1, 2. (1) Ta men ko renana rej wal̦o̦k im kõm̦m̦an an armej ro bũrom̦õj? (2) Im ta kajjitõk ko ruo ekkã an armej kajjitõk kaki?

EWÕR juon pata el̦ap ear wal̦o̦k ilo juon aelõñ, im ãlikin pata in elõñ to̦ujin kõrã im ajri ro rar mej. Rar aini ãnbwin kein ippãn doon im kalibwin er ilo juon ro̦ñ kileplep. Innem, rar kajjutak debwããl jiddik ioon lõb in el̦ap, im ioon debwããl kein kajjojo rar je naan in “Etke?” Eñin ej juon iaan kajjitõk ko me armej rej bõkm̦aantak ñe rej iioon jorrããn ak apañ ko rel̦l̦ap ilo mour ko aer. Ekkã aer kwal̦o̦k kajjitõk in ñe tarin̦ae ko, jorrããn ko rel̦l̦ap, im nañinmej ko rej kõm̦m̦an bwe ro rejitõnbõro ippãer ren mej, im bareinwõt ñe rinana ro rar m̦õrõik ro el̦ap aer yokwe er. Rej bar kwal̦o̦k ejja kajjitõk in wõt ñe men ko renana rej wal̦o̦k im ko̦kkure m̦õko im̦weer ak kaeñtaan im kabũrom̦õj er ilo wãween ko jet. Rein rekõn̦aan jel̦ã etke men kein renana rej wal̦o̦k ñan er.

² Etke Anij ej kõtl̦o̦k bwe armej ro ren bũrom̦õj im eñtaan? El̦aññe Jeova ej juon Anij ekajoor, el̦ap an yokwe, emãlõtlõt, im ej ekajet jim̦we, etke el̦ap nana im dike doon ilo lal̦ in? Em̦õj ke am̦ baj l̦õmn̦ak kõn men kein?

3, 4. (1) Ta eo ej kwal̦o̦k bwe ejjel̦o̦k jorrããn ñe jej kajjitõk etke Anij ej kõtl̦o̦k bwe armej ren bũrom̦õj im eñtaan? (2) Ta eñjake eo an Jeova ñe men ko renana rej wal̦o̦k im kõm̦m̦an menin an armej ro eñtaan?

 ³ Ebõd ke ñan kajjitõk etke Anij ej kõtl̦o̦k bwe armej ren eñtaan? Jet rej l̦õmn̦ak bwe ñe rej kwal̦o̦k kajjitõk rot in, ej mel̦el̦ein bwe edik aer tõmak im bwe rejjab kwal̦o̦k kautiej ñan Anij. Bõtab ilo am̦ riiti Baibõl̦, kwõnaaj lo bwe elõñ rũkarejar ro retiljek an Anij rar kwal̦o̦k ejja kajjitõk rot in wõt. Ñan waanjoñak, rũkanaan Habakkuk ear kajjitõk ippãn Jeova im ba: “Etke kwõj kõm̦m̦an bwe in iioon jorrããn kein rel̦l̦ap? Etke kwõj pãdwõt im jab lali men kein rebõd? Jorrããn im ire rej kaapool̦ eõ. Poktak im iakwããlãl rej wal̦o̦k ijoko otemjej.”—Habakkuk 1:3, UBS.

⁴ Jeova ear ke illu ippãn Habakkuk kõn an kwal̦o̦k kajjitõk rot kein? Ear jab ñan jidik kõnke ear likũt naan kein an Habakkuk ilo Baibõl̦. Ear bareinwõt jipañe bwe en kajoorl̦o̦k tõmak eo an im l̦apl̦o̦k an mel̦el̦e kõn unin an kar men ko renana wal̦o̦k. Eñin bar kõn̦aan eo an Jeova ñan kwe. Keememej bwe Baibõl̦ ej ba “kwõaorõk Ippãn” Anij. (1 Piter 5:7) El̦ap an Anij dike ñe men ko renana rej wal̦o̦k im kõm̦m̦an menin an armej bũrom̦õj im eñtaan. El̦apl̦o̦k an dike men kein jãn kõj aolep. (Aiseia 55:8, 9) Ak kiiõ ñe Anij ej dike men kein, etke ejjab jem̦l̦o̦k an armej bũrom̦õj im eñtaan?

