1, 2. Ke tlaišego ya mohuta ofe yeo batho ba lebeletšanego le yona lehono, e lego seo se dirago gore ba bantši ba ipotšiše dipotšišo dife?

KA MORAGO ga ntwa ya masetla-pelo nageng e nngwe yeo e hlagaditšwego ke ntwa, basadi le bana ba dikete ba naga yeo bao ba bolailwego ba ile ba bolokwa lebitleng leo go bolokelwago batho ba bantši leo le bego le dikologilwe ke maswao a difapano. Leswao le lengwe le le lengwe le be le e-na le mantšu a rego: “Ke ka baka la’ng?” Ka dinako tše dingwe yeo ke potšišo e kwešago bohloko kudu go di feta ka moka. Batho ba e botšiša ba nyamile ge ntwa, masetla-pelo, bolwetši le bosenyi di bolaya baratiwa ba bona bao ba se nago molato, di senya magae a bona goba di ba tlišetša tlaišego e kgolo ka ditsela tše dingwe. Ba nyaka go tseba lebaka leo ka lona ba welwago ke masetla-pelo a bjalo.

² Ke ka baka la’ng Modimo a dumelela tlaišego? Ge e ba Jehofa Modimo ke yo matla-ohle, yo lerato, yo bohlale le yo a lokilego, ke ka baka la’ng lefase le tletše kudu ka lehloyo le go hloka toka? Na wena o kile wa ipotšiša ka dilo tše?

3, 4. (a) Ke’ng seo se bontšhago gore ga se phošo go botšiša gore ke ka baka la’ng Modimo a dumelela tlaišego? (b) Jehofa o ikwa bjang ka bokgopo le tlaišego?

³ Na go fošagetše go botšiša gore ke ka baka la’ng Modimo a dumelela tlaišego? Ba bangwe ba tshwenyega ka gore go botšiša  potšišo e bjalo go bolela gore ga ba na tumelo e lekanego goba go bolela gore ba bontšha go se hlomphe Modimo. Lega go le bjalo, ge o bala Beibele o tla hwetša gore batho ba botegago bao ba boifago Modimo ba ile ba botšiša dipotšišo tše swanago. Ka mohlala, moporofeta Habakuku o ile a botšiša Jehofa gore: “O re’ng Ò ntesa kè lebane le bobe? O dula Ò bôna kè hlaka, kè lebane le thlakolô le sehloxo, xò tsoxa ntwa, xò hlaxa phapang?”—Habakuku 1:3.

⁴ Na Jehofa o ile a kgalemela moporofeta Habakuku yo a botegago ka baka la go botšiša dipotšišo tše bjalo? Aowa. Go e na le moo, Modimo o ile a akaretša mantšu a Habakuku a tšwago pelong ka pegong ya Beibele e buduletšwego. Modimo gape o ile a mo thuša gore a kwešiše ditaba gabotse gotee le gore a be le tumelo e matla. Jehofa o nyaka go go direla se se swanago. Gopola, Beibele e ruta gore ‘o a go hlokomela.’ (1 Petro 5:7) Modimo o hloile bokgopo le tlaišego yeo e bo bakago go feta kamoo motho le ge e le ofe a bo hloilego. (Jesaya 55:8, 9) Ka gona, ke ka baka la’ng go e-na le tlaišego e kaakaa lefaseng?

5. Ke mabaka afe ao ka dinako tše dingwe a newago e le go hlalosa tlaišego ya batho, eupša ke’ng seo Beibele e se rutago?

⁵ Batho ba madumedi a fapa-fapanego ba ile go baetapele  ba bona ba bodumedi le baruti go botšiša lebaka leo ka lona go nago le tlaišego e kaakaa. Gantši, karabo ke gore tlaišego ke thato ya Modimo le gore ke kgale a rulagantše dilo ka moka tšeo di bego di tla direga, go akaretša le ditiragalo tša masetla-pelo. Ba bantši ba botšwa gore ditsela tša Modimo ga di hlalosege goba gore o tliša lehu bathong—gaešita le go bana—e le gore a be le bona kua legodimong. Lega go le bjalo, ka ge o ithutile, Jehofa Modimo le ka mohla ga a bake seo e lego se sebe. Beibele e re: “Modimo ó kxolê le bokxôpô; Yo-matla-ohle ó kxolê le xo foša.”—Jobo 34:10.

