1, 2. Dia sat paniska nani yawan wauhwisa ki, bara upla ailal diaura lukisa?

KUNTRI kum ra war tara tilara kan, bara aiklabanka kum ra mairin bara tuktan ailal prui tiwan. War aiklabras kan nani na sut unta kumira salhki bikan. Bara bikan kir ra dus prihni sirpi lupia nani bapi muni ulban: “Dia tawan?”. Panis wauhwi uplika nani ba baha makabi walanka ra kau lukisa. Ban kra, war tilara, prari satka dukya nani, siknis saura alki taim, apia kaka, rau munanka kum mita ai uplika ra iki, ai watla sauhki, bara panis wala sat sat sin wauhwi taim, kupia kriwan ni dia tawan ai rayaka ra baku takan sapa nu takaia want sa.

² Dia tawan upla paniska ba Gâd swin ban takisa? Witinka Gâd kum karnika sut bri, sinskira pali, kasakkira, bara latwan wan kaikisa kaka, diakan tasba ra misbara kaikan laka, bara upla pâtkas panis wauhwi ba ban takisa ki? Rait apia man sin baha ra lukisma?

3, 4. a) Panis taki ba Gâd dia tawan ban swin sapa lukaia ba saura apia ba, dia mita wan marikisa? b)Saurka taka panis taki ba dukyara Jehova dia lukisa ki?

³ Upla panis taki ba, Gâd bui dia tawan ban swin sapa lukaia ba saura sa ki? Upla kum kum mapara baku lukaia ba saura sa, kan Gâd ra kasak lukan laka, bara rispik sin apu  marikisa wisa. Sakuna Baibil aisi kaikuma taim, Gâd uplika wapni nani sin baha ra luki kan ba kaikma. Naha tanka ra, prapit Abakuk bui Jehova ra naku walan: “Diakan man sari laka bara watauika laka nani ba sin marikisma ki? Lâ krikanka nani bara sauhki tikaia laka nani ba kutbi kir ai brisa; tnaiya banira unsaban laka bara aiklaban nani man kir sa” (Abakuk 1:3).

⁴ Baha sat makabi walan ba mita, Jehova Abakuk ra laui daukan ki? Apia, laui daukras kan! Kau ni, Abakuk ai kupia latan ni makabi walan ba Gâd Baibil ra ulbi swin. Bara Gâd yaban Abakuk makabi walan ba tanka brih, ai kasakka lukan laka sin pakbia. Jehova brinka sa man ra sin baku maikaia. Bara ‘witin lika yawan sut ra main wan kaikisa’ Baibil wi ba amya ra bri bas (1 Pita 5:7). Saurka taka panis taki ba, ya ya kabia purkara sin Gâd mita kau pali misbara kaikisa (Aiseya 55:8, 9). Baku kaka, diakan tasba ra pura luan panis bara sa ki?

5. Kum kum lukanka ra yawan dia muni panis wauhwisa wisa, sakuna Baibil ba dia smalkisa?

⁵ Upla ailal mita ai priaska ta uplika nani ra walisa,  diakan yawan uba panis wauhwisa. Aihkika nani ba pana bila, baha ba Gâd kupia laka sa, bara dia takai ba sut —paniska nani ba kat sin—, Gâd ai kupia ra kaina manas luki brin wisa, bara Gâd dia luki ba yawan tanka sip briras wisa. Baha purkara sin, Gâd bui upla nani ra —tuktan nani ra kat sin—, witin wal kabia dukyara heven ra brihwisa wisa. Sakuna, man pat lan takram, Jehova bui saura kumi sin daukras. Baibil bila: “Lukaia apia sa Gâd karnika sut bri ba, saura daukbia” (Job 34:10).

6. Dia muni upla ailal bila tasba ra panis wauhwi ba Gâd pâtka sa wisa?

⁶ Dia muni upla ba mistik luki Gâd ra pâtkira kulkisa sapa nu sma ki? Kan upla aihkika lukanka ra, karnika sut bri Gâdka ba mita naha tasba wihta aimakisa lukisa. Witin nani ba, man saptika 3 ra, diara kum lan takram ba tanka, kau lan taki bangwras sa. Baha tanka tara, kuna isi ba sin naha: Tasba wihtka aimaki ba, Setan Debil sika.

7, 8. a) Tasba na ai wihtka lukanka ba nahki marikisa ki? b)Upla saurka tawan, wihki “upla ba bila kaikras kan [...] pât ra dimi [ba]” tawan sin, nahki panis wan munisa ki?