5. (1) Ekkar ñan mel̦el̦e ko an elõñ rũkaki in kabuñ ko, etke men ko renana im rekabũrom̦õjm̦õj rej wal̦o̦k? (2) Ak ta eo Baibõl̦ ej ba kõn men in?

⁵ Elõñ armej rar etal ippãn rũkaki in kabuñ ko aer im kajjitõk etke men ko renana im rekabũrom̦õjm̦õj rej wal̦o̦k ñan kõj. Im ta kar uwaak eo an rũkaki rein ñan er? Eokwe, ekkã aer jiroñl̦o̦k armej ro im ba bwe men kein rej wal̦o̦k  kõnke rej ankilaan Anij. Rej ba bwe em̦õj an Anij kar karõk men otemjej jãn jinoin, ekoba men ko rej kõm̦m̦an bwe en rup bũruod. Rej jiroñ armej rein bwe ejjel̦o̦k juon emaroñ mel̦el̦e kõn bũl̦ããn im karõk ko an Anij. Rej bareinwõt ba bwe Anij ej kõm̦m̦an bwe rũtto ro im ajri ro jim̦or ren mej kõnke ekõn̦aan bõk er bwe ren mour ippãn ilañ. Bõtab, ãinwõt am̦ kar katak ilo bok in, Jeova Anij eban kõm̦m̦ani men ko renana. Baibõl̦ ej ba: ‘Anij Ekajoor Bõtata ejjab kõm̦m̦ani men ko renana; Ej kõm̦m̦ani men ko rejim̦we ñan jabdewõt armej.’—Job 34:12, UBS.

6. Etke elõñ rej l̦õmn̦ak bwe Anij ear karõk bwe men ko renana im rekabũrom̦õjm̦õj ren wal̦o̦k ñan kõj?

⁶ Etke elõñ rej l̦õmn̦ak bwe Anij eo ej kõm̦m̦an bwe armej ren bũrom̦õj im eñtaan? Kõnke rein rej l̦õmn̦ak bwe Anij eo Ekajoor Bõtata ej iroojin lal̦ in. Rejjab jel̦ã kõn ta eo Baibõl̦ ej ba kõn men in. Bõtab, em̦õj am̦ kar katak ilo Katak 3 im jel̦ã bwe eo ej iroojin lal̦ in, ej Setan Tepil̦ eo.

7, 8. (1) Ewi wãween an m̦wil im kõm̦m̦an ko an armej ro ilo lal̦ in kaalikkar kõm̦m̦an ko an eo ej iroojin lal̦ in? (2) Ta un ko jet unin an armej iiooni men ko renana? (3) Im ewi wãween an men kein kõm̦m̦an bwe armej ren eñtaan im bũrom̦õj?

⁷ Baibõl̦ ej ba: ‘Aolepen lal̦ in ej pãd ium̦win pein Rinana  eo.’ (1 Jon 5:19, UBS) Ñe kwõj kõl̦mãnl̦o̦kjen̦ kõn an lal̦ in obrak kõn nana, men in ej kaalikkar bwe em̦ool naan ko ilo eoon in. M̦wil im kõm̦m̦an ko an armej ro ilo lal̦ in rej kaalikkar kõm̦m̦an ko an Rinana in me ej “m̦on̦e aolepen lal̦.” (Revelesõn 12:9) Ñan waanjoñak, Setan etao im lãj, im el̦ap kõjdat ippãn. Innem kõnke lal̦ in ej pãd ium̦win pein Setan, enañin aolep ro ie retao im lãj, im el̦ap kõjdat ippãer. Eñin ej un eo kein kajuon unin an wal̦o̦k men ko renana im rej kaeñtaan im kabũrom̦õj armej ro.

