1, 2. Soangen lokolok dah kei me aramas kan kin lelohng rahnwet? Soangen peidek dah kan me aramas tohto kin pwunodikihda?

MWURIN mahwen ehu wiawi nan sahpw ehu me ohkihlahr mahwen, lih oh seri kid kei me sohte wia sounpei melahr, oh irail lekdekpenehte nan ehu lapalahn pwoar oh seridi. Oh lohpwu kan poad pohn wasa me pwoar wet mi ie, oh mie nting kan pohn ehuehu lohpwu pwukat me nda: “Dahme kahrehda?” Aramas akan kin wia peidek wet pwehn kasalehda arail pahtou ni ahnsou me kahpwal kan wiawihong irail oh re sohte wehwehki ia kahrepe. Aramas pahtoulahr akan kin wia peidek wet ni ahnsou me mahwen, soumwahu, kauwehla kosonned oh kahpwal teikan kahrehda mehlahn kompoakparail, ohlahn imwarail akan, de pil soangsoangen lokolok teikan. Irail kin men ese dahme kahrehda kahpwal pwukat kin lelohng irail.

² Dahme kahrehda Koht kin ketin mweidohng lokolok pwukat en mihmihte? Ma iei Siohwa Koht sapwellimaniki manaman unsek, limpoak, erpit, oh irair en pwung pahrek, dahme kahrehda sampah nohn direkihla kailok oh koasoandi sapahrek kan? Ia duwe, mie pak me ke pwunodikihda soahng pwukat?

3, 4. (a) Dahme kasalehda me e sohte sapwung en peidengki dahme kahrehda Koht ketin mweidohng lokolok en mihmihte? (b) Ia sapwellimen Siohwa pepehm ong wiewia suwed oh lokolok en aramas?

 ³ Ia duwe, e sapwung kitail en peidengki dahme kahrehda Koht ketin mweidohng lokolok en mihmihte? Ekei kin perki pwe dene ma irail wia soangen peidek wet, met kin kasalehda me arail pwoson me tikitik, de e pil kak wehwehki me irail kin lahlahwe Koht. Ahpw ni ahnsou me ke pahn wadek Paipel, ke pahn diarada me aramas me kin pwoson oh wauneki Koht pil kin ahneki soangen peidekohte. Karasepe, soukohp Apakuk patohwanohng Siohwa: “Dahme komw ketin mweidkihong ie I en patopatohwan soangen sapwung oh suwed pwukat? Ia duwen omwi kak ketin kanengamahiong mahmahsanih soangen wiewia suwed wet? Apwal laud kin kapiliepene, akamai oh pei kin wiewiawi wasa koaros.”​—Apakuk 1:3.

⁴ Ia duwe, Siohwa ketin engiengda pahn soukohp lelepek Apakuk pwehki eh wia peidek pwukat? Soh. Me weksang met, Koht ketikihdiong ahn Apakuk lokaia kan en ntingdi nan Paipel. Koht pil ketin sewese Apakuk en wehwehki mwahu mehkan oh kalaudehla eh pwoson. Siohwa kupwurki wia soahngohte ong uhk. Tamataman, Paipel padahngki me “eh kin ketin apwahpwalih” iuk. (1 Piter 5:7) Koht kin ketin kalahdeki wiewia suwed oh lokolok me wiewia suwed kin kahrehda, laud sang ahn aramas ar kin kailongki mepwukat. (Aiseia 55:8, 9) Ahpw dahme kahrehda lokolok nohn mwuledengkihla nan sampah?

5. Soangen kahrepe dah kan me ekei kin kihda pwehn kasalehda kahrepen aramas ar kin lokolok? Ahpw dahme Paipel kin padahngki?

⁵ Aramas akan sang nan soangsoangen pelien lamalam kan kin kohla rehn arail kaun akan oh sounpadahk kan  oh kin idek rehrail dahme kahrehda lokolok nohn mwuledengki nan sampah. Pak tohto, re kin sapengki me dene lokolok pwukat iei kupwuren Koht oh e kin ketin koasoanehdier soahng koaros me pahn wiawi sangete kawao me pil iangahki kahpwal kan. Aramas tohto kin ale pasapeng me dene sapwellimen Koht ahl akan me nohn rir oh kitail sohte kak wehwehki. Oh dene Koht me kin ketin kahrehda mehlahn aramas iangahki seri kan pwe irail en kak iang mi reh nanleng. Ahpw duwen omw sukuhlkiher, Siohwa Koht sohte kin ketin kahrehda me suwed en wiawi. Paipel mahsanih: “Koht Wasa Lapalahpie sohte kin ketin wia me suwed; e sohte kin ketin kupwur sapahrek ong emen.”​—Sohp 34:12.

