1, 2. ¿Tlake kichiua ma titlaijiyouikaj, uan tlake kinekiskiaj kimatisej miakej?

IPAN se altepetl kampa mochijki se ueyi tlauilankayotl, mijkej tlauel miakej siuamej uan konemej. Nochi kintlalpachojkej sansejko ipan se ostotl uan kitlalijkej miak kuamapeli, uan ipan sejse kiijkuilojkej: “¿Kenke panok ni?”. Miakej ya nopa motlajtlaniaj kema se kokolistli, se ueyi tlauilankayotl o seyok tlamantli kichiua ma miki se tlen ininchampoyouaj, kinsojsoljuilia ininchaj o kichiua tlauel ma tlaijiyouikaj. Yeka kinekij kimatisej kenke kinpano tlen tlauel amo kuali.

² ¿Kenke kikaua Jehová ma titlaijiyouikaj? ¿Timoiljuijtok kenke tlauel tekualankaitaj uan techiuiliaj tlen amo kuali tlaj toTeotsij kipia nochi Chikaualistli, teiknelia, tlalnamiki uan kichiua tlen xitlauak?

3, 4. 1) ¿Kenke amo kenijki kema titlajtlanij kenke kikaua toTeotsij ma titlaijiyouikaj? 2) ¿Kineki Jehová ma titlaijiyouikaj uan ma mochiua tlen amo kuali?

³ ¿Tikixpanoj toTeotsij kema titlajtlanij kenke kikaua ma titlaijiyouikaj? Sekij moiljuiaj kena, pampa tijnextiskiaj amo timotemachiaj ipan toTeotsij o amo tijtlepanitaj.  Ipan Biblia tikitas sekij nojkia tlajtlankej nopa. Kej Habacuc, katli kitlajtlanik Jehová: “¿Para tlen tijchiua ma nikita tlajtlakoli uan tlen axxitlauak mojmostla? Kampa ueli nechyaualouaj tlakamej tlen tlaxoleuaj uan tlen temajmatiaj. Mojmostla mosenkualanijtokej uan moteuiaj” (Habacuc 1:3).

⁴ ¿Kiajuak Jehová pampa kitlajtlanik nopa? Amo, pampa ya kichijki ma moijkuilo ipan Biblia tlen kiijtok Habacuc. Nojkia kipaleuik ma kikuamachili tlen kinekiyaya kimatis uan nojua kuali ma tlaneltoka. Jehová nojkia kineki mitspaleuis. Xikilnamiki Biblia kiijtoua toTeotsij ‘techmokuitlauia’ o kitekipachoua tlen techpano (1 Pedro 5:7). Ya amo kineki ma titlaijiyouikaj yon ma mochiua tlen amo kuali (Isaías 55:8, 9). Uajka, ¿kenke miakej tlauel tlaijiyouiaj?

5. ¿Kenke sekij kiijtouaj titlaijiyouiaj, uan tlake techmachtia Biblia?

⁵ Ipan tlen ueli religiones miakej kintlajtlanijtokej inintlayakankauaj kenke tlauel titlaijiyouiaj. Inijuantij kiniljuiaj pampa toTeotsij kej nopa kineki ma pano o  pampa uejkajkia ipa kiijtojtoya panoskia tlen amo kuali. Uan miakej kiniljuiaj amo kinamiki kimatisej tlen toTeotsij kichiua, uan kema miki se akajya kiniljuiaj toTeotsij kinekiyaya ma itsto iuaya ne iluikak. Maske temachtiaj nopa, ta tijmati Jehová amo kema techchiuilia tlen amo kuali, pampa Biblia kiijtoua: “ToTeko axkema kichiua tlen axkuali. Nochipa toTeko tlen kipia nochi Chikaualistli tetlajtolsenkauas keja kinamiki” (Job 34:12).

6. ¿Kenke miakej kiijtouaj toTeotsij kichiua ma titlaijiyouikaj?

⁶ ¿Kenke kiixpanoj toTeotsij katli kiijtouaj yaya kichiua ma titlaijiyouikaj? Pampa moiljuiaj toTeotsij katli kipia nochi Chikaualistli kinauatia Tlaltipaktli. Inijuantij amo kimatij tlen nelnelia tlamachtia Biblia, ni amo ouij uan tlauel ipati. Ipan tlamachtili eyi tikitakej Satanás yaya tlanauatia ipan Tlaltipaktli.

7, 8. 1) ¿Kenijkatsa kinextiaj maseualmej nojkia tlalnamikij kej inintlanauatijka? 2) ¿Kenijkatsa kichijtok ma titlaijiyouikaj pampa titlajtlakolejkej uan pampa techpano tlen amo kuali ‘kema amo tijchiaj’?