⁸ Un eo kein karuo unin an armej iiooni men ko renana, ej kõnke kõj aolep jejjab weeppãn im jej likjab itok wõt jãn an kar Adam im Iv jum̦ae ilo jikin kallibin Iden. Em̦õj am̦ kar katak kake men in ilo Katak 3. Kõnke armej ro rejjab weeppãn, ekkã aer kõn̦aan irooj ioon ro jet im kajoorl̦o̦k jãn er. Eñin unin ej wal̦o̦k tarin̦ae, kowadoñ, im armej ro rej bũrom̦õj im eñtaan. (Ekklisiastis 4:1; 8:9) Im un eo kein kajilu unin an armej iiooni men ko renana, ej kõnke jirilo̦k ej pãd im̦aan men otemjej. Baibõl̦ ej ba: “Jerata ej wal̦o̦k ñan jabdewõt armej.” (Riit Ekklisiastis 9:11, UBS.) Ñan waanjoñak, el̦aññe juon armej ej etetal ium̦win ni ko, waini ko remaroñ wõtlo̦k jabdewõt iien im ure bõran, im kõm̦m̦an bwe en jorrããn ak mej. Armej ro remaroñ iioon jorrããn im apañ ilo jidimkij kõnke rej mour ilo lal̦ in me ejjab pãd ium̦win kõjparok eo an Jeova.

9. Etke jejel̦ã bwe ewõr juon un em̦m̦an unin an Jeova kõtl̦o̦k bwe men ko renana ren wal̦o̦k?

⁹ Ad jel̦ã bwe Anij ejjab kõm̦m̦an bwe armej ro ren eñtaan, men in el̦ap an kaenõm̦m̦an kõj. Ejjab Anij eo ej kõm̦m̦an bwe en wõr tarin̦ae, kowadoñ, ak taibuun im jorrããn ko rel̦l̦ap me rej kõm̦m̦an menin an armej ro eñtaan. Ak kajjitõk eo in kiiõ: Etke Jeova ej kõtl̦o̦k wõt bwe men kein renana ren wal̦o̦k? El̦aññe E eo ej Anij Ekajoor Bõtata, ejjel̦o̦k kajjitõk bwe ewõr an maroñ ñan kabõjrak aolep men kein jãn aer wal̦o̦k. Ak etke ejjab? Eokwe, kõn ad jel̦ã  bwe Jeova ej juon Anij in yokwe, men in ej jipañ kõj ñan kile bwe ewõr juon un em̦m̦an unin an jab kajju kabõjrak men kein renana.—1 Jon 4:8.

10. Ta aitwerõk eo Setan ear bõkm̦aantak, im ewi wãween an kar kõm̦m̦ane men in?

¹⁰ Bwe jen jel̦ã unin an Anij kõtl̦o̦k bwe armej ro ren eñtaan, jen ro̦o̦l likl̦o̦k ñan jinoin an kar wal̦o̦k eñtaan. Ke Setan ear kapoik Adam im Iv bwe erro en jab pokake Jeova, ear tõl erro ñan jum̦ae. Men in ear kõm̦m̦an bwe en wal̦o̦k juon aitwerõk el̦ap. Setan ear jel̦ã bwe Jeova ekanooj in kajoor im ejjel̦o̦k joñan kajoor eo an. Kõn men in, ear jab jum̦aik an Jeova kajoor. Bõtab, ewõr juon men ear jum̦aiki. Ta in? Ear jum̦aik jim̦we im maroñ eo an Jeova ñan irooj im tõl armej ro. Ilo an kar kariab Jeova im ba bwe ej dãpij men ko rem̦m̦an jãn armej ro doon, ekar ba bwe Jeova ej juon irooj enana. (Riit Jenesis 3:2-5, UBS.) Ej ãinwõt ñe ear ba bwe em̦m̦anl̦o̦k an naaj armej ro tõl er make jãn an Anij tõl er. Ilo wãween in, Setan ear jum̦ae Jeova im ba bwe ejjel̦o̦k an jim̦we im maroñ ñan irooj ioon armej ro im tõl er.