6. Ke ka baka la’ng batho ba bantši ba dira phošo ya go bea Modimo molato ka baka la tlaišego ye e lego gona lefaseng?

⁶ Na o tseba lebaka leo batho ba dirago phošo ya go bea Modimo molato ka baka la tlaišego ka moka yeo e lego lefaseng? Mabakeng a mantši, ba bea Modimo yo Matla ohle molato ka gobane ba nagana gore ke mmuši wa kgonthe wa lefase le. Ga ba tsebe therešo e bonolo eupša e le e bohlokwa yeo Beibele e e rutago. O ithutile therešo yeo go Kgaolo 3 ya puku ye. Mmuši wa kgonthe wa lefase le ke Sathane Diabolo.

7, 8. (a) Lefase le bonagatša bjang semelo sa mmuši wa lona? (b) Go se phethagale ga batho le “nako le ditiragalo tše di sa letelwago” di feleleditše bjang ka tlaišego?

⁷ Beibele e bolela ka mo go kwagalago gore: “Lefase ka moka le rapaletše matleng a yo kgopo.” (1 Johane 5:19) Ge o nagana ka taba ye, na ga e kwagale? Lefase le le bonagatša semelo sa sebopiwa se se sa bonagalego sa moya seo se “timetšago lefase ka moka le go agilwego go lona.” (Kutollo 12:9) Sathane o na le lehloyo, ke wa maaka e bile ke yo šoro. Ka gona ka ge lefase le le ka tlase ga tutuetšo ya gagwe, le tletše lehloyo, bofora le bošoro. Leo ke lebaka le lengwe leo ka lona go nago le tlaišego e kaakaa.

⁸ Lebaka la bobedi leo ka lona go nago le tlaišego e kaakaa ke gore, ka ge go ahla-ahlilwe go Kgaolo 3, batho e be e dutše e le ba sa phethagalago le ba sebe ga e sa le go tloga borabeleng kua tšhemong ya Edene. Batho ba sebe ba sekametše go lweleng go buša, gomme se se feleletša ka dintwa, kgatelelo  le tlaišego. (Mmoledi 4:1; 8:9) Lebaka la boraro leo ka lona go nago le tlaišego ke “nako le ditiragalo tše di sa letelwago.” (Mmoledi 9:11, NW) Lefaseng leo go lona Jehofa e sego Mmuši yo a šireletšago, batho ba ka tlaišega ka gobane go direga gore ba be lefelong le le fošagetšego ka nako e fošagetšego.

9. Ke ka baka la’ng re ka kgodišega gore Jehofa o na le lebaka le le kwagalago la go dumelela tlaišego gore e tšwele pele?

⁹ Go a re homotša go tseba gore Modimo ga a bake tlaišego. Ga se yena a bakago dintwa, bosenyi, kgatelelo goba gaešita le dikotsi tša tlhago tšeo di dirago gore batho ba tlaišege. Go dutše go le bjalo, re nyaka go tseba gore, Ke ka baka la’ng Jehofa a dumelela tlaišego ye ka moka? Ge e ba e le Yo matla-ohle, o na le matla a go e thibela. Ka gona, ke ka baka la’ng a sa diriše matla ao? Modimo yo lerato yo re mo tsebago o swanetše go ba a e-na le lebaka le le kwagalago.—1 Johane 4:8.