⁷ Baibil ra param marikisa “tasba aiska na lika Setan karnika munuhtara sa” (1 Jan 5:19). Baha nu si wan sinska kwawisa, rait apia? Kan tasba ra daukanka nani ba, ya bui “tasba aiskara kunin” muni lukanka ba marikisa (Param marikan [Reveleshan] 12:9). Setan ba kunin muni, misbara kaiki, kupia siksa ni wark takisa. Baha taka mita, tasba na ai mihta ra ba, kunin laka, misbara kaikan laka, bara kupia siksa laka ni bangkisa. Bara baha tanka pas ba mita tasba ra panis wauhwisa.

⁸ Saptika 3 ra kaikan baku, upla ba Eden gadinka ra Gâd bila lulkan ba taka, saura dadaukra takan. Bara baha tanka wala ba mita tasba ra panis wauhwisa. Saurka ba taka, upla ba karnika briaia lihkisa, bara briaia wisi war aiklabi, upla wala ra taibi panis munisa (Smasmalkra 4:1; 8:9). Tasba ra dia muni panis wauhwi ba tanka yuhmpa ba dahra,  Baibil bila “upla ba bila kaikras kan [...] pât ra dimisa” wisa (Smasmalkra 9:11, 12). Naha tasba wihtka kaina kakahbra ba Jehova apia sa. Baha mita upla ba ini plis ra tauki kan, ban wina aksidint kum taki, latwan briaia sip sa.

9. Diara kum mita Jehova ba paniska apu daukras sa dahra, yawan nahki nu sa ki?

⁹ Yawan panis wauhwi ba Gâd mita daukras ba nu takaia wan maisanihkisa. War nani, lâ krikanka nani, rau munanka ba, tasba nikbanka, bara prari satka nani taki ba Gâd pâtka apia sa. Ban sakuna, upla paniska ba dia muni Gâd swin ban takisa sapa, yawan nu takaia nit sa. Witin karnika sut brisa kaka, panis nani apu daukaia karnika bri ba latan sa. Bahamna, diakan baku daukras ki? Yawan pat lan takan, witin ba Gâd latwankira kum sa. Baha mita, upla paniska Gâd apu daukras sa kaka, diara kum mita sa kaia sa (1 Jan 4:8).

10. Setan ba dia mapara latuban, bara nahki muni daukan?

¹⁰ Upla paniska ba dia muni Gâd swin ban taki ba nu takaia sa kaka, pât nani sut ta krikan pyua ra lukaia sa. Setan bui Adam Iv wal Jehova bila lulkbia daukan taim, trabil tara kum bukan. Setan ba Jehova karnika bri ba mapara latubras kan, kan nu sa Jehova ba karnika sut brisa. Sakuna, Jehova ba King aimakaia raitka brisa sapa latuban. Setan mita Gâd ai uplika ra kunin muni diara yamni briaia mihta dakbisa win. Baku dauki, Jehova ba wihta saura kum sa latuban (Blasi sturka 3:2-5). Wibia sa kaka, Gâd upla ra king aimakras sa kaka, upla ba kau pain iwbia laka ra aisan. Baku daukisi, Setan ba Jehova King aimakaia raitka bri ba mapara dusa kuhban.

11. Dia muni Eden gadinka ra Jehova bui kyamapara nani ra iki tikras kan?

¹¹ Adam Iv wal sin Jehova bila lulkisi naku lukan pitka sa: “Yang nani nit apia sna Jehova ba wan wihta kabia.  Yang nani selp dia pain dia saura ba luki daukaia sip sna”. Jehova bui trabilka na nahki wapnika mangkaia kan ki? Ai paskanka sinska bri nani ra, nahki marikaia sip kan kyamapara nani ba mistik takan kan, bara witin dauki ba lika yamni sa? Upla kum kum lukisa Gâd mita kyamapara nani ra sauhki tiki, upla wala paskaia kan. Sakuna witin pat aisan kan, tasba na paradais kum ra laki, Adam Iv kyamka ni bangkbia (Blasi sturka 1:28). Bara Jehova dia daukaia luki ba kat daukisa (Aiseya 55:10, 11). Bara Eden gadinka ra kyamapara nani ra, ba kat iki tikan kata, Witin King aimakaia raitka bri ba dahra wapnika mangkras kaia kan.

