1, 2. Matambujiko o mushovonyi ari kusongana no vandhu nyamasi uno?

PASURE po kuhwisana kukuru mu nyika yakasakajwa ngo hondo, zviuru no zviuru zvo vanakaji no vana vadoko vacaingepi varhwi vakaurawa, vocihwa pa guva rimwe basi rainga rakatendenejwa ngo zviphambano. Ciphambano cimwe nga cimwe caitahwa kuti: “Ngenyi?” Nguva jimweni uwu ungava mubvunjo unohwaja maningi vandhu vese. Vandhu vanouita mukusuruvara pavanovona hondo, ngozi, ndhendha, kana kuti magandanga eciuraya vadiwa vavo, zveciparaja muzi wavo, kana kuti zvecivaviisira ngozi jicikanangiki. Ivona vanoda kuziva kuti ngenyi ngozi iji jinoitika.

² Ngenyi Mwari anotendera matambujiko? Kudari Jehovha Mwari ari wo masimba ese, ano rudo, ano uzivi no urungami, waro ngenyi nyika yakazara ngo uzondi no kutama urungami? Makambotambujikavo pacenyu ngo zviro izvi here?

3, 4. (a) Zvicinyi zvinovonesa kuti azvizivi kushata kubvunjisa kuti ngenyi Mwari anotendera matambujiko? (b) Jehovha anozwa kudini ngo pamusoro po ushati no matambujiko?

³ Zvakashata here kubvunjisa kuti ngenyi Mwari anotendera  matambujiko? Vamweni vanorangarira kuti vanoita mubvunjo jakadari avana gonda rakakwana, kana kuti vari kuvonesa kuti avareremeji Mwari. Kaveta pamunonga meciverenga Bhaibheri, munozovona kuti vandhu vakagondeka, vanothya Mwari vaingavo vano mubvunjo jakadaro. Inga muezaniso, Muporofita Habhakuki wakabvunjisa Jehovha kuti: “Ngenyi munondivonesa bzakaxata, munosotesesa vandhu vakaxupwa? Kuba no kujipa kuri pambeji pangu; vandhu vanopopana no kuhwisana!”—Habakuki 1:3.

⁴ Jehovha wakatuka Habhakuki here ngo ndava yo mubvunjo uwu? Haiwa. Kunja ko kudaro, Mwari wakabatanija masoko o mwoyo wese a Habhakuki mu matahwa akafemehwa o mu Bhaibheri. Mwari wakamubeseravo kuti ave no zwisiso yakajeka ngo pamusoro po shwiroyo zve kuti awane rutendo hwakakura. Jehovha anoda kuitavo zvondhozvo na imwimwi. Mucakanganwa kuti, Bhaibheri rinojijisa kuti “Yena anozomukorondha.” (1 Pedru 5:7) Mwari anozonda ushati no matambujiko anobahwa ndihwona kupinda ciri cese. (Isaia 55:8, 9) Waro, ngenyi mu nyika makazara maningi ngo matambujiko?

5. Ngorapi thangwe rinoshandiswa kuitira kudurujira kuvepo ko matambujiko o vandhu, asi Bhaibheri rinojijisenyi?

⁵ Vandhu vo zviara zvakasiyana-siyana vakaenda ku vatungamiriri no vajijisi vavo koovabvunjisa kuti ngenyi kunomatambujiko akawandisa kudari. Kazinji vanopinguhwa kuti matambujiko, kuda ka Mwari zve kuti iyena wakatozvisunga kare kuti zvaizoitika, kubatanija zviitiko zvo ngozi. Vazinji vakabvunjwa kuti maitiro a Mwari aadurujiriki kana kuti anoviisa rufu ku vandhu—pikija hwo zvivana—kuitira kuti ave navo kudenga. Inga zvamakajija, Jehovha Mwari aazomboitisi zvakashata. Bhaibheri rinoti: “Mwari aaiti bzakaxata kamare! Nyakukwanisa bzese aaxaixi.”—Jobe 34:10.

6. Ngenyi vandhu vazinji vanokanganisa pa vanopumbha Mwari ngo matambujiko o munyika ino?

⁶ Munozviziva kuti ngenyi vandhu vari kukanganisa pavanopumbha Mwari ngo matambujiko ese o mu nyika? Kazinji, vanopumbha Mwari wo Masimba ese ngo kuti vanorangarira kuti ndiyena mutongi kamare wo nyika ino. Ivona avazivi zvokwadi yakareruka zve inosisira maningi inojijiswa ngo Bhaibheri. Makaijija cokwadi iyi mu Cipauko 3 co bhuku rino. Mutongi wo nyika ino kamare ndi Sathana Dhiabhu.

