1, 2. ¿Ibiga dulemar wilebuggwa, geb ibu ibmar dulemar wisgubi guardae?

NEGGWEBUR soggwengi urwed dummad nosadba buggidar omegan, geb burwigan burgwismalad. Bela wemar yaa dummadgi bular diglesmalad, geb aa nabba diggarba ebiris cruz burwi burwi weyob narmaggar nanai digsamalad: “¿Ibigala?”. Neg nued dagdisurmalad deyob egissardamarmogad. Dule wargwen e ibe gwenadgan surgusale, neg surgu noniggirdibe, guerraba wiledi guderdibe, neg aggar gunoniggirdibe, boniganbardibe, gwage nunmaggedgine weyob egissardamarmogad: ¿ibiga weyob neg gunadibe?

² ¿Ibiga Jehová neg onugusuli? Jehováde yeer gangued, nue dulemar sabed, nue ibmar wisbalid, geb igar nuedba ibmar imagbalid, degidde, ¿ibiga na isdardagmalad yaisuli, ibiga abar dulemar wilebuggwa? ¿Be we ibmargi binsadimoga?

3, 4. a) Ibiga anmar wisi Bab issaggwa dagsuli anmar wisgubiele, ¿ibiga Baba dulemar wilebuggwadga neg nudagsurye? b) ¿Igi Jehová dagmai ibmar isgana gunaidi geb wileged yaisulidi?

³ Bur nuedi anmar egiser, ¿ibiga Jehová neg nudagsuli? Abar binsamalad dule wegi ibmar egiser, gadi neg benguye,  abar sogmalad Babgi dodoaggwa iddolle wegi gordiir. Auggi be Biblia absodele, be dagsaled Babga nue arbasmaladi, weyob egissamarmogad. Profeta Habacuc weyob Jehovága sogsad: “¿Ibigala, igar inniggigwad imaglesulid daggega be an imagge? ¿Ibiga ibmar isgana imaglenaid daggega be an imagge? Unnila neg gagalenaidbi, degi, dule sabsur imaglegedbi an dagged. Urwelegedbi, degi, na abin abin imagmaladbi neg naid” (Habacuc 1:3).

⁴ Habacuc weyob Jehováse egissadbali, ¿Jehová abin ulusa? Suli. Habacuc ibmar egissadi Jehovádi Bibliagi nasisad. Jehová Habacuc bendasbalid we ibmar mag iddogega, geb mer egi bengubaliga. Jehová be bendagbimogad. Mer iego, Bibliagi soglenaid Jehová anmar “aggwe[maye]” (1 Pedro 5:7). Jehová nued dagsulid, neg isgunaidba dulemar wilebuggwadi, dulemarba bur bule isdar dagged (Isaías 55:8, 9). Degidde, ¿ibiga doggus dulemar wilebuggwa?

5. ¿Ibiga dulemar wilebugye soggardamala? Bibliagindi, ¿igi soglenamoga?

⁵ Buggidar dulemar Babgi binsadamaladi pastormarse geb saglaganse egissardamalad, ¿ibiga wileged yaisuli?  Emar abin weyob soggardamalad, Bab sogedba weyob neg gunaye, ar bad Bab sogsaddeye dulemarga igi neg gudagoe, sogsabarye dulemarga neg gagaledoye. Geb sogdamarbalid, geg dule Bab igar balamiye. Dule wargwen burgwisale, mimmigan burgwisdibe, soggardamarbalid Bab Dummad na sesye. Deginigwale, be durdasad, Jehová bibbisaale, dulemarga ibmar isgana imaggosurye. Bibliagi soglenaid: “Anmar geg soged, Bab Dummaddi, ibmar isgana nabir imagye, Bab Dummad Bela Gangued Niggaddi, sunna ibmar noar imagye” (Job 34:10).

6. ¿Ibigala dulemar Babgi nasigdae, bela dulemar wilebuggwadba?

⁶ ¿Be wisi ibiga dulemar sogdamala, Bab nuggi dulemar wilebugye? Ar binsamalad, Bab dulemarga neg semaye. Ibmar soggwen Bibliagi soglenaid wissurmalad, bad be capítulo 3 gine we ibmar durdasad, ¿be ebinsae? Nia dulemarga neg semaidid.

