1, 2. ¿Kasa müliaka atuma waya? ¿Kasa nasakitka anain na wayuukana?

SULUʼU wanee mma, ouktüsü wainma maʼin jieyuu otta tepichi sutuma tü atkawaakat. Ojoitünüshii naya suluʼu waneesia ishi otta wainma kuruusa joʼuuchein eʼinaajünaka süʼütpünaa tü ishikat, müsü sünain tü kuruusakalüirua: «¿Jamüsü sülataka tüü?». Tia shia tü nasakitkat maʼin anain na wayuu alatakana amüin kasa mojusü. Asakitshii naya sümaa mojuin maʼin naaʼin ouktüle napüshi sutuma atkawaa, ayuulii, wawai, sukutkujaain mma, saʼajünüin nepia jee müliale neʼe naya atumawaa. Natüjawee aaʼu jamüin sülataka tia.

² ¿Jamüsü nuuʼulaaka Maleiwa eein tü müliaakat? Pülale maʼin nia, aipüraire, kekiire maʼin otta lotule nukuwaʼipa, ¿jamüsü joutka maʼin üttaa aaʼin otta saainjünaka maʼin kasa mojusü Mmapaʼa? ¿Püsakirüirü paaʼin sünain tia?

3, 4. (1) ¿Jamüsü nnojotka mojuin wasakirüle sünain jamüin nuuʼulaaka Maleiwa eein tü müliaakat? (2) ¿Jamüsü naaʼin Jeʼwaa sünain tü kasa mojusükat otta tü müliaakat?

³ ¿Mojusü wasakirüle sünain jamüin nuuʼulaaka Maleiwa eein tü müliaakat? Eeka nasakirüin sünain tia naashin noʼutku na wayuukana, manoulasalii otta mojutsai  Maleiwa namüin. Paashajeʼerüle tü Wiwüliakat, pütüjaweerü aaʼu eepuʼuin wayuu aʼyataalii nümüin Maleiwa asakitka sünain kasa eeka müin aka saaʼin tia. Maʼaka naaʼin Habacuc, müshi nia: ‹¿Jamüsü teʼraka putuma kasa mojusü otta atkawaa?› (Habacuc 1:3, TNM).

⁴ ¿Aʼülüjüshi Jeʼwaa nümüin Habacuc sükajee nüsakirüin tia? Nnojo. Nüshajirüin nünüiki Habacuc suluʼu tü Wiwüliakat. Nükaaliinjain nia süpüla nütüjaain saaʼu tü nüsakitkat anain otta süpüla kooʼomüin nunoula. Keeʼireesü naaʼin Jeʼwaa müin pia nutuma. Soto paaʼin «naaʼinmajüin» waya saashin tü Wiwüliakat (1 Pedro 5:7). Üttüsü maʼin naaʼin Maleiwa sünain tü kasa mojusükat otta tü müliaakat nuulialeʼeya wanee wayuu (Roma 11:33). Müle shia, ¿jamüsü joutka maʼin müliaa Mmapaʼa?

5. ¿Jamüshii müliaka waya naashin nekiipuʼu na suluʼukana tü iküleesia nnojotkat shiimain? ¿Kasa shikiraka tü Wiwüliakat?

⁵ Na suluʼukana tü iküleesia nnojotkat shiimain nasakirüin na nekiipuʼukana otta na ekirajakana naya sünain jamüin müliaka maʼin waya. Naashin shia süka keeʼireein naaʼin Maleiwa sülatüin tia otta alejatia shia nutuma.  Naküjüin nnojoluin sütüjaanüin aaʼu tü naainjakat Maleiwa otta nümaain na tepichikana sirumatuʼumüin. Sünain tü pikirajaakalü anain paala, nnojoishi niain kasirüin Jeʼwaa tü kasa mojusükat. Müsü tü Wiwüliakat: ‹Nnojotsü lotüin nukuaippa Maleiwa makaʼa nüneekajüin wayuu, ¿müinjana waya? Nnojo› (Roma 9:14).

