1, 2. Nama pemerinsa ti nuntung mensia kemaya hari tu, lalu nama tanya ti selalu dipikir orang?

PENGUDAH perang, beribu iku orang indu enggau anak mit ke udah mati dikuburka ba siti pendam ti besai, dikelingi kayu regang ti betulis: “Nama kebuah?” Nya tanya ti pemadu ngenyinuka ati. Sekeda orang ti dikesayau kitai engka mati maya perang, penyakit, penyai enggau penusah ti bukai. Sida mega engka lenyau rumah enggau reta tengkira. Utai tu ngasuh orang balat bendar merinsa. Pemerinsa ti nyadi ngasuh sida betanya: “Nama kebuah pemerinsa tu nyadi?”

² Nama kebuah Petara ngelakka pemerinsa? Enti Petara Jehovah bisi kuasa, pengerindu enggau pemandai, nama kebuah dunya tu mayuh pemenchi sereta utai ti enda lurus? Kala nuan berunding pasal utai tu?

3, 4. (a) Nama kebuah enda salah enti kitai nanya Petara ngelakka pemerinsa nyadi? (b) Baka ni asai ati Jehovah pasal penyai enggau pemerinsa?

³ Kati nya salah enti kitai nanya nama kebuah Petara ngelakka pemerinsa? Sekeda orang irau ati betanya baka nya laban sida takut dikumbai kurang pengarap  tauka enda bebasaka Petara. Tang, maya macha Bup Kudus, nuan ulih nemu sida ti ngasi enggau nangika Petara mega nanya utai ti sama. Chunto, nabi Habakuk nanya Jehovah: “Nama kebuah Nuan ngasuh aku meda penyalah enggau penusah ti baka tu? Baka ni ku Nuan tan meda penyalah ti baka tu? Aku dikelingi pengerusak enggau penusah, lalu orang belaban sereta belaya.”—Habakuk 1:3.

⁴ Kati Jehovah nganu nabi Habakuk ketegal iya betanya baka nya? Enda. Laban Petara ngasuh Habakuk nulis jaku nya ba Bup Kudus. Kelimpah ari nya, Petara nulung iya nemu nama utai ti udah nyadi enggau ngeringka pengarap iya. Jehovah mega deka nyaut tanya nuan. Ingat, Bup Kudus ngajar “Iya ngibun kita.” (1 Peter 5:7) Petara begedika penyai enggau pemerinsa lebih agi ari enggi kitai. (Isaiah 55:8, 9) Tang, nama kebuah dunya kitai tu mayuh pemerinsa?

5. Nama sekeda saut ti dipadah tuai pengarap pasal pemerinsa mensia, lalu nama ajar Bup Kudus?

⁵ Orang ari bemacham pengarap nanya tuai pengarap  sida, “Nama kebuah mayuh pemerinsa nyadi diatu?” Kesuah agi, tuai pengarap madah pemerinsa tu nyadi laban udah diatur Petara. Bisi mega madah, pengawa Petara nya enda tau ditemu tauka Iya ngasuh mensia mati nyengkaum anak mit, ngambika begulai enggau Iya ba serega. Baka ke udah dipelajar nuan, Petara Jehovah enda kala ngasuh utai ti enda manah nyadi. Bup Kudus madah: ‘Petara ti Pemadu Bekuasa enda ngereja penyai, lalu Iya enda kala meri atur ti enda lurus.’—Jop 34:12.

6. Nama kebuah mayuh orang nyalahka Petara ketegal semua pemerinsa ti nyadi ba dunya tu?

⁶ Nemu nuan nama kebuah orang nyalahka Petara ketegal semua pemerinsa ti nyadi ba dunya tu? Laban sida ngumbai Petara ti Pemadu Bekuasa merintah dunya tu. Sida enda nemu ajar ti bendar ba Bup Kudus. Nuan udah belajar pasal pemendar nya ba Pelajar 3 bup tu. Iya keamat, pemerintah dunya tu, Antu Sitan.