⁷ Biblia kiijtoua “kampa ueli ipan Tlaltipaktli mokauaj ipan ichikaualis Axkualtlakatl [Diablo]” (1 Juan 5:19). Ni texto techpaleuia ma tijmatikaj tlen kichiuaj ipan Tlaltipaktli, kinextiaj tlalnamikij kej katli “kinkajkayaua nochi tlakamej tlen itstokej kampa ueli ipan Tlaltipaktli” (Apocalipsis [Revelación] 12:9). Satanás tlauel tekualankaita, tekajkayaua uan techiuilia tlen amo kuali. Yeka ipan Tlaltipaktli kampa ya tlanauatia nojkia kichiuaj nopa. Ni tlauel techtlaijiyouiltia.

⁸ Ipan tlamachtili eyi nojkia tikitakej titlaijiyouiaj pampa kema Adán tlaijixnamijki mochijki tlajtlakole. Yeka maseualmej kinekij san ininselti monauatisej. Ni kichijtok ma onka uejueyi tlauilankayotl, ma techiuilikaj san tlemach tlamantli uan ma tetlaijiyouiltikaj (Eclesiastés  4:1; 8:9). Biblia kiijtoua nojkia titlaijiyouiaj pampa se “tlamantli axkuali ueli kipantis aki ueli tlakatl kema axkichia” (xijpoua Eclesiastés 9:11). Uan pampa Jehová amo tlanauatijtok ipan Tlaltipaktli, amo kinmanauia maseualmej, yeka kampa ueli kinpano tlen amo kuali.

9. ¿Kenke timotemachiaj Jehová kimati kenke kikajtok ma titlaijiyouikaj?

⁹ Kema tijmatij toTeotsij amo techtlaijiyouiltia, nelia techyolchikaua. Ya amo kichiua ma onka uejueyi tlauilankayotl, ma temiktikaj, ma techiuilikaj san tlemach tlamantli, ma mojmolini tlali o ma techpano sekinok tlamantli. Uajka, ¿kenke toTeotsij nojua kikajtok ma titlaijiyouikaj? Ya uelis kitlamiltis tlaijiyouilistli pampa kipia nochi Chikaualistli. Uan, ¿kenke amo kitlamiltijtok? Tojuantij tikixmatij Jehová uan tikitstokej kenijkatsa techiknelia, yeka timotemachiaj ya amo kitlamiltijtok pampa kineki kichiuas tlen kuali (1 Juan 4:8).

10. ¿Kenijkatsa Satanás kiistlakauik toTeotsij?

¹⁰ Tlaj tijnekij tijmatisej kenke kikajtok toTeotsij ma titlaijiyouikaj, moneki ma tikilnamiktokaj kenijkatsa pejki. Kema Satanás kichijki Adán uan Eva ayokmo ma kineltokakaj Jehová, pejki se ueyi kuesoli. Satanás amo kiijtok tlaj Jehová amo kipia chikaualistli, pampa kimatiyaya kipia nochi Chikaualistli. Ya kiistlakauik Jehová pampa kiijtok amo kinamiki tlanauatis. Kema Diablo kiijtok istlakati toTeotsij uan amo kinkaua itekipanojkauaj ma yolpakikaj, kinejki kiijtos amo kuali tlanauatia (xijpoua Génesis 3:2-5). Nojkia kiijtok maseualmej kuali itstoskiaj tlaj amo kinnauatiskia toTeotsij. Kej nopa Diablo kiijtok Jehová amo kinamiki tlanauatis.

11. ¿Kenke Jehová amo kintsontlamiltik katli tlaijixnamijkej?

 ¹¹ Kema Adán uan Eva tlaijixnamijkej, kejuak kiijtojkej: ‘Amo moneki ma technauati toTeotsij. Tojuantij uelis tikijtosej tlake kuali uan tlake amo kuali’. ¿Kenijkatsa kisenkauaskia Jehová nopa kuesoli? ¿Kenijkatsa kinextiskia san istlakatiyayaj nopa tlaijixnamikinij uan san ya kuali kichiua nochi? Sekij moiljuiaj kinamikiyaya kintsontlamiltijtoskia uan kichijtoskia seyok tlakatl uan seyok siuatl. ToTeotsij amo kichijki nopa pampa mosentlalijtoya kichiuas se xochimili kampa itstoskiaj Adán uan Eva ininkoneuaj (Génesis 1:28). Jehová nochipa kichiua tlen mosentlalia (Isaías 55:10, 11). Tlaj kintsontlamiltijtoskia nopa tlaijixnamikinij, amo kinextijtoskia san ya kinamiki tlanauatis.