10. Sathane o ile a hlohla eng, gomme bjang?

¹⁰ E le gore re tsebe lebaka leo ka lona Modimo a dumelelago tlaišego, re swanetše go gopola morago kua nakong ya ge tlaišego e thoma. Ge Sathane a be a dira gore Adama le Efa ba se kwe Jehofa, potšišo e bohlokwa e ile ya rotošwa. Sathane ga se a ka a hlohla matla a Jehofa. Gaešita le Sathane o a tseba gore matla a Jehofa ke a sa lekanywego. Go e na le moo, Sathane o ile a hlohla tshwanelo ya Jehofa ya go buša. Ka go bitša Modimo gore ke moaketši yo a timago bahlanka ba gagwe dilo tše dibotse, Sathane o ile a bea Jehofa molato wa gore ke mmuši yo mobe. (Genesi 3:2-5) Sathane o be a bolela gore batho ba be ba tla phela gabotse ka ntle le go bušwa ke Modimo. Se e be e le go hlasela bogoši bja Jehofa, tshwanelo ya gagwe ya go buša.

11. Ke ka baka la’ng Jehofa a se a fo fediša marabele kua Edene?

¹¹ Adama le Efa ba ile ba rabela malebana le Jehofa. Ge e le gabotse, ba ile ba re: ‘Ga re nyake gore Jehofa e be Mmuši wa rena. Re ka kgona go bona ka noši seo e lego se se nepagetšego le seo e lego se se fošagetšego.’ Jehofa o be a ka rarolla bjang  kgang ye? O be a ka ruta bjang dibopiwa ka moka tše bohlale gore marabele a be a fošitše le gore tsela ya gagwe ke yona e di phalago e le ka kgonthe? Yo mongwe a ka bolela gore Modimo nkabe a ile a fo fediša marabele gomme a thome dilo gabotse ka bofsa. Eupša Jehofa o be a boletše morero wa gagwe wa gore lefase le tlale ka bana ba Adama le Efa, e bile o be a nyaka gore ba phele paradeiseng ya lefaseng. (Genesi 1:28) Jehofa ka mehla o phethagatša merero ya gagwe. (Jesaya 55:10, 11) Go oketša moo, go fediša marabele kua Edene nkabe go se gwa araba potšišo yeo e bego e rotošitšwe mabapi le tshwanelo ya Jehofa ya go buša.

12, 13. Bontšha lebaka leo ka lona Jehofa a dumeletšego Sathane gore e be mmuši wa lefase le le gore ke ka baka la eng Modimo a dumeletše batho gore ba ipuše.

¹² Anke re ele hloko seswantšho se se latelago. A re re morutiši o botša barutwana ba gagwe kamoo ba swanetšego go rarolla palo e thata ka gona. Morutwana yo bohlale eupša e le lerabele o bolela gore tsela ya morutiši ya go rarolla palo e fošagetše. Go bontšha gore morutiši ga a kgone, lerabele le le gatelela gore le tseba tsela e kaone kudu ya go rarolla palo ye. Barutwana ba bangwe ba nagana gore le nepile, gomme  le bona ba thoma go rabela. Ke’ng seo morutiši a swanetšego go se dira? Ge a ka raka marabele ka klaseng, seo se tla kgoma bjang barutwana ba bangwe? Na ba ka se dumele gore morutwana-gotee le bona gotee le bao ba mo thekgago ba nepile? Barutwana ba bangwe ka moka ka klaseng ba ka no thoma go se sa hlompha morutiši, ba nagana gore o tšhaba go botšwa gore o fošitše. Eupša a re re morutiši o dumelela lerabele gore le bontšhe barutwana kamoo lona le ka rarollago palo ka gona.

¹³ Jehofa o dirile se se swanago le seo morutiši a se dirago. Gopola gore marabele kua Edene ga se wona feela ao a bego a akaretšwa. Barongwa ba dimilione ba be ba bogetše. (Jobo 38:7; Daniele 7:10) Tsela yeo Jehofa a bego a tla swaragana le borabele e be e tla kgoma kudu barongwa bao ka moka gomme mafelelong ya kgoma le dibopiwa ka moka tše bohlale. Ka gona, Jehofa o dirile’ng? O dumeletše Sathane gore a bontšhe kamoo a tlago go buša batho ka gona. E bile Modimo o dumeletše batho gore ba ipuše ka tlase ga tlhahlo ya Sathane.