7, 8. (a) Nyika inokhombijisa kudini undhu hwo mutongi wayo? (b) Kutama kukwana ko vandhu pomwe no ‘mukuvo no zvicikavetehwi zvinowira ku ari wese,’ zvinobarisa kudini matambujiko?

⁷ Bhaibheri rinonanga pambhene kuti: “Nyika yese yo pasi iri mu nyara ya Sathana.” (1 Johani 5:19) Azvina shwiro here pamunorangarira ngo pamusoro pazvo? Nyika ino inovonesa undhu hwo cisikwa co mujimu cicikavoneki uwo “mucengeji wo nyika yese yo pasi pano.” (Apokalipsi 12:9) Sathana muzondi, mucengeji zve no anocishatihwa. Ngo kudaro, nyika iri kutongwa ndiyena, yakazaravo ngo kuzonda, kucengeja, no cishatihwa. Iri ndirimwe ro thangwe rinoitisa kuti kuve no matambujiko akawandisa kudari.

 ⁸ Thangwe ro cipiri rinoitisa kuti kuve no matambujiko akawandisa kudari ngo ro kuti, inga zvatakabhuya mu Cipauko 3, vandhu vese avazivi kukwana zve vashaishi kundobvira pakatanga kupandukira mu munda wo Edheni. Vandhu vano zvishaishi vanohwa kuti vatonge vamweni, zve izvi zvinopejisira ngo hondo, kucikirirana, no matambujiko. (Mucumaeri 4:1; 8:9) Thangwe ro citatu ngo ndava yo matambujiko nga iri: ‘Mukuvo no zvicikavetehwi zvinowira ku ari wese.’ (Verenganyi Mucumaeri 9:11, NM.) Mu nyika icina Jehovha inga Mutongi anojivirira, vandhu vanotambujika ngo kuti vari pa ndau yakashata mu nguva yakashata.

9. Ngenyi tingava no cokwadi co kuti Jehovha ano thangwe rakanaka kuti atendere matambujiko arambe aripo?

⁹ Zvinonyaraja kuziva kuti Mwari aaitisi matambujiko. Iyena andiyepi mune wo hondo, uphanga, ubzinyiriri, pikija no ngozi jinoitika jega jinoitisa kuti vandhu vatambujike. Ticiri kundoda kuziva kuti, ngenyi Jehovha anoregerera matambujiko ese aya? Kudari iyena ari wo Masimba ese, ano simba ro kuzvipeja. Waro anorivigirenyi simbero? Mwari ano rudo watinoziva, ano thangwe rakanaka.—1 Johani 4:8.

10. Sathana wakaphikizenyi, zve wakazviitisa kudini?

¹⁰ Kuti tifumbhure thangwe rinoitisa kuti Mwari atendere matambujiko, tinodikana kumborangarira sure kwakatangira matambujiko. Sathana paakatungamirira Adhamu na Evha kuti vashaishire Jehovha, painga pecimuswa mubvunjo unosisira maningi. Sathana aacaiphikizepi simba ra Jehovha. Sathana anotoziva kuti simba ra Jehovha ariperi. Ngo kudaro, Sathana wakaphikiza kufanea kutonga ka Jehovha. Ngo kunanga kuti Mwari munyepi kutizve anonyima vandhu vake zviro zvakanaka, Sathana wakapumbha Jehovha kuti mutongi wakashata. (Verenganyi Genesi 3:2-5.) Sathana wakasima mu musoro mo vandhu  kuti vaizorarama ushoni vacikatongwi ndi Mwari. Kwainga kuhwisa ukuru-kuru hwa Jehovha, kufanea kutonga kwake.

11. Ngenyi Jehovha aazivi kuparaja vapanduki mu Edheni?

¹¹ Adhamu na Evha vakashaishira Jehovha. Zvokadi vakati: ‘Atidi kutongwa ndi Jehovha. Tingatema zvivaringo zvedu pacedu, zvakanaka no zvakashata.’ Jehovha wakainasiririsa kudini shwiro iyi? Jehovha waizojijisisa kudini zvisikwa zvese zvakangwara kuti vapanduki ndivona vainga vakashaisha zve kuti maitire ake ndiwona akanaka? Umweni angananga kuti Mwari waidikana kuparaja vapanduki ava zve oitazve ngapapsa. Asi Jehovha wakananga cidisiso cake co kuzaja pasi pano ngo vana va Adhamu na Evha, zve waida kuti vararame mu paradhiso pasi pano. (Genesi 1:28) Jehovha anokwanirisa cidisiso cake nguva jese. (Isaia 55:10, 11) Kunja kwa izvi, kuparaja vapanduki mu Edheni kwaizodari kucizivi kunasirira shwiro yainga yamuswa ngo pamusoro po kufanea kutonga ka Jehovha.