12, 13. Ani praki kaikanka ba marikisa, Jehova bui dia muni swin Setan ba upla ra aimaki, upla ba selp ai gabamintka mangki bribia?

¹² Kaisa tanka kum wal praki kaikaia. Maestru kum mita kulki kaikaia warkka kum nahki pain daukaia ba marikisa. Ban wina, diara lan, kuna kyamapara wahmika kum bui, ai maestruka dauki ba saura sa wisa. Maestruka ba ai warkka pain daukras wisi, wahmika bila witin kau pain daukaia tnatka kum nu sa wisa. Kul panika nani kum  kum ba wahmika wi ba rait luki, ai maestruka mapara buisa. Maestruka ba dia daukaia sa luki? Wel au, kyamapara wahmika nani ra kul wina kangbi sakaia sip sa. Sakuna wala nani ba dia lukbia ki? Ban kra, ai panika wala nani ba rait aisi kan lukbia. Ban kra sin, maestruka ra dan rispik munras kabia. Apia kaka, maestruka ba mistik takaia sia brisa lukbia. Sakuna, maestruka ba mita kyamapara wahmika ra swika, witin bui wala nani ra warkka ba nahki pain daukaia ba marikbia.

¹³ Jehova ba sim baku daukan. Kan Adam, Iv bara Setan baman bara apia kan. Insal milian milian sin baha takan ba kaiki kan (Job 38:7; Danyal 7:10). Jehova dia daukbia ba wina baha insal ailal nani ra, bara sinska bri wala nani rayaka ra kat sin diara munaia kan. Baku bamna, Jehova Gâd ba dia daukan ki? Swin Setan mita upla ra nahki aimakbia sapa marikbia. Bara swin Setan karnika munuhtara upla ba selp ai gabamintka mangki bribia.

14. Jehova mita upla ba selp ai gabamintka mangki bribia swika wina, dia yamnika takbia ki?

¹⁴ Yawan aisi kata maestruka ba pain nu sa kyamapara nani ba mistik takan sa. Sakuna baku sin, witin pain nu sa wahmika ba kau pain daukisa sapa marikbia swibia kaka, wala nani sut ba diara kum kum kaikbia. Au sika! Kyamapara nani ba mistik lukan kan ba param takbia taim, sut nani kaikbia maestruka ba baman kau pain daukaia sip sa. Bara maestruka mita kyamapara nani ra kul wina kangbi sakbia taim, wala nani ba ai tanka sin bribia. Sim baku, Jehova pain nu sa insal bara upla kupia pain bri nani ba mapara yamni kabia, Setan bara ai lasika kyamapara nani mistik takan ba kaikbia. Bara tasba uplika ba selp ai gabamintka mangki bri taim, sip lilia takras kaikbia ba sin yamni kabia. Prapit Jirimaia nan aisan ba upla sut pain ai tanka bribia: “Dawan, yang kasak daira walisna upla rayaka ba witin mita dawanka apia sa, ai kanra ai rayaka ra dia takaia ba alki takaskaia karnika apu sa” (Jirimaia 10:23).

15, 16. a) Dia muni panis nani ba Jehova mita pyu wihkara swin takisa ki? b)Tasba ra lâ krikanka bara trabil saura nani taki ba, dia muni Gâd bui kaina dakbras?

¹⁵ Sakuna, dia muni Jehova swin panis nani ba pyu wihkara takisa? Bara dia muni panis nani taki ba alki takaskras sa ki? Wel, maestruka dukyara bisiura aisi kan ba, witin diara wal daukbia apia ba kaisa kaikaia. Pas ba, wahmika kyamapara ba dia marikbia ba wina mihta dakbras kabia, bara walka ba, warkka pain daukbia wisi maestruka bui help munras kabia. Sim baku, Jehova ba diara wal daukbia apia. Pas ba, Setan ra bara Setan ra ta baiki nani ra, dia daukaia luki ba wina alki takaskras. Baha tawan Gâd mita pyu lubia swika nit pali kan. Pat mani ailal luan sa, bara tasba uplika ba gabamint sat sat nani mangki brin, bara tasba sinska laka ra sin pawi bangwan. Ban sakuna, upla pâtkas panis wauhwi ba, umpira laka ba, lâ krikanka ba, bara war aiklabi ba sin pawi auya sa. Latan pali sa! Upla gabamintka nani selp mangki bri ba sut yus apu bangwisa.

