1, 2. Xaa yannara mannu oosora hiikku dadillisanno coyi iillanno? Konnira duuchchu manni hiittee xaˈmo xaˈmanno?

MITTE olunni hembeelantanni keeshshitino gobbara waajjishanno oli kaeenna, olu giddora einokkihu kumunni kiirranni meentinna qaaqquulli goofino; konne meentonna qaaqquulle albaanni batinynye manna madaarroonnitera shiimmaadda masqalla doyissine qansoonni waammara mitteenni madaarri. Mittu mittunku masqali aana “Mayira?” yitanno borro no. Mannaho dadillisannori iillannonsa wote hakku qarri iillinonsahu mayiraatiro leella hooginsaro lowo geeshsha xissiisiˈre aleenni noo xaˈmo xaˈmanno. Mannu xissiisiˈre tenne xaˈmo xaˈmannohu olunni, kalaqote danonni, xibbunni woyi jaddotenni baxanno manni reyanno wote, mininsa diigame baˈˈanno wote woyi qarru buuto xissiisannonsa woteeti. Kuni manni togoo dano iillitannonsahu mayiraatiro afa hasiˈranno.

² Maganu qarru iillara faqqadannohu mayiraati? Maganu Yihowa duuchchanka dandaannoha, baxillaancho, hayyichchanna taashsho baxannoha ikkina, alame bunshetenninna taashshote xeˈnenni woˈmitinohu mayiraati? Ati togoori mayira ikkannoro xaˈmite egennootto?

3, 4. (a) Maganu qarru heeˈrara faqqadinohu mayiraatiro xaˈma soˈro ikkitinokkita leellishannohu maati? (b) Bunshenna qarra lainohunni Yihowara mayi macciishshamannosi?

³ Maganu qarru heeˈrara faqqadinohu mayiraati yee xaˈma soˈroteni? Mitu mannira togoo xaˈmo xaˈma ammana xeˈinonsata  woyi Magano ayirrissannokkita leellishshannoha lawannonsa. Ikkollana Qullaawa Maxaafa nabbawatto wote, ammanantinori hattono Magano waajjitanno mannooti togoo xaˈmo xaˈmitinota huwatatto. Lawishshaho masaalaanchu Imbaaqoomi Yihowa togo yee xaˈmino: “Dadillisanno coye laeemmo gede mayira assittoe? Qarru iillanna sammi yite laˈˈattohuna mayiraati? Baonna finqille albaˈyaanni noohu mayiraati? Gibbonna gaaru kaˈˈannohu mayiraati?”—Imbaaqoomi 1:3.

⁴ Ammanamino masaalaanchi Imbaaqoomi tenne xaˈmo xaˈminohura Yihowa hanqinosini? Dihanqinosi. Isinni Yihowa, Imbaaqoomi danchummatenni coyiˈrinoha konne qaale Qullaawu Maxaafi giddo borreessamanno gede assino. Qoleno Maganu, tenne hajo lainohunni Imbaaqoomira coyi roore xawe leellannosi gedenna ammanasi roore jawaattanno gede kaaˈlinosi. Yihowa ateno konni garinni kaaˈlahera hasiˈranno. Qullaawu Maxaafi, ‘Isi kiˈnera [assaawanno]’ yaannota qaagi. (1 Pheexiroosi 5:7) Maganu bunsheno ikko bunshe abbitino qarra ayee manchinni roore giwanno. (Isayyaasi 55:8, 9) Ikkina, alamete aana qarru togo batiˈrinohu mayiraati?

5. Mito wote ammaˈnote marooti qarru iillannohu mayiraati yite kultanno? Qullaawu Maxaafi kayinni mayyaanno?

⁵ Babbaxxitino ammaˈno giddo noo manni qarru togo  mayira batiˈrinoro xaˈmara ammaˈnonsa marootiwanna rosiisaanowa maranno. Ammaˈnote marootino duuchcha wote, qarru iillannohu Maganu fajjo ikkino daafiraati yite qoltannonsa; qoleno isi dadillisanno coye ikko mitte mittenta ikkito lowo diri albaanni balaxe wossanino yitanno. Batinynyu mannira, Maganu loosi xilqete yine woyi Maganu mannaho qaaqquullu nafa gatikki reyo abbannohu iima ledosi heedharaati yine kullanninsa. Ikkollana albaanni rosittonte gede, Maganu Yihowa horontanni bunshe diassanno. Qullaawu Maxaafi togo yaanno: “Bunshe assa Maganuwiinni faffo; taashsho xeˈinore assano Duuchchanka Dandaannohuwiinni xeertidho!”—Iyyoobi 34:10.

6. Mannu alamete aana noo qarrira Magano beebba bushiishannohu mayiraati?

⁶ Mannu alamete aana noo qarrira Magano beebba bushiishannohu mayiraatiro afootto? Roorenkanni mannu Duuchchanka Dandaanno Magano bushiishannohu, tenne alame gashshanni noohu iso laweennansaati. Kuni manni Qullaawu Maxaafi rosiisannoha kabbaadannokkihanna hasiisannoha mitto halaale diafino. Ati konne halaale konni maxaafira sayikki fooliishshora rosootto. Tenne alame gashshanni noohu Sheexaane Daawuloosiiti.

7, 8. (a) Alame gashshaanchise akata leellishshannohu hiittoonniiti? (b) Mannu cubbaataamo ikkasi hattono “yannanna agarroonnikki hedeweelcho” qarru heeˈranno gede assitinohu hiittoonniiti?

⁷ Qullaawu Maxaafi xawise togo yaanno: “Alame [woˈma] Sheexaanu gashshooti woroonni ikkitino.” (1 Yohaannisi 5:19) Konne coye hedatto wote, tini yaatto gara dilabbannohe? Tini alame illete leellannokkihu mittu ayyaanaamu kalaqami akata leellishshanno; isi ‘manna duuchcha soˈrisiisanni no.’ (Ajuu[j]a 12:9) Sheexaanu bunshetenni woˈminoho; dogannohonna kaajjadoho. Konni daafira isi gashshino alameno bunshetenni, dogatenninna kaajjillunni woˈmitinote. Qarru woˈminohu umi korkaati konneeti.

⁸ Layinki korkaati kayinni sayikki fooliishshora ronsummonte gede, Edenete kaashshu basera finqille jammartunkunni kayise mannu ooso guunte xeˈinorenna cubbaataamma ikkansaati.  Cubbaataammu manni duuchcha wote kuˈu koˈonne roorate sharramanno; hatti sharronsa qolte olu kaˈˈanno gede, mimmito coqqontanno gedenna qarru heeˈranno gede assitanno. (Mekibibi 4:1; 8:9) Qarru heeˈranno gede assinohu sayikki korkaati kayinni, ‘yannanna agarroonnikki hedeweelchooti.’ (Mekibibi 9:11) Yihowa agarooshshi nookki alamera mannu busha saatera busha bayichcho maransanni qarru iillansara dandaanno.

9. Yihowa qarru heeˈrara faqqadinohu ikkadu korkaati heeˈreennasiiti yineemmohu mayiraati?

⁹ Qarra abbannohu Magano ikkinokkita afanke shesho uyitannonke. Mannu aana qarra abbanno olira, jaddote hattono kuˈu koˈonne coqqonannotera, wole agurranna kalaqote danora nafa xaˈmamannohu diˈˈisooti. Hatto ikkiro, Yihowa kuni baalu qarri heeˈrara faqqadinohu mayiraati? yitanno xaˈmora dawaro afa hasiissannonke. Isi Duuchchanka Dandaannoha ikkiro, qarru iillannota hoolannoti wolqa noosi yaate. Hatto ikkina sammi yiinohu mayiraatiyya? Baxillaanchu Magani sammi yiinohu ikkadu korkaati heeˈreennasiiti.—1 Yohaannisi 4:8.

10. Sheexaanu xaˈmo kayisinohu maa lainohunniiti? Isi kisse kalaqinohu hiittoonniiti?

¹⁰ Maganu qarru heeˈrara faqqadino korkaata afate, qarru jammarino yannare badheenge assaawa hasiissannonke. Sheexaanu Addaaminna Heewani Yihowara finqiltanno gede assi wote, mitte kabbaade kisse kalaqino. Sheexaanu tenne kisse kalaqinohu Yihowa wolqa lainohunni diˈˈikkino. Isinni Sheexaanu Yihowa wolqara gawalo nookkita afino. Hatteentenni Sheexaanu, Yihowata gashshate mabte lainohunni xaˈmo kayisino. Sheexaanu, Yihowa gashshannorira dancha coye hoˈlannohonna kaphphaanchoho yee, Iso bushu gashshaanchi gede asse kassasino. (Kalaqo 3:2-5) Sheexaanu wole yaattonni mannu ooso Maganu gashshooti gobbaanni heedhuro woyyannonsa yiino. Tini Yihowa aliidimma yaano gashshate mabtesi seyaatate.

11. Yihowa Edenete finqilture hakkawotenni shiinokkihu mayiraati?

¹¹ Addaaminna Heewanino Yihowara finqiltu. Wole yaattonni insa togo yitino: ‘Yihowa Gashshaanchonke ikkara  dihasiˈneenno. Bushunna danchu maatiro ninke uminke wossaˈna dandiineemmo.’ Yihowa kissete dawaro qolinohu hiittoonniiti? Isi assaawate dandoo noonsa kalaqamira baalaho, finqilturi sodhinotanna isi gashshooti ayeewoteno woyyinoha ikkinota rosiisa dandaannohu hiittoonniiti? Mitu manni Maganu finqilaasine shee gude insa bayichcho wole kalaqiro woyyannonka yaara dandaanno. Yihowa kayinni Addaaminna Heewani sirchi uulla woˈmanno gede alaamu noosita albaanni xawisino; qoleno insa gannate ikkitino uullara heedhara hasiˈrino. (Kalaqo 1:28) Yihowa ayeewoteno alaamasi wonshanno. (Isayyaasi 55:10, 11) Hakkiinni saeno, Edenete finqilture shaa, Yihowata gashshate mabte lainohunni kaˈino xaˈmora dawaro diqoltanno.

12, 13. Yihowa, Sheexaanu tenne alame gashshaancho ikkanno gedenna mannu ooso insaneeto gashshitanno gede faqqadinohu mayiraatiro lawishshunni kuli.

¹² Hanni mitto lawishsha laˈno. Mittu rosiisaanchi kifilete rosaanora mitte kabbaade shallago loonsanni gara kulanni noo gede assite hedi. Mittu worba ikke heeˈrenni finqilu rosaanchi, rosiisaanchu shallago loosanno gari digaraho yee coyiˈri. Kuni rosaanchi rosiisaanchu loose afannokkihu gede asse, tenne shallago woyyitino doogonni looseemmo yee heewisami.  Mite rosaano rosaanchu yiinori garaho yite insano finqiltu. Xa rosiisaanchu ma assiro woyyanno? Finqiltino rosaano kifiletenni fushshe huniro, gattino rosaano mayitakka? Finqilino rosaanchinna isira kaaˈlite finqilturi halaale yitino yite diheddanno? Kifilete gattino rosaano gudisidhe rosiisaanchu koˈore fushshe huninohu soˈrosi anfannita waajjeeti yite mishshasira dandiitanno. Kayinni hanni rosiisaanchu finqilu rosaanchi tenne shallago loosate hedino gara leellishara faqqadisi yine hendo.

¹³ Yihowano lawishshu aana laˈnummo rosiisaanchi gede assino. Tini hajo laˈannori Edenete noo finqilaasine calla ikkitinokkita qaagi. Miliyoonetenni kiirranni sokkaano konne coye laˈanni no. (Iyyoobi 38:7; Daanieeli 7:10) Yihowa finqilaasinete qolanno dawaro, tenne baala sokkaanonna gedensaannino assaawate dandoo noonsa kalaqama baala laˈanno. Ikkina Yihowa ma assiyya? Sheexaanu mannu ooso gashshanno gara leellishara faqqadisi. Qoleno Yihowa mannu ooso Sheexaanu marraˈˈannansa umonsa gashshitara faqqadinsa.

14. Yihowa mannu ooso insaneeto gashshitanno gede wossanasi mayi horo uyitanno?

¹⁴ Lawishshu aana laˈnummo rosiisaanchi, finqili rosaanchinna isi garo sodhinota afino. Qoleno rosiisaanchu finqiltu rosaano shallago loossanno gara leellishshara faqqada kifilete noo rosaano baalate horo uyitannota afino. Finqilaasine hattee shallago loosa hoogguro, finqiltinokkiri wole rosaano kifilete giddo aliidiha ikke marraˈˈate dandoo noosihu rosiisaancho calla ikkinota affanno. Hakkunni gedensaanni rosiisaanchu finqiltu rosaano kifiletenni fushshe hunanno korkaati xawe leellannonsa. Hatteente gede, suwashsho wodana afidhinori mannu oosonna sokkaano baalanti Sheexaanehonna iso harunsite finqilturira injiinonsakkitanna mannu ooso insaneeto gashsha dandiitannokkita laˈuro horo afidhannota Yihowa afino. Tenne laˈˈansanni insano hundi masaalaanchi Ermiyaasi gede, aane nooha xinta ikkino halaale buuxxanno: “Yihowaˈya, manchu beetti doogo umisita ikkitinokkita seekke afoommo. Qaafosi biddi assiˈra nafa qaafanno manchita diˈˈikkitino.”—Ermiyaasi 10:23.

15, 16. (a) Yihowa qarru kageeshshita seeda yanna heeˈrara faqqadinohu mayiraati? (b) Yihowa, macca gibbanno jaddonna bunshe hoolannokkihu mayiraati?

¹⁵ Ikkina, Yihowa qarru kageeshshita seeda yanna heeˈrara faqqadinohu mayiraati? Bushu coyi ikkannota hoolannokkihuna mayiraati? Tenne buuxate, lawishshu aana laˈnummo rosiisaanchi assannokkiha lame coye laˈno. Umihunni, kuni rosiisaanchi finqilu rosaanchi shallago loosanno gara leellishanno wote mereeroho diuurrisannosi. Layinkihunni, rosiisaanchu finqilu rosaanchira hatte shallago loosa dikaaˈlannosi. Hatteente gede, Yihowa assa giwate wossaˈninoha lame coye lai. Umihunni, Yihowa Sheexaanunna isira garo ikkituri gara ikkansa leellishate woˈnaaltu wote diuurrisinonsa. Konni daafira yanna oye laˈˈa hasiissino. Kumunni kiirranni dirira, mannu ooso duuchchu daniha mannu gashshoote woˈnaaltino. Mannu ooso sayinsetenna wole doogonni mito geeshsha lophphitinoha ikkirono, taashshote xeˈne, buxima, jaddonna olu bashshonni roore lexxanni haˈrino. Mannu manna gashshe afannokkiti xabbe leeltino.

¹⁶ Layinkihunni, Sheexaanu tenne alame gashshanna Yihowa dikaaˈlinosi. Lawishshaho Maganu macca gibbanno jaddo heedhannokki gede assoommero, wole ragaanni finqilture kaaˈla diˈˈikkitanno? Mannu ooso qarru nookkiha insaneeto gashsha dandiitanno yee mannu hedanno gede diassitanno? Yihowa hatto assoommero, kaphphaanote miila ikkanno. Ikkollana “Maganu kaphpha didandaanno.”—Ibiraawuyaani 6:18 NW.

17, 18. Mannu gashshooti hattono Sheexaanu alamete gashshaancho ikkasi abbitino gawajjo baala Yihowa hiissanno?

¹⁷ Finqilaasine Maganoho finqiltuhunni jammarte iillitino gawajjo baala hiikkitannoyya? Yihowa duuchchanka dandaannoha ikkinota qaaga hasiissannonke. Konni daafira isi mannu oosora qarru abbino gawajjo baala dhaawate dandoo noosi; qoleno dhaawanno. Albaanni ronsummonte gede, uullanke gannate ikkitanno wote xa iillitinose gawajjo dhaawantanno. Cubbu  abbino gawajjo Yesuusita wodote kakkalo ammanatenni hoˈlitanno; reyo abbitino gawajjo qolte reyino manni kaˈˈanno wote dhaawantanno. Maganu Yesuusa, ‘Daawuloosi looso diigate’ horoonsiˈranno. (1 Yohaannisi 3:8, NW) Yihowa konne baala hasiissanno yannara wonshanno. Isi rahe qaafo adhinokki daafira galata hasiissannonke; korkaatuno cince yanna uyino daafira halaale afatenna isira soqqamate kaayyo afiˈnoommo. (2 Pheexiroosi 3:9, 10) Maganu hundinni jammare, halaalunni magansiˈrannosi manna seekke hasanninna tenne qarru woˈmino alame giddo iillannonsa qarra dandiite heedhanno gede kaaˈlanni keeshshino.—Yohaannisi 4:23; 1 Qorontoosi 10:13.

¹⁸ Mitu manni, Maganu Addaaminna Heewani finqiltannokki gede asse kalaqoommero kuni baalu qarri heeˈrannoni? yaara dandaanno. Tenne xaˈmora dawaro afiˈrate, Yihowa uyinoheta mitte muxxete elto qaaga hasiissannohe.

19. Yihowa uyinonketi muxxete elto maati? Tenne elto kaffi asse laˈˈa hasiissannonkehu mayiraati?

¹⁹ Fooliishsho ontete ronsummonte gede, mannu ooso baxisinonsare doodhate mabte uyineenna kalaqantino. Tini elto mageeshshi geeshsha muxxe ikkitinoro wodanchootto? Maganu batinynye saada kalaqino; tini saada baala heedhannohu garri-garimmo laˈe diˈˈikkino. (Lawishsha 30:24) Mannu ooso, uyinoonnise hajajo harunsite loossanno rooboote woyi maashine loossino. Maganu ninkeno hatto asse kalaqoommenkero baxisannonke? Dibaxisannonke. Hiittoo manna ikkineemmoro, hiittoo heeshsho heeˈneemmoro, hiittoo manni ledo jaalooˈma hasiˈneemmoronna w.k.l doodhate mabte noonke daafira  tashshi yaannonke. Ninke mannu ooso quwa saˈinokkiti doodhate mabte heedhankera hasiˈneemmo; Maganuno togoo mabte heedhankera hasiˈranno.

20, 21. Doodhate mabtenke duuchchunkunni woyyino garinni horoonsiˈra dandiineemmohu hiittoonniiti? Hatto assa hasiissannonkehuna mayiraati?

²⁰ Yihowa giddeessineennanke soqqammammosira dihasiˈranno. (2 Qorontoosi 9:7) Lawishshaho, mittu qaaqqi yii yineenna baxeemmohe yiironna, umisinni kae baxeemmohe yiiro annasi woyi amasi roore hagiirsiisannohu hiikkonneeti? Konni daafira, Yihowa uyinoheta doodhate mabte horoonsiˈrattohu hiittoonniiti? yitanno xaˈmo xaˈma hasiissannote. Sheexaanu, hattono Addaaminna Heewani doodhate mabtensa horo bushu garinni horoonsidhino. Insa Yihowa effidhe gibbino. Atina?

²¹ Xaggete elto ikkitinota doodhate mabtekki duuchchunkunni woyyino garinni horoonsiˈratto kaayyo noohe. Yihowara kaaˈlite uurritinorira miliyoonetenni kiirranni mannira miila ikka dandaatto. Kuri mannooti Sheexaanu kaphphaanchonna danchu garinni gashsha dandaannokkiha ikkinota heeshshonsanni leellishshino daafira Maganu wodana tashshi assitino. (Lawishsha 27:11) Atino gara ikkitino heeshsho heeˈratenni insa gede assa dandaatto. Tenne lainohunni aantanno fooliishshora ronseemmo.