7, 8. (a) Baka ni dunya tu ngayanka ulah pemerintah iya? (b) Baka ni mensia ke enda sempurna, ba endur enggau jam ti salah ngasuh pemerinsa nyadi?

⁷ Bup Kudus enggau terang madahka: “Semua dunya di baruh kuasa Sitan.” (1 John 5:19) Maya nuan mikirka utai tu, enda ke tu betul? Dunya tu ngayanka ulah melikat “ke nipu semua dunya.” (Pemandang 12:9) Sitan penuh enggau pemenchi, penipu sereta nadai pengasih. Nya alai, dunya ti di baruh kuasa Sitan, penuh enggau pemenchi, pengawa ti nipu sereta nadai pengasih. Tu siti ari kebuah mayuh pemerinsa nyadi.

⁸ Kebuah kedua dunya tu mayuh pemerinsa udah dipelajar ba Pelajar 3. Mensia enda sempurna bepun ari Adam seduai Hawa ti ngelaban Petara ba kebun Eden. Mensia ke bedosa berebut deka merintah, lalu tu ngujungka perang enggau pemerinsa nyadi. (Pengajar 4:1; 8:9) Kebuah ketiga pemerinsa nyadi, laban nuan enda  “nemu maya diri deka ditinggang penusah.” (Pengajar 9:12) Chunto, maya orang ngumpul buah rian, sida engka bakal tauka mati ketegal kena tinggang buah rian ke labuh. Pia mega, mensia kena mayuh pemerinsa ba endur tauka jam ti salah ketegal dunya tu ukai diperintah Jehovah.

9. Nama kebuah kitai ulih pechaya Jehovah bisi kebuah ti manah ngelakka pemerinsa terus nyadi?

⁹ Kitai berasai lantang ati laban nemu ukai Petara ti ngasuh kitai merinsa. Perang, penyai, pengawa ti nekan tauka penusah ti bukai ke ngasuh kitai merinsa ukai datai ari Iya. Tang, kitai deka nemu, Nama kebuah Jehovah ngelakka semua pemerinsa nyadi? Enti Iya nya Pemadu Bekuasa, Iya ulih ngetuka semua pemerinsa. Tang, nama kebuah Iya enda ngena kuasa Iya? Kitai nemu Petara Jehovah nya Petara ti bisi pengerindu. Nya alai, Iya tentu bisi kebuah ti manah ngelakka pemerinsa.—1 John 4:8.

10. Nama utai ti ditanya Sitan, lalu baka ni?

¹⁰ Enti deka nemu nama kebuah Petara ngelakka pemerinsa nyadi, kitai patut mikirka ni maya pemerinsa belabuh nyadi. Maya Sitan nguluka Adam seduai Hawa enda ngasika Jehovah, siti tanya ti berat pansut. Sitan enda nyangkal kuasa Jehovah. Laban Sitan nemu kuasa Petara nadai sekat. Tang, Sitan nanya sekalika Jehovah patut merintah tauka enda. Sitan ngumbai Petara nya pemerintah ti bula, ngenan utai ti manah ari rayat Iya. (Pemungkal 3:2-5) Sitan madah mensia idup manah agi enti enda diperintah Petara. Pengawa Sitan tu udah ngelaban kuasa merintah Jehovah.

11. Nama kebuah Jehovah enda terus ngemunaska sida ke ngelaban Iya ba kebun Eden?

¹¹ Adam seduai Hawa udah ngelaban Jehovah. Seduai  iya bejaku: ‘Kami duai enda begunaka Jehovah nyadi Pemerintah. Kami duai ulih milih kediri empu pasal utai ti betul enggau utai ti salah.’ Baka ni Jehovah nyaut utai tu? Baka ni Iya ulih nunjukka sida ke ngelaban Iya nya salah ba mua semua melikat ti bukai? Sekeda orang madah, Petara patut ngemunaska sida ke ngelaban Iya ari pun. Tang, Jehovah udah madah, semua peturun Adam seduai Hawa deka menuhka dunya tu. Iya deka sida idup ba dunya paradais. (Pemungkal 1:28) Jehovah seruran ngamatka tuju Iya. (Isaiah 55:10, 11) Ukai nya aja, enggau ngemunaska sida ke ngelaban Iya ba kebun Eden, tanya pasal kuasa merintah Jehovah enda ulih disaut.