6. ¿Jamüshi niaka kasirüin Maleiwa tü müliaakat naashin na wayuukana?

⁶ ¿Pütüjaa aaʼu jamüin niaka kasirüin Maleiwa tü müliaakat naashin na wayuukana? Shia süka nuluwataain Maleiwa Mmapaʼa naashin. Nnojotsü natüjaain saaʼu niain Satanaa chi shiimainshikai aluwataain Mmapaʼa, tü pütüjaaitpakalü aaʼu suluʼu ekirajaaya 3.

7, 8. (1) ¿Kasa naainjaka na manoujuinsaliikana nashataka anainjee nukuwaʼipa chi aluwataakai naaʼu? (2) ¿Jamüsü eeka müliaa sutuma nnojoluin anain wayuu otta sutuma tü kasa mojusü alatalaa makat?

⁷ Saashin tü Wiwüliakat ‹tü manoujainsatkalüirua suluʼu tu mmakat, nia aluwataaka saaʼu chi Yolujaakai› (1 Juan 5:19). Makalaka eein kasa mojusü. Na manoujainsaliikana nashatüin nukuwaʼipa chi meʼrujusai ‹eʼikeʼerakai wayuu sainküin tü mmakat› (Alateetkat Mapeena 12:9). Emeejüshi wayuu Satanaa, üttüsü naaʼin otta aainjashi kasa mojusü. Makalaka nemeejüin, üttüin naaʼin otta naainjain kasa mojusü na wayuukana. Tia shia tü palajatkat kasa eeka atuma müliaa.

⁸ Tü piamakat shia tü wekirajaakalü anain suluʼu ekirajaaya 3, süchikijee neʼrüin wayumüin na wayuukana chaaʼaya Edén, nnojoliinnapa anain naya otta kaainjalashii. Makalaka natkaain maʼin süchiirua naluwataweein. Sutuma tia, eesü atkawaa otta müliaa (Eclesiastés 4:1; 8:9). Tü apünüinkat kasa eeka atuma müliaa shia sutuma tü kasa mojusü alatalaa makat sümüin wayuu (paashajeʼera Eclesiastés 9:11). Sükajee nnojoluin nuluwataain Jeʼwaa Mmapaʼa, nnojotsü shia naaʼinmajüin. Makalaka eein  süpüla sülatüin kasa mojusü namüin na wayuukana eepünaale naya.

9. ¿Jamüsü watüjaaka saaʼu eein tü kasa nuuʼulaakat anainjee Jeʼwaa eein tü müliaakat?

⁹ Amülialaasü waaʼin sutuma nnojoluin niain kasirüin Maleiwa tü müliaakat. Nnojoishi niain kasirüin tü atkawaakat, tü kaainjalaakat, tü wawaikat otta sukutkujaain mma. Watüjaawee aaʼu jamüin nuuʼulaaka Maleiwa eein tü müliaakat. Pülale maʼin nia eesü süpüla najaʼlajeʼerüin shia. ¿Jamüsü nnojotka najaʼlajeʼerüin shia? Sükajee weʼraajüichipain Jeʼwaa sümaa aipüralin nia, eesü tü kasa nuuʼulaakat anainjee eein tü müliaakat (1 Juan 4:8).

10. ¿Jamüshi Maleiwa sünain aluwatawaa naashin Satanaa? ¿Jamüsü sukuwaʼipa nutuma?

¹⁰ Süpüla watüjaain saaʼu jamüin nuuʼulaaka Maleiwa eein müliaa, soteesü waaʼin jamakuwaʼipalüin tü kasa mojusükat. Naashin Satanaa wanaa sümaa nnojoluin noonooin Adán otta Eva sümaa nünüiki Jeʼwaa, nnojoishi anain nia süpüla aluwatawaa sükajee alaain nia otta naʼalijirüin kasa anasü suulia wayuu. Nnojotsü mojuin nünüiki süchiki nüpülain Jeʼwaa süka nütüjaain aaʼu pülain maʼin nia (paashajeʼera Génesis 3:2-5). Otta müsia naashin chi Yolujaakai, aneerü sukuwaʼipa wayuu suluwanaajiraale saaʼu. Sükajee tü naainjakat ashutushi saaʼu nuluwataaya Jeʼwaa.