6. Dahme kahrehda aramas tohto kin sapwungala oh uhd ikidiki me Koht me ketin kahrehda lokolok nan sampah?

⁶ Ke ese dahme kahrehda aramas akan sapwungala oh uhd ikidiki me Koht me ketin kahrehda lokolok koaros nan sampah? Pak tohto irail kin ikidiki Koht Wasa Lapalahpie mepwukat pwehki irail kin lemeleme me ih me ketin kakaun sampah ahnsou wet. Irail sohte ese duwen ire mehlel ehu me mengei oh kesempwal me Paipel kin padahngki.  Ke sukuhlkiher ire mehlel wet nan Irelaud 3 en pwuhk wet. Uhdahn kaunen sampah wet iei Sehdan me Tepil.

7, 8. (a) Ia duwen sampah eh kin kasalehda mwekid oh madamadau en eh kaun? (b) Ia duwen soh unsek en aramas oh “pai suwed” ar kin kahrehda lokolok?

⁷ Paipel mahsanih ni sansal: “Sampah unsek mi pahn manaman en Me Suwedo.” (1 Sohn 5:19) Ma ke pahn medewehla met, e sou mehlel? Sampah wet kin kasalehda mwekid oh madamadau en ngehn menet me kin “pitipitih sampah pwon.” (Kaudiahl 12:9) Sehdan kin diren kailok, widing, oh lemei. Kahrehda sampah wet me mi pahn eh kaweid kin diren kailok, likamw, oh lemei. Iei ehu kahrepen lokolok eh nohn mwuledengki.

⁸ Kahrepe keriau me kahrehda lokolok eh nohn mwuledek, iei nin duwen kitail kilangehr nan Irelaud 3 en pwuhk wet, tohnsampah kan solahr unsek oh dipanlahr sangehr ahnsou me uhwong wiawi nan mwetuwel en Ihden. Aramas dipan akan kin kalapw siaiki ihs me pahn kaunda oh met kin imwikihla mahwen, limeidihd, oh lokolok. (Eklesiasdes 4:1; 8:9) Kahrepe kesiluh me kahrehda lokolok mie iei pwehki “paisuwed kin lelohng aramas koaruhsie.” (Wadek Eklesiasdes 9:11.) Nan sampah ehu me Siohwa sohte kin ketin apwalih nin duwen Kaun emen, aramas akan pahn kak lelohng lokolok ma re mi wasa ehu ni ahnsou me kahpwal wiawi wasao.

9. Dahme kahrehda kitail kak kamehlele me mie kahrepe mwahu me kahrehda Siohwa ketin mweidohng lokolok en mihmihte?

⁹ E kin kansenamwahu ong kitail en ese me Koht sohte kin ketin kahrehda lokolok. Kaidehn ih me kin ketin kahrehda mahwen kan, wiewiahn kauwehla kosonned kan, wiewia limeidihd kan, de kahpwal teikan me duwehte rerrer en sahpw me kin kahpwalihala mour en aramas akan. Ahpw kitail anahnehte ese, Dahme kahrehda Siohwa ketin mweidohng lokolok pwukat koaros en mihmihte? Ma  iei ih me Wasa Lapalahpie, e uhdahn sapwellimaniki manaman en irehdi lokolok kan. Eri dahme kahrehda e sohte ketin wia met? Koht limpoak men me kitail ese uhdahn pahn mie kahrepe mwahu ehu me kahrehda e ketin mweidala en mie lokolok.​—1 Sohn 4:8.