12, 13. Beri chunto nama kebuah Jehovah ngelakka Sitan nyadi pemerintah dunya tu, lalu nama kebuah Petara ngelakka mensia merintah diri empu.

¹² Chunto, seiku cikgu benung ngajar bala nembiak iya chara nyaut siti tanya matematik ti tusah. Seiku nembiak ke pandai tang udu ngelaban, madahka chara cikgu nya salah. Lalu iya ngumbai diri nemu chara ti betul  nyaut tanya nya. Sekeda nembiak ngumbai iya betul, lalu sida mega nitihka iya ngelaban cikgu nya. Nama patut digaga cikgu nya? Enti iya ngasuh bala nembiak ke ngelaban iya terus pansut ari kelas, nama pikir bala nembiak ti bukai? Tentu sida pechaya bala nembiak ke ngelaban cikgu nya betul. Bala nembiak ti bukai ba kelas nya engka enda bebasaka cikgu nya agi, laban iya takut dikumbai salah. Nya alai, cikgu nya ngelakka nembiak ke ngelaban iya nunjukka chara iya deka nyaut tanya matematik nya.

¹³ Jehovah mega ngena chara ti sama baka cikgu nya. Kingatka, ukai semina sida ke ngelaban Petara ba kebun Eden aja besangkut-paut. Bejuta melikat meda. (Jop 38:7; Pemandang 5:11) Chara Jehovah mutarka utai tu bisi sangkut paut enggau bala melikat sereta mensia. Nyadi, nama digaga Jehovah? Jehovah ngelakka Sitan nunjukka chara iya merintah mensia. Petara mega ngelakka mensia merintah diri empu di baruh kuasa Sitan.

14. Nama penguntung diulih kitai ari pemutus Petara ngelakka mensia merintah diri empu?

¹⁴ Cikgu ba chunto tadi nemu sida ke ngelaban iya nya salah. Tang, iya mega nemu semua nembiak ba kelas nya deka bulih penguntung, enti iya meri peluang ngagai sida ke ngelaban iya. Maya orang ke ngelaban iya endang salah, semua nembiak iya ke lurus ati deka meda semina cikgu nya aja ti ulih ngajar ba kelas nya. Nya alai, sida nemu kebuah cikgu nya mansutka bala nembiak ke ngelaban iya ari kelas. Pia mega, Jehovah nemu semua mensia ke lurus ati enggau bala melikat deka bulih penguntung ari beratika Sitan enggau sida ke nitihka iya salah. Baka Jeremiah kelia menya, sida ngaku pemendar tu: ‘Jehovah, aku nemu, nadai siku kami bisi kuasa ngatur pengidup diri.’—Jeremiah 10:23.

15, 16. (a) Nama kebuah Jehovah ngelakka pemerinsa lama amat nyadi? (b) Nama kebuah Jehovah enda nagang penyai nyadi?

¹⁵ Nama kebuah Jehovah ngelakka pemerinsa lama amat nyadi? Lalu, nama kebuah Iya enda nagang utai ti jai ari nyadi? Pikirka dua pekara ti enda digaga cikgu ba chunto tadi. Kesatu, cikgu nya enda nagang nembiak ke ngelaban iya nunjukka chara iya. Kedua, cikgu nya enda nulung maya nembiak nya nunjukka chara iya. Pia mega, pikirka dua pekara ti enda digaga Jehovah. Kesatu, Iya enda nagang Sitan enggau sida ke nyukung iya nunjukka diri betul. Nya alai, Jehovah meri sida masa. Dalam timpuh beribu taun, mensia udah nguji mayuh macham perintah mensia. Mensia udah mansang ba penemu sains enggau pengawa ti bukai. Tang, pengawa ti enda lurus, penyuntuk, penyai enggau perang makin balat. Perintah mensia nunjukka sida enda ulih merintah mensia.