11. ¿Jamüshii nnojoliika ouktüin nutuma Jeʼwaa na eʼrüliikana wayumüin chaaʼaya Edén?

¹¹ Wanaa sümaa niʼrüin wayumüin Adán sümaa Eva nümüin Jeʼwaa, müshii namakai: «Nnojotsü choʼujaain nuluwataain Maleiwa waaʼu. Eesü süpüla waneeküin tü kasa eekat anain jee mojuin». ¿Kaseerü naainjaka süpüla niiʼiyatüin namüin na aapieekana, na wayuukana alawaain tü namakat na eʼrüliikana wayumüin otta niain  neʼe anaka atuma tü kasa naainjakat? Eeshii eeka namüin: ‹Anashiijee noʼutünüle aaʼin na eʼrüliikana wayumüin süpüla sukumajünüin wanee wayuuirua neʼiraka›. Akaisaʼa Maleiwa nüküjatüjülia paʼaraiisüinjatüin tü Mmakat otta piratajatüin shia wayuu (Génesis 1:28). Nikeraajüin Jeʼwaa tü nümakat (Hebreokana 6:17, 18). Otta müsia nuʼutüle naaʼin na eʼrüliikana wayumüin chaaʼaya Edén, nnojotsüjeʼe atüjaanüin aaʼu jaralin anain süpüla Aluwatawaa.

12, 13. ¿Kasa shiyaawaseka nuuʼulaain Jeʼwaa nuluwataain Satanaa saaʼu wayuu otta nuuʼulaain na wayuukana naluwanaajiraain naaʼu?

¹² Weʼitaa wanee shiyaawase. Eeshi wanee ekirajüi, ekirajüshi sünain ayaawajaa nuumero. Eeka wanee jintüi atüjüshi sümaa eʼrülin nia wayumüin. Nnojotsü anain shiyaawajia tü nuumerokat nutuma chi ekirajüikai otta nnojoishi anain süpüla ekirajaa naashin. Chi jintüikai nia atüjaka süpüleerua shiyaawajia tü nuumerokat naashin. Otta müshiʼiya noʼutku na ekirajaakana nümaa nanoujain tü nümakat otta neʼrüliijaaka wayumüin. ¿Kaseerü naainjaka jooluʼu chi ekirajüikai? Eeshii süpüla nüjünajaain na eʼrüliikana wayumüin. Naainjüle tia, ¿jameerü nanüiki na waneeinnua? Eeshii süpüla namüin: «Shiimain tü nümakat  chi jintüikai otta na nümaajanakana, mmotshi chi ekirajüikai süka eein süpüla shiiʼiyatünüin mojuin nutuma shiyaawajia tü nuumerokat». Sükajee tia eeshi süpüla mojutüin namüin chi ekirajüikai. Akaisaʼa chi ekirajüikai nuuʼulaain chi jintüi eʼrüikai wayumüin niiʼiyatüin namüin na waneeinnua nütüjüin süpüleerua shiyaawajia tü nuumerokat.

¹³ Müsia tü naainjakat Jeʼwaa. Soto paaʼin na eʼrakana wayumüin chaaʼaya Edén, nnojoishii nayain neʼe sünainpünaain nünüiki Satanaa. Wainma maʼin aapiee eʼraka tü alatakat (Job 38:7; Alateetkat Mapeena 5:11). Tü naainjainjatkat Jeʼwaa sükajee tü alatakat Edén, nanainpünaainjatü shia na aapieekana otta na wayuukana. Sükajee tia, ¿kasa naainjaka Jeʼwaa? Nuuʼulaain niiʼiyatüin Satanaa sukuwaʼipa nuluwataaya otta naluwanaajiraain na wayuukana naaʼu sümaa naainjain tü nümakat Satanaa.

14. ¿Kasa tü atüjaaneetkat aaʼu sükajee nuuʼulaain Jeʼwaa na wayuukana naluwanaajiraain naaʼu?

¹⁴ Chi ekirajüi waashajaakai achiki paala, nütüjaa aaʼu nnojoluin shiimain tü nümakat chi jintüi eʼrüikai wayumüin otta na nümaajanakana. Otta müsia nütüjaa aaʼu aneerüin nanüiki na wanee ekirajaashiikana nuuʼulaale niiʼiyatüin chi jintüikai nütüjüin süpüleerua shiyaawajia tü nuumerokat. Müsia, sütüjaanapa aaʼu alawaain tü namakat na eʼrüliikana wayumüin, natüjaajeerü aaʼu na ekirajaashii anamiakana niain anaka süpüla ekirajaa chi ekirajüikai otta jamüin nüjünajaaka na ekirajaashii eʼrüliikana wayumüin. Müshia Jeʼwaa, nütüjaa aaʼu aneerüin nanüiki na aapieekana otta na wayuu anamiakana natüjaapa saaʼu isain nachiki na wayuukana naluwanaajiraain naaʼu otta alawaain tü nümakat Satanaa namaa na aapiee mojulaashiikana. Natüjaajeerü aaʼu shiimain tü nümakat Jeremías: ‹Nnojoishi laülaain otta aluwataain chi wayuukai saaʼu nukuwaʼipa› (Jeremías 10:23, TNM).

15, 16. (1) ¿Jamüsü nuuʼulaaka Jeʼwaa kakaliain maʼin tü müliaakat? (2) ¿Jamüsü nnojotka nuuʼuleʼerüin Maleiwa suʼutünüin aaʼin wayuu otta eein waneeirua kasa mojusü?

¹⁵ Akatsaʼa, ¿jamüsü nuuʼulaaka Jeʼwaa kakaliain maʼin tü müliaakat? ¿Jamüsü nnojotka nümalajeʼerüin tü kasa mojusükat? Jülüja waaʼin piamasü kasa nnojotka naainjain chi ekirajüi waashajaakai achiki. Nnojoishi nuuʼuleʼerüin chi jintüi eʼrüikai wayumüin niiʼiyatüin namüin na waneeinnua nütüjüin süpüleerua shiyaawajia tü nuumerokat otta nnojoishi nükaaliinjain nia. Müshia Jeʼwaa, eesü piamasü kasa nnojotka naainjain. Palajana, nnojoishi nuuʼuleʼerüin chi Yolujaakai otta na nümaajanakana süpüla neeʼiyatüin shiimainre tü namakat. Süpüla tia ooʼulaanüsü sülatüin wainma kaʼi. Soʼutpünaa tia, wainma sukuwaʼipa suluwataaya wayuu otta tü kasa nakumajakat. Akatsaʼa awainmalaain maʼin tü kaainjalaakat, nnojoluin kasa sümaʼana wayuu otta tü atkawaakat. Shiimain isain nachiki na wayuukana naluwanaajiraain naaʼu.

¹⁶ Piama, nnojoishi akaaliinjünüin Satanaa nutuma Jeʼwaa sünain aluwatawaa saaʼu wayuu. Nnojorüle nuuʼuleʼerüin Jeʼwaa suʼutünüin aaʼin wayuu otta eein waneeirua kasa mojusü, nükaaliinjainjeʼe na eʼrüliikana wayumüin ¿aashimüin? Otta eeshii süpüla namüin na wayuukana: «Anashii waya süpüla waluwanaajiraain waaʼu sümaa nnojoluin sülatüin kasa mojusü». Naainjale Jeʼwaa tia wanaawashijeʼe nia namaa na aküjakana alawaa. Akaisaʼa nia ‹matüjüinsai aküjaa alawaa› (Hebreokana 6:18).

17, 18. ¿Kaseerü naainjaka Jeʼwaa süka tü kasa mojusü eekat sutuma suluwataaya wayuu otta nutuma Satanaa?

¹⁷ ¿Kaseerü alataka sümüin tü kasa mojusü eekat sutuma tü eʼraakat wayumüin? Soto waaʼin pülain maʼin Jeʼwaa. Sutuma tia, eesü süpüla nunoukteʼerüin tü kasa mojusükat. Maʼaka wekirajaain paala, anouktaajeerü tü mmakat otta paʼaraiiseerü shia. Taasheena suulia tü kasa  mojusükat na anamiakana sükajee nanoujain sünain naapajiraain nikii Jesuu waaʼu. Otta na ouktüshiikana asoʼiraajeerü naaʼin. Niʼitaajeechi Maleiwa Jesuu ‹süpüla najaʼttirüin tü kasa mojusü naaʼinrakat chi Yolujaakai› (1 Juan 3:8). Naainjeerü Jeʼwaa tia süntapa tü sükaliakat nutuma. Talatüshii waya sükajee nnojoluin najaʼlajeʼerüin shia maalü. Sükajee tia, ekirajünüshii waya sünain tü shiimainkat nüchiki Maleiwa otta aʼyataashii waya nümüin (paashajeʼera 2 Pedro 3:9, 10). Süpülapünaa sülatüin tü nümakat Maleiwa, nüchajaain na aʼwaajeekana nia otta nükaaliinjain naya süpüla nachecherüin naaʼin suʼunnaa tü müliaakat (Juan 4:23; 1 Corinto 10:13).

¹⁸ Saashin soʼutku wayuu nnojotsüjeʼe eein müliaa nukumajüle Maleiwa Adán otta Eva süpüla nnojoluinjanain neʼrüin wayumüin. Süpüla watüjaain saaʼu jamüin nnojotka müin nakuwaʼipa nutuma, soto paaʼin wanee asülajuushi kojutüsü naapaka wamüin Jeʼwaa.

19. ¿Kasa tü nüsülajakat wamüin Jeʼwaa? ¿Jamüsü kojutüinjatka shia wamüin?

¹⁹ Maʼaka wekirajaain suluʼu ekirajaaya 5, akumajünüshii waya süpüla waneeküin tü keeʼireekat waaʼin. Kojutüsü maʼin tia asülajuushikat ¿aashimüin? Otta müsia wainma mürüt nukumajaka Jeʼwaa otta tü naainjakat na mürütkana alejatia shia nutuma Maleiwa (Proverbios 30:24). Wainma kemion saainjaka wayuu oʼunaka eepünaale suʼuninnüin. ¿Talatüshiijeʼe waya müle wakumajia nutuma Maleiwa? Nnojorüleejaa.  Makalaka talatüin waya sükajee waneeküin tü wakuwaʼipainjatkat otta na waʼaleewainkana. Anasü maʼin tia wamüin otta shia tü keeʼireekat naaʼin Maleiwa wapüleerua.

20, 21. ¿Kasa waainjainjatka süka tü naapakat Jeʼwaa wamüin? ¿Jamüsü keeʼireeinjatka waaʼin tia?

²⁰ Nnojotsü keeʼireein naaʼin Jeʼwaa waʼyataain nümüin mojusheeka (2 Corinto 9:7). ¿Kasa keeʼireeka saaʼin wanee wayuu eeka kachoin? «Aisü maʼin pia tapüla» nümüinjachin mojusheeka chi süchonkai sümüin jee shiataapa sutuma naainjain shia süka naaʼin. Püsakira paaʼin: «¿Kasa taainjainjatka süka tü naapakat Jeʼwaa tamüin?». Mojusü sukuwaʼipa tia nutuma Satanaa, Adán otta Eva sükajee nayouktüin Jeʼwaa. ¿Jama pia? ¿Kaseerü paainjaka?

²¹ Ana putuma sukuwaʼipa tü nüsülajakat pümüin Jeʼwaa. Naʼaka pia na nümaakana Jeʼwaa. Talatüshi maʼin Maleiwa natuma sükajee neeʼiyatüin nüküjülin alawaa Satanaa otta nnojolin anain nia süpüla aluwatawaa (Proverbios 27:11). Eesü süpüla paainjain tia püneeküle tü akuwaʼipaa anakat maʼin. Suluʼu tü wanee ekirajaayakat aküjüneerü tia.