12, 13. ¿Kenke Jehová kikajtok Satanás ma tlanauati ipan Tlaltipaktli, uan ma monauatikaj maseualmej ininseltitsitsij?

¹² Ma timoiljuikaj ni: Se tlamachtijketl kinixtomilia katli kinmachtia kenijkatsa kisenkauasej se ouij tlamachtili. Teipa, se telpokatl katli tlalnamiki uan amo tlatlepanita kiiljuia itlamachtijka amo kuali kej kisenkaua. Ika ni  kiijtosneki itlamachtijka amo kuali tlamachtia uan kiijtoua san ya kimati kenijkatsa kinamiki mosenkauas nopa tlamachtili. Sekij kineltokaj uan nojkia tlaijixnamikij. ¿Tlake kinamikiskia kichiuas inintlamachtijka? Uelis kinkixtiskia kampa kinmachtia. ¿Uan tlake kiijtoskiaj sekinok tlaj kinkixtiskia? Uelis kineltokaskiaj tlen kiijtoua nopa telpokatl uan nopa sekinok tlaijixnamikinij, uelis ayokmo kitlepanitaskiaj inintlamachtijka uan moiljuiskiaj amo kineki ma kinextikaj amo kuali tlamachtia. Yeka kikaua nopa telpokatl ma kinexti kenijkatsa kisenkauaskia nopa tlamachtili.

¹³ Jehová nojkia kej nopa kichijtok. Nopa kuesoli amo kipixkej san katli tlaijixnamijkej ipan Xochimili Edén, nojkia nopa iluikaeuanij katli kiitakej tlen panok (Job 38:7; Daniel 7:10). Kej Jehová kisenkauaskia nopa kuesoli, iluikaeuanij uan maseualmej kimatiskiaj ajkia kiijtouayaya tlen melauak uan san ajkia kinamiki tlanauatis. Yeka, Jehová kikajtok Satanás ma kinexti kenijkatsa tlanauatia, uan maseualmej ma monauatikaj ininseltitsitsij uan ma kinyakana Satanás.

14. ¿Kenijkatsa uelis techpaleuis pampa Jehová kinkajki maseualmej ma monauatikaj ininseltitsitsij?

¹⁴ Nopa tlamachtijketl kimati san istlakatij nopa tlaijixnamikinij. Nojkia kimati nochi kinpaleuis tlaj kinkauas ma kisenkauakaj nopa tlamachtili kej inijuantij kinekij. Uajka, kema nesis mokuapolojtokej, nopa sekinok telpokamej kiitasej san inintlamachtijka kinamiki tlamachtis. Uan kikuamachilisej kenke inintlamachtijka kinkixtis nopa tlaijixnamikinij kampa tlamachtia. Jehová nojkia kimati kenijkatsa kinpaleuis katli kuali ininyolo, kema kiitasej Satanás uan amo kuali ajakamej san istlakatij uan maseualmej amo uelij monauatiaj ininseltitsitsij. Uajka, kikuamachilisej ni tlajtoli: “NoTeko, na nijmati  para se tlakatl axiaxka iyolis, niyon axyajaya tlen kinauatis tlen panos ipan iojui” (Jeremías 10:23).

15, 16. 1) ¿Kenke kikajtok Jehová tlauel ma uejkaua tlaijiyouilistli? 2) ¿Uan kenke kikajtok ma temiktikaj uan ma pano tlen tlauel amo kuali?

¹⁵ ¿Kenke kikajtok Jehová ma uejkajto titlaijiyouijtokaj? ¿Uan kenke amo kitlamiltijtok? Nopa tlamachtijketl kichijki ome tlamantli. Kikajki nopa telpokatl ma kisenkaua nopa tlamachtili, uan amo kipaleuik. ToTeotsij nojkia kiijtok kichiuaskia ome tlamantli. Kikajki Diablo uan katli iuaya tlaijixnamijkej ma kinextikaj tlaj nelnelia tlen kiijtojkej. Yeka kikajtok ma pano miak xiuitl. Maske miakej tekichiuanij tlanauatijtokej, uan katli tlauel ixtlamatij kichijtokej kuali pajtli, yajyankuik tepostli uan sekinok tlamantli, tlauel onkatok uejueyi tlauilankayotl, techiuiliaj tlen amo kuali, temiktiaj uan miakej amo kipiaj ika tlen mopanoltisej. Ni kinextia tlen monauatiaj ininselti amo kuali itstokej.

