Kapetulu 11

Mwomwo Ika Kalunga Etavishila Kuyanda?

Uno Kalunga ikiye aneha kuyanda mukaye nyi?

Chihande muka vakatwile mumilemba yaEtene?

Uno Kalunga mwakafumisako ngachilihi vyuma vyeji kunehanga kuyanda kuvatu?

1, 2. Kuyanda chamuyachi muka vali nakumonanga vatu makumbi ano, kaha chalingisa vavavulu vahulise vihula muka?

OMU yakumine jita yayinene ize yapwile mulifuchi limwe, mapwevo navanyike vavavulu vaze vajihile vavafunjile muchimbumbe chochimwe, kaha vajikileko tujikulusu. Hakulusu hikulusu vasonekeleho ngwavo: “Mwomwo ika?” Lwola lumwe chihula kanechi cheji kwivwisanga vatu kukola kumichima. Vatu veji kuhulisanga chihula kanechi nge jijita, chipwe jiponde, chipwe misongo, chipwe vilinga vyaulyanyi vinajihi masepa navausoko wavo, chipwe vilinga kana vinenyeka jizuvo javo, chipwe kuvanehela lamba mujijila jeka. Veji kusakanga kwijiva mwomwo ika luvinda kana lunavawanyina.

² Mwomwo ika Kalunga etavishila kuyanda? Nge Yehova Kalunga apwa wangolo chikuma, wazangi, wamangana, kaha nawa wachiyulo, nyi mwomwo ika kaye kanazale ngana nachijindo naupi? Uno ove washinganyekaho lyehi havyuma kanevi nyi?

3, 4. (a) Ika yasolola nge kachapwa chakuhengako kuhulisa ovyo Kalunga etavishila kuyanda? (b) Uno Yehova eji kwivwanga ngachilihi hakuhuka nakuyanda?

³ Uno chapwa chakuhenga kuhulisa ovyo Kalunga etavishila kuyanda nyi? Vamwe veji kushinganyekanga ngwavo kuhulisa chihula kanechi nachisolola nge kaveshi nalufwelelo lwambwendeko chipwe ngwavo pamo vali nakusaula Kalunga.  Oloze hakutanga Mbimbiliya, nauwana nge navatu jaKalunga vakushishika vamwe vahulishilenga vihula vyamuyachou. Chakutalilaho, kapolofweto Hambakuke ahulishile Yehova ngwenyi: “Ikaze weji kungumweneselanga kuhenga nakungutalisa luyanjisa? Mwomwo kwenyeka naulyanyi vili kumeso ami, kuli kulisopesa, kweji kukatukanga vikokojola.”—Hambakuke 1:3.

⁴ Uno Yehova atenukilile ou kapolofweto wakushishika Hambakuke hakuhulisa chihula kana nyi? Nduma. Oloze Kalunga asonekele mazu kana awa aHambakuke mumijimbu yamuMbimbiliya ize ahwima. Kalunga nawa amukafwile evwishise kanawa vyuma nakupwa nalufwelelo lwakukola. Yehova ali nakusaka kulinga mwomumwe nakuli ove. Anuka ngwove Mbimbiliya yanangula ngwayo ‘eji kukuzakamanga.’ (WaPetulu 1, 5:7) Kalunga ahunga kuhuka nakuyanda chosena kuhambakanomu vachihunga vatu. (Isaya 55:8, 9) Jino mwomwo ika kuyanda chinavulu ngana mukaye?

MWOMWO IKA KUYANDA CHINAVULU NGANA?

5. Vatu veji kuhanjikanga ika hakusaka kulumbununa ovyo kwapwila kuyanda, oloze Mbimbiliya yanangula ika?

⁵ Vatu vamukwitava chachivulu vanahulisanga vatwamina javo navaka-kuvanangula vavalweze ovyo kuyanda chinavulila ngana. Kakavulu veji kuvakumbulula ngwavo Kalunga ikiye  ajina ngwenyi kupwenga kuyanda, nakwamba nawa ngwavo ikiye alongesele vyuma vyosena vyeji kusolokanga, kuhakilako vene nakuyanda. Vatu vavavulu vavalweza ngwavo chapwa chachikalu kwijiva jijila jaKalunga, kaha nawa ngwavo Kalunga ikiye eji kujihanga vatu, kuhakilako vene navanyike vavandende, mangana vayenga vakatwame nenyi mwilu. Oloze nganomu unalinangula lyehi, Yehova Kalunga keshi kuneha vyuma vyavipiko. Mbimbiliya ngwayo: “Kuhukisa chipwenga kwakusuku naKalunga, kuhengesa chipwenga kwakusuku naUkwechi ngolo josena.”—Yopa 34:10.