11. Etke Jeova ear jab kajju m̦an rijum̦ae ro ilo jikin kallibin Iden?

¹¹ Adam im Iv rar jum̦ae Jeova. Ilo aerro kar kõm̦m̦ane men in, ear ãinwõt ñe rar ba: ‘Kõmij jab aikuji Jeova bwe en tõl kõm. Ewõr ammim maroñ ñan make peek ta ko rem̦m̦an im ta ko renana ñan kõm.’ Ewi wãween an Jeova maroñ kam̦ool bwe rijum̦ae rein rebõd im bwe e wõt em̦m̦antata wãween an irooj im tõl? Ta eo emaroñ kõm̦m̦ane ñan kam̦oole men in ñan aolep enjel̦ ro im armej ro? Jet armej rej ba bwe Anij en kar kajju m̦an rijum̦ae rein im bar kõm̦anm̦an jet armej ro reweeppãn. Bõtab em̦õj an kar Jeova kwal̦o̦k kõn karõk eo an m̦oktal̦o̦k, kõn lal̦ in im armej ro. Ekar karõk bwe lal̦ in en obrak kõn ajri ro nejin  Adam im Iv, im ekar kõn̦aan bwe ren mour ñan indeeo ilo pedetaij ijin ioon lal̦. (Jenesis 1:28) Aolep iien Jeova ej kajejjet karõk ko an. Innem ñe em̦õj an ba juon men, enaaj kajejjete. (Aiseia 55:10, 11, UBS) El̦aññe Jeova ear kajju m̦an rijum̦ae rein ilo kar jikin kallibin Iden, eban kar maroñ kam̦ool bwe eriab men eo Setan ear ba kõn e.

12, 13. Etke Jeova ear kõtl̦o̦k bwe Setan en irooj ioon lal̦ in im bwe armej ro ren make kõm̦m̦an aer kien? Kwal̦o̦k juon waanjoñak.

¹² Jen lale juon waanjoñak: Juon rũkaki ej kajjioñ kõmel̦el̦eik rijikuul̦ ro an kõn juon un epen. Juon iaan rijikuul̦ ro an ebwe an mãlõtlõt, bõtab el̦ap an jum̦ae. Rijikuul̦ in ej ba bwe ebõd an rũkaki eo kõmel̦el̦eik un eo. Ej bar ba bwe ejel̦ãl̦o̦k im enaaj em̦m̦anl̦o̦k wãween an kõm̦m̦ane un eo jãn rũkaki eo. Jet iaan rijikuul̦ ro rej errã ippãn im rej bar jum̦aik rũkaki eo. Ta eo rũkaki in enaaj kõm̦m̦ane kiiõ? El̦aññe ejjab lel̦o̦k iien an rijum̦ae ro kam̦oole naan ko aer ak ej m̦õkaj in kadiwõj er jãn kilaaj eo an, ta eo rijikuul̦ ro jet renaaj ba? Bõlen renaaj l̦õmn̦ak bwe rijum̦ae ro rejim̦we im rũkaki eo ebõd. Innem, remaroñ jino aer jab kautiej rũkaki eo aer kõnke ejjab kõn̦aan bwe ro jet ren lo bwe e  eo ebõd. Kõn men in, rũkaki eo ej kõtl̦o̦k bwe rijikuul̦ eo eutiej bũruon en kajjioñ kõmel̦el̦eik un eo ñan rijikuul̦ ro jet.

¹³ Men eo Jeova ear kõm̦m̦ane ej ãinl̦o̦kwõt men eo rũkaki in ear kõm̦m̦ane. Jeova ear jab kajju m̦an rijum̦ae ro ilo kar jikin kallibin Iden ak ear kõtl̦o̦k iien ñan aer kam̦oole naan ko aer. Etke? Kein kajuon, elõñ milien enjel̦ ro rar reilal̦tak im lale an men in wal̦o̦k. (Job 38:7; Daniel 7:10) Enjel̦ rein rar aikuj jel̦ã wõn eo ejim̦we, Jeova ke ak Setan. Kein karuo, aolep armej ro me renaaj kar mour tokãlik, renaaj aikuj kar bar jel̦ã wõn eo ewõr an jim̦we im maroñ ñan irooj im tõl. Innem, ta eo Jeova ear kõm̦m̦ane? Ear kõtl̦o̦k bwe Setan en kwal̦o̦k el̦aññe enaaj em̦m̦anl̦o̦k an irooj im tõl armej ro. Ear bareinwõt kõtl̦o̦k bwe armej ro ren make kõm̦m̦an aer kien ilo lal̦ in me ej pãd ium̦win pein Setan.