7, 8. a) ¿Ibiga anmar wisi bela dulemar Niabali damala? b)  Dulemar isgusbuggwadbali ¿igi emi ibagine wilebuggwa, geb “ibagan isgana[ba]” igi wileddamarbali?

⁷ Bibliagi soglenaid, “bela dule[mar] we nabneg naidgi bugmaladi nia sagla sogedba gudidimar[ye]” (1 Juan 5:19). Degsoggu mag iddolleged ibiga weyob neg gunai. Bela dulemar nabneggi bugmalad e daedba mag dagleged Niaba damala, ar Nia “dulemar bela nabneg naidgi yardagdiid duled” (Apocalipsis 12:9). Nia emar  yardagdiid, sae emar dagdiid, geb sabsur emar imagbalid, aaga Nabbaneggi na yardagmaladi, na sae dagmaladi, geb na sabsur imagmaladi yaisulid. Aa ulale emi ibagi wileged yaisulid.

⁸ Capítulo 3 gine bad anmar durdasbalid, dulemar Edéngi Babba igar imassulidba isgusmarye, aaga geg bar ibmar nueggwa imaggusmarbarye. Aaga dulemar unnila dummadga guedginbii binsadamalad, geb aaginbii alamagdidiid, aaga guerra noardaed, ibgwensur baigan imagleardaed,  geb wileged yaisurbalid (Eclesiastés 4:1; 8:9). Bibliagi soglenabalid bela dulemarga “ibagan nued ega nonidaed, inbagwenale, ibagan isgana ega nonidabalid”, aaba anmar wileddabalid (Eclesiastés 9:11 absogo). Jehová nabbaneg semasursoggu, aaga dulemar bendagsulid. Degsoggu dule neg dargwen gunaidgi gudimogale sun galedamogoed.

9. ¿Igi anmar wisi, Jehová ibmar soggwen ulale neg onugusuli?

⁹ Nued iddolleged anmar wisgusgu Jehová nuggi dulemar wilebugsurye. Urwed yaisulidi, na oburgwemaladi, na sabsur imagmaladi, negabandur nanamaidi, Bab weyob neg imagmasulid. Degi inigwale anba anmar wisgubied ibiga Jehová neg onugusuli mer bar dulemar wilebuggwa guega. Jehová bela belad ganguele, nabir neg onugusaled, degid ¿ibiga neg onugusuli? Anmar wissogua, Jehová igi dae, geb anmar wisbalid nue dulemar sabe, ibmar soggwen ular neg onugusulir gebed (1 Juan 4:8).

10. ¿Ibuga Jehová guedsurye Nia sogsa, geb igi deyob sogsa?

¹⁰ Anmar balamigega ibiga Bab dulemar wilebuggwadga neg onugusuli, anmar wisguer gebed igi gebbe neg isgude. Nia, Jehovági, Adán, Evabogwa obadsagua igar aburnoniggid. Aa un Nia sogsad Jehová neg seedsurye, Jehová ganguedgindina sunmassulid, ar wisinad Jehová bela nabir ibmar imagge. Sogsagua Bab gadi gaggansaye, geb abesurbarye dulemar nued gudi guedi, Nia Bab nigsogsad, wissur neg seye (Génesis 3:2-5 absogo). Anba sogsabalid Bab dulemarga neg sesulir, dulemar bur nued gudi guderye. Weyob sogsadba bela Bab Dummad neg dagmaidgi agbidded, sogsado Jehová neg seedsurye.

11. ¿Ibiga Jehová dulemar eba ibmar imassurmalad abga Edéngi obelossuli?

¹¹ Adán, Evabogwa Jehovába ibmar imassurmargua  sogsamalayob iddolleged: ‘Anmar abesurye Bab Dummad anmarga neg seed. Anmar na wisye biddi igar nuedi, biddi igar nuedsurbali’. ¿Igar aburusoggua igi Jehová igar onudaggoena? ¿Igi Jehová ibmar imaggoena ángelmar wisgumalaga egi agbidsamaladi noar gordidii, geb eedi bur nabir ibmar sogmaina? Abar dulemar sogmalad Bab Dummad bur egi agbidsamalad yog obelogar imaggenye. Sogdamalad bur dulemar gwabbid urbenye. Auggi Jehovádina bad sogsanad Adán mimmigana Nabneg yeer daglegedgi buggumaloye (Génesis 1:28). Ar Jehovádina ibmar sogsale imaggedse daed (Isaías 55:10, 11). Jehová dulemar egi agbidsamalad obelosana wisgulegosur guoenad bule nabir Jehová neg seoedina.