¹⁶ Jehová amo kipaleuijtok Satanás ma tlanauati. Tlaj kichiuaskia amo ma temiktikaj uan amo ma pano tlen amo kuali, uajka nesiskia toTeotsij kinpaleuia tlaijixnamikinij. Uan uelis timoiljuiskiaj kena uelis timonauatisej toseltitsitsij uan amo kema techpanoskia tlen amo kuali. Tlaj Jehová kichiuaskia nopa kinextiskia nojkia istlakati. Uan tojuantij kuali tijmatij “toTeko axueli istlakati” (Hebreos 6:18).

17, 18. ¿Tlake kichiuas Jehová ika nochi tlen amo kuali katli kichijtokej tekichiuanij uan Satanás?

¹⁷ ¿Tlake panos ika tlen amo kuali katli pejki kema kiijixnamijkej toTeotsij? Jehová kitlamiltis tlen techtlaijiyouiltia pampa kipia nochi Chikaualistli uan pampa nelnelia kineki kichiuas. Kej timomachtijkej, Tlaltipaktli  sampa mochiuas se xochimili. Katli kineltokaj Jesús temaktilik inemilis, ayokmo elisej tlajtlakolejkej, ayokmo kinpanos tlen amo kuali, uan katli moyolkuisej sampa kuali eltos inintlakayo. Kej nopa toTeotsij kitekiuis Jesús “para kixoleuas iteki Axkualtlakatl [Diablo]” (1 Juan 3:8). Jehová kichiuas ni kema ya kiijtos kinamiki. Nelia tiyolpakij pampa toTeotsij ayamo kichijtok tlen mosentlalijtok. Tlaj ya kichijtoskia, amo tijmajtoskiaj tlen tlamachtia Biblia uan amo tijtekipanoskiaj (xijpoua 2 Pedro 3:9 uan 10). Nama toTeotsij nojua kintemoua katli kinekij kiueyichiuasej ika nochi ininyolo, uan kinpaleuia ma kiijiyouikaj tlaijiyouilistli tlen kipiaj (Juan 4:23; 1 Corintios 10:13).

¹⁸ Sekij moiljuiaj nama amo aka tlaijiyouiskia tlaj toTeotsij kinchijtoskia Adán uan Eva amo ma uelikaj tlaijixnamikikaj. Tlaj tijnekij tijmatisej kenke toTeotsij amo kej nopa kinchijki, xikilnamiki kenijkatsa techchijtok Jehová.

19. ¿Kenijkatsa techchijtok Jehová, uan kenke moneki ma tijpatiitakaj?

¹⁹ Ipan tlamachtili makuili tikitakej toTeotsij kikaua ma tijtlapejpenikaj tlake tijnekij tijchiuasej. ¡Nelnelia tlauel kuali kej techchijki toTeotsij! Maske ya nojkia kinchijki miakej tlapialmej, inijuantij kichiuaj san tlen ipa momajtokej kichiuaj. ¿Tiyolpakiskiaj tlaj toTeotsij techchijtoskia kej tlapialmej? Amo. Tojuantij tipakij pampa toTeotsij  techkaua ma tijtlapejpenikaj tlake tijchiuasej, kenijkatsa timonejnemiltisej uan ajkia ininuaya timouampojchiuasej. Tlauel techpaktia kej Jehová techchijtok, uan ya kej nopa kineki ma tiitstokaj.

20, 21. ¿Kenijkatsa uelis kuali tijtlapejpenisej tlen tijchiuasej, uan kenke kinamiki ma tijchiuakaj nopa?

²⁰ Jehová amo kineki ma tijtekipanokaj san pampa technauatiaj (2 Corintios 9:7). ¿Kipaktiskia se tetaj ma kiiljui ikone “tlauel nimitsiknelia” san pampa kinauatiaj, o pampa ika nochi iyolo kineki kiiljuis? Uajka ximotlajtlani: “¿Tlake nijtlapejpenis nijchiuas?”. Satanás, Adán uan Eva kitlapejpenijkej kichiuasej tlen amo kuali pampa kiijixnamijkej Jehová. ¿Uan ta tlake tijchiuas?

²¹ Ta uelis kuali tijtlapejpenis tlen tijchiuas ipan monemilis. Uelis tijchiuas kej katli kitekipanouaj Jehová. Inijuantij kichiuaj ma yolpaki toTeotsij pampa kinextiaj Satanás san istlakati uan amo kuali tlanauatia (Proverbios 27:11). Ta nojkia uelis tijtlapejpenis tijchiuas tlen kuali. Ipan seyok tlamachtili moixtomas tlake nopa tlamantli.