14. Etke Jeova ear kõtl̦o̦k bwe armej ro ren tõl im kiene er make?

¹⁴ Rũkaki eo ejel̦ã bwe ebõd rijikuul̦ eo me ej jum̦aiki kab ro rej errã ippãn. Bareinwõt, ejel̦ã bwe ñe enaaj kõtl̦o̦k an rijum̦ae eo kõmel̦el̦eik un eo, men in enaaj jipañ aolep rijikuul̦ ro jet bwe ren jel̦ã wõn eo ejim̦we. El̦aññe rijum̦ae rein rejjab maroñ kõmel̦el̦eik un eo, rijikuul̦ ro jet renaaj kile bwe rũkaki eo wõt ejim̦we im ewõr an maroñ ñan katakin er. Im tokãlik ñe rũkaki in enaaj kadiwõj rijum̦ae ro jãn kilaaj eo an, rijikuul̦ ro jet renaaj mel̦el̦e unin an kõm̦m̦ane men in. Eñin men eo Jeova ear kõm̦m̦ane. Ear kõtl̦o̦k an Setan im rijum̦ae ro kajjioñ irooj im tõl. Men in enaaj kar jipañ enjel̦ ro rem̦m̦an im bareinwõt armej ro renaaj kar mour tokãlik bwe ren jel̦ã wõn eo ejim̦we. Rein renaaj make kile bwe Jeova wõt ej tõllo̦kũn bwe en irooj im tõl, ñe rej lo bwe ejjab em̦m̦an an Setan tõl im ej alikkar bwe armej rejjab maroñ kiene er make. Renaaj ãinwõt rũkanaan Jeremaia ke ear ba: “Ijel̦ã, Jeova, bwe ial̦ eo an juon armej  ejjab ilo e make; ejjab an juon armej eo ej etetal bwe en jineet buñtõn neen.”—Jeremaia 10:23.

15, 16. (1) Etke eto an Jeova kõtl̦o̦k bwe men ko renana im rekabũrom̦õjm̦õj ren wal̦o̦k? (2) Etke Jeova ejjab jipañ kabõjrak men ko renana jãn aer wal̦o̦k ãinwõt kowadoñ?

¹⁵ Ak etke eto an Jeova kõtl̦o̦k bwe men ko renana im rekabũrom̦õjm̦õj ren wal̦o̦k? Eokwe, kwõj keememej wõt ke waanjoñak eo kõn rũkaki eo im rijikuul̦ eo eutiej bũruon? Ke rijikuul̦ eo ekar kajjioñ kõmel̦el̦eik un eo ñan rijikuul̦ ro jet, rũkaki eo ear jab kabõjrake. Ilo ejja wãween in wõt, Jeova ear jab kabõjrak Setan im rijum̦ae ro rar kobal̦o̦k ippãn bwe ren kajjioñ kam̦oole men ko rar ba. Kõn men in, ekar menin aikuj bwe Jeova en kõttar im kõtl̦o̦k iien ñan aer kõm̦m̦ane men in. Ium̦win elõñ to̦ujin iiõ ko, armej ro rar kajutak elõñ kain kien ko ñan tõl er make. Meñe rar maroñ kõm̦m̦an elõñ wõnm̦aanl̦o̦k ko im kein jerbal ko rekapeel me jej loi ilo raan kein, ak ejjab jem̦l̦o̦k an wõr kowadoñ im jeram̦õl. Ejjab bar jem̦l̦o̦k an wõr tarin̦ae ko im jerbal ko renana an armej ro. Men kein rej kab baj l̦apl̦o̦k wõt im kien ko an armej rejjab maroñ kabõjraki. Innem ealikkar bwe armej rejjab maroñ irooj im tõl er make. Rej aikuj jipañ!