6. Mwomwo ika vatu vavavulu veji kuhanyinanga Kalunga mulonga hakuyanda chili mukaye?

⁶ Unejiva ovyo vatu veji kuhanyinanga Kalunga mulonga hakuyanda chili mukaye nyi? Kakavulu veji kuhananga mulonga Kalunga Wangolo Josena mwomwo vashinganyeka ngwavo ikiye ali nakuyula kano kaye. Kavejiva muchano waulemu vanangula muMbimbiliyako, uze nawa wapwa wawashi kwivwishisa. Walinangwile muchano kana muKapetulu 3 mumukanda uno. Satana Liyavolo ikiye ali nakuyula kano kaye.

7, 8. (a) Kaye keji kusololanga ngachilihi vilinga vyauze eji kukayulanga? (b) Uno kuhona kukupuka mwosena ‘namyaka navyuma vyakulijila tuhu’ vili nakunehanga ngachilihi kuyanda?

⁷ Mbimbiliya yahanjika hatoma ngwayo: “Vaka-mavu vosena vatwama muli uze wamupi.” (WaYowano 1, 5:19) Uno chuma kana kachakulumbunukilileko nyi? Kaye kano keji kusololanga vilinga vyauze vahona kumona uze “muka-kuhungumwisa vaka-mavu vosena.” (Kusoloka 12:9) Satana apwa muka-kuhunga vatu, muka-kwonga, kaha nawa waukenya. Shikaho kaye kanazale ngana nachijindo, namakuli, naukenya mwomwo ikiye ali nakukayula. Echi chikiko chuma chimwe chaneha kuyanda.

⁸ Nganomu twashimutwilile muKapetulu 3, chuma chamuchivali chalingisa kupwenga kuyanda shina vatu vanapunga vakuhona kukupuka mwosena, kaha nawa vaka-shili kufuma vene hakulikanga chize chasolokele mumilemba yaEtene. Vatu vaka-shili vasaka kulisa vakwavo nachikela, ngocho echi cheji kunehanga jijita, kutwama vatu chivwoto, naluyando. (Muka-kwambulula  4:1; 8:9) Kaha chuma chamuchitatu chalingisa kupwenga nawa kuyanda shina “myaka navyuma vyakulijila tuhu.” (Muka-kwambulula 9:11) Vatu vanahase kuyanda hakupwanga muvihela vyakuhenga halwola nakusoloka vyuma vyavipi, mwomwo Yehova keshi ikiye ali nakuyula kano kayeko.

9. Mwomwo ika twatela kufwelela ngwetu Yehova akwechi chuma chamulingisa etavise kuyanda chitwaleho lika?

⁹ Chapwa chamwaza kuli etu kwijiva ngwetu Kalunga keshi kuneha kuyandako. Keshi ikiye eji kunehanga jijita, uhwanga, ukenya, chipwe jiponde jeka jize jeji kulingisanga vatu vayandeko. Mwomwo ika Yehova etavishila kuyanda chosenechi? Kachi nge Kalunga apwa Wangolo Josena, kaha nahase kukumisa kuyanda. Jino mwomwo ika ahonena kulinga ngocho? Kwatela chikupu kupwa chuma chimwe chalingisa Kalunga uze twejiva kupwa wazangi ahone kukumisa kuyanda.—WaYowano 1, 4:8.

