapwaai ekkewe sam me in? Án néúr we pwisin uwawu seni letipan pwe a echeniir are án emén afalafala an epwe ereniir? Iwe, iei eú kapas eis ngonuk, Ifa usun kopwe áeá óm tufichin pwisin filatá, Jiowa a liffang ngonuk? Satan, Atam me Efa ra áeángawei ar tufichin pwisin filatá. Ra likitaló Jiowa Kot. Nge en, met kopwe féri?

²¹ Ka tongeni áeáéchú liffangom na mi aúchea me fiti ekkewe fite million aramas mi peppeni Jiowa. Ra apwapwaai letipen Kot pún ra éttúres le ánnetatá pwe Satan i emén chón kapas chofona me sounemenem mi fókkun sópwongaw. (Än Salomon Fos 27:11) Ka pwal tongeni féri ena ren óm filatá ewe alen manaw mi pwúng. Lón ena sópwun mwirin ei epwe áweweei ena pwóróus.