12, 13. ¿Ibiga Jehová imasa Nia oyogega an nabir neg seye geb ibiga imasbali dulemar neg semogaga?

¹² Maestro matemáticagi burwigan odurdaggwissidyobid. Degiidgi uggiar massigwa yeer ibmar wisidi auggi maestroba igar sabisurdaedi gwisgualid, geb maestroga soged weyob imaglesurye, soge iddolledo maestro noar imagnaye.  Massigwa maestrogi naid, sogega an wisye igi bur we ibmar imaglege. Abar e sordagan binsamalad e ai nabir soggwisye, geb maestroba igar sabisur guarmarmogad. ¿Igi maestro ibmar imagger geboe? Nabir masmala eba igar sabisurmalad onosaled, auggi ¿igi masmala baigan binsaarmalale? Sun binsaarmalaled we massi geb baigan eba aggasmaladi, nabir sogmardagleye. Bar maestroba ibmar imagbisur guarmalaled, sun binsaarmalaled maestro dobe wisguleye noar gorgwisye aaga e sordagan onosye. Be binsabalina, emidi maestro massigwaga sogded be, be imagmosunne.

¹³ Aayobsaale Jehová imasmogad. ¿Ebali igar sassurmalad abgayala obelosa? Suli. ¿Ibigala? Gebbegwadgine ángelmala buggidar dagbugmarmoganad we ibmar gunagu (Job 38:7; Daniel 7:10). Emala wisgued abelemarmoganad doa bur nabir gordii Jehovádibe, Niadibe. Sogbogine sorba bela dulemar gwalulemarmogoedi wisgumarmogoenad doa bur nued neg seoe Jehovádibe, Niadibe.

14. ¿Ibigala nued gusa Jehová imasgua dulemar na neg semai guega?

¹⁴ Maestro wisinad massi eba igar sabisur daedi geb baigan webali aggasmarmogadi binsa gordidii. Auggi wisbalinad masmala na wargwengi ibmar imadmalale baigan wisgumaloe doa bur nabir soge. Degsoggu, wisgulesaled masmala eba ibmar imassurmalad noar gordidii, nue durdagbimaladi mag dagmaloed unnila maestrobii nabir emar odurdagge. Anba mag iddomarbaloed ibiga maestro masmala eba ibmar imassurmaladi onogoe. Aayobi Jehová wismoganad ángelmar geb dulemar wisgumarmogoe niamala binsa gordidii, geb dulemala na wargwena geg neg semala. Dulemar wisgumaloed Salomón gaggan sogsasuli, narmasgu: “Inbagwenale, dule na e ibmar imaggedi, inniggi imagye bidaed, degi inigwele, e ibmar imaggedgine, sunna burgwed igar amied” (Proverbios 14:12).

15, 16. a) ¿Ibiga Bab dulemarga neg onugusuli? b) ¿Ibiga Bab neg isgunaid geb na oburgwemalad bargamasuli?

¹⁵ ¿Ibiga Jehová neg onugusuli? ¿Ibiga neg aggar gualile bargasurdae? Anmar binsaoena, ibmar sogbo maestro imassuliledgi. Soggwengi, massigwa eba igar sabisulidga sogsasuliled mer imagye, geb sogbogi e sordaganse oyogegala igi imaglege massigwa bendassurbaliled. Aayobi Jehová ibmar sogbo imaggosurmogad. Gebbedgi, Jehová Niaga geb Nia sordaganga sogsasulid mer neg semaloye. Jehová Niaga iba nasisad geb dulemarga iba nasismogad wemar oyomalaga bule nued neg semalodibeye. Birga milibar gusad dulemar balaminanaidi igi neg selege, geb anba nue ibmar durdasmarbalid, deginigwale, dulemar neg onugusulid, wileged surgusulid, na oburgwemalad bergusulid, urwed agga bur mergumaid. Ibu bar abelebali wisguega dulemar bibbisaar nued neg seosuli.