12, 13. Ipanyi muezaniso unokhombija kuti ngenyi Jehovha wakatendera Sathana kuti ave mutongi wo nyika ino zve ngenyi Mwari wakatenderazve kuti vandhu vajitonge pacavo.

¹² Ngatimbovona muezaniso uwu basi. Amborangariranyi kuti mujijisi ari kujijisa vajiji vake madurihwe o konta  inonesa maningi. Mujiji wakangwara asi naari mupanduki wonanga kuti majijisire o mujijisi akashata. Mupanduki uwu, wokhonderera kunanga kuti anoziva njira yaushoni yo kudura konta iyi kuti aeje kukhombija kuti mujijisi uwu aakwanisi kuidura. Vajiji vamweni votorangariravo kuti ndizvona zviri kunangari mupanduki uwu, no kudaro votopandukavo. Mujijisi uwu anodikana kuitenyi? Kudari akabudisa kunja mupanduki uwu, vajiji vamweni vaya vaizorangarira kudini? Avacaizodavirepi kuti ndizvona zvainangaya shamwari yavo yabudiswaya no vese vainga vapanduka here? Vajiji vese vaizoguma pa kutama kureremeja mujijisi uwu, vorangarira kuti iyena anonyangajwa kubvunjwa kuti izvi zvakashata. Asi ngatiti mujijisi watendera mupanduki kuti aende koovonesa madurire aangaita konta iyi pamberi po vajijidoni.

¹³ Jehovha wakaitavo zviro zvondhozvo zvaithwa ngo mujijisi uwu. Mucakanganwa kuti vapanduki vainga mu Edheni avacaingepi vega basi. Zviuru no zviuru zvo ngirozi zvainga zvecivona. (Jobe 38:7; Danieli 7:10) Zvaizoita Jehovha ku upandukiri uhu, zvaizopsasa ngirozi jese no zvisikwa zvese zvakangwara. Waro Jehovha wakaitenyi? Iyena wakatendera kuti Sathana akhombijire matongere aaizoita vandhu. Mwari wakatenderavo vandhu kuti vajitonge vega pacavo pasi po ndhungamiro ja Sathana.

14. I besero rapi rinobva pa civaringo ca Jehovha co kutendera kuti vandhu vajitonge pacavo?

¹⁴ Mujijisi wo mu muezaniso wedu waiziva kuti andizvopi zvainanga mupanduki no vajiji vaimuinikira. Asi, wakazivazve kuti kumupekeja cimukana kuti akhombijire vajiji vese mavonero ake zvaizobesera vese. Mu panduki paaizokonehwa, vajiji vese vakanaka vaizovona kuti mujijisi ndiyena ega basi anokwanisa kutungamirira vajiji. Vaizozwisisa mujijisi paaizobudisa mupanduki ari wese. Mukufananavo, Jehovha waiziva kuti ngirozi no vandhu vakanaka mwoyo vaizobesehwa ngo kuvona Sathana no vateveri vake pavanonga vecikonehwa zve vandhu vacikakwanisi kujitonga  pacavo. Inga Jeremia wo mu nguva yo kare, ivona vaizojija cokwadi ici: “Ndinoziva, [Jehovha], kuti mundhu asipi [mune] wo gwanja rake; kuti ecifamba aakwanisi kusana gwanja, raanoda!”—Jeremia 10:23.

15, 16. (a) Ngenyi Jehovha ari kutendera kuti matambujiko arambe aripo ko nguva yakareba? (b) Ngenyi Jehovha acikajiviriri zviro zvakashata zvakadari inga ngozi jakashata?

¹⁵ Ngenyi Jehovha wakatendera kuti matambujiko arambe aripo ko nguva yakareba? Zve ngenyi acikajiviriri kuti zviro zvakashata zvitame kuitika? Hina, ambovonanyi zviro zviviri zvicaizoithwepi ngo mujijisi wo pamuezaniso wedu. Cokutanga, iyena aacaizokamisepi mujiji wokupanduka wiya paanonga ecidura konta iya. Cocipiri, mujijisi aacaizobeserepi mupanduki uwu kudura konteyo. Mukufananavo, mecivonanyi zviro zviviri zvakasungwa ndi Jehovha kuti atame kuita. Cokutanga, iyena aazivi kukamisa Sathana no vari mu divi rake pavanonga vecieja kukhombija kuti ndivona vakanaka. Kusiya nguva yakanaka zvinova zvecisisira. Mukati mo zviuru zvo makore o ndhorondho yo vandhu, vandhu vaeja ngo simba rese kujitonga venga, kana utongi hwo vandhu. Vandhu vakatobudirira mu zvo siensia, no mativi amweni asi kutama kurungama, urombo, uphanga no hondo zviri kuengejeka pikija kutonyanyisa. Wari uno utongi hwo vandhu hwavonesa kuti huri kukonehwa.