KWAKATUKA CHIHANDE CHACHILEMU

10. Chuma muka afumbukilile Satana, kaha mujila muka?

¹⁰ Hakusaka tuwane ovyo Kalunga etavishila kuyanda, twatela kushinganyeka omwo chaputukile kuyanda. Omu Satana alingishile vaAlama naEve valikange kuli Yehova, kwakatukile jino chihula chachinene chikuma. Satana kakakasanyine ngolo jaYehovako. Satana ejiva ngwenyi ngolo jaYehova kajakumako. Oloze Satana afumbukilile ngolo jaYehova jakuyula. Satana avulukile Yehova kupwa muka-kuyula wamupi hakumuvuluka ngwenyi apwa himuka-kwonga uze aswekela vatu jenyi vyuma vyamwaza. (Kuputuka 3:2-5) Satana alumbunwine nge vatu vanahase kutwama kanawa chakuhona kuvayula kuli Kalunga. Chuma kanechi chapwile hikufumbukila wata waYehova, chipwe ngwetu chiyulo chenyi.

11. Mwomwo ika Yehova ahonene kujiha vaka-kulikanga muEtene?

¹¹ VaAlama naEve valikangile kuli Yehova. Chasoloka kwijiva nge vambile ngwavo: “Katweshi nakusaka Yehova kupwa Muka-kutuyulako. Tunahase kulisakwila etu vavene vyuma vyakwoloka nevi vyakuhenga.” Uno Yehova avatwile  ngachilihi chihande kanechi? Atelele kunangula ngachilihi vangelo navatu mangana vejive ngwavo vaze vaka-kulikanga vapihishile, oloze jila yenyi yapwa yambwende? Mutu nahase kwamba ngwenyi Kalunga kachi ajihile vaze vaka-kulikanga hahaze vene nakutenga veka. Oloze Yehova ashikile kusulisa hamavu navana vaAlama naEve, kaha asakile vatwamenga mupalachise hamavu. (Kuputuka 1:28) Yehova lwola lwosena eji kutesangamo jishiko jenyi. (Isaya 55:10, 11) Nge enyekele vaze vaka-kulikanga kachi kakumishile chihande chize vakatwile kupandama kuchiyulo chenyiko.

12, 13. Hana chakutalilaho nachisolola ovyo Kalunga netavishila Satana ayule kaye, nakwitavisa vatu valiyule vavene.

¹² Tuchitale chakutalilaho echi. Achishinganyeke mulongeshi ali nakulweza vana vashikola mwakukumishila ukalu umwe. Oloze muka-shikola umwe wakachanja uze alimona kuzangama mwamba ngwenyi jila ali nakuzachisa mulongeshi yakuhenga. Hakusaka asolole ngwenyi mulongeshi keshi nakuvanangula kanawako, himwatwalaho lika ngwenyi ikiye nejiva jila yamwaza yakukumishilamo ukalu kana. Vaka-shikola vamwe navashinganyeka ngwavo pamo nahanjika mwakwoloka, ngocho navakivo hinavalikanga. Uno mulongeshi atela  kulinga muka? Nge mwahanga uze muka-kulikanga, kaha vaka-shikola vaze vanasale navamona ngachilihi ou mulongeshi? Kutala kaveshi kushinganyeka ngwavo pamo uze mukwavo muka-shikola hohamwe navaze vanamukavangiza vahanjikanga muchanoko nyi? Ngocho vaka-shikola vosena vanahase kusaula uze mulongeshi nakushinganyeka ngwavo ali nakuchina kumumona makuli. Oloze mulongeshi atela kulweza uze muka-kulikanga alumbunune mwakukumishila uze ukalu.

¹³ Yehova nalingi chuma chochimwe nachize eji kulinganga mulongeshi. Ijiva ngwove keshi vaka-kulikanga muEtene vakivo kaha vapwile muchihande kanako, oloze navangelo nawa vaze vapwile nakumona vyuma kana. (Yopa 38:7; Ndanyele 7:10) Jila Yehova alingililemo navaze vaka-kulikanga yakwachile chikuma hali vaze vangelo, nahali vatu vosena nawa. Uno Yehova nalingi chuma muka? Netavisa Satana asolole omu nahase kuyulila vaka-mavu. Kaha Kalunga nawa netavisa vatu valiyule vavene hakuvatwaminyina kuli Satana.