¹⁶ Ak etke Jeova ejjab jipañ kabõjrak men ko renana jãn aer wal̦o̦k? Eokwe, kwõj keememej wõt ke waanjoñak eo? Rũkaki eo ear jab jipañ rijum̦ae eo ñan kõmel̦el̦eik un eo ñan rijikuul̦ ro jet. Ilo ejja wãween in wõt, Jeova ejjab jipañ Setan ñan irooj ilo lal̦ in. El̦aññe Anij enaaj kabõjrak men ko renana ãinwõt kowadoñ, enaaj kar ãinwõt ñe ej jipañ rijum̦ae ro im kõm̦m̦an bwe ro jet ren tõmak er. Bareinwõt, el̦aññe enaaj jipañ kien ko an armej ro, renaaj l̦õmn̦ak bwe remaroñ lo tõprak ilo aer irooj im tõl er make. Keememej  bwe Setan ear riab im ba bwe armej rejjab aikuji Anij. Innem el̦aññe Jeova en kar bõbraik jorrããn ko jãn aer wal̦o̦k, enãj kar ãinwõt ñe ej errã ilo naan ko reriab an Setan. Jeova ear jab kõm̦m̦ane jabdewõt men kõnke ejjab errã ilo naan kein reriab an Setan. Baibõl̦ ej ba bwe “Anij eban riab.”—Hibru 6:18.

17, 18. Ta eo Jeova enaaj kõm̦m̦ane ñan jorrããn ko rel̦l̦ap me rar wal̦o̦k itok wõt jãn jerbal ko an Setan im an armej tõl er make?

¹⁷ Ak ta kõn jorrããn l̦apl̦ap ko me rej jelõt kõj itok wõt jãn an kar Setan im armej ro jum̦ae Anij? Men kein renaaj ke jako? Eokwe, keememej bwe Jeova ekajoor bõtata. Kõn men in, ewõr an maroñ im enaaj kõm̦m̦an bwe en jako aolep men ko renana im rekabũrom̦õjm̦õj me rej jelõt armej ro. Enaaj kõm̦m̦an bwe aolep men ren bar ro̦o̦l im em̦m̦an ãinwõt kar jinoin. Ãinwõt am̦ kar katak kake m̦oktal̦o̦k, enaaj kõm̦m̦an bwe lal̦ in me em̦õj an armej ko̦kkure, en oktak ñan juon jikin eaiboojoj ak pedetaij. Bareinwõt, men ko renana me rej jelõt kõj kõn ad jab weeppãn, renaaj jako ñe jej kwal̦o̦k ad tõmak ilo katok in mour eo an Jijej. Armej ro reban bar bũrom̦õj kõn ro remej kõnke Anij enaaj kõjerkak er jãn mej. Em̦ool, Anij enaaj kõjerbal Jijej ‘bwe en ko̦kkure jerbal kein an tepil̦’ eo. (1 Jon 3:8) Jeova enaaj kõm̦m̦ani men kein ilo iien eo ekkar im ejejjet. Jej lukkuun kam̦m̦oolol bwe ear kwal̦o̦k wõt an meanwõd im jab kõm̦m̦ani men kein wõt etto. Etke? Kõnke an meanwõd ekar maroñ letok iien ñan ad katak kõn e im jerbal ñane. (Riit 2 Piter 3:9, 10.) Ñan kiiõ, Anij ej kappukot wõt ro em̦ool bũrueer im ej jipañ er bwe  ren kijenmej wõt ñe rej eñtaan im iioon wãween ko reppen ilo jukjukun pãd in enana.—Jon 4:23; 1 Korint 10:13.

¹⁸ Jet armej remaroñ l̦õmn̦ak im ba: ‘Jenãj ke kar eñtaan wõt el̦aññe Anij ear kõm̦anm̦an Adam im Iv ilo juon wãween me reban jum̦ae?’ Ñan uwaake kajjitõk in, kwõj aikuj keememej bwe ke Jeova ear kõm̦anm̦an eok, ear lewaj ñan kwe juon menin lewaj ekanooj aorõk.

19. (1) Ta menin letok eo eaorõk Jeova ear letok ñan kõj? (2) Etke jej aikuj kaorõke menin letok in?