¹⁶ Cocipiri, Jehovha aaripi kubesera Sathana kutonga nyika ino. Kudari Mwari naaijiva padoko zvakashata, azvicaizoitepi inga kuti vapanduki vainga vecibhuya gunyiso here? Mwari aacaizoitisepi kuti vandhu varangarire kuti vangakwanisa kujitonga vega pacavo vacikajiviisiri matambujiko here? Jehovha naakazviita waizonga ecibesera manyepo. Kaveta “Mwari aakwanisi kunyepa.”—Vaheberi 6:18.

17, 18. Jehovha anozoitenyi kuno zvakamosheka zvese zvakaviiswa ngo utongwi hwo vandhu zve vecibesehwa ndi Sathana?

¹⁷ Tingati kudini no zvakamosheka zvese zvakaithwa kubvira pa kupandukira Mwari? Tinodikana kuceukija kuti Jehovha  ngo wo masimba ese. Ngo kudaro iyena anokwanisa zve anozohwirijazve zvese zvakaviiswa ngo matambujiko o vandhu. Inga zvatakajija, kumoshwa kuri kuithwa nyika kucada kuhwirijihwa ngo kucinja nyika kuti ive paradhiso. Muviyo wo cishaishi unozobviswa ngo gonda ro muripo wo kujipira wa Jesu, zve muviyo wo rufu unozocinjwa pecishandiswa rumuko. Mwari anozoshandisa Jesu kuti “afujure mabasa a Sathana.” (1 Johani 3:8) Jehovha anozokwanirisa zvese izvi pa nguva kwayo. Tinodakara kuti iyena aazivi kukasikira kuita ciito, ngo kuti kusengerera kwake kwatipa mukana wo kuti tijije cokwadi zve kuti timushandire. (Verenganyi 2 Pedru 3:9, 10.) Munguva iyi Mwari ari kupsaka vandhu vanonamata no mwoyo wese zve ovabesera kucungirira matambujiko angavawira mu nyika ino yakashata.—Johani 4:23; 1 VaKorinto 10:13.

¹⁸ Vamweni vangabvunjisa kuti: Matambujiko ese aya aizojivika here kudari Mwari naakasika Adhamu na Evha mu njira yokuti Vatame kupanduka? Kuti mudavire mubvunjo uwu, munodikana kurangarira cipo cinosisira camakapuwa ndi Jehovha.

19. Cipo capi cinosisira maningi catakapuwa ndi Jehovha?

¹⁹ Inga zvatakavona mu Cipauko 5, vandhu vakasikwa no rusununguko hwo kuzvikhetera. Munozwisisa kuti icipo cinosisira zvakadini here? Mwari wakasika zvinyama zvicikaverengeki, zve zvinotungamirihwa ngo simba ro cibarihwe. (Mazwi Akangwara 30:24) Mundhu wakaita mucini unoita basi zvawakaitihwaro.Taizodakara here kudari Mwari naakatiita inga mucini? Haiwa, tinodakara kuti tino  rusununguko hwo kukheta kuti tinoda kuva mundhu wo mushovonyi, mararamire atinoda, ushamwari hwatinoda no zvimwenivo. Tinodakarira kuva no rusununguko hwakati kuti, zve izvi ndizvona zvaanoda Mwari kuti tibuse.

20, 21. Tingashandisisa kudini cipo co rusununguko hwo kuzvikhetera mu njira inobesera, zve ngenyi tinodakarira kuita kudaro?

²⁰ Jehovha aadakariri basa rinoithwa ngo kuvangirijwa. (2 VaKorinto 9:7) Muezaniso: Ngozvapi zvaizodakajisa maningi mubari—mwana wake paanoti “Ndinomuda maningi”? Ndi paya po kuti mwana uwu waita ngo kubvunjwa kuti anange kudaro kana kuti paanozvinanga ega zvecibva pa mwoyo? Ngo kudaro zvinosisira kuvona mubvunjo uwu: Imwimwi munozoushandisisa kudini rusujunuko hwamakapuwa ndi Jehovha? Sathana, Adhamu na Evha vakaushandisa mu njira yakashatisisa. Ivona vakaramba Jehovha Mwari. Imwimwivo munozoitenyi?

²¹ Muno mukana wo kushandisa cipo cinosisira ici co rusununguko hwo kuzvikhetera mu njira inobesera. Mungatobatana na vese vayani vari kubesera divi ra Jehovha. Vanodakajisa Mwari ngo kuti vanovangisira kuti vakhombije kuti Sathana munyepi zve mutongi wakonehwa zvinoita no kupseruja. (Mazwi Akangwara 27:11) Imwimwivo mungazviita ngo kukheta upenyu hwakanaka. Izvi zvinozosananguhwa mu cipauko cinotevera.