14. Uno nganyo muka yeji kufumangamo omu Yehova etavisa vatu valiyule vavene?

¹⁴ Mulongeshi tunavuluka muchakutalilaho nejiva chikupu ngwenyi uze muka-kulikanga navaze vanamukavangiza, kaveshi nakuhanjika muchanoko. Oloze nejiva nawa ngwenyi kuvetavisa vasolole nge vyuma vanahanjika vyamuchano nyi chiku nachinganyalisa vaka-shikola vosena. Omu vaze vaka-kulikanga navahona, kaha vaka-shikola vosena vakulyononona navetavila jino ngwavo mulongeshi ikiye kaha atela kuvanangula mushikola. Kaha navejiva jino ovyo mulongeshi mwafumishila kala muka-shikola mwalikanga. NaYehova nawa nejiva ngwenyi vatu navangelo vosena vakulyononona navanganyala hakumona ngwavo Satana navaze vamukavangiza vanahono, kaha navatu nawa kavahashile kuliyula vaveneko. Ngana mwaYelemiya wakushikulu, navalinangula muchano waulemu wakwamba ngwawo: “Ove Yehova, ngunatachikiza ngwami, Jila yamutu kayatwama muli iveneko, muli mutu wakutambuka kamwatwama mangana akutalikisa jitambo jenyiko.”—Yelemiya 10:23.

 MWOMWO IKA YEHOVA NETAVISHILA KUYANDA HATANDO YAYISUKU NGANA?

15, 16. (a) Mwomwo ika Yehova netavishila kuyanda chitwaleho lika? (b) Mwomwo ika Yehova nazeneka kuhonesa vyuma vyakufwana nge uhwanga?

¹⁵ Uno mwomwo ikaze Yehova netavishila kuyanda chitwaleho lika hatando yayisuku ngana? Kaha nawa mwomwo ika keshi nakuhonesela vyuma vyavipi? Achitale havyuma vivali vize mwahona kulinga mulongeshi uze twavulukanga. Chatete, mulongeshi keshi kukanyisa uze muka-kulikanga alumbunune mwakukumishila ukalu uze navulukako. Chamuchivali, mulongeshi keshi kukafwa uze muka-kulikanga awane mwakulingila naukalu kanako. Chochimwe nawa, achitale vyuma vivali vize Yehova kasakile kulingako. Chatete, kakanyishile Satana navaze vatwama kusali yenyi kusolola nge vanakulinga mwakwolokako. Kumana chapwa chakutamo kuhichisamo lwola. Vatu hamyaka yayivulu vanesekanga kuliyula vavene, chipwe ngwetu kuvayula kujifulumende javatu. Vatu vanazovoloka muvyuma vyasayasi namuvyuma vyeka, oloze chiyulo chakuhenga, nauhutu, nauhwanga, najijita vinavulilako chikuma jino. Ngocho, chiyulo chavatu chinasoloka nge chinahono.

¹⁶ Chamuchivali, Yehova kakafwile Satana kuyula kano kayeko. Chakutalilaho, nge Kalunga mwahonesa uhwanga, kaha ali nakukundwiza vishinganyeka vyavaze vaka-kulikanga. Kutala kachi Kalunga keshi nakulingisa vatu vashinganyeke ngwavo vanahase kuliyula vavene chakuhona ukaluko nyi? Kachi nge Yehova mwalinga ngocho, kaha nayikiye jino mwapwa muka-kwonga. Oloze ‘Kalunga keshi kwongako.’—WavaHepeleu 6:18.

17, 18. Yehova mwakalinga ika haukalu vananehe vatu hakuliyula vavene navize aneha Satana?

¹⁷ Nyi ngachilihi haukalu vananehe vatu hakulikanga kuli Kalunga putu vene kushikulu? Twatela kwijiva ngwetu Yehova apwa wangolo josena. Shikaho, akwechi ngolo jakukakumisa vyuma vyosena vize vinakuneha lamba kuvatu, kaha mwakalinga vene ngocho. Nganomu tunamono lyehi, awa mavu vanenyeka ngana navakawalumuna kupwa Palachise. Kaha kuhichila  mundando yakusokola yaYesu, navakafumisako vyuma vize vyeji kwizanga mwomwo yashili. Kaha ushona uze weji kwizanga hakufwisa vatu naukakuma omu navakasanguka vafu. Ngocho, Kalunga mwakazachisa Yesu mangana ‘akenyeke milimo yaLiyavolo.’ (WaYowano 1, 3:8) Yehova mwakatesamo vyuma vyosenevi halwola lwakutamo. Tunahase kuwahilila ngwetu Kalunga kalingile washi vyuma kaneviko, mwomwo kutalilila chenyi chikoki chinatulingisa tulinangule muchano nakumuzachila. (WaPetulu 2, 3:9, 10) Mulwola luno, Kalunga ali nakutonda vaka-kumulemesa vamuchano nakuvakafwa vomike kuvyuma vyosena vinahase kuvayanjisa mukaye kano kalamba.—Yowano 4:23; Wavaka-Kolinde 1, 10:13.

