1, 2. Omauzeu yeṋe ovandu ngu ve muna ndino, nu ye eta omapuriro yeṋe?

KOMBUNDA yotjirwa otjitirise mehi rimwe nda nyonwa i ovita, omayovi omengi wovakazendu novanatje ovature vehi ndo, mba ṱa movita mbyo, va pakwa meyendo rimwe nda kovererwe noukoroise. Kovikoroise mbi kwa tjangerwe epuriro ndi: “Ongwaye?” Kovengi indi epuriro ehihamise tjinene. Ovandu ve pura epuriro ndo nomuhihamwatima indu ovita, omaumba, omitjise, poo ozondjito zoutwe tji vya zepa ovasuverwa vawo, na wina oviṋa mbi tji vya nyono ozondjuwo zawo, poo tji vye ve etere omauzeu omengi yarwe. Owo ve vanga okutjiwa kutja ongwaye oviwonga tji vi ya ku wo.

² Ongwaye Mukuru tje yandjera ovandu okumuna omauzeu? Ndoovazu Jehova Mukuru omunamasaaehe, omunarusuvero, onongo, nomunausemba, okutjavi ouye tji we ura nonyengo nouhasemba nao? Ove omuini wa rora okuripurira koviṋa otja imbi?

3, 4. (a) Otjikwaye tji matji raisa kutja kanavi okupura kutja Mukuru u yandjerera tjike omauzeu ye kare ko? (b) Jehova u tara vi kouhasemba nomauzeu nga takavara mouye?

³ Ouposyo tji matu pura kutja ongwaye Mukuru tje yandjera omauzeu ye kare ko? Tjiva ve muna kutja tji mave pura epuriro otja indo okutja kave nongamburiro ndja yenene mu Mukuru  poo kave nondengero naye. Nungwari tji wa lese Ombeibela mo munu kutja ovakarere vaMukuru ovaṱakame va ri nomapuriro tjingewo. Okutara kotjihorera, omuprofete Habakuk wa purire Jehova na tja: “Okutjavi tji u ndji munisa ouhasemba nai? Okutjavi tji u ha kara ko na tja noṋiṋikizire ombi otja indji? Omayandekero nozondjito zoutwe vye ndji kovera akuhe, nu poṋa apehe pe novirwa nozombata.”—Habakuk 1:3.

⁴ Jehova wa pindikira omuprofete Habakuk indu tja pura omapuriro ngo? Kako. Moruveze rwanao, Mukuru wa tjita kutja omambo waHabakuk nga, ye tjangwe mOmbeibela. Mukuru wina we mu vatera kutja ma mune ondjiviro ongahuke ohunga noviṋa mouye nu me kure mongamburiro. Jehova wina u vanga nao kove. Zemburuka kutja Ombeibela mai tja “omerikendero weṋu aehe yumbeye kombanda Ye, Eye tjinga e mu pa imbi mbi mwa hepa.” (1 Petrus 5:7) Mukuru wa tonda ouhasemba nomauzeu nge etwa i ouhasemba nu we vi tonda okukapita omundu ngamwa. (Jesaja 55:8, 9) Nu hapo ongwaye tji mwe ura omauzeu nao mouye?

5. Omaziriro yeṋe potuingi nge yandjwa okukahurura omauzeu ovandu ngu ve muna, nungwari Ombeibela i honga tjike?

⁵ Ovandu vozongamburiro pekepeke ve yenda kovahonge  vozokereka zawo okukapura kutja ongwaye tji ku nomauzeu omengi nao. Potuingi owo ve zira kutja omauzeu nge tjitwa, ombango yaMukuru nokutja Mukuru wa tya rukuru oviṋa avihe mbi mavi katjitwa, tjimuna omaumba watjimanga. Ovengi ve raerwa kutja oviungura vyaMukura kavi tjiukwa, poo ve raerwa kutja eye u toora ovandu, nandarire ounatje, kutja ve kakare puna ye meyuru. Nungwari otja tji we rihonga, Jehova Mukuru ka tjiti ouvi. Ombeibela mai tja: “Ndjambi Omunamasaaehe ka tjiti ouvi nouhasemba.”—Job 34:10.