14. Ke mohola ofe wo o tlago go tlišwa ke phetho ya Jehofa ya go dumelela batho gore ba ipuše?

¹⁴ Morutiši yo a lego seswantšhong sa rena o a tseba gore lerabele le barutwana bao ba le thekgago ba fošitše. Eupša gape o tseba gore go ba nea sebaka sa gore ba leke go hlatsela ntlha ya bona go tla hola barutwana ka moka ka klaseng. Ge marabele a palelwa, barutwana ka moka bao ba botegago ba tla bona gore morutiši ke yena feela yo a swanelegago gore a ka ruta klase. Ba tla kwešiša lebaka leo ka lona morutiši ka morago a rakago marabele le ge e le afe ka phapošing. Ka mo go swanago, Jehofa o a tseba gore batho ka moka bao ba botegago le barongwa ba tla holwa ke go bona gore Sathane le marabele-gotee le yena ba paletšwe gotee le gore batho ba ka se kgone go ipuša. Go swana le Jeremia wa bogologolo, ba tla ithuta therešo ye e bohlokwa: “Morêna, ke a tseba; motho tsela y’axwe xa’ e buše; le monna mo a yaxo xa’ ikiše, le xe a xata a tiiša.”—Jeremia 10:23.

15, 16. (a) Ke ka baka la’ng Jehofa a dumeletše tlaišego gore e tšwele pele ka nako e telele gakaakaa? (b) Ke ka baka la’ng Jehofa a se a ka a thibela dilo tše di swanago le ditiro tše di boifišago tša bosenyi?

¹⁵ Lega go le bjalo, ke ka baka la’ng Jehofa a dumeletše tlaišego gore e be gona ka nako e telele gakaakaa? Le gona ke ka baka la’ng a sa thibele dilo tše mpe gore di se ke tša direga? Go ba gona, ela hloko dilo tše pedi tšeo morutiši wa seswantšhong sa rena a bego a ka se di dire. Sa mathomo, o be a ka se thibele morutwana wa lerabele gore a tšweletše tharollo ya gagwe. Sa bobedi, morutiši o be a ka se thuše lerabele gore le nee tharollo ya lona. Ka mo go swanago, ela hloko dilo tše pedi tšeo Jehofa a ikemišeditšego go se di dire. Sa mathomo, ga se a thibela Sathane le bao ba mo thekgago go lekeng go hlatsela gore ba nepile. Go dumelela nako gore e fete le gona go be go dutše go nyakega. Nywageng e dikete ya histori ya batho, batho ba be ba dutše ba kgona go leka mekgwa ka moka ya go ipuša, goba pušo ya batho. Batho ba dirile ditšwelopele tše itšego go tša thutamahlale le dikarolong tše dingwe, eupša go hloka toka, bodiidi, bosenyi le ntwa di oketšegile le go feta. Pušo ya motho ga bjale e bontšhitše gore e a palelwa.

¹⁶ Sa bobedi, Jehofa ga se a thuša Sathane go buša lefase le. Ka mohlala, ge nkabe Modimo a be a thibetše ditiro tše di boifišago tša bosenyi, na ge e le gabotse o be a ka se be a thekga taba ya marabele? Na Modimo o be a tla be a sa dire gore batho ba nagane gore mohlomongwe batho ba ka ipuša ka ntle le ditla-morago tše di senyago kudu? Ge e ba Jehofa o be a tla dira ka tsela yeo, o be a tla ba le karolo maakeng. Lega go le bjalo, ga go ‘kgonege gore Modimo a aketše.’—Ba-Hebere 6:18.

17, 18. Ke’ng seo Jehofa a tlago go se dira mabapi le tshenyo ka moka yeo e bilego gona ka baka la pušo ya batho le tutuetšo ya Sathane?