¹⁸ Vatu vamwe vanahase kulihulisanga ngwavo, Uno nge Kalunga atangile vaAlama naEve mujila yize yakuvahonesa kulikanga, kachi kuyanda chosenechi chauchiko nyi? Hakukumbulula chihula kanechi, watela kwanuka wana wamwaza uze Yehova akuhana.

NAUZACHISA NGACHILIHI WANA WAKUFUMA KULI KALUNGA?

19. Wana muka wamwaza atuhana Yehova, kaha mwomwo ika twatela kuumwena kupwa waulemu?

¹⁹ MuKapetulu 5 twamwene nge vatu vavatangile nauhashi wakulisakwila vyuma. Uno wamona wana kana kupwa wamwaza chikuma nyi? Kalunga atenga tunyama vavavulu, vaze veji kulilingilanga vyuma chakuhona kushinganyeka. Vatu vanatungu makina aze eji kuzatanga vyeshovyo vawatungila. Uno kachi twevwa kuwaha nge Kalunga atutengele ngana mwamakina kana nyi? Nduma, twawahilila hakulisakwilanga omu twatela kupwa, nachiyoyelo twatela kupwa nacho, navatu twatela kulikata navo,  navyuma vyeka nawa twasaka. Twasaka kupwa vakulihehwa mujila kaneyi, kaha omu mukiko asaka Kalunga.

20, 21. Natuzachisa ngachilihi kanawa uhashi vatuhana wakulisakwila vyuma, kaha mwomwo ika twatela kulingila ngocho?

²⁰ Yehova kasaka vatu kuzata milimo kwijiva nge yakuvahana chilikako. (Wavaka-Kolinde 2, 9:7) Chakutalilaho: Uno chisemi eji kwivwanga kuwaha namazu mwahanjika mwanenyi akufuma kumuchima wenyi tahi, nyi namazu aze mwalondezeza vakwavo? Chihula jino chili ngana, Nauzachisa ngachilihi uhashi wove wakulisakwila vyuma uze Yehova akuhana? Satana, naAlama, naEve vazachishile uhashi wavo wakulisakwila vyuma mujila yayipi. Vakanyine Yehova Kalunga. Jino yove naulinga muka?

²¹ Uli najila yakutela kuzachishilamo kanawa uhashi wove wakulisakwila vyuma. Unahase kupwa hamwe navatu vosena vaze vasakula kupwa kusali yaYehova. Vatu kana veji kwivwisanga muchima waKalunga kuwaha mwomwo veji kusololanga Satana kupwa muka-kwonga nakumona chiyulo chenyi kupwa chakuhona kutamo. (Vishimo 27:11) Ngocho nayove nawa unahase kulinga mwomumwe hakusakula kuyoya mujila yakwoloka. Chuma kana natuchilumbununa mukapetulu nakavangizaho.

VYUMA YANANGULA MBIMBILIYA

▪ Kalunga keshi kuneha vyuma vyavipi mukayeko.—Yopa 34:10.

▪ Satana afumbukilile wata waYehova hakwamba ngwenyi Kalunga apwa muku-kwonga kaha nawa Eji kuswekelanga vatu Jenyi vyuma vyamwaza.—Kuputuka 3:2-5.

▪ Yehova mwakazachisa Mwanenyi uze apwa Muka-kuyula Wangana wauMeshiya, akakumise kuyanda cheji kwizanga kuvatu.—WaYowano 1, 3:8.

[Vihula vyaChilongesa]

[Muvwimbimbi halifwo 107]

Yehova mwakakumisa kuyanda chosena

[Muvwimbimbi halifwo 110]

Uno muka-shikola nahase kupwa kuluwa kuhambakana mulongeshi nyi?

[Muvwimbimbi halifwo 113]

Kalunga mwakukafwa umike muluyando