10. Dahme Sehdan peidengki? Ia mwomwen eh wia met?

¹⁰ Pwe kitail en kak diarada dahme kahrehda Koht ketin mweidohng lokolok en mihmihte, kitail anahne pwurehng katamando duwen ahnsou me lokolok tepin miehla. Ni ahnsou me Sehdan kahrehiong Adam oh Ihp en sapeikiong Siohwa, peidek kesempwal ehu pwaradahr. Sehdan sohte peidengki ma mie sapwellimen Siohwa roson de soh. Pwe Sehdan pil ese me sapwellimen Siohwa roson me inenen mwuledek oh sohte imwi. Ahpw dahme Sehdan peidengki iei ma Siohwa sapwellimaniki pwuhng en kaunda. Sang ni Sehdan eh karaunehki Koht me ih Koht likamw men oh e kin ketin kolasang sapwellime aramas akan mehkan me mwahu ong irail, Sehdan kin nda me Siohwa kaun suwed emen. (Wadek Senesis 3:2-5.) Mwomwen ahn Sehdan koasoi kasalehda me tohnsampah pahn kak kalaudehla arail nsenamwahu ma irail pahn uhtohrda sang sapwellimen Koht kaunda. Met wia uhwong ehu ong sapwellimen Siohwa pwuhng en kaunda.

11. Dahme kahrehda Siohwa sohte ketin kasohrehla irail akan me pelianda ih nan Ihden?

¹¹ Adam oh Ihp peliandahr Siohwa. Sang ni ara mwekid, ira kin nda: ‘Kita sohte anahne Siohwa en wia ata Kaun. Kita kak pein pilada dahme pwung oh dahme sapwung.’ Eri ia duwen Siohwa eh pahn kak ketin kapwungala ire wet? Ia duwen eh pahn kak ketin kasalehiong sapwellime tohnleng kan oh tohnsampah kan koaros me irail me pelianda Ih me sapwung oh me sapwellime ahl me  keieu mwahu? Ekei ele nda me Koht sou ketin kasohrehla irail me pelianda ih ni ahnsowohte oh ketin pwurehng kapikada aramas. Ahpw Siohwa ketin mahsaniher sapwellime koasoandi en kadirehkihla sampah kadaudok en Adam oh Ihp akan, oh e kupwurki irail en kousoan nan paradais nin sampah. (Senesis 1:28) Ahnsou koaros Siohwa kin ketin kapwaiada sapwellime koasoandi kan. (Aiseia 55:10, 11) Pil ehu, eh pahn ketin kasohrehla irail oko me pelianda ih nan Ihden sohte pahn sapengala peidek me pwarada me pid sapwellimen Siohwa pwuhng en kaunda.

12, 13. Menlau karasahda kahrepen Siohwa eh ketin mweidohng Sehdan en wia kaunen sampah oh ketin mweidohng aramas en kaunda pein irail?

¹² Kitail tehkpene karasaras ehu. Ia duwen ma sounpadahk en sukuhl emen padapadahkihong tohnsukuhl kan ia duwen ar kak rapahkihda pasapengpen wahntuhke apwal ehu. Ah emen tohnsukuhl me loalokong ahpw kin men uhwong sounpadahko, eri nda me ahn sounpadahko wiepen rapahkihda pasapengo me sapwung. Pwehn kasalehda me sounpadahko soakoahiek, tohnsukuhlo eri ngihtehtehki me e ese ehu elen rapahkihda pasapeng en  wahntuhkeo me mwahusang ahn sounpadahko. Eri ekei tohnsukuhl kan medemedewe me tohnsukuhl uhwongo me pwung, oh irail pil iang uhwongada sounpadahko. Dahme sounpadahko pahn wia? Ma e pahn kihieisang irail kan me uhwong sang nan wasahn sukuhlo, ia pahn madamadau en tohnsukuhl teikan? Irail sou pahn kamehlele me tohnsukuhlo oh ienge ko me pwung? Tohnsukuhl teikan koaros kakete sohla wauneki sounpadahko oh lemeleme me e perki re de kasalehda me e sapwung. Ahpw ia duwen ma sounpadahko mweidohng tohnsukuhl uhwongo en kasalehiong tohnsukuhl teikan ia duwen eh pahn rapahkihda pasapengo.

¹³ Siohwa ketin wia mehkot me rasehng dahme sounpadahko wia. Tamataman me kaidehn irail kante me pelianda Koht nan Ihden me iang pidada ire wet. Tohnleng rar (million) kei pil iang kilikilang dahme wiawio. (Sohp 38:7; Kaudiahl 5:11) Ia duwen Siohwa eh pahn ketin kapwungala uhwong me wiawio pahn inenen kamwakid laud madamadau en tohnleng kan oh pil tohnsampah kan me pahn miehla mwuri. Eri dahme Siohwa ketin wia? E ketin mweidohng Sehdan en kasalehda ia duwen eh pahn kaunda tohnsampah. Koht pil ketin mweidohng aramas akan en kakaun pein irail pahn kaweid en Sehdan.

14. Ia kamwahupen Siohwa eh ketin mweidohng aramas akan en kaunda pein irail?

¹⁴ Sounpadahk en sukuhl nan atail karasaraso ese me tohnsukuhl uhwongo oh irail me iangala ih me sapwung. Ahpw e pil ese me eh pahn kihong irail ahnsou mwahu en kasalehda dahme re lemeleme pahn wia kamwahu ehu ong tohnsukuhl kan koaros. Ahnsou me irail me uhwongo sohte pweida, tohnsukuhl mwahu koaros pahn kakehr kilang me sounpadahko kelehpw me ahneki koahiek en katanga wasahn sukuhlo. Mwurin mwo, irail pahn wehwehkier kahrepen sounpadahko eh pahn kihieisang  tohnsukuhl kan me kin uhwong ih nan wasahn sukuhlo. Ni soangen mwohmwohte, Siohwa mwahngih me e pahn wia kamwahu ong aramas mohngiong mehlel oh tohnleng kan koaros en kilang me Sehdan oh ienge soun uhwong kan sohte pweida oh me aramas sohte kak pein kaunirailda. Duwehte Seremaia, irail pahn sukuhlki ire mehlel kesempwal wet: “Maing KAUN, I ese me sohte mehmen me kaunda pein imwilahn eh mour; sohte aramas emen me kaunda pein eh mour.”​—Seremaia 10:23.

15, 16. (a) Dahme kahrehda Siohwa ketin mweidohng lokolok en mihmihte nan erein ahnsou reirei? (b) Dahme kahrehda Siohwa sohte ketin irehsang mehkan me duwehte tiahk en kauwehla kosonned akan en wiawi?

¹⁵ Ahpw, dahme kahrehda Siohwa ketin mweidohng lokolok en mihmihte ahnsou reirei? Dahme kahrehda e sohte ketin irehdi soahng suwed kan en wiawi? Eri, medewe duwen soahng riau me sounpadahk nan atail karasaraso sohte pahn wia. Keieu, e sohte pahn irehsang tohnsukuhl uhwongo en kasalehda mahs eh elen rapahkihda pasapengo. Keriau, sounpadahko sohte pahn sewese tohnsukuhl uhwongo en kasalehda me eh wiepeo me pwung. Ni soangen mwohmwohte, medewe soahng riau me Siohwa ketin koasoanehdi me e sohte pahn ketin wia. Keieu, e sohte ketin irehdihsang Sehdan oh irail kan me iangala ih en song kadehdehda me irail me pwung. Kahrehda e anahne ketin mweidohng irail ahnsou laud. Nan erein sounpar kid kei en poadopoad en aramas, tohnsampah songehr soangsoangen elen kaunda pein irail de soangsoangen koperment. Aramas akan wiahdahr soangen pweida kei nan palien sains oh pil pali teikan, ahpw koasoandi sapahrek, semwehmwe, kauwehla kosonned, oh mahwen kin inenen susuwedla. Ahnsou wet, e sansalehr me kaundahn aramas sohte pweida.

 ¹⁶ Keriau, Siohwa sohte ketin sewese Sehdan en kaunda sampah. Ma Koht pahn ketin irehsang tiahk en kauwehla kosonned en wiawi, e sou pahn ketikihda mehn kadehde me me pelianda ih me pwung? Koht sou pahn ketin wiahiong aramas akan en lemehiong me re kak kaunda pein irail oh sohte lelohng apwal? Ma iei sapwellimen Siohwa mwekid en met, e pahn wehwehki me e ketin iang utungada lamalam likamw wet. Ahpw “Koht me sohte kak ketin wiahda likamw.”​—Ipru 6:18.

17, 18. Dahme Siohwa pahn ketin wiahiong soangen lokolok oh kahpwal koaros me kohsang ni kaundahn aramas oh kaweid en Sehdan?

¹⁷ Ahpw dahme pahn wiawihong soangen lokolok oh kahpwal koaros me mi erein ahnsou reirei me uhwongo wiewiawi? Kitail en tamataman me Siohwa iei Koht Wasa Lapalahpie. Kahrehda e kak ketin kamwahwihala dahme lokolok kin wiahiong aramas, oh ih me e pahn ketin wia. Kitail sukuhlkiher me ohlahn sampah pahn onohnsapahlda ni ahnsou me e pahn wiahla Paradais. Kahpwal kan me dihp kin kahrehda pahn sohla ni aramas pwung kan ar pahn pwoson sapwellimen Sises meirong en pweipwei sapahl. Nsensuwed oh medek me mehla kin kahrehda pahn sohrala ni me melahr akan ar pahn iasada. Koht pahn uhd ketin doadoahngki Sises “en kauwehla doadoahk en Tepilo.” (1 Sohn 3:8) Siohwa pahn ketin wia mepwukat koaros ni ahnsou me keieu konehng. Kitail kak perenkihda me e sohte ketin mwadangete wia met. Sapwellime kanengamah me ketikihong kitail ahnsou mwahu en kak sukuhlki duwen padahk mehlel oh papah  ih. (Wadek 2 Piter 3:9, 10.) Ni ahnsowohte, Koht kin ketin raparapahki tohnkaudok mehlel kan oh kin ketin sewese irail en dadaurete pahn soangsoangen lokolok kan me kin lelohng irail nan sampah suwed wet.​—Sohn 4:23; 1 Korint 10:13.

¹⁸ Ele ekei pahn medemedewe oh nda, ‘Ma Koht ketin kapikada Adam oh Ihp ni soangen mwohmw ehu me ira sohte pahn kak pelianda ih, met sou pahn irehdi lokolok en dehr wiawi?’ Pwehn sapengala peidek wet, ke anahne tamataman kisakis kesempwal ehu me Siohwa ketikihong uhk.

19. Kisakis kesempwal dah me Siohwa ketikihong kitail? Dahme kahrehda kitail en kesempwalki met?

¹⁹ Irelaud 5 en pwuhk wet kasalehda me aramas akan kepikipikda oh mie arail saledek en wia pilipil. Ke kak kilang uwen kesempwal en kisakis wet? Koht ketin wiahda soangsoangen mahn akan. Koht ketin wiahda soangsoangen mahn akan oh irail kin mwekidkihte arail koasoandi en loale. Re sohte ahneki koahiek en pilada dahme pwung oh dahme sapwung. Aramas kin wiahda misihn kei (robot) me kin idawehn soahng koaros me koasoandi. Ia duwe, kitail pahn perenki ma Koht ketin wiahda kitail duwehte misihn (robot) pwukat? Soh. Kitail perenki atail ahneki saledek en pein pilada soangen aramas dah me kitail men wia, soangen elen mour dah me kitail pahn wiahiong pein kitail, de soangen aramas dah me kitail pahn kompoakepahnki, oh pil soangen pilipil teikan. Kitail kin perenki ahneki uwen saledek ehu me konehng oh iei met me Koht kin kupwurki ong kitail.

20, 21. Ia duwen atail kak doadoahngki kisakis en saledek en pilipil ni ahl me keieu mwahu? Dahme kahrehda kitail men wia met?

²⁰ Siohwa sohte kin ketin kupwurperenki atail papah ih  ma kitail kin wia met pwehki mie me kin iding kitail. (2 Korint 9:7) Karasepe: Dahme pahn keieu kaperenda pahpa de nohno men, nah seri men eh pahn nda “I poakepoake iuk” pwehki aramas emen me padahkihong ih en nda, de serio nda pwe e poakepoake sang nan eh mohngiong? Kahrehda iet peideken, Ia duwen omw pahn doadoahngki saledek en pilipil me Koht ketikihong uhk? Sehdan, Adam oh Ihp doadoahngki saledek en pilipil wet ni ahl me keieu suwed. Irail sohpeisang Siohwa. Dahme ke pahn wia?

²¹ Ke kak doadoahngki kisakis kaselel en saledek en pilipil wet ni ahl me keieu mwahu. Ke kak patehng aramas rar (million) kei me kin utung Siohwa. Irail kin kaperenda Koht pwehki re kin ngoangki iang kasalehda me Sehdan sounlikamw men me sohte pweida nan eh wia kaun emen. (Lepin Padahk 27:11) Ke pil kak iang wia met ni omw pahn pilada elen mour pwung. Irelaud en mwurin met pahn kawehwe duwen met.