¹⁷ Lega go le bjalo, go thwe’ng ka tshenyo e kgolo yeo e bilego gona nakong ya borabele bjo bo tšerego nako e telele malebana le Modimo? Re swanetše go gopola gore Jehofa ke yo matla-ohle. Ka gona, a ka kgona e bile o tla dirolla ditla-morago  tša tlaišego ya batho. Ka ge re šetše re ithutile, go senywa ga polanete ya rena go tla lokišwa ka go dirwa ga lefase gore e be Paradeise. Mafelelo a sebe a tla tlošwa ka go dumela sehlabelong sa Jesu sa topollo, gomme mafelelo a lehu a tla dirollwa ka tsogo. Ka gona Modimo o tla diriša Jesu “go fediša mediro ya Diabolo.” (1 Johane 3:8) Jehofa o tla tliša dilo tše ka moka ka nako e swanetšego tlwaa. Re a thaba gore ga se a tšea kgato ka pela, ka gobane go se fele pelo ga gagwe go re neile sebaka sa go ithuta therešo le go mo hlankela. (2 Petro 3:9, 10) Go sa letilwe nako yeo, Modimo o be a dutše a tsoma ka mafolofolo barapedi ba kgonthe gomme a ba thuša go kgotlelela tlaišo le ge e le efe yeo e ka ba tlelago lefaseng le la mathata.—Johane 4:23; 1 Ba-Korinthe 10:13.

¹⁸ Ba bangwe ba ka botšiša, Na tlaišego ye ka moka e ka be e thibetšwe ge nkabe Modimo a ile a bopa Adama le Efa ka tsela yeo e lego gore ba be ba ka se rabele? Gore o arabe potšišo yeo, o swanetše go gopola mpho e bohlokwa yeo Jehofa a go neilego yona.

19. Ke mpho efe e bohlokwa yeo Jehofa a re filego yona, gomme ke ka baka la’ng re swanetše go e tšeela godimo?

¹⁹ Ka ge go lemogilwe go Kgaolo 5, batho ba bopilwe ba na le tokologo ya go ikgethela. Na o lemoga kamoo mpho ye e lego bohlokwa ka gona? Modimo o dirile diphoofolo tše di sa balegego, gomme tše di laolwa kudu ke tlhago. (Diema 30:24) Motho o dirile diroboto tše itšego tšeo di rulagantšwego gore di latele taelo e nngwe le e nngwe. Na re be re tla thaba ge e ba Modimo a be a re dirile ka tsela yeo? Aowa, re thabela go ba le tokologo ya go dira dikgetho mabapi le mohuta wa motho yo  re nyakago go ba yena, tsela ya bophelo yeo re nyakago go e phegelela, bogwera bjo re nyakago go bo bopa le tše dingwe. Re rata go ba le tekanyo e itšego ya tokologo, gomme se ke seo Modimo a nyakago gore re se thabele.

20, 21. Re ka diriša bjang gakaone kudu mpho ya tokologo ya go ikgethela, gomme ke ka baka la’ng re swanetše go nyaka go dira bjalo?

²⁰ Jehofa ga a thabele tirelo yeo e dirwago ka kgapeletšo. (2 Ba-Korinthe 9:7) Ka mohlala: Ke’ng seo se ka thabišago motswadi kudu—ke ge ngwana a re “Ke a leboga” e le ka gobane a botšwa gore a dire bjalo goba a bolela bjalo a lokologile go tšwa pelong? Ka gona potšišo ke gore, O tla diriša bjang tokologo ya go ikgethela yeo Jehofa a go neilego yona? Sathane, Adama le Efa ba dirišitše gampe tokologo ya go ikgethela. Ba ile ba gana Jehofa Modimo. Ke’ng seo wena o tlago go se dira?

²¹ O na le sebaka sa go diriša gakaone kudu mpho e kgahlišago ya tokologo ya go ikgethela. O ka kopanela le dimilione tša bao ba emego ka lehlakoreng la Jehofa. Ba thabiša Modimo ka gobane ba tšea karolo ka mafolofolo go hlatseleng Sathane e le wa maaka le go palelwa ga gagwe mo go nyamišago bjalo ka mmuši. (Diema 27:11) Le wena o ka dira seo ka go kgetha tsela e swanetšego ya bophelo. Se se tla hlaloswa kgaolong e latelago.