¹⁶ Walka ba, Setan upla ra gabamint aimaki ba ra, Jehova bui help munras. Kan tasba ra lâ krikanka bara trabil saura nani taki ba, Gâd bui kaina dakbia sa kaka, rait apia kyamapara nani ra ta baikisa baku kaia kan? Rait apia yawan lukbia tasba uplika ba selp ai gabamintka mangki brisi trabil apukira pain iwaia sip sa? Jehova baku daukbia sa kaka, witin Setan kuninka pâtka bribia. Sakuna, “Gâd sip kunin aisaras” (Hibru nani 6:18).

17, 18. Setan wihki tasba gabamintka nani bui diara sauhki ba dukyara Jehova dia daukbia ki?

¹⁷ Sakuna, Gâd mapara bui bangwan ba taka diara sut sauhkan ba wal dia takbia ki? Jehova karnika sut bri ba wan auya tikbiara. Ani trabilka kabia sin witin wapni mangkaia sip sa, bara mangkaisa sika. Yawan pat lan takan baku, wan tasbaia ra sauhkan ba sut pain taki, paradais  painkira kum kabia. Jisas sakripaiska ra kasak luki ba tingki, saurka laka pâtka sut wina upla ra pri sakan kabia. Bara upla prahki nani ba, prura wina buan laka ni yamni munan kabia. Jisas bak Gâd bui “Debil warkka ba sut apu dauk[bia]” (1 Jan 3:8). Naha sut ahkia daukai ba Jehova Gâd kau pain nu sa. Witin wihka bila kaiki ba yawan tingki wiaia sa, kan baha taka mita Baibil tanka kasak ba lan taki, Gâd warkka daukaia sip sa (2 Pita 3:9, 10). Tnata aimakras kainara, Gâd mita upla kupia pain bri witin ra mayunaia want nani ba pliki, tasba trabilka mapara bapi buaia helpka yabisa (Jan 4:23; 1 Korint 10:13).

¹⁸ Upla kum kum bila Gâd ba Adam Iv wal ai mapara sip buras kaka paskan kata, pâtka nani na takaia apia kan wisa. Sakuna, dia muni Jehova baku daukras kan ba tankam briaia want sma kaka, witin prisant kum maikan ba ra lukaia sma.

19. Dia prisantka painkira Jehova bui wankan, bara dia muni painkira sa ki?

¹⁹ Saptika 5 ra kaikan baku, Gâd mita upla ra kupia laka pri yaban, wibia sa kaka, upla ba selp dia daukbia ba luki briaia sip kaia laka ba yaban. Man kaikisma prisantka na nahki painkira ba? Gâd mita daiwan ailal sin paskan, sakuna daiwan nani sut ba sinska yaban ba kat daukisa. Bara robot nani upla mita paski ba sin, adar yabi ba kat daukisa. Gâd mita baku wan paskan kata, yawan lilia kabia lukisma? Apia pali! Yawan lika dia sat uplika kaia ba, wan rayaka  wapanka satka ba, bara dia sat panika bribia sapa sin, selp luki daukaia sip kaia ba uba lilia sa. Yawan baha sat prika laka briaia ba lihkisa, bara Gâd sin want sa yawan baha ba bribia.

20, 21. Kupia laka pri Gâd mita prisant wankan ba nahki pain yus munaia sip sa ki, bara dia muni baku daukaia ba wan brinka kaia sa?

²⁰ Jehova lika want apia sa yawan taiban laka ra ai dukya daukbia (2 Korint 9:7). Aisa yapti kum mapara ani kau want sa: Ai luhpia mita witin ra “Latwan mai kaikisna” wibia taim, ai kupia wina wibia, apia kaka taiban laka ra wibia? Baku bamna, man selp luki kais: “Jehova mita kupi laka pri aikan ba, yang nahki yus munamna ki?”. Setan bara Adam Iv wal saura pali yus munan, kan Jehova Gâd bila lulkan. Bara man lika? Dia sapa daukma ki?

²¹ Baha prisantka painkira —kupiam laka pri ba—, pain yus munaia ba man mihtam ra sa. Upla milian milian Jehova tanira tauan ba baku man sin tauaia sip sma. Uplika nani na Gâd kupia ba lilia daukisa, kan ai daukanka ni marikisa Setan ba kuninkira, bara yus apu wihtka kum sa (Sins laka 27:11). Iwanka yamni kum alki brima kaka, man sin Gâd kupia ba lilia daukma. Saptika aula ba ra baha sat iwanka dahra laki kaikbia.