¹⁶ Sogbogi, Jehová, Nia bendagmasulid nabir dulemarga neg seega. Be binsaena, Bab Dummad mer na dulemar oburgwemalaga imadele, ¿eba igar imassurmalad bendagnasulir be binsae? ¿Dulemar sogsasulir be soge ar igid nabir anmala neg sesunna, gwen neg aggar gusulid? Jehová weyob ibmar imadele, gaggansamaladba galedmogaled. Auggi “Bab Dummad geg gaggansaed” (Hebreos 6:18).

17, 18. Nia ular geb gobiernomar ular neg isgusnaidi, ¿igi Jehová imaggoe?

¹⁷ Bab sogedba ibmar imaglessulidba neg gagalesnaiddina, ¿igi gudbalosunna? Mer iego Jehová yeer gangued. Degsoggua, bela neg gagalesadi nabir gannar onugued, onuguedsegoed. Bad anmar durdasad nabbaneg gannar onugulegoye, geb yeer dagle guoye. Jesucristo burgwisadgi dulemar bensulile, isguedba bar wilebuggwa guosurmalad  geb burgwismaladdi, gannar durgudamarmogoed. Weyobi Jehová imaggoed, Jesús “nia ibmarmar imagged obelogegar” (1 Juan 3:8). Jehovádi na wisid sana we ibmar imaggoe. Anmar yeer iddogedid abgayala Jehová neg isgunaid obelossulidbali, ar degiina anmar Bab igar durdaggosulinad, geb anmar ega arbaosurgubaloenad (2 Pedro 3:9, 10 absogo). Anba yoo neg onugulesoggua Jehová amimaid doamala ega nueggwa arbabimala, geb aamar bendagmaid mer neg galagwensur gunaidba galaggumalaga (Juan 4:23; 1 Corintios 10:13).

¹⁸ Abar sogdamalad Bab Dummad, Adán imasana, geb Eva imasana melle bibbisaar e igargi bangumalagala, degin anmar weyob wilebugsulinye. Wisguegala ibigala deyob wemar imassuli, ebinsao Jehová anmargala ibmar nued soggwen ugsad.

19. ¿Jehová igi anmar obinyisa geb ibiga be nued iddoge weyob anmar obinyilesadba?

¹⁹ Capítulo 5 gine anmar durdasad, Jehová anmar imasad, anmar na wargwengi binsaaggwa ibmar imagdii guega. Be iddogena, ¡ibiyob nued iddollege weyob anmar imaglesgu! Bab ibmar durgan buggidar imasbar inigwale, auggi ibmar durgandina anmaryob imaggarsulid, binsaaggwa ibmar imagmalaga (Proverbios 30:24). Dulemar robot sobed, yamo ibmar imaggega. Be binsaena Jehová, robotyobi anmar imasmogana, yamo anmar eba ibmar  imaggega, ¿anmar yeer iddodi guoen be binsae? Suli. Aaga anmar nued iddoged, ar yamo dule baid anmarga sogosulid dule igiidga anmar guoe, igi anmar daoe, doamala anmar aiga anmar imaggoe. Yamo dulemar anmargi naisulile, anmar yeer iddodaed. Jehová abemogad anmar weyob gudi guedi.

20, 21. ¿Be igi nabir na wargwengi binsaed nigga ibmar imasale, geb ibigala anmar weyob ibmar imagbie?

²⁰ Jehová abesulid anmar ega arbabisulidgi arbaedi (2 Corintios 9:7). Sergan yeer iddosaled e mimmi yamo dule ega sogar sasuli eba ibmar saele. Degsoggua, be binsamogana, Jehová yamo anmarga sogmasursoggua bemar we ibmar imagye. ¿Ibu be imagmogadi? Jehová imassulid Nia, Adán geb Eva yamo eba ibmar imagmalaga, auggi wemardina agga Jehová obadsamalad. ¿Bedina ibu imagmogoe?

²¹ Bedina nabir na wargwengi binsaed nigga ibmar imasaled. Millónba dulemar Jehová sordaga gusmaladba nabir be aggamogad. Wemarba Jehová yeer iddomaid, ar na e daedba oyodidiid Nia gaggan duleye geb wissur neg sebarye (Proverbios 27:11). Be nabir wemaryob imasmogaled igar nuedba be gudimogale. Capítulo 12 gine we ibmargi sunmaglegoed.