¹⁶ Kedua, Jehovah enda nulung Sitan merintah dunya tu. Enti Petara nagang penyai, enda ke Iya nyukung sida ke ngelaban Iya? Enda ke Petara ngasuh orang bepikir mensia ulih merintah diri empu enggau nadai penusah? Enti Jehovah baka nya, Iya tentu sama enggau bula. Taja pia, ‘Petara nunjukka Diri enda bula.’—Hebrew 6:18.

17, 18. Nama deka digaga Jehovah ngagai semua penusah ti datai ari pemerintah mensia enggau Sitan?

¹⁷ Baka ni enggau penusah ti nyadi sekumbang Petara dilaban? Kitai patut ingat Jehovah nya ti pemadu bekuasa. Nya alai, Iya ulih lalu deka ngemetulka pemerinsa mensia. Baka ke udah dipelajar, pengerusak ba dunya kitai tu deka diadu, lalu nyadi Paradais. Pemerinsa ti dibai dosa deka dibuai enti kitai manggaika  pengarap ba genselan nyawa Jesus. Lalu orang ke udah mati deka diidupka baru. Petara deka ngena Jesus “ngerusak pengawa Sitan.” (1 John 3:8) Jehovah deka ngenataika semua tu ba jam ti udah diatur Iya. Kitai gaga ati ketegal Iya bedau ngamatka semaya Iya. Laban sabar, Iya meri peluang ngagai kitai belajarka pemendar lalu nyembah Iya. (2 Peter 3: 9, 10) Diatu, Petara benung ngiga orang ke lurus ati nyembah Iya, lalu nulung sida ngelaban pemerinsa ba dunya ti charut tu.—John 4:23; 1 Korint 10:13.

¹⁸ Sekeda orang engka betanya, Ulih semua pemerinsa ditagang enti Petara ngaga Adam seduai Hawa enda nemu ngelaban Iya? Enti deka nyaut tanya tu, nuan patut ingatka pemeri berega ti udah diberi Jehovah ngagai nuan.

19. Nama pemeri berega ti diberi Jehovah ngagai kitai, lalu nama kebuah kitai patut gaga ati nerima pemeri tu?

¹⁹ Baka ke dipadah ba Pelajar 5, maya digaga, mensia diberi peluang milih kediri empu. Kala nuan beratika nama kebuah pemeri tu berega? Petara ngaga mayuh bengkah jelu, lalu semua jelu tu ngereja utai nitihka pengasai. Mensia ngaga robot ngambika nitih utai ti udah diprogram. Kati nuan gaga ati enti Petara ngaga nuan baka robot? Enda, kitai gaga ati laban bibas milih kediri empu. Kitai ulih milih, deka nyadi orang ke baka ni, nama utai ti dikedeka ba  pengidup, kaban, enggau utai bukai. Kitai enggau gaga ati nerima pemeri tu, lalu nya utai ti dikedeka Petara.

20, 21. Baka ni kitai ulih ngena peluang bibas milih enggau chara ti pemadu manah, lalu nama kebuah kitai deka milih chara nya?

²⁰ Jehovah enggai nerima sembah ti ukai ari ati. (2 Korint 9:7) Chunto: Nama utai ti ngerinduka ati apai indai—maya anak nyebut “Aku sayau ke nuan” laban iya diasuh bejaku munyi nya, tauka iya nyebut nya ari ati iya empu? Nyadi, pikirka tanya tu, Baka ni nuan ngena peluang bibas milih ti diberi Jehovah? Sitan, Adam, enggau Hawa udah ngena peluang nya enggau salah. Sida udah nulak Petara Jehovah. Nama deka digaga nuan?

²¹ Nuan bisi peluang ngena pemeri ti berega nya enggau chara ti manah. Nuan ulih sama enggau bejuta iku orang ke udah nyukung Jehovah. Sida ngagaka ati Petara laban udah enggau bebendar nunjukka Sitan nya bula, lalu enda ulih merintah mensia. (Jaku Dalam 27:11) Pengudah pelajar tu, nuan deka belajar baka ni ulih nyukung Jehovah enggau milih jalai pengidup ti betul.