¹⁹ Ãinwõt ad kar etale ilo Katak 5, Jeova ear kõm̦anm̦an armej ro im lel̦o̦k maroñ eo ñan make kããlõt men ko rekõn̦aan kõm̦m̦ani. Men in ej ãinwõt juon menin letok eaorõk. Kwõj ke kile joñan aorõkin? Anij ear kõm̦anm̦an elõñ kain menninmour ko, bõtab ejjel̦o̦k an menninmour kein maroñ ñan jel̦ã ta ko rem̦m̦an im ta ko renana. Ñan waanjoñak, ke armej ro rar kõm̦m̦an jet robaat ko, rar bũrookraam̦i robaat kein bwe ren l̦oore jabdewõt men ko rej jiroñ er bwe ren kõm̦m̦ani. Kwõnaaj ke kar m̦õn̦õn̦õ ñe Anij ear kõm̦anm̦an eok bwe kwõn ãinwõt juon robaat? Kwõban kar. Jej m̦õn̦õn̦õ bwe ewõr ad maroñ ñan make kããlõt kain armej rot eo jekõn̦aan bwe jen ãinwõt, im kain jerbal rot eo jekõn̦aan kõm̦m̦ane. Bareinwõt, jemaroñ make kããlõt wõn ro m̦õttad im men ko ãierl̦o̦k wõt. El̦ap ad m̦õn̦õn̦õ bwe jej anemkwõj in kããlõt men ko jekõn̦aan kõm̦m̦ani. Eñin men eo Anij ekõn̦aan ñan kõj im em̦õn̦õn̦õ in kõtl̦o̦k bwe jen make kããlõt ta ko jekõn̦aan kõm̦m̦ani.

20, 21. (1) Ewi wãween ad kõjerbale maroñ eo ad ñan make kããlõt men ko jekõn̦aan kõm̦m̦ani ilo wãween eo em̦m̦antata? (2) Im etke jej aikuj m̦õn̦õn̦õ in kõm̦m̦ane men in?

²⁰ Jeova ejjab m̦õn̦õn̦õ ñe armej ro rej jerbal ñane kõnke juon ej iuun er bwe ren kõm̦m̦ane men in. (2 Korint 9:7)  Ñan waanjoñak, jen ba bwe ewõr juon nejũm̦ ajri im juon armej ear jiroñe bwe en iwõj im ba “kom̦m̦ool.” Kwõnaaj ke kar m̦õn̦õn̦õ kõn men in? Eokwe bõlen kwõmaroñ naaj kar m̦õn̦õn̦õ jidik. Bõtab, enaaj kar l̦apl̦o̦k am̦ m̦õn̦õn̦õ ñe ajri eo nejũm̦ ej make iwõj im kam̦m̦oolol eok kõnke ej itok jãn bũruon. Eñin men eo eaorõk jej aikuj kõl̦mãnl̦o̦kjen̦ kake: Jeova ear lewaj maroñ eo bwe kwõn make kããlõt men ko kokõn̦aan kõm̦m̦ani. Ak ewi wãween am̦ naaj kõjerbale maroñ in? Eokwe, kwõj keememej ke Setan, im Adam im Iv? Rein ekar bar wõr aer maroñ ñan make kããlõt ta ko rekõn̦aan kõm̦m̦ani. Ak ewi wãween aer kar kõjerbale? Rar kõjerbale ñan jum̦ae Jeova Anij. Ak kwe, ta eo kwõnaaj kõm̦m̦ane?

²¹ Eokwe, kwõmaroñ kõjerbale maroñ eo am̦ ñan make kããlõt men ko kokõn̦aan kõm̦m̦ani ilo wãween eo em̦m̦antata. Ta in? Kwõmaroñ kobal̦o̦k ippãn elõñ milien armej ro me rej kam̦ool bwe Setan ej juon rũriab im rũtõl enana. Armej rein rej kabuñbũruon Jeova ilo aer rejetake e. (Jabõn Kõnnaan 27:11) Kwe bareinwõt kwõmaroñ kõm̦m̦ane men in. Ewi wãween? Ilo am̦ kõjerbale mour n̦e am̦ ilo wãween eo ej kabuñbũruon Anij. Jenaaj etale men in ilo katak in tok juon.