6. Ongwaye ovandu ovengi tji ve tjita ondataiziro yokukuminina Mukuru mena romauzeu ovandu ngu ve muna?

⁶ Ove mo tjiwa kutja ongwaye ovandu tji ve tjita ondataiziro yokukuminina Mukuru mena romauzeu ngu ve muna? Potuingi owo ve kuminina Mukuru Omunamasaaehe mena rokutja ve ripura kutja eye tjiri ongu ri omuhonapare wouye mbwi. Owo kave tjiwa ouatjiri ounanḓengu Ombeibela mbu i honga. Ove we rihonga ouatjiri mbo mEkondwa 3 rembo ndi. Omuhonapare omuinimuini wouye mbwi oSatan Omudiaboli.

7, 8. (a) Ouye u raisa vi ovikaro vyomuhonapare wawo? (b) Ouhahomonena wovandu noruveze rwoumba, vi eta vi omauzeu kombanda yehi?

⁷ Ombeibela mai twa po oukahu kutja: “Ouye auhe u ri kehi youhonapare waingwi umwe Omunaurunde.” (1 Johanes 5:19) Ove tji we ripura na imbi mbi kayenda mouye mbwi, ko nakuitavera kutja otjingaperi? Ouye mbwi u raisa ovikaro vyotjiutwa tjombepo otjihamunika, tji tji “pukisa ouye auhe.” (Omavandururiro 12:9) Satan u nonyengo novineya nu omuzepe. Okutja ouye mbwi we ura nonyengo novineya novitjitwa vyoutwe mena rokutja u ri kehi youvara waSatan. Okutja indi eepu etenga ndi mari ziri kutja ongwaye tji ku nomauzeu mouye.

⁸ Pe nepu rarwe kutja ongwaye tji ku nomauzeu omengi nao. MEkondwa 3 twe rihonga kutja ovandu tji va za nokukatuka motjikunino tjaEden owo kava ri ohomonena rukwao nungwari va rira ovanauvi. Kunao ovandu ve rwira ouvara, nu imbi vi eta ovita, noṋiṋikizire nomauzeu. (Omuzuvarise 4:1; 8:9)  Otjiṋa otjitjatatu tji tji eta omauzeu, omena rokutja ‘oruveze rwokumuna ouhumandu ru ya ku avehe.’ (Omuzuvarise 9:11) Mena rokutja ovandu ve hupa mouye mbu hina Jehova otjOmuhonapare wawo ngu ma yenene okuvetjevera, ovandu ve muna ouzeu orondu owo ve vazewa poruveze oruvi moiri ndji pe noumba.

9. Ongwaye tji matu sokukambura kutja Jehova u nepu esemba nda yandjerera omauzeu ye kayende komurungu?

⁹ Tjiri, otjiṋa otjiwise tjomutima pehi okutjiwa kutja Mukuru kangu eta omauzeu. Eye kangu eta ovita, ozondjito zoutwe, oṋiṋikizire poo nandarire oviwonga mbi eta omauzeu kovandu. Nu ngundee, matu sokutjiwa kutja: Ongwaye Jehova tje yandjera omauzeu ayehe nga? Ndoovazu ongu ri Omunamasaaehe, omena ratjike tje ha ungurisa omasa we okutjaera omauzeu? Mukuru wetu omunarusuvero, ma sokukara nepu ewa nde yandjerera omauzeu ye kare ko.—1 Johanes 4:8.

10. Satan wa pirukira tjike, nu omomuano uṋe?

¹⁰ Tji matu vanga okutjiwa kutja ongwaye Mukuru tje yandjera omauzeu, ngatu ripurire koruveze indu ouzeu tji wa uta. Indu Satan tja tjita kutja Adam na Eva ve katuke komurungu waJehova, pa zikamisiwa ombata onene. Satan kena pa pataṋa omasa waJehova, orondu eye u tjiwa kutja omasa waJehova kaye nomaandero. Eye wa pirukira ousemba waJehova wokuhonapara. Neye wa ruka Mukuru ovizeze nokutja u rurupara ovandu oviṋa oviwa. Mokutjita mbi Satan wa kuminina Jehova kutja omuhonapare omuvi. (Genesis 3:2-5) Satan wa raisa kutja ovandu mave kara nehupo ewa nokuhina ouhonapare waMukuru. Eye wa wira ousemba waJehova womananeno.

11. Ongwaye Jehova tje hina wa yandeka ovemupirukire moEden porumwe uriri?

¹¹ Adam na Eva va pirukira Mukuru. Mokutjita nao aape munika aayo mave tja: ‘Eṱe katu nakuhepa okuhonaparerwa i Jehova. Eṱe matu yenene okurityera oveni ouwa nouvi.’ Jehova ombata ndji etje i zengurura vi? Atja honga vi oviutwa  avihe ovinazondunge kutja ovapirukire mba va ri posyo nokutja omuano we wokuhonapara ombu ri omusembasemba? Omundu umwe mape ya a tja Mukuru andaku wa ṱokuyandeka ovapirukire mbo na utu ovandu varwe ovape. Nungwari Jehova wa raisa ondando ye yokutja ehi ndi ri ure norukwato rwaAdam na Eva, nu ve hupe moparadisa kombanda yehi. (Genesis 1:28) Jehova aruhe u yenenisa ondando ye. (Jesaja 55:10, 11) Nu kombanda yanao, okuyandeka ovapirukire mbo moEden, katjaku zira omapuriro nga sekama ohunga nousemba waJehova womananeno.

12, 13. Sasaneka kutja ongwaye Jehova tja yandjera Satan okurira omuhonapare wouye mbwi nokutja ongwaye tja yandjera ovandu okurihonaparera oveni.

¹² Ngatu tare kotjisanekero. Ngatu tje omiṱiri mai raere ovahongwa omuano wokukutura otjivarero otjizeu. Nu tjazumba omuhongwa wozondunge nu womanyengu a munu kutja omuano omiṱiri mbu mai kutura otjivarero ho u ri posyo. Okuza nokuraisa kutja omiṱiri kai nakutjiwa oviungura vyayo, eye a kawondja komurungu kutja ma tjiwa omuano warwe omusemba wokukutura otjivarero ho. Ovahongwa tjiva mave munu kutja eye u ri nawa, nowo ave rikutu ku naye okupirukira omiṱiri. Omiṱiri mai sokutjita vi? Indu tji ya ramba ovahongwa  mba metuwo romahongero, imba ovarwe mave munu ko vi? Owo kave nokuripura kutja omuhongwa ngo na imba mbe rikutu ku naye ngahino mave sora? Ovahongwa imba ovarwe mape ya ave nyengurisa omiṱiri, nave munu kutja mai tira okumunikwa kutja ya zunḓa. Nambano ngatu tje omiṱiri ya yandjere omuatje omupirukire ngwi okuraisira ovakwawo okukutura otjivarero.

¹³ Jehova wa tjita otjiṋa tjingetjo omiṱiri motjisanekero tji ya tjita. Zemburuka kutja ovapirukire motjikunino tjaEden kamba ri ko aveyerike. Ovaengeli ovengi aave tarere. (Job 38:7; Daniel 7:10) Omuano Jehova mbwa tja ṱuna omapirukiro ngo, atjau ṱuna kovaengeli mbo avehe nu korusenina wina atjau ṱuna koviutwa avihe ovinazondunge. Jehova wa tjita tjike? Eye wa yandjera kutja Satan ma raise kutja ma honaparere po vi ovandu. Mukuru wina wa yandjera ovandu ve rihonaparere oveni kehi yomananeno waSatan.

14. Ondyero yaJehova yokuyandjera ovandu ve rihonaparere oveni mai eta ouwa waye?

¹⁴ Omiṱiri motjisasanekero mai tjiwa kutja omuhongwa ngwe mu pirukire ngo na imba mbe ri kuta kuna ye ve ri posyo. Nungwari ma tjiwa wina kutja tje ve pe oruveze rwokuraisa epu rawo, matji vatere ovahongwa avehe. Indu ovapirukire mba tji va urwa i otjivarero, okutja ovahongwa avehe ovaṱakame mave munu kutja omiṱiri aiyerike ondji nousemba wokuhonga. Okutja omiṱiri kombunda tji ya karamba kangamwa omupirukire metuwo romahongero, katji nakurira otjikumise ku wo. Momuano tjingewo, Jehova ma tjiwa kutja ovandu novaengeli avehe ovaṱakame mave kamuna ouwa indu tji va munu kutja Satan novapirukire va puna ye va pandjara nokutja ovandu kamaave yenene okurihonaparera oveni. Owo mave rihongo ouatjiri ounanḓengu mbwa tjangwa i omuprofete Jeremia indu tja tja: “Muhona, ami me tjiwa kutja kape nomundu ngu ri omutye womirari vye omuini; kape na umwe ngu yenena okuryamisa omikambo vye omuini.”—Jeremia 10:23.

15, 16. (a) Ongwaye Jehova tja yandjera omauzeu kutja ye kare ko orure nao? (b) Omena ratjike Jehova tje ha tjaerere oviṋa tjimuna ozondjito zoutwe?

¹⁵ Nu hapo ongwaye Jehova tja yandjera omauzeu ye kare ko orure nao? Nongwaye eye tje ha tjaere kutja oviṋa ovivi avi ha tjitwa? Ripurira koviṋa vivari omiṱiri motjisasanekero tjetu mbi i hina maai roro okutjita. Rutenga oyo kamaai tjaere omupirukire ngo okuraisa epu re. Otjitjavari, omiṱiri kamaai mu vatere okukutura otjivarero tjo. Momuano tjingewo, ripurira koviṋa vivari Jehova wina mbya tya kutja ke nokutjita. Rutenga eye kena pa tjaera Satan na imba mbe rikuta kuna ye okuraisa epu rawo. Okutja aape sokukapita oruveze. Mozombura omayovi zomakuruhungi yovandu, ovandu va kondjisa omiano avihe vyokurihonaparera oveni poo okuhonaparerwa i ohoromende yovandu. Ovandu va kayenda ombaze komurungu momerihongero wounongonone woviutwa na wina momihunga vyarwe, nu nandi pe ri nao ouhasemba, ousyona, ozondjito zoutwe novita vi ryamena ko komurungu. Ihi matji raisa oukahu kutja ozohoromende zovandu ombandjarero.

¹⁶ Otjitjavari, Jehova kena pa vatera Satan okuhonaparera po ouye mbwi. Andaku Mukuru u tjaera ovitjitwa vyoutwe kutja avi ha tjitwa, hapo nao katja pe munika aayo ovemupirukire va ri nawa? Nu ovandu katjave muna kutja owo mave yenene okurihonaparera nokuhinotjipo? Tjiri andaku Jehova wa tjita nao, eye atja kara norupa movizeze mbyo. Posi yokutja, “Ndjambi ka wovisa.”—Ovaheberi 6:18.

17, 18. Jehova ma katjita tjike konyoneno ndja etwa i ouhonapare wovandu nomahwangero waSatan?

¹⁷ Nu nambano omanyoneno nga tjitwa oruveze aruhe ndwo ovandu ndu va pirukira Mukuru, maye tjitwa vi? Eṱe matu sokuzemburuka kutja Mukuru ongu ri omunamasaaehe. Okutja eye ma isapo omauzeu aehe, noviṋa avihe mbya kongorera ko. Otja tji twe rihonga rukuru, ehi nda zunḓaka mari tungururwa ari rire Oparadisa. Ovikongorere ko vyourunde  mavi isapewa indu ovandu tji mave raisa ongamburiro mombunguhiro yomuinyo waJesus, nu imba mba ṱa mave pendurwa movakoke. Okutja Mukuru ma ungurisa Jesus “okuyekuyandeka imbi oviungura vyaSatan.” (1 Johanes 3:8) Jehova ma yenenisa avihe mbi moruveze ndu ri ro. Ngatu tje ndangi kutja eye ka eta omaandero tjimanga, orondu omuretima we we tu pa oruveze okurihonga ouatjiri nokumukarera. (2 Petrus 3:9, 10) Ngunda oruveze ndo aru hiye ya, Mukuru u paha ovandu mbe vanga okumukarera tjiri nu u ve vatera okutjinda omauzeu ngu ve muna mouye ouvi mbwi.—Johanes 4:23; 1 Ovakorinte 10:13.

¹⁸ Tjiva mape ya ave ripura kutja, Andaku Mukuru wa memene ooAdam na Eva momuano wokuhina okumupirukira, omauzeu nga aehe atja ye kara ko? Okuzira epuriro ndo, ove mo sokuzemburuka otjiyandjewa otjihuze Jehova tje ku pa.

19. Otjiyandjewa tjiṋe otjihuze Jehova tje tu pa, nongwaye tji twa sokutjivara otjotjiṋa otjinanḓengu?

¹⁹ Otja tji twe rihonga mEkondwa 5, ovandu va memwa nousemba wokuritoororera oveni. Ove mo munu kutja itjo otjiyandjewa otjihuze? Mukuru wa mema ovipuka ovingi nungwari ovyo kavi ya memwa nouyara wokuritoororera ouwa nouvi. Ovandu va ungura ozomahina nḓe yenena okutjita otjiṋa tji za ungurirwa uriri. Eṱe atja tu tjaterwa andaku Mukuru we tu ungura nao? Kako, eṱe tu tjaterwa okukara nouyara wokuritoororera ohunga nokutja matu vanga okurira ovangendu, ongaro iṋe mehupo ndji matu sokukongorera, noupanga mbu matu  sokutunga, na vyarwe wina. Otjovandu tu yorokera ouyara mbo, nu Mukuru ope vanga.

20, 21. Omomuano uṋe omusembasemba mu matu yenene okuungurisa otjiyandjewa tjousemba wokuritoororera oveni, nu ongwaye tji matu sokutjita nao?

²⁰ Jehova ka tjaterwa ovandu tji mave mu karere moṋiṋikizire. (2 Ovakorinte 9:7) Okusasaneka: Otjikeṋa tji tji nyandisa omutima womunene? Eendu omuatje tji me mu raere kutja we mu suvera mena rokutja kwa za nga tje nao, poo indu tji ma hungire okuza komutima we? Okutja nambano epuriro orondi: Ove mo ungurisa vi otjiyandjewa tjousemba wokuritoororera omuini hi, Jehova tje ku pa? Satan, Adam na Eva va ungurisa ouyara wawo mbo momuano omuvimuvi. Owo va nakaura Jehova Mukuru. Ove mo tjiti vi?

²¹ Ove u noruveze rokuungurisa otjiyandjewa tjousemba wokuritoororera omuini momuano omusembasemba. Ove mo yenene okurikuta ku novengi mbe ri komunda waJehova. Owo ve nyandisa omutima waMukuru orondu ve toora omikambo vyokuraisa Satan kutja omunavizeze nu omunane ombandjarero uriri. (Omiano 27:11) Ove wina mo yenene okutjita nao mokutoorora omuhunga wokutjita ombango yaMukuru. Ihi matji kakahururwa mekondwa